|
|
 قصيدة جديدة - بلداً مجبوكة فوق تحت - بقلم أحمد يوسف حمد النيل
|
بلداً مجوبكة فوق تحت
خطابك يا رئيس انذاع
هو زي ريحة الأكل في الجوع
لا موجود و لا مبلوع
ترانا صبرنا صبر أيوب
كلامك في المعاجم غاب
و عند أهل اللغات "وقواق"
نقول : "بو – واو" ؟
نقول : "فو –فو" ؟
نقول : " يو – هي – هو" ؟
عديل احتار معاك "جوهان"
وقت ماك بتراعي شعور
أهل بلداً عزيز موجوع
كان ترحم وليداتنا
و حشا الأمات
ياتو كلام دا يا ريّس؟
دا لا في الطير و لا الباقير
أظن سحبوهو من ايديك
و كتبولك لغات ال "تا – تا" و ال "دينغ – دونغ"
و كتبولك حروف جابوها من بلاد الجن
هوالمكتوب دا يا ريسنا اسمو كلام؟
و نامن كل بنات الحلة مصدومات
و بعد الليلة هن حالفات
لا ما يكتبن
لا تعبير و لا مقالات
عريسن فجتو الوجعة
و كان بحلم يفرِّح أمه و الجارات
و بس لمتين يسكنو الجوع
من الاحباط حلف
لا يجر ملود لا ايد
و قام نفض العريريقي المهيرت تب
و قال : ههه ها
ضحكة زول يمين موجوع
بس لابس العفاف و العز
و كيف أطفالنا يتربو؟
و يصدقوا في الكلام و القول
و من يوم قامو في دا الحال
خطابك يا رئيس صاقعة
و كل شجر البلد حرقان
وليدات ما بعرفو الانشاء و التعبير
تركوا المدارس كلهن
عشان المعزة ما تقول : "ميغ"
و ما يسمع "جعير" البقر بالليل
و ما هماهو لو يأكل عيش عاول
ولا يموت من الاسهال
و قامو اتسحبو الأولاد
و لا دخل الفرح في بيت
و صبحن كل جرائد البلد بايرات
يقولو شنو للأجداد و للجدات؟
حروف شترا
و جُمل ممطوطة مكشوطة
خطابك جانا من غادي
لا لحماً نزل في السوق
و لا عيشاً رقد واطا
تقول من سوق عكاظ مجلوب
و اظن الفرحة ما بتحوق
على بلداً مجوبكه فوق تحت
مجبوده و منصلة من مروق الدنيا
منسوجة من خيوط العنكبوت
و سكنت فيها أسراب الدواب و الهيم
و كل ما نقول شرق أملك
تجينا خرافة و ألفين رأي
تجينا الفرحة شايلة كفن
و نيلك يا بلد ناكوسي
ختا راسو صعيد
دحين أحسن نحش بلداتنا
و نتوكل على القبلي الشلع بالليل
|
|
  
|
|
|
|
أحمد يوسف حمد النيل
فيس بوك
تويتر
انستقرام
يوتيوب
بنتيريست