|
|
 بس لو قدرتا اعرف/شوقي بدرى
|
طيب حضرنا مسرحية الحكم بالاعدام غيابيا علي الابطال عقار وعرمان. وطبعا ما قطعنا تذاكر والحمد لله ، لان التمثيلية بايخة جدا . كان مفروض تكون دراما وطلعت مهزلة . لكن بس عاوز اعرف اخونا الحلو بارك الله في حله وترحاله ، طنشوه ليه . ولماذا يحرمونه من هذا الشرف . هل حقدهم عليه فاق حقدهم علي الآخرين وقرروا حرمانه .
وبس لو اقدر اعرف غندور ده لسة بتكلم مع الاموات . ياخي حكومتك حكمت بالاعدام علي مفاوضينك . يعني شرطوا ليك الورق . لسه بتصرح بي جِضومك الذي حجر المسن في شنو ؟؟ ودي حكومة شنو تعدم وتفاوض . زمان سوداني شرب في عجمان ، قطع الشارع دخل الشارقة البوليس قبضوا . سجنوا وجلدوا وحكم علية بالتسفير قال للقاضي دي بلد شنو ؟؟ شيخ يسكر وشيخ يسفر .
بس لو قدرتا اعرف ، امام الانصار في خطبة الجمعة هدد حسين خوجلي واضاف اليهم السفهاء واظن في سره قال و الضالين والبسفوا الصعوط . لان المهدية قد حرمته وكان يسجن ويجلد ويصادر مال مالكه . طيب ده والصادق خارج السلطة وبعد لما الصادق يرجع ويحكمنا ، الامام ده حيقول شنو ؟ زمان ود الاغا صاحب المقهي الاشهر في امدرمان . قال لزبون اطلق بصقة ضخمة في وسط القهوة . وعندما وجد الاحتجاج قال ، مالو . والرد من ود الاغا كان ,, يعني انت تبزق كده واخوك ده يبزق كده ويجي واحد تاني يبزق كده ، انحنا نعوم ؟؟ وبعدين الامام ده ما سمع كرتي شتم الصادق باسوأ مايقال عن الرجل في السودان . وهي وصفه بانه سجمان . ولا عشان حسين ده ما بضرب روسية. و خطب الجمعة بتدعو للسماحة والبر والتلطف بالآخرين .
وبس لو قدرتا اعرف ، لمن النظام ده يقع ويقدم الكيزان للمحاكمات ، هل سيقول الصادق ديل جلدنا وما بنجر فيه الشوك ؟ واذا قدم ابنه الي المحاكمة لانه في موقع دستوري ،وهو شريك في القتل والنهب والاغتصاب وتصفية الابرياء في الجامعة وفي الشوارع ، لانه علي رأس النظام . هل سيحميه الصادق بمليشيات الانصار ، الانصار الاسي بيموتوا في كردفان ودارفور والنيل الازرق والبحر الكان ابيض وبقي احمر ، وكل السودان ؟؟
بس لو قدرتا اعرف ، الترابي ده مجلد وشه بي جلد شنو ؟ ما بخجل بعد كلام الغرباوية وغرودة الغازية ، والطلب من البشير يبقي شجاع ويمشي الجنائية . ده كلوا ، كيف الترابي قدر يتناساه . وبدون خجل يمشي يحضن البشير . وبكل لتاخة يضحك ويشرب وياكل ، تاكل الحمترمت . الناس دي كانت غايبة طوالي في حصة الخجل والحياء واحترام الذات . انعل ابو السلطة البتهين الناس قدر دة .
بس لوقدرتا اعرف ، هل الترابي والصادق مابيفكروا انهم دلوكت عايشين بعقلية الضرة . وكل واحد بيقدم اكتر ويتقرب اكتر الي البشير . وكيف الصادق قدر ينسي البهدلة البهدلها ليه الترابي ؟؟ هل في دروس عصر لتحمل الاهانة والعصر ؟؟
بس لو قدرتا اعرف ، الترابي بعد ما السلطة ادتو قفاها ماقال الماتوا في الجنوب ديل فطايس . طيب الفطسم منوا ؟ ما انتا يا وكيل ابليس الحصري في كوكب الارض . طيب لمن الترابي يرجع السلطة حيعملهم شهداء من جديد ويفك تسجيل بنات الحور ؟ وهل سيرجع برنامج ساحات الفداء ؟ ولا حيتغير السناريو . والامهات العرسوا لي اولادهم عرس الشهيد وطلبوا منهم يزغردوا. لو طالبوا بيحقهم وجريمة تفطيس ابنائهم الاصطادوهم في الاسواق ومواقف البصات . والقرضاوي الجابوه الخرطوم وافتي بصحة عرس الشهيد ، حيرجع تاني ؟؟ ولا هو ذاتوا بقي في تولا . والاخوان يبحثون عن اجحار .
بس لو قدرت اعرف ، زمات لمن ناصر ادي الاخوان علقة، الاخوان انكبوا علي السودان وعملوا مكتبات ومحلات سندوتشات ذي خيرات في المحطة الوسطي . هل حيجوا كابين علي السودان؟ وهم دلوكت عندهو اكبر الشركات . وهل استقبالهم ده مش حيزعل السعودية والامارات والكويت ؟ وتجو بعدين تقولو انحنا مستهدفين ومحسودين لاننا بندعوا لشرع الله . الكلام ده كنتو بتقولوه عن امريكا الكافره واسرائيل الحاقدة . حتقولوا الكلام ده عن ارض الحرمين الطاهرة ولا حترجعوا لي يهود يهود آل سعود ؟ هل حيكفروا اهل السعودية ، ويقولوا ليهم انتو ما مسلمين ولا بتعرفوا الاسلام . ولا حتعرفوا احسن من الخروف ؟ بلة تؤم الروح طيب الله ثراه كان عندما يتعب من اقناعي ، يحكي لي عن الراعي الذي كان يطلب من ابنه ان يلبس الفروه علشان البرد والولد بيلبس الفروة والصوف بي جوة ويغالط ابوه الذي يلبس الفروة والصوف لي بره . ويقول الراعي لولده . يعني انت حتعرف احسن من الخروف ؟؟
ع . س . شوقي
|
|
  
|
|
|
|
شوقي بدرى
فيس بوك
تويتر
انستقرام
يوتيوب
بنتيريست