قال لي صديقي السوداني (عكلتة) ، ياخي التاريخ العاطفي القديم كلو كضب في كضب ، زمان في عصر الجاهلية في الصحراء العربية قالو انو جميل بثينة كان بحب بثينة وبخلص ليها إلى درجة انو سقط اسم ابوه ذاتو وسمى نفسو جميل بثينة لكن الكلام ده كضب في كضب دا كلام ساكت! ياخي انتا ما سمعت شعر جميل البقول فيهو: يقولون جاهد يا جميل بغزوة وأي جهاد غيرهن أريد! لكل حديــث بينهــن بشــاشة وكل قتيل عندهن شهيد!! يعني جميل ما كان بحب بثينة براها ولا حاجة، جميل كان بحب بنات حلة بثينة كلهم بما في ذلك صديقاتها واخواتها وعماتها وخالاتها وجارياتها وهلم جرا ..... !!!!! لاكين على الطلاق حب السودانيين لبنات حوا فات حب عرب الجاهلية بي هناك ياخي انتا ما سمعتا مكتول البنات السوداني القديم قال شنو في العصر الجاهلي السوداني الأول؟! قتا ليهو : دا كمان كان منو وقال شنو؟! قال لي : الزول الكلس الاسمو مكتول البنات السوداني قال (ونسة الضكير للضكير ، منها النوم أخير)!! يعني الراجل دا داير يسمع كلام نسوان وبس وما داير يسمع صوت أي راجل !!! تقول لي جميل بتاع الجاهلية العربية قال : لكل حديث بينهن بشاشة !! بشاشة بتاعت فنيلتو!!!! استطرد عكلتة قائلاً: للفنان اللبناني فارس كرم أغنية نسونجية جريئة عنوانها (نسونجي!!) تقول كلماتها عم تطلع بالنسوان شو بدك منن قلي؟! لك والله اللي ما يحب النسوان الله يبعتله علي! عم تطلع بالنسوان شو بدك منن قلي قلي مين بيسترجي يبعد عن حوا درجي ؟؟! انا شخصيا نسونجي ...نسونجي نسونجي!! بقولا وبصوتي بعلي...بعلي بعلي قلي مين بيسترجي يبعد عن حوا درجي ؟؟! انا شخصيا نسونجي ...نسونجي نسونجي!! بقولا وبصوتي بعلي...بعلي بعلي لك والله اللي ما يحب النسوان الله يبعتله علي!!! شرع عكلتة في تفسير هذه الاغنية اللبنانية النسونجية فقال: قلي مين بيسترجي يبعد عن حوا درجي (يبعد عن حوا درجي) معناها ياتو راجل بيقدر يبعد عن حوا درجة واحدة أي سنتمتر واحد!! لك والله اللي ما يحب النسوان الله يبعتله علي : (يبعتله علي) معناها الما بحب النسوان الله يرسل له علة أي مرض يخمو ويوديهو في ستين الف داهية!! استطرد عكلتة قائلاً : لاكين على الطلاق حب السودانيين للنسوان فات حب اللبنانين للنسوان بي هناك ، زمان في العصر الحجري السوداني الأول، وعندما كنا مجرد شفع صغار كنا نجري في شوارع مدينة كوستي ونحن نردد نشيدنا الوطني المفضل بأعلى صوت غير آبهين بأي زول كبير: ماك خابرنا ماك حارينا ماك دارينا !! الما بدور البنات في درب الله ما يبارينا!!! يعني الما بحب البنات ما يمشي معانا في شارع واحد ، اها في رجالة وحب للبنات اكتر من كده ؟! أها في تطرف في حب البنات اكتر من كده؟! قلت لعكلتة اضحكتنا يا رجل فقال وهو يبتسم قبال ما افوتك بخير ، هاك الحكاية الاخيرة دي : زمان كان في واحد صاحبنا كده وكان بتاع شربة وكده ، مرة صاحبنا مشى بالليل لابوه في الدكان وهو مولع وقعد يهظر معاهو (ابوه كان متزوج تلاتة نسوان) ، الولد المشوطن قال لابوه والله يا بوي انا بحترمك جداً جداً لأنك انتا بتحب النسوان وانا لو الله قدرتني حاتزوج اربعة نسوان واخلي حبي للنسوان يفوت حبك للنسوان بي هناك وانتهت الحكاية عند هذا الحد ، بعد يومين الاخو الكبير قابل صاحبنا وقاليهو : يا خي ابوي دا ما تخليهو في حالو ، امبارح ابوي جاني هنا زعلان وقال لي الولد قليل الادب دا جاني امبارح في الدكان وكان سكران وقال لي (انتا بتاع نسوان) ! لاحظ التحريف من عبارة (انتا بتحب النسوان) لى (انتا بتاع نسوان)!! وقد لا يكون هناك فرق بين العبارتين إلا عند ذوي الغرض والمرض والله أعلم!! قلت لعكلتة محاولاً تقديم دفاع قانوني عام لمواجهة أي اتهام كيدي نسائي خاص: على العموم يا عكلتة حب الرجال السودانيين للنسوان والبنات ما فيهو حاجة كلو كلو فالمقصود بالنسوان والبنات هو الحبوبات الكبيرات والزوجات المصونات والاخوات العزيزات والبنات الفالحات والله أعلم ، قال عكلتة ضاحكاَ: انتا نسيت وطالبات الثانويات وطالبات الجامعات ورصة البنات في الحفلات وستات الشاي في الطرقات وهلم جرا !!!! ياخي اقول ليك قول : ياخي الما بحب النسوان يلم فيهو فيروس زيكا ويخلي راسو اصغر من النبكة!! فيصل الدابي /المحامي
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
فيصل الدابي المحامي
فيس بوك
تويتر
انستقرام
يوتيوب
بنتيريست