|
|
 العِيشة في البلد السّجَمْ قصيدة جديدة / للشاعر أحمد يوسف حمد النيل
|
العِيشة في البلد السّجَمْ
قصيدة جديدة / للشاعر أحمد يوسف حمد النيل
مالو الوليد يا بت بِضِج؟
طردوه في شان الرسوم
و انت بتكابد كل يوم
حق الملاح و لا الهدوم
وين الكتاب سجم الرماد
سجم أمك الراجياك سنين
سجم البلد كان راجيه منك و من وراك
دايرين كتاب
دايرين هدوم
و الجزمة ديك غلبها الحِمل
ما بتتلبس .. كيف تتلبس؟!
ما الجزمة و الليفة المدلدلة
من حُبال العنقريب يا هن سوا
يا ولدي ما تجيب لي ضغط!!
و سرحت فيكم كلكم
حتى الوليد الما دخل سور المدارس و الرياض
دايرين لِبس .. دايرين كتاب .. دايرين قلم
و العِيشة تب ابت الدرب
زي الحمار التب حرن
لمن ظهر دابي الشقوق
هي العِيشة بس وقفت أبت؟
ما الدنيا كاملة اتعطلت
العنبلوق ,, و الدردقو
الشطة ,, شوال الملح
كيس الرغيف ,, قفة خضار
اتشتتن في الشارع الوراني
جنب شجر الحراز
و لا الغنم راعيها ضاق
ترك البلد من الدغيش
قصد البنادر و المدن
دايرلو سبوبة و يعيش
داير يعيش زي الوليدات النُضاف
و بعدين معاك ات يا ولد!!
شن التعب؟ و شن فراقك حلتك؟
ماك الوليد الترعى حكام البلد
شمس الظهر سلخت قفاك
و الزيك أولاد الحكومة الما خمج
عربية لون .. و سواقها لون
و الشنطة و البوت و العطور
دخل الفصل ,, بارد خلاص
لا زيفة بجيبها المطر
لا رمضاء لا شوك لا غبار
و انت يا ود السجم
يا البقولو لك ود الغفير
وين المدير و الباشمفتش و الغفير
وينو القطر مشهادو في السكة الحديد؟
وين المحطة الفيها سواق القطر؟
شجر النيق , مطارق الحنة و البان الطويل؟
باعوها كلها للفرن؟
و الله يا بلد السجم راجيك حزن
ولداً يكفكف دمعتك
قال ناوي يا ناس السفر
بلداً زهورها الحسكنيت
شجر اللعوت القام بروث
شبّع الأطفال لبن
و اماتنا من جنس الكلام الما اتسمع
طرشن خلاص
ولداً بساسق في الخريف
السمسم يا ولد اتحرق
و الفول بعد ضريتو سفيت التراب
و المايلو , ود أحمد , و طابت , و الدبر
يا اما تدفع للحكومة عشان ضرايبك ما تزيد
أو السجن و الدين يزيد
ما تاكلو يا الناس الرغيف!
وين الرغيف؟
خمسين جرام بتكفي يا ولد السجم؟
أنا و البنات ألفين جرام
يعني ستة آلاف قبل ما تشرق شمس
من وين دحين أجيب جرامات الرغيف؟
و الله يا بلد السجم زمناً غريب
بيتنا البنيناهو في ضهير الترعة
ما أظن بعيد
الموية من تال الشمال
و الموية من تال الجنوب
و النيل بقالنا هناك شرق
و انت يا تدفع ضريبة الموية , يا حقك سجن
و شن الفايدة يا سجم السجم
العيش حِرق , و الفول حِرق من العطش
و الموية في قفا البيت المسور بالتراب
ما بينا بين النيل و قيفة النيل شجر
حامينا منه طابور الوزير
قصر الرئيس
و جبخانة الجيش السجم
مليانة قفتك يا سجم
و انت ولدوك فوق ضهر التُرع
و بقيت مدير ,, وبقيت وزير ,, و بقيت رئيس
و الله يا سجم السجم , الشَكْرة ما تابعاك تب
ود الغفير ما لاقي عيش!
ود الوزير راكب "هامر"
ود الغفير راجيهو دين
من قام صغير , كتبولو في الدفتر ديون
حق الداية , و الشفخانة , و المستشفى , دمور الكفن
جهِّز حسابك أيام حسابك قرّبن
ود الوزير بعرف يوقع اسمو
في دفتر حساب
دخل الرصيد
سحب الرصيد
و حسابو كله اكتروني
من قام صغير كتبولو في ورقة رقم حساب
تسحب عديل من كل فرع
شرق الدنيا غرب الدنيا ما هماك حد
جهّز حسابك يا ولد أيام حسابك قربن
ود الغفير ما لقالو جنبة ينوم عليها من التعب
مرة راميهو الحمار
و مرة دقاه المدرس في الغياب
غيابو زاد , عشان يوماتي بنطرد الوليد
بقى اسمه دايماً يندهو
حق الرسوم , و لا الحبر و لا الجِلاد
حق الهدوم , و لا الأكل , و لا العلاج
و ات يا سجم السجم أبوك قرا ؟
و الله لا
و عشوشة أمك دي بتكب حرف؟!
و الله لا
روح يا سجم , أمسك ملود
جز الحمير , أشتل بصل
سيبك خلاص من ناظر السجم البيطرد فيك يود
سيبك خلاص من قراية الدق
و صورة الشلهته المكتوبة ليك فوق الجبين
نوم يا ولد انت حاشاك ما سجم
و أبوك و أمك ما سجم
بس انت مولود في بلاد موجوعة تب
لا قادرة تطاول تقيف
لا قادرة تسند ليك ضهر
و بكره يا ولدي العوض بجيبو الله من غير حساب
|
|
  
|
|
|
|
أحمد يوسف حمد النيل
فيس بوك
تويتر
انستقرام
يوتيوب
بنتيريست