|
|
 الحوار المستدير إلى روح شاعر الشعب العظيم: محجوب شريف
|
(إلى الذين يقرأون كلماتي ويعرفون انتمائي أقول: إنني حفي أيما حفاوة بالشاعر الكبير محجوب شريف عليه رحمة الله لأنه شاعر الشعب السوداني العظيم بلا منازع. ولأنني مؤمن بأن الرهان لابد أن يكون على الشباب المصادم المقدام من كل الأحزاب والفصائل الذين سقط من بينهم الشهداء والجرحى، وما زالوا قابضين على جمر القضية)
مائدة مستديره ؟!
يا محجوب حليلك
لسع بينا صوتك
يهتف للحزانى
بالنبره الجهيره
يوم وصيت شبابنا
في قلب المسيره
وما خليت بناتك
ناس عزه ومهيره
يا البشرت شعبك
بالقيم الكبيره
لما كتبت تشرح
في آخر قصيده
إنو بلدنا أعظم
وكل الدنيا غيره
درتنا نبقى عشره
وما نفرط في خيره
ولما معاك مرقنا
ورشرشت المطيره
ظهرو الفرقونا
قالو الحل في إيدنا
مائده مستديره!!
********
يا محجوب حليلك
يا ريت شافو غيره
مين اتلمو ليها
أم حمد البصيره
والساسه التجقلب
بالرؤيه الفطيره
ما قدرت تباصر
حالتنا العسيره
والوطن المجرح
هو الحيطه القصيره
ديل القسموهو
لبسو الدم حريره
ديل البشتنوهو
وين قطن الجزيره
وين سكة حديدو
المبسوط غفيره
وين زخم النقابه
يوم كانت تكاتل
وكل إداره ظالمه
يتراجف مديره
*********
يا محجوب حليلك
ربع القرن ولى
وشعبك في الهجيره
والناس الغلابه
ما عرفت مصيره
الدولار يهابش
دولتنا الفقيره
الأسعار تولع
تحرقنا بسعيره
الكسره الطماطم
العيشه الصغيره
وصحن الفول مصلح
ما يشبعلو طيره
والحرب المدور
غلب صولا ومشيره
وآمات القضايا
ما عارفين نديره
وكل أمورنا جاطت
والأحوال خطيره
ويات من دوله شمتت
وزُعَمَاك لعبو قيره
يا محجوب حليلك
لسع بينا صوتك
يهتف للحزانى
بالنبره الجهيره
*******
مائده مستديره؟!
يا ريت شافو غيره
يا محجوب حليلك
إنت الكنت عارف
شعبنا ما هو هين
بلد بالعز جديره
إنت الكنت تحلم
مهما ليله طول
الحرية ترجع
وما حتكون أسيره
ربع القرن ولى
وديل قايلين شبابنا
البفديك بروحو
الطالعين مواكب
زي موج الدميره
الزافين شهيدن
كأنو عريس في سيره
غاية مبتغاهم
وممكن تحتويهم
مائده مستديره
******
يا محجوب حليلك
نحنا خلاص مرقنا
ما بنقدر نساوم
عهدنا ليك... نقاوم
نهدر في المسيره
يا حادي المواكب
يا العلمت شعبك
وطنك قدرو عالي
بلدك هي الأميره
مي في راسنا تاجك
ومريم هي الضريره
وحمّيد الصغيّر
يكبر في دروبك
وتاني يعلي صوتك
بالنبرة الجهيره
ونحنا معاكا نهتف
نهتف لي وطنا
البي إسمو ياما
غنينا ورطنا
يا محجوب حليلك
يا محجوب حليلك
|
|
 
|
|
|
|
عبدالله محمد سليمان
فيس بوك
تويتر
انستقرام
يوتيوب
بنتيريست