كتب الكاتب الفاتح جبرا المتوفرة بمعرض الدوحة
|
مســــطـول.....فــوق العــــادة
|
دكينا الحصة التالتة....... كنا في الاول ثانوي...... الجماعة قالو لي هاك جرب....والله تاني ما تخليها...... نفس نفسين.... تلاتة انفاس.... سيجارة سيجارتين تلاتة سجارات.....اتخدرت من راسي لكرعي...... اتلخبط فوق تحت... فجأة بقت اشوف الجماعة المعاي... كل واحد اشوف نصو التحت.... نصو الفوق مافي....ما في عديل كدي.... يعني شايف من الكرعين لحدي نص البطن.... تاني لفوق فراغ....... نحن راجعين قلت لهم يا اخونا انا اكون نسيت نص عيوني الفوق محل ما كنا قاعدين؟.....وكل عين حسي شغالة بالنص التحت بتاعها؟...... الجماعة مافي زول ردا علي... كل واحد فيهم سارح في بلد.... مشيت كداري... لحدي البيت... خليت المدرسة.... ارجع اسوي شنو في المدرسة وانا عيوني انصاص؟...... دخلت البيت قابلتني امي... اشوف امي نصها الفوق بس.. والنص التحت مافي... انا اخوك انت... النص التحت حق عيوني اتعطل...لكن الفوق اتصلح؟ ... جا ابوي داخل....ما اشوف الا نصو التحت.... لابس بنطلون و جزمة باتا ايوا.. اعيوني بشوفن نص الرجال التحت ونص النسوان الفوق... ابوي قعد جنب امي في عنقريب واحد...وانا مقابلهم في عنقريب..... نصها الفوق وااضح...ونصو التحت واضح......عاينت لهم كدا وقلت يا ولد يا سجيمان.....شوف القدامك دا شخص واحد... يا اما امك يا اما ابوك.... طيب ابوي لا... الوشي وش امي.... خلاص دي امك....لكن امي دي اللبسها بنطلون ابوي والباتا حقتو شنو؟....... طيب نقول لبستو عاين الكرعين وين وباقي الجسم وين..... امي دي تكون اتمطت؟... قدر ما حاولت اركب النصين ديل علي بعضهن ما قدرت وما وصلت لنتيجة......قبلت علي امي وسألتها..... يمة انتي نصك التحت وينو؟..... عاينت وقالت لي يا ولد نصك للكلاب....نسال ابوي يمكن يجاوب... يابا نصك الفوق وينو؟.... قال لها ام سجيمان عوضك علي الله ... ولدك ركب الظلط....امي سكلت وصرخت ونسوان الجيران جن...... واترصن جنب امي في عنقريب واحد مقابلني... اربعة انصاص نسوان قدامي.... وانا اموت من الضحك واضحك واضحك....يمة مالكن عاملت كدا زي المزيرة؟......ودوني المستشفى...قايدني اتنين... نص ابوي التحت بجهة ونص واحد تاني برضو التحت بالجهة التانية...وامي مسكينة مبارينا بنصها الفوق.... غسيل معدة...وطراش...وحقن...ودربات..... يا الله ويا امين حتين العصر كدي...... فتحت عيوني... والحمد لله لقيت كل زول نصو رجع لو......
|
|
|
|
|
|
|
|
Re: مســــطـول.....فــوق العــــادة (Re: HOPELESS)
|
لوووووووووووووووووووووووووووول ...الله يستر ما تكون هسع بتشوف انصاص البوستات ..طبعا يا سجيمان طرحت موضوع خطير بشكل فكاهي ...لذيذ...و تعرف مرحلة الثانويات مرحلة خطيرة الواحد بيكون مخو خفيف ... اتذكرت بقصتك قصة حصلت لي صديق عزيز قرب يلصق و يلحق امات طه بي سببا ....و برضو قال انو يوم مشي مع اصحابو في الشمالية جنب النيل و سطلو ليك سطلة قوية ...قال رجع البيت امو شافتو داخل قالت ليه الله جابك يا ولدي الازيار فاضيات عليك الله املاهن ... شال الجردل الاول و جا ماشي قداما هي قاعدة في الحوش ..فاتخيل انو مشيتو ما تمام بتاثير السطلة ..قام غير مشيتو ...الجردل التاني برضو غير المشية زيادة ....التالت امو قالت ليهو شجم خشمي مالك مشيك زي مشي البنات ....تكعوج في كرعيك ...؟؟؟قال طوالي رميت الجردل و مرقت من البيت ما رجعت لما فكت .... المهم اتمني انو كلنا نتبهم للشباب في الفترة دي لانها اخطر فترة سنية ...
| |
|
|
|
|
|
|
Re: مســــطـول.....فــوق العــــادة (Re: سجيمان)
|
المسطوووووول سجي
طبعا اكيييد ماشايف نص اسمك الباقي
الوداك تجرب شنو .... ما عارف الفضول جاب خبر الكديسه
اها النحكي ليك دي حصل بالجد ايام كنا ممتحنين للشهاده السودانيه وكنا داخلين امتحان الرياضيات وعندنا واحد زميلنا شااااطر جدا زول لا عندو شغله بالحاجات دي ولا شغله طبعا جينا قبل بدايه الامتحان ممكن بساعه عشان نراجع مع بعض وكدا.. المهم اخونا كان براجع مع شله قاعدين في طرف المدرسه بعييييد .. ومعاهم واحد طلع ليهم سجاره ملفوفه جاهزه -يا شباب خلونا نشرب السجاره دي عشان الرياضيات دي محتاجه تنظير شديد اها الجماعه قاعدين والسجاره حايمه زولك .. في وسطهم قاعد -يازول شد ليك نفس عشان تزيد العلم دا وتنظر صاااح المهم زولك سمع كلامهم ومسك السجاره نفس نفسين تلاته اربعه =كو كو كو جرس الامتحان دقه= اها صوت الجرس دا زي الدقوهو في ناقوس الزول دا شبك لك معي الجر س كو كو كو وهو ماسك راسو وجاري لافي في المدرسه ... كو ... كو... كو
بقينه في المقابضه امسك امسك قبضناهو .. كتف كتف كتفناهو نادوا الحكيم انقلوا الزول المستشفي مشو ودوهو .. وطبعا نحن مافي طريقه غير نخش الامتحان مزهللين
زولك المهم اتعالج يومو داك بس النتيجه ضيع سنتو ديك كلها وبقت ليهو درس منها
والحمد لله جات سليمه
| |
|
|
|
|
|
|
Re: مســــطـول.....فــوق العــــادة (Re: alfatih)
|
سجيمان أنتفلسف ليك شوية في المعني بتاع ( عادي فوق السطلة )
مسطول فوق العادة ، معناها متعود على السطلة ، بس يومتا كانت السطلة رابطة بي ( ملبوكة سوبر ) و بقت فوق العادة المتعود عليها عادة.
عادي فوق السطلة ( معناتا إنو مستجد على الشغلة ) عشان كدي الفيوزات ضربت.
عندنا واحد يا سجيمان متعود يدخن سيجارة ملفوفة صاح و هو متغطي ببطانية أو ملاية حسب الجو ، و بعد ما يخلصا يجدعا و يغطي بقية جسمو و ينوم. يوم و هو بيدخن ، سمع ليهو ضربة شديدة برة البيت ، قام إتخلع ، غطى السيجارة و نط هو من العنقريب. أها دي خلعة فوق السطلة.
| |
|
|
|
|
|
|
Re: مســــطـول.....فــوق العــــادة (Re: سجيمان)
|
هههههههههههههههههههههههه بالغته يا مسطول بقول ليك شنو يا سجيمان جربت قبل كدة ابو ستة كروت؟؟؟؟ ما بنصحك
ذكرتني مرة زمان قبل البعاد عنها زرعنا حبها في مجري الحمام (بلا مؤاخزة)بتاع الداخلية عشان تلحقنا قبل امتحان الرياضيات بتاع اولي
ولكن لو شفت عملت فينا شنو ماعارف ليه..... اظنو عشان مروية بمويت الحمام قبلها الرياضيات كانت نص نص لكن بعدها راحت خالص
___________ متي استعبدتم الناس و قد ولدتهم امهاتهم احرارا
| |
|
|
|
|
|
|
Re: مســــطـول.....فــوق العــــادة (Re: سجيمان)
|
هاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاها كروت ديجتال اهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاها
| |
|
|
|
|
|
|
Re: مســــطـول.....فــوق العــــادة (Re: HOPELESS)
|
يا هوبليس..... تماسيح وابو القدح وقرنتي... وبردة.....وكل انواع الحيوانات البحرية من ذوات الثدي...ومن غير ثدي...... عليك الله امش شوف البوست بتاع بكري بتاع فصل اخونا دافي........تشوف العجب والصيام في رجب
| |
|
|
|
|
|
|
Re: مســــطـول.....فــوق العــــادة (Re: Ahmed satoor)
|
تعرف يا سجيمان مرة واحد وقفوه فى كبرى الحرية ،ولقو عندو قندول يتلتل ، أصرو عليهو العساكر إنو لازم يوديهم المحل اللى إشترى منو ،
قال ليهم يا جماعة المشوار بعيد قالو ليهو بنزين حكومة ما يهمك قعد إنجعص فى العربية وقال ليهم أها جاهزين ايوة جاهزين قال ليهم - جوبا
| |
|
|
|
|
|
|
|