|
|
 (العكلته) و(القطامه)!!! تاج السر حسن
|
--------------------------------------------------------------------------------
(العكليت) هو نموذج لنوع من الناس مهما كان ضعيف البنيه لكن، (الله يقول بى قولك كان دخلت معاهو فى (شبكه) كما قلت الروب ما بخليك).
هو فى الغالب زول حقانى وما برضى الحقارة ، (تدقو) تحسب نفسك قضيت عليه، لكنه سرعان ما يتنفط ويجيك تانى، و(العكليت) جنو وجن واحد يقيف مع واحد ظالم وحقار ، برضو بتعكلت فيهو وبندمو على فعلتو الشينه.
فى ملاعب كرة القدم هناك لاعبين كانوا مشهورين (بالعكلته) مثلا (محسن العطا) فى المريخ ، و(ابراهيم يحى الكوارتى) فى الهلال ، و(عبده مصطفى) ، و(شواطين) الذى كره (بيليه) الكوره لمن قالو ليه امسك (بيليه) وما تفرط فيهو، حتى لمن بيليه مشى يشرب مويه برضو كان واقف جنبو وعينو جوه المويه ، قيل ان (بيليه) لمن خرج من الملعب (شواطين) وصلو لحدى خط التماس، وكاد ان يخرج معه لحدى ما (بيليه) قال ليهو good by my wife.
لا أدرى لماذا تذكرت هذين النوذجين (العكليت والقطيم).
أما القطامه فخير من يمثلها هذه الايام أهلنا (الرباطاب).
قالوا واحد طالب ليهو واحد قروش وما قدر يحصل على قروشو ، قامو وصفو ليهو واحد (عكليت) قالو ليهو ده كان ما جاب ليك قروشك ، تانى ما فى زول بجيبها ليك.
أها صاحبنا مشى (للعكليت) قال ليهو أنا طالب فلان داك مليون جنيه وكان جبتها ليك 100 الف.
قام (العكليت) مشى وأختفى فترة طويله، اها الزول صاحب القروش دور عليهو لمن لقاهو، وقام قال ليهو يازول شنو من ديك وعيك وين قروشى؟؟
العكليت رد عليهو وقال ليهو والله زولك صعب صعوبيه ، بالتلتله قدر اطلع منو ال 100 الف بتاعتى!!!!
ومن نماذج (القطامه) حكوا عن (مدلك الهلال) السابق رحمه الله (فاروق دين) وقد كان (أطرش) يسمع خفيف جدا، وكان يلعب (كوتشينه) حريق 14.
الجماعه كلهم ورقهم (كعب) قاموا قالوا (باص ... باص) ولمن قالوا ليهو يا (فاروق باص) قال ليهم (انا أطرس)!!!
قالوا واحد (عكليت) مشى لى واحد صاحبو وقال ليهو سلفنى 100 الف، قام صاحبو قال ليهو والله ما عندى غير 50 ، قام (العكليت) قال ليهو خلاص جيبها واكون طالبك 50!!
نواصل هذا (العكلته) واذكر ود الشيخ الزول العندو معرفة وثقافة (عكلته) و(قطامه) ما تنشبك معاهو خصوصا لو كان من ناس (أم درمان)، عشان مش كان نبح (البورد) كله، والله الا (يهنق حمار الوادى) حتين يسيبك!!!
|
|
 
|
|
|
|
|
|
|
|
Re: (العكلته) و(القطامه)!!! تاج السر حسن (Re: osly2)
|
على ايام الشباب كنا نذهب بصورة يوميه الى نادى الحى.
وكان بيننا احدهم (خرخار) جدا ، لمن ورق الكوتشينه بتاعو يكون كعب النلس كلها بتحذرو لأنه طوالى يستغل أى كلمه ويقوم (يدك) الكوتشينه.
أها فى مرة من المرات ورقو كان كعب خلاص كله (دبل) ، فالناس كلها صمتت وما قالت أى حاجة عشان صاحبنا ما (يدك) الورق.
أها لسوء الحظ فى واحد جاء من بره وقام قال السلام عليكم.
قام صاحبنا رد عليهو السلام ومع رد السلام راح (كشح الورق) وقال:-
نحنا نلعب ولا نسلم؟؟؟
تاج السر حسن
| |
|
|
|
|
|
|
|
|
|
Re: (العكلته) و(القطامه)!!! تاج السر حسن (Re: osly2)
|
قيل يا عاصم فى أحدى قرى السودان البعيده عن المركز وصلت اشاره الى قاضى القضاة أن أحد قضاة تلك القريه أو المدينه يعضى المتهمين على روؤسهم، فأرسل قاضى القضاة قاضيا درجة اولى للتحقق من تلك الواقعه وعمل تقرير بها.
وصل القاضى الى القريه وذهب الى مكتب قاضى القريه وسأله عن سبب ممارسة العض على روؤس المتهمين، فقال له قاضى القريه لن أرد عليك ولكن أفضل أن تذهب معى فى الغد لحضور جلسه محاكمه.
وفعلا ذهب معه ذلك القاضى ، وبمجرد أن قال الحاجب محكمه سال قاضى القريه المتهم عن اسمه؟؟
فرد المتهم بطريقة (سمجه) اسمى ياتو يا حضرة القاضى السمانى ليهو أبوى ولا امى ولا حبوبتى؟؟؟
ثم ساله عن تاريخ ميلاده؟؟
فرد عليه المتهم تاريخ ميلادى بالشهر الميلادى ولا الهجرى ولا القبطى؟؟
وقبل ان يوجه قاضى القريه السؤال الثالث، تدخل القاضى القادم من الخرطوم قائلا له
(تقوم تعضيهو ولا اقوم اعضى انا)؟؟؟
تاج السر حسن
| |
|
|
|
|
|
|
|
|
|
Re: (العكلته) و(القطامه)!!! تاج السر حسن (Re: ALGARADABI)
|
Quote: الأخ osly2
التحايا العطرة للأخ العزيز تاج السر
هلالابى أصيل لا يخشى فى الحق لومة لائم
ونتمنى أن نراه بيننا فى سودانيز أون لاين |
الاخ ALGARADABI
على وزن osly2
تاج السر قلم افتقدته الاون لاين
اختلف معه فى هلاليته ولكن ياسرنى تحليله
اتمنى معك ان نراه بيننا
فالرجل لا يتوقف دوره بتحليل ما حوله من احداث
بل يحركها باسلوبه المميز
ظلمناه اكثر من مره وظلمنا انفسنا بظلمه
لك وله التحايا
| |
|
|
|
|
|
|
|
|
 Re: (العكلته) و(القطامه)!!! تاج السر حسن (Re: osly2)
|
Osly2
قالو واحدة رباطابية استلتفت من صاحبتها الرباطابية قروش وعملت نائمة..وكل يوم تجي تتونس مع صاحبتها الطالباها لي نص الليل ولما تدور ترجع تقول ليها ( أها أنا ماشة.. ودعتك الله) .. والحكاية تكررت .
في يوم من الأيام جات وإتونست معاها كالعادة ولما دايرة ترجع قالت ليها العبارة المعهودة( أنا ماشة (( ودعتك الله)..
الطالباها وكت خلاص زهجت منها قالت ليها (يا اختي ودعتك الله والقروش )
نحياتي
| |
|
|
|
|
|
|
|
|
|
Re: (العكلته) و(القطامه)!!! تاج السر حسن (Re: Gaafar Ismail)
|
الاخ جعفر
مرحب بيك والقروش
وهاك دى من الاستاذ تاج السر حسن
واحد (عكليت) عكلته ما حصلت قبل كدى ، لم ليك فى تاجر سمعتو أبيض من الدبلان، كلما يلقاهو فى مكان يمشى عليهو ويقول ليهو (وينى قروشى العايزه منك)؟؟
أها يوم التاجر داك قاعد مع صاحبو ومعاهم تجار آخرين، حكى لى صاحبو عن الزول (العكليت) المجننو فى روحو ده.
قام صاحبو قال ليهو أنا بريحك منو ، وكان تانى جاء عليك ما تتكلم معاهو وخليهو لى.
فعلا بعد شويه (العكليت) ظهر ، قام أول ما داير يفتح خشمو ، قام صاحب التاجر ادخل بى سرعه وقال ليهو( ايوه ما عندك مشكله مش عايز تتكلم عن القروش العايزه منى، ما يهمك بديك ليها).
أها (العكليت) قام رد عليهو (لا أنت مضمون الكلام الناكر داك)!!!!
| |
|
|
|
|
|
|
|
|
|
Re: (العكلته) و(القطامه)!!! تاج السر حسن (Re: Tragie Mustafa)
|
واحد (عكليت) خالص خالص مجنن واحد فى الشربه ، كل يوم يجى مع وصول (القزازه) ده طبعا قبل الشريعه المرت سريعه!!!
ويروح ملح شاطف ليك قزازة الزول ذى (المشير) معاهو، اها صاحبنا ده زهج منو زهج شديد، وفى يوم أول ما خت قزازتو والعكليت ظهر.
قام ما هببو ليه وما كب ليهو ولا كب لى روحو.
أها (العكليت) لا شلاقتو قام قال ليهو ما تكب.
قام صاحبنارد عليه وقال ليهو لا القزازه دى مشاركنى فيها واحد!!
قام (العكليت) قال ليهو طيب ما تكب لى من نصك!!
قام زولنا رد عايهو وقال ليهو (أنا نص بى تحت)!!!
تاج السر حسن
| |
|
|
|
|
|
|
|
|
|
Re: (العكلته) و(القطامه)!!! تاج السر حسن (Re: saif massad ali)
|
Quote: العكلت
جمل من كل مية لا يؤدب ويترك مع الابل يطرد كل غريبة من الابل ويرجع الخارجة من اخواتها
وبضرب الابل ضرب صعب اي واحده مطرفه لو حمر ليها ترجع |
سيف كيفنك
لو قلنا عضوية المنبر 4000
يلزمنا كم جمل بمواصفاتك دى
وترشح منو للقيام بدور عدم التاديب ؟؟
| |
|
|
|
|
|
|
|
|
|
Re: (العكلته) و(القطامه)!!! تاج السر حسن (Re: osly2)
|
سوف اتفرغ لمدة اربع سنوات كى احضر درجة (الدكتورارة) فى تعريف من هو (الكوز) الحقيقى وأحضر معى كلما يؤكد ذلك !!
هذه نفسه نوع من انواع التهرب التى تجعلنا فى مودة ووئام مع الكيزان ، فكل منا يعرف شقيقه أو صديقه السابق أو جاره اذا كان ينتمى الى منظومة (الكيزان) أم لا .. (استفتى نفسك وان افتوك).. لكن كل منا يعامل ذلك الشقيق أو الصديق او الجار على انه أفضل (كوز) والكوز القبيح هو شقيق أو صديق أو (جار) الآخر ... وهكذا يعيش الكيزان فى نعيم وأمن وأمان وهم يصدرون الأرهاب ويفشون الظلم حتى اصبح الناس مقتنعون بذلك الظلم الذى يعيشون فيه.
تاج السر حسن
| |
|
|
|
|
|
|
|
|
|
Re: (العكلته) و(القطامه)!!! تاج السر حسن (Re: osly2)
|
بنتين تومات ... شبه شديد .. لابسين زى بعض تماما ...
عندهم بابين حديد برضو شبه شديد .. دخلت واحده من الباب الأول
وبعد لحظه خرجت التانيه من الباب الآخر ..
رباطابى شاف المنظر قال :-
هعععععععععع فاكس ؟؟
تاج السر حسن
| |
|
|
|
|
|
|
|
|
|
Re: (العكلته) و(القطامه)!!! تاج السر حسن (Re: osly2)
|
حينما تشددت الأنقاذ مع موضوع العمله الصعبه وحوكم البعض بالأعدام ، وأصبح الناس يخشون حمل الدولار والريال حصلت طرائف عديده منها قيل أن الدكتور الشهير المرحوم (ابو حسبو) رأى ناس بوليس النجده لصا معلقا على سور منزله يحاول أن يقفز الى الشارع وكان ماسك فى يده حقيبه ، يعنى متلبس الجريمه ، وحينما نزل قبضوا عليه وفتحوا الحقيبه ووجدوا فيها مستندات وشهادت تخص دكتور/ حسبو، اضافة الى 10 الف دولار (ابو صلعه) اخضر جديد لنج.
فطرقوا على باب الدكتور فى ذلك الوقت المتأخر من الليل وفتح لهم دكتور/ ابو حسبو فقالوا له هل هذا الأشياء تخصك؟
فقال لهم : نعم كلها حقتى لكن ال 10 الف دولا ر دى لا حقتى لا بعرفها !!!
تاج السر حسن
| |
|
|
|
|
|
|
|
|
|
Re: (العكلته) و(القطامه)!!! تاج السر حسن (Re: osly2)
|
وقيل ان احد اهلنا (العرب) فى تلك الفترة نفسها خرج من منزله وبالقرب من الباب وجد دولار واحدا مرمى على الأرض
فبدأ يلف ويدور حوله يا رب يشيلو ولا يخلى ... وأخيرا خاطب الدولار وقال له يعض أصبعه بأسنانه:-
ود الكللللب عايز تودينى فى داهيه ؟؟
تاج السر حسن
| |
|
|
|
|
|
|
|
|
|
Re: (العكلته) و(القطامه)!!! تاج السر حسن (Re: osly2)
|
صدام حسين ، الرئيس العراقى المعروف لمن الضرب كتر عليهو .قالوا فكر فى المخارجه بعد تداخل وساطات من هنا وهناك .. لكن فجأة قال للوسطاء :-
لو انا اقتنعت بالتوقف وأعلان الهزيمه شنو البقنع السودانيين !!!
وعلى هذا السياق :-
قيل أن المرحوم شيخ زائد حاكم دولة الأمارات خلال جلسه مع حاكم امارة أم القوين وهو رجل معروف بالبخل وبالطرافه ، قال له شيخ زائد يا شيخ ما تقفل البار فى امارتك دى واصرف ليك كل سنه 3 مليون درهما.
شيخ ام القوين حسب المساله ولقاها فارقه 2 مليون لأنه البار بدخل ليهو ضرائب 5 مليون فى السنه، وفكر فى المخارجه وقام قال ليهو:-
(انا مدى الزولات كلمه )!!!
هههههه يعنى عندو عهد مع السودانيين بأنه لا يقفل البار ... لأنهم أكثر الرواد والزبائن لذلك البار !!!
تاج السر حسن
| |
|
|
|
|
|
|
|
|
|
Re: (العكلته) و(القطامه)!!! تاج السر حسن (Re: osly2)
|
فى مرة تانيه برضو صاحبنا (الخرخار) ... ورقو كان كعب شديد ...خالص .. ومزنوق وكلو (دبل) قام فك كرت الخمسين اها (الزول) الفتح كان بسف وقام نفض يديهو من (الصاعوط) .. ولمن شاف كرت الفتوح قال (خمسين)!
اها (الخرحار) قام قال ليهو واحد فى الأتنين يا تنفض (السفه) يا تقول خمسين !!
__________________
تاج السر حسن
| |
|
|
|
|
|
|
|
|
|
Re: (العكلته) و(القطامه)!!! تاج السر حسن (Re: osly2)
|
--------------------------------------------------------------------------------
متهم (عكليته) واقف قدام القاضى وبعد أن اخذ القاضى اقواله
قال ليهو بتعرف (توقع)؟
قال للقاضى : لا انا امى
قال ليهو بتعرف (تبصم)؟؟
رد على القاضى : بسيط !!!!
| |
|
|
|
|
|
|
|
|
|
Re: (العكلته) و(القطامه)!!! تاج السر حسن (Re: osly2)
|
بضة (قمحيه) ذات عينين قاتلتين كالعادة ولولا ذلك لما لفتت انتياهى .. لكنها تغطى العينين بنظارة طبية بيضاء .. الشعر مجدول طليق حر ... الكلمات تخرج ناعسة (فترانه).
تهتم بمن حولها دوما كالفراشه أو (كام العروس) وتسعى لارضائهم بكل السبل .. لا تهدا ولا تشكو من تعب.
لم ارها غاضبه طيلت فترة 4 سنوات على نحو متواصل ولسنوات آخر على نحو متقطع .. ربما لم اكن محظوظا فلو غضبت امامى مرة لرايت مخلوقا عجيبا رهيبا يزيد ه الغضب جمالا ... (غضبك جميل زى بسمتك) هكذا وصفها المحظوظون الذين راوها (غاضبه)، اغار منهم (بأثر رجعى)!!
من الكلمات التى تسحرنى عندها ولم انساها .. انها بعد كل معلومه تقولها لها تردد وتمد لسانها وتفتح فمها قائلة:-
هااااااااااااا عليك اللللللللللللللله ؟
اجيبها الان بعد أكثر من عشر سنوات:-
والله .
تاج السر حسن
| |
|
|
|
|
|
|
|
|
|
Re: (العكلته) و(القطامه)!!! تاج السر حسن (Re: osly2)
|
عربى قاعد مع مرتو بيشرب فى شاى داخل (قطيه) ... و(مركوبو) القديم مختوت فى باب (القطيه)، جا حرامى شال (المركوب) وقام جارى .. العربى (خت) كباية الشاى ، وقمز لى بره .. وقام دخل يدو فى جيب الساعه عندو (شوية) قريشات رماهم لى زوجتو ... وقال ليها :-
يا فاطمه (الحول) الجاى كان ما جيت طهرى الأولاد.
(الحرامى) وقف ... وقال ليهو (هاك مركوبك) انعل ابوك لأبو أهلك داير تسكنى حول عشان (مركوب قديم) ؟؟
تاج السر حسن
| |
|
|
|
|
|
|
|
|
|
Re: (العكلته) و(القطامه)!!! تاج السر حسن (Re: osly2)
|
قالو فى بص كان فى واحد عسكرى جنبو بنيه حليوه .. قامت البت فجأة رفعت يدها وصرررر .. ضربت ليك العسكرى كف ... بعد شويه فى ولد شاب كده برضوواقف قريب منهم رفع يدو وصرررررررر راح مدي ليك العسكرى كف ... اها كمان فى راجل عجوز عمل نفس الشئ ... بعد شويه واحد من آخر الباص كفكف يديهو وجا ماشى على العسكرى وراح صررررر مديهو كف.
سواق البص طوالى غير اتجاهو ومشى على قسم الشرطه ، وبلغ على الجماعه الضربو القانون بالكفوف أقصد العسكرى.
اها المتحرى سال البت أول حاجه ليه ضربت العسكرى كف؟
قامت ردت عليهو خجلانه وقالت : العسكرى ده ما عندو أدب ، شاغلتى !
بعدها سال الولد ليه ضارب العسكرى كف؟
الولد رد عليهو : دى اختى شفت العسكرى شاغله وضربتو .
سال الراجل الكبير ، وكان ردو أنه ابوها .
قام قال ليهم طيب كلكم عرفنا سببكم ، انت الجيت من آخر الباص مالك ضارب العسكرى؟
قام رد عليهو :-
انا قايله اتقلبت !!!
تاج السر حسن
| |
|
|
|
|
|
|
|
|
|
Re: (العكلته) و(القطامه)!!! تاج السر حسن (Re: osly2)
|
الخليفه عبدالله جاب أهلنا الحلفاويين
وقال ليهم لازم تتعلموا الدين ، وجاب ليهم واحد يعلمهم القرآن ،
اها قالوا الزول الجابوهو يعلمهم بدأ أول حاجه بى سورة (القارعه)
وأول ما بدأ يقرأ وقال :-
(القارعة * ما القارعه)
الجماعه طوالى وقفوا حيلهم ونقنقوا وقالوا :-
ده ما يعرفش ، ايه الحكايه ؟
مرة القارعه ، ومرة مش القارعه !!
تاج السر حسن
| |
|
|
|
|
|
|
|
|
|
Re: (العكلته) و(القطامه)!!! تاج السر حسن (Re: osly2)
|
واحد من أهل أم درمان ، ركب باص دون ان يسأل عن قيمة التذكره ، اها الكمسارى جاء عليهو ... قام صاحبنا دفع ليهو قيمة التذكره العاديه وكانت 50 قرش .. قام الكمسارى قال ليهو لا التذكره بى جنيه ، دخل فى غلاط مع الكمسارى ، الركاب معظمهم من (أهل العوض) ، قاموا وقفوا مع الكمسارى وقالوا ليهو :-
لا تدفع جنيه !! قال ليهم ليه أدفع جنيه؟؟
قاموا قالوا ليه :-
الباص ده ما سياحى !!
الكلمه دى حرقتو شديد ، زولنا وهو نازل بعد ما دفع الجنيه قال للركاب :-
اها يا السواح مع السلامه أن شاء الله تكون البلد عجبتكم!!
تاج السر حسن
| |
|
|
|
|
|
|
|
|
|
Re: (العكلته) و(القطامه)!!! تاج السر حسن (Re: osly2)
|
يا هوبفل
انت عارف أنا هلالابى يعنى أم درمانى أصيل .. وأقرب ناس لى ، هم (الهلالاب) الزعلانين ... أقصد اصلاء المريخ ... مصيرك ترجع الهلال لأنه فيهو ده وداك ... وما ح تخسر حاجه ، لكن الخوف تبقى مريخابى شديييييييييد والقرعه تقع لى صالح الهلال وبعدين تقول امانه ما مات راجل !!!
| |
|
|
|
|
|
|
|
|
|
Re: (العكلته) و(القطامه)!!! تاج السر حسن (Re: osly2)
|
الموضوع الأول:-
عضوين أحدهما رجل والآخرى أمراة على المنبر الزعيم (اون لاين) فى السابق لو دخل أحدهم للمنتدى وقبل أن يكتب حرفا تجد موضوعا فتح من قبل عشرات الأعضاء يقولون (فلان على الخط)!!
اما اذا كتب واحد منهما عبارة (السلام عليكم) فقط ، تجد البوست زى الراكب (اسانسيرات دبى) تداخل فيه اقل حاجه 1000 عضو وأرتفع للسماء ، كل واحد عايز يسبق التانى مثل التزاحم على رمى الجمرات.
كلامهم كان غلط صاح ، وكان الواحد بموت فى الهلال ، وقال نحنا مريخاب ، البورد كله يتقلب لونو أحمر، زى بطيخ (كوستى) ... وتلقى العضو ما بكره فنان فى الدنيا زى محمود عبدالعزيز ، لكن لو واحد منهم قال (محمود) فنان كويس ، ما يفضل للعضو الا (يخمس) معاهو (السجائر)!!!
العضوين غلطو غلطة العمر نزلو آخر صور ليهم ، وضحت اثر السنين وتغير الشكل المحفوظ لهم على مخيلة الكثيرين ، وبعدها أصبحت مواضيعهما لأول مرة تواجه الكساد وتهبط وتنزل للقاع مثل (التفاح) الكان يباع فى السوق الأفرنجى وتم تحويله ( لعربية) عمك (جادو) فى سوق (الملجه)، واصبح عدد المتداخلين لا يتعدى بضع عشرات ، فهل للصوره اثر سلبى على متابعة ما يكتبه العضو؟
وهل هذا يعنى أن بعض المثقفين السودانيين مصابينب لوثة (مراهقه) على قدر ما؟
نصيحه لصديقتنتا اللدوده قمر 14 :-
خصوصا مع صورة العين البتغمز وتولع وتطفئ زى بيرق رجل الخط،، لو كنتى من (البشتون) فاوعك تغلطى وتنزلى صورتك ، عشان مواضيعك ما تحصل امات طه !! وناس تاج السر وعبدالغفار يختوك فى (الدروه)!!!
| |
|
|
|
|
|
|
|
|
|
Re: (العكلته) و(القطامه)!!! تاج السر حسن (Re: osly2)
|
يا قمر 14
رغم انك شتره شويه .. لكن عارف ما بتفوت عليك حاجه .. انا بستغرب زول بكتب فى منبر حوارى ، الناس ما بنعرفو من قريب ، يقولو ليك والله ده زول طيب ، ده انسان مهذب ، ده .... الخ.
يا اخوانا فى موضوع جميل وجيد و(مسبك) وفى موضوع فارغ وما عندو قيمه، والزول المهذب ومؤدب ده، مرا ت تلقى بكتب فى الرسائل الخاصه والماسنجر كلام تعافه (ستات العرقى) !!
ما يطلع لى واحد يقول لى دى كمان مهنه شريفه !
زى ما قالوا واحد كان زول تمام فى كل جانب، مشكلتو الوحيده شراب العراقى ما قدر اخليهو كل كلو ..
لكن عشان الستره كان حظو كويس جارتهم من وراء طوالى ست عرقى، اها صاحبنا بعد صلاة العشاء طوالى يمد يدو .. بى فوق الحيطه ويستلم قزازتو يشرب شرابو وينوم ... قام نوى يمشى الحج . ولمن حج ورجع فى الطياره يصادف ليك جارتو ست العرقى راكبه جنبو .. وجايه من الحج زيو .. وكمان شايله سبحه فى يدها .. ورابطه راسها زى (بت الأحفاد)، هى (بت الأحفاد) رابطه راسها ؟ ما يسمعنى وليد 500 !!!
صاحبنا هم هم كبير خلاص ، وسالها قال ليها:-
اها بعد الحج بتبطلى بيع العرقى؟
قالت ليهو :-
أكيد، معقول يا الحاج بعد الحج الزول يرجع لبيع العرقى تانى؟
قام رد عليها زعلان:-
ليه هسه النجار مش بحج ، ببطل شغلو ؟؟ والميكانيكى برضو مش بحج ، ببطل شغلو؟
| |
|
|
|
|
|
|
|
|
|
Re: (العكلته) و(القطامه)!!! تاج السر حسن (Re: osly2)
|
كان بيلعب فى فريق الأخلاص من (القلعه)، وعندهم مباراة ضد (الأصلاح) قريب منهم فى (مكى) ود عروسه ، وهو فريق أشتهر فى أم درمان باسم (هاردلك) طوالى مغلوبين ، وكل لاعب بعد المباراة بيقول لى زميلو :-
هاردلك ... عشان كده اشتهروا بهذا الأسم.
وشدة ما انهم طوالى مغلوبين مرة قالوا تعادلوا مع فريق (ميت) ، ما صدقو قاموا مشوا بيت الحفله بى فنائل الكوره!!
المهم م مباراة الأصلاح مع الأخلاص ، قربت تطلع (درون) ، وفى آخر دقائق المباراة الأخلاص أحرز هدف وأنتهت المباراة 2/ 1 لصالح الأخلاص.
اها ود الخولى ، وده ادارى فى فريق الأصلاح ، بقى للحكم فى روحو محل ما يمشى يمشى وراهو ، يا حكم زدت الكورة 5 دقائق ، يا حكم الكورة دى لو نهيتها فى مواعيدها كان انتهت (درون) ... يا حكم .....
عابدين ، الله يرحمو ، قاعد يملص فى الكدارات فى (الواطه) ، ومتابع ود الخولى وكلامو مع الحكم.
اها عابدين قام مشى على ود الخولى وقال ليهو:-
يا ود الخولى يا اخوى الحكم ده مأجر منك (عجله) شنو زدتها 5 دقائق ونقصتها 10، يا أخى ما غلبناكم خلاص امشى الله يهدينا ويهديك !!
اها هسه أخونا زعيم النضال ده هسه الأخ/ عثمان حسن ، هزمو بالأنجليزى وبالقاضيه الفنيه وبى لعب دقاق دقاق ، لا شتائم لا كواريك لا كذب ونحنا هسه بنقول ليهو (هاردلك) وما فاضل لا خمسه دقائق لا عشره .. وهو ما داير يصدق شابك ومعلق زى (البورى) فى (دينق) قال و(تراجى) قالت
تاج السر حسن
| |
|
|
|
|
|
|
|
|
|
Re: (العكلته) و(القطامه)!!! تاج السر حسن (Re: osly2)
|
شاب سودانى (مقرم) بلغة زمنا، و (تفتيحه) بلغة جيل اليوم .. ضحك على شرطة المرور فى الأمارات، حينما تقدم لأختبار السواقه .. طبعا هناك أصعب حاجه فى الدنيا انك تحصل على رخصة سواقه وفى ناس 20 سنه ما طلعو الرخصه.
ذلك الشاب من خلال اول امتحان لعب بى نفسيات لجنة الأمتحان المكونه من ثلاثه أفراد شرطه .. فى العاده بكونوا راكبين 2 فى الخلف وواحد بجانب الممتحن.
ولو بقيت حافظ السواقه دى ومنقطه ما ممكن من أول مره يقولوا ليك ناجح لأسباب كثيره، منها عشان ناس (التاكسى) يشتغلوا لأنه أى زول بيحصل على (الليسن) ممكن يشترى عربيه ، اخواننا (الباكستانيين) خصوصا أهل (بيشاور) يخسروا 20 الف درهما على الرخصه ويمتحنوا 10 سنوات ولمن يحصل الواحد منهم على (الليسن) يشترى عربيه بى 500 درهما!!
ناس بيشاور ديل أكبر عدو عندهم هو (الخرمه) بضم الخاء ويقصدوا بذلك (الحرمه) المرأة ... طوالى عندهم رأى انها مفروض تكون (مكتفه) و(مدمدمه) وقاعده جوه البيت وما تطلع الا للمقابر .
نرجع لموضوع (الليسن) عادة وبعد كل امتحان يحضر له الممتحنون بدرى منذ السابعه صباحا، تكون النتيجه معروفه سلفا للكثيرين وهى (راسب) والسبب (سيطره) أو (عدم انتباه) أو (تسارع) أو(عدم استخدام جيد للأشارات)أو خطأ عند لفة (دوار) وهكذا.
من الطرائف قيل أن (كابتن طيار) أمتحن فكتبوا له (راسب) والسبب (عدم سيطره)، فغضب وقال لهم:-
(انا بسيطر على الطائرة فى الجو ، يغلبنى أسيطر على العربيه فى الواطه)؟؟
طبعا زى ده 20 سنه ما ح يطلع الرخصه لأنه ح يعتبر (متفلسف) وسوف يلحق ذلك الرجل الذى قيل انه لم يحصل على الرخصه لمدة 22 سنه من الأمتحانات ، بينما حصل عليها ابنه الذى ولده بالأمارات من خلال ثانى أختبار بفضل (الربع) الذين يتحث معهم بلغتهم الخليجيه.
فغضب الرجل غضبا شديدا، وحينما حصل على الرخصه بعد أبنه بعدة أشهر ذهب الى مكتب المرور، ومزق ورقة النجاح وقال لهم :-
(ده انا عرست امو وجبتو من ضهرى تدوهو الرخصه قبالى وما تدونى ليها الا بعده وبعد 22 سنه)؟؟
وربما قال عبارات طريفه وغاضبه أكثر من هذه لا داع لذكرها.
عموما نرجع لذلك الشاب، فمن خلال أو اختبار، قاد السيارة بطريقة شخص عارف ومتمكن، وحينما انهى الأختبار ونزل، كادوا أن يكتبوا له الكلمه المعتاده كبيره وزى المكتوبه بالنوته الموسيقيه (راسب)، لكنه أمسك بيد الشرطى الذى يكتب وقال له :-
(أوعك تقول لى ساقط ، انا فى حاجتين فى الدنيا دى بعرفهم وما بعرف غيرهم وما بتغالط فيهم، (الكوره والسواقه)!!
فضحك رجال الشرطه الممتحنين من جرأته ومن هذه اللهجه السوادنيه المحببه، التى يتحدث بها القادمون لتوهم من السودان وقبل ان يرتدوا الجلاليب الخليجيه و(يعوجوا) لسانهم مرددين عبارات مثل (ايش لونك) و(طال عمرك) و(ما يخالف)!!
| |
|
|
|
|
|
|
|
|
|
Re: (العكلته) و(القطامه)!!! تاج السر حسن (Re: osly2)
|
فعلا شعب السودان (شعب عملاق) يتقدمه (أقزام) كما قال الشهيد الأستاذ/ محمود.
بدأت رحلتى مع الأغتراب خارج الوطن منذ عام 1983، وقبل ذلك التاريخ أو بعده لم أدخل الى اى سفارة سودانيه فى أى مكان فى العالم واذا دخلت (مضطرا) لا أمكث اكثر من الوقت االذى يمكننى من تجديد جواز سفرى، وتلك هى أكثر اللحظات التى أشعر فيها بالضيق والملل لفعل أخترته بنفسى وبكامل ارادتى .. وتانى بعدها تلك اللحظات حينما يضغط (الحلاق) على راسى بقوة كى يحلق لى المنطقه أدنى الرقبه من الخلف !! لا أدرى لماذا يمارس بعض الحلاقين نوعا من السطوه على زبائنهم وكأنهم (يبحثون) عن لحظه تشعرهم بأنهم سادة العالم وحكامه لمجرد أن الزبون سلمهم راسه ودقنه !!
لماذا لا ارتاد السفارات السودانيه لأنى صراحة لم أشعر فى أى وقت من الأوقات أنها تمثلنى كسودانى، بل اشعر داخلها بغربة وشوق لا حدود لهما، وكأنى فى سفارة بلاد معد لوطنى!!
رغم ذلك كنت احول المصاريف للأهل عن طريق البنك وخلال زمن النميرى الذى خرجت من السودان بسببه ، فى وقت كان فيه سعر الدولار الرسمى فى النوك وسعره فى السوق الأسود فرق السماء للأرض ، كل ذلك لأنى كنت اشعر بأن ما احوله يمكن أن يساهم فى شراء علبة لبن لطفل محتاج!
ألان بكل بساطه يمكن لآى (كمسارى) متشعبط فى (قطر النضال) ، ملوثه يديه بكل فعل قبيح يمكن أن يتهمك بالعماله والتجسس ، كاذبا مفتريا مختلقا من دماغه الخرب!!!
| |
|
|
|
|
|
|
|
|
|
Re: (العكلته) و(القطامه)!!! تاج السر حسن (Re: osly2)
|
بتستغرب ....؟؟
وتسأل عن سؤالنا عليك وتستعجب ؟
منو القال ليك ......
بلاك الدنيا ، تصبح دنيا ،
فى عينينا شايله جمالها من عينيك ؟
منو القال ليك ...
حروف كلماتنا تتعطر
وتلبس توبها تتمخطر
وتمشى هوينا تتبختر
تضم الحانها
بى حنيه تتوزن وتصبح غنيه
ترحل ليك؟
منو القال ليك
حلم طول وكان منيه
نشوفو الليله فى الواقع
وزى قمرا توهط فى السما السابع
وحاتك أنت يا رايع
جمال الدنيا فى عينيك
بتستغرب .... ؟
وتسأل عن سؤالنا عليك وتستعجب؟
وأنت هوانا والأنفاس
وأنت الطيبه والأيناس
وروعة رنة الأجراس
منو الأداك عيون حلوات
وللحلوات بقت مقياس ؟
منو الأهداك جمال أحساس
بتستغرب وتستعجب
وأنت الناس وسيد الناس وكل الناس؟
تاج السر حسن
ما اروعك غفارى منابر الحوار
| |
|
|
|
|
|
|
|
|
|
Re: (العكلته) و(القطامه)!!! تاج السر حسن (Re: osly2)
|
بتستغرب .... ؟
وتسأل عن سؤالنا عليك وتستعجب؟
وأنت هوانا والأنفاس
وأنت الطيبه والأيناس
وروعة رنة الأجراس
منو الأداك عيون حلوات
وللحلوات بقت مقياس ؟
منو الأهداك جمال أحساس
بتستغرب وتستعجب
وأنت الناس وسيد الناس وكل الناس؟
| |
|
|
|
|
|
|
|
|
|
Re: (العكلته) و(القطامه)!!! تاج السر حسن (Re: osly2)
|
فى هذا الوقت العصيب والحرج من تاريخ وطننا الحبيب وشعبنا العملاق، والأكثريه الصامته تتابع جسد الوطن يمزق وينهش تارة بالعنف والحرب، وتارة أخرى بالسلام والتراضى، والجميع لا استثنى منهم أحدا لا يهمهم غير تكبير نصيبهم من (الكيكه).
فى هذا الوقت يخرج علينا الصحفى/ عثمان ميرغنى، برؤية التفافية جديده مهما كانت اهدافها المعلنه ساميه ونبيله، ولقد قيل فى المثل (الطريق الى جهنم محفوف بالنوايا الحسنه).
لا أدرى الى متى يخدع هذا الشعب العظيم الذى حكم عليه أن يحكم بواسطة الأقزام وان طالت اجسامهم وتمددت نحو السماء؟
ولماذا فى هذا الوقت بالذات يخرج علينا الصحفى الذى خرج من رحم الأنقاذ (عثمان ميرغنى) برؤية جديده تشبه تلك الرؤيه التى كون من خلالها شيخه الترابى هذا التنظيم الذى اتى بالخراب المسمى (بالجبهة القوميه ألاسلاميه)؟ ولا أنسى تلك اللحظه التى طالعت فيها اعلانا على جريدة (الأيام) وبعد الأنتفاضة والخلاص من حكم النميرى، يناشد فيها الترابى جميع المسلمين بمختلف فئاتهم وطرقهم واتجاهاتهم للألتفاف حوله وخدع بذلك اتباع الطرق الصوفيه وهم كثيرون فى السودان ، وقد كانت الخد يعه تتمثل فى مناداته لجميع المسلمين من مختلف الفرق والطرق قائلا : تعالوا نلتقى على (الا اله الا الله محمد رسول الله) !!
فانخدع الناس بتلك الدعوة وكيف لا ينخدعون؟ واذا بالأيام تمر، وخلال ما كنت اتحدث الى أحد المنتسبين الى الحركة الأسلاميه أو المؤيدين لها فى دول المهجر، واخبرته بقدوم أحد مشائخ الطرق الصوقيه للدولة التى نقيم فيها معا ، فاذا بالرجل يشيح عنى وجهه، ويقول لى بالحرف :-
(هؤلاء هم الذين اضروا بالدين وافسدوه)!!
فيا سبحان الله جاءوا الى كراسى الحكم على اكتافهم وبماسندة منهم وهاهم الآن يتنكرون لهم ولأسهاماتهم التى لا ينكرها الا جاحد فى ترسيخ معالم الدين الطيب المتسامح المعتدل فى جميع ربوع السودان، وأدركت من يومها أن هذه الجماعة أستغلت المتصوفه لتحقيق مطامعها لا أكثر او أقل.
المهم ما أحذر منه الان الا ينخدع الناس لدعوة الصحفى الأنقاذى/ عثمان ميرغنى، فهى دعوة التفافيه وقد سبق أن حذرت من عثمان ميرغنى هذا وتوجهاته التى تبدو معتدله ومقنعه لبعض السذج الذين يأخذون الأمور بمظاهرها.
وقلت اته شبع من ثدى الأنقاذ وهو صحفى ذكى، يفكر فى دور جديد بعد ذوبان ألأنقاذ، وبذلك يظل طول الوقت فى موقع اتخاز القرار وصنعه حتى لو كان ذلك الأمر من خلال كتاباته.
وأين كان عثمان ميرغنى وقلمه يوم أن أن اعدم الرجال واصحاب الدولارات ويوم أن كانت بيوت الأشباح مكانا لتعذيب الشرفاء من ابناء الوطن، لماذا لم يرفع صوته فى ذلك الوقت الصعب الذى يمتحن فيه الرجال، وألان اتى لكى يصبح نجما من نجوم المعارضه وبعد أن حصل على ضوء أخضر من اصدقاء الأمس الذين لما يصبحوا بعد أعداء اليوم، وبعد أن اصبح النضال يدار من حدائق قاعة الصداقه ويتنقل تفاصيله حيا على الأذاعه والتلفزيون وعلى مسمع ومرأى من اجهزة الأمن، فهل تنجح حركة معارضة ترضى عنها الحكومه القائمه الى ذلك الحد؟ وهل تطورنا واصبحنا فى دولة من دول العالم الأول ولا زال الكثيرون من ابناء الشعب يرزحون تحت افات لمرض والجوع والفقر والأميه؟
ولماذا ينال شرف تكوين ذلك المنبر صحفى مثل عثمان ميرغنى الذى عاش فى بحبوية من العيش طيلة فترة الأنقاذ، ومعلوم أن معارضة الشخص المنتمى للنظام لا يمكن أن تواجه بعنف مثل معارضة الشخص المناوئ له.
نحن نرحب بالفكره من حيث المبدأ حتى لو اتت منهم، وهى دون شك مغروسه وعائشه فى خاطر أى سودانى اصيل يحب بلده يائس من جميع التنظيمات والأحزاب القديمه والجديده التى ما قدمت شيئا للوطن.
على شرط أن يتينى تلك الفكره من لا يشك فيهم من ناحية التاريخ والسلوك والهدف.
وعلى شرط الا يسموا انفسهم باسم مستنسخ من اى جهة مثل (كفايه) او غير (كفايه) اعنى بالطيع كفاية هذا التنظيم الشرعى المعلن.
وهو اسم لا ينسجم مع الطبيعة السودانيه المرهفة الحس والشعور، مهما وجد رواجا فى بلدان أخرى.
ولماذا لا نسمى هذه الحركه أو هذا المنبر باسم (السودان اولا) Sudan First على سبيل المثال.
حتى يجتمع عليه جميع أهل السودان بمختلف مشاربهم وانتماءاتهم وافكارهم ودياناتهم، وان يكون الشعار المطروح هو (كل واحد عندو دين كل واحد عندو راى). والا يرفض حق كل أقليم أو مجموعه فى حكم نفسها بالطريقه التى تريدها من خلال سودان واحد موحد
بعود بنا الى السودان القديم الوطن الواحد الذى يسهر ابناؤه من أجل راحة جميع اخوانهم دون فروقات جهويه أو عرقية أو عقائديه ، وان يدخلنا الى العالم الحديث فى التعامل مع أحدث المخترعات والوسائل التكنولوجيه ،و دون أن نفقد هويتنا واصالتنا وأرثنا الثقافى وحضارتنا التى أمتدت لأكثر من 7000 سنه.
وأن يستقطب لذلك التنظيم المفكرين والمبدعين فى جميع مجالات الحياة الذين لم يجدوا فرصة لبناء وطنهم بسبب اختلاف التوجهات والأفكار، وظلت تستفيد من علمهم وعرقهم على الدوام دول أخرى تقدمت وأزدهرت وجعلت لنفسها مكانه واسما بارزا بين الدول من خلال مجهوداتهم وأبداعاتهم المقدره.
وان يتفق الجميع على قومية القوات المسلحه والا يقصى أو يبعد اى موظف أو عامل فى دواوين الحكومه بسبب اتجاهه الحزبى أو العقائدى، وان يلتزم الناس جميعا بالعمل يد واحده من أجل السودان اولا وأخيرا.
خاطره:-
الشعب الأثيوبى الصديق، رغم ما عانه من ويلات النظام الماركسى خلال عهد الجنرال منقستو، لكنه لا زال بذكر فضل منقستو فى مناداته بأثيوبيا واحده موحده وبلغة اثيوبيه رسميه واحده تدرس فى جميع المدارس، ولذلك تجد ابناء قبيلة التقراى الذين تعلموا ودخلوا المدارس يتحدثون اللغه الأمهريه ويكتبونها لأنه لغة التعليم واللغة الرسميه للدوله.
تاج السر حسن
| |
|
|
|
|
|
|
|
|
|
Re: (العكلته) و(القطامه)!!! تاج السر حسن (Re: osly2)
|
Quote: سوف اتفرغ لمدة اربع سنوات كى احضر درجة (الدكتورارة) فى تعريف من هو (الكوز) الحقيقى وأحضر معى كلما يؤكد ذلك !!
هذه نفسه نوع من انواع التهرب التى تجعلنا فى مودة ووئام مع الكيزان ، فكل منا يعرف شقيقه أو صديقه السابق أو جاره اذا كان ينتمى الى منظومة (الكيزان) أم لا .. (استفتى نفسك وان افتوك).. لكن كل منا يعامل ذلك الشقيق أو الصديق او الجار على انه أفضل (كوز) والكوز القبيح هو شقيق أو صديق أو (جار) الآخر ... وهكذا يعيش الكيزان فى نعيم وأمن وأمان وهم يصدرون الأرهاب ويفشون الظلم حتى اصبح الناس مقتنعون بذلك الظلم الذى يعيشون فيه. |
إستمتعت وضـحكـت كثيرا..شـكرا..
مني
| |
|
|
|
|
|
|
|
|
|
Re: (العكلته) و(القطامه)!!! تاج السر حسن (Re: Muna Khugali)
|
Quote: إستمتعت وضـحكـت كثيرا..شـكرا..
مني |
الراقيه دائما
منى خوجلى
تاج السر يتعامل مع اللغه كلاعب كرة ماهر يفعل بها ما يشاء
وحتى فى مخاشنته لا يخلو من اللمسة الرقيقه
انا شخصيا اصنف كتابته تحت بابين
* الممتع المبكى
* الممتع المضحك
وبما ان الامتاع هو العامل المشترك بين الصنفين
ممكن نقول يا منى
تاج السر = الممتع(المبكى+المضحك)
تحياتى واكبارى لمرورك المضئ
| |
|
|
|
|
|
|
|
|
|
Re: (العكلته) و(القطامه)!!! تاج السر حسن (Re: osly2)
|
شكرا الاخت سارة منصور
على الاتصال والاشاده بهذا البوست
ولو كنت اعرف ان اعلان تواجدى بمنسوتا
قادر على تحريك جبل الجليد لفعلت قبل ان احضر اليها
شكرا لك مرة ثانيه على الاتصال
وعلى دعوة الافطار الرمضانى
التى تدل على كرمك ونبلك
واذا كان محبة تاج السر هى التى تجمعنا
فهذه وحدها كفيلة بازالة كل رواسب الماضى
تقديرى ومحبتى
| |
|
|
|
|
|
|
|
|
|
Re: (العكلته) و(القطامه)!!! تاج السر حسن (Re: osly2)
|
Quote: بتستغرب ....؟؟
وتسأل عن سؤالنا عليك وتستعجب ؟
منو القال ليك ......
بلاك الدنيا ، تصبح دنيا ،
فى عينينا شايله جمالها من عينيك ؟
منو القال ليك ...
حروف كلماتنا تتعطر
وتلبس توبها تتمخطر
وتمشى هوينا تتبختر
تضم الحانها
بى حنيه تتوزن وتصبح غنيه
ترحل ليك؟
منو القال ليك
حلم طول وكان منيه
نشوفو الليله فى الواقع
وزى قمرا توهط فى السما السابع
وحاتك أنت يا رايع
جمال الدنيا فى عينيك |
| |
|
|
|
|
|
|
|
|
|
Re: (العكلته) و(القطامه)!!! تاج السر حسن (Re: osly2)
|
قد اعتدت على منابر الحوار الا ادخل واشارك فى أى بوست لا يروق لى لذلك تلاحظ عدم تداخلى فى كثير من بوستات الآخرين، فما يروق لى ويقع فى دائرة اهتمامى قليل جدا، فهل يعقل أن ادخل فى كل بوست موجها صاحبه أو رافضا ما كتبه أو مذكره بيوم القيامه واهوال النار ونعيم الجنه ؟ (هذا يجوز وذاك لايجوز) !! ويمكن توصيل فكرتك من خلال موضوع يتحدث عن الخير والشر والجنة والنار والثواب والعقاب.
الذين لا يعرفون دور منابر الحوار ويتطاولون علينا عليهم ان يدركوا أن الكاتب فى الاساس يهمه القراء المتابعين من غير الأعضاء فهؤلاء يعتبرون مثل المحررين فى الصحيفه، وبحمد الله فان الذين يقرأوننا على مختلف منابر الحوار كثر، ولا اهتم كثيرا بأن يقرأ ما أكتب اعضاء لا يفهمون رسالتى وما اريد توصيله للناس.
تاج السر حسن
| |
|
|
|
|
|
|
|
|
|
Re: (العكلته) و(القطامه)!!! تاج السر حسن (Re: osly2)
|
ناديت برأى ودافعت عنه بقوة لفترة من الزمان وتحملت بموجبه الكثير من العنت، ذلك الرأى يقول (الا النساء) !!
اعلنها صراحة الآن قد مزقت واحرقت هذه الورقة التى كتبت فيها هذه القناعة، فبعضهن أشد مكرا وكذبا و خبثا ونفاقا من الرجال، قناعتى تلك بنيت على اساس يقول (مجرد وجود أمراة على منابر الحوار هو مكسب فى حد ذاته ومن أجل ذلك ضحيت بالكثير حتى حينما كن يقفن ضدى على نحو ظالم)، أدركت أخيرا أن بعض الحاملات (لنون) النسوه لا يستأهلن تلك (النون) وعدم وجودهن افضل من وجودهن وهن يمارسن الكذب والتضليل والتدليس صراحة، ويشاركن فى الآجرام والتعدى على شقيقاتهن والصمت الجبان على تلك الجرائم، التى سوف نتعرض لها فى نهاية هذا الموضوع، حيث لا فرق بين أمراة سودانيه وأخرى الا بعطائها وأحترامها لنفسها ومواقفها المنحازة للحق، لا للظلم والباطل.
تاج السر حسن
| |
|
|
|
|
|
|
| |
osly2
ALGARADABI
Gaafar Ismail
Tragie Mustafa
saif massad ali
Hussein Mallasi
Muna Khugali
فيس بوك
تويتر
انستقرام
يوتيوب
بنتيريست