|
|
 آمالى فيك
|
آمالى فيك
يا حلوه زى موج العدم
ضماها كون وطواها ليل
صبحت محال
زى ما أكون بزرع زهور فوق الصخور
أو كانت آمالى البنيتها !!
زى القصور فوق الرمال ..
ويا حلوه ماكان العشم
يا سمحه ما كان العشم ..
أحصد ثمار إخلاصى ليك .. تعذيب و هم
يا حلوه كان وعدك قبيل
نمشيهو مشوار العمر ..
فى طريق نضير
أخضر جميل
زادنا فيه
حبة صبر واحلام عمر
نديانه زى بسمة صغير
و حالمه زى أجمل نغم
وانا كنت فارسك يا أميره
وإنتى توحينى الشعر
أوصف محاسنك ياقمر
وانضم قصايد شعرى فيك اجمل درر
فيكى الخصل .. حاضنه السواد ..
زى ليل شقاى ..
وجهك قمر
وفيك بسمه زى طفلا غرير
خدك موشح بالورود
ثغرك يغير منو الزهر
وابقى اسرح فى الوصف
فى اللسه كامن وما اتوصف
رمشك غزير .. إتدلى وارتاح فى العيون
يحكى أجفان الزهر
عينيكى بالفرح بتنوم ..
وانا ليلى لفاهو السهر
و لو مرة بس طيفك عبر
أتشابا ليهو وانادى ليه !!
يا طيف اقيف قبال تمر
من بدرى راجيك منتظر
تمسح عذاب عمرى الحزين
تمسح عذاب كل السنين
وانا أصلى ياطيف منتظر
شايل معاى شوق العمر
لكن لقيتك مابتلين
وآمالى فيك ضاعت هدر
جفت مواسم الفرحه .. فى قلبى الجريح كمل الصبر
وبعدك بقيت هايم وحيد
فى كون فسيح ..
تسوقنى ريح !!
وتجيبنى ريح !!
وآمالى فيك يا حلوه بس كانت سراب
إنشر فى عمرى العذاب
ودفقت مويتى على الرهاب
وآمالى فيك واحلامى فيك
يا حلوه بس كانت خدر ..
حاتم الحوشابى
|
|
 
|
|
|
|
فيس بوك
تويتر
انستقرام
يوتيوب
بنتيريست