يا خوي بقول إدريس محمد إبراهيم يا خوي كلام أمك قريتو ... يا خوي كلام الحاجّه في وجداني داك .. يا زوول وعيتو .. أصل الحنينه الصابّه في الاعماق أمل .. بالموالى بابالايمان بي سرّها الفيهو الحنان ... بي قلبها المليان أمان ... بس حضنها الفيهو الأمان ... زي صدرها المنو الحليب سر الإله .. أنا كم شربتو وكم رويتوا ... قصيتو للعالم رويتو ... والدنيا تطرّب تنبهر ... تقعد تقوم .. هابوني حتى الإمريكان ... حتى اليهود في يوم وعوا .. سر الحكايه الكان زمان .. والزول بيعرض في حمي الساحات طرب ... يشدو الغنا .. ينثر فرح .. ينداح حنان ... ويجيها راجع شان يقبل لي تراب رجليها ... يبحث في شذى الرمل المعطر ... فيها عن سر الجنان ... والدنيا تطرّب تنبهر ... والزول بيعرض حتى يحلم بالدماء .. السايله من ضهر البطان ... فارس أصيل ..دمعاتو للمسكين ترّف ... في الفقرا .. في أرقو الحبيبه والعوضه تنزل ما بتجف ... في خالو في ود الملك في عمتو .... في اخوانو في قاسم البخت في لمتو.. في اصحابو في الزول الخليل في مصطفى ... في بدري في عمر الكضم يا زول كفي ... في العلموا الفقرا الكلام ... في محيّ ..في الفيتوري ....تاج السر ... ناساً تكرّم فيهم الدنيا اللّي عرفت قدرهم ... ولقيتها في العراقي في محيّ الأصيل ... قال لي بلادي الهاجّه بالابداع كفر ... لامن اموت يمكّن حتذكّر تعيد ... أنا لن أحيد .... لكني صابر يا وليد .. أنا راجي لي آخر حفيد ... زكرى الحفيره معايا لي عند الحفيره ... بذكّر الشتله الصغيره ... ونفيسه يا سراً هدت ... للدنيا كم أقمر منيره .... والبيت ده عارف سرو زول ... فات القبر أسمو الزبير ... وصلّت كلماتي القلال حتى المشير ... وبلادي بالابداع كفر ....
-2- آه يا بلد ... والله ما محتاج أنا ... يا إيد بترجف بالعنا .... سيقاني شالها السكري ... ومؤمن أنا ... وآه يا بلد ... بتطيري تلحقي للنجوم ... ناساً بتشبع ناس تموت ... منّ التخوم ... ناساً بتحفى تبوس الايد عشان مية جنيه .. وناساً تموت في المشنقه ... سوّت من النقد الغبي .. في الدنيا كم مليار جنيه .. وآه يا بلد ... حالك كتر ... كم فيكي بالابداع كفر ... ***زولاً بعرفوا الجمعه يوم خارج الحساب ... يتفقد المسكين يكوس ناسو الزمان ... ناس عمي عبد القادر العبدون ... ده المابيهون ..... ينزل يشارك في النفير ... عز الهجير ... يعرق مع الولد الصغير ... يضحك مع الكل ينتشي .... ويرجع الدنيا الرماد يوم السبت ... يحسّب يخت .. راجي النصر ... آه يا بلد .. ما انتي بالابداع كفر ... **** وعرفت يا صاحبي البتسأل .. ديمه عن سر الحقيقه ... ياني الحكيت .... بس لسه يا صاحبي العزيز .. فوق العزيزه الغاليه بعدك ما بكيت .. وانا قد بكيت ... فوق أمك الغاليه الحبيبه ... كم كم بكيت ... عرفت يا حمّيـــد ... ولداً سعيد أسمو الزبير .. ود السعيد .... ما من زمان قول الاله ... قال الرسول سر الهدي ... الفات ومات ... الجنه في الدرب التحت ... تحت القدم للأمهات .... تحت القدم للأمهات .... وآه يا بلـــد ... إدريس محمد إبراهيم – الخرطوم – صباح الجمعه 25/08/2006م الساعة 55: 09
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
إدريس محمد إبراهيم
فيس بوك
تويتر
انستقرام
يوتيوب
بنتيريست