حجة امنة ... استبيح كل الدروب شان ادخلك ...

حاجة آمنة حكاويها في صرتها وقروشها في مفحضتها طيبة لكن بخاف من مفراكتها
أبو بكر
صباحك خير يا عسل

مبسوط منك، و قلوتيتك دورت رسين خلق الله. اتصل بي اسحق قبال ماأشوف كشف اليوم الجديد، قال لي:
- " أبو عمر ، إن شاء الله كويس. قريت بوست حاجة آمنة؟"
قلت ليه دون ما أفكر.
- آآآآآآآآآ . هي كمان جات هنا؟
سألني:
-" هي منو يا أبي؟ "
ضحكت، قال لي:
- ولا ده كلام تعرفوه براكم؟"
قلت ليه كان كدي أقوم على الكمبيوتر، دي حاجة رائعة، لكن انت شفت مفحضة ولا صرة في البوست؟
الصرة فيها حكاويها والمفحضه، بالحيل بريدها، وكت تفتحها وتمرق القرش وتقول ليك عافية منك يا ود أمي، سوي ديل في حلاوة. لكن ما بخاف من شئ في الدنيا غير كنشها، يجيك لب في الضهر.
حاجة آمنة حبابك متلفي في توب الزراق، ومتريحي بي بي بت السودان و التوب معطناه في بت مسيمس و وشلة كدي من بت القسيي.
املصي حجباتك ديل، ختيهن في ضهر السحارة ديك.
اتوهطي وأنا البدا ليك.
قلت لي جدك ود العمدة وكت دار ياخد بت عند الله ، أمه مالها أبتها؟
وجاني الكنش المرة دي في نص الراس.
-" قوم يا مطموس كوس لك شغلة،جدي ود العمدة المتلو منو؟ حليل الرجال. الرجال رقدت شرفي
أخوي أبو بكر فتح عينك، واقعد بعيد، خلي البنات لي جوه متوهطات في السباتة وأنا وانت بنعاين بي الشباك. عشان في كلام ما قلتو ليك، حاجة آمنة اشترت ليها سلبة جديدة وطويلة.
شكرا لك أخي إذ ابتدأت يومي بالضحك، قبل أن تكشر في وجهي شمس الصحراء.
وتحية لحاجة آمنة الرمز، وتحية للشخصية. بل تحية لك آمنة، وإن روعتها الأيام.
و أحب خالتي حاجة آمنة. وأشرككم معي في حبها.

اقيفي النحدثك بي قصتي مع حجة آمنة
زولتك قشرت ليك قشرة طيري ولما لقت بابي فاتح توش انقطعت في البوست حقي
كاتب ساخر من الدويم/ الطيب عبد الرحيم خلف الله
أها ما أطول عليك جابت كلاما عجيب وردت ليها، لكن باقي لي بعد تركب نضارتها في عيونها، أقصد لمن تمرقها من صرتها، بكري أبو بكر يكون وداه الأرشيف.
قالت لي كلام ورديت ليها،
حجة آمنة سر شنو.
شي نوبة وترجمة وشي جبنة وشي ودع مالك نسيتي الدستور، دستور يا أسياد. ولا أظنك غرقتي في الذكر؟
الجبنة من لوازم الودع . ورغم أن هنالك أوجه كثيرة في لقراءة الحظ؛ مثل قراءة الكف، قراءة الفنجان، الرمل، قراءة اللوح وقراءة الماء الذي يصب في (القرعة) أو (الكورة). إلا أن أهل السودان مغرمون بالودع خاصة دون غيره،ولهم في ذلك حكاوى، تعد شرطا في ممارسة المهنة ولهم أيضا طقوس لا يمكن تجاوزها.
أما الحكاوى، وهي غالبا من صنع الخيال:
أولا:
قد تدعي إحداهن أن زائرا زارها في المنام وأذن لها برمي الودع وهذه تسمى (المحلمة) وهو أدني إذن يخول للوداعية أن تمارس المهنة.
ثانيا:
قد تدعي إحداهن أن زائرا زارها و سلمها سبع ودعات بيض، وأنها لما صحت من نومها، وجدت الودع بجانب السرير. وتشهر نفسها قارئة من درجة أرفع من الأولى.
ثالثا:
قد تدعي إحداهن أن زائرا دخل بتها وبيتها مغلق الأبواب، وناولها الودع وأذن لها. وأن حوارا قد دار بينهما فقالت له إنها لا تعرف قراءة الودع، فقال لها :
" قومي برمي الودع وأنا أفسر لك".
فإذا جلست لقراءة الحظ، كان واقفا أمامها يحدثها بما (قاله) الودع، من حيث لا يراه الحاضرون ولا يسمعونه وهذه درجة عظيمة. لأن القارئة تستطيع أن تسأل الرجل مباشرة.
أما الطقوس:
أولا:
لاتشذ إلا القليل من الوداعيات في أن العدد المصرح به سبع ودعات، أما الودع المجلوب من (أولاد كذا وكذا) فهو تسع ودعات وهن رمز لأبناء الجني الذين ماتوا ولهم قصة أخرى. فإذا قامت صاحبة التسع للعمل لا بد أن تتفل في ودعها تسع تفلات. ولا تعتد الأولى بذلك.
ثانيا:
القارئة التي من الدرجة الثالثة واسمها( الشايلة أو الشايفة) فلابد أن توقد البخور ويشم الجن رائحة البن المقلي، فهو مرتبط بالجبنة ارتباطا كبيرا.
ثالثا:
لا بد من جعل مادي يوضع قبل الشروع في العمل ويسمى ( البياض). ويجب أن يكون من عملة معدنية ولا يجوز التعامل بالورق، ولا الذهب. أما الذي يعطى هدية بعد الانتهاء من العمل أو (الحق) إذا عالجت المريض، أو كشفت مكان المسروق، فلا بأس أن يكون أي نوع من المال، حتى ولو كان ذهبا وفضة.
رابعا:
إذا جلست الوداعية من الطبقة الثالثة، فلا بد من تغطية رأسها، وبعض منهن يشترط أن تبل الأقدام بالماء.
خامسا:
أن يرمي الزائر الذي يراد قراءة الحظ له الودع بنفسه، خاصة الرمية الأولى.
سادسا:
أن يصمت الناس ولا يتحدثون أما الشايلة، إلا إذا أذنت لهم أو يصيب المتحدث ضرر وخيم.
وتسمية الودع نفسها تبدو غريبة ولكن إذا رددناها إلى الوداعة بفتح الواو وهي اللطافة، فلربما لأن النشاط نفسه مرتبط بالإنس وشراب البن. وإن كان من الوداعة بكسر الواو وهي الأمانة فقد يكون المعني أن الجن استودعت الوداعية هذا الودع، فالوداعية من الدرجة الشايلة، حين تهجر هذه المهنة فيجب أن تضع الودع في دار خربة حتى يستلمه صاحبه، أو تذهب إلى النهر وتقول كلاما ثم ترمي به في الماء.
سابعا:
تخصص الوداعية يوما لا تمارس فيه المهنة وفي الغالب الأعم هو يوم الجمعة، ولكن ذلك يعتمد على يوم زيارة الجني، وبعضهن يدعين أن الذي زارهاليس جنيا بل هو ولي صالح، وقد تذكر اسمه.

والوداعية تعتمد في عملها على سيكولوجية الذي تقرأ له الحظ، فهي لا تقول كلامها جملة واحدة. بل تبدأ كلامها كما يلي:
- ووب على النسوان المتشاكلات ديل مالهن؟
وتستدرج المراة الأخرى لتقول لها بكل بساطة:
- ديل أخوات راجلي، أصلهن من يوم عرسني ما دايراتني و.....
تقول الوداعية:
والمرة السمينة دي مالها يا بنات أمي؟
فترد التي يراد قراءة حظها:
دي أم راجلي، هي مرة طيبة لكن بتخاف من بناتها.
تقول الوداعية:
- سجمي البنات ديل ملجمات أم الولد راجلك ده ، خاتات ليها العمل في زريبة الغنم ولا دافناتنو فيها ربك يعلم . كدي أقيفي النشوف الودع قال شنو؟
أو تستعمل مصطلحات أهمها:
الوحيد والوحيدة ومعناها الولد أو البنت التي لا أخ أو أخت لها
ثاني أخوه أو تاني أخواتها
أولاد الصرة وبنات الصرة وهم الأشقاء الذي يزيدون على الاثنين
وهي حيلة للاستداج أيضا، فحينما تقول :
تاني أخوه ده والله بسافر سفرا طويل لكن برجع.
فتبحث التي يقرأ لها الحظ في سيرة العائلة كلها وقد يدور في رأسها أنه فلان ابن فلان، وتحسب أن الوداعية رأته بين حبات الودع.
ونلتقي ياحاجة( في شان نعرف ودعاتك كمهن. محلمة ولا متعلمة الودع ده؟ ودعك أبيض ولا مخازز؟
والنوبة دي موضوع تاني خالص.
الرسول سلمي لي على بنياتك لامن اجيهن

حجة آمنة
صباح الخير
كلامي الداير اقولو ليك ده عشان نخش في الجد. انا جيتك لي الشغل.
أول في التبادي كان لي البنية الجابت ليك طاري العرس دي من قبل شوية، بت الصرة وأم الويحيدة، ما بجيب اسمها، عشان ما ادخل رقبتي في الدرب الضيق. أنا جبت اسم زول هنا؟ لا. وكت ما رديتي برد لي رقبتي. البنية دي ما تصدقيها، دي مطموسه ساكت بتدور تشوف مويتك يالرايقة . عرس واحد كايسالو مافي.
لكن اسمعي كلامي أنا.. أنا بنضم ساكت. أفـُّـو.
- أرخي أضانك ، بدور لي مره، آآآآآآآآآي مره ، زي ما بقولوا الجماعة (إمرأةً) ويعوجو خشومهم فوقها ، كيفن كدي ما بعرف.
بدورك ترمي ودعاتك ديل وتشوفيها لي.
مستغربه مالك ومنططة عويناتك، قولي بسم الله.البنية دي أسع ما جابت سيرة الكلام ده وقالت الدايراه، مالو أنا قندول مشنكل الريكة؟
أسمعي البنية البدورها بنية رايقة زي موية النقاع،
بدور احس بي محلها في جواي وكت تسكن شراشيفي،
أختها في بكان النتاحة الباقة في قلبي
بنية زي أمونة الغنو ليها كثير،
واحدين قالو باميي رهافه
واحدين قالو ضامر هافه
واحدين قالو شفنا الشافه
بس براي بجيد اوصافه
سابل ديسها فوق اكتافه
ما شفتوها ياخلاني؟
والله مقدرة وكت الولد سيف الجامعة ده يقول:
من يوم داك جاني الجاني
والله الدنيا تمسخ علي
*
- آآآآآآآآي بدور
المن النسيم تتضارى
*
بنية أحس بيها مارقة من نفسي(بفتح الفاء).
ولا زي ما قال عادل ود محمد خير ، الله يديه العافية
(كأنك بتنبعي من فرح جواي)
الوصف ده ياهو الغلب الداواي
بدور بنية زي......
زي نورة وكت حميد يوصفها


هيْ .. أقيفِنْ .. ‏
نورا فِيكِنْ
نورا ... نقّاحة الجِّروفْ .. ‏
نورا ... حَلاّبة اللِّبيني .. ‏
للصغيرين والضِّيوفْ ‏
نورا ساعة الحَرْ يولِّعْ .. ‏
تنقلِبْ نسمة وتطوفْ ‏
تَدِّي للجيعان لقيمة ‏
وتَدِّي للعطشان جغيمة ‏
والمَخَلِّي الحال مَصَنقِرْ .. ‏
في تَقَاة اللّيل تَندْقِرْ .. ‏
تدِّي لي باكر بسيمة ‏
تَكْسي للماشين عَرَايا ‏
وفوقا ينقطّعْ هديمه ‏
‏ما عِرفتِنْ ... نورا إنْتِنْ .
.قولِنْ إنتن شِنْ عِرفْتِنْ ‏
***** ‏
‏
نورا أخُتْ كُلّ الغلابة ‏
نورا حاحاية الشّقاوة .. ‏
نورا هَدّاية الضّهابة ‏
الأراضي اليَاما أدّتْ .. ‏
نورا ... بقّتْ من تُرابه ‏
وماشي في الأعماق سحابه ‏
مشتهنِّها .. والله جابه ‏
الله جابه ... الله جابه ‏
للجنوب طبلاً‎ ‎‏ يَهَدْهِدْ ‏
ليل مشاعر ناس تعابة ‏
وللشّمال طنبور يَسَكِّتْ .. ‏
دمعة الميتين كآبة ‏
ما عِرِفْتِنْ نورا إنتِنْ ..
قولِنْ إنتن شِنْ عِرِفْتِنْ ‏
نورا
‏ عايزه تقرأ . قالتْ ‏
فوقا حيطة الدِّنيا مَالتْ ‏
خَتّتْ الكرّاس وشَالتْ ‏
منجلاً صَالَتْ بو جَالَتْ ‏
لامِنْ إنجرحت بو شالَتْ ‏
لي التراب فوق إيده كَالَتْ ‏
ومَرّة يوم في الدُّونْكَا لِدْغَتْ ‏
جاء الفقير بالليل حَوَاهَا ‏
ويوم ملاها الهم قطايع .. ‏
جاء البصير بالنّار كَوَاهَا ‏
ونورا . ما قِدْرَتْ تمانع .. ‏
تقنع النّاس المعاها ‏
مرة شافت في رؤاها ... ‏
طيرة ... تاكل في جناها ‏
حيطة تِتمغّى وتفلّعْ .. ‏
في قَفَا الزّول البناها ‏
في جنينة سيدي سِمْعَتْ .. ‏
شتلة تصقع لي الوَرَاها ‏
الأرض .. ‏
‏ لابُدَّ ‏
‏ ترجع ... ‏
للتِّعِب فوقا ورعاها ... ‏
غيمة ... والنِّيل موجو لاها ‏
والعطش شقّقْ شفاها ‏
الشّمس طَبَقت ضُحَاهَا ‏
الخليقة لقت إلاها ‏
نار
عقاب إنسان مكسّر .. ‏
فوق تَلَكِّيات متاهة ‏
وضَوْ من الله .. رهاب مكتّفْ ‏
في وتيد اللّيل معاها ‏
بين ربوع حَضَره وخلاها ‏
فَسّرَتْ لي النّاس رُؤاها ‏
وقالوا .... جَنّت .... ومو براها ‏
ونورا زادت فوق شقاها ‏
‏ ‏و صَدّتْ الأيام .... تحُشْ ‏
تبني لي عصفورة عُشْ ‏
في السّواقي تشوف عزاها ‏
لما شوقه يسوِّي .. أُشْ !!! ‏
تملا ... تزرعْ ‏
ترعى .. تقرع ‏
للنهار في الليل تخُشْ ‏
عِرْفَتْ الشّقَا والشّقَاوة ‏
إلاّ .... ‏
ما عرفت تغُشْ !!! ‏
شايلة طولة البال من الله .. ‏
ومن أراضينا الإثارة ‏
وماشي تكدح طول نهاره ‏
وترجى لما الليل يَفلِّلْ .. ‏
تسرِق ألمي عشان خداره ‏
عشان صغاره .. ‏
عشان خداره ‏
عشان صغاره .. ‏
ولما ترجع لي دياره ‏
تنزف أحلام الفقارى ‏
من عويناته الحيارى ‏
لي غُبار الحال تقُشْ ‏
فوقو لي الآمال ترُشْ ‏
نورا .... ‏
تقعد ‏
‏ صاحيي تحلم .. ‏
بي بيوت بي نور ودُشْ ‏
وبالمحبة تشُق دروبه .. ‏
ولي قلوب الكل تخُشْ ‏
نورا ... ‏
‏ تحلم بي وجود ‏
ما مشت بينو القيود ‏
أفضل أفضل بي الكتير .. ‏
بي وطن من غير حدود ‏
نورا تحلم بي عوالم ‏
زي رؤى الأطفال حوالم ‏
لا درادر .. ‏
لا عساكر .. ‏
لا مظاليم ‏
لا مظالم ‏
نورا تحلم .. ‏
ولما تحلم ..... نورا ترجِفْ ‏
ولما ترجف .... نورا تحلم .. ‏
ولما ريح الواقع المُرْ .. ‏
لي عشيش أحلاما ينسِفْ ‏
نورا ..... تنزِفْ ‏
وفي الوجود .. وجدانه يهتفْ ‏
حالة .. تقرِفْ .. ‏
حالة تكسِفْ .. ‏
حالة تكسِفْ .. ‏
حالة تقرِفْ .. ‏
وتبدا تقضِفْ .. ‏
ولما تقضِفْ ‏
‏ بالا يهتِفْ .. ‏
وتملا باله أحلام بتلصِفْ ‏
يوم حا تنصِفْ ‏
يوم حا تنصِفْ ‏
نورا .. ‏
لسّه بعيد .. ‏
هناكَ .. ‏
وتبدأ تحلم .. ‏
ولما تحلم نورا ترجِفْ ‏
ولما ترجف نورا تحلم ‏
صاحيي تحلم.. ‏
وصَاحْ بتحلَمْ ‏
صاح بتحلَمْ ‏
بتحلم صاحْ

- استغفر الله يا ججة آمنة مالي الما ببكيني شنو؟ قايلاني بكيت بي إرادتي.

• ما أكتر عليك الكلام ياحجة، بسم الله ده بياضي رميتو.
كش كش
- لا ، لا الرمية دي لازم تعيديها ما عجبتني
كش كش
- لا ، لا لا لا .بالله شوفي الودع ده بحمر لي كيفن؟
- يلا، لمي ودعك ده ، أظنو الدنيا حر، أرميه لي وكت تاني ولا خليني أمشي لي الفكي. قالولك الفكي الجديد ده اسمه أبو بكر يوسف، والله كلامو شوف عين وإيدو لاحقة.
ودعتك الله

يا حجة
ما عيب عليكي إنت وبت ولدك أبوبكر ده ، تقفلوا باب الحوش والناس مترصين عند الباب؟