|
|
 وين غُناكم ؟؟ وين ؟
|
الي ادعياء النضال والمضللين والمشعوذين والدجالين وماسحي جوخ السلطان وحواة اخر الزمان لقد انقلب السحر علي الساحر وانكشفت كل الحيل الاكثر سماجة وغرقت سفينة نوح في يم الحقيقة والشرعية والقضية ومازال يراع التاريخ يسجل لحظات التهافت هذه بمداد نور فسفوري ينعكس في كبد الظلمة والعتمة الانقاذية.
واليهم ينبري هذا اليراع الابنعوفي ويقول
وين غُناكم ؟؟ وين ؟
خلّهم فى وحلهم
خلى الميادين تدّهم
خلى الغباء يركن
يوصّل حدهم
ماكلهم عارفين عطية الجبهه
ليهم صفعه أُخرى .... و
بيتفهم نوع النضال
الفيهو مرمطو إسمهم
متأكدين إنو البقيف فى خندقهم
ضد كل وطنى غيور جسور بقى منهم
متحمسين لى حاره
بى إسم التراب
معروف مداها وإحتمالا
مادين اياديهم الى تلك القذاره
"همتك يامُحمد أحمد همتك"
إيدك مع إيد قتلتك
تبنى وتهد
ترسم ملامح للبلد
لوحات عميقة من الدماء
ناس معتمين
جدران خراب
وبلاد صقيعه من الدمار
"يامحمد أحمد همتك"
إيدك مع إيد قتلتك
تسكت تهد
يامحمد احمد همتك
نفضح نضال الواهمين
نفسح مجال
لى ناس حقيقه
وناس رُجال
حارين كما هُم
ماختو إيد فى إيد عدوهم
لسه ماملوا النضال
واقفين ألف
أحمر عديل
يامحمد أحمد خلّهم
العرفة قسمه
الحكمة ترزح تحت ظلم الأنظمة
يامحمد احمد مابتقصر
لما ن يفرتك شملهم
لما ينكشف الخداع
الدنيا كيف بتلمهم؟
بس خلّهم
معروف نضالهم بالهزال
موعود زمانهم بى زوال
تشهد لهم كل المنابر فى المنافى
إنو غيرهم أصلو مافى
وإنو سر اللعبة يكمن
فى التمترس خلف ماضى
خلف فكره
إتناثرت بين المواقف
"وينكم إنتو"
" الكنتو إنتو"
وين غناكم .... وين
زغاريد عزه
وين النيل
ووينن ملايين القصايد؟؟
لما نفس الشعب هداها المشانق
لما كنت محمد أحمد جد حقيقه
بهرب السجان وبمرق
وبتمرق الناس الشوارع
ترجع الغنيات تعبّر
عن مواجدنا وتدافع
تنتصر لى كل من جاع
أو تشرد
وتنتقم من كلّ من صافح
وأيّد
لما كنت محمد أحمد جد حقيقه
لما تقضى الليل مُطارد
بين ندوه
وإجتماع سرى ومؤكد
بين مكتب أمن
بيت أشباح مُهدد
يامحمد أحمد همتك
الليل طويل
الموقف أصبح جد هزيل
الناس تمش من غير دليل
إيدك على إيدى
أحسن من تكون فى أيدى من سفكو الدماء
يامحمد احمد ماكنت قايل
إنو فى يوم تبقى ديل
وتبقى واحد بس عميل...
إبنعوف
يونيو- شهر الخراب
|
|
 
|
|
|
|
wesamm
فيس بوك
تويتر
انستقرام
يوتيوب
بنتيريست