قضينا وقت جميل في مسبح الرملة البيضا... حانت لحظة العودة فالآن الساعة التاسعة، إرتدينا ملابسنا بعد أن شربنا بعض فناجين من القوة التركية ودخنت أنا ونضال التي هي أيضاً مدخنة شرهة وقمنا لنُودِعْ لحظات جميلة وسعيدة قضيناها نسبح شتاءً ... عندما تسعدك الأقدار تهييء لك السبحة شتاءً في بلد شتاءه قارس ، نعمة حتى تسجل ذاكرتينا بعض أوقات سعيدة لن تُمحى من الذاكرة لأنها بقرب الحبيب... هنا ودعتنا نضال على وعدٍ منك لها بأن تعطيها قرارك الذي سيتيح لها أن تكون أم العروس وأن تخرجي من بيتها في ثوب الزفاف وكان وعدك لها غداً العاشرة صباحاً أن تتوقع منك مكالمة. ثم خرجنا وبدأت أنت الحديث معي ونحن في السيارة: - عاوزة أقول ليك حاجة ما عارفه إن كانت مهمة بالنسبة لك أن تعرفها أم لا ؟ - موضوع مهم أوممكن تأجيله لحدي ما نوصل ؟ - لا موضوع عادي ولكن سأبدأ هنا بطرح سؤال ربما يكون غريب شوية أو الرجال أظن بتناولوه على إستحياء؟ - قولي شوقتيني!! - رأيك شنو في الختان؟! - والله يا روحي عادة ذميمة من المتوارث؟ - ليه يعني في نظرك عادة ذميمة ما هو جزء من تقاليدنا من زمن حبوبتي وحبوبتك!! - يا روحي ما قلنا حاجة، لكن إنتي رديتي على سؤالك بنفسك هي تقاليد سويناها برانا.. بدينا بالفرعوني وإنتهينا بالسنة وأظنها عادة بدأت تنقرض ، وأنا ضدها لثلاث أسباب الأول أن الجسم وديعة الله عند المخلوق ويجب عدم التصرف فيه بقطع جزء أو كل إزالة إلا إذا كان هنالك حالة طبية تستدعي بتر أي جزء من أجزاب الجسم؛ ثانياً هو حرمان للأنثى من حقها في بلوغ ذروتها ونشوتها بطريقة طبيعية وده تشويه في خلق الخالق له إنعكاسات نفسية.. وكل شيء خلقه الله كان لحكمة وسؤالي هل أمنا حواء تمّ ختانها؟! أما ثالثاً عند الولادة أعتقد أن الختان يسبب مشكلة وبعرض الحياة للخطر رغم عدم علمي بالتفاصيل العلمية، هذا هو رأيي. - عموماً فهمت رأيك ولما نوصل حأقول ليك أسباب سؤالي. - خلاص وصلنا وممكن توريني الأسباب لو عاوزة. - زي ما قلت ليك قبل كده أنا وحيدة أمي وأبوي وأمي طبعاً كانت متعلمة وبتشتغل وأبوي راجل مستنير ومتعلم. علشان كده كانوا ضد الختان ولما حبوبتي قالت لي أمي بتين بتطهروا البت أمي وأبوي رفضوا مما أغضب حبوبتي ، وقالت ليهم : دي ما عوايدنا دي عوايد الخواجات والبت كان ما ختنوها حتتعب في بلدنا الحار ده وبعدين ده سنة وإمكن السبب لما سافرتوا البعثة الخواجات خربوا عقلكم!! - يعني إنتي... - آي - والله أمك وأبوك فعلاً مستنيرين وكمان زي ما إنتي عارفه أم الأولاد ما كانت سودانية... يعني ما بعرفوا الختان وحياتي الخاصة معاها كانت طبيعية جداً وكنت عارف طبعاً شعور الأنثى عند ممارسة الحب عندما يكون كل شيء طبيعي وطبعاً عارف تعقيدات الختان وتأثيره. كمان بتي دكتورة صيدلانية وطبعاً العملية دي ما وارده بالنسبة لها. - يعني الموضوع ده ما بفرق معاك؟... لأنو كان سبب خلاف في حياتي الماضية. - طبعاًلا بل وأرفضو. خلينا من الموضوع ده الليلة أنا حأسهرك في ملهى الهمبرا... - ما عندي مانع محل ما توديني وديني بس أنا حأعمل شوية مكالمات هامة وبعد ما أنتهي نمشي أي مكان إنت عاوزه!! - طيب أيه رأيك في نسكافي؟ - كويس بس بشرط أعملو أنا...عشان شايفاك مندمج مع الفيلم الرومانسي !!
دخلت وعملت النسكافي وبينما هي في المطبخ أرهفت السمع لأجدها بتتكلم في التلفون ومن سير المكالمة عرفت أنها بتتكلم مع أمها وسمعت كلمة ( الله يبارك فيك) وكأنها رد على كلمة ( مبروك) وشوية كمان تواصلت المكالمات .. ولحدي ما قلتي لي هاك السماعة كلم (ص.م) صديقك الشاعر وقريبي. - أزيك عامل كيف - في أمان الله وشغال مرشد سياحي لقريبتك... - مبروك يعني حتجونا عرسان... والله دي كانت أمنية وتحققت ... أنا قلت ليها قبل كده والله مافي واحد حيقدر يسعدك زيو.. وإنشاء الله يبقى من نصيبك وكان حصل لآزم تهاديني بساعة رولكس عشان أنا سبب إنضمامو لصالونك. والله ما تعرف أنا فرحان ليكم قدر شنو... مبروك وألف مبروك وحننتظر عودتكم عشان نحتفل. وبعدين حقو في أجازة الصيف تمشوا الخرطوم عشان تتعرف على نسيبتك والله أنا بحسدك على نسيبة زي أمها ما إنت عارف المرحوم كان شاعر رقيق. - شكراً وأنا عارف مشاعرك نحوي ونحوها ... المهم وصيها عليّ . - ما محتاجة توصية ما إنت زوج وحيدتها... والله بالرعم من إنها إتدلعت شديد لكنها ما أساءت لهذا الدلع ده الدلع المحمود. مع السلامة وبدأ الحوار التالي وبدأتِ: - كلمت ماما وباركت لي وقالت ليّ ألف مبروك والله يهنيك وعلى فكرة قالت بتعرف أهلك كلهم وبالذات خيلانك وخالاتك وقالت بلمهم نسب وبينها وبين خالتك حياة صداقة وكانت دفعتها. أما صاحبك فأنا عارفه دي رغبتو وما إستغربت لما قال لي مبروك وكأنه عارف أنو الموضوع كان موضوع وقت بس وإنو لو أتيحت الفرصة لينا نقعد برانا ربما الموضوع كان يتبلور ... ولكن الأقدار أرادت أن نلتقي هنا لوحدنا وكانت فرصة هيأتها الظروف... والله ما قادرة أوصف ليك مقدار سعادتي... صاح ما بعرف قيمة السعادة إلا الفقدها. - أنا أسعد منك يا حياتي... المهم كلمي نضال حسي .. حار حار!! - ما تخليي الموضوع ده لي بكرة أحسن تفتكر أنا حأموت على العرس!! - إنتي ما تموتي على العرس .. إنت أحيي ليهو وفيهو وخليني أنا أموت على العرس!! عليك الله كلميها حسي... علشان خاطري!! - خاطرك غالي يا حبيبي حأكلمها بس أديني النمرة. - أنا بطلبها ليك ... ضربت النمرة وكانت نضال في الخط : - هاي شو خير ، لا .... عاوزة تكلمك!! - هاي... شو إتصلت بالماما؟ - فعلاً كلمتها - شو قالت ؟ وهيك عالسريع؟!! - ما تكسفيني يا لولا... عموماً كلمتها وكلمت بعض الأقارب ووافقوا وباركوا. - هنيالك ... بكرة الصبح برتب مع المأذون والشهود ... العصر عالكوافيرة وعلى فكرة لازمنا فستان زفاف؟ - الفستان موجود والطرحة إشتريناهم لما رجعنا من بشري ... صاحبك شاف فستان في فترينة وعجبه وإشتراه مع الطرحة. - شو كنتوا مخططين للموضوع؟ - لا والله كانت مجرد أمنية في نفسه ولكن ربنا أراد أنو يكون من نصيبي وتكوني إنت أم العروس - على فكرة ما بنصدق نلاقي هيك مناسبة علشان نهيص ونزغطط!! - إنشاءالله ربنا يديم عليك الفرح يا يالولو... تعبناك معانا؟ - ولو إنتو عزاز علينا ... بدنا سعادتكم. - صاحبك عاوز يسهرني الليلة في الهمبرا - لا ما بصير اليوم إرتاحوا ... بكره حتتعبوا وخلوا السهرة في الهمبرا بكرة بعد ما ننتهي من الأجراءات أنا حأرتب كل المواضيع ما تعتلوا هم... إرتاحوا اليوم ... هاي نصيحة!! - باي ... بكرة حأتصل بيكم الصبح.. باي إتفقنا أن نعمل بنصيحة نضال ونرتاح الليلة لأن غداً حينتظرنا الكثير وإلى الغد حبيبتي...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Muna Khugali
فيس بوك
تويتر
انستقرام
يوتيوب
بنتيريست