|
|
 عمّار محمد آدم : يوميات من بيوت الأشباح
|
يوميات سجين سياسي: لقد كنت هناك!
بيوت الأشباح لاذلال الرجال
حينما صعدت في عربة اللاندروفر الخضراء الواقفة امام قسم الجغرافيا جامعة الخرطوم كان مئات الطلاب قد تجمعوا حولي لاكشف لهم كيف تمت عملية تزوير الانتخابات وكيف ان الترابي بنفسه يشرف على تلك العملية من خلال وجوده في مؤتمر الشعب العربي والإسلامي والذي كان يقع في شارع البلدية على بعد مئتي متر من المكان الذي كنت اخاطب فيه الطلاب وانطلق الطلاب من بعد يحاصرون مكتب مدير الجامعة ومكتب الترابي في مؤتمر الشعب العربي كنت ادرك انهم سوف يقبضون علىَّ في هذا المساء ولكنني كنت اعتزم الا استسلم الا بعد مقاومة شديدة ولكن سحب الدخان الكثيفة حاصرتني والتي كانت بفعل القنابل المسيلة للدموع وتم القبض علىَّ بسرعة، والقيت كما يلقي الجوال في سيارة مكشوفة حيث انهالت علىّ هناك الضربات بعصى يحملها أكثر من شخص وكان الشارع الذي يربط كلية الهندسة بالقيادة العامة مغلقاً أمام حركة المرور. لذلك لم تمض بضعة دقائق والسيارة تنهب الارض نهباً حتى وجدت نفسي في داخل جهاز الامن العام حيث اجبرت هناك للجلوس على الارض مستقبلاً الحائط وانا اتبادل معهم الشتائم والاساءات وجاءني الضابط عاصم كباشي والذي كنت اعرفه منذ مايو ليقول لي "كل كلامك سجل بالصورة والصوت انت شنو ايام مايو متعبنا وأيام الاحزاب عامل مشاكل وبعد ما حكومة الله جات برضو عامل مشاكل، فرددت عليه قائلاً انت في مايو شغال امن وفي الاحزاب حايم وبرضو هسي في الأمن دا كلو عشان الماهية .. قال لي عاصم كباشي (يعني تقصد اني مرتزق) فقلت له (بالضبط الحمد لله قلتها بلسانك) هنا قال للعساكر (اعزلوه) ولم افهم ما يعني ولكنهم اركبوني سيارة واجبروني على ان يظل رأسي على المقعد خلال الطريق ورفعت رأسي وأنا داخل منزل غريب وهناك صف من الفرق الصغيرة في شكل جماعات لم اكن ادري ما هي وفتحوا احدى الابواب وقذفوا بي في داخل تلك الغرفة والتي كانت عبارة عن زنزانة صغيرة وهي متر في مترين وضعت فيها في ذلك البرد القارس وأنا بلا فراش أو غطاء وخلعت حذائي وجعلته وسادة بعد ان خلعت قميصي ووضعته عليه وبعد قليل اطل علىَّ وجه قبيح لشخص تبدو على وجهه الشراسة وسيما العقد النفسية ونظر إلى بعينين حاقدتين وهو يمد لسانه ليلامس شاربه الطويل وذكر لي أنه يعرفني وانني في مرة من المرات انتصرت لامراة كانت تقود سيارة وصدمت دراجته النارية وبدأ يكيل لي الشتائم والسباب ويحاول ان يقنعني أو ان يقنع نفسه لست ادري أنني شخص سيئ وردئ جداً بسبب تلك الحادثة ثم تحدث بعد ذلك عن انني احلق لحيتي لذلك فإنني لا صلة لي بالاسلام واصبح يتردد علىَّ كل حين يبث في سمعي كميات من عقده النفسية ولكم كنت أتأذى نفسياً من تلك العبارات بل من تلك النفس التي تخرج منها تلك الكلمات حاولت ان اخاطبهم مستنكراً هذا الامر ولقد صدمت صدمة قاسية حينما علمت ان في بقية الصف أشخاص آخرون قضوا في هذا المكان مدداً طويلة وكنت اتلو عليهم بصوت عال قوله تعالى (إن فرعون وهامان وجنودهما كانوا خاطئين) وأقول لهم إن الله لم يستثن الجنود عن فرعون وهامان ولكم أثر في نفسي كثير جاري في الزنزانة التي على يساري والذي كان يخاطبه احد أفراد الأمن مذكراً اياه بحال أسرته وأطفاله وأجهش الرجل بالبكاء فتمزق قلبي من شدة الألم.
قضيت تلك الليلة التي كان يزعجونني فيها بالطرق على الباب حيناً وباضاءة اللمبات وقفلها وبالحديث المتكرر السخيف الذي لا معنى له وفي الصباح اخذوني إلى مباني الجهاز مرة اخرى وهنالك وضعوني على الارض وجاء شخص يطلب مني الوقوف ثم الجلوس وهكذا ويتحدث من خلفي وحينما احاول ان استدير لأرى وجهه يعطيني ظهره ثم جاء شخص آخر ملثم وامسك بانفي وأصبح يجره بعنف ويحركه يمنة ويسرة وآخرون من حولي مدججون بالسلاح وأذكر أنني في تلك الساحة شهدت الدكتور نافع علي نافع مدير الجهاز في ذلك الوقت يدخل ويخرج وهو في لحظة انفعال خاصة وعلمت ان السبب هو ان هنالك عدد آخر من الطلاب قد تم اعتقالهم في ذلك الوقت ثم جاء اللواء حسن ضحوي نائب مدير الجهاز وحاولت مخاطبته ولكنه منعني من ذلك.
حتى ذلك الوقت كنت اعتقد ان الأمر عادي وانه حبس على ذمة التحقيق ولم اكن ادري انه ينتظرني الكثير في بيوت الأشباح ولمدة أربعة أشهر قضيتها في الحبس الانفرادي وأنا فقط بالملابس التي دخلت بها السجن.. مرة أخرى ارجعوني بتلك الطريقة التي اجبر بها على وضع رأسي على مقعد السيارة حتى لا أعرف المكان الذي سوف اذهب اليه وأعادوني إلى زنزانتي من بعد ان احكموا قفلها وجلست على ارض تلكم الزنزانة والتي تحتفظ بالبرودة داخلها وكأنها ثلاجة فواكه في ذلك الشتاء من العام 1993م وأنا داخل الزنزانة دخل على الأخ صلاح قوش داخل الزنزانة وجلس معي على الأرض ثم اخذني إلى مكتب في ذلك المكان وقدم اليه مشروب الكركدي فأعطاني منه وبدأت عليه علامات التأثر ولم يتكلم معي ولم اتكلم معه في الموضوع ولكنه قال لي "عشوائي" وخرج ولم اره بعد ذلك اليوم الا بعد خروجي من الاعتقال.
كان يأتيني في المساء الضابط المناوب ويقول لي الحديث النبوي (من جاءكم وامركم جمع يريد ان يشق عصاكم ويفرق جمعكم فاقتلوه) حاولت كسر الخوف الذي يسيطر على المكان من خلال تحديهم بالآذان مرة وبالخطب مرة أخرى وبقراءة أشعار السجن بصوت عالي وكان معي في الزنازين الأستاذ سيد احمد الحسين والأستاذ يوسف حسين والدكتور عبد الله غابات والأمير نقد الله وكثيرون آخرون.
اشتدت ثورتي وغضبي حينما رأيتهم يضربون شاباً من مدينة الثورة بأمدرمان وكان ذلك الشخص الذي يقوم بعملية التعذيب يجهز ادوات التعذيب وكأنه يعد الشيشة او يجهز لجلسة سكر فهو يجمع الثلج الذي اعد للتعذيب باستمتاع ثم يحضر الماء بمثل ذلك ويحضر الكلابيش بذات الطريقة ويضع السوط ويطلب من ذلك الشاب إخراج يديه من فتحة الباب العلوية ويربط يديه مع الطبلة بالخارج ويخرج رأسه من فتحة الباب ليكون كل جسمه داخل الزنزانة ويداه ورأسه خارجها ثم يبدأ في صب الماء والثلج على رأسه في ذلك البرد القارس والشاب ينتفض من شدة البرد ويطلق صيحات ألم مكبوته كان ذلك يحدث من بعد ان يخلد الناس للنوم وحينما تهدأ حركة السيارات والناس في الخارج والمكان في قلب الخرطوم لأنني كنت اشاهد مباني (سيتي بانك) ولكنني لا أعرف تحديداً الاتجاه.
وتستمر عملية تعذيب ذلك الشاب التي يتخللها الضرب والاساءة بالفاظ جارحة لعدة ساعات وقد كان يأتي إلى دائماً ذلك الشخص المشوه الذي كان يقوم بعملية التعذيب ليقول لي ان ذلك الشاب موجود هنا بأمر والده الذي طلب من جهاز الأمن تأديبه!!
من بعد الساعة الحادية عشر يتحوّل المكان إلى رعب وخوف فلا تسمع الا بعض أفراد الأمن يطوفون على الزنازين يكيلون الشتم والسباب للناس ويقرعون الأبواب بعنف ويخرجون البعض ويضربونهم ويعذبونهم في الساحة التي امام الزنازين لإحداث أكبر قدر من الارهاب وحتى ذلك الوقت كنت أكاد لا اصدق.
* الكاتب من قيادات الحركة الاسلامية وقد لعب دوراً في تنفيذ انقلاب 30يونيو 1989، غير انه اصطدم تنظيمه بعد ما كشف عن تزوير الاتجاه الاسلامي لانتخابات جامعة الخرطوم في اوائل عقد التسعينات حيث تم اعتقاله للمرة الاولى وقد اعتقل لعدة مرات، قبل ان يعلن انهاء علاقته بالتنظيم الاسلامي الحاكم.
http://www.alayaam.info/index.php?type=3&id=2147503212
|
|
 
|
|
|
|
|
|
|
|
Re: عمّار محمد آدم : يوميات من بيوت الأشباح (Re: مكي النور)
|
| Quote: دخل على الأخ صلاح قوش داخل الزنزانة وجلس معي على الأرض ثم اخذني إلى مكتب في ذلك المكان وقدم اليه مشروب الكركدي فأعطاني منه وبدأت عليه علامات التأثر ولم يتكلم معي ولم اتكلم معه في الموضوع ولكنه قال لي "عشوائي" وخرج ولم اره بعد ذلك اليوم الا بعد خروجي من الاعتقال. |
إن قدر لصلاح قوش أن لا يصدق إلا في شيء واحد، فقد صدق والله في وصفه لعمار محمد آدم بأنه عشوائي ..
كان هذا الكائن عشوائي في مشيته وكلامه ونقاشه وهتافه واختلافه مع الآخرين ..
كنا نهرع بين الحين والآخر من ركن نقاش لآخر عند حدوث جلبة .. فنجد الرجل متأبطاً آلة أو حجراَ ضخماً يريد أن يهشم به رأس أحد خصومه .. ولكننا لم نر قط أنه وضع ما يحمل على جسد خصم من خصومه ..
حتى في طريقة فتكه بالآخرين كان عشوائياً ..
فعشوائي أنسب الأوصاف التي ينعدم البديل لها في وصف شخصية عمار .. أذكر مرة كان يهورط كعادته وسط مظاهرة خارجة من مسجد الجامعة فجاء صاحب تاكسي يريد المرور عبر شارع الجامعة فكان أن أخذ هذا العشوائي بمقدمة التاكسي ودعا الآخرين لقلب العربة وبداخليها صاحبها !!!
عشوائي ..
جاد
| |
|
|
|
|
|
|
|
|
|
Re: عمّار محمد آدم : يوميات من بيوت الأشباح (Re: مكي النور)
|
الاستاذ مكى والاخوة
Quote: أذكر مرة كان يهورط كعادته وسط مظاهرة خارجة من مسجد الجامعة فجاء صاحب تاكسي يريد المرور عبر شارع الجامعة فكان أن أخذ هذا العشوائي بمقدمة التاكسي ودعا الآخرين لقلب العربة وبداخليها صاحبها !!!
|
الكلام ده لو صاح ده يكون عشوائى وبلطجى كمان
| |
|
|
|
|
|
|
|
|
|
Re: عمّار محمد آدم : يوميات من بيوت الأشباح (Re: مكي النور)
|
الاخ بكري شكرا علي اضافة الصورة.
الاخ ترهاقا، قلت:
| Quote: الكلام ده لو صاح ده يكون عشوائى وبلطجى كمان |
يا صديقي لم يتحول صلاح قوش الذي اطلق لفظة عشوائي علي الاخ عمار الي حكيم زماننا لنتبني مقولاته، انه جزء من نظام لم يعد هناك من يشكك في فساده والجرائم الرهيبة التي ارتكبها في حق شعبنا. بالعكس أري أن توصيف صلاح قوش يحسب للاخ عمار الذي اختار أن ينحاز للمبدأ ولم يكن صعبا عليه ان يجد مغانما لا تحصي لو لجأ للخيار السهل وهو المواصلة بعد ان انكشف له كل شئ.
الواقعة التي ذكرها الاخ جاد أعلاه لا يمكن ان نصدر بشأنها حكما ونحن نجهل ملابساتها، ثم لماذا لا ندين اسلوب العنف الذي لم يبتدعه دون شك الاخ عمار بل كان ويظل حتي الان خطا للتنظيم الذي أحرق جامعة امدرمان الاهلية وهو في السلطة فما بالك ببمارساته السيخية المعروفة في الجامعات في فترات اخري وفي فترة الحكم الديمقراطي، حيث شهد مسجد الجامعة نفسه تحرك التنظيم البلطجي الي صحيفة الوطن لاحراقها وغيرها من الحوادث التي انتهت بالبلطجة الكبري وهي الانقلاب علي الشرعية وبماذا نسمي ممارسات النظام الدموية؟ الا تتواري البلطجة خجلا أمام ممارسات النظام منذ استيلاءه علي السلطة؟
ولماذا يا اخي تتجاهل الموضوع الاساسي هنا وهو بيوت الاشباح، إن كان عضو سابق بالتنظيم الحاكم هو الاخ عمار يتعرض الي ما تعرض اليه فكيف نتصور ما حدث للاخرين؟
| |
|
|
|
|
|
|
|
|
|
Re: عمّار محمد آدم : يوميات من بيوت الأشباح (Re: مكي النور)
|
شكرا جزيلا أخي مرتضي علي المشاركة القيّمة. ولاشك انك والاخ عمار تملكان الكثير من الحقائق بوصفكما شاهدي عيان علي فترة مغرقة في الظلم والظلام. وكشف تلك الحقائق ينير الطريق للأجيال المتوثبة للحرية.
وتحية للاخ عمار ومعك أخي مرتضي:
Quote: لنتضامن مع زميل البورد عمار آدم و كشف المذنبين الذين أحرقوا منزله
يجب أن يمثل مجرم الحرب صلاح غوش/قوش للمحاسبةلضلوعه في حريق منزل الزميل عمار
لنساهم مع الزميل عمار في إعادة تشييد منزله
|
| |
|
|
|
|
|
|
|
|
|
Re: عمّار محمد آدم : يوميات من بيوت الأشباح (Re: مكي النور)
|
حادثة التاكسي التي أشار إليها أحد المتداخلين كنت شاهدا عليها..
وكانت المظاهرة بسبب فوز الاتجاه الاسلامي في انتخابات ذلك العام..وكانت الحادثة بالقرب من المسجد..
المهم أن هذا (العشوائي) كان حينها مجاهدا..وقائدا لجحافل المؤمنين ..الذين يصفونه الآن بأنه مجرد عشوائي..
والأهم هو دخول الكيزان واشباههم ليدلوا لنا برأيهم فيما قاله هذا (العشوائي)..أو (المجاهد)..وعلى ضؤ اعتراف كبيرهم الذي علمهم السحر بتزوير الانتخابات..
| |
|
|
|
|
|
|
|
|
|
Re: عمّار محمد آدم : يوميات من بيوت الأشباح (Re: haleem)
|
| Quote: ولماذا يا اخي تتجاهل الموضوع الاساسي هنا وهو بيوت الاشباح، إن كان عضو سابق بالتنظيم الحاكم هو الاخ عمار يتعرض الي ما تعرض اليه فكيف نتصور ما حدث للاخرين؟ |
الاخ مكى
قصة بيوت الاشباح وما تم فيه من جرائم دى حاجة مدانة من عامة
الشعب السودانى ولكن انا قلت لو هو فعلا داير يقلب ليهو تاكسى بى ناسو
ده تفسره بى ؟ اما ما حدث للآخرين فانا وانت والسودان كله يعلم
إنو فى ناس إستشهدوا فى بيوت الاشباح وناس انتهكت رجولتهم .
ولك ودى
| |
|
|
|
|
|
|
|
|
|
Re: عمّار محمد آدم : يوميات من بيوت الأشباح (Re: مكي النور)
|
الاخ العزيز
مكى النور
ادناة حوار فى صحيفة الصحافة بكل أسف لم احصل على رقم العدد والتاريخ
فى باب "ونسة".. مع الأخ عمار احمد ادم, ارجو ان يساعد فى التعريف اكثر
بافكارة ومواقفة السياسية, ويكون منسجم مع فكرة البوست
تحياتى
_________
أنا مزروع في الجبهة من سنة خامسة ابتدائي
عرسته لكن مااااتزوجت لسع ع ع ع
سمّاني عامل التلغراف
عمار محمد آدم.. يعرفه البعض عضو بالاتجاه الاسلامي ثم الجبهة الاسلامية يهتف ويخطب في التجمعات السياسية وغيرها.. ثم ترك كل هذا ومضى الى حزب آخر (صباحاً يتركه مساءاً) جلست اليه انا خليفة حسن بله وحذفت بعض اسئلتي له لاجاباته التي قد تؤدي الى فصلي من الجريدة طبعاً.. وتركت الاخريات وربنا يجيب العواقب سليمة له ولي وللصحافة.
* انت منو؟
انا عمار محمد آدم، ولد من اولاد كسلا اتولدت في القري
* سنة كم؟
9/7/1961م القرير محافظة مروي
* انت من القرير الوداك كسلا شنو؟
لا ابوي اصلا عامل - محولجي - في السكة الحديد وكان في سنة 1961م في الابيض قام حجز لي امي في القطر وسافرت علشان تلدني في القرير.
* وسماك عمار على منو؟
ما سماني ابوي .. سماني عامل التلغراف
* كيف
ابوي بعد ما عرف انو امي جابت ولد رسل تلغراف قال سموهو عماد قام بتاع التلغراف داس بدل النقطة شرطة.. النقطة في التلغراف دال والشرطة راء . قامت وصلت البرقية سموهو عمار وبعد داك بقي ابوي امام الامر الواقع وصرت عمار...
* تفتكر كان ممكن تكون عماد؟
افتكر انا عندي مؤهلات ابقى عماد ود ظريف ولطيف وممكن تعتبروني وسيم .. لكن عمار خلتني الزول الدشن ده.
* كنت اول الابناء ؟
لا كنت الثالث بعد بنتين.
* ذكريات طفولتك؟
اول حاجة عندنا خالتنا حواء قالت ليهم عثمان حسين بحييكم وبهنيكم بالمولود لانو صادف انو مع ولادتي كان عثمان حسين بغني.. لكن الحاجة الحكوها لي ومؤكدة انو انا من بطن امي ما في زول استلمني.
* كيف يعني
يعني من بطن امي الداية ما لحقت تمسكني وقعت في الطشت طوالى وكان فيه موية حارة.
* دي الوقعة اللي يوم الليلة ؟
بالضبط كده... الوقعة الىاها .. دي مؤشر
* انت شايقي؟
لانو ابوي كمساري فكل سنة بنقعد شهرين في القرير ، الاجازة لكن موطني كسلا حي العرب.
* ..............؟؟
انا فتحت في كسلا في قطاطي السكة حديد وريحة السكة حديد عشان كدة انا مرتبط جدا بالسكة الحديد ولي هسة انا بمشي المحطة اشم ريحة القضبان والورشة.
* السكة حديد وعمالها ارتبطوا بالىسار؟
ابوي كان يساري ونقابي وهو القاد القطر المشهور بتاع اكتوبر من كسلا وجابو هنا وساهم بي كدة في ثورة اكتوبر المشؤومة انا بعتبرها ثورة مشؤومة.
* ابوك يساري وانت مشيت يمين.؟
ابوي في النهاية بقي متدين لكن بنفس طريقة الىسار.. بقي انصار سنة لكن مازي هسة.. لا.. انصار سنة بتاع نضال وتحرر ما زي بتاعة الليلة دي شركات واموال واستثمار ومنظمات..
* ..........؟
ناس ابوي زمان بشبههم هسة ابوزيد محمد حمزة مقاومة وثورية.
* متين دخلت الىمين؟
الناس لغاية الليلة بعتبروا فيني ريحة اليسار .
* انت كان داير الجد ناس كتار بعتبروك .. (مجهجه ) ساكت !!
الجهجهة دي عاملة انا براي..
* قاصد يعني
قاصد طبعا..
* وجواك محدد موقفك؟
طبعا لكن الزمن عابس.. والزمن عبث ساكت.
* طيب انت جواك شنو؟
سوداني ود بلد... سوداني ممعن وموغل في السودانية ..انا اصلا من الشمال متربي مع الهدندوة وبحب السكة حديد وجامعة الخرطوم.
* اول مرة تجئ الخرطوم للجامعة؟
قبلها ما بعرف حاجة اسمها الخرطوم عندي بنطلون واحد ! كنت وانا صغير بسقوني اللبن من الضرع طوالى .. وكت جيت الخرطوم جيت بدون شنطة استقبلوني ناس الاتجاه الاسلامي .
* انت جيت قاصد الاتجاه الاسلامي؟
انا كنت كوز من سنة خامسة ابتدائي.
يا زول استقبلوني وودوني استديو بابا صوروني بي كرفتة .. كنت نحيف واضنيني كبار حتى في واحد حلفاوي قال والله انت يا عمار لو قعدت في بطن امك 3 شهور تاني كان طلعت حمار...
* ودخلت معمعة السياسة؟
طبعا رشحوني للانتخابات من اول سنة جيت لكن التسجيل عطّل دخولي الاتحاد 1981م،
* ندمت ؟
بالعكس .. كنت سأكون لي هسة لاصق في القيادة .. كل الناس الدخلو الاتحادات دي تلقاهم ما بقبلوا يكونوا موظفين او مواطنين عاديين ... الحمد لله ما دخلت الاتحاد كنت ما حأقبل بعد داك الا اكون زعيم... ودي مشكلة السياسة السودانية.
* .......
قعدت في الفترة ديك مع ناس عبيد ختم شيخ صبير في الجامع وعلىهما رحمة الله.
* ..........؟
انا ما كنت متدين كتير لكن كنت ساكن في الجامع وعندي كافتريا .. كنت مرتاح وعرست وعمري كان 22 سنة وانا طالب.
* قريبتك؟
لا لا ... عرستها من هنا .. بري والجريف عرفتها في التنظيم وعقد لي الترابي سنة 84 وبنتي الكبيرة دخلت الجامعة السنة دي .
* استقبلوها الاتجاه الاسلامي؟
ما اظن يستقبلها اي زول... حيستقبلها منو يعني؟ الوطني ولا الشعبي ولا ياتو جناح في انصار السنة
* في واحد حكى لي انك هجيت نفسك في جامعة الخرطوم؟
ايوه جيت الجامعة متأخر وقامت واحدة شافتني وقالت : سجمي ده بقرأ معانا ..
قمت قلت ليهن:
سجمكن بالحيل سجمكن
وسجمان انا الساكن بلدكن
وسجمان انا الحزين المركن
زي وحشا طلع بالليل خلعكن
وزي اسدا نهر بالليل فزعك
غالبني الكلام ما مخي شرك
لكن تمام بالحيل سجمكن ..
* حتى الآن لم تهج نفسك؟
بعد داك قلت اهجو نفسي:
ما شفت الزمن يا اب فقرة جابك راجع
زي قدرا كعب يا اب فقرة جيتهم واقع
زعزعت البنات قلقلت نوم الشافع
مالك بالجامعات يا اب فقرة شوفلك جامع
ما شفت الجامعات يا اب فقرة صارت روكه
داك ياكل في اللبان ويغني بالدلوكه
وديك تشحد في زميلها يقسملها البازوكه
زمن اولاد الدشوش ما بياكلو بالمفروكه
وزمن اولاد المدن ما جربوا السلوكه
زمن المتقرضمات ما قربن للدوكه
ما تقول الزمن يا اب فقرة جاني علىك
ده الحال الكعب سويتو بي ايديكا
خليها الديار ليه تسعى للمابيكا
لايوقا عديل حاكيت ملاح الويكه..
قال اب فقرة قال يا اخوان كلامكم صاح
خليتها الديار ما اظن وراها نجاح
سوق الناقة وين هناك بس ارتاح
وزي كل الرجال اجلب جمال وسلاح.
* متى بدأت رحلتك نحو كيانات وتنظيمات اخرى غير الاتجاه الاسلامي؟
- أنا رفدوني من الاتجاه الاسلامي.
* ليه؟
- السبب مشكلة مع طالبة في الجامعة قامت هي في نقاشنا مع بعض ضربتني كف.
* وكان السبب يستحق هذا الكف؟
- انا كنت بتكلم معاها عن الزي اللابساه فما احتملت كلامي.
* واتصرفت كيف انت؟
- انا دفعتها بس.. وده ما افتكر انو السبب الحقيقي لرفدي لكن لانو بعد اعلان نميري للشريعة قلت ليهم بعد ده انحنا متلمين ليه مش عشان نعمل شريعة اسلامية خلاص نميري عملها لا يجوز بيعة الاثنين بايعنا نميري بالتالي سقطت البيعة الثانية ويظهر خافوا من انتشار التيار ده فاستغلوا مشكلة الطالبة وفصلوني الحمد لله من التنظيم بعد مجلس محاسبة ونشروا الخبر في جريدة «آخر لحظة» في جامعة الخرطوم..
* اظن انو كف غالي جداً؟
- شوف الكف ده نوع من العلاقة.. مش الشاعر قال: قد جاءني سبُك لي فسبي
ألم يجري اسمي على فيك فحسبي
* لكنك عدت بعد الانتفاضة للجبهة؟
- نميري اعتقلني معاهم قبل الانتفاضة وبعد طلعنا عملوها جبهة واسعة تلم اي زول فلقيت نفسي معاهم تاني.. وكنت بمثل التيار الايراني وكنا متحمسين للثورة الايرانية..
* متين كسلت من العمل في الاتجاه الاسلامي والجبهة؟
- أنا اعتقد اني اصلاً ما كنت اتجاه اسلامي حتى من خامسة ابتدائية.. الاتجاه الاسلامي كان بالنسبة لي مجتمع.. وأعتقد اني كنت مزروع في الاتجاه الاسلامي من خامسة ابتدائى.
* الزارعك منو؟
- القدر.. عشان اكشف كتير من المستور.. كنت متفرج.
* وخليتهم؟
- انا قلق جداً حتى في الجبهة كنت بشتغل في مكتب لمدة كم يوم كده وابدي قلقي لارحل لمكتب آخر.
* دي الجهجهة الاتكلمنا عنها قبيل؟
- عندي اخوي ما بستقر في شغل.. قالت امي كلما اجي من كسلا القى خالد غير شغلو وعمار غير حزبو..
* لكنك استقريت مع زوجة واحدة؟
- الآن اكملنا 20 عاماً في علاقة ما اتخللتها اي مشاكل انا عايز اتزوج زوجة ثانية اعلنها لكن بفهم.
* فهمك شنو؟
- الاولاد يكبرو ويوعوا ويفتحوا، التانية دي زواج.
* والاولى كانت شنو؟
- الاولى عرس.
* وفي فرق بين العرس والزواج؟
- عندي قصيدة قلت فيها:
لو تعرفي انو الزواج ماهو العرس
اصلو الزواج لما النفس تهوى النفس
ولما النفس تهوى النفس
يبقى الزواج تمّ وخلص
اصلو الزواج ماهو المهر
اصلو الزواج نفحة قدر
ولما الشجر يهوى الشجر
من غير مهر ينتج ثمر
لو قلت نكتب للكتاب اصلو الزواج في الغيب كُتِب
يعني بتأكد في القدر حاشا القدر يصبح كضب
فاعتقد انو الزواج فهمو عميق.
* يعني الزواج عند عمار هو درجة اكبر من العرس؟
- استعير مقولة الاستاذ محمود محمد طه: زوجتك هى انبثاق نفسك عنك خارجك..
التعبير بتاع الضلع مجازي، الله قال من انفسكم ما قال من اضلعكم، الله شالها من نفسك وانت بتفتش عن جزء من نفسك لتكتمل.. والمرأة زي ما قال ابن عربي: المرأة معراج روحي..
* طيب في علاقتك مع اولادك برضو بتعيش بنفس طريقتك خارج البيت؟
- انا زوج واب ممتاز.. انا الحياة بره ما معترف بيها لكن بيتي معترف بيهو عشان كده جادي جداً في بيتي.
* يعني انت مختلف جوه البيت عن خارجه؟
- انا في اليوم عندي ثلاث شخصيات بعيش بيها في شخصين بالصباح للسوق ووسط الناس وفي الجرايد ودي فيها عدم اعتراف بالحاصل واحساس بالعبث الفيهو وتمرد عليه وسخرية بالغة عليه.
في شخصية تانية بعيشها بعد الساعة الواحدة ظهراً لغاية بعد العصر دي في جامعة الخرطوم عندي علاقة وطيدة جداً واعتقد انو عندها هدف مستقبلي.. الشخصية الثالثة بعيشها مع اولادي في البيت من المغرب لغاية صباح بكره ودي فيها مسؤولية كبيرة.
* عندك كم ولد وبت؟
- انا ولدي الكبير اتوفى اسمو سياف كان عمرو سنتين اتوفى في يوم داير نعمل ليه عيد ميلادو الثاني:
كان سياف جميلاً كالقمر
كان سياف ضحوكاً قد تفتح كالزه
مات سياف بريئاً لم يمس احداً بشر
انها الاقدار تجري ليس يخطئنا قدر
بعدو (لينا) هى الآن طالبة بجامعة الخرطوم علوم، محمد غرة عيني ربنا يحفظو في الثانوي العالي ، ومودة تمتحن هذا العام للعالي، وابراهيم الشقي الفقُر عمرو 8 سنوات ونصف.
* علاقتك بيهم كيف؟
- عندي معاهم قصص ونكات.. يوم انا بتكلم مع صاحبي مغترب في التلفون بقول ليه والله كويسين وماعندنا اي مشكلة ختفوا السماعة وقالوا ليه بغشك والله ما عايشين كويس ولا حاجة.
* بتحاول تأثر على اتجاهاتهم؟
- شوف التربية بالتلقين ما بتنفع.
* طيب لو (لينا) جات قالت ليك انا بقيت شيوعية او حزب امة او غيرهما؟
- بي طريقتها لكن لو دايرة نصيحتي حا قول ليها ما تنتمي لي اي حزب خليك سودانية بت بلد انا نفسي اولادي كلهم يبقوا سودانيين اولاد بلد.
* هسه هم شايقية ولا اولاد خرطوم؟
- امهم محسية طبعاً وأنا حاولت ازرع فيهم حكاية شايقي دي لكن ما شايفها نجحت بالحيل هم مايلين على اهل امهم فبقيت ماسك في سوداني وغبش ما بتاعين دلع.
* انت دائماً بتردد انو الشايقية هى القبيلة الوحيدة الما عندها بديل في السودان؟
- ايوه كدي اتخيل السودان ده بدون شايقي.. ما ممكن.. الجعلية ممكن تلقي بدلهم الرباطاب.. والدينكا بدلهم النوير.. الدناقلة بدلهم المحس أو الحلفاوين، الشكرية بدلهم البطاحين، الرزيقات بدلهم المسيرية إلا الشوايقة.
* وده للحاجات الكويسة في الشايقية ولا العكس ذلك؟
- بصراحة أنا اعتقد انو الشايقية هم شعب الله المختار وهم ما محتاجين لزول يعترف بيهم وفي ناس بقولوا اصل الشايقية بجة وهناك شبه كبير بينهم. انا حأعمل مركز حضارة وثقافة البجه.
* بتسمع منو من الفنانين؟
- بحب غناء محمد وردي لكن ما بحبو هو.
* ليه؟
- مفتري ومغرور
* صحي بتاكل في كل الموائد وتنقل اخبار وتطلق اشاعات؟
- ايوه ده كله عدم اعتراف بيهم كلهم وسخرية منهم وعبث بيهم.
| |
|
|
|
|
|
|
| |
Waly Eldin Elfakey
JAD
ترهاقا
بكرى ابوبكر
Murtada Gafar
عمر ادريس محمد
فيس بوك
تويتر
انستقرام
يوتيوب
بنتيريست