تمـبس، إزيـك..والله يديك العافية... ويسامحك كمان (بالمـرة)!..وإن شا الله ما تشـوف ألم الفـراق؛؛ وكـان شـفتو إن شا الله ما تشـكيه!..( على طريقة الفكـي القال للزول: أكتب ليك حجاب كان الأسـد شافك ما يسكك، وكان سـكاك ما يحصلك، وكان حصلك ما ياكلك، وكان أكلك إن شاالله ما تنفعو)... بعـدين دا هو الغـنا العـديل الأنا قصدتو ليك في بوسـت التوقعات؛؛ وكدة يكـون توقعي صدق، باقي بس الأرجنتين!!.. كل التحايا والـود..
05-28-2006, 06:46 PM
tmbis
tmbis
تاريخ التسجيل: 10-19-2002
مجموع المشاركات: 24862
عيســــي عامل كيف ؟ بلاي أنت كنت بتتوقع حاجات زي دي ؟؟ طيب دي ما قاعده من زمـــان .. لكن المرة الفاتت كنت حاسي بيك ( لياقتك ) شوية تعبانة علشان كدا ما فتحت ليك ( الشباك ) دهـ لكن اكان دي توقعاتك القاصدهـ .. كلما تدخل البورد تعال اديها ( لفة ) بي هنا بتلقاني مجهز ليك حاجة طاعمه.. .. بعدين موضوع الارجنتين دهـ ياعيسي قلت ليك طلع من يدي .. اي كاس بتلعب في اي مكــان ( نحن ) ناس البرازيل ديل ما قاعدين نفرط فيهو.. حتى لو كاس العالم دهـ عملوهو كاسين برضو بنشيلهم.. شهر ستة قررررب ..
05-28-2006, 06:57 PM
tmbis
tmbis
تاريخ التسجيل: 10-19-2002
مجموع المشاركات: 24862
جــــاي تـــاني عثمان محمــد محمـــود خــــالد محجــــوب جاي تاني جاي تسأل عن حناني ما خلاص أصبح حكاوي واللي فات اتعدى فاني جاي تتوسل وترجى الزمن يجمعنا تاني لالا ما تصدق مشاعرك شلت سيرتك من لساني جاي تاني يا ما قاسمتك سروري وفيك بديت نظم المعاني كنت بستناها جيتك وكنت بحلم بالاماني من أمس بستنى بكره يا الرجيتك كل زماني جيت لقيتك خنت ودي صد قلبك ما طراني جاي يا الــــ : ياالفت ورميتني جاي تشمت في رفاتي انا ما خلاص اخترت غيري وناسي أجمل ذكرياتي شلت من صوتي الأغاني كل ماضي وكل آتي والحقيقة بقت خديعة فيها ضاعت امسياتي جاي تاني
05-28-2006, 07:30 PM
tmbis
tmbis
تاريخ التسجيل: 10-19-2002
مجموع المشاركات: 24862
جاى ليك وانا كلى لوعه كلى من بعدك مواجع الزمن علقنى دمعه سابنى فى احزانى ضايع بعد ما احكيلك عذابى وبعض اتحول مقاطع من أنين واشواق ونجوى شكوى من اقدار زمانى جاى ليك لا منى يرجع حبى لغيرك يسافر لا عيونى بتنسى ريدك تنسى إنو معاك تساهر المكان اللنتى فيهو ما بتغيب منو البشائر ما بيكون للقسوة مؤوى لى سفاين الهم مرافى
الانيق / تمبس
ده شاي عصرية في طرف الغمامه..
شكرا للتسامي والروعه..
فالاختيار دلاله على جمالكم ..
فبـكــــم يسمو هـوانا يتصاعد ونسـمو معاهو نتصاعد نجاور روعة الأفلاك نحاور مجلس الأملاك وجنب النجمه نتواعد ننسـج من خيوط النور على رمل القمر مرقد ينزل للأرض عـصـفور يترجم بالغناء المشهد واقارن بين سـبايب الليل خصـل شعرك تكون اسود نكتب فى السحابه جواب بتهطل تروى كل بلاد ويزرعـوا ناسا حب الغير ويشتلوا فى الصحارى وداد وتبقى الدنيا واحة خير زمن افراح واحلى أعياد
منك لله .. غرقتا البوست يا سيد جرسه
05-29-2006, 06:22 AM
tmbis
tmbis
تاريخ التسجيل: 10-19-2002
مجموع المشاركات: 24862
انــا حسع قلت حاجه هنا يا كبكابة؟؟ شوف الجاب الحاجات منو ..؟ دي حرفنة منك .. تكتبو الكلام ( وتغطغطو) فيهو.. حسع عليك الله دي ما شجاعة ادبية مني .. بعدين كلم معاك ( الاستاذ ) .. قول ليهو في مساحة كويسة فيها امكانيات تعبر عن حاجاتك بي مـــزاج..
05-28-2006, 07:48 PM
Soumeta
Soumeta
تاريخ التسجيل: 10-17-2002
مجموع المشاركات: 1733
يامحي الدين.. نهارك زي الورد أنت الظاهر عليك حظك عامل كدا زي حظي .. تعرف تلاتة اشرطة للخالدي + كم C.D منوعات فنانين وبرضو ما لقيت ليك ( خصل شعرك ) دي مع اني تحت تحت كدا برضو مقروووض فيها شديد والله والايامات دي عندي مزاج شديد جدا اسمع الخالدي.. غايتو احتمال اجرب ليك خيارات تانية..
Quote: طالما ما ناوى تجيبها البر بالكلام السمح دة
غايتو يا محيو .. شهر لي قدام ماناوي اجيبه البر .. بردت .. بردت ما بردت عنها ما تبرد ولا خسران اي حاجة
05-28-2006, 08:50 PM
Soumeta
Soumeta
تاريخ التسجيل: 10-17-2002
مجموع المشاركات: 1733
Quote: اها يا تنبس،، نبقي في بكية مني،، و بكية منو؟
يعني دي بكيتك عامله كدا .. طيب ما انا باكي اربعه مرات فوق .. ده غير العطلات والمناسبات الرسمية بقولو عليك متناسي ؟؟ دي بتاعت المرحومة ليلي المغربي ؟؟ والا بتاعت حكمت يس ..انا بلخبط ساكت؟ على كل حال جهزي نفسك .. تقومي تنقزي وتجيبي .. ( انساك .. ومن ذاكرتي بمحاك ) تجيبيها من محل ما جبتي اختها دي .. يـــا: ح اتشبك فيك وتكوني مضطره تغنيها.. وكلامي دهـ جادي فيهو..
05-28-2006, 09:38 PM
Salwa
Salwa
تاريخ التسجيل: 04-26-2006
مجموع المشاركات: 148
تمبوسه يعنى قاعد تعمل كده ليه ؟؟قلنا ليكم براها ماسمتحملها..
اسى الواحد يمسك شنو لا يخلى شنو.. ودالجبل ودالصحافه ودالسقيد والخالدي ولسه شكلك ماشى فى السكه تمد.. قايتو ربك يكون فى عونا بس.. معاك نمشى وببقى الطريق ارحب نطوف عالم من الدهشة ونشوف وقت الفرح قرب معاك كنا وعرفنا المعنى فى عينيك
يااااااااااااااه سلامات الهادي سلامات خالد - الخالدي -محمد سفلة سلامات كل جميل ياجميل انت..
تعرف: كان عندنا جيرانــا في المـــوردة ( نقــادهـ ) طبعا ما شايلين ( دين ) معانــا.. ولدهم دفعة في المدرسة معــاي .. بعدين الحالة واحدهـ طبعا قاعد يحضر معانا حصة التربية الاسلامية زي الترتيب .. ومرات بنمشي معاهــو ( الكنيست ) عادي جدا ومتداخلين مع الناس في الحلة في كل شئ .. لما يموت ليهم زول . في الفراش بيكونوا ضابحين كمية بتاعت ( بينسون ) ( وكيلوباترا ) .. عندنا صاحبنا المشرتك بيناتنا بيكون منتظر اي مناسبة زي دي بي فارق الصبر بالنسبة للسجاير الملح.. قام مات جدهم الكبير .. وشكل الصيوان كان اوســع قمنا مشينا انا وصاحبي علشان نجامل صاحبنا ونعزيهم في فقدهم الاليم .. ولينا مآرب أخرى.. وصلنا الصيوان .. قام صاحبي قال ليهم ( الفــاتحة ) ورفع يدينو الاتنين علشان يأكد مسالة الفقد واحد دي .. اديتو لكزة صغيرة كدا قلت ليهو فضحتنا مع الاجانب يا اروش .. المهم في الموضوع .. فاتحتك مقبولة مع أنو عندك مآرب أخرى.. عليه: تكلم صاحبك بتاع المرة الفاتت وتقول ليهو أخوى مهندس الكمبيوتر الفي الرياض عندهم فراش أونلاين واحتمال كبير يجي يشرب معاكم شاي المغربية بعد شهر .. بعدين قول ليهو جايب معاهو ( قامشة ) ويحضر الاكسسوارات و ( الشدايد )
كان ما ترجمت ليهو الكلام ده
بخسرك
05-29-2006, 10:58 AM
tmbis
tmbis
تاريخ التسجيل: 10-19-2002
مجموع المشاركات: 24862
Quote: تمبس امرق الاغنية دي في بوست براهو خلينا ندردق براحاتنا بعيد عن ودالجبل دا
.. تعرفي ممكن اخسر ليك بنزين بي تلاتــة ريال امشي محل ( كــارفورد ) أجيب ليك ( شرقــانية ) Made in USA وأعمل ليك ( ضــروة ) .. بس نشوف عينة من الدردقــة دي عاملة كيف ..
05-29-2006, 05:11 AM
bushra suleiman
bushra suleiman
تاريخ التسجيل: 05-27-2003
مجموع المشاركات: 2627
غريبة الليلة تسأل عن احوالى كيفن وانت الريد نسيتو وعارف الحال تبدل
يا بشرى ..
Quote: اقعد اتوجع لى..الا تولد بعد دا
نحن مستهلكين عاديين .. وبنشجع اللعبات الحلوة دي .. بمعنى أنو ولادتنــا بتكون ساهلة المشكلة في الناس البتصرف الكروت دي .. وبعداك يجهجهو وراهم الفنانيين .. والملحنين .. وناس لجنة النصوص .. وخلق الله شفت كيف؟؟
05-29-2006, 06:54 AM
فيصل نوبي
فيصل نوبي
تاريخ التسجيل: 09-16-2005
مجموع المشاركات: 14194
Quote: غايتو حيرتونا يا تمبس انت ومعتصم دفع الله هسه بدل كل واحد يفتح لينا بيت عزاء براهو كده وتخلونا نلف عليكم واحد واحد ما تتلموا في بوست واحد وابكوووووووووووووووووووووووووا وبكونا معاكم (وش بكاااااااااااااااااااااااي)
يا انعام انتي ما سمعتي .. زمان قالوا الفراش أربعين صباح .. أها نحن عندنا دبل ..
يعني شيلو شيلتكم ساي .. دا لسه في أوله ..
العزيزة انعام ..
احتراماتي ومحبتي .. كوني بألف خير ..
05-31-2006, 06:25 AM
انعام عبد الحفيظ
انعام عبد الحفيظ
تاريخ التسجيل: 12-07-2005
مجموع المشاركات: 8738
Quote: بقيتوا تعملوا بزنس وكده طيب الناس البتجي تتكسر معاكم دي ما عندها نسبة والناس البتجي تصبح عليكم صباح صباح
المسالة دي طلعت من يدي يا انعـــام .. من المرة الفاتت قلت ليك الكشف ماسكو معتصم وانا عارفو ح يضربني .. كل مرة يقول لي امشي جيب ( تــلج ) وبنتحاسب بعدين .. بعد الناس دي تمشي .. قلت ليهو طيب طلع لي انعام دي حقهــا بعدين بتشيل حالنا.. حسع المهم قاعدين نعمل في ( دراسة جدوى ) وعندنــا ( صندوق ) وانا اقترحت أنك تاخدي الصرفة الأولى + بدلات بنحسبه ليك بمعدل كل جية + بدل ترحيل + بدل بكاء + شيلة دكان .. والكلام دهـ كلو مخصوم منو دمغة ( جريح ) وخمسة وتمنين في المية من صافي الأرباح .. ح ارسل ليك رقم الحساب بالايميل والمسالة دي سر بيني بينك معتصم ما ينقش حاجة ..
06-03-2006, 04:19 AM
انعام عبد الحفيظ
انعام عبد الحفيظ
تاريخ التسجيل: 12-07-2005
مجموع المشاركات: 8738
يا انعـــــام عبد الحفيظ: بالطريقة دي بتضيعي حقك ساكت انا ساعي ليك في المشروع دهـ ما تتخيلي قدر كيف يعني كان وديت اوراقك دي لي مراجع قانوني احتمال يصادر مننا كل المالية بتاعت الصندوق .. ويطلعك مطالبة وانا طبعا ما بخسر اي حاجة ولحدي الآن المسالة دي خسرانه معاي شديد وده كلو عشان اوفر ليك ( سقف عالي من الارباح ) .. رأيك شنو في سقف عالي دي مش مقنعه وبتاعت محاسبين كبار؟؟ اها زي الكلام دهـ معتصم خاميني بيهو خم شديد ومخدرني بيهو .. المهم لو عايزه تضمني حقك انسي كشف الحال دهـ ونموت بالمسالة دي برانا.. انا مسالة الخسارة ما بتهمني كتير المهم اضمن ليك حقك .. وكامل الارباح .. طبعا راجعنا البند بتاع دمغة الجريح قالو كان في ازدواجية في صياغة البند دهـ لانو بتضارب مع بنود تانية اها اسقط البند دهـ واتحول لي ( دعم فضائية )..
06-04-2006, 03:34 AM
tmbis
tmbis
تاريخ التسجيل: 10-19-2002
مجموع المشاركات: 24862
Quote: تمبس الليلة يوم 3/6 وكلامك الفوق ده يوم 31/5 يعني ليهو 4 ايام وما وصلني اي ايميل
نظرا لي جدية المسالة دي .. والسرية العالية جدا . ح نستلم ( كاش ) مندوبنا ح يصلك ظهر اليوم ومجرد ما يصلك ح يفتح خط مباشر بيناتنا .. أنت بس اتستري معاهو .. وبعدين اهم حاجة عندو لازم تغديهو غدوة مظبوطة دي طبعا بعدين ح تتحسب مع بند أخرى .. ومع الصرفة ح نرسل ليك دعوة عشاء فاخرة في اي مطعم صيني تشوفيهو مناسب .. اتصلحي معانا يا انعام وادفعي دي فرصة ما تفوتيها وبطلي ( المجابدة ) بتاعتك دي ...
06-04-2006, 05:33 AM
انعام عبد الحفيظ
انعام عبد الحفيظ
تاريخ التسجيل: 12-07-2005
مجموع المشاركات: 8738
شرووم.. وديت المعروضات وين ؟ القصة دي ما نجحت تاني خاميها مالك ومتلتله معاك؟؟
.. عقيــــد..
Quote: تعرف يا تمبس أنا سمعت الأغنية دي حوالي 15 مرة خلال الساعات التلاتة المضت..
والله تعرف الاغنية دي أول مرة سمعتها في عربية ( تنقو ) وعملت فيني عمايل بطالة خلاص ورسله لي وجبتها الجهاز هنــا ومن اليوم الجبتها انا بسمعه كلما اقرب للجهــاز ولحدي الآن ما شبعت منها ولا ح اشبع .. اعتبره من ضمن حاجاتك المعاي .. وبتلقاها جاهزة في اي وكت ومر علينا يا مواطن في حاجات كتيرة بتستحق ..
تمـبس والجميع،، تحـية... تعـرف اليومين ديل معلق لي في فنان كدة ما كان عندي فيهو هـواية زمان، وأخـوي بقى يقول لي ( الريـدة جات متأخـرة)، وكنت داير أشيل معاكم الفاتحـة بواحدة من أغانيه المناسـبة،، لـكن ولأنك برضـو قلت مغرود في خصل شعـرك، غايتو أنا جاسفت ليك منها وحـدة ، أصـبروا بيها لغاية نجيك بالفاتحـة!... أقـول ليك سـر تاني: أغنية الهادي دي موجودة عندي في الشـريط، لكن صـدقني كأنو أول مـرة أسمعها أمبارح، ممكن تفتينا يا شيخنا في الحالة دي اسمها شنو وتشخيصها كيف، أنا غايتو أفتكر واحد من الأسباب هو الفـرق بين لامن تسمع أغنية في الشريط مع ستة أغاني أخـرى وبـين تسـمعها براها زي تلاتة وتسعين مرة كدة على التوالي ..لـكن برضـو أظـن في أسـباب غميسة! دي العايزين رأي الأخصائي فيها! شـكري الكتير
ده نوع الغنا البيعوّق وبيخليك قاعد ( مُتلّش ).. عشت متألم معاك .. الخالدي زمان أيامو الفي الكفر كنا بنسك حفلاتو ، وكنا أشهر من علّوب ( بتعرفوا ؟ ) وكنا وكان الحب والوقفة في آخر الصيوان ، (والكشيّف حسن ) للحنان بتاعك ، واشارات ، والقشرة الما خمج والقميص محشي ، ويد واحدة ( مربعها ) والتانية شايلة السيجارة وقريبة من الخد ( الود خلاس بيشرب سجاير) والأهم من ده وداك ( الخنفسة ) والشعر المدهن ( يا حليلو ) .. ويا لها من أيام ..
الخالدي زولي من زمان وهو البيجرسني .. والله يا أخو أنا أغني ليك للخالدي ما تفرزنا إلا ( تشمنا ) هههههههههههههههههاي ..
تمبس ...أكتلني ونزّل لي ، زي ما بنشفق ، بصوت الهادي حامد ..
برســـــــــي .. عارفك من زمان زول فنان .. والحاجة الحلوة بتقع ليك في عبك طوالي .. ..
استاذ إدريس.. ارتفع معدل الاصابات . وفي جروح طفيفــه .. الزم تجــاه اليمين.. وانا بشوف معتصم رايو شنو .. مات والا لسه ؟؟ .. شغل الرشيد ح انزلو ليك في واحد من البوستات في اسرع فرصـــة..اتوقعو تحياتي ..
06-02-2006, 11:31 AM
tmbis
tmbis
تاريخ التسجيل: 10-19-2002
مجموع المشاركات: 24862
صلاح عبد الله .. مشتاقين يا ابو الصحب .. بلاي الحاجات دي برضو بتتلش بيك ؟ ياخي الخالدي دهـ تلش بي زمــان في سنة أولى ( حاجات ) وايام الكشيف حسن وقشراتك القاطعه من راسك دي .. تتخيل يا صلاح شريط أول تتليشة محتف بيهو لحدي الآن إذا بتتذكرو متصور فيهو الخالدي بالجنبه كدا ولابس قميص كاروهات .. بعدين في شوية ( خنفسه ) برضو ... تعرف علوب ده يا صلاح عندي معاهو قصة لذيذة جدا . وايام الاسابيع الثقافية المفتوحة بتاعت الفرع كانت بتتعمل ف يالمكتبة القبطية الخرطوم كان علوبة وشري وصلاح ضيق اساسيين جدا .. وطبعا هم ناس زوق جدا وزمنهم خطير واحساسهم عالي جدا اول ما الهادي يجي طالع المسرح بكونو واقفين ليهو قدام وأول ناس بيصفقوا والغريبة انهم ما بيرقصوا كتير في الهادي بس عندهم ( جلكسات ) كدا بيعملوها في فترات متباعدهـ مثلا يكونوا قاعدين بعد شوية تكون في ( مـــــــدهـ ) من ساكس أو ترامبت .. بقومو مع زمن ( المــــــدهـ ) دي يقومو قومه واحدهـ ويقعدوا مع نهاية الزمن بتاعــه .. مره في زواج بن عمنا في الصحافة .. بالعصرية الحلوة ديك .. طبعا موسيقى الشرطة بعد العقد بتكون حاجه كدا .. فقام جا علوب .. وضيق اتاخر شوية .. بعدين الفرقة بتاعت موسيقى الشرطة كان القائد بتاعــه بعرفو وعمك ( كركاره ) كدا وابوالدقيق شديد لكن ما بيفوت ليك حرف في النوته .. قمت قلت لي علوب رايك شنو لحدي ما ضيق يجي تقوم تعمل لي حركة .. قال لي ما عندك مشكلة .. قمت اتفقت معاهو كلام اتفاق رجال .. طبعا عمك القائد واقف قدام الفرقة وفاتح رجلينو الاتنين وهو زول طويل جدا .. قلت ليهو تدخل لي بي تحت بتقدر ؟؟ قال لي لكن صعبة ياخ ... المهم اديتو راحتو على الآخر لكن متابعو .. بعدما ابتهج شديد .. بقى يمشي شوية شوية على الفرقة وانا مراقبو .. بعد شوية .. طاااااااااخ انقطع ليك بي تحت رجلين الكمندان أنت قايل الحفلة تاني اشتغلت ؟؟ زي ما بنشفق نحن عليك والله ما عندي يا صلاح .. وموصي ليها الدنيا دي كلها .. وكان عايز خيارات تانية انا جاهز ..
06-02-2006, 08:01 AM
tmbis
tmbis
تاريخ التسجيل: 10-19-2002
مجموع المشاركات: 24862
عيســــــى .. تعرف بي عمليتك العملتها دي ..؟ ممكن نديكم مساحة وننظر في امركم ونخليكم تلعبو معانا في الفاينال .. ونكرمكم لحدي الربع ساعة الأولى .. لكن الكاس تشمو قدحــه .. الظاهر لي ما قصرنا معاكم .. بعدين تعرف حكاية تعليق الفنان دي مسالة غريبة جدا انا بتكون عندي اشرطة قديمة جدا بقوم بصحى من النوم كدا معلقه معاي حاجة محددهـ .. قدرما اطنش تاااني تجوطني ليك .. بقوم بتنازل عن اي عناد وافتش لي الشريط انكتو بعدين بتجهجه ليك لما اللقي الاغنية العايزه مافي في الشريط .. تتخيل بقوم اجيبه ليك من مافي حتى لو امشي ليها السوق عديل كدا وبعدين مرات مشاكلي بتكون كتيرة جدا يعني الأغنية البكون عايزه ما بلقاها ليك نهائي في النت .. يعني إلا امشي ليها السوق إلا امشي ليها السوق .. يعني برضو ريدتي بتجي متأخرة والا رايك شنو؟؟ ما ( تغمس ) الاسباب يا عيسى الحركة دي عادية جدا .. تتخيل انا الشريط ده برضو عندي ليهو سنين ما بتذكر اني سمعتو كامل كدا إلا اليوم الجبتو .. لكن الأغنية المعلقة معاي دائما هي الأغنية الشغالة فوق دي ... طبعا ما معناهو انو الأعمال التانية ما بتستاهل .. لكن بتكون ( حاقصة ) معاي اسمع الاغنية دي واليوم البنوي عليها والله بكرهه ليك العيشة .. بكون بسمع فيها من الكمبيوتر .. ولما اجي انوم بشغله في الاستريو .. ولما تكون عندي طلعه بنزله على الـ mp3 Player بمرضه ليك مرض شديد خلاص .. شكرا يا عيسى لانو سترتني مع محي الدين بي خصل شعرك .. ومردوده ليك .. لما نشيل منكم الكاس.
أخـــونــا حاتم ( سمبريــة ) .. مشتاقين يا الأخــو .. البسمع كلامك يقول مستثمر اجنبي .. زي نصايحك دي انا عملت بيها زمــــان .. لما كنت بتابعك غطست حجري يا هذا .. لا استفدت من خبرتك الفالصو دي .. لا ضرسي القديم بطل المتاورة انا لحدي الآن متضرر منك شديد جدا ومفكر انزلك في أقرب محطة.. عندك ( فكــه ) والا نرجع ليك قروشك ..
05-31-2006, 06:06 PM
oudenoord
oudenoord
تاريخ التسجيل: 12-19-2002
مجموع المشاركات: 326
تمبس الجميل اسعد الله ايامك ياحبوب عارف فكرته اكتر من مرة انو افتح البوست دة من العنوان بس كان عندي احساس قوي انو الليله مها معديه ساكت اهو اتوكلت علي الله وفتحوا وماشي ورجل وراة ورجل قدام لحدي ما حصلت طلب اخونا محي الدين ابكر وقلته الله يستر من الوجع الما بينتهي الليله خصل شعرك في الليل ده الله يستر قريت ردك قلت الحمد لله الراجل الجميل قدر حالنا وراعه عمل السن أجي في آخر البوست القي اخونا عيسي ربنا ينور ايامه خاتيها غايتو تثبيتا لكلام اختنا ناديه عثمان بتكتلو لكم زول يوم.الشكر ليك ولي محي الدين وعيسي موصول
06-03-2006, 03:49 AM
tmbis
tmbis
تاريخ التسجيل: 10-19-2002
مجموع المشاركات: 24862
oudenoord سلامات ومشتاقين لطلتك وحمد الله على السلامة تعرف يا ا ودين .. دائما بنضع الخيارات السهلة . بره عتبت البوست .. والقلبو محدثو زيي وزيك يجي داخل وشايل قلبو في ايد .. وفي التانية حابس النفس وبي جــوه بنبتدي التفتيش .. والصيد وبي صراحة في نوعية مستهدفة ..ياخلت القلب في البوست ومشت بي وشها يامرقت من البوست من غير حمص وفي الحالتين .. لاوقف القلب .. لا برد الوجع .. شكرا ليك .. ولي محي الدين ولي عيسى .. ولي كل اصحاب القلوب .. الواقفه على امشاطه..
تمـبس العـزيز؛؛ سـلام، ولو أن الأعـراف تقتضي أن نشـيل الفاتحـة قبل السـلام،، لكـن لأن عـزاكم (غير شكل)، لذا يجـوز فيه ما لايجـوز في غيره..بعـدين أنا فكـرت وقـدرت وغـيرت رأي من (فناني) القلتو ليك.. فالواجـب أيضا يقتضي أن تكـون فاتحتكم (مدنكلة)، شـرعية وقانونية ومعـترف بيها رسـمي وشعـبي ودولي..وبعـدين بيني وبينك خفت ما تبقى علي البقت على صاحبنا واحد، والذي خـطب ليه بت ناس مـرطبين،، ولما كانت الحـكاية بيناتم، قالت ليه ما عايزين منك أي شي و (بابا بسـندك)..تغـيير نص الأغـنية لـزوم ملاءمة المقال للمقام..المهـم، وبعـد ما الكـلام دخـل الحـوش..قاموا أهلها (وأهلها دي بالمـؤنث!)..قالوا ليه أول حاجة عايزين خمسـطاشر مليون ( وفي رواية خمسـة ألف يورو) عشان يجيبوا الشيلة من السعودية أو دبي، لأنهم (في العادة) بجيبوا كل حاجاتهم الشخصية من هناك..لامـن ربنا فتح عليه بكلمة وحاول يقول إنو المبلغ دا كبير، قالوا ليه: والله نحنا دا مستوانا كدة..طبعا صاحبنا لم يجـد بد من أن ينبرش!.. وينبرش في لغتنا نحنا معناتا يعمل زغبير،، وهي غير الإنبراش بتاعكم إنتوا ناس العـواصم..(يا زول ما أكـون بس حكيت ليك القصة في لحظة ما مناسبة!).. المهـم: ما علينا منهم.. لكـن أنا كمان خفت أجيب الأغنية الكنت ناوي عليك بيها، تقـوم تطلعوا لي برضو ما مسـتواكم، ويمكن يكـون بالنسـبة ليك(صحـرواوي) عـديل كدة؛؛خاصة وإنت فارش لينا بالهادي، وعشـت متألم معاكي..وطبعا مش ح أقـدر أغـالط أهـل البيت! عشان كدة قلت ألعب على المضمون..(كمان الفاتحـة يا اخـواني بقى فيها لعـب؟!).. والتانية ديك أخليها لي رفـع الفـراش، لأنو ديك بتكون بتاعة حـركات ساكت.. والناس بشـيلوها بعـد ما يكونوا كملوا الونسـة والشمارات،، وتكلموا عن (بتعبير أحمـد مطـر): وضـع إيرلندة.. وأنف الجيوكندا.. وقضايا هونولولو.. وبطـولات جيوش الحلفاء تحياتي وأكيد المـودة..
..
06-04-2006, 03:37 AM
tmbis
tmbis
تاريخ التسجيل: 10-19-2002
مجموع المشاركات: 24862
عيسى ... بركة الجيت كدي خلينا من الفاتحة دي يا عيسى .. أنت تجيب في سيرة المشاريع المثمرة وتقول لي الفاتحة .. بعدين صاحبك دهـ .. ( بت أعمو مالا ) عليك الله عيبه لي .. المانعوة شنو ما يغطي قدحـــو؟ تعرف عندنا صاحبنا هنا عزيز علينا اتزوج بت خالتو .. اها والشباب ماسكين سيرة العرس .. والشباب العرسو والباقيين .. والحسابات مدوره .. اها واحد ماسك الحساب فلان وفلان .. فجأة نط ليهو صاحبنا دهـ .. وقال بصورة جادة كدا : ياخ دي ما بت خالتو ههههههه .. يعني بقصد لقاها بااااردة وما اجتهد فيها .. غايتو يا عيسى كان دي الصحراوية بتاعت الانبراش كدا .. حقو تتصحر معاي وتنبرش بي اي شكل .. ياخي والله نحن شدة ما صحراويين لمن الصحراء عرفت حاجة بس مشكلتنا انبراشتنا بنتمها حنك .. واهم حاجة تقوم من الأول تحدد الاماكن البتجنبك الانبراشة الشديدة دي .. علشان بعدين ما تقوم تجهجه معاك الخالدي ولا الهادي يعني تكون فاصل ( رشاشك ) من بدري .. واهم حاجة في المسالة دي كلها .. قوة القلب .. القلب إذا بقى قوي الحبه ما بتجيك .. وبعدين تكبر راسك .. خلي راسك يكون كبير جدا .. ومن النوع البتحمل اي صدمات انا ما عايز اقول شواكيش علشان ما تتحسس يا عيسى .. فاهمني ؟؟ لحدي الآن يا عيسى مستواكم كويس وماشي في تحسن .. ومع الملف دهـ .. ( يعني ) بنحاول بقدر الامكان نشوف ليكم تعديل في زمنكم معانا .. وغالبا نزيدكم دقيقتين تاني .. إذا نزلت الملف القانج بيهو دهـ وصادف ليهو شاكوش .. اقصد انبراشه وحركة شوية من ساكن الحاجات المطارشنها الجماعة .. بنديك خمسة دقايق راسه عديل .. اها قلت شنو ؟؟ في انتظار اضافتك ياجميل .. اردمني من الهادي دهـ وشوف لي ( افتقدتك ) علشان تحلني من صلاح عبد الله ده
تمـبس.. طبعا أخـونا صـلاح عبد الله قال عـاوز زي ما بنشفق، والفايل الأنا رفعـتو فـوق دا هو افتقـدتك،، لـكن إنت بقيت (معـلوم حال).. عشـان كدة بنمشـيها ليك، وما بيناتنا.. بس المشكلة إنو نحنا التلاتة طلعـنا في الهـوى سـوا،، لأنو لو رجـعت لبوسـت لـؤي بتاع طلبات الأغـاني وفي صفحـتو الرابعـة، تلقاني طلبت نفـس الغـنية، وبي صوت الهـادي برضـو، للأسـف لؤي (همسيلف) طلعـت ما عـندو.. لكـن الشـريط دا كان عـندي (في حـياتي زمـان) في السـودان.. ولامـن سـافرت نسـيتو في عـربية أخـوي، ولامـن رجعت المـرة الفاتت لم أعـثر له على أثـر، لكـن ناوي المـرة الجاية أعمـل ليه (أف بي آي)، وأطلـعوا من طقاطيق الأرض.. ولغاية الوكت داك،، أخليكم تسـمعوها بصوت عبد العـزيز، ونعـتبر أن صـلاح قـد ردّ بالإيجاب على سـؤالك حول البدايـل.. وإذا صادفت (هوا) في نفسـك، فهي مهـداة ليك أيضا..أو زي ما كان البقاري بوصّـي في بتو يوم زواجـها كيف تعامـل زوجـها وتحـافظ على بيتها الخ؛؛ وبعـد كل جملة كـان بقـول ليها: الكـلام ليكي؛؛ وأمْـكِي تسـمع! والأغـنية لي صـلاح،، وإنتا تسـمع!
زي ما بنشـفق
عـلى فكـرة، دا كان تسـجيل من حفلة في برلـين، غنـّا فيها عبد العـزيز أغاني سمـحة شـديد،، ولترضية صـلاح عشـان يقبل (بالبدايل)، نديكم منها وحـدة تانية.. وأرجـو أن تعـجبكم برضـو... كل التحـايا..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة