|
|
 اصحى يا بريش
|
امس محمد وردى طلع لا موسيقى ولا بيمثل الموسيقين وما عندو علاقة بالغنا ولا الشعراء المطاليق .. وما فنان وما بعرف يغنى التكتح ... وردى !!!!... ما مناضل ولا وطنى ولا بيعرف غوغ فى الوطنية .. وقبالو السيد محمد عثمان الميرغنى دا هاجو فيهو هيجة لمن انا قلت دا محمد عثمان (مولانا ) زاتو ولا زول تانى عنقالى ساكت ضارب الخلا .. ودا كلو عشان شنو قال النفرين ديل قالو للحكومة نحن معاك تب فى قصة انك ترفضى تحاكمى ناسك واولادك والهم سودانيين بره البلد فى لاهاى ولا استاد وميبلى .. وهسة بالمناسبة هسة المسالة جاره وفى الطريق مذكرة وتوقيعات فنانين تانين ناس محمد يوسف موسى وعبد القادر سالم عمر احمد قدور .عبده عثمان اضافة الى الاستاذ التجانى حاج موسى ، والشاعر الحلنقى ، وصلاح بن البادية ، وشرحبيل أحمد .. ولسة السبحة جارة وديل كلهم طبعا طوالى حينالو اعظم الصفات دا عميل دا وكيل عميل ودا امباشى عميل وداك ركن عمالة رغم انو الحقيقة انو ديل بالفعل قراو الواقع وشافو الصورة من جوه وما زى ما بقول بعض الاخوة ناس مصلحة وقبضو السمينة . طيب نمشى وجهة تانية فى كلامنا امس الاربعاء حزب الامة القومى جناح السيد الصادق كان عاوز يعمل ندوة عن 6 ابريل وحصل شنو مشادة ومجابدة بينو وبين الحكومة الرفضت قيام النشاط وفجاة برضو الناس شبكونا ليك الانتفاضة قامت والشوراع مكتظة بالغضب والثورة تحاصر النظام واووووووووك كرووووووك زى القصة ايام اعتقال عبد العزيز خالد والجوطة الحصلت والخنق الخنقوه الناس هنا بخصوص انو فى غضب شعبى وفوران وشنو ما عارف ونرجع كدى لحزب الامة والحصل كان وببساطة انو عامة المواطنين البيجو بشارع الموردة قدام دار الحزب كانت بتمشى بغير مبالاة وما اشتغلت بالموضوع بما فى ذلك باقى ناس الاحزاب ، طيب النقول بارك الله فى حزب الامة الدقا صدروا وقال حنحتفل بستة ابريل وين باقى الاحزاب ؟؟؟؟ والمهم انا لو كنت زول محل سلطة فى حزب الامة كنت شكرت الحكومة انها فرتقت الندوة ومنعتها لانها حكتون فاشلة ... وطبعا والكلام دا للناس البره البلد وطولت انو يا جماعة حقو تشوفو طريقة تانية لتنشيط وتفعيل العمل السياسى الناس بقت قافلة معاها وقصة تعالو نعمل حزب ونلم الناس وامرقو دقوا عنق الحكومة ولا امشو سوو كدا واعملو كدا وانتو اهل شنو ونحن اهل ايه ما عارف الكلام دا بقى ... ببح ... مافى زول شغال بيهو
يا جماعة معليش واسف لو كنت بكتب ببساطة دا الحاصل .. شوف اتخن جامعة فى البلد جوه الخرطوم ولا خارجها تلقى الطلاب كم الف ولمن تجى انتخابات تلقى الناس والطلاب الصوتت كان بالغو كان بالغو 300 طالب ولا 500 كان خلاص دقو فى رقم خيالى وقياسى ، البلد اتغير الانسان الفيها يا جماعة مايو حكمت ستة عشرة سنة ولمن الاحزاب جات وقعدت بس اربعة سنة واتلحست تانى شتت مرقت تعارض وتعملها كلها تنظيمات وتحالفات وتجمعات تقوم يوم السبت وتنحل يوم الاحد ويمكن يوم السبت زاتو العصر وبعد وجات الانقاذ وهسة هى خاشة برضو على عمر مايو ، يعنى 32 سنة الاحزاب بره الشبكة والتاثير المباشر على الجماهير والزمن ميل .. ويا لطيف واتغير ... الناس هسة بقت ما شغالة كتير بالزعيم فلان ولا القائد فلان حتى فى الحكومة ما شغالين بيهم ويمكن الناس بتقيف مع الحكومة دى لسبب واحد انو خصومها طوالى بيخشو عليها من مدخل الوطن واستهداف الجميع مش المؤتمر الوطنى والحركة الاسلامية يعنى تلقى فى ناس من متمردى دارفور شايلنها مع على عثمان ولا البشير ولا كاشا يقومو يطبظوها ويشيلوها ليك مع اى سودانى ما معاهم وعلى هذا قس وبالتالى الناس بتكون فى النهاية لمن تبقى فى تولا دى والمسالة تجيب ليها خراب بيمس وجودهم بيكون اخير ليهم يموتو قدام البشير دا ، بعدين فى حاجات فى البلد اتغيرت فى مفاهيم جديدة خشت فى تاثيرات كتيرة بقت تشكل سلوك وفهم السودانيين وعشان كدا حقو الناس تقرا الكلام دا زين وهى تنطلق نحو اهدافها غير كدا حتكون كل المسالة امانى وحبوب هلوسة .
هى ... اصحو .... السودان دا اتغير ... اصحى يا بريش !
|
|
 
|
|
|
|
|
|
|
 Re: اصحى يا بريش (Re: محمد حامد جمعه)
|
| Quote: وامرقو دقوا عنق الحكومة ولا امشو سوو كدا واعملو كدا وانتو اهل شنو ونحن اهل ايه ما عارف الكلام دا بقى ... ببح ... مافى زول شغال بيهو |
انت أقفل لى على كدة ..
بعدين لامن تحلج .. شوف ليك زرقينة تولف ليك السِنة ..
| |
|
|
|
|
|
|
|
|
|
Re: اصحى يا بريش (Re: محمد حامد جمعه)
|
صباح الخير سعادتك
والله والله والله ناس مشت المظاهره مجبوره ومقهوره فيهم ناس دايرين محاكمات دوليه تقول لي دا مدخل وطني انتم من قتلتم الوطنيه انتم من قتلتم الاحزاب فجاءتكم الجهويه والقبيليه واللاهيه من لاهاي
| |
|
|
|
|
|
|
|
|
|
Re: اصحى يا بريش (Re: محمد حامد جمعه)
|
| Quote: طيب النقول بارك الله فى حزب الامة الدقا صدروا وقال حنحتفل بستة ابريل وين باقى الاحزاب ؟؟؟؟ والمهم انا لو كنت زول محل سلطة فى حزب الامة كنت شكرت الحكومة انها فرتقت الندوة ومنعتها لانها حكتون فاشلة |
عشان كدة يا محمد من الطبيعي انك ما تكون زول ذو سلطة في حزب الامة و لا حتى عضو عادي..
لان اهم مميزات اعضاء الحزب الا يتطرق الياس الى نفوسهم
ومن اهم صفاتهم المصادمة
وعدم تثبيط الهمم
وحاجات تانية
| |
|
|
|
|
|
|
|
|
|
Re: اصحى يا بريش (Re: lana mahdi)
|
لنا مهدى
تحياتى واحترامى الكبير لحزب الامة ولكل الاحزاب انا اقول هذا واكتبه باعتباره وجهة نظر تحتمل الصحة والخطأ معا ولا اسعى لتثبيط احد لكن انا اسرد مشاهد واذا فى راى مخالف - مرحبا به - وليعرض ويفند بمثل رؤاى وحججى ويبين مواقفه
ويبقى الود
عبد الحميد عوض :
اراك تقسم قسما مغلظا .... يا راجل ! ..... فى ذمتك الناس اليومتا دى مجبورة .... مجبورة الى حد الاشتباك مع حرس السفارات ... مجبورة ...!
| |
|
|
|
|
|
|
|
|
 Re: اصحى يا بريش (Re: محمد حامد جمعه)
|
الأخ/ محمد حامد جمعة...
تور بقر الجواميس الرقادن لخ.. وما هو جخ...
التحايا النواضر وبلدنا السودان يمر بكل المنعطفات..
والمحن..
ولكن الدهب بتجمر بالنار..
| Quote: فى تاثيرات كتيرة بقت تشكل سلوك وفهم السودانيين |
وأنا أقرك الرأي تماماً...
ولكن كرسي السلطة ده ما هو أمان...
وبالمرة طالما المسألة بقت ماشه معاكم..
يا أخوانا عشان حقو الناس تقرا الكلام ده..
زين .. وزين.. بعد ما أتميز الخبيث من الطيب...
هو إنو تخلو الناس تنطلق نحو اهدافها بقوة الدفع الذاتية...
وأي كلام غير كده حيكون كل المسالة أمانى كما ذكرت وحبوب هلوسة...
فعشان الناس تصحى..
وتعرف إنو السودان ده إتغير..
أدو الناس معاكم فرقة ...
يختو معاكم.. جنبتهم...
والقومة ليك يا ...
بلـــد....
| |
|
|
|
|
|
|
|
|
|
Re: اصحى يا بريش (Re: A.Razek Althalib)
|
عبد الرازق
التحايا النواضر
وصاحب اللفظ والتحية المسلجة باسم النواضر هو تروتسكى هذا المناضل الحقيقى ... تحية كبيرة له ولك ..
يا اخوى
صدقنى ... الاسلاميين فترو ... وهم ابسط مما يتوقع الاخرون فى مسالة الشراكة مع من يرغب لكن ...حرقص الاحزاب كبير وفى النهاية صدقنى الناس دى لو مشت وراء احلام اليقظة بتلقى نفسها ... مبارية الدجاج .. ... عارفنو بيمشى وين ..
| |
|
|
|
|
|
|
|
|
|
Re: اصحى يا بريش (Re: A.Razek Althalib)
|
الأخ محمد حامد
ما حاتكلم عن القرار والمحاكم وحزب الأمة والحاجات دي
بس حبيت أرد عشان أأكد إنو الناس في السودان بقو ما شغالين لا بحكومة لا بمعارضة
الناس يا أبو حميد شايلة هم أكل عيشها
بتتكلم في أسعار اللبن واللحوم والخضار
ونأجر لينا بيت ولا ندق صدرنا ونبدا بنيان يا تم يا ما تم
وكان خلاااااص راقو تقلب هلال مريخ وتاج السر و سامي 
والكل ما بيدور أمريكا وأي حاجة تجي منها
كان حق كان باطل
| |
|
|
|
|
|
|
|
|
|
Re: اصحى يا بريش (Re: محمد حامد جمعه)
|
Quote: الناس في السودان بقو ما شغالين لا بحكومة لا بمعارضة
ايمن جبارة :
تمام دا الحاصل ... واى زول يدرك الحقيقة دى الا بعض الناس ... والنشوف اخرتا .. |
كلام صاح
بس يا ريت انتو برضو تكونو عارفينو ... و ما تقعدو تقولو لينا مسيرة و مظاهرة و مليونية ... و الشعب و شنو داك ما تعرف
اكلو ناركم براكم في لاهاي
تخريمة
بريش دا ياخي خلى الكورة و خلى النوم ذاتو
ريحو ياخي... فكو سيرتو
ولا شنو يا بريش
| |
|
|
|
|
|
|
|
|
|
Re: اصحى يا بريش (Re: Hafiz Bashir)
|
بس يا ريت انتو برضو تكونو عارفينو
انا غايتو .............. عارف ... انت برضو اظنك عارف .. والمعرفة ادراك خصائص الاشياء كما جاء فى تفسير الزمخشرى
| |
|
|
|
|
|
|
| |
محمد حامد جمعه
معتصم الطاهر
عبد الحميد عوض
lana mahdi
A.Razek Althalib
merfi
Hafiz Bashir
أبوالزفت
فيس بوك
تويتر
انستقرام
يوتيوب
بنتيريست