|
|
 RoadaneseOnline.com
|
رودانيـزأونلاين دوت كوم
كيف حالكـم يا أهلنـا.
.
.
.
عضـو جـديــــد..
.
.
.
هل من مرحب؟
|
|
 
|
|
|
|
|
|
|
|
Re: RoadaneseOnline.com (Re: وليد محمد المبارك)
|
الأخـوة محمـد الســر ووليــد،
شكــرا على الطلـة..
يللا..
ما دام البورد بقى اسمـو رودانيزأونلاين، عاوزين نعرف رأى حزب الأمـة فى هـذه المشكلـة.. ورأى الزعيـم قرنق فى ديمقراطيـة البورد، ولا نمانـع من نقل البورد إلى ينفاشـا..
برضـو عايزين نعـرف رأى عبد الله بولا فى فلسفــة "ما بعـد الروداويـة"
وأخيـرا أقترح تغييـر اسـم السـودان ليصبـح "الـرودان".. دا يخلى أرباح النقاش الدئـر تمشى للسـودان تلقائيــا.. الإجـراء دا مرات يسمـوه حكـم قرقـوش.. لأنـه، ما دام البورد أسس لنقاش مشـاكل الســودان، والأن هـو يناقش مشـاكل رودا، إذا السـودان يســاوى رودا.. وإلا المسـألـة تبقى كـوار ما حسـاب!
واللا كيف؟
| |
|
|
|
|
|
|
|
|
|
Re: RoadaneseOnline.com (Re: أبوالريش)
|
بصراحة كدا ..
أنا ما فاهم الحاصل شنو بالزبط؟
خليتكم زعلانين مني ، وعيب عليك واعتزر والدنيا أم قدود الخ الخ
وهسع رجعت وشايفكم سايرين على الناس الكانوا سايرين ضدي
يعني انتو حسع شايتين معاي؟
وللا كلامك الزمان طلع صح يا ابو الريش كمن قلت كندورة دا معانا وللا معاهم؟
طيب انا كنت شايت غلط بعترف!!
أها فهّموني النتيجة بقت كم كم ؟ والناقصين منم عشان نتمهم بشرط
أنا مع المغلوبين
احب اكون مع المغلوبين
دايما المغلوبين في الدافوري - وحياتنا العامة طبعا كلها دافوري - بكونوا عريانين وحفاية
عريانين وضلوعم برة وبطونم معصورة على ضهورم ، وذلك كله امعنا في الذل.. غبش وبتوقعوا بسرعة العبرة خانقاهم من قلة الحيلة والهوا العكسي
الغالبين بكونوا لابسين كُباكة وباتات جديدة نيف ومرات كما شربات طويييلة ولابد انك تلقى واحد وللا اتنين منهم لابسين كدارات عندها كدايس ومرات مرات مسامير مصدية
المغلوبين جوة الميدان شوية وضعاف ومنتهيين رغم انو اهلهم برة كتار جدا وما بيعرفوا يلعبوا بالطريقة العايزة الحكم، وكان خِتوا الحكم ما يختوا اللاظملاين! الظروف كلها ضدهم وبتخوّف الناس
انا مع المغلوبين على امرهم وخايفين
انا مع المغفلين الذين لا يحميهم القانون
انا ضد القانون الذي لا يحمي المغفلين
انا مع الله ولي الغافلين
مع المغلوبين ..
لانهم غالبا ما يكونوا اولاد هامش البلد ( سواء الهامش الاجتماعي او الاقتصادي او الجغرافي).
عندما كنت صغيرا في الكرمك الابتدائية كنت اعشق فريق المريخ ، لأنه فريق اهل البلد
اهلي الجلابة كانوا مستغربين وبعتبروني ما مفهوم ولا منتمي أو بحب المشاترة والظهور
مافي زول احيمر وسط الناس الزرق ديل! .. كايس شنو هناك؟
الكاسات كلها كانت بتمش للهلالاب ونحن ناس قريعتي راحت ديل معليش
اقسم بالله انو استاز عبد القيوم كان لمان الفريق يكون فايز بقون واحد في الشوط الأول كان برسلنا بيتو عشان نقطع ليمون ( حداشر ليمونة بالعدد ) يمصوها اللعيبة في الهاف تاين
لا اله الا الله محمد رسول الله
يمين الكلام دا حصل وانا شاهد عليو
سعيت اعمل فريق اشبال وحاولت استقطب من اصحابي اولاد الجلابة لعيبة ولكن للاسف !!
المسألة محسومة : ان الطيور على اشكالها تقع
جمال عبد الله اهلو من المحمية وودعمو محي الدين المرضي شرحو وعصام علي التوم ابوهو مفتش الزراعة وعندو كومر وعندهم كلب شعرو كتيير زي الخروف
كلهم ابوا وقالوا لي ياود انت جنيت ؟
والغريبة انو مافي ناس من اهل البلد( صرف) هلالاب
لكين من اولاد العرب في مريخاب من الجياشة وبعض المدرسين اللي اصلا مريخاب من يومم وبحبو الفانيلا الحمرا الصفرا والنجمة من قبل ما يجو الصعيد.
حامد بلة عصب جلابي ماكن وساكن في حي الاغاريق جنب الجبل ، ورغم ذلك فهو مريخابي على السكين ، حالة شازة ، والناس بتقول انو متأسّر بالدوالة البغربلو الدهب فوق في الجبال، أصلو عمنا حامد تاجر دهب شراي خالس ..أكتر زول بشتري تبر
يوماتي على الله تلقى الناس مترصرصين فوق البلاط قدام الدكان بتاعو حتى قبل ما يفتح البيبان ويقول اصبحنا
ديل هم ناس الدهب بهدومهم المطينة طين وجسومم البيضاء بسبب تراب الدهب ولما يتنضفوا بينقلبوا زرق، والعجب لو اتمسّحوا بالزيت وفرحوا ..ياسلالالام
حامد بلة برضوا مع المغلوبين ديل ، رغم انو كان بياخد منهم الدهب وبيعطيهم نقود لا يعلم مداها الا الله
كان ما يقوله لهم هو الصحيح دائما: قيراط ، تلاتة قراريط، حباية ، ربع وقية أي حاجة فضل من الله
لا يملكون ان يقولوا رأيهم ، فهو محل ثقتهم بعد الله عز وجل، ويقولون انه احسن ليهم من الخواجة نيكولا والخواجة بنيوتي كوكارس او خرلمبو الخ .. وكل ما يمكنهم قوله امامه هو : ها يا أمي هامد بلة ما تسلّه لينا شوية مالك بقيت بخيل كدا بس! انت ما داير الاجر؟ نهنا ما مساكين زي ما انت شايفو، انشاللا كان طرادة ساي كويس مانا .. وهنا ينفحهم ريال كان كافيا لتحقيق عدد اتنين فول بالزيت والشمار والبصل في قهوة السادق ، وكمان براد شاي طلس راكّة فوقو ضبانتين خضراوين في صينية مورّدة وفي امانة الله!
انا هنا مع المغلوبين ليس بهذا المعنى تحديدا
وانما معهم دون نقاش ، ومن ثم اتساءل ما اذا كانوا ظالمين او مظلومين
هكذا وجدتني منذ صغري يا ابو الريش
هذه الصفة سببت لي كثيرا من المشاكل وسوء الفهم ( لأن العقلية السودانية المهيمنة هي دوما عقلية هلال مريخ وشايت وين، واما من يشجع اللعبة الحلوة فلا محل له ) كنت دائما اجد نفسي في وضع ينظر اليه الآخرون ( النمطيون ) بريبة و باعتباره المكان الخطأ الذي لا يناسبني موضوعيا، وهكذا يبدأون في البحث عن المبررات والدوافع وما اذا كان موقفي ناجم عن انتماء خفي نحو من انحاز اليهم برأيي المحدد هذا؟!!.
والآن اتساءل يا اخي ابوالريش وانت تعلم انني اعزك واحترمك
فهلا اجبتني ؟:
هل تظن ان رودا التي تكتب في هذا البورد هي ( دائما) امرأة بنفس المواصفات المعلن عنها سالفا؟
اقصد هل انت متأكد من انها امرأة حقيقية اسمها رودا مردة مسيحية من غرب أو جنوب غرب السودان ؟ أم انها شخصية اخرى حملت اسم امرأة حقيقية لها هذا الاسم ( رودا مردا) ولكنها لا تشاركنا في البورد ؟
ماهو ردك على الذين يعتبرونها شخصية مفبركة اصطنعها البعض هنا لتمرير بعض الافكار الراديكالية المضادة للمسلمين والعرب على النحو العاطفي المستفز و النابي الذي نراه؟ وهل تظن ان بكري ابوبكر يعرف جلية الأمر بهذا الصدد؟
كيف تقوّّم هذه الظاهرة بعقلك الحكيم الذي نعرفه؟
ابو الريش كل عام وانتم بخير
واعتذر للتداعي وتيار الوعي
_____________
رب اشرح لي صدري
| |
|
|
|
|
|
|
| |
وليد محمد المبارك
محمد عبدالقادر سبيل
فيس بوك
تويتر
انستقرام
يوتيوب
بنتيريست