|
Re: لقاء مع والدة وزوجة المرحوم مصطفى سيد احمد ** وصله (Re: مبيوع)
|
أخي العزيز ياسر مبيوع كثير التحايا وعاطر الأشواق أشكرك على الوصلة فقد أتاحت لنا سياحة طيبة في حياة ذلك الفنان الإنسان المهموم بوطنه وبفنه وقد عانى ما عانى وانسكبت معاناته لحنا رقيقا وصوتا حنينا يهز الوجدان .. فسلام عليه في الخالدين والتحية لوالدته وزوجته وأبنائه .. ويسرني أن أهديك قصيدة أخينا الشاعر العوض مصطفى والتي كتبها فيه بعيد رحيله .. وعنوانها "يا مصطفى" ..
ودَّعتَ ياحُزْنَ البلد ودَّعت يالولد السَّمِح في الغـُربة والزَّمن النـَّكد وجوك العِـيال ما بقصِّرُوا سوُّوا العدِيل والزّين هِناك ما اتصرْصرُوا بس كنت خايـِف كيف عليك يطويكَ ليل الغربة دِيك في الغربة لا اندلـَـقــَنْ عليك بنـُّوتـْـنـَا مَحْزُونات كمَدْ لا اتـْـشالبوك أهلك يَهـِـزُّوا الدنيا يالولد الرَّهدْ مات الغـُنا المحْشُود وحاتك يـَا الحُزُنْ ما عندُه حَدْ ؟ مطرُود وراك الريح تصفـِّر لا غمدت ولا رَقـَد شايل همُوم النـَّاس وناسِي البيكَ يالولد العددْ أصلـُه الغـُنا ان ما كان وحاتك للوطن مابيبقى جد والحزن لو ما كان نبيل يبقى انهزام .. بحرًا شـَرد محزون وحاتك يا ولد صوتـك يرن في بالي حد (غدار دموعك ما بتفـيد) صوتك يجيني أنا في الهويد (عبد الرحيم) و (حاج ود عجبنا) ونفحة العيد والجديد كـُتْ في انتظار يومًا أشوفك فيه ساير بالنشيد راجع تبشـِّر بالغـُنا الغنيتـُه في البلد البعيد ويتلمُّوا ليك النـَّاس دمُوع الفرحة تـَطـْفـُر دون عدد ويتلمُّوا ليك الصَّالحين يـبرُوك ويدُّوك المدَد وتفضل تغنـِّي وتنشرح لا غُربة لا الزَّمن الجرح حقـَّـك عليْ يا مصطفى وحقـَّـك علي البلد الوهبتـُه غـُناك والفال السَّمِح هاكَ السَّلام من عندي انا ومليون سلام ليك ياجنا من الغـُبش قايمين دُغُـش كادحين علي اللـُّـقمة ْ العِصَتْ صابرين علي الحَالـة ْ القِستْ والحال وحاتـَـك ما هُو حَال رَاجـِين رجُوعكـُم يالعِـيال لا شيلة ْ لا كِمِّين ريال راجـِين ضُراعكـُم يـِنكرِبْ لا فـُرقة لا ريحَة ْ حَرِبْ نبنِي الوَطـَنْ مَهْما خِـربْ والسَّاعة دِيك يبقى الغـُنا اللا اتـْـقـَال ولا مَرَّة انـْـكـَتـَبْ ممدُود من اللـَّحن القدِيم مَحْـشـُود وحاتـَـكْ بالطـَّربْ مَـلـْيان وُمسْـنـُود ما بْيـَقـَعْ مَعَجُون من العَرَقْ النـَّـقـَعْ مِـنْ كـَمْ جبـِـيـن بي تـْصُبـُّه صَبْ وتخضِّر الأرض اليباب يتبدَّل الزَّمن الصَّعـبْ وُنفـْضَـل نغنـِّي وْ نـِنـْـشَرحْ لا غـُربة لا الزَّمن الجرحْ ودَّعتَ يا حُزنَ البـَـلدْ ودَّعتَ يا لوَلد السَّمِحْ
عزيزي ياسر ، لقد سرني أنك ستعيد تسجيل القصيدة (ويا حبذا "طائري الخفاق" و"أنا أمدرمان") بصوت أوضح وكنت سأطلب منك ذلك .. فأرجو أن نسمعها ويسمعها الجميع قريبا عمر
| |
|
|
|
|
|
|
Re: لقاء مع والدة وزوجة المرحوم مصطفى سيد احمد ** وصله (Re: مبيوع)
|
اخى الحبيب عمر هوارى كل سنه وانت طيب شكرا للمداخله الشاعر العوض مصطفى شاعر رقيق الحاشيه ومتمكن من ادوات الشعر اتمنى انو اعيد تجربة التلحين لاعماله مره تانيه ساقوم انشاء الله بتسجيل كل الاعمال الطلبتها وحاانسق مع استاذه اسماء انشاء الله ولو قدرت نزل لينا صور من الذكرى العشرين للاستاذ عشان توروا الناس حجم العمل
| |
|
|
|
|
|
|
|