صلاح أحمد أبراهيم من ندوة فى الجامعة أول أيام الانتفاضة وجدتها فى شريط كاسيت محفوظ لدى من ذاك العهد
فيهم قوة فيهم نخوة فيهم راس وفى مجلس رفاقا عزاز بساط وظراف مازى زولكم الزهجى الظلوم الظق خادم الباشا دقاق المساكين دق تيلات جدو فى التركية فيه مرق لا بحس بالكرامة ولا بهمو الحق
يشتم فى البشر أموات على أحياء ويشتم كل مغضوب منو فى الوزراء وحتى الماتو أذكروا كيف اليهم أساء وعاد يبكيهم التمساح وأى وفاء
ثروات بحرنا الأحمر تنازل فيها زى مويتنا ما عبود تبرمك بيها عجبن لى حراميها وصبح حاميها يقهرنا ويقول للغير أهجموا عليها
أسرع يا سليم (سليم مستشارو الاقتصادى واحد لبنانى محتال ابن كلب) أسرع يا سليم ساعد أخوك عدنان وهاك الشيك وهيك ملعون أبو السودان خبراتنا العزيزة الطاشة فى البلدان طفشا بى عمايل ما بتسر انسان
يابايع الوطن للغير
يابايع الوطن للغير أريت لو بعتو بالتمن النقول يمكن يطابق نحتو كل صاحب جنيهين أجنبى وطمعتو بالهوبلى خم وقال أريتكم جعتو
ماكان العشم قط يا الأبوك مسكين تتكى الشعب تدنا عليه بالسكين باكر تفنى لكن تبقى فينا سنين آثار فعلتك شوف البسامحك مين
برطعت وعتيت (قطع فى الشريط) شعب البلاد شحات بددت الأمل والمال نصيبنا فتات وليك انت النياشين ترقش الدهبات
سبحتو من حبال المشنقة المرفوعة جلابيتو من كفن الشهيد مقطوعة صحة عضلو من مرض الأهالى وجوعا الفاتورة من لبن الرضيع مدفوعا
(صاح فى مقديشو بصوت عالى قائلا) الرحمة
(فرد عليه صلاح) الرحمة بتكورك فى بلاد الغربة والرحمة بتكورك والعمايل كعبة فاكر رحمة الله يا أب مشانق لعبة ولا الرب رهو منك بتدخلو رهبة
سبحان مكرو اسمو المنتقم لعبادو واسمو شديد عقاب ويل للذين تمادو يمهل حبلو داك سلبة وطويلن مادو ما بهمل وقط ظلم النفوس ما واردو
يا سفاح عشان تهنأ وتعيش فرعون يا داسى الجثث يا الفى الفجر (سورة الفجر) ملعون يا سارق الفقير مانع على الماعون يا عارض عرض فوق البلد طاعون
قولة أضربوهم (قالا للجامعة هنا لو تتذكروا)
أضربوهم قولة أضربوهم كيف يرجعا فوك ووين تلقى العدالة ودا العهدنا سلوك أحكام ظل بلا بينة وحكم متروك لا للمادة لكن لى مزاج صعلوك
متهمك يشر دمو وأمام القاضى يضربو فيه يكفيهم وفخامتك راضى كيف يتهنا جفنك ساعة بالاغماضى من يوم يندهوك ويواجهوك بالماضى
ما تتحوى بى آيات عزل معزولة ما تغشك سبح متسولات بى قولا ما فيش اليقيك وكتين تجيك فى تولا نوح نوحن كثييييير وأطرأ القيامة وهولا
أعزل لى دجل آية وتفادى الأخرى قالت آخر الظلم الجحيم فى الأخرى يا العاجباك أمارتك تنقز فخرا ربك كيدو أكبر يوم يزنقك تخرا
خلى الدين بعيد ما تجروا توب فى دنيتك ما قال ليك جوعو عبى فى صينيتك ما قال ليك أسرف وسف وعلّى بنيتك وعربد وعير وعاند وخلى انسانيتك
خلى الدين بعيد ماتزيد جرايمك سيئة راعى وبسألوك كيفن ظلمت رعية يا الحمل الأمانة ظلوم جهول مادية بتجيب الخبر عند البيقرا النية
يتبع
04-17-2002, 05:34 PM
EMU إيمو EMU إيمو
تاريخ التسجيل: 02-16-2002
مجموع المشاركات: 2924
كما قال الشاعر هذا زمن الحق الضائع لا يعرف فيه مقتول من قاتله ومتى قتله ورؤوس الناس على جثث الحيوانات ورؤوس الحيوانات على جثث الناس فتحسس رأسك يا زاتو فتحسس رأسك يا إيمو
04-17-2002, 05:45 PM
wadazza wadazza
تاريخ التسجيل: 02-05-2002
مجموع المشاركات: 5386
شكرا لهذه القصيدة ..للراحل المبدع صلاح أحمد ابراهيم وهى بحق من القصائد النادرة كونه كتبها بالعامية ولمضمونها الوطنى العميق فلا تبخل علينا بهذه الدرر وأفتح السحارة مرة مرة وطلع وأنا أعلم أن لديك الكثير المثير الخطر تحياتى ود عزة
04-17-2002, 06:37 PM
bamseka bamseka
تاريخ التسجيل: 04-07-2002
مجموع المشاركات: 2451
أها يا المولود فى واشنطن دى سى عرفنا ناس السارة يقولوا ملاح الحبال والبشكير..عشان ماسمعوا بالكمونية ..انت الما بعرفك بالسحارة شنو؟؟ السحارة الكانوا زمان بختو ليك فيها البلاى استيشن لمان كنت صغير تلعب..فى التراب..أقصد فى ميدان الغولف تحياتى ودعزة
04-18-2002, 03:03 PM
bamseka bamseka
تاريخ التسجيل: 04-07-2002
مجموع المشاركات: 2451
لا والله فهى أصعب شىء أن تنقل قصيدة من شريط كاسيت وتكون المناسبة ندوة فى جامعة الخرطوم والشريط عمرو أكثر من 17 سنة
أولا لازم تتأكد من كل كلمة وأحيانا الكلمة الواحدة تتطلب أن تسمعها لأكثر من 50 مرة وتسمعها لآخرين محايدين حتى تأخذ الصيغة الصحيحة للكلمة وبعدين لاحظ أن هنالك تصفيق وتشويش كثير فى خلال الندوة فصدقنى المسألة ليست ساهلة أبدا وخصوصا لما يكون المتحدث شاعر بقامة الراحل المقيم صلاح أحمد أبراهيم وكمان لما الكلام يكون بالدارجى يعنى باختصار شغلانة كدة ولكن عشان خاطر الحبايب كل شىء يهون
تسلم يا أمير
04-21-2002, 00:33 AM
bunbun bunbun
تاريخ التسجيل: 02-04-2002
مجموع المشاركات: 1974
نترحم في ذكرى الانتفاضة على الاستاذ صلاح احمد ابراهيم ونشيد بفكرة اعادة ونشروتلخيص الليالي الثقافية والفكرية على ايام الانتفاضة والديمقراطية التي لم يعشها وعيًا جيل الدفاع الشعبي وثقافة الحرب
04-22-2002, 09:47 AM
يازولyazoalيازول يازولyazoalيازول
تاريخ التسجيل: 02-05-2002
مجموع المشاركات: 10210
إنت المُلهِم الملهَم دوام تتوطح ما بين مهبط الحكمة وتقوم تتفولح وين إلهامك؟ البلد التراهو ملولح غشك ثعلبان حاجتو إنقضت واترورح
فى ضهرك طلع وطلعت إنت فى ضهرو شيلنى وأشيلك السايس بغاير مُهرو ينفخك إنت ناصر وإنت تيتو ونهرو باكر تمشى فى غيرك يمارس عهرو
وين إلهامك؟ الفكر القفلت دروبو ولا شقاوة الشعب النفضت جيوبو ولا سقوط قيم فى جيل مفرهد دوبو حسب الشايفو قدامو بيتم تدريبو
وين إلهامك؟ إلا إن كان كذب وأونطة أمل الشعب فيك راح زى قتيلة الشنطة مشدوه بى مواقفك نطة عكست نطة زى قرد الطلح يوم يسألوك رطنت
صدق القالو منصور (جعفر المنصور) صدق القالو منصور نصرة ضد آمالنا ضد أولادنا ضد أحفادنا ضد عمالنا ضد الشعب كلو القالو مالك ومالنا حلال بلة من القيد يكون حلالنا
صدق السمّا قائد (الرئيس القائد) صدق السمّا قائد للخراب والفرقة للخلق الرزيل لى بيع عرض للسرقة لى سف التراب للمحقة يوت للحُرقة زى إبليس يقود الساقطين للحَرقة
زى السامرى ما برضو قائد ملهم شال عجل الدهب قال موسى خائن مجرم وزى قائد الضلال مذموم صحائح مسلم قائد ماشى وين؟؟ دربك ملولو ومظلم
الأخ الرئيس قالك الأخ الرئيس قالك رئيس لى عصابة حاكم بالعضل بالبنية بالدبابة تبت إيدو يحكم بى شريعة غابة بالجمهورى صائل فى تعابة غلابة
الأخ الرئيس كل يوم يفاجىء شعبو بى شيتن يمحن للبعيد والجمبو مرماه الوحيد كيفن يوهط صلبو فى كرسى الحكم والباقى شن يعملبو
تمثيلية فينا رئاسة بعد رئاسة قايل الشعب بى قمبورو ولا دباسة ماناقصلو غير يعمل عمل بوكاسا سبورة بعضل متأبط الحداثة
ربنا وابتلانا عشانا نخش الجنة نزل لينا دجال ايدو ماكنة مكنا جانا فى شكل منقذ مرفعين ضللنا بى فروة حمل لمن أمِنا أكلنا
انظر نابو بى دم الشباب كيف دامى وانظر جسمو بى تنميتو كيف متنامى وانظر مخلبو الفوق المساكين رامى واسمع عوتو جِعان ولا جنن رامى
04-22-2002, 09:52 AM
wadazza wadazza
تاريخ التسجيل: 02-05-2002
مجموع المشاركات: 5386
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
يازولyazoalيازول
EMU إيمو
wadazza
bamseka
cola
فيس بوك
تويتر
انستقرام
يوتيوب
بنتيريست