شوقى بدرى شخصية سودانية فذة ، يكره العنصرية وينبذ افتراء الشماليين وتعاليهم على أبناء الجنوب ، ويعتقد جازما أن كل مشاكل السودان كانت وما برحت بسبب هذه العنجهية الشمالية المتعالية وهو محق فى ذلك ، وهو مؤمن بانتمائنا الى أفريقيا وأنها الأقرب الينا من تلكم العروبة المدعاة ، رغم فصاحة ألسنتنا ، ولكن بشرتنا وشكل مناخيرنا ورائحة عرقنا وشلوخ نسائنا وما تبعه من نقرابى ودق شلاليف وخفاض وحتى طارات مديحنا تشكل الدليل الأكبر على أفريقيتنا ، أنا شخصيا تعلمت منه الكثير أوجز بعض ما تعلمته هنا:
كل السودانيين (زنوج) بالمفهوم العالمى بما فى ذلك الحلب والنقادة وأولاد الريف الذين تزاوجوا معنا وجميع قبائل الشمالية (العرب) هم فى الأصل ليسوا سوى زنوج أولاد زنوج
تعلمت منه أن موسيقانا أفريقية ولذلك لا يطيقها العرب باعتبارها موسيقى زنوج دونية
تعلمت منه أن أم درمان كانت فى حقبة من الحقب تمثل السودان بكل أقاليمه وعاداته وشعوبه ، فهى خلطة سودانية بحتة حيث تعايش فيها الجنوبى بقرب الفوراوى جنبا الى جنب مع النقادى والقبطى والحلبى والدنقلاوى والرباطابى والفلاتى ، فكانوا مجتمعا فريدا فى نوعه يحبون بعضهم بعضا دون عرقية أو تعالى على الآخرين
تعلمت منه أن حكومة الانقاذ هى أسوأ حكومة مرت على السودان عبر التاريخ ، والسبب الرئيسى فى سوءها هو الزج بالدين الاسلامى دون سواه فى نظام الحكم ، وتعقيد مشكلة الجنوب عندما جعلها الانقاذيون حربا جهادية على مواطنى البلد الواحد ووسعوا بذلك الهوة بين الفريقين ، وومما زاد الطين بله ، ظهور مشكلة دارفور كافغراز طبيعى لسوء تصرفاتهم وحكمهم الطائش
تعلمت منه معنى قيمة الانسان ، وكيف يمكن بل وكثيرا ما يحدث أن يكون الجنوبى أفضلا بكثير من الشمالى فى مواقفه ورجولته وأمانته وصبره وجلده واحترامه للآخرين
تعلمت منه الرجولة بكل معانيها ، وهو يستخدم يده ولسانه ليضع الأمور فى نصابها الصحيح ، ويكون الله دائما معه لأنه لا يستخدم يده أو لسانه الا بالحق ، والحق هو الله
تعلمت منه معنى الحياة والشرف والفن والحب والكر والفر
05-20-2004, 12:58 PM
Ibrahim Algrefwi Ibrahim Algrefwi
تاريخ التسجيل: 11-16-2003
مجموع المشاركات: 3102
يا زول يا زول يا زول اسمع يا زول ، تباري لي درب شوقي بدري ده تلقي نفسك قاعد براك . كلامك ده زكرني بي سيد العرضحال بضم العين . في واحد مشي لي كاتب عرضحال نجيض . و في امدرمان زمان كان في اتنين بقعدوا تحت الجميز في السرداريه او مجلس القضاة الاوسط اخيرا . عمنا جادين صافي الدين في الجميزه الجنوبيه و عمنا حجازي في الجميزه الشماليه . عمنا جادين يسكن في شارع الفيل و عمنا حجازي في العرضه . بعد تدبيج العرضحال قال لسيد العرضحال ( نقرا ليك العرضحال ؟ ) و بعد القراءه بدأ سيد العرضحال في البكاء . فقالوا له ( يا زول مالك ، قول بسم الله ) فقال ( انا والله ما كنته عارف نفسي مظلوم قدر ده ) . اها يا وداخوي انا والله ما كنته عارف انو انا بعرف قدر ده . و لك التحيه شوقي
05-21-2004, 11:19 AM
shawgi badri shawgi badri
تاريخ التسجيل: 04-26-2003
مجموع المشاركات: 622
ابننا قرمبوز انته عامل لي صلعتك دي ما حتجيبها علي البر ، مداخلاتك دي حتدخلك في مشاكل بتهمة التعامل مع شوقي بدري . اخونا الرشيد عبدالحليم حامد الذي صار في فتره من الفترات مديرا لفندق قصر الصداقه . كان قديما لمن يمشي الديسكوتيهات بقول انو اخو شوقي بدري . و حذرته . يوم مع احد الاصدقاء عزموا اتنين بنات سويديات البيت . و جا السؤال انتو من وين و تطرق لانه من السودان و اخو شوقي بدري ، البت راحت لافخاهو بالشنطه و ساقت صحبتها و فاتت . في الستينات والدتي حضرت عدة مرات بتاكسي و رفض السائق اخذ فلوس منها عندما تعرف علي البيت و قال ليها سلمي علي شوقي . و طبعا كانت تعمبب لمن يكون معاها صديقه لان وقتها كنت في الثامنه عشر . الي ان اتت يوم و مدت الريال لصاحب التاكسي فقال لها ( انتي ام شوقي ، بتعرفوا تلدوا لكن ما بتربوا ) . بعدين ما تقول ما حذرتك . و لك التحيه شوقي
05-21-2004, 11:48 AM
Frankly Frankly
تاريخ التسجيل: 02-05-2002
مجموع المشاركات: 35211
الاخ العزيزالاستاذ يازول يازول يازول لك التحية وانت تمجد ابن امدرمان الاستاذ شوقي بدري وأقول لقد تعلمت عنه وعن ذاك الزمن الكثير واحمد الله كثيرا على عروبتي وعروبة لساني مع احترامي لكل انسان كرمه الله قبل ان يكرمه بني جلدته و ارى انه كي نرد الحق لاهله لابد ان يجد كل ذي حق حقه وانكار العروبة عن العربي ظلم لحق محقوق والاجدر ان نعالج المظالم بوضع الاطر التي تكفل حق المواطنة للجميع عربا وغيرهم وان كنت لا اريد بزج تجاربي الشخصية في موضوع عام ولكن اقول ان لي كل الفخر ان تعلمت قواعد اللغة العربية من اخ حبيب لي من ابناء الزغاوة اسمه الشيخ ادم اسحق من كتاب اسمه "التوضيحات الجلية في شرح الاجرمية" وكنت اجلس كل يوم بعد المدرسة على البروش امام مسجد الملك فيصل بالعرضة لكي اتعلم منه ومن المشاركين في الدرس قواعد لغتي الام وقد يفوتني الغداء وانا في الدرس الذي كان يطول الى صلاة العصر بعض الاوقات بارك الله فيك اخي الشيخ ادم اسحق و
لكما معا كل تقديري واحترامي
_____
أتق الله حيث ما كنت واتبع السيئة الحسنة تمحها وخالق الناس بخلق حسن
05-22-2004, 09:01 AM
يازولyazoalيازول يازولyazoalيازول
تاريخ التسجيل: 02-05-2002
مجموع المشاركات: 10210
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
يازولyazoalيازول
Ibrahim Algrefwi
shawgi badri
Frankly
فيس بوك
تويتر
انستقرام
يوتيوب
بنتيريست