رسالة عاجلة وحزينة للسودان ..طير الشؤم .. شعر بكرى النعيم .. لكل موجوع من حال البلد !!!!

Quote: والشوم جاب معاهو الشوم والموقف مشى اتأزم ! لا الغنيان قدر يرتاح ولا الفقران عرف ينجمّ

Quote: والله قصيده تحى عن الواقع المرير الذى نعيشه فى السودان وخارج السودان وجع وألم وحزن لمتين ؟؟؟؟؟ الله أعلم ....!!!!!!!

Quote: لو ما كنت سوداني ولو ما جرحك الصابر سرح حدّادي مدّادي من شرقك ولي غربك. ومن عقلك ولي قلبك شنو الخَلّى الوطن بي حالو مليون ميل تشيلو عديل ويتمهَّل في ضيق صدرك؟!! لو ما كنت من وجعك شِرِب حرفك وما قبّل على الأسهل شنو الخَلّى العيون تحمل عذاب الرؤيا للأجمل. ولو ما كنت ناى سوّاي وما حدّاث وسر ضحّاك وما بكّاي شنو النحتك من الأهوال في أحسن حال بقيت سوداني بالإزميل وبالتبريح وبالتجريح وبالتنكيل وما باللفّه والأسهل؟!! شنو الخلاّكا يا حفيان من أمدرمان؟! شنو البَقّاكا يا هلكان من السودان؟! شنو السوّاكا نار وعصار ودار وعمار وإنت وحيد كمان أعزل؟!! تُف من خشمك الحنضل داك برقاً شلع أجمل رغم «الظاهره» والخافية. رغم العُصبه والمافيا رغم الشفتو والجاكا وناس «دلاكه» كنداكه. ناس «ودّوك» وجبناكا. ناس الزانه والزازاي. ناس «البِزّه» والتاتاي. ناس «المزّه» سِيرة الناس في ضُل البُن وبوخ الشاي. ناس «العَصْره» سر «الشفره» ناس «البيع» وستين وش - عشان الخَش - ومليون راي. .............

Quote: طير الشوم لمتين يا سنين الهم ومن مشوارنا فاضل كم ؟!! ملينا السؤال والحال عنوانو النكد والهم مخيم فوقنا طير البوم لا فات لا عرف يرحم !!

Quote: لابد من يوم ترد فيه المظالم ابيض على كل مظلوم اسود على كل ظالم لك التحية وعبرك أحيى المثقل دوما بهموم وجراح عزة الرائع بكرى النعيم

Quote: قصيدة جميلة ومعبرة فى حق الوطن وهذة القصيدة شىء بسيط من ما يجوش فى وجدان الشقيق الرهيف العمدة ود العمدة بكرى النعيم فى حب هذا الوطن الجميل ونسأل الله العزيز القوى أن يبعد طيور الشؤم عن هذا الوطن الجميل حتى تعود طيورنا المهاجرة .