لدينا قريبنا طويل وعوير لكن كل هذا الطول الفارع لم يشفع له من ضرب زوجته له ولديه حركة ظريفة جداً فعندما ياخد { علقة } من المدام فإنه لايذهب ليكلم امه أو أخواته بل يقفل الباب عليه ويبكي لمدة ساعة على الأقل ثم يخرج كيوم ولدته أمه وكأن شيئاً لم يحدث !!! وربما هذا الشخص كان سبباً في تاخير زواجي فكلما أنظر اليه اصاب بالاحباط من اكمال نصف الدين واقول يكفينا هذا النص وليكن ما يكون أما أنا فيبدو لي انني سأغلق غرفتي واضحك على نفسي كثيراً فقد حدث لي موقف بجده قبل يومين مازلت استغربه حتى اللحظة انزل عادة بفندق رخيص الثمن لكن في ذلك اليوم حتى هذا الرخيص لم أجد به غرفة للسكن اضطررت الذهاب على مضض لفندق قريب منه والسعر مضاعف اربع مرات ومع الارهاق دلفت الى إحدى غرفه وبعد أن وضعت شنطتي نزلت الى الاستقبال لإكما الاجراءات ومن ثم الذهاب للتسكع في وسط جده وعندما أخرجت المبلغ الخاص بايجار الغرفة { 200 } ريال قال لي موظف الاستقبال 00 معليش المبلغ مدفوع اعتبرت الموضوع كاميرا خفية 00 لكنني سألت عن من قام بتسديد المبلغ فأشار الى شاب باكستاني كان يجلس في الاستقبال بانتظاري !!! سبحان الله قام بالسلام وبالأحضان وبطريقة غريبة جداً ليس هذا فحسب بل احضر العشاء ووضع لي في جيبي { 1000 ريال } قد لاتعرفون من يكون هذا 00 بالطبع ليس هو نواز شريف ولاذوالفقار علي بوتو ولا عمران خان انه عامل بسيط كان مكلفاً بتنظيف مكتبي واحضار القهوة والشاي لضيوفي وكنت كثيراً ما أنهره وأطرده من المكتب ان أتى لي أي شخص يشكو منه خدمته فقط عندما بدأ يشكو لي من راتبه القليل { 700 } ريال وأن اسرته كبيرة بالطبع لم ارفع له راتبه وإن كنت استطيع ذلك لفعلتها لنفسي بل ساعدته باستلام مستحقاته وعمل الخروج النهائي فقد كان الرجل يفكر في اضاءة مستقبله بصورة أجمل ذهب الى أهله ورجع 00 واشتغل بالتجارة مابين كراتشي وجدة قال لي 00 أمازال راتبك كما هو ؟؟ قلت له : كمان نقص 00 فقد خصموا منا 5% قال لي : صدقني 00 مصاريفي اليومية الآن لاتقل عن 1500 ريال انا مازلت مديراً لمكتب الرئيس 15 سنة 00غطرسة في الفاضي و15 سنة تعامل بعجرفة مع المراجعين والبسطاء من العمال و15 سنة لسان أطول من نهر النيل 15 سنة بلا طموح ولا أهداف ولا خطط آنية أو مستقبلية ولابيت في السودان ولا قطعة ارض 00 بس عرسنا قال عرس قال !!! كمان بعد العرس نص الراتب راح في المكياج شي رموش وشي عيون حتى الأضنين لهن نصيبهن من الميك اب ياجماعة 00 هل نحن شعب غير طموح ؟؟؟ ولماذا دائماً نحن نمشي في شارع اتجاه واحد يعني تكنكش في راتبك دا لحد ما يودوك جنازة !!!!
04-22-2006, 04:46 AM
يازولyazoalيازول
يازولyazoalيازول
تاريخ التسجيل: 02-05-2002
مجموع المشاركات: 10210
يا ابحراز ياخوى الباكستانى طلع اشطر منك ، إيه رايك نحن كان عندنا بنقلاديشى بيعمل الشاى وراتبو ألف ريال شهريا ، والعجيب فى الأمر أن كان بيرسل لبنقلاديش عشرة ألف ريال شهريا ،
كيف؟؟؟
سؤال لم استطع معرفة إجابته بعد ، ولكنه كان بعد الدوام يعمل فى (أى شىء) يرسل بضاعة للبنقلاديشيين ، يحول لهم فلوسهم ، له مجموعة يعملون فى المكواة وفى غسيل العربات وفى البيع بالجملة والتجزئة وفى الحشيش وفى القوادة وفى تعليم القرآن وفى اشياء لا تخطر بالبال ، ويعملون فلوس زى التراب ويبنون العمارات فى بلادهم
السودانيين كاتلاهم الطيبة يا ابحراز
الله يكون فى عونهم
04-22-2006, 05:03 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
يازول يازول وكمان كاتلاهم العوارة ايضاً أما الحماقة فحدث ولا حرج زي أخونا الجعلي الذي وقع في البير ومافي بره البير الا الشايقية اها الراجل كان عنده دكان وقالوا ليه رايك شنو لو طلعناك { تطلق لينا } قال ليهم علي بالطلاق حاضر ما ابيع ليكم !!!
ذهبت لبنغالي يبيع ملابس نسائية اخترت اقمصة نوم هدايا لإمراة ترضع طفلها الصغير ولابد ان يكون القميص مفتوحاً ليساعد على الرضاعة وقلت للبنغالي ذلك واعطاني الأقمصة داخل كيس وفي البيت وجدوها مقفولة تماما فاخذتها له بعد المغرب ورفض استلامها بحجة أنني تأخرت في ارجاعها طوالي أعطيته كف زي السم وقمت بتقفيل الدكان بعد أن وجدت بعض المخالفات ولم أمكث في البيت سوى 5 دقائق فجاءني البنغالي الذي يقوم بغسيل سيارتي شوف موديل 79 وعاملين ليها واحد يغسلها اسبوعياً أمانة ماعجرفة وفشخرة في الفاضي المهم كان البنغالي يحمل جردله بتاع الغسيل وهو يبكي فقال لي : صديق انت في قفل دكان قلت له وماعلاقتك أنت به فقال لي { الدكان حقي } تصدق الدكان به مالايقل عن 100 الف ريال ورغم هذا فهو يحمل جردله لغسيل السيارات قلت له مادام الدكان حقك فانت أشطر مني اذهب لنفتحه اليك حالاً برضو الراجل ماشي بي كرعينه سبحان الله
Quote: سنة 00غطرسة في الفاضي و15 سنة تعامل بعجرفة مع المراجعين والبسطاء من العمال و15 سنة لسان أطول من نهر النيل 15 سنة بلا طموح ولا أهداف ولا خطط آنية أو مستقبلية ولابيت في السودان ولا قطعة ارض 00 بس عرسنا قال عرس قال !!! كمان بعد العرس نص الراتب راح في المكياج شي رموش وشي عيون حتى الأضنين لهن نصيبهن من الميك اب ياجماعة 00 هل نحن شعب غير طموح ؟؟؟ ولماذا دائماً نحن نمشي في شارع اتجاه واحد يعني تكنكش في راتبك دا لحد ما يودوك جنازة !!!!
الاخ العزيز ابو حراز نحنا مش شعب غير طموح ، لكن شعب ، الدنيا دي ماشين فيها بالمقلوب الشعب السوداني عمره كلو يضيعوا نص في الكلام والنص التاني احلام بناء البيت ولما يبني البيت .. يقوم يموت .. ويكون لااستمتع بدنيته ولا دنية جيرانهم ويتنتهي العزاء بانتهاء الدفن
04-22-2006, 05:10 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
مايا ضحكتيني كثيراً قلت ينتهي العزاء بانتهاء مراسم الدفن والله دققتي على موضع الجرح يوم امس كنت اتحدث مع احد الأصدقاء في أننا نضيع نصف عمرنا بالكلام والكلام الفارغ والله تلقى في مشكلة حصلت في { أم ضريوة } تلقي ناس { كاب الجداد } يقوموا يحللوا المشكلة بعدين تلقي في انقلاب في بوركينا فاسو يسمعوا بيهو السودانيين قبل القصر الجمهوري في بوركينا فاسو يعني فعلاً نحن في التنظير مافي حد بيلحقنا والله سألني فلبيني عن عاصمة السودان تصدقي طبعاً بعد ما قديته قد بجزر بيساو والمتمردين وجبهة مورو وازدحام مانيلا وكروزان أكينو واميليدا ماركوس وأحذيتها الكثيرة وفردناند ماركوس وموته في جزر هاواي عليك الله هسي اميليدا حاتبني لي البيت في السودان قال جلوريا أرو قال !!!!
Quote: واميليدا ماركوس وأحذيتها الكثيرة وفردناند ماركوس وموته في جزر هاواي عليك الله هسي اميليدا حاتبني لي البيت في السودان
ابو حراز
عارف نحنا في السودان خلونا نعد المليون شهيد باسمائهم ، تقول لي احذية اميليدا ماركوس ديل عددهم حبة خالص ده غير دول حوض النيل.. بالله تقول حيدونا جايزة في معرفة تعرجات نهر النيل بالمسطرة والمنقلة اها لقينا شنو ؟؟ لا جنة لا نار واخيرا الشعب السوداني ابدع في الغنا للطيور لغاية ما جابت ليها انفلونزا طيور بالكمية
وتاني الناس تغني لازم لازم نبني البيت..!!! عليك الله دي حالة دي
04-23-2006, 00:34 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
مايا أكاد اجزم بان 90% من المغتربين لايملكون بيتاً في السودان ويوجد الآن الكثير من العوائل بلا مصادر دخل وبعضهم كبرت بناته وكبر أولاده ولايملكون اي شيء وكثيرون منهم لايستطيعون حتى العودة للسودان كمان جات ظاهرة جديدة يكون في عمك هنا ليهو 35 سنة مغترب وقاعد مع عياله الراجل يقوم { يتلحس } عليك أمان الله المدام بس تكمل الأربعة شهور على مضض وتقعد في بيتها وماتسافر السودان والعجب كان لقت ليها راجل تتقلب عروس طوالي الاحظ معنا الكثير من الجنسيات الأخرى يختلفون عنا كثيراً فهم يأتون بخطط وأهداف ويحققونها سريعاً كما أن مدة غربتهم لاتطول فنحن حليب طويل الأجل المشكلة برضو الناس حاتضحك عليك وهم نفس الناس الساعدتهم ووقفت معاهم في السودان يقولوا ليك زمنك دا كلو كنت قاعد تسوي في شنو ؟؟ نسوا دي حملت ودي ولدت ودي عاوزة ريحة الولادة ودا عاوز شيك عمرة وكمان النسيبة عاوزة الحج وتلقاها صلاة مابتصلي
04-22-2006, 05:25 AM
أحمد الشايقي
أحمد الشايقي
تاريخ التسجيل: 08-08-2004
مجموع المشاركات: 14611
Quote: لدينا قريبنا طويل وعوير لكن كل هذا الطول الفارع لم يشفع له من ضرب زوجته له ولديه حركة ظريفة جداً فعندما ياخد { علقة } من المدام فإنه لايذهب ليكلم امه أو أخواته بل يقفل الباب عليه ويبكي لمدة ساعة على الأقل ثم يخرج كيوم ولدته أمه وكأن شيئاً لم يحدث !!!
أضحكتني فعــلا.
Quote: فكلما أنظر اليه اصاب بالاحباط من اكمال نصف الدين
واقول يكفينا هذا النص وليكن ما يكون ]
أخـيرا اكتشفت انه النـص اللي عـندك , هــو النصــف
(الحـلـــو).
تحياتي,
04-22-2006, 06:00 AM
SAdo7
SAdo7
تاريخ التسجيل: 01-06-2003
مجموع المشاركات: 844
والله لكن أمانة ماوصية وقعت ليها في جرح ارجو أن لاتزعل مني الأمهات لكن هناك صراحة آلاف الأمهات اللائي يخربن بيوت بناتهن في حين أن هناك أمهات يقفن مع النسيب حتى لو كان على خطأ ترجو مصلحة ابنتها واستقرارها بأي طريقة مشكلتنا تكمن في السكن المشترك سواء مع أهل الزوج أو الزوجة فتجد أحد الزوجين وقد تم نفخه بالكلام الفارغ فتحدث مشاكل لاتحمد عقباها كمان في سودانيات عندهن فشخرة ماعادية وماقاعدات في واطاة الله الواسعة دي يعني بس شغلهن قوالات وأحلام يقظة يعني لايعقل هنا القروش كلها منتهية { عدة وملايات } بس الواحدة ماتشوف ليها ملاية شكلها غريب عند واحدة تانية تجيك ماسكاها كارووووووووشة كان ما اشترت الملايات ماترتاح نهائي قال كباية شاي قال !!! والله انا مبسوط من زولك دا وكان عاوز يزيد حلاوة وطعم الحكاية شوية كان مفروض النسيبة أم لساناً طويل دي تاخد ليها { رفسة } برضو
مش مشكلة تجيب شاحنة وما تشتغل المشكلة ماتكون عندك يعني الواحد لو عنده شاحنة وماشغالة على الأقل بيقبض بيها الجو تعرف جانا واحد قال عنده عربات وشاحنات شغالة كوستي بورتسودان وخلى الحلة كلها ريالتها سايلة بي حكاويه وقاموا زوجوه أجمل واحدة في حلتنا والنسوان حسندنها شديد صحيح جاب حاجات كتيرة في العرس لكا أخونا طلع ببيع { كمونية } قال طه الروبي قال
04-23-2006, 02:20 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
أحمد الشايقي فعلاً لو الواحد اكتفى بنصفه الخاص كان ارتاح باله في الخطوبة تعمل ليك فيها مسكينة جداً وتشوفها تقول الغنماية تاكل عشاها أول ماتعرسها تاكل عشاك وتاكل عشاها وتاكل الغنماية كمان اغلب السودانيات عندهن { حردة } بطالة جداً يعني لو مدت بوزها واتكرفست والله مش كان رفستها تاني لحد الشمس ماتشرق لاتشوف منها أخضر ولا أحمر !!!
04-22-2006, 05:44 AM
almulaomar
almulaomar
تاريخ التسجيل: 07-08-2002
مجموع المشاركات: 6485
أخي أب حراز يا جميل تقول الحكمة "وما تحكها شديدة لأنني أنا الحكمت بيها" عريس يضرب كل يوم أحسن من عزابي مرتب الهدوم بعدين يا أب حراز يا أخوي شنو البضمن ليك إنت أساساً النص العندك ده هو الـ base شنو ما ممكن يكون النص الفوق أها حا تمشي كيف بنص فوق وإنت النص التحت ما عندك وإنت ما سمعت بي ضرب الحبيب أحي من الزبيب. المهم دع الطويل يتلقي الضربات والصفعات ويبكي منفرداً ودي أفتكر تجربة لا يجب أن تكون سبباً مانعاً أو عائقاً من زواجكم المتأخر والمتأزم جداً والقطار المر فيهو مر حبيبي ، وكما تعلم أخي ب حراز فإن الرجل يمر بمرحلتين إثنين لا ثالث لهما المرحلة الأولى هي التي تجري وراهو الحسان والمرحلة الثانية هي التي تجري منو حتى الغنم فأعمل حسابك. عن البنغالي البقي مليونير بتاع يازول يازول فأفتكر إنو ده بيعمل بي مبدأ الغاية تبرر الوسيلة أى كانت تلك الوسائل الموصلة إلى الثراء وهذا ما يعمل به البعض في بلادنا ممن أثروا ثراء فاحش. ما الباكستاني بتاعك الدفع الميه للمشاطه يا عديله لي فهذا الرجل يبدو أنه يؤمن بأن تسعة أعشار الرزق في التجارة وبهذا أصبح أفضل من الموظف والمزارع والمهني وبقية وظائف كسب العيش فإيه رأيك تجرب التجارة وتطلع بي تسعة أعشار ولو عندك ناس في الجمارك والمصالح الحكومية ومتنفذين في مواقع إتخاذ القرار فيمكن أن تطلع بي عشرة أعشار الرزق وناس نحن نأكل هوا ما مشكلة. غلب المغتربين السودانيين هم كوبي وبعدين بيست فلان إغترب عشان علان إغترب وجاب بوكس ، فلانه عايزه راجله يغترب عشان راجل هنايه جاب ليها دهب ، غير كده الحكومة ما مساعدة والأهل ما مساعدين والوضع في دول الإغتراب ما مساعد على تحقيق هدف معين وجيب ورقة وقلم وأحسبها دخلك كم في الشهر 15 ألف ريال ، بترسل لي أهلك كم بصفة مستمرة بتصرف كم في مهجرك أبوك أداك قدرها أرمي نصها البحر الباقي ليك كم ؟ يعني شربكه شديدة.
04-23-2006, 02:33 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
صديقي الملا عمر علي بالطلاق العرس طاعم في الأسبوع الأول وتاني الرماد كال حماد ونحن ياكافي البلاء الأسبوع الأول نفسه اتحنضل علينا فقد حدثت شكلة كبيرة جداً بين عروس وعريسها داخل الفندق وبعديها امتدت المشكلة للخارج والله نحن لمينا أغراضنا وغادرنا الفندق وتمينا عسلنا في القضارف البشوفنا يقول الناس ديل ماشين يزرعوا ليهم عيش والله العروس لو شفت جضومها تقول دي نهائي ماتشاكل ليها زول طبعاً للأسف انا الذي تسببت في هذه المشكلة فقد قلت للعريس يازول عروسك دي جبتها من { التشليح } وللا شنو ؟؟ والعريس تاريهو { اضينة } قوم شيل الكلام بي ضبانته وقولوا ليها !!!
04-22-2006, 08:47 AM
قرشـــو
قرشـــو
تاريخ التسجيل: 02-05-2002
مجموع المشاركات: 11385
مالك علينا مقلب علينا المواجع ياخى نحن حكاية البيت واللازم منو دى خلاص وارتضينا من الغربة بالاياب بالسلامة ولم نسلم برضو واستعضنا عنها بالامانى والقول الخاسر "البيت بيت الجنه" مع خوفى ان لا نحصل هنالك ولا بيت ولا ظل شجرة كمان ونكون مرقنا منها دنيا واخرة ....
اما حكاية الضرب فالضرب خشم بيوت يا سيدى والكل مضروب فى الاخر
وزوجاتنا وبناتنا حقوا يحمدو الله بدل ضرب ازواجهن ففى قبيلة جوبيس الأفريقية تُجبر العروس على ثقب لسانها ليلة الزفاف حتى لا تكون ثرثارة ويمل منها زوجها .. بعد ثقب اللسان يتم وضع خاتم الخطبة فيه يتدلى منه خيطاً طويلاً يمسك الزوج بطرفه فإذا ما ثرثرت الزوجة وأزعجت زوجها يكفيه بشّدة واحدة من هذا الخيط أن يضع حداً لثرثرتها وكثرة كلامها .
04-23-2006, 01:34 AM
صلاح الدين عبدالله محمد
صلاح الدين عبدالله محمد
تاريخ التسجيل: 01-02-2005
مجموع المشاركات: 1403
بس أنا ما عارف المخ بشتغل كويس كيف بالجاز ولا الجازولين
مرة واحد شافني مطرم زيك كدة في ساعة تطريم قياسية وعامل فيها ولا أبو العشرة الرفعو القادوس
وفي سرو عارف اني ما بسوي قرش ( ملالين)
شنو فايدة التعليم لو كان الواحد ما قادر يستفيد مادياً من تعليمو
والقاعدة الأساسية عن جماعتنا ( الجماعة الحفرو البحر وقددو التعريفة)
القلم ما بزيل بلم
والبلم هذه هي الصفة التي يكتسبها المتزوجين بحكم الصفة الجديدة بعد التعاقد
وتأكدها الزوجة (( الضاربة على الوجع))
أما صفة العذابة هي التطنيش يعني مطنشين لها حسب حقوق الملكية الفكرية لأبو المطنش الطناشي حين سأله أبوه بعد ما جاء لبكاء أمه ياولدي الحكاية دي اشنفرها مالك قاطع كده لا بترسل خبر لا بتجيب خبر ولا منك خبر ( خبر تتنقل بين المعاني المعروفة)
فرد له عليه الإبن:
يابوي والله مطنش لها
استغرق الأب حيناً من الفهم
أكان كدي معليش
حتى أمك كانت مطنشة لها
حتى قرباب تلبسو في طيشة ما عندها""
أها ياأخونا في كلمة ( مطنش ) لها
في امكانك تغير حرف النون إلى (ي) وحرف الشين إلة (ز) تعرف النكتة الحقيقية
04-23-2006, 02:20 AM
manubia
manubia
تاريخ التسجيل: 04-21-2002
مجموع المشاركات: 1284
manubia انت تعرف البنغالي قال شنو سوداني كلو مافي فهم !!! وهذا ما أغاظني لهذا لم أتردد في ذلك بعدين هنا الكف في السعودية بالمناسبة غالي جداً يعني مرات 5000 ريال ماتحلك لكن المشكلة برضو هذا البنغالي تجده ناجح سواء في عمله أو على صعيد بيته وتجهيزه
04-24-2006, 03:24 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
المسافر الله يجازيك الظاهر طاقاك { فلسة } شيييييييييييييييينة لكن شايف ناس الامارات ديل نايرين وسمااااااااااااااااان يبدو لي ماعندهم مشاكل كتيرة زي جماعتنا هنا
عندنا واحد في ابوظبي قبل فترة ارسل لولده عشان يساعده الولد جاء اشتغل في محطة بنزين جاء زبون عاوز بنزين وفي الآخر مادفع الفلوس صاحبنا دا أول شيء عمله حرق السيارة !!! بالله صقع وللا ما صقع !!! قال خدمة العملاء قال !!!
اما حكاية { البلم } الزوجي فهي على وزن السكوت الجماعي يعني في رجال في الغربة بس الواحد يشيل عليهم الفاتحة ويترحم عليهم بالليل والنهار هل يعقل أن تأتي إمرأة لزوجها في بيت العزابة { كوتشينة } طبعاً وتمسكه من رقبته وتدخله في السيارة ؟؟؟ والراجل كان قافل منتظر { الخمسين } !!! ياحليل جدودنا 00 ماتوا وفكونا في الهواء ياحليل زمن العكاز المضبب حيث لا كلمة الا للرجل والعكاز الحكاية الآن جابت ليها عولمة ومساواة ومكاواة ودا كلو هين كمان شيخنا الترابي قال تجوز صلاة المراة باقي لينا تاني ست النفر طوالي تقول ليك عاوزة اصلي بيك الصبح والحمد لله من حبوب منع الحمل بتاعت الراجل مازالت واقفة في هولندا لكن عليك أمان الله كان وصلتنا نص الليل يقوموا ينهروك ياراجل هووووووووووووي قوم ابلع حبتك دي !!!!
04-24-2006, 00:43 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
الأخ صلاح وأكرر معك نفس السؤال هل نحن شعب غير طموح ؟؟؟ الآن بيوت العزابة مليئة بالعاطلين عن العمل السوداني مرات يجد شغل مثلا هنا بالسعودية براتب 1500 ريال يقول ليك لا ما بشتغل الا يتم الراتب الفين وبعديها يقعد 9 شهور منتظر يتمو ليهو الألفين يعني تاني لو اشتغل ب 3000 ريال ماحايقدر يعوض هذه الفترة كذلك كثيرون منهم حمقاء ولايعرفون كيفية التعامل مع عملاء المحل يتعاملون بفوقية ومن ثم كثيراً مايفقد المحل بعض زبائنه لكنهم شاطرين في الأمانةوالعرض والوفاء والشهامة وهذا هو السر الوحيد في تمسك الخليجين بنا
04-23-2006, 05:53 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
اخي قرشو : أحياناً نصل لمرحلة اليأس ولكن فجأة تتغير الأحوال 00 وتلك الأيام نداولها بين الناس } طبعاً معانا واحد يعني وصل لدرجة قف وفجأة اتفتحت له الأبواب على مصراعيها دا كلو عشان اتزوج واحدة تانية مش يعني المراة الأولى كثيرة النقة لكن لعبت الصدفة دورها فقد اصرت ان تسافر السودان ولم يكن يملك مبلغ تسفيرها المهم من هنا وهنا سافرت المدام وصاحبك شعر بالهواء يدخل اليه من جميع الاتجاهات لقى واحدة معلمة عندها مشكلة بسيطة وهي أن المحرم معاها قرفان من السعودية المهم اتوكل على الله واتزوجها هسي اشترى بيت للمدام القديمة واتوهطت فيه تب ولا قالت ليهو بتقول في شنو واشترى بيت للمدام الجديدة وراكب سيارة جيب لاندكروزر وكان راكب 79 مافيها قزاز لاوراء لاقدام والله صاحبك ابوحراز صراحة الفقر مابيقدر عليه فكرت في حاجة زي دي اها باقي لينا معلمة واحدة قلنا نجرب حظنا فيها عزمني ابوها وقلنا بالمرة نصطاد عصفورتين بي حجر لكن العشاء نفسه طار لي في راسي ياخي دي الا تعمل ليك سرير من { الكمر } قعدت في الكرسي 00 الكرسي كلو قعد يطقطق !!! قال لاندكروزر قال !!! يعني دي لو يوم شاكلتها وقعدت فيك والله ناس المطافي مايحلوك منها اخير لينا ست النفر بدون بيت 00 هنية ورضية
04-23-2006, 02:27 AM
ودقاسم
ودقاسم
تاريخ التسجيل: 07-07-2003
مجموع المشاركات: 11146
ابوحراز كيفك يا قريب نحن نجيد إضاعة الزمن ، نحن هنا نهدر أعمارنا ، ونقبل بعضنا على بعض نتلاوم ... الغالبية العظمى من السودانيين لا يعرفون لم هم هنا في هذه المهاجر ، هم فقط يمضون وقتا ، ولا يهتمون بقيمة هذا الوقت ,,, كلنا من هذه الشاكلة ، وكلنا سنعود صفر اليدين ، هذا إن تمكنّا من العودة أصلا ...
04-24-2006, 05:28 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
ود قاسم تعرف لدينا قريبنا غربة أكثر من 25 سنة عنده حواشة في مشروع الجزيرة شغال معاه واحد بالنص من تشاد عديل كده صاحبنا طلع من 76 واتزوج سنة 77 والراجل المشاركه في الحواشة اتزوج في 77 قريبنا عنده ولدين يعني مايجي السودان كان الا بعد عشرة سنوات وأخونا دا عنده 17 من ولد الى بت تصدق ال 25 سنة طلع منها بشنو ؟؟ { سن دهب } !!! كلما تقول ليهو عملت في الغربة شنو يقوم يضحك وهسي قال عاوز يبيعها !!!
04-23-2006, 02:39 AM
أحمد الشايقي
أحمد الشايقي
تاريخ التسجيل: 08-08-2004
مجموع المشاركات: 14611
عاجل لأحمد الشايقي سمعت بحكاية المراة التي اصرت على زوجها أن { يدق } ليها ذهب قالوا دقاها { ودقّ } سيد الدهب
لكن مرات بتعكلن على الواحد يعني لو ما اشتريت ليها دهب بتقطع منك الموية والنوووووووور عندنا واحدة شغالة كويس والراجل عليك أمان الله قاعد بس يلعب في { الشفع } طبعاً { محرم } مع زوجته أها مرة حصلت ليهم ظروف { اتسجن زوجها في مشكلة } وقلنا ليها لازم تبيعي الذهب دا عشان راجلك يطلع من السجن قسمت بالله انها ماتبيع ولا خاتم قلنا ليها ليييييييه ؟؟ قالت أنا الدهب دا جبتو بي ضراعي دا علي بالطلاق رفعت يدها فووووووووق دي بتتقدر هسي ؟؟
04-23-2006, 06:48 AM
انعام عبد الحفيظ
انعام عبد الحفيظ
تاريخ التسجيل: 12-07-2005
مجموع المشاركات: 8738
عندي قصه شبيهه بقصة الباكستاني وبقصة صاحب المحل غسال العربات
كنت في مدينة دخان بدولة قطر في زيارة لأختي المقيمة هناك مع زوجها واولادها وفي احد الايام جاءت لزيارتها واحده من السودانيات المقيمات بالمدينة وفي يدها مجموعة من الصور لفيلا من ثلاثة طوابق وجميلة جدا وعندما سألناها عن البيت الجميل ده وين قالت انها تفاجأت بالهندي الذي يحضر اليهم لنظافة البيت مرتين في الاسبوع وهو نفس الشخص الذي يأتي لمنزل اختي للقيام باعمال النظافة تفاجأت به يقول لها ان المنزل يملكه هو وقد بناه من عمله كعامل في شركة البترول ومن عمله في المنازل بعد انتهاء دوامه الرسمي
فما كان مني الا واندهشت لهذا التفكير والتدبير لهذاالهندي واشفقت على حال السودانيين في الاغتراب والمنفى فهم يمارسون حياتهم كما تقول بعيدين عن هدف الاغتراب الاساسي وينشغلون بمظاهر الحياة وببعض العادات المرهقة والمكلفة كشراء الهدايا في الاجازات وكمان موضوع الدهب والملايات ده موضوع تاني خالص جد موجع ومؤلم ان يكون كل الهم هو تغيير الدهب واختيار الصيحات الجديدة في الملايات
كان الله في عونكم
مودتي واحترامي
04-23-2006, 09:31 AM
othman mohmmadien
othman mohmmadien
تاريخ التسجيل: 12-13-2002
مجموع المشاركات: 4732
أبو حراز والعقد المتداخل وكيف مع جماعتنا البطاردوا أو البسكوا البنت (الدامة) من العصر وحتى بعد منتصف الليل ثم يتناولوا العشاء وهم متعبين ويصحون متخمون مطاردتهم للدامة ما بقيم عليهم الحد في السعودية لو الدولة عرفت وعلمت انهم يسكون دامة الأسود حتى يورطوا بيها واحد والنهاية إزدياد الفقر وآلام بالكلى من كثرة الجلسة ومعاه كمان إنفعال وإرتفاع ضغط وبلاوي أخرى هل لعب الهارت وملاحقة دامة الأسود لفترات طوال يشكل صورة بدليلة للأنوثة التي تعتبر ككائن يجلب النحس ويحاول الكثير الفرار منها وفي الشمالية زمان الجماعة بيحملوا معاهم حجر لو معاهم دامة واحدة في سيارة أو غيرها حتى يصلوا بالسلامة ، أو لم يتفق للثقافة السودانية الكوتشينية صورة للمرأة المصون غير الصورة التي يرتبط بها اللعب وتلكم الدامة مصدر النحس. لماذا لم يختاروا الشايب؟ أم الأمر إنتقاما من البنات حينما تغنين بـ الشايب ده الله بيني وبينه ...... تسل ود عينه
04-24-2006, 05:32 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
انعام والله صدقاً لكلامك فالبنغالي الذي معي الآن عندما رأيت بيته أصبت بالذهول أول شيء يعمل مراسل بمكتبي ويقوم بالتنظيف وخلافه البيت مكون من طابقين فيلا رائعة جداً ومحاطة بالزهور والأشجار له معنا في العمل 9 سنوات راتبه 750 ريال فقط وياليت لو وقفت الحكاية على البيت فلديه اتوبيس { بص } يعمل داخل { دكا } يعني تمنيت لو كنت المراسل وهو مدير المكتب أما عندما أخرج لي صورة المدام والله عندما رأيت جمالها لم أعرف من اين أخرج باب المكتب محل طار ماعرفته جمال وروعة وشعر يتمرد حتى الخصر وعيون لم أر مثلها في حياتي نحن الواحدة تلقى في راسها { ثلاثة شعرات } ومكرهاك عيشتك !!!
04-23-2006, 09:49 AM
بلدى يا حبوب
بلدى يا حبوب
تاريخ التسجيل: 05-29-2003
مجموع المشاركات: 9833
ابو حراز انا يا زول مشبهك بديك شفرة لو عرفتها ياكه زولى البعرفه ارجع الى بداية الثمانيات وبالتحديد سنة82 المكان مدينة الصحفيين العمارة 20 شارع الرشيد الشقة رقم 2 وكما ارضية وحتى البواب الكان ماسك العمارة اسمه عبد الظاهر اه يا زول رايك شنو فىالكلام ده تحياتى
04-24-2006, 01:48 PM
ابوحراز
ابوحراز
تاريخ التسجيل: 06-27-2002
مجموع المشاركات: 5515
بلدي ياحبوب حرام عليك قال مدينة الصحفيين قال 82 دي انا عمري 12 سنة والريالة سايلة يمين وشمال والجلابية بدون زراير احتمال قاصد 92 لأني زرت القاهرة وزرت بغداد بعدين نحن ناس شيوخ وأولياء يعني عادي ممكن تلقانا في أي مكان ناسنا من الجماعة البطيرو بالجو !!! لك تحيتي
04-24-2006, 01:36 AM
Fadl Karrar
Fadl Karrar
تاريخ التسجيل: 12-04-2004
مجموع المشاركات: 1904
العزيز أبو حراز السلام عليكم طال علينا فراقكم والله يا حلوين قدر ما ننسي العلينا برضو مشتاقين نعود والعود أحمد ياخي قول الحمد لله وما يهمك الدنيا أصلو كتيرها رايح وقليلها رايح وبعدين لو إتكشف ليك عن ما يعانيها أصحاب القروش من بلاوي وأمراض وغيرو لحمدت الله ألف مرة ورجيتو أن يخليك علي حالك قالوا لو أي زول ختا مصيبتو فى كوم كبير والناس كلهم ختو مصايبهم فى نفس الكوم وبعدين قالوا لي أي زول يختار ليهو مصيبة من الكوم دا صدقني أي زول ح يختار مصيبتو القبيل كانت معذباهو ابو حراز أرضي بالعندك وخليك كدا الزول سمح الأخلاق الضاحك الضحوك لا فض فوك ولك معزتي فضل كرار
04-24-2006, 02:55 AM
على محمد على بشير
على محمد على بشير
تاريخ التسجيل: 08-07-2005
مجموع المشاركات: 8648
Quote: وكمان النسيبة عاوزة الحج وتلقاها صلاة مابتصلي
Quote: كمان اغلب السودانيات عندهن { حردة } بطالة جداً يعني لو مدت بوزها واتكرفست والله مش كان رفستها تاني لحد الشمس ماتشرق لاتشوف منها أخضر ولا أحمر !!!
Quote: طبعاً للأسف انا الذي تسببت في هذه المشكلة فقد قلت للعريس يازول عروسك دي جبتها من { التشليح } وللا شنو ؟؟ والعريس تاريهو { اضينة } قوم شيل الكلام بي ضبانته وقولوا ليها !!!
Quote: يعني دي لو يوم شاكلتها وقعدت فيك والله ناس المطافي مايحلوك منها اخير لينا ست النفر بدون بيت 00 هنية ورضية
04-24-2006, 02:33 PM
nazar hussien
nazar hussien
تاريخ التسجيل: 09-04-2002
مجموع المشاركات: 10410
نزار حسين المشكلة في ناس الله بيديها بالكوووم لكن ما بحمدوه ولا بشكروه قريبنا خليه معانا واحد كان بيعمل في الهلال الأحمر عمك مدة صلاحيته انتهت عشان كده ماجددوا ليه العقد والراجل عنده مرتو في السودان الظاهر حاجة صعبة جداً كلما تتصل عليه يابلع حبوب الضغط يا حبوب السكري المهم نحن كان مكرهنا البيت لأنها يوم تتصل بقدنا بالكلام واي شيء بتحنضل علينا صرف حقوقه { 000 50 } ريال نصحناه وقلنا ليه خلاص تمشي تستقر في بلدك وتعمل ليك سبحة كبيرة وتحرس الجامع طبعاً من ناحية حياة زوجية وكده عليه العوض ومنه العوض عشان كده أحسن ليه الصلاة على النبي المهم اتعكلت وقال ماحايسافر قام فتح بوفيه خسر معاه وفتح مطعم خسر معاه كالعادة القريشات راحن في خبر كان تصدق هسي شغال شنو بوزع { الرغيف } بالعجلة جات يوم سيارة مسرعة لا لقينا عمنا ولا لقينا العجلة رقد 3 شهور في المستشفى والآن يادووووووووب سافر 00 شوف النهاية كيف ؟؟
04-25-2006, 00:49 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
أخي علي محمد بشير شكراً أخي على هذه اللقطات الجميلة تصدق انا استغربت كتبت الكلام دا كيف ؟؟ يعني يمكن ماذكرته يكون خلاصة للبوست لكن مالك { حمّلت } كتير على النسوان ؟؟ لايكون عندك مشكلة مع النسيبة القالوا عين شمس اعمل حسابك يازول اي شيء ولا النسيبة دي !!!
04-25-2006, 00:45 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
فضل كرار كلماتك دائماً تحمل لي الحصاحيصا بكل نهرها اتذكر هذه المدينة الرائعة العن الغربة وابو الغربة عصرية واحدة بجوار البنطون تكفي عن عشرة سنوات غربة الفول التسالي الجوافة الكوارع نادي النيل وأزهري دياب الأعمى الذي يهمزني في الكوتشينة دائماً ملجة الخضار والسوق الشعبي الغريب نقله أحد المحافظين بلا تخطيط ودون عمل اي دراسة له نقله الى مكان قصي بعيد فأصبحت الحصاحيصا تحتاج لنقل كلية وتحتاج لأن يزرع فيها قلب !!! أحياناً ياتيك محافظ لايعرف الا نظريات الحكم المحلي المهترئة وهي نظريات قديمة لاتتلاءم مع التطوير فيقلب المنتزهات التي تتنفس منها المدينة ويحيلها الى مواقف للسيارات وأحيانا تجد رئيس المحلية عسكري لايفهم الا في التخطيط للإنقلابات العسكرية وياليت لو كان عسكرياً قد درس الهندسة المدنية حتى يمكنه أن يساعد في تهذيب وتخطيط المدن الآن السوق الشعبي بالحصاحيصا اصبح كبقايا الحرب العالمية الثانية وينظرون في نقله الى داخل الحصاحيصا وطلبوا من جميع الناس أن يأخذوا طوبهم وأبوابهم وعدسهم وفوهم وبصله !!! كان لدينا كشك لكن أول ما اصدر ذلك المحافظ المعتوه قراره بعناه فورا قبل نقله وكنا اكثر الناس حظاً لكن الذي فاز علينا بالحظ هي ست الكسرة التي بعنا لها الكشك فاليوم هي من أغنى السيدات !!
حنين للبلد قال متحامل على النسوان قال أجمل كتاباتي كانت ومازالت عن المراة لدرجة مرات يقولوا لينا ماتغازلوا ولدي كتاب مانجض حتى الآن اسمو : قارورة عطر اليها ياجماعة الناس كلها متعاطفة مع النسوان حتى في الطب توجد اخصائي نساء ومافي أخصائي رجال ماعارف الحاصل شنو ويقولوا ليك مساواة ولا واحدة يوم ماجات طالبت قالت مفروض يكون في اخصائي رجال
ويسألونك عن ست النفر والله نصيحة اقولها ليك النسوان لو الواحد ما أداهن العين الحمراء والله من أول يوم تخليك طرطور وجلابية لافة لازم تخوفها لكن زولتي مسكينة جداً وخوافة لدرجة ماعادية يعني بتخاف من { الدودة } والحكاية دي مريحاني خالص زارعين لينا ملوخية تحت الزير مش عشان ناكلها عشان فيها { دودة خضراء مكروهة جداً } اها كلما تفتح سن النفر خشمها طوالي بتناول واحدة والله تتكرفس تاني لحد الصباح ماتتحرك قال حاكماك قال !!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة