|
|
 يا ربى شن سويت ...
|
هجرة وغربة من زمناً بعيد وبعيد ....
لا صبحت ناس يمه .. ولا ناغمت ليك وليد ..
لا كملت يوم نومك بلا تتوقيت ولا تحديد ......
لا حضرت احزانهم ولا باركت ليك جديد....
لا شفت ضل الضحى ولا ساعة الهجيرغفيت. ..
فى شورتهم ما لقوك ولا لى ناقصتم تميت ...
لا رسلوك مرسال .ولا قضيت ليك غريض ....
لا صايحت لى جارك ولا صبحت ليك مريض ...
كم من فرح فاتك لا صفقت لا غنيت......
كم من زغرودة فرح لا بشرت لا تبيت ....
كم من مولود ولد . لا هنيت ولا سميت ....
لا حضرت ليك جرتق ولا فى الكشف ختيت ....
احزان كتير مرت بالع عبرتك لا بكيت ولا اتفشيت....
متحمل الغربه ولى الرجوع ما نويت ....
كم من اعياد مضت لا شفت زحمة سوق لا تظيم وترتيب بيت..
.لا حضرت تكبيره ولا مع الخلق صليت ....
لا عيدت لى اهلك و لا حتى العفو عفيت .....
لا فرحت ليك طفلا ولا بالفرح حسيت .....
آهات كتير محبوسه يا ربى شن سويت ..
يا الله الكريم ا رجع زى قبيل ما جيت ....
اعوض الماضى واتحكر فى نص البيت ..
والمستقبل الجاى اغنيه زى دوبيت...
التحية لشاعرتنا الرائعة اسماء الجنيد محمود ناظمة الأبيات أعلاه ، وبقول ليها مشتاقين لكلماتك الرقيقة التى تداعب وجداننا وتصور حالنا دوما ...
رجاء أظهرى وبانى ...
|
|
 
|
|
|
|
قرشـــو
فيس بوك
تويتر
انستقرام
يوتيوب
بنتيريست