كتب الكاتب الفاتح جبرا المتوفرة بمعرض الدوحة
|
|
 يا جماعـة رايـح لي شـيوعي بطعـم الوطـن..صديقـي الفـنـّان عبدالغـني..؟
|
طوييييل
أخدراني
ماهو الفافنوس ماهو الغليد البوص
كثير الضحك و الإبتسام
هو غالبآ خرّيج المعهد العالي للموسيقى و المسرح، لكن احتمال يكون بتاع فنون..
أنا لو كنت عارفو ح يروح مني كنت اتأكدت
الزمن داك كان شعرو كتير (خنفس)..و انا كمان
عندو دقـن لاهو مربيها و لا هو حالقها
أعرف إسمه الأوّل ..لأننا كنا نتبادل لقب (كارنيجي)..فهو عندي عبدالغني (كارنيجي)..و أنا عنده الطيب (كارنيجي)..و السبب أننا تبادلنا كتابين لـ ديلي كارنيجي، الكاتب الأمريكي الشهير، أذكر أنه وجد عندي كتاب
دع القلق و ابدأ الحياة
فاستعاره و أتاني من مكتبته بكتاب
كيف تكسب أصدقاء و تؤثر بالناس
الزمن داك لا كان في تلفونات
لا ايميلات
الناس بتتفارق و تتلاقى بلا هلع فراق
فهل من دليل عليه
في أمريكا؟
أستراليا؟
أوروبا؟
بلاد العربان (احتمال ضعيف)
لا زال بالسودان..احتمال وارد
فيا خريجي الجمال نهايات التمانينات
ما شفتوهو؟
|
|
 
|
|
|
|
|
|
|
|
Re: يا جماعـة رايـح لي شـيوعي بطعـم الوطـن..صديقـي الفـنـّان عبدالغـني..؟ (Re: الطيب بشير)
|
مهما شغلتني عنه المشاغل
تجيء ذكرى أبريل لترفع ذكره بأعلى ذاكرتي
إلتقينا في شارع القصر صباح الأربعاء الرائعة
الثالث من أبريل 1985 ..
كان الشارع فيهو الأطباء و المحامون
الروبات السود و البيض
كان البوليس لما يجدع البومبان
الناس بتقعد في الأرض..يعني ما ماشين أي حتة
أتذكّـر ناس عبدالغني ديل بيشيل البومبان لحظة وقوعو و بيرجعوهو للبوليس سريع و كان ذلك يؤذي البواليص جـدّآ
و أخذني الحماس
وقعت جنبي بومباناية واحدة
شلتها بلا دراية
وقعت مني
كحيت
و اتكومت
جرّوني ممرضات و شالوني فوق...لووول
انتبه للموقف صديقي عبدالغني
و بعد ما أسعفوني و اتنفّـســت
كوركـت فوقو:
انتو في الحزب درّبوكم، ما كان تقول لي المصيبة دي ما ساهلة
قام ضجك و قال لي
و الله يا الطيب لو مـت، كنا نكتب على قبرك
شهيد البمبان..الشالوهو النسـوان
و الله أيام يا زمان
ما شفتوهو؟
| |
|
|
|
|
|
|
|
|
|
Re: يا جماعـة رايـح لي شـيوعي بطعـم الوطـن..صديقـي الفـنـّان عبدالغـني..؟ (Re: Abdalla Hussain)
|
مدد يا مواليد كوستي مدد
كيف حالك أخي الكريم عبدالله حسـين
بالله شفت عبدالغني اليوم؟..و هو طييييييب و شديد؟
و طوييييل و جنّـو ضحـك؟
ياخ كتّـر ألف خيرك
و الله يا جماعة الانترنت دة عجايب الدنيا الكم ما عارف
شوف تسلسل المعلومات دة
بدأت القصة بشوق انساني فقط ..و لا معلومات كاملة عن (المتهم)
بدأ أمين بتوصيف الدولة و المدينة و الإيميل
جاء خالد قال لي اسم ابوهو و لقبو و حسم لي كلية الفنون/المسرح الكانت ملاوزا لي دي
و هسع عبدالله وصلو في محلو و سلّم عليهو
| Quote: فلك عاطر التحايا من الصديق عبد الغني |
أمانة يا بكري ابوبكر ما عملت فايدة كبيرة
نتوورك ختري
عشان كدة لازم يقصدوك..أيوا.. كاشا و شيكا و كريديتا..ما من فراغ
عبدالله حسـين؟ اللخو؟
جبت لي خبرآ سمح بالحيل
سلام طويييييييل لصديقي الطويل
و بالله يا عبدالغني أكتب لي..و انا بكتب ليك
[email protected]
تاني روحان ما فينا..تلفونات و ايميلات و سودانيز أون لاين
شكرآ ليكم يا شباب كتير على هذه الهـمّــة
| |
|
|
|
|
|
|
|
|
|
Re: يا جماعـة رايـح لي شـيوعي بطعـم الوطـن..صديقـي الفـنـّان عبدالغـني..؟ (Re: الطيب بشير)
|
العزيز الطيب
شكرا علي هذا البوست الحميم الذي جعلنا نقتفي أثر الصديق عبدالغني فقد سمعت بوجوده في ألمانيا وقد أرسل لي عمل فني جميل يتوسط دارنا في مولد أبني البكر ولم يتذكر أن يرسل معه عنوانا أوتلفون وقد ألتزم صديقنا المشترك التشكيلي محي الدين الزين بالبحث عنه وعن تلفونه من قبيلة التشكيليين وناس المعهد وقد كان البحث جاريا ألي أن عثرنا علي هذا البوست السعيد ولك الفضل بوضعك قضية البحث عن صديقنا عبدالغني قضية عامة علي صدر المنبر وهاهي قد اتت أكلهافلك منا كل الود والعرفان
| |
|
|
|
|
|
|
|
|
|
Re: يا جماعـة رايـح لي شـيوعي بطعـم الوطـن..صديقـي الفـنـّان عبدالغـني..؟ (Re: الطيب بشير)
|
هل غادرتنا تلك السنين بدفئها بعد أن غيبتنا المتاهة وارهقنا الشتات. إنها في مكان ما تصحو أحياناً .. ولكنها عندما تصحو بهذه الكثافة وبهذا الزخم من الأصدقاء بابتساماتهم المطمئنة بأرواحهم الجزلى التي ليس فيها سوى الحب .. العطاء من غير انتظار، سمو خالص للحب .. وليس كما نحيا في هذا الصقيع الطارئ في منافينا .. الصديق الطيب كيف فتحت باب الحديقة وجاء كل الياسمين وبقية الورود وهبت نسائم عطرة من كل الأنحاء، شكراً لكم يا اصدقاء هرعتم إليّ وصار للبريد طعم آخر ولون آخر ليس فقط حفنة من الاعلانات والفواتير .. كمُُ من الفرح بين كل لحظة وأخرى أعانق وجهاً يطل من خبايا الذاكرة مبتسماً، صديقاً يأتي بكل ذكرياته. ما لي طاقة بهذا الفرح الكبير .. شكراً لكم وللحديث بقية.
عبد الغني
| |
|
|
|
|
|
|
| |
الطيب بشير
Amin Elsayed
خالد العبيد
shahto
فيس بوك
تويتر
انستقرام
يوتيوب
بنتيريست