حاجة محيرة الأسبوع يبدأ يوم السبت رغم إنو المنطق أن يبدأ يوم الأحد والسبت بالعربية زي ما عرفت من أهل العلم يعني البرهة من الدهر وهو الراحة ويقال: سبت يسبت سبتا أي استراح وسكن. وكمان قالوا السبت هو ترجمة لكلمة شبات العبرية، وتعني الراحة والسكون. وكان يسمى في الجاهلية شبار. الآن ونحن نعيش الجاهلية الثانية الواحد يضرب تلفون لي صاحبو ويقول ليهو والله يا مان فلان داك أطول من يوم شبار وقالو الله يكفينا شر القوالة إنو ييوم الأحد يعني الواحد وهو أول العدد الموجب عشان ما ينط لي واحد في حلقي ويقول لي ناقص واحد أس تلاته نق تربيع – وكان يسمى في الجاهلية أول. والمفروض طبعاً كان تكون بداية الأسبوع يوم الأحد. يجيك يا صاحبي يوم الإثنين عشان يؤكد لينا إنو لأسبوع المفروض يبدأ يوم الأحد لأنو الإثنين هو اليوم التاني من الأسبوع وكان يسمى في الجاهلية أهون وفي جاهليتنا يقول ليك يا أخي ده شاريني من يوم الأحد لغاية يوم أهون وما هان عيهو الشره. يوم الثلاثاء بيؤكد حقيقة إنو نحنا بنبدأ الأسبوع من آخرو لأنوالمفروض هو ثالث يوم في الأسبوع والعرب كان بسموهو جبار في الجاهلية وبيني وبينكم يوم تلاتاء في حر الصيف زايد شوية فلسه كده يبقى جبار شديد. شوف بتاعين الجاهلية الأولى لمن ما عرفوا يسموا يوم الأربعاء شنو قاموا غيرو ليك حرف الجيم في جبار بحرف الدال وبقي يوم الأربعاء دبار. ودبار ده مصيبة كبيرة خلاص وهو من الأيام التي نتطير منها نحن معشر السودانيين الواحد يقول ليك يدخل عليك بي أربعاء وعقاب شهر يعني دخله في الأنكل عديل كده تسوي ليك كسر مركب وفي جاهليتنا التانيه ممكن يدخل عليك بي دبار وعقاب شهر. أما يوم الخميس فده اليوم الخامس من الاسبوع. وناس الجاهلية كان بسموهو مؤنس وهنا أيضاً يظهر مدى توافق ناس الجاهلية الأولى معانا نحن ناس الجاهلية التانيه يعني أول ما يكون يوم دبار بالليل نقوم ننكرش ونفتش في حق البهجة وأول ما تجي الساعة 9 من مساء مؤنس تلاقي الناس واقفه لط ومستأنسه وتغني بصوت نشاز الندامي الندامي الندامي الندامي الندامي. أها يوم الجمعه ده قالو من الإجتماع وبرضو قالوا كان ناس الجاهلية بيقولو ليهو عروبه وربما أطلقت الجمعه على الأسبوع بكامله من باب إطلاق الجزء وإرادة الكل. لكين عروبه العزابة أريتها عروبة السواد والرماد
04-01-2006, 10:12 AM
عبد الله عقيد عبد الله عقيد
تاريخ التسجيل: 09-20-2005
مجموع المشاركات: 3728
أخي عبد الله عقيد صاحب الكيبورد الأصلي وسرعة البديهة وجمال الحرف سعدت بزيارتك لينا في ناصية حارتنا وأزدادت سعادتنا بأن وجدناكم متواضعين في غير هوان وتفرجختم معنا في فردة نعال ولزمتم الجابرة فتناثرت الدرر ، أتابع كتاباتك بإستمرار فخلينا نفك العقدة مترقياً إلى فريق وإذا ما تمسكتم بمرتبتك الحالية شأن القذافي فخلينا نضيف إليها أركان حرب. الجماعة قالوا في واحد صحفي عاوز يعمل لقاء مع شيخ مشايخ النقلتيه – الصرماطه – فجاء للراجل وقال ليهو والله يا حاج عاوز أعمل معاك لقاء وداير أعرف طبيعة شغلكم كيف فقال ليهو يا أخوي لقاء شنو ، كدي خليني أنادي ليك الصبي بتاعي ده يوريك طريقة شغلنا. لمن جاء الولد الصحفي سألو وقال ليهو وريني بتشتغلوا كيف ومتين الولد رد عليهو وقال: السبت أخدر – أخضر – ما بنشتغل الأحد بطالة الإنجليز ما بتشتغل الإثنين كتلو بيهو الحسن والحسين ما بنشتغل الثلاثاء عمارة والأربعاء بشارة والخميس أحاسب الأسطى والجمعة بطالة
04-01-2006, 11:21 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
الملا يا عمر : نفسياً كده الناس كلها بقت ترتاح لي يوم الأربعاء ده !!!!! يقولوا ليك لأنو بعدو الخميس والسودانيين يوم الخميس عندهم زي ما قلت يوم البهجة والنبق النبق والقرد القرد .. يوم الجمعة مرتبط عندنا بي الإيمانيات بالصباح والغدا المدنكل بعد الصلاة ومن تمغرب تبدا تفكر في غيار بكرة وهاك يا مكواة وغسيل ونوم بدري.. السبت ده يوم الجلد العالمي اول حاجة تفكر فيها الكركاسة وفي رواية الردافة وتمشي جاااااااااهز للمدرس تقول ليهو ياخ اديني علقتي دي من اسة .. الاحد كان يوم جميل لأنو كنا بنقرا جمب الكنيسة ومدرسة التوفيقية وهاك يا الجكس النضيف الإثنين من اكثر ايام الإسبوع محبة لقلبي وفيه ولد ومات الحبيب المصطفى صلى الله عليه وسلم وهو اهدأ ايام الأسبوع يعني يوم رايق .. الثلاثاء بيزكرني بي السهرات السمحة في التلفزيون ..
تخريمة : ليي ماف يوم إسمو الأتمناء ؟؟؟؟ بحيث إنو يكون اليوم التامن !!!! تحياتي يا لذيذ يا رايق..
04-01-2006, 12:11 PM
ابو جهينة ابو جهينة
تاريخ التسجيل: 05-20-2003
مجموع المشاركات: 22499
أخي الجميل جلال بن داؤود شكراً على مرورك الكريم يا رجل ، حكاية اربعا وعقاب شهر دي كثيراً ما أرددها وهي تعطيني الإحساس بأنصاف المصائب ومنتهي الفلس والحيرة ، ولا أملك سنداً أو دليلاً بيناً يعضد ما ذهبت إليه ، وإن كنت شايف بطرف عيني إنو ربما يكون مرد ذلك إلى أن يوم الأربعاء هو آخر يوم للإنتظام في الشغل ومن يوم الخميس الناس تبدأ تزوغ عشان تلحق البصات المغادرة للعاصمة المنبعجة أها يوم الأربعاء يكثر فيه الذي يبحثون عن دين وسلف إلى حين ميسرة ومن ثم يكون الطلب أكثر في نهاية الأسبوع الأمر الذي يعني أن الخميس بما فيه من قعدات وفرفشة وركلسة يبقى ثقيلاً لوقوعه بين الأربعاء والجمعه الجامعه.
04-02-2006, 02:17 AM
almulaomar almulaomar
تاريخ التسجيل: 07-08-2002
مجموع المشاركات: 6485
أخي عمر الفاروق يا أخي حرام عليك نحن أسبوعنا أب سبعه يوم ده وفي تلتله عاوز تعملهم لينا ثمانية أيام حسوما ، لكن فكرة والله تصور بس لو الأسبوع بقي خمسة أيام كان يا مان الخميس يجيك فللي يعني يا دوب تكون بتعيد في شريط الويك إند يقوم تاني يجيك الويك إند أها في الحته دي بالذات كان جهجهنا ليك يوم السبت جهجهة شديدة لمن ما يعرف نفسو هل هو يوم سبت ولا يوم إثنين.
04-02-2006, 02:27 AM
قرشـــو قرشـــو
تاريخ التسجيل: 02-05-2002
مجموع المشاركات: 11385
رغم طرافة الموضوع ولكنه لم يجافى الحقيقة ولعلك تدرك اننا نتعامل فى العمل مع وحدات كثيرة خارج المملكة فتجد ان يوم السبت عطلة مثلا فى البحرين ولبنان ومصر وانجلترا وكل دول اوروبا وأتيت بالعربية لكى تثبت ان العرب ايضا لا يعملون يوم السبت فمن اين لهؤلاء بالعمل يوم السبت وهو اخدر ؟؟؟؟
رغم ان السبت خاص باليهود وحكايتهم مع السمك شهيرة ولا تحتاج الى تكرار ولكن المنطق هو ما اورته وسمك اليهود لن يجافى المنطق ..
ممكن تديهم الاقتراح ده بالله ؟؟؟
04-02-2006, 06:45 AM
almulaomar almulaomar
تاريخ التسجيل: 07-08-2002
مجموع المشاركات: 6485
الخواجات عندهم تسمية لأيام الأسبوع لكين قالوا والله يكفينا شر القوالة ما شالوا الأسماء دي من اللغة الرومانية زي ما عملوا في الشهور وتحت تحت سمعنا قالو شالوها من الأنجلو – ساكسون وهي أسماء آلهة في ذلك العهد:
Saturday الاصل الروماني هو dies saturni بالانكليزية القديمة day of Saturn أي يوم الكوكب زحل. وزحل هو اله الزراعة عند الرومان. Sunday الاصل الروماني هو dies solies ويعني بالانكليزية القديمة day of the Sun أي يوم الشمس وده طبعاً كل أيام الأسبوع في الخرطوم شمس وعمودية ومعاها كتاحة وزحمة مواصلات يعني أسبوعنا يبدأ في يوم الشمس وينتهي برضو في يوم الشمس عشان كده الأيام عندنا بقت مسيخة. Monday الاصل الروماني هو ويعني بالانكليزية القديمة day of the moon اي يوم القمر.
Tuesday مصدر الاسم هو Tiw او Tiu وهو الاسم الانجلو ـ سكسوني للاله الاسكندنافي Tyr وهو اله الحرب، منل تعنى Mars day أى يوم كوكب المريخ، وكان المريخ اله الحرب عند الرومان وبطل دورة سيكافا والند التقليدي للهلال السوداني. Wednesday الاصل الروماني هو Mercurii ومنها الى اللغة الانكليزية التي يعني فيها Mercury.s أي يوم كوكب عطارد، وكان عطارد اله التجارة والفصاحة والمكر واللصوصية عند الرومان وبرضو ناس الجبهة عشان كده يا أبا جهينة يقول ليك المثل يدخل عليك بي أربعا وعقاب شهر أى بي جبهجي إنقاذي يغطس حجرنا عديل كده !!!. Tharsday الاصل الروماني هو jovis dies ومنها الى الانكليزية القديمة حيث تعنى day of thor وهو احد الآله، كما تعني Jupiter.s dayاي يوم كوكب المشتري وهو كبير آلهة الرومان. Friday يعني الاسم باللغة الانكليزية القديمة day of Frigga اي يوم (فريغا) وهي زوجة الاله اودين وهي آلهة الحب والصحة، كما يعني الاسم ايضا Venus day اي يوم كوكب الزهرة، والزهرة هي آلهة للحب والجمال عند الرومان
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
almulaomar
عبد الله عقيد
عمر الفاروق
ابو جهينة
قرشـــو
فيس بوك
تويتر
انستقرام
يوتيوب
بنتيريست