|
|
 الحصاد المُـر !!!!!!!!!!!!!!!!!!!!!!!!
|
الحصاد المُـر
بِتَنبُش في الأرض طِفلة
بتلعب بالحَجَر حِجلة
حَصَاصَها عَقَابُو في الحفرة
وبالدس دس تنادي شليل
شليل وين راح؟؟ .. حليل زمنو !!
تمساح الفتن كتلو ؟
ولا الدودو المخيف أكلو ؟؟!
بقولوا شِرِق في بطن النيل
حليلو شليل!!
* * * *
لون المَحْلَب المدقوق صِبِِح أسود
وأم أحمد بكت بالدم
عشان أحمد رجع زي ناس عيونها خُضُر
وبدل يُمَّا بيقول (ماظر)
بكت مَلأ دمَّهَا المِنديل
حليل أحمد
حليلو وشليل
* * * *
كم طيراً هجر عُشُّو
وكم مِهْيَار ودَّع روح سماهو وطار
لا بِقَى في المدينة ولد يَشِد الحيل ..
لا أسداً يطاعن في خيال الفيل
رواكيب البلد وَقَعَنْ حصيراتها
برندات الولد وقفن عواميدها
تضاري الشمسة والقنديل
كتير واللهِ عليك يا بنية .. شيل الهم عليكي تقيل
حليل أحمد .. حليلو شليل
* * * *
زمان الفرحة ما وِدْرَن حكايتو !!
بقن ناس فاطنة حزنانات
وطاحونة الشتات تطحن .. تَدَقِّق في العضُم والرُّوح
وما بترحم سماح وخليل
تيران السواقي تدوس .. حوافرها غارزة في الأبدان
تشوِّه مَعلم الإنسان
وتِحْت الحافر المسنون .. يضيع الجيل وراهو الجيل ..
حليل أحمد حليلو شليل
* * * *
سيفاً دون جفير لامع .. بريقو الومضة تضوي الليل
ووعداً بالحرير مغزول
وشرط الخطوة للأحلام بتركب فوق جناح الويل
تطير أول تسيب جواك.. كُراعك تسرق الخطوات
تفتش لي جُحُر بي هناك.. وتسيب بوراك مليون ميل ..
حليل أحمد حليلو شليل
* * * *
في زمن الحصاد المُر .. تفتش لحظة في الأعماق
وجوة الروح تغوص أكثر
تقول يمكن تلاقي سعادة تبقى الزاد.. ولمسة حب بتعني جويل
وتعود تلقى البراح ضيِّق.. وكمان الحِجلة ما حِجلة
ولا أم الحُفر لعبة
تلاقي الطفلة ما طفلة
وأم أحمد بقت (ماظر)
والراكوبة شالها السيل
حليل أحمد .. حليلو شليل!!
من ديوا ميلاد عصيب لرجل ما.. الصادر فى القاهرة !
|
|
 
|
|
|
|
|
|
|
|
Re: الحصاد المُـر !!!!!!!!!!!!!!!!!!!!!!!! (Re: محمد بهنس)
|
الفنان الشفيف محمد بهنس
| Quote: ياناديه..انتي...صادقه وصديقه وقلبك شاعر |
دى مشاعر طيبة تجاه مااكتب وشهادة اعتز بيها من فنان كبير زيك ووسام ازين به جيدى ماحييت ..شكرا كتتتتتتتتتتير .
..| Quote: انا ماعارف لكن مرات كده بقول كلام بحس بي نفسي ذي العوير..فاعذريني..فقط خلي بالك منك |
.
سمح وكت انت تكون عوير انا اكون شنو ؟!! ام ان العوارة قدر المبدعين المرهفين امثالك ايها الجميل الدواخل؟!!
| Quote: .ورفقا بك..فدرب الاحساس خطر وجمييل محفوف بي نور ذي السيل,الله يديك العافيه.محبتي |
ياعاشق الراستا
درب الاحساس حلو ومر .. ولكن بوجود امثالك فى الدنيا تتوازن الاشياء فكن بالقرب دوما ولا تبتعد !!
| |
|
|
|
|
|
|
|
|
 Re: الحصاد المُـر !!!!!!!!!!!!!!!!!!!!!!!! (Re: نادية عثمان)
|
حليل شليلنا الراح !!!
المتألقه دوما ...لك التحيات استاذه ناديه
(وكم مِهْيَا) الكلمة دي مع التشكيل وصغر الحجم ما واضحه.ممكن تكتبيها كبيره شويه ؟؟
(حب بتعني جويل) وبرضو الكلمه الاخيره .لو تكرمتي .
القصيده جميله ما في شك, وانشاء الله لابسه توب العافيه دائما
| |
|
|
|
|
|
|
|
|
|
Re: الحصاد المُـر !!!!!!!!!!!!!!!!!!!!!!!! (Re: عماد شمت)
|
النبيل عماد شمت
البسك الله ثوب العافية دوما يارب
سعيدة جدا لمرورك من هذا المكان
وشكرا للملاحظات القيمة
| Quote: (وكم مِهْيَا) الكلمة دي مع التشكيل وصغر الحجم ما واضحه.ممكن تكتبيها كبيره شويه ؟؟ |
الكلمة هى
كم مهيار
ودع روح سماهو
وطار !
| Quote: حب بتعني جويل) وبرضو الكلمه الاخيره .لو تكرمتي . |
لمسة حب بتعنى جويل
| Quote: القصيده جميله ما في شك, وانشاء الله لابسه توب العافيه دائما |
شكرا ليك تسلم
وسعيدة انا لان القصيدة قد لامست فيك مواطن الاعجاب ..
وكن بالف خير
| |
|
|
|
|
|
|
| |
عماد شمت
فيس بوك
تويتر
انستقرام
يوتيوب
بنتيريست