|
|
 21مارس عيد الام
|
21مارس عيد الام
الى اللائي وضع الله الجنة تحت اقدامهن...اهدي رائعة محجوب شريف..يا والدة يا مريم
تقديم د.بكري الصايغ
الشاعر محجوب شريف "الأطفال والعساكر"
يا والدة يا مريم
يا عامرة حنية
أنا عندى زيك كم
يا طيبة النية؟
بشتاق وما بندم
إتصبرى شوية
يا والدة يا مريم
مانى الوليد العاق
لا خنت لا سراق
والعسكرى الفراق
بين قلبك الساساق
وبينى، هو البيندم
والدايرو ما بنتم
يا والدة يا مريم
عارف حنانك لى
راجيك تلولينى
دايماً تقلدينى
وفى العين تشيلينى
ألقاهو عز الليل
قلبك يدفينى
ضلك على مشرور
قَّيّلت فى سنينى
أنا لو تعرفينى
لو تعرفى الفينى
أنا كم بحبك كم
والعسكرى الفراق بين قلبك الساساق
.. وبينى، هو البيندم
والدايرو ما بنتم
يا والدة يا مريم
طول النهار والليل
فى عينى شايلك شيل
لكنى شادى الحيل
والخوف على داهم
هاك قلبى ليك منديل
الدمعة لما تسيل
قشيها يا مريم
-----------------------
مشتاقلك كثير والله
وللجيران وللحلة
كمان قطر النضال ولى
وغالى علىَّ ادلى
محطة... محطة بتذكر
عيونك ونحن فى المنفى
وبتذكر مناديلك
خيوطها الحمرا... ما صدفة
وبتذكر سؤالك لي
متين جرح البلد يشفى
ومتين تضحك سما الخرطوم
حبيبتنا ومتين تصفا؟
أسامحك لو نسيتينى وأهنتينى
وبكيتى علىَّ
لو فى يوم رميت سيفى
ورفعت إيدىَّ
وخنت الثورة... جيت والذلة فى عينىَّ
حرام عينيك بناغمونى ويرحبو بىَّ
حرام إيديك ينومن تانى فى إيدىَّ
وحياة أمنا الخرطوم
أشيل شيلى وأشد حيلى
وأموت واقف على حيلى
وأقولك يا أعز الناس
على الوعد القديم جايين
وبين الثورة والسكين
شيوعيين
حتى الموت شيوعيين
================================
غنى يا خرطوم وغنى
شدى أوتار المغنى
ضوى من جبهة شهيدك
أمسياتك واطمئنى
ونحن يا ست الحبايب
من ثمارك
فى دروب الليل نهارك
وقبل ما يطول إنتظارك
نحن جينا
وديل انحنا القالو فتنا
وقالو للناس انتهينا
جينا زى ما كنا حضنك... يحتوينا
|
|
 
|
|
|
|
Hussein Mallasi
فيس بوك
تويتر
انستقرام
يوتيوب
بنتيريست