|
|
 قبل أن يدخلوا غرف نومكم
|
قبل أن يدخلوا غرف نومكم
عاد الريح ود المكي إلى أم درمان ووجد المدينة تضج بالشائعات والتكهنات حول التدخل الأجنبي وما سيكون عليه موقف الاتحاد الافريقي؛ وتابع أخبار المسيرة الهادرة التي خرجت في شوارع الخرطوم وظهور الدبابين مجدداً والخطب النارية التي تتوعد الغزاة إن حدثتهم أنفسهم بالمجيء إلى السودان.. إذاً فأجندة السهرة في منزل ود البكري قد إكتملت.. وما إن إجتمع شمل الثلاثي ودارت فناجين القهوة الحبشية المطعمة بالزنجبيل حتى دار معها الحديث حول مجريات الأمور. كان صديق دوشكا متهيجاً ذاك المساء.. فقد بعثت فيه طبول التعبئة روح الجهاد وأعادت إليه ذكريات صيف العبور.. وطمأنتة أن ذاك التراث لم يذهب مع التاريخ.. ووجد نفسه حاضراً في الساحة الوطنية وأحس بوجوده مرة أخرى.. بعد أن كان يتحسر على ضياع تلك الومضات المضيئة في حياته وحياة السودان.. وعلى تضحيات رفاقه الغالية التي طوتها تقلبات الزمن وتبدل الأحوال والتوجهات. دخل صديق دوشكا وهو ينشد: الطاغية الأمريكان ليكم تدربنا بكتاب الله وقول الرسول ليكم تسلحنا بادره ود البكري : يا زول ها... إشتغلك شغله... الأمريكان ما هن جايين والقوات الأفريقية قاعدة... إنت ما قريت الجرايد؟؟ ود البكري كعادته ينساق وراء أحلامه (his wishful thinking وهي أحلام تحركها رغبته في إستقرار سوق الماشية (حيث يعمل سمساراً. سأل صديق دوشكا ود البكري عما ورد في الصحف؛ فانبرى الأخير يروي في حماس كيف أن إجتماع ما في أديس أبابا لعله للدول الأفريقية قرر تمديد وجود القوات الأفريقية؛ وأنه قرأ تصريحات المسئوولين السودانيين مما يفهم منها أن الأمريكان ليسوا بقادمين وأن الدبلوماسية السودانية قد انتصرت في النهاية.. أخذ الصديق بادي ذي بدء بهذه المعلومات إلا أنه إستجمع قواه الذهنية واستعاد المبادرة قائلاً: شفتو الزول لما يبقى صالت بخلي الناس يحترموه كيف؟؟ والله لو ما وريناهم العين الحمرة.. لم يرد ود البكري مسوغاً لمجادلة الصديق.. فأياً كان سبب تراجع الأفارقة ونزولهم عند رغبة السودان (كما صورته له صحف الصباح فالمهم بالنسبة له لن تكون هناك حرب وأن سيل الماشية سيتدفق على أم درمان وسيظل سوقها عامراً ورائجاً.. لذلك إلتفت إلى ود المكي مستفسراً: الريح خبر البلد شنو؟؟ إن شاء الله بسط؟؟ إعتدل ود المكي في إضطجاعته وتناول (فنجان البكري من ود البكري وأجاب: والله بسط.. إلا قبال سبوع كدي جا خبر من أم رملة جابو زول قال سمع ناس النهب المسلح في سوق الثلاثاء بتواسسوا ناوين يغيروا على الحلة عندنا.. أها .. إنعقدت ا لشورة في بيت الشيخ.. واحدين قالوا الجماعة ديل هسع كامنين في غابة البعشوم قدام الحلة منتظرين الفرصة المناسبة ويغيروا علينا بالليل.. دحين نبادر ونهجمهم في محلهم.. يعني نبغتهم ونكاتلهم بعيد من الدار وليبقى اليبقى. الآخرين قالوا: لأ نرجاهم هنا لا من يجوا يختوا علينا يمكن ما هن جايينا.. ويمكن نباصر معاهم نديهم شيء يفوتوا مننا.. ويمكن يغيروا رأيهم يرجعوا.. وكفى الله المؤمنين (شر القتال. قام الطيب ودرحمة قالهم: يا ناس إنتو مجانين؟ ترجوهم لامن يدخلوا بيوتكم ويخربوها فوق رؤوسكم يذلوكم قدام حريمكم؟ وقت أصلهم جايين جايين تبادروا وتلاقوهم بره هناك.. المحركة العليكم شني يا ناس.. ترجوهم لا من يدخلوا بيوتكم؟ دا كلام شنو.. أنا مارق لهم الداير يجي معاي اليلحقني.. قاموا قالوا: والله أخير نتغدا بيهم قبال ما يتعشوا بينا.. عليك أمان الله هجمناهم عصر إنبهطوا في محلهم.. كتفناهم وسلمناهم الحكومة. صديق دوشكا: ما ضربتوهم؟؟ ود المكي: يعني ما بختوا.. فيما كان ود المكي يرشف (فنجان البركة كان ود البكري يداعب مفتاح الراديو.. وإذا بالمذيع في محطة أجنبية يذيع تصريحات كوفي عنان المرحبة بقرارات مجلس الأمن والسلم الأفريقي ويفصل في نصوص القرارات المؤيدة لتحويل مهمة القوات الافريقية للأمم المتحدة.. ولم يزد ود البكري الذي عقدت الدهشة لسانه على أن يقول: كلام شنو دا؟؟؟ أما صديق دوشكا فقد إسترجع كلمات الطيب ود رحمة : (ترجوهم لا من يدخلوا بيوتكم؟ وقت أصلهم جايين جايين تبادروا وتلاقوهم بره هناك..)
قطبي المهدي
ــــــــــــــــــــــــ
|
|
 
|
|
|
|
waleed500
سفيان بشير نابرى
فيس بوك
تويتر
انستقرام
يوتيوب
بنتيريست