Quote: ويقوم كدا يا ود الفاروق العريس يسوق عروستو في نص الحفلة بي ديك الاتوس الما خمج
ياخ نحن لسة في مشاهد الصباح ما جينا لي مشاهد الحفلة لسة .. الشفقة شنو
يا قلب : ياخ الزغاريد دي حاجة سمحة خلاص.. اخو العريس يجي قاطع بي حوش النسوان الناس تزغرد .. ام العريس تجي شايلا ليها صحن الناس تزغرد .. ابو العريس لو قال عايز زيادة فول الناس تزغرد .. اليوم داك كان اديت المرا كف تزغرد ليك
أسة ما تدينا زغرودة في البوست ده عليك الله
احمد عبد الله :
Quote: عااااااااااااااااااااااااااادي
زيييييييييييي الزباااااااااااااااااااااااادي .. نكورك ليهم ما يجو ..نجيهم يكوركوا ..
03-01-2006, 02:21 AM
Ahmed Abdallah Ahmed Abdallah
تاريخ التسجيل: 08-12-2005
مجموع المشاركات: 5193
لكن يا عمر شفت العريس بكون ما عندو شخصية اليوم داك كيف. اى شافع يجرو من ايدو يقول ليه خالتى هناية دايراك يقوم العوير(اقصد العريس) يمش وبعدين يرسلوا ليه شافع بوم كده يقول ليه:دالو ليك تعال سوف السفغ بعملوا فى شنو برضو ويجرجروا من ايدو برضوا يمش.غايتو عالم بدون شخصيات بشكل،،،
03-01-2006, 03:09 AM
صلاح الدين عبدالله محمد صلاح الدين عبدالله محمد
تاريخ التسجيل: 01-02-2005
مجموع المشاركات: 1403
يازل انت وصـّاف وصفاً شديد ، لدرجة انّك اعدت لينا صـُور شعبية محبّبة كادت ان تضيع مع توالي الأيام ، وقِلة حضور الأعراس في سنواتنا الأخيرة، او ربما قِـلّة الأعراس " بالطريقة الفيها مشاهدك دي ! " ولسـّه حالتك في الفترة الصباحية !
ما تنسى بالله ، تنفحنا بي تحليلات عن بعض الشخصيات الما بكون عندها هَـمْ غير الإغراق في توفير حالة ترف شخصاني " لي رِقيباتم/تِنْ !! " ، فتجد الواحد/ة ، يسـأل عن الفطور! وقبله عن صابونة الحمّام والبشكير والمرايا والمُشط ! وممكن مكنة الحلاقة ، والكركار والكِريم ، ودا كلّو في طلعةودخلة وقولة وسكتة ؛ دون ان يدير/تدير باله/ها على اولويات ناس " بيت العِرس " ! .. وآخرين واخريات ، يتجلـّون ويصدقون في تهوين القسا وتراهم/نّ أشــغل من " أمّ العروس " ، مهمومين بي صِـحّهم ، وفايرين وغايرين في انجازات يتكاسل عنها بعض اهل العرس ذات نفوسهم ! .. هادول الأخيرين ، هم مِلح الأرض ، وفواح الفضائل ، واهل المرووّات ، الجاّدّين في إخلاصهم ومساعداتهم ، والجّادّات ..
--- بس ما تقوم تقليبا لينا محزنة ، وتدلف بينا لي مشاهد " بيت بكا " ؟!!
مع التحايا ،،
03-01-2006, 03:24 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
Quote: لكن يا عمر شفت العريس بكون ما عندو شخصية اليوم داك كيف. اى شافع يجرو من ايدو يقول ليه خالتى هناية دايراك يقوم العوير(اقصد العريس) يمش وبعدين يرسلوا ليه شافع بوم كده يقول ليه:دالو ليك تعال سوف السفغ بعملوا فى شنو برضو ويجرجروا من ايدو برضوا يمش.غايتو عالم بدون شخصيات بشكل،،،
كل ما أتزكر قصتك مع الشفع اضحك جنس ضحك .. تتزكر لمن قلت إنك قاعد في كوشة العرس سمعت ليك شافعين بيتحدوا بعض وبيقولوا (تعال نشوف منو البيسلم علي العريس اكتر ؟؟) قلت اليوم داك سلمت علي اي واحد تلتين مرة ؟؟؟ والغريبة ما بتقدر تقول ايهو اي شي !!!!!! بس تمد يدك تسلم زي البوم الله يجازيك يا موج ياخ انا يوم العرس قطعتوا مع الشفع ناشف وقلت إمكن يكونوا ديل متشارطين الجميل في الموضوع مش الشفع الكبار زاااااااااتهم بيكونوا عايزين يظهروا والواحد يجيك يقول ليك : اها يا عريس جبنا العيش خلاص !!! ياخ انا مالي ومال العيش طيب ؟؟؟؟ لا ويقوم يجيك واحد تاني يقول ليك دقيقة يا عريس ..ويسوقك بعييييييييييييد علي جنب كده وفي النهاية يقول ليك : الكراسي جبناها الف كرسي بدل سبعمية مش كده احسن يا عريس !!!!!؟؟؟؟
03-01-2006, 03:27 AM
فيصل نوبي فيصل نوبي
تاريخ التسجيل: 09-16-2005
مجموع المشاركات: 14194
محمد ابو جودة : الرجل الجميل .. وين الحي بيك ياخ ؟؟؟ متلومين معاك لا صوت لا صورة ... عاش من شافك وين ايامك ..
Quote: فتجد الواحد/ة ، يسـأل عن الفطور! وقبله عن صابونة الحمّام والبشكير والمرايا والمُشط ! وممكن مكنة الحلاقة ، والكركار والكِريم ، ودا كلّو في طلعةودخلة وقولة وسكتة ؛
ياخ جنس ديل بيقفلوها معاك قفلة ؟؟؟؟ الواحد يكون شغال ليك يا ولد شيل الإبريق داك ويا ولد تعال كب لي عمك موية ويا شافع تعال شيل الصينية دي وهو تلقاهو اخر قيفات واخر ارياح .. في الشق الاخر تلقا النسوان شغالات في الفحم والنار وتقوم تجي واحدة تكشكش في الدهب وتقول ليهم إنتو ضلعتكم دي مالا نييية كده ؟؟؟؟ اما الجكس فحدث ولا حرج .. انا كاوية شعري ما بقدر اطلع بيهو ..والمنكير بيتوسخ كان قطعت السلطة والكريمات الشمس ما بتنفع معاها .. ياخ كمية من الزحمة في البرندات والغرف اليوم داك ..مبااااااااااااااااالغة ..
Quote: وآخرين واخريات ، يتجلـّون ويصدقون في تهوين القسا وتراهم/نّ أشــغل من " أمّ العروس " ، مهمومين بي صِـحّهم ، وفايرين وغايرين في انجازات يتكاسل عنها بعض اهل العرس ذات نفوسهم !
والله يا ابو جودة ده أجمل مشهد يتصور في البوست ده وصدقني ما أظن يجي مشهد أروع من ده .. يا زول والله داير تبكيني عدييييييييل كده .. لا تعليق على هذا المشهد ..
03-01-2006, 04:01 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
يا مريخابي يا وهم !!! بالله إنتو بتعرفوا تعرسوا؟؟؟؟ العرس ده خلوهو لينا نحن الهلالاب ديل اللينا تلاتة سنة بنعرس
بعدين عشان ما عندكم رائدات زي رائدات الهلال تكون ما عايز تخليهم يعملوا الضلع وداير توديهم اعضاء في النادي مش؟؟؟ والله يا سامي تلقاك إنت من النوع الفي العرس جنو يرسل الشفع الدكان ..
03-01-2006, 04:19 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
مشهد من بعيييد : رغماً عن إنو بيت العرس بعيد جداً من شارع الظلط تلقا ناس نازلين من المواصلات بي شنطهم وأول زول يلاقوهو : لو سمحت في عرس قريب بي جاي؟؟؟ يرد عليهو كل الشباب المتواجدين في ضل الشجرة : ايوة عرس ناس فلان ؟؟؟ امشي طوالي وخامس لفة علي يدك اليمين تاني بيت علي يدك اليسار !!!!!
مشهد اخر: حركة نشطة للركشات في بيت العرس .. الركشة البتنزل ليها زول جايي العرس بتشيل ليها جكس ماشي الكوافير ..
03-01-2006, 05:29 AM
يازولyazoalيازول يازولyazoalيازول
تاريخ التسجيل: 02-05-2002
مجموع المشاركات: 10210
تعرف يا عمر دايما بيكون في واحد في العرس ( إما من أهلو أو من أصحابو ) واقف بعيد و بيفكر : يا ربي الزول دة بيقدر يسدد ال قروش ال إتدينا مني ؟ ولا قاعد يهجج و ما جايب خبر الديون ال على راسو ؟
03-01-2006, 06:57 AM
JAD JAD
تاريخ التسجيل: 02-05-2002
مجموع المشاركات: 4768
Quote: تعرف يا عمر دايما بيكون في واحد في العرس ( إما من أهلو أو من أصحابو ) واقف بعيد و بيفكر : يا ربي الزول دة بيقدر يسدد ال قروش ال إتدينا مني ؟ ولا قاعد يهجج و ما جايب خبر الديون ال على راسو ؟
تعرف يا ابو جهينة الناس الفي البورد ديل كللللهم مركزين علي إنك زول كاتب قصة من الدرجة الأولى لكن اغفلوا إنك كاتب ساخر من الدرجة الاولى عديييييييل كده .. كل كتاباتك وتعليقاتك الطريفة لا ينافسها إلا عمنا المسخوووت ود الموج .. إنتو الإتنين يوم بتقطعوا قلبنا ده .. تعرف والجميل في الموضوع تلقا زولك يطنطن في سرو ويقول : " العريس ده ينطط فرحان كده ما كلللللللو بي حقنا .." والأغرب إنو كل الناس البيكون العريس متدين منهم بعدين لمن يجي يحضر شريط العرس يقول ليك : " والله فلان ده ما قصر معاي في العرس " فدي معناها الراجل قروشو تاني ما بترجع ليهو ..
مشهد قمة التناقض: الرجال اول ما تجي صينية الغدا يقولوا ليك طلّع امرقيقة دي برة لأنها دي التحلية ويقعوا ليك في الضلع ده من قولة تيت وبعدين ما بيرجعوا للكسرة زاتو .. النسوان عكسهم تماماً بيطلعوا الضلعة برة وبيجوها اخر شي !!!!! يا قلب ورينا الحنك شنو بالضبط من حركتكم دي ؟؟؟
03-02-2006, 02:53 AM
JAD JAD
تاريخ التسجيل: 02-05-2002
مجموع المشاركات: 4768
Quote: السيرة قربت ياجماعة وصلت لفة الشعبية هسة ..يلا يابنات اطلعوا لى برة
يا زولة الناس لسة ما ضايرت عدة الغدا ونفيسة ما شالت حلتا الكبييييرة والمنقد حق نفيسة لسة بي نارو وسارمس الشاي ما رجعوها والكباكي إتكسر نصها .. كدي أول حاجة غسلوا العدة دي ولملموها كوييييييييييييس بعد داك شيلو دلوكتكم واركبوا البصات ..
03-04-2006, 03:39 AM
صلاح الدين عبدالله محمد صلاح الدين عبدالله محمد
تاريخ التسجيل: 01-02-2005
مجموع المشاركات: 1403
المتداخلين : شايفكم شابكين في العريس العريس ،، انتو عارفين اكتر زول بكون مطحون في العرس دا منو؟ اخو العرووس... اييييييييييييييييييييييييييك بكون مدور من دق الريحة والصلصة نقصت والتوم ما لاقينو والعربية ال ح تودي فطور العريس والعقد الفي الجامع مع الخبايز والغدا والعروس البيودوها للمرة تجلبطا والعشا اترص في النادي ولا لسه والاستديو وووووووووووووووو
مطحون طحن
03-04-2006, 09:03 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
يا اخوي اهل العروس لو الشرتيت جاهم تمام بينوموا قفا لكن لو العريس طلع زول مخستك ونظام قال ليهم هاكم دي قروشكم ومتكفي ووووو ويعمل اخخخخخخخخخخخخخخخخخخخ نايم .. يقوموا ناس العروس الشفوت لو القروش ما كفت يظبطوا ليك صحن العشا قدر قروش العريس.. مخلل وبيضة وبطاطساية وقطعة جبنة
03-04-2006, 09:14 AM
Ahmed Mohammed Osman Ahmed Mohammed Osman
تاريخ التسجيل: 10-10-2005
مجموع المشاركات: 1381
والله يا عمر اخوك عاصم متابع الموضوع من الالف الى الياء لكن فى شئ غريب يا اخوى الفنان منو بالتحديد ... اسمعنى انت قصة بيت العرس ده تنبيه للعريس ولا شنو ولا الحكاية شوية جدعات من الزمن الصعب ... احسم لينا موضوع الفنان سريع والله تقول لى اجيب الفنان ( حمادة بت ) ولا (حمادة شعبية) مع احترام اخواننا واهلنا فى الشعبية تبقى الامور طارت طيرة شديدة ... اعمل حسابك يا عمر والحكاية شكلها لعلاءالدين لكن نضع نقاط على كل حال ...... تسلم اخى
03-05-2006, 07:38 AM
mahmed alhassan mahmed alhassan
تاريخ التسجيل: 02-10-2004
مجموع المشاركات: 1793
العد التنازلي بدا والشمس خلاص بدت تغيب مما يتيح الفرصة للجلبطة في الوشوش وكل البنات القابلتهم في الغدا ما حا تعرف فيهم ولااااااااااا واحدة اللهم إلا إذا جيت شايل معاك خرطوش موية وتدي الواحدة رشة في وشها حتى تقدر تسلم عليها.. الخيمة مليانة بي الشفع ومعظمهم متلمين في خشبة المسرح والكراسي مرصوصة جزء للنسوان وجزء للرجال وحلبة الرقيص في النص قصاد محل الفنان وكوشة العروسين مواجهة للفنان من الجانب الاخر وجريد النخل يحفها بالجوانب وكرسيين جلوس شادنهم من صالون ناس اللمين الزول المرطب ..
03-08-2006, 00:26 AM
صلاح الدين عبدالله محمد صلاح الدين عبدالله محمد
تاريخ التسجيل: 01-02-2005
مجموع المشاركات: 1403
ويبد التنافس بين اهل العريس واهل العروس .. اهل العريس ما بينزلوا من البص إلا اهل العروس يطلعوا ليهم برة وينزلوهوم .. اهل العريس يغنوا : حسي حسي يا ام العروس.. حسي وجهزي البيبسي يا ام العروس.. سلااااااااام سلاااااام يام العروس.. سلام جاييك عريس تمام يا ام العروس..
والرد يجي سريع من اهل العروس: عريسكم ده الله ادا.. اداهو (هناية) تحبو برا ..
ويكون الرد من اهل العريس اعنف المرة دي: يا نسيبتو شن بتدوري .. جبنا ليك عقييد اللولي.. وتنهتي المشادة الغنائية بنزول اهل العريس وتبدا المقالدة بين اهل العريس واهل العروس في مشهد جمييييييييييييييييل ..
مجموعة من النسوان بيصلحوا في التياب بعد النزول من البص إستعداداً للدخول
03-08-2006, 01:57 AM
صلاح الدين عبدالله محمد صلاح الدين عبدالله محمد
تاريخ التسجيل: 01-02-2005
مجموع المشاركات: 1403
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عمر الفاروق
القلب النابض
Ahmed Abdallah
bob
ترهاقا
صلاح الدين عبدالله محمد
فيصل نوبي
Omar Bob
صديق الموج
محمد أبوجودة
يازولyazoalيازول
hatim
ابو جهينة
JAD
Ahmed Mohammed Osman
Sobajo
ايوب عبدالرحيم
عاصم ابوبكر حامد
mahmed alhassan
فيس بوك
تويتر
انستقرام
يوتيوب
بنتيريست