|
|
 مسقط تودع ضؤالقبيلة عضو البورد الطيب شيقوق الي الرياض
|
في حفل مهيب وجمع حاشد جمع كل الوان الطيف السوداني وبمشاركة مقدرة من الاخوان العمانيين ودعت مسط اليوم الاستاذ الطيب مضوي شيقوق الخبير القانوني بسوق مسقط للاوراق المالية منتقلا الي الرياض0
الطيب شيقوق عضو هذا المنبر شخصية فريدة متفردة ممتلي باصالة الريف السوداني البكر مزدان بالعلم في احدث مغانية شيقوق الشيخ كان يلقب بضؤالقبيلة وشيخ العرب كانت دارة مشرعة الابواب لكل الناس مها وصفت الكلمات فلن تستطع ان تعكس جزء من هذا الكرم والاريحية التي يصعب التمسك بها في هذا الزمن الصعب وخصوصا في دار الغربة ولكن عند شيقوق لم تختلف مسقط عن بوادي الدندر قط سوي في عدم اماكنية اراقة دم الذبيح الي الضيف امام الباب0
لك التحية الاستاذ شيقوق وانت سفارة متحركة لشعب لشعب السوادن ودركم يابورداب الرياض بالعضو الفذ الذي ستسمعونه وترونه في مقبل الايام القادمات0
|
|
 
|
|
|
|
|
|
|
|
Re: مسقط تودع ضؤالقبيلة عضو البورد الطيب شيقوق الي الرياض (Re: عبدالله)
|
الأخ العزيز عبد الله
شكراً على إشاعة هذا الخبر بهذه الكلمات الرائعات في وداع الأستاذ الطيب. فكل الأمنيات الطيبات للأستاذ شيقوق بطيب الإقامة في مقر عمله الجديد، فهو رجل يحتل مكانة خاصة وسط الجالية في مسقط فرضها طيب معشره وتعامله الراقي مع كل ذي صلة بالسودان ودونك تلك الابتسامة التي كانت لا تفارقه وهو يسجل حضوراً متميزاً في المناسبات التي كان هو ضوء قبيلتنا فيها (ودعني أستعير منك-عزيزي عبد الله- هذه العبارة لأنها الأصدق والأنسب في وصف هذا الرجل كريم المحتد أصيل المعدن).
الزاكي
| |
|
|
|
|
|
|
|
|
|
Re: مسقط تودع ضؤالقبيلة عضو البورد الطيب شيقوق الي الرياض (Re: عبدالله)
|
الاخ الشقيق الوفي عبد الله
شكرا لكلماتك الطيبة وده اكيد من اصالتك يا عشاء البايتات ومقنع الكاشفات
الاخ الزاكي ما احلى احرفك والمؤسف حق انني لم اغادر السلطنة اخي الزاكي الا بعد ان تعرفت اخيرا على عمقك الادبي والثقافي فهي بالنسبة لى 8 اعوام ضاعت لم اسمع منك الا في تلك المناسبات التى تجمعنا بين الفينة والاخرى في النادى .
الاخ على بدوى يعجبني فيك حضورك الدائم في كل المناسبات التى تجمع الرجال فلله درك وربنا يجمعنا بالخير.
الاخ محمد الشيخ : شكرا لمداخلتك واتمنى ان تكون كل ايامكم افراحا وكل عام وانتم بخير.
الاخ تمبس : انت تجاوزت رجالة الرجال كلهم وحرم ازورك بعد اديتني تلفونك وما قصرت .
الاخ ابو جهينة حياك يا حبيبي ولك خالص ودي
الاخ احمد انشاء بالعافية نلتقي .
الاخ عبد الله إليكم كلمة وداعي لجميع اخوتى بالسلطنة .
الفاضل رئيس نادي الجالية السودانية بمسقط
اخواتى واخوتي الاعزاء
اخواتي واخوتى الشرفاء
شكراً لهذه الكلمات الجميلة
شكراً لهذا الألق
وشكراً على هذا الرحيق المليء بطعم الابداع
شكراً لهذه الأنفاس المعطرة
التهنئه القلبيه الحاره للاخوه المسيحين بمناسبة اعياد الكريسماس والميلاد المجيد
إن الحياه احبتي
ماهي الا ومضات
محظوظ من التقطها
الشاهد اننا في مثل هذه المواقف تنمحي امامنا حدودنا الجغرافية ولا نشاهد خلاف لوحة رائعة بلون واحد اسمه السودان . فلا غرو فقد تكررت هذه المواقف لدى وداع الاستاذ المحامي الجنوبي ايول الذى استقبلناه بالود والحب وفتحنا له قلوبنا وظللنا نتردد عليه في مكان اقامته الى ان غادر في احتفالية رائعة في معانيها وحزينه لفراقه.
أتمنى ان تتوحد كلمتنا وتأتلف قلوبنا وننسي مرارات الماضي لا سيما ونحن مقبلون على عهد ديموقراطي يكون الفيصل فيه لتحديد خارطة طريقنا السياسي هو صناديق الاقتراع .
والتهنيئه موصوله لجميع الاخوه بالسلطنة
وها نحن تطل علينا ذكرى الاستقلال المجيد .
نريد عاما جديدا وسودان جديدا خالى من الخلافات والتنازعات والتناحر فهذه فرصة لنصيغ تاريخنا من جديد من اجل انسان هذا الوطن والذى اصبح هائما على وجهه فى جميع انحاء البسيطه حتى انه كاد ينسى الى اى مجتمع ينتمى.
أتمنى ان يكون همنا هو المصلحة العليا لبلادنا التي تمر باحرج منعطفاتها التاريخية
ويحضرني في هذا المقام ما قاله الاستاذ محمد احمد المحجوب في البرلمان السوداني عندما كان زعيما للمعارضة وعندما كان موضوع المداولة وقتها مناقشة اتفاقية سحب مياه النيل حيث جاء في حديثة :-
Lets forget our parties differences so as to obtain any possible drop for our country
فاين نحن الان اخوتى من هذه المعاني والقيم النبيلة .
صحيح اعذائي
(بعض الأوطان تحمل رجالا بين ظهرانيها ، وبعض الرجال يحملون الأوطان في حدقاتهم
وهولاء قد ضربوا خير المثل لأولئك القلة الذين حملوا الأوطان في قلوبهم فتجلت سماتهم الخيرة في خلقهم وفعالهم)
ود الضو ...
لاحظت أعذائي : ان بعض الزملاء الاكارم يتحدثون في كل المحافل عن ود شيقوق ابن البيئة البدوية فارجو ان تسمحوا لى ان احكى لكم حلاوة هذه البيئة .
قطعا يكون كل الاهل الان مشغولين بكيفية حصول اى منهم على طلقة جبخانة عشان يضربها في الهواء لعودة ود شيقوق والمداح كمان جاهزين للمديح بسخنوا طاراتهم ومنتظرين الطيب يجي يفتح ليهم الشنط واعجهم ببخور لبان اهلنا ناس ظفار وقطعا اهلي الان يعملون في ترتيب المظلات والرواكيب لاستقبال ود شيقوق وقطعا لاى منهم سؤاله الذى ينتظر الاجابة عليه كيف ناس السلطنة طيبين ولا ما طيبين وعندهم رزق ولا ما عندهم وكيف بيشربوا عندهم مطر ولا ما عندهم وكيف رعيانهم بيتضاربوا في محلات وردة الموية ولا كيف .
وكيف حريمهم لابسات مستورات ولا كاشفات وكيف بيصرفوا ليكم الرواتب بالصفوف زيّنا وبالشباك والصراف ولا كيف ........... واكيد بقول ليهم لا الرواتب تحلب من الاى تى ام ATM وبقولوا لى ما ترطن ورينا شنو القلت ده وبوريهم شنو ال ATM وكلام كتير وعفوى وحلو شديييييييد وبنسى مرات بدل حقي بقول ليهم حالي ومالى وبهو ومن صوبكم وبقولوا ود شيقوق جانا مغير لكنتو طاب ويسألوا تاني كيف الاستاد مدنى ود العرضى هناك برجّعوا ليه البنطون كان فاتو ولا بدوهو ضهرهم ساى حوفة ؟ وبحكى ليهم عن سوق مسقط للاوراق المالية وما بحبوا الحديث كتير عنها بس بديهم فكرة بسيطة بقول ليهم البورصات دى زى سوق الماشية فيها البائع وفيها المشترى وفيها الضامن والضامن دى هو شركة الوساطة لكن بيهتموا شديد وبلهفة للاستماع منى عن طيبة وكرم مديرها العام احمد صالح المرهون وعن اهلنا ناس ظفار اولاد الشحرى وال مقيبل وناس زعبنوت وال المرهون وعن خريف صلالة الفيهو الهيف وفيهو الضحوى وفيهو الليلي وفيه البرق وفيهو الرعد وفيهو الخزام والشيح والبراح .
وبقول ليهم هناك البناطين شغالة سمك بس الناس اى واحد بليسنه وبعربيته والبناطين بركبوها العصريات يتفسحوا بيها في البحر وبحرهم حدادي مدادى . اها تاني كمان بعد يومين يجوك اهلك من بعيد شايلين الكرامات فيها التور وفيها الضان وفيها وفيها ضحكتهم وفرحتهم وهشتهم وبشتهم ناس ما بيعرفوا البيتزا ولا الكنتاكي ولا ترتيب ولا سيم سيم . بعرفـــوا القدح ابو خرز البشيلوهو بالهباب وبيعرفوا على الطلاق ما تمشى مريوق .
اها يا نصر الله ( نصر الله من اولاد البندر يا اخوانا ومعنا هنا في مسقط) يا اخوى انت وقت تسافر لاهلك بتدخل بيتك الاشتريت ارضه بالفلوس ساى في كسلا وبتلبس جلابيتك السمحة وبتمشى الفواتح والعزاء لوجهاء المدينة لكن نحن ....... لا لا لازم نمشى لحاج احمد كبير العمر وست البنات ونقعد معاهم نحكي ليهم تانى عن السلطنة لانهم كبروا ما بيقدروا يجوا الراكوبة وما عايزين الحكي الا من خشم سيده والاطفال نشيل ليهم الحلاوة ونختها في عبنا في الراكوبة وكل واحد يجيك تسلم عليهو في قديديمو وتديهو الحلاوة وده بيكبر وفي بالوا ود شيقوق وما بيرضى يقولوا ود شيقوق حديد مشحود لانه عارف المال ضل ضحى وعارف الرجال شرادة وورادة .
وكيف امانينا الجميلة حلت الأهات مكانا
كفاية اشوفكم بي خيالي
واستعيد احلى الليالي
وأبكي أيامي الخوالي
وكل ماضي الذكريات .
الشكر موصول لجميع الاخوة الزملاء الذين تكبدوا مشقة الاعداد لهذا اللقاء ولجميع الحضور وحتى الغياب الذين لم يتسن لهم المشاركة .
الشكر موصول لجميع اعضاء النادى السودانى واخص اولئك الذين يقومون على امر ادارته على راسهم الاستاذ الصادق سلمان .
كما اخص بالشكر الاخوة القضاة والمستشارين و شيخ المحامين الاستاذ محمد الطيب السعيد عشاء البايتات ومقنع الكاشفات .
| |
|
|
|
|
|
|
|
|
|
Re: مسقط تودع ضؤالقبيلة عضو البورد الطيب شيقوق الي الرياض (Re: عبدالله)
|
أخي وصديقي عبدالله اللغز
سلام وشوق عارم
قررررررررررربت أجي حفل وداع أخونا وأستاذنا الطيب شيقوق ولكنني أتهيب هذه اللحظات وأحاول تجنبها بقدر الإمكان
وعبر أخي عبدالله أودع القامة السامقة شيقوق وأتمنى أن يوفقه المولى عز وجل في مشواره بين أهل الرياض والذين أحبهم وأتمنى ألتقيهم ولو للحظة
واشهد بأني لم أر من شيقوق ولم اسمع عنه إلا كل طيب وكريم وصدقني أخي عبدالله مهما كتبت فلم أضف لما خطه يراعك فحروفك كانت صادقة
لكما تحياتي
| |
|
|
|
|
|
|
|
|
|
Re: مسقط تودع ضؤالقبيلة عضو البورد الطيب شيقوق الي الرياض (Re: abulinah)
|
شكرا الاخ عبد الله
شكرا عزيزي البدري ووالله نحن شاعرين انك معانا والزعيم كمال قرشي كلم ود الضو قال ليهو لازم البدري يجي بالطائرة لوداع الطيب لكن انا حلفت طلاق ما تتعب كفانا كلامك الحلو وشكرك لاخينا عبد الله.
الاستاذ وليد ابو لينا انا عايز منك بس تورونى دروب الرياض في الايام الاولى وتانى اسالونى من اى واجب بس ختونى واجبات الكورة انا ما زولها طب .
لكم ودي
| |
|
|
|
|
|
|
|
|
|
Re: مسقط تودع ضؤالقبيلة عضو البورد الطيب شيقوق الي الرياض (Re: عبدالله)
|
الاستاذ عبد الله
شكرا عزيزي على البوست
اتفق معكم وكل المتداخلين بأن الاستاذ الطيب شيقوق يستحق ذلك وأكثر فهو مكسب لكافة بورداب السعودية عامة والرياض خاصة ،
ألف ومليون مرحب بكم ود شيقوق بيننا في السعودية ، وعلينا حلف باليمين أن نذهب الرياض لاستقبالكم والسلام عليكم فأنت تستحق يا ود شيقوق
مع خالص تمنياتنا لكم بطيب الإقامة بالسعودية
أخوكم / الشفيع
الدمام
| |
|
|
|
|
|
|
|
|
|
Re: مسقط تودع ضؤالقبيلة عضو البورد الطيب شيقوق الي الرياض (Re: الطيب شيقوق)
|
وبعد سلسلة من حقلات الوداع
وجلسات ماقبل الفراق
يغادر الطائر الميمون بشيخ العرب
الي الخرطوم غدا
لقضاء العيد مابين ربوع الدندر والحوش بامدرمان
وبعدها يشد فارسنا عصا الترحال الي الرياض
لك السلام اخي الطيب
والي اللقاء هنا في هذه الساحة
التي تزدان بكوبة من اعظم واحلي اهل السودان
والي اللقاء في السودان
| |
|
|
|
|
|
|
| |
الزاكى عبد الحميد
mohamed elshiekh
tmbis
ابو جهينة
ahmed haneen
الطيب شيقوق
بدرالدين شنا
فيس بوك
تويتر
انستقرام
يوتيوب
بنتيريست