|
دعواتكم لزميلنا المفكر د.الباقر العفيف بالشفاء العاجل
|
|
 Re: الحركه الوطنيه لتحرير الجزيره المرويه و الإقليم الأوسط ... (Re: ABDELMAGID ABDELMAGID)
|
الله اكبر الله اكبر الله اكبر
(واخيرا بحمد الله انطلقت الثورة من الجزيرة المروية تهميشا و ام المهمشين في السودان بقراها و(كنابيها) وملارياها وبلهارسياها مزارعيها ولقاطها عرب ,فور, زغاوة ,برقد, تاما, برته قرعان ... من كل ربوع الوطن الحبيب.....)
اها يا اخوي عبد الماجد الثورة واعلنتوها بعد ده شيلوا طواريكم وكواريكم وملوداتكم وجاهدوا في التيوس ابان دقون العندكم ديل ....بس بتدوروا ليكم ( ضرا) فالحركات الثانية دي كلها لمن بدت تحارب عندها (ضرا) يا في اثيوبيا او ارتريا او اوغندا او تشاد دحين شوفوا ليكم(ضرا) للكر والفر وبعد ما تدوسوا الحيكومة وتقول الروب الحيكومة انا متاكد محتاجين ليكم حجازين ومنبر زي بتاع نيفاشا ولا اسمرا ولا ابوجا وطالما اسمكم حركة تحرير الجزيرةحتتعاطف معاكم قناة الجزيرة وكل ( الجكس)بس ما تجيبوا لينا القرضاوي وجماعتو ومنبركم حيكون ( منبر الجزيرة) بتاع البنية النجاضة جمانة ديك...عاد ما منبر وتكون كمان الاخت جمانة هي الحجاز بينكم وبين الحيكومة .. علي بالحرام البشير ظاااطو اجي المنبر ده للمفاوضات توووووش طالما الحجاز (جمانة) واجدع ليك علي عصمان بعيد واديكم البتدوروه والبرضي اختنا جمانة....منبر الجزيرة منبر من لا منبر له....
عاشت حركة تحرير الجزيرة....و الجزيرة هي ام المهمشين من المزارعين واللقاط العرب والزغاوة والبرقد والتاما والفور والقرعان والبرته في كل الكنابي الفقرانة...بعد ده تاني النسمع واحد اقول لينا المثلث الذهبي....في الجزيرة ام المهمشين في السودان..
الله اكبر الله اكبر
سندة: اها التمويل كيفن يا عبد الماجد اخوي؟؟
| |
 
|
|
|
|
|
|
|
 Re: الحركه الوطنيه لتحرير الجزيره المرويه و الإقليم الأوسط ... (Re: أحمد الشايقي)
|
أحمد الشايقي يا خاين..
خلاص عديت روحك من ناس النيل الأبيض وأتحالفت مع ناس الجزيرة؟؟
شوفوا يا ناس الجزيرة والنيلين أبيضهم وأزرقهم (يا كافي البلا شغلتنا كلها أبيض وأزرق في القبائل وكمان في المويه)،
يا فيها يا نفسيها، تدخلونا معاكم ولا نطرشق ليكم ثورتكم وما تنسوا أنه أكثر من نصف سكان الجزيرة المروية من عندنا، دوسه واحدة من الريموت نسحب القوة الضاربة.
المهم معكم في النضال والمطالبة بالحقوق المشروعة.
وطالما أن الجنوب أخذ نصيبه من السلطة والثروة والغرب في الطريق وسوف يليه الشرق إنشاء الله، نحن ناس الوسط والشمال نقع من قد القفة ولا يحملونا أخطاء العسكر والحكام الذين لم يحكموا يوماً بأسمنا ولم نفوضهم لذك؟؟
الشايقي
_____________
فاوضني بلا زعل
____________________________________________________________
قالت بت ود خير لولها في رسالتها الشهيرة:
إن قعدت ... مع السلامة وإن جيتنا ... يا الزين
وإنت إن ما جيت بننتظر الصغيرين
| |
|
|
|
|
|
|
|
|
 Re: الحركه الوطنيه لتحرير الجزيره المرويه و الإقليم الأوسط ... (Re: ABDELMAGID ABDELMAGID)
|
Quote: الشايقى !!!
ات اااخوى عنصرية الشوايقه دى ما تخليها شويتين كدى ...
كلامك كلو لأحمد الشايقى ... يا أبو النسب ... و كمان خال الأولاد ...
تحيتى و احترامى
عبدالماجد |
عبدالماجد أخوي ما لك داير تسوي لي سواة ناساً هنا يعادوني على الهوية ومجرد الإسم بيعمل ليهم حساسية وهرش.
أنت تعلم أنه الشايقية أقل قبائل السودان عنصرية والدليل الإنتشار الواسع في كل ربوع السودان وما تبع هذا الانتشار من تزاوج وتمازج وأي ملة على أرض المليون ميل مربع يا عندهم زول ماخد له شايقية ولا شايقي ماخد منهم، (طبعاً ماخد دي تعبير شايقي لمتزوج وأنت سيد العارفين).
أما مخاطبتي لأحمد الشايقي فلم أقصد بها سوى مشاغلة الرجل فهو قريب وزميل وصديق شريك وأحببت أن أمازحه في هذه المساحة الخاصة بك مزاحاً بريئاً على الأقل في نواياي وليست مسؤولاً عن نوايا أو أفكار الآخرين.
وفي ذات الوقت أحببت أن أرسل إشارات تعبر عن مخاوف أعتقد أن الكثيرين يشعرون بها ولكن لا يجرأون على التصريح بها لآنه جرت العادة أن ما يعبر عنه أهل الأطراف صراحة يكون حق مباح وإن أشرنا له أعتبر جرماً وعنصرية وووووو الخ ..
فمثلاً أخوتنا في الجنوب إذا تحدثوا عن الإنفصال صفق لهم الناس وقالوا من حقهم وإذا فكرنا في الأمر همساً قالوا عنصريين إنفصاليين ، ... ، ... ، إلى آخر قوائم عبارات التهجم والتجريم.
المهم أنه طالما فتح الباب لتقسيم السلطة والثروة فلماذا لا يطالب أهل الشمال والوسط بنصيبهم وكل ناس يأخذوا نصيبهم ويبقوا أحرار في توظيف هذا النصيب في تنمية مناطقهم ورفعة أهلهم أو حتى حرقه مش كل زول حر في حقه.
أهه الكلام ده حسي يجوك ناس يستكتروه عليك ويقولوا ليك ما ليك الحق تطلب؟؟؟
وكما ذكر الأخوة المتداخلون وسبق أن ذكرنا في مواضع كثيرة فإن معظم التنمية في الأقليم الشمالي والأوسط كانت بسواعد أبناء المنطقة من العون الذاتي والجهود التي يبذلونها من أجل مناطقهم وأهلهم.
وأذكر في بداية الستينيات (في المرحلة الإبتدائية وفي الخرطوم بحري "العاصمة") كانت معظم أثاثات المدرسة من العون الذاتي النهر الجديد بدأ بفصول من البروش بنيت بتبرعات أولياء الأمور وبعض التجار في الحي، في المرحلة المتوسطة أذكر في السنة الأولى وفي أول يوم للدراسة طلبوا الإجتماع بأولياء أمور طلاب الصف الأول (نحن) القادمون من الإبتدائي وطلبوا منهم كراسي لجلوس الطلاب لآن المدرسة تعاني من نقص الكراسي والطلب من الوزارة تأخر وبالتالي لا يريدون تعطيل العام الدراسي وأذكرها حتى اليوم في اليوم التالي حملت كرسي خيزران من البيت على رأسي ومخلاية الكتب معلقة على كتفي وسرت في طريق طويل إلى المدرسة وكلما تقدمت ألتقيت بحامل كرسي آخر إلى أن دخلنا المدرسة يومها مجموعة كبيرة من حاملي الكراسي حتى أنه في اليوم التالي وجدوا أن هناك طلاب لا يقدرون على جلب كرسي فكان أن تبرع القادرون بكرسي إضافي لغير القادر وهكذا كانت تسير الأمور واليوم يقولوا كاتلين الجدادة وخامين بيضه؟؟؟
معليش أخي عبدالماجد طولت عليك وما تزعل من خال العيال وبالله سلم لي على أختنا الشايقية وإنشا الله تكون مشلخه وما تنسى تشلخ العيال.
لك مودتي
الشايقي
_____________
فاوضني بلا زعل
| |
|
|
|
|
|
|
|
|
|
Re: الحركه الوطنيه لتحرير الجزيره المرويه و الإقليم الأوسط ... (Re: Al-Shaygi)
|
الشايقى اخوى
ابشر بالخير ...
( طب ) و الله انا مو بزعل ... والزعل لزومو شنو ؟؟؟
لكن بينى و بينك ود عمك ( الجعلى ) مرات بحب المناكفه و ( الكجار !!! ) لوجه الله ساكت كدى ... زى كجارو مع ام العيال فطينه ( السمحه ) بتكم ( المو مشلخى ... ) ... هى بتقول لى نحن الشوايقه بنسو و انا بقول ليا نحن أولاد جعل بنسو .... وابراهيم و محمد اتفرجوا على حماقة اللبو الجعلى و لسان الأم الشايقييي ..
تحيتى و احترامى
أخوك
عبدالماجد
| |
|
|
|
|
|
|
|
|
|
Re: الحركه الوطنيه لتحرير الجزيره المرويه و الإقليم الأوسط ... (Re: Al-Shaygi)
|
السلام عليكم
الأخ الشايقي ذكر نقطة مهمة جداً
و هي أنو ناس الوسط و الشمال حيتحملوا وزر الظلم الذي أصاب بقية السودان
مع أنهم من أكثر المتضررين من كل الحكومات السابقة
فالحكومات السابقة و بما فيها الأنقاذ عملت فقط من أجل مصالحهم الشخصية فقط
و كان همهم الأول كيف يزيدوا أرصدتهم ليس في قلوب أهلهم و لكن في بنوك سويسرا
و بالمناسبة المطالبة بالحقوق ليست بالضرورة تتطلب حمل السلاح و الحرب
و الطريق لذلك أصبح ممهد جدا حيث أن الحكومة نفسها فتحت الباب أمام تقسيم الثروة لمن يطالب بذلك!
و لكن تأكد طالما كان هناك صمت مطبق من اهل الوسط و الشمال
فسيظلوا طول عمرهم يزرعون و سيحصد غيرهم
الا هل بلغت اللهم فأشهد
| |
|
|
|
|
|
|
|
|
|
Re: الحركه الوطنيه لتحرير الجزيره المرويه و الإقليم الأوسط ... (Re: ABDELMAGID ABDELMAGID)
|
أخي عبد الماجد
سلام
وتقدير
ووفاء
نعم تحرير الجزيرة
أولا فليذهب الوالي غير مأسوفا عليه - ومن كان عنده سجلا بإنجازات هذا الوالي فليتكرم بمدنا بها- لا يقول أحد الخدمات الطبية - فنحن في الجزيرة من شيد كل متر وشبر بهذه المرافق الطبية التي تزين مدينة ودمدني - فالدخول للمستشفى (الزيارة) بألف جنيه من أكثر من ثلاث سنوات مضت - ؟؟؟ أجزم أنه لا حكومة الولاية - ولا الحكومة الاتحادية خسرت جنيها واحدا في هذه المرافق الطبية - وما زال الدخول بألف جنيه للزيارة - ناهيك عن رسوم العلاج ورسوم بنك الدم ، ورسوم العلاج ووووو الخ
ثانيا:
فليذهب اتحاد المزراعين - وكافة إدارة المشروع ببركات والمناطق الأخرى
وبعدين نشوف ناس الري ووو المجالس التي أثقلت كاهل أهلنا بالجبايات والاتاوات
ولنا عودة
الشفيع مصطفى
الدمام السعودية
ولاية الجزيرة - جنوب الجزيرة الحاج عبد الله - مكتب حمد النيل
| |
|
|
|
|
|
|
|
|
|
|
Re: الحركه الوطنيه لتحرير الجزيره المرويه و الإقليم الأوسط ... (Re: ودقاسم)
|
اعلن تضامنى وانضمامى لكم
وسوف أوفر قوه ضاربه تحتل شارع الظلط من وسط الجزيره بين ظلط الخرطوم بورتسودان
بعد دا خلى الشاحنات الجايه السودان تجى بفوق
وسوف اوفر قوه ضاربه تحتل نهر النيل الازرق من وسط الجزيره
وسوف اوفر قوه ضاربه تحتل السكه حديد من وسط الجزيره
وسوف اوفر قوه ضاربه تحتل ابراج الكهرباء الجايه من سنار والدمازين
وسوف اوفر قوه ضاربه تحتل الكبارى و كبرى حنتوب وغيره
مطالبنا
كل مواردنا تذهب للجزيره فقط
الرئيس ووزير الداخليه وزير الدفاع ووزير الماليه مننا والوالى كمان
نعطى حق ابرام الاتفاقيات الخارجيه والتوامه مع من نرغب
وبقية المطالب سوف تأتى تباعا
| |
|
|
|
|
|
|
|
|
|
Re: الحركه الوطنيه لتحرير الجزيره المرويه و الإقليم الأوسط ... (Re: ABDELMAGID ABDELMAGID)
|
اخوتي الاعزاء
تربيت و تعلمت في بحر ابيض زرت اهلي مثيرا في ود مدني ، وعند اندلاع ثورات التهمش مع تردي الوضع في عموم الوطن بداءت باجراء مقارنة بين الاقاليم و تذلكرت الملاريا و هي حبيبتي تزورني دوما و البلاهارسيا التي هلكتتني شهور
تذكرت تكيلات مذارعي الجزير ة و النيل الابيض كيف هم ضحية ايضا و مهمشين ايضا حتي ان الطبيعة امعنت في هجرانهم بسسبب السياسلت الطفيلية
و من هنا تم التعريف الحقيقي و السليم للجلابة ، و هو ان الجلابي هو السياسطفيلي الذي يهلك اهل السودان عموما و يستوي في ذلك الغرباوي و الشرقاوي و الجنوبي و الشمالي و الوسطي .
يعني ليس السمالين و حدهم جلابة كما يحلوا للبعض ، فيمكن جدا ان تجد نوباوي واو جنوبي اشرس جلبنة من الشمالي
كما تجد قري باكملها او بطون قبائل باكملها مهمشة اكثر من الجنوب و الغرب و ليس لديهم غير الكتاحة
و الكل يذكر كارسة المويلح الانسانية و كيف تعامل معها الافندية الحلابة من الغرب و الجنوب و الشمال و كيف كانت نظراتهم لهؤلاء المحتاجين الذين ظلمتهم الطبيعة
و الله ليس هناك حل غير السودان الجديد يشارك الجميع بتفكيك مركز الجلابة و النهضة لبناء سودان عادل
و يا اهل الجزيرة اعتمدوا علي الجماهير فقط و ليس علي اي اخر و حتي لا تتضطروا للتوقيعات المشبوه
و تتفاغم المشاكل
ثقفوا الجماهير و عرفوهم بحقهم و هم من بعد قادرون لانتزاعه
| |
|
|
|
|
|
|
|
|
|
Re: الحركه الوطنيه لتحرير الجزيره المرويه و الإقليم الأوسط ... (Re: ABDELMAGID ABDELMAGID)
|
الأخ عبدالمجيـد والإخـوة المتداخليـن
الحمـدلله نحـن فـى الجـزيـرة ننعـم بنعمـة تفتقدهـا معـظم أقاليـم السـودان الا وهـى نعمـة الأمـان حتـى أصبح الإقليـم ملجـأ وملاذا لكـل من إفتقـد الأمان فى ربـوع إقليمـة فلم نبخـل أن يشاركنـا إخـوتنـا من بقـاع السـودان شرقـه وغربـه نعمة الأمان ورزق ساقه الله لنا ولهم
إن الحرب أخى عبد الماجد حتى وإن كانـت لتحقيـق مطلـب تقضـى على ما تبقى من عمران - شهدت الجزيرة تنميـة بضل جهـود أبنائهما فعمروها أكثر مما عمروها لم ننتظـر حكومـة تبنى مدرسة أو مستشفى ولو حملنا المعاول لحرب الحكومة لهدمنا ما بنيناه
والان نستطيـع بفضل الإستقرار الذى هو العامل الأول لأى نهضة وتطور وعمران أن نرقى بهذا الوسط وأن نزيل أى مظاهر للتخلف أو التهميش ما ظهر من مصطلح للمطالب المشروعة فقط أبعدو الحرب وأبعدو الساسة والسياسة
| |
|
|
|
|
|
|
|
|
|
Re: الحركه الوطنيه لتحرير الجزيره المرويه و الإقليم الأوسط ... (Re: عمر عبدالجليل البعشي)
|
الأخ عمر عبدالجليل ...
نعم اتفق نحن أكثر أقاليم السودان استقرارا و كذلك كانت دارفور و الشرق و الى وقت قريب و لكن ... الظلم و التجاهل و التهميش سوف يولد الإنفجار ... و لكن ظللنا نعطى بكل كرم و سخاء و طيلة قرن كامل و فى المقابل جحود و نكران للجميل من البعض ...
ظل أهلنا فى الجزيرة ينتجون الذهب الأبيض ليوزع ريعه على كل السودان .... فلم يتزمروا أو يتضجروا بالرغم من علاقات الإنتاج المجحفة فى حقهم ( السخرة المقننة ... ) ...
الجزيرة المهمشة فى أغلبها تفتقر لابسط المقومات افنسانية و الحياتية و البيئية فمازالت العديد من قرى و نجوع الجزيرة تفتقر الى مياه الشرب الصحية فيضطر هؤلاء الغلابة و المهمشين الى شرب مياه الترع الملوثة بالطحالب و البلهارسيا و المبيدات الحشرية فكان هذا الكم الهائل من الإمراض الخبيثة التى انتشرت و بصورة مروعة .... هذا غير ذلك المكافح المزارع الذى تلدغه الثعابين و تلسعه العقارب فتفيض روحه قبل أن يصل لاقرب وحده صحيه ( ده اذا كان يوجد بها ذلك المصل المضاد للسموم ) .... هنالك الكثير و الكثير أخى و لكن ... لقد ان الأوان أن نتكلم و نتحدث ( IT IS TIME TO SPEAK OUT )...
كسره :
يجب أن لا ننسى حملات الإنقاذ و مصادرة قمح الغلابة باسم تحرير الإقتصاد ... فكان الزبير محمد صالح و جاندرمته تاتى لمصادرة محصول أهلنا و منطق االإستغفال و الإستهبال بأنكم ( انتو ما ناس اخره مو دنيا !!! ) هذا ما كان يقوله ذلك الزبير !!!!
عبدالماجد
| |
|
|
|
|
|
|
|
|
|
Re: الحركه الوطنيه لتحرير الجزيره المرويه و الإقليم الأوسط ... (Re: eyes of liberty)
|
Quote: بس يا عبد الماجد شوفو ليكم بالله حتا
غير ابوجا و نيفاشا تعقدوا فيها السلام
مع الحكومة .... يعني هراري ولا جوهنسبرغ
اصلو نيجريا فترت من مشاكلنا العجيبة دي |
نحن ماعندنا اكبر من مدنى و سنار و كوستى و الدويم ... الدايرنا اللجينا ...
Quote: و يا ريت تضموا الشمال كمان اصلو بقي جمل الشيل
|
و مالو ما كلنا فى الهوا سوا ...
تحبتى و احترامى
عبدالماجد
| |
|
|
|
|
|
|
|
|
|
Re: الحركه الوطنيه لتحرير الجزيره المرويه و الإقليم الأوسط ... (Re: عبد المنعم عمر عثمان)
|
| Quote: ولكن أراكم اليوم قد عممتم الفكرة لتشمل كل ألاقليم فهذا شىء عظيم |
أخى عبدالمنعم عمر
ود أهلنا الحلاويين ....
هل تعلم أننا فى الإقليم الأوسط بمناطقه االأربعه الجزيرة و النيلين الأبيض و الأزرق و غرب البطانة أكثر مناطق العالم انتاجا و يا للمفارقه ... أكثرها تهميشا ؟؟؟؟؟
كسره :
ملاريا ، بلهارسيا ، ليشمانيا ، تايفويد ، مجاعه ، أمراض خبثه ( malignant diseases ) بفعل المبيدات !!!!
عبدالماجد
| |
|
|
|
|
|
|
|
|
|
Re: الحركه الوطنيه لتحرير الجزيره المرويه و الإقليم الأوسط ... (Re: ABDELMAGID ABDELMAGID)
|
السيد القائد العام دكتور عبد الماجد
كلو تمام يا فندم
اولادنا الفي القوات النظامية وتجارنا وموظفينا وطلابنا في الجامعات والمعاهد والثانويات في كل مدن السودان واولادنا المهاجرين كلهم جاهزين لدعم المشروع و الامريكان جاهزين والاتحاد الاوروبي جاهز والوسطاء جاهزين وحيكومة الخرطوم قالت الروب ومستعدة للتفاوض.... وحتقدم كل المطلوب والمنبر بمشيئة الله غالبا ما يكون في في اوروبا المرة دي...بس يا سعادتو لازم تقوم بزيارة خاطفة لاولادنا في كل المهاجر للتعبئة واستقطاب الدعم ويا سعادتو لازم تكون حكومة في المهجر لادارة البرنامج والتنظيم
والله اكبر والعزة للجزيرة...
| |
|
|
|
|
|
|
|
|
|
Re: الحركه الوطنيه لتحرير الجزيره المرويه و الإقليم الأوسط ... (Re: ABDELMAGID ABDELMAGID)
|
للجميع أهدى قصيدة الشاعر هاشم صديق ياتو ورقا
ياتو ورقا
اتمضا
وكان دوانا
من الأذى؟!
...............
ياتو ظُلماً
اتنسى
بس عشان
مكَّاً ضحك
أو عشان
سِيِداً عفا؟!
ياتو خُطباً
في إضينّا
جَملّت في عيونّا
شينه؟!
وياتو تلفاز
ياتو رادي
ياتو راوي
ياتو زينه
لَبسّت عريانّا
توب
وبدّلت طعم
(السخينه)؟!
وياتو حلماً
في عصورنا
ما صبح باللّت
عجينه؟!
وياتو مركب
في بحَرْنا
طاش صوابها
وهدهدت أعصابها
مينا؟!
وياتو راجلاً
بالبشارة
جانا
من أقصا
المدينه
و (بالبشاورة)
كان مسح
سبورة الرحلة
الحزينه
وكان غرس
في الليل
بشارات الرتينه
وشَفانا
من جوع
أو حفا؟!
ياتو مسرح
ابتدا
واسيادنا
ماكانوا الفوارس
ونحنا كومبارْس
الحوادث؟!
وياتو والي
في المنابر
ما خطب فينا
ونَهَر
مليون شهر
ونحنا قاعدين
في البنابر
قدامو
زي شُفَع مدارس؟!
وياتو دستور
ما صِبِح في راسنا
قمبور
وياتو اعلان
أو بيان
ما انْغرس
في حلوقنا أحزان
وياتو لحماً
للعضام
يوماً رجع
وياتو آذان
يا عسس (مالطا)
انسمع
وياتو صفاً
إنقسم
وعاد يتمم
وانجمع؟!
وياتو رُتبه
وياتو قُبه
ما بقت
في اللفّه كُبه
وياتو صوتاً
من وجع
دمدم هتف
ما انقطع حبلو
ونزف
وبالأوامر
والكوامر
اتنفا؟!
أحلام بتنقح
طول دبابيس
الليالي
ولما جمر الدنيا
يصبح
وما انجبر
يا دنيا خاتر
لسه لافّانا
المواجع
والصفافير
والمواتر
.....
سِيِداً مرق
سيداً رجع
مكَّاً دخل
مكَّاً طلع.
شيخاً لَبَد
شيخاً نَبَل.
سيفاً ضِحِك
كشّر كَتَل.
ورقاً جبل
ورقاً سَهَل.
صِدْقَاً أَفَل
كِضباً لمع.
صنماً وقف
صنماً وقع.
كفاً عصر
كفاً قلع.
...........
والأماني
لسه في حال
(الصواني).
لقمه طاعمه
وبي كرامه.
حبة احساس
بالسلامه
رجعه لي قيف
الشهامه
مَرْقة
من (عصر)
القيامه
فرحة ما تكمل
ندامه.
لاها قصراً
أو دواير.
لاها بستان
أو مناظر
لاها (مول)
في (وادي شنقول)
وكبري طاير
في (القماير)
لاها أموال
في الخفا.
أعفونا
من كُتْر (التحالف)
و (التخالف)
والشراكه
والشياكه
والمواثيق
والتواثيق
والورق.
كم مره
أذَّنا الفَجُر
قبال نفيق
شَفَقُو انسرق.
كم مره
بشرتو الخُشوم
أكلت عديل
مُر الصفق.
كم مره
جربنا (البيان)
كم مره
جبناكم عيان
نِشِف البلد
قلبو انحرق
........
الشعب وين
يا مؤمنين
ودستورو
في حَله انسلق؟!
و (القسمه)
في ثروة منو
والشعب
بي جوعو انشرق؟
و(النسبه)
في سُلطة منو
و(سُكرنا زاد)
(بالنسبه)
في الدم انطلق.
........
انتو الفوارس
والمكوك.
الدايْر يبيع
تدوهو
(في جاهكم يلوك)
واللسّه
ماسك في الجَمُر
ياريتو بس
يلقى النبق
والجوع يقَطِّع
في الحشا
ألفين سنه.
أدونا بس
حق الصَبُر
خلونا
من غش الكلام
وعد الرخا
وليلة القَدُر.
خلونا
من كضب
البشاير
في القصايد
والجرايد.
أدونا بس
حق الفطور
أعفونا
من حق (العوايد)
و (النفايات)
والدوا
وكفايه
(فك عكس الهوا)
............
يامؤمنين
الشعب وين؟
تاكلو الثمر
والشعب تدوهو
النوا؟!
خلونا
من حشد المواكب
بي أجاويد الجرايد
والإذاعه
والإشاعه
وبي مناشير
الوظيفة.
كم مره
دقيتو النحاس
في لمبه
طقّت وطرشقت
أو (زره) جاتكم
حتى لو كانت
خفيفة
أو (نِبْلَه) ناشت
باب جنابكم
وعطسه قَدّت
للرهيفه
أو هاجسه
مرقت
من عقول
عَسَس الخليفة.
........
خلونا نمرق
من هدومنا
ونغلي نهتف
للكرامه
والشهامه
والحساب
الفي الكتاب
وللرغيفه
وللحليفه :
- مافي جُحراً
تاني بلسع.
ومافي عذراً
للفوارس
تاني بشفع.
ومافي ومضاً
في عقولنا الصاحيه
نلقاهو انطفا
ومافي رجعات
تاني للشوك
والحفا.
ورونا كيف
ننسى الكوارث
يا فوارس؟
الإنكسار
الإنشطار
الإنحسار
الذِلّه لي ناساً
كِرام
موت العُروض
دك الفروض
بلْع الحرام.
ورونا كيف
بس لينا يوم
(بعتوا الترام)؟!
ورونا كيف
لمعت وشوش
كبرت كروش
وأنحنا ناس
ربط الحزام؟!
كَسَر الخراب
مِرْق البلد
حتى النفوس
صبحت حطام.
أدونا بس
فَرْق العُمُر
سووا المعاش
حبة لحم
فوق العضام.
أوضحكه
من جوه القَلِب
أو لمبه
في جوف الضلام
ولو أصلو موت
أدونا موت
حق الكِرام
.........
خلونا
من جنس التخاريف
في الثقافه
ومهرجانات السخافه
أدونا بس
حبة (كُنافه)
..............
ياتو حرفاً
يوم هتف
بي غُبنو
أو صادم وقف
أشّر
على حق (اتلهف)
أو على خَطْف
الشَرَف
أو غَنّا
للناس والشَمِس
واتحدى للظلمه
وعزف
وما اتخنق صوتو
ونَزَف؟!
...........
حريه وين
يا مؤمنين؟!
صوتنا وين
يا موحدين؟
............
الشعب وين
في السُلطه
يا أُمة محمد
ويا يسوع؟!
(القسمه)
في المال والحُكُم
ولاّ المظالم
والدموع؟!
...........
يا شراكه
يا تحالف
يا (تخالف)
يا شياكه
يا قِباب
يا رهاب
يا خطابه
يا شيوخ
يا شلوخ
يا مهابه :
- انتو الفوارس
في المسارح
ونحنا كومبارْس
الغلابه.
انتو أبطال
القصص
نحنا التلاميذ
في الحصص
انتو الأكابر
في المنابر
ونحنا
حُراس المقابر
بِتْصَدِقوا
أو تضحكوا؟!
قسماً عديل
يا نبقى
نحنا الساده
والحق والقياده
وانتو خُدامنا
وزياده
نطلع نكون
نحنا المنابر
والإمامه
أو تقوم بينّا
القيامه.
الشعب ما ضحكه
وقمامه
والصَنّه
ما بر السلامه.
.............
يا ناس كفايه
من خراب
نُبل الضماير
والهواجس
في البشاير
ومن طلاسم
جايه باكر
ومن تعاويذ
(الولاده)
ومن كضب
يوم السمايه
ومن تهاليل
البدايه
ومن عويل
خط النهايه
ومن صراع
كل الديوك
للكراسي
وللولايه.
يا (مبيور)
ويا (جَلاّبه)
انحنا الشعب
سَدْرَنا ولّع
وكَرْكَرْ تَب.
حتفاوضونا؟!
ولاّ نولِّع
ونبدا حرابه
نَخُش الغابه؟!
ياتو ورقاً
اتمضا
وكان دوانا
من الأذى؟!
..........
وياتو ظُلماً
اتنسى
بس عشان
مكَّاً ضحك
أو عشان سِيِداً عفا؟!
هاشم صديق
10/7/2005م
| |
|
|
|
|
|
|
|
|
|
Re: الحركه الوطنيه لتحرير الجزيره المرويه و الإقليم الأوسط ... (Re: Alshafea Ibrahim)
|
الاخوة المناضلون اها نحن جيران و مهمشين تعالوا نكثف من المطالبة
انا عارف الناس بيقولوا ده كلام بودات وو لكن نحن متريثون لربما يطلع واحد عاقل يجنبنا الخراب و هو كبير و تكون نتائجة مدمرة لقرب المسافات و تمازج الاشكال و الالوان
يعني مافي طريقة لقولة غزوا اجني او مرتزقة الناس يهم سكان الاوسط و كردفان
و هنا بياننا الاول طبعن ملكية و ما خفي اعظم سنقاتل بالقنقليس و اسياف العشر و عصيدة الدخن و الحم المناصيص
و تقبلوا من التحاي الثورية و انتم اهلها و قدرها يا ناس الوسط
بيان تأسيسى
المؤتمر التأسيسى لتجمع كردفان للتنمية بمدينة انتويرب البلجيكية.
يهدف المؤتمر الى بحث مستقبل اقليم كردفان تحت الظروف السياسية المعقدة التى يمر بها الوطن بعد أن الغت السلطة المركزية دور جماهير اقليم كردفان فى تحديد مستقبل الوطن الذى تريد. لقد ظلت السلطة المركزية فى الخرطوم لمختلف الانظمة تمارس وبتعمد سياسات لا تلبى الطموحات التنموية لسكان واحد من اغنى اقاليم السودان، بل مارست ولعقود من الزمان سياسات الافقار المتعمد للاقليم واستغلال موارده الاقتصادية والبشرية واستخدامها لبذر الفتن والشتات بين ابناء الاقليم وتمزيق لحمتهم الاجتماعية ومنهجة ترويع السلم الاهلى بينهم وذلك بالتقسيمات الادارية التى تساعد على تكسير عناصر الوحدة بينهم وتدفعهم الى الاقتتال. دفع اقليم كردفان ثمنا غاليا لمثل هذه السياسات. فقد ازدادت معدلات الفقر والنزوح، وتضاءلت فرص التعليم على علاته، وساءت الخدمات الصحية وغيرها من الخدمات المفترض توفيرها وذبح وشرد الالاف فى مجازر جبال النوبة الجهادية ودمرت البنية التحتية التى كانت فى الاصل دون الحاجات الاساسية للاقليم. لقد قام مؤتمرنا الذى تنادينا اليه من داخل وخارج الوطن ولاسيما من دول الاتحاد الاوروبى لكى نواجه هذه المظالم بكافة الوسائل الممكنة حتى نحقق احلام بنى جلدتنا كافه فى العيش بكرامة وقطع الطريق امام استمرار كل اشكال التهميش المختلفة والمتعمدة التى ظلت تمارسها السلطات المركزية على اقليم كردفان كما هى على غالبية اقاليم السودان مما ادى الى تعدد جبهات الموت.
فى البداية حيا مؤتمرنا النضال المشروع لكل الشعوب المهمشة فى السودان وكفاحها من اجل الحرية والديمقراطية والتحرر من تلك الظلامات التاريخية التى نتجت عن ممارسات السلطات المركزية ويضم صوت اقليم كردفان جنبا الى جنب مع كل الذين يسعون بكل شرف وامانة لخلق وطن جديد معافى من اوبئة ووهم الاستعلاء العرقى الذى تجاوزه العالم حتى تتحقق كل الاهداف الانسانية والحقوق التاريخية والطبيعية التى ينشدها الجميع. ولذلك أمن مؤتمرنا على وحدة تراب الاقليم ووحدة شعوبه كجزء لا يتجزأ من وحدة السودان القائمة على الخيار الطوعى واحترام التعدد الثقافى والعرقى والدينى واعتماد الديمقراطية كأحدى الوسائل الاساسية لترسيخ قيم التعايش السلمى.
ان تجمع كردفان للتنمية يدعو كل شرائح مجتمعات اقليم كردفان من رجالات الاداره الاهلية والطلاب وافراد المؤسسة العسكرية والقوات النظامية الاخرى والمنظمات النسائية وروابط وتجمعات كردفان داخل وخارج الوطن، يدعوهم الى مساندة اهدافه ودعم برامجه التى يسعى لتنفيذها بكل الوسائل المتاحه. وعليه يدعو تجمع كردفان للتنمية جميع ابناء الاقليم والخيرين من ابناء امتنا الى المشاركة الفعالة فى حوار كردفان-كردفان لدعم التعايش السلمى ورتق النسيج الاجتماعى الذى مزقته السياسات الخرقاء للسلطات المركزية وذلك لكى نقطع الطريق امام مخططاتها الانتهازية لتقسيمنا بالمعايير العنصرية العرقية والجهوية. قياسا على هذه الدعوة، يحذر تجمع كردفان للتنمية السلطات فى الخرطوم من الاستمرار فى هذه السياسات التى تنتهك وبفظاعة حقوق الانسان فى كافة انحاء الوطن كما هو الحال فى دارفور وأمرى وشرق السودان. نحذر من الاستمرار فى اعتقال الذين مارسوا حقهم الطبيعى فى النضال السياسى ضد سياساتها من مناضلى شهامة الاولى والثانية وتربصها المستمر بحركة كفاح. يحذر مؤتمرنا من الممارسات اللا انسانية بحق النازحين من اقليم كردفان وبقية المناطق المهمشة الاخرى.
بنى وطننا:
لقد نجح مؤتمرنا فى اجازة دستوره ولوائحه الاساسيه وبرامجه القائمة على تنفيذ الاهداف المعلنة كما انتخب قيادته لكافة الاجهزة فى جو حر وديمقراطى. وقد اصبحنا على يقين بأن نضالنا المشروع من اجل تحقيق ما اعلناه من اهداف سيتم باتحادنا جميعا.
اننا قد عقدنا العزم غير مدفوعين بأى نعرات جهوية أو قبلية أو عنصرية أو أى من تلك التى ظلت مؤسسات السلطة تنعت بها الاخرين لمجرد مطالبتهم بحقوقهم الطبيعية، عقدنا العزم فى هذا المؤتمر على تحمل مسؤلياتنا التاريخية تجاه وطننا والخروج به من هذا المنزلق الخطير الذى يتهدده الان، ونناشد كل الشرفاء من ابناء وبنات وطننا باتحادهم معنا.
عاش نضال شعبنا من أجل الحياة الحرة والكريمة.
تجمع كردفان للتنمية انتويرب بلجيكا
.
| |
|
|
|
|
|
|
|
| |
هشام هباني
أحمد الشايقي
saif massad ali
Al-Shaygi
خالد عبد الله محمود
ودقاسم
wadalzain
shahto
نيازي مصطفى
زول ساكت
Mohammed Ahmed Saeed
فيس بوك
تويتر
انستقرام
يوتيوب
بنتيريست