|
وكاتلت بيك حزن الـمواسم
|
كـتبتك والـقول حـرن..انتسب صـوتي لـمدارج النار..سافرت في شرايين البوح..غشيت تعاريش القول الجـميل ولـمة الوجع العشاري..نضح خاطري بتقاسيم شقاك.. كاتلني فيك طيف الغربة ..و تهاويـم العبور لزمن تاني.. ما قدرت أقول ليك ، وكتين كاشفني زمن الحضور..انتحيت في ذاكرة الهـياكل..اتوضيت بدم القصايد..وصليت حضورك نشوة الضـو البهـيه..ضـميت نبـضي وبخشوع تليتك لزمن الصـمت/الحـضور..الكـلام شاترني فيك..اتقفلت مداخل البوح..والعـجـمة سارت فوق لساني.. كتبتك رقيات الزيف الـمفضوح بجـوع الصبايا..ومشيت للنيل..لقيت النيل مـخمور ، سكران بالحزن الودار..الوهم اعترض خطاي وجاهرني فيك بالعداوة..وقفني في قلب اللـيل صـوت دوريه هاربة من صدى الخـوف..رنت أنفاسك في صدر الـمدينه..جريت عليك..وجرت الدوريه في الدرب الـمعاكس.. جريت عليك..لـميت توب الحـروف..وكانت الحروف عريانه..والظروف برضك عريانه ..أبت تنستر.. مرقتي من بين رؤاي.. اتـماثلتك في حضن الافق ، صوت فجر تريان بالوضـوح ..وكاتلت بيك حزن الـمواسم..كتبتك سـورة الشـجن الأسـيف..لغة الـمنافي كانت حاضرة..زهت في فنـارات البـحر..وكتف الخـروج..ورسمت السفر العنيد.. كـيف أقدر أجيك ، وخطاي لسه ما عرفت طعم الحضارة؟ كيف أقدر أجيك ، والنبض جواي خان معنى الجسـاره؟ كيف أقدر أجيك ، واللــيل ضـفر جـدايلو وكتفني بحبال الســكوت؟ كتبتك والقـول حرن ، انتسب صـوتي لـمدارج النار
محمد النور كبر
|
|
|
|
|
|