الليلة الصباح بدري، يعني ما الليلة الليلة، الناس الجو متأخرين، يعني يوم 10/02/2003، قلتا أمشي أشوف موضوع العيد دا شنو والقصة دي كيفنها، السنة دي قلتا أضبح زي باقي خلق الله، لنو انا لحدي العيد الفات معتبر نفسي قاصر، لكن السنة دي قلتا لا، وداعاً يا طفولة، نمشي نشوف أبوي دا كان قاعد يعمل شنو زمان.
عندي واحد صاحبي عند بوكس داتسون موديل 87، عربية جميلة وسيدها جميل هو زاتو، المهم أخدتا منو العربية قلتا يا سوق الغنم جاك زول، العربية فيها 3 نمر بس يعني تعشق الأول التالت الرابع، التاني مافيها، انا ما عارف السر في القصة دي شنو يمكن انا الماعرفتا ليها.
المهم يا هادي، وقفتا العربية برا بعيد، بالله العرب، لياقة عربنا بس، يازول يازول يازول، طبعاً كلهم أزوال، لكن عرفتا صاحبي دا قاصدني وعندو خروف باير عاوز يتخارج منو، عملتا فيها نهائي دا ما انا، وحاولتا بكل الطرق الدبلوماسية اتوه في الزحمة، بالله زولك حدية، أصلو ما زغتا من عينو، قبضني ليك من نص السوق، عربي يشبه عرب بيوضه الهواوير لا بس ليهو حاجة عرفتها بعيديييين إنها كانت جلابية في يوم من الأيام بعيد، وخاتي حاجة في راسو بعدييييين عرفتها بالله هو دا الشماغ البيقولوهو ؟ هلا يازول إشلونك ؟ لوني ؟ ما كعب، أها الحاصل شنو، عندي ليك خروف نجدي ما يحتاج، كم ؟ 500 ريال، آآآآآآآزول إنتا ما بتخاف الله ؟ 450 راس مالو والله، ياود عمي 450 شنو ؟ في حسابات سريعة جرت في العقل الباطن 450×750=337.500 جنيه سوداني، هممممممم، والله غالي ياخوي، 400 والله خسران بس عشانك ياطيب، 350 كيف معاك ؟ تنفع ؟ 300 ريال عاد آخر كلام، قلتا ليهو يازول كدي نشوف خروفك أول وبعداك نتفاهم.
ندفر في خروف وننزل تحت حاشي نختا عجل نلقى بقرة، لمن وصلنا للسيد، يا حبيب كيفنك ؟ بالله عيني في عينو أبى ينزل عينو أصلوا، خروف قليل تربية، آها خروفي طلع خروف، خروف قعدة بس، يعني اتنين زي ناس أب حراز وصاحبي قرجة يقومو بيهو، المهم أبيت الخروف ونفسي مرقت منو مرة واحدة، لأنو شكلو كدا احرف جزار ما بطلع منو 5 كيلو لحمة. كدي النشوف الباقين، يازول كيفك، الحمد لله، يارجال تبي خروف ؟ لا أبي سلامتك، يا حبيّب عندي لك حاشي، يحشاك فقر، شكراً.
بعد ساعة حوامة كدا، الخروف أبى يتلقي نهائي يعني، مرقتا من سوق الغنم، قلتا نتعوض الله أجيهم بعد العصر، دورتا العربية وفتا من سوق الغنم.
العصر جيت ياخوانا الحاصل شنو ؟ بالله تقول الخرفان ما ياها بتاعت الصباح، الحمل بي 500، جاتني صدمة أخلاقية من تفاهة السوق، عارفين زيادة الطلب بترفع السعر، لكن قدر دا ؟ كدي النشوف الخرفان يمكن رخصت، أها دي كمان في الاقتصاد قالوا سعر السلعة الأصيلة وكتين يترفع البديلة بتلحقا، بالله الخروف هو الأصيل والا الحمل البديل ؟ لقيت ليك الخرفان دقت في الـ 800، أممممك، كدي النشوف عربي الصباح وينو ؟ أكوس وأكوس وأكوس وأكوس، لمن لميت فيهو، بالله أول شي سلمت علي خروفي حتن عاينت لي العربي في وشو، ما فرجت يا أبو علوة، كيفك ؟ بالله تقول شاحدو السلام، رد ابى يرد، قلتا ليهو خلاص جيتك يا جنى، حمل الخروف في الدتسن، قال لي 750 يا زول، قلتا ليهو 750 سوط أب لسانين اليطلعك سور السوق دا بلا سلم، إنتا جنيت ؟ الصباح بالتحانيس بالتلتمية أبيتو، تقول لي 750 ؟ والله هذا كلامي، عن كان تبيه خذه وإن كان ما تبيه أتركه، لا لا شكراً تركته لك عسى ان ينفعك او تتخذه ولداً.
وداعاً سوق الغنم .. قال 750 قال، وانا راجع في الدرب، قلتا أغشى عندي واحد صاحبي سعودي إسمه ماجد، قلتا أغشاهو طولتا منو، مشيت لقيتو قاعد في الدكان بتاعو، يا حبيب، سلامات سلامات اتطايبنا قعدنا، القهوة جات، يا ناس كدي سؤال قهوتم دي قاعد تشربوها ولا زي بتبلعهو بلع ؟ المهم، الونسة جرت حكيت ليهو قصة عرب سوق الغنم، قال لي يا سوداني يا مجنون، في زول يمشي يكوس خروف في العصر التاليهو ليل العيد ؟ قلتا ليهو أها شنو ؟ قال لي الناس بتشتري الخرفان من عيد الفطر تخزنها عندهم عشان ما تقع زي وقعتك دي، كدي قوماك معاي، وين ؟ قال لي عندي واحد بعرفو في سوق الغنم، يمكن يخفض ليك، جداً.
رجعنا السوق، بالله صاحبي ماجد، ماشي وانا وراهو لكن ما عارف مالي حاسي إنو أنا ماشي لي حتة شايفها قبال دا، الزوووول عاينتا لقيتو ليك عربي النحس الأبا يفارقني من الصباح، إنا لله وانا اليه راجعون، شيلك ختك ختك شيلك، آخر كلام 500، أمرنا لله، وداعاً يا خمسمية حبابك يا خروف الشقا والتعب، أخدتا الخروف، ركبتو ليك في حوض الداتسون، ومسكتا أبنص للبيت الخروف رابطو ليك في السطوح من الوكت داك، كل خمسة دقايق أطلع أسلم عليهو وأرجع.
عارفين المشكلة وين بعد دا ؟ لا بعرف أضبح لا بعرف أطبخ، دي الحقيقة المرة الإكتشفتها وانا قاعد أربط الخروف، الشي الوحيد البعرفو بس طلع ربط الخروف، أها الضبح هين راقدين الضباحين، الطبيخ دا كيفن عاد ؟ هسع من المغرب راقد أتأمل في مصيبتي دي، متمني أصحى الصباح ألقى الخروف فكا الحبل ورجع الحلة، لكن قال لي وين راجيك راجيك.
فكرتا جادي والله أسعى الخروف دا يعني ما أضبحو، أخليهو وأعرس ليهو وأخليهو يكون أسرة، ويشوف مستقبلو، لكن ما عارف شايف القصة دي ما جاية، زاتو الخروف رافضا شايفو، من امبارح يدوبي خلاص عارفها النهاية ..
فص ألماظ مركب فوق مجمر
فص عينيك يا ام خشماً متمر
فوق بستان تحت سالك مضمر
جليدك طاقة الكيدي المنمر
خليتو والله يحنن، دقس هو ولا انا الدقستا ؟
.
ود شاموق
doma
Elmosley
willeim andrea
nazar hussien
bit barber
وجن
سجيمان
فيس بوك
تويتر
انستقرام
يوتيوب
بنتيريست