ونحن صغار بنلعب في التراب ونتجاري من هنا لهناك مرة نلعب كورة ومرة دسوسية ومرات ام الحفر او كمبلت وفي نص الحي ومع المغارب مافي لعب وتسمع الاصوات مع الازان تعال ياود وادخل استحمة وخليت سفنجتك وين والغبى اليازاك ويجي بكرة ونفس الحصل امبارح بعد المدرسة لعب البلي والفريد ما يديك الدرب يا اولاد انتو ما عندكم اهل ادخلو من الحر ده شيلو شنطكم دي يا ود ما تمشي يا ود انعل خاشك يا ود اسمع الكلام يا اولاد انتو مساهرين لحدي هسي مالكم ما عندكم مدارس قوموا من تحت العمود ده ما فيهو شي غير الحشرات قوموا كل واحد علي بيتوا سريع ما عاوز اشوف فيكم واحد هنا قسم بالله اللقي واحد فيكم هنا زي المواعيد دي تاني الله قال بي قولو اجازة الايام دي مدارس مافي بنات الحلة تسمعهم اريكا عمياء اريكا عمياء او الصج وبعد شوية الاولاد بعد لعب البلي يجو يفرتقوها للبنات عشان نلعب كمبلت وكده بالطريقة وبالليل تعال نلعب الرمة والحراس بس ياجماعة ما في واحد يربط القميص عشان الضرب بالزراير بيعوق وبكرة نلعب شليل وينو يا جماعة والله البرد شديد رجلينا دي اتشققت تعال يا ولد شيل الجلسرين ده امسح وشك ده الليلة الجمعة جنة الاطفال وسندباد والشارع هادي ناس هناي الفي الحلة عندهم ولدهم ظابط يا زول كتفو كلو دبابير دبابير شنو عنده صقر ومقص لابس ليك الاخضر ده وعنده سواق لما يكون نازل السواق بينزل ويفتح ليهو الباب شفتو لبسو نضيف ومكوي كيف والدبابير دي من دهب يا سلام انا غايتو لما اكبر عاوز ابقي ظابط في الجيش وده عاوز يبقي دكتور وده مهندس لكن كلنا لو بقينا ضباط احسن حبوبتي جابت لي من الحج لبسة بتاعت ظابط كاملة ومعاها مسدس..... حوارات دايما ما كانت تدور في زمن الطفولة رغم ان المواهب كانت متعددة فكان هذا رسام وذلك كاتب جيد في مواضيع الانشاء وهو شاطر في الحساب الا ان الجو العام كان كله يدور حول كلية الطب واحيانا الهندسة والجمهور عاوز ظابط كان هذا جيلي في السبعينات اخر جيل لعب بكورة الشراب والجيل الذي سرقت احلامه حوارات مهداة لكم جميعا خاصة اخونا ميدو واخي محمد الذي يناوشه كابوس دفاعنا الشعبي ياهودي عبدالرحيم ابايزيد
الحبيب عبد الرحيم مرحب بيك بيننا فقد عشت مع خريجى الهند فترة من الزمن فى ميرلاند فوجتهم نعم الاخوة و الاصدقاء و و احببت فيهم تكافلهم و تعاونهم فهم مثلا اذا قرر زميل منهم الزواج فى خلال ايام يكون كشفهم اكتمل بمشاركة كل زميل بمبلغ 500 دولار و كذلك فى حالة الوفاة فمرحبا بك فى بيتك
01-23-2003, 09:32 AM
abdel abayazid
abdel abayazid
تاريخ التسجيل: 01-20-2003
مجموع المشاركات: 400
الاخ بكري ترحيبكم اثلج الصدور وشباب الهند دائما صاروا تلك القبيلة التي ننتمي اليها وتنتمي الي وطن الانسانية فالتحية لك وانت تقوم بهذا العمل والتحية لشباب الهند عبرك. عباس فداسي يا مهاجر والله انا بعاين للبوست وعجزت عن الكلام لكن انتظرني حاجيك سريع جدا لك الف تحية وتحية
01-23-2003, 12:22 PM
مهاجر
مهاجر
تاريخ التسجيل: 11-23-2002
مجموع المشاركات: 2997
اخونا عبدالرحيم كيف حالك مرحب بيك يا سيدي مع اولاد الهند فانت اهل لذلك كما عهدناك ثوري وطني غيور ولك خالص شكري استاذ بكري بالنيابة عن ابناء الهند ودا من طيب معشرك معهم ايضا
01-24-2003, 12:31 PM
abdel abayazid
abdel abayazid
تاريخ التسجيل: 01-20-2003
مجموع المشاركات: 400
كانت القطعة التي كتبت عبارة عن بداية محاولة لتحليل شخصيتنا السودانية من زاوية مختلفة ىعني ونحن صغار كيف كان الكبار يتعاملون معنا ؟ وهل ده عنده اثر علي حياتنا وحياة البلد؟ وكيف كنا نتعامل مع بعضنا وهل نظرتنا لبعض عملناها نحن ام في عوامل تانية؟ نمشي نفرتك.. للبنات الحجلة... ده بيعرف انشاء وبيكتب كويس لكن عاوز يبقي دكتور... ناس هناي ولدهم ظابط الدبابير تلمع والسواق يفتح ليهو الباب حبوبتي من الحج جابت لي بدلة ظابط ومسدس انا عاوز ابقي ظابط...... نقاط حقيقة او حوارات طرحتها اتمني ان تفتح ابواب نقاش وحتي نتفادي ذلك في اولادنا السمر ويبقو افراحنا البنمسح بها احزان الزمن
01-25-2003, 11:58 AM
abdel abayazid
abdel abayazid
تاريخ التسجيل: 01-20-2003
مجموع المشاركات: 400
طبعا الكلام ده لايشمل كل الناس لكن يمكن الاغلبية نظرة المجتمع للبنت واقصد المجتمع السوداني وانها اقل مننا ده الذي جعلنا نمشي نفرتك الحجلة او البربرة ونجعلهم يشاركوننا لعبة اخري وليس العكس اتو هن وفرتكو البلي وجعلونا نلعب معهم وبعد شوية العلاقة ذاتها تنتهي بعد الناس تدخل المدارس وتفوت مرحلة سنة ثالثة ابتدائى يظل التعامل بين الولد والبنت معدوما والبنت خروجها الي الشارع يظل محدودا المدرسة والبيت ومراسيل الجيران وطبعا المدرسة اولاد او بنات ومافي اختلاط تاني البنات والاولاد ما يلتقوا الا يمكن في المراحل التعليمية المتقدمة فتخيل التعامل حيكون كيف والبنت دي اذا عندها هوايات حتظل حبيسة البيت او دفتر الزكريات وما افتكر ان عندنا بنات مشو النوادي وهم في سن الشباب فالاولاد هم البيمشوا بالرغم ان النادي يحمل لافتة نادي اجتماعي ثقافي رياضي فنظرة المجتمع لاتري مجال لاجتماعيات ولا ثقافيات ولا رياضيات في النوادي تخيل لو كنا انا واختي نذهب الى النادي سويا او والدك ووالدتك بعد شاي المغرب ذهبوا الي النادي وعمتك كانت ريئس لجنة النشاط بالنادي؟
01-25-2003, 05:49 PM
abdel abayazid
abdel abayazid
تاريخ التسجيل: 01-20-2003
مجموع المشاركات: 400
ما شايف في زول كتب رد يبقي الناس كلها موافقة علي ان جزء من الحصل لبلدنا سببه التربية والبيئة التي قمنا فيها عشان كده الناس لو بتحلم بوطن خير في المستقبل مفترض تربي اولادها وبناتها علي اشياء تخليهم يحترموا بعض وتعمل من اجل ذلك يعني لو معنا واحد من المهتمين بالتعليم مفروض يدعو الي فتح المدارس المختلطة في السودان كبداية.....
01-25-2003, 05:49 PM
abdel abayazid
abdel abayazid
تاريخ التسجيل: 01-20-2003
مجموع المشاركات: 400
ما شايف في زول كتب رد يبقي الناس كلها موافقة علي ان جزء من الحصل لبلدنا سببه التربية والبيئة التي قمنا فيها عشان كده الناس لو بتحلم بوطن خير في المستقبل مفترض تربي اولادها وبناتها علي اشياء تخليهم يحترموا بعض وتعمل من اجل ذلك يعني لو معنا واحد من المهتمين بالتعليم مفروض يدعو الي فتح المدارس المختلطة في السودان كبداية.....
01-25-2003, 08:44 PM
abdel abayazid
abdel abayazid
تاريخ التسجيل: 01-20-2003
مجموع المشاركات: 400
ناس هناي ولدهم ظابط ونحن صغار والبلد يحكمها العسكر وطبعا الظابط زي ما بقولو يجي لابس ليك نظيف ومرتب والدبابير تلمع وبعدين اي حاجة معدومة هو بيجيبها ولو من سقط لقط وده نحنا بنعاين ليهو والتلفزيون كله القائد والكشاف الاعظم والاول وبقت الاحلام كلها جياشة وصفا وانتباه والي الخلف دور ومن الوقت داك ما مشينا الي الامام سر وبقت ثقافة الناس البلد دي عاوزة ليها عسكري يظبطها ليك ظبطة وبعد ما وعينا بداء ينمو شفنا مع الناس ان البلد ما بتتقدم الا ننتهي من عقلية العساكر دي اي من ولوجهم وتهجمهم علي السلطة ومن مظاهرة الي اخري والناس التانية من معتقل الي اخر وجاي جاي صلينا صبح الخلاص حاضر وكانت مارس ابريل وعشان نخلص وكان الهم السفاح وعلي غفلة خطط الظلاميون لياتوا برجل صام ثلاثة ايام لانه نكص العهد امام سفاح تلطخت يده بالدماء أمام ألأستجابة لشعب بكامله ذبح الكرامات لازالته للكابوس وكان هو الظابط الذي امتلاء كتفه بالمقصات التي اول مافعل بها قص احلام الشعب وقطع الطريق امام جيل باكمله
01-25-2003, 11:35 PM
abdel abayazid
abdel abayazid
تاريخ التسجيل: 01-20-2003
مجموع المشاركات: 400
كان ذلك الطابط هو المشير او المؤشر عبدالرحمن سوارالدهب والذي بمقصه تفصلت قوانين انتخابية تروق للجبهة الاسلامية وتقطع لها شريط دخول الجمعية التاسيسية وتقطع احلام الشعب الذي كان يتطلع لقيادات شابة ومتقدمة تتخذ قرارات ترمي بسارقي قوت الشعب الي مزبلة التاريخ وتعطي لكل ذي حق حقه قيادات شابة هتفت العار العار يامستشار ولن تحكمنا حكومة الجبهة لكن جاء المشير بالمستشار وجاء المستشار بالمشير فلك يوم ياسوارالدهب والويل الويل ياسدنة
01-25-2003, 11:50 PM
Elmosley
Elmosley
تاريخ التسجيل: 03-14-2002
مجموع المشاركات: 34683
دكتور سلامات وتسلم محاولات عشان نطلع ما في داخلنا من مكتوم وديل حطموا امالنا لكننا سنسير مش لو جو بدبابة حقيقة ما فهمت ابو السيد دي في غناء شغال وانا ما سامع ولاشنو
01-26-2003, 01:05 AM
Tumadir
Tumadir
تاريخ التسجيل: 05-23-2002
مجموع المشاركات: 14699
وانتو سرقوا احلامكم بهناك ونحن كنا بنحلم بفارس احلامنا البجى ويجيب لينا الدهب والحنة منقوشة كيف والتياب ونجيب بنات ام لعاب ونلعبهم عروس وعريس ونعمل سيرة وحنة ونلبسهم الدهب لغاية ما اماتنا يجوا ينهرونا عشان نمشى نغسل العدة ولا يغسلوا لينا شعرنا ويدهنونا ونقدم الشربات للضيوف ونزاكر جوة البرندة مع بنات الجيران ونسمع الاناشيد ونتغالت فى ست فلانة معرسة ولا مطلقة لغاية ما يجوا اخواننا من كورة الشراب دى زاتها ويقعدوا يتفلهموا علينا ولا بيناكفوا لينا صاحباتنا ويورونا انه العالم بتاعهم حر وطليق وعالمنا محدود وضيق،
ولما تصبح الواطة نلعب الصج فى ضل الضحى وهودنا يا هودنا ونبردب تحت النيمة للحجلة واريكا عامية ، وبعد دة كلو نترسل لاماتنا ونساعدهم فى النضافة والبيوت والغدا ونقرا المجلات والكتب المستلفة ، الكتاب يبقى زى حجاب الفكى كلو شروط وكتابة وتزكارات ومن فلانة الى اعز صديقة والزكرى ناقوس يدق فى عالم النسيان ولمن يظهر كتاب جديد فى الحلة يبدا دورة الاستلاف والتبادل والزكريات الباكية
واتسرقت احلامنا برضو، وحاميها حراميها
اهلا بيك وبى زخم زكرياتك والسودان نكبتو التربية عن حسن قصد
01-26-2003, 01:43 AM
abdel abayazid
abdel abayazid
تاريخ التسجيل: 01-20-2003
مجموع المشاركات: 400
وانتو بتلعبو في الشارع وبتجهزوا في الطبيخ علي علب الصلصة ونحنا نجي سايقين عرباتنا المصنوعة باتقان من علب اللبن فورمست او جالون موبيل واطاراتها ولا الدولية مصنوعة من سفنجات صينية ونضرب ليكم البوري تيت تيت ودعن عن ونقيف قريب لحلة الملاح ويا ولية ما سويتي الاكل وطاخ اصدم المنكت وادفق ملاح الويكة القاعد في النار من الصباح ذلك كان وكما قلتي سؤ وبحسن نية لكن لازم يتصحح وكلنا مطالبين بالعمل من اجل مستقبل اجمل لك التحية تماضر وسوف احاول المواصلة
02-01-2003, 02:02 AM
abdel abayazid
abdel abayazid
تاريخ التسجيل: 01-20-2003
مجموع المشاركات: 400
ونحن في عنفوان الشباب وبداية التكوين او التحديد وجدنا نفسنا في وسط الشارع وبعد ان غصبنا الي الخروج في تلك المسيرة الملوينية لمبايعة امير المومنين الامام القائد جعفر ابن محمد ابن نميري ونحن مبهورين بتلك الدبابير علي كتفه والاوسمة والنياشيين اللامعة نفاجاء به بجلباب وعمامة كالتي وضعت علي العملة الوطنية حتي يحيه الشعب كل ما يدخل يده او يخرجها من جيبه المهم في تلك المليونية السندوتشات الفاخرة التي اتت علي ظهر البكاسي والمثلجات وما كان لامامنا الا ان يهدينا يوما اجازة وبعدها بقليل يعلن تغير الزي المدرسي حتي لبسنا الدمورية وكما قالت حبوبتي لبسنا الدمورية حدادا علي رئيس الجمهورية بالرغم من اننا غصبنا في تك المليونية ام سندوتشات ومويتن باردة الا اننا كنا نحب تلك المظاهرات ام بومبان مكتوب عليه for negros and dogs وهتافات يا بوليس ماهيتك كم ورطل السكر بقي بكم؟ ولن يحكمنا طيش حنتوب...والشعب جعان لكنو.... والمساككة بيننا والبوليس الذي كان يتابعنا الي داخل حرمات منازلنا وكل يوم المظاهرة تكبر ونحن نكبر ونفهم الهتاف ونهتف مليون شهيد لعهد جديد ونواصل
02-07-2003, 00:05 AM
abdel abayazid
abdel abayazid
تاريخ التسجيل: 01-20-2003
مجموع المشاركات: 400
المظاهرات بالليل وبالنهار الناس هايجة واي زول طالع في المظاهرات ومافي حد صار يمنعنا وكل يوم تزداد التهابا والايام دي في اواخر مارس وابوعاج في امريكا قالوا مشي لعلاج هناك والناس في المظاهرات وازديادها وناس تسمع نشرة الساعة 3 ونشرة 6 ومترقبين خبر ونحنا ما خلينا لستك حائم في الشارع وكل يوم الفواصل بين الاحياء بتقل يعني المظاهرات امتدت بدل ما كانت مقطعة ومتباعدة صارت اقرب الي ان تلاصقت وناس الخرطوم كلهم مشوا نحو القصر ونفس الشي ناس امدرمان وبحري قطعوا الكباري ويوم وراء يوم المسالة صارت اكبر وفي الجرائد ظهر سوار الدهب قال كلام كده في ما معناه سنضرب بيد من حديد والناس طالعة وشكلهم كده لو ضربتهم بصاروخ ما حيعمل لهم حاجة اضرت وزارة التربية ان توجل الامتحانات للشهادةالمتوسطة التي كان محددا لها 7 ابريل وبدل البوليس في ناس لابسين مدني وراكبين بكاسي بقوا يجوا يطاردونا في المظاهرات قبضوا علي كم زول ومرات الناس كان بتحاوط البوكس الى ان يطلقوا سراح الناس المقبوضين والامور كل يوم تتفاقم المظاهرات تكبر وناس جاريين حمار ويهتفوا يا بثينة حمارك عينة وفي نص شارع القصر والبوليس صار مراقبا ليس الا وفي وجوه الناس ومع الهتاف تعرف تعبيرهم القوي عن معاناتهم وعاوزين يصلوا لحاجة ونحن في نص تلك المظاهرات نلتقط الهتاف تلو الاخر والي اللقاء
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة