|
|
 ام درمان تحتضر
|
لا حبذا أنت يا ام درمان من بلد أمطرتني نكداً لا جادك المطــر
من صحن مسجدها حتى مشــــارفها حط الخمول بها واستحكم الضجر
ولا أحــــــب بلاداً لا ظلال لــها يظلها النيم والهجليج والعشر
ولا أحب رجالاً من جهـــــــالتهم أمسى وأصبح فيهم آمنا زفـــر
أكلما قام فيهم شاعر فطــــــن جم المقال نبيل القلب مبتكـر
ضاقوا بهمته واستدبروا جزعـــاً صمّ القلوب وفي آذانهم وقـــر
أكلما غرست كفي لـــهم غرســـاً كانوا الجراد فلا يبقى ولا يذر
المظهرون بيـــاض الصبح خشيتهم والمفسدون إذا ما صرّح القمـر
قميص يوسف في كفي أليح بــــه قميص يوسف لم يرجع لهم بصــر
ولا أحب نساءً إن سفرن فقـــــد تحجر الحسن والإشراق والخفــر
من كل ماكرةٍ في زي طاهـــــرةٍ في ثوبها تستكّن الحية الذكـر
يا بعض أهلي سئمت العيش بينكم وفي الرحيل لنل من دونكم وطر
ام درمان تتزوج
_____________
وعدتني بعد قربي منك بالولـــــد لكن كعهدك يا ام درمان لـم تلدي
قالوا :تزوجتها من بعد ما اكتهلت وأذبل الدهر منها زهرة الجســـد
وقال قائلهم: أنثى بلا رحـــــــم تهوى الرجال ولا تبقى على أحـــد
قد كان مضجعها قبراً لطائفــــــه من المحبين أفنتهم بــــــلا عدد
كم شاعر دنست فيه مشــــــــاعره وعاشق بات مطوياً على كمـــــــد
فارفق بنفسك من شعر تسطـــــــره للحيزبون التي تهوى ولا تـــــزد
محمد الواثق
|
|
 
|
|
|
|
|
|
|
|
امدرمان تحتضر (Re: EMU إيمو)
|
الاخت ايمان
ده نظرة غير صحيحة لامدرمان فامدرمان خالدة ولن تحتضر طالما انها حبلى وتلد وتجدد الاجيال جيلا بعد جيل امدرمان ستظل عريقة ونفخر بها نحن ابنئها
تحية لابوروف سلام لبيت المال تحية للمسالمة تحية لودنوباوى والموردة والعباسية وحى البوستة
| |
|
|
|
|
|
|
|
|
|
Re: امدرمان تحتضر (Re: ALMURADABI)
|
العزيز الموردابي
EMU male
محمد الواثق ، علم سوداني عمل محاضراً
ورئيس لقسم اللغة العربية بجامعة الخرطوم
في فترة السبعينيان ثم عميدلمعهد الموسيقى والمسرح
إرتبط اسمه بأم درمان كموضوع للبحث
تناوله الآخرون بالنقد وعدم الرضا
وديوانه ذو التسع قصائد مشهور
ويا ليت الأمر إنتهى عند إحتضار ام درمان
هاك
جنازة ام درمان
قد أقبل النعش هات الكأس ما الخجل
كي لا نرى جثة ام درمان يا رجل
كي لا نرى نعشها تمشي الرجال به
منهم بطئ ومنهم مسرع عجل
إن فاحت الخمر مني في جنازتها
قد أشرب الخمر كيما تدمع المقل
فان ترى الدمع مني جد منهمل
لقد بكيت عجوزاً ساقها الأجل
وهالني دفنها في لفح هاجرةٍ
تكاد من وقدها الأكفان تشتعل
وهالني أن يقود النعش ذو صلف
مستأسد يتقيه الفارس البطل
والناس تهمس خلف النعش مرجفةً
لا تستحي إذ رماها الحادث الجلل
هذا الذي أورد ام درمان مهلكةً
قد كان يقهر وام درمان تحتمل
حتى إذا ماتت ام درمان من غصص
يعود يبكي عليها ثم ينفعل
| |
|
|
|
|
|
|
|
|
|
Re: امدرمان تحتضر (Re: EMU إيمو)
|
وهي رمزية..تمثل العشق الطاغي..والإسقاطات تحتاج
لمعرفة الإطار الزمني الذي قيلت فيه والجو السياسي
الخانق الذي دفع بالواثق لأن ينعي أمدرمان ويهجو من
خلالها الوضع السياسي كله..ويماثل الواثق في ذلك شاعرنا
الحبيب عمر الدوش عندما قبل على أمدرمان وصورها بأنها
سكرانة تترتح وتقع تتكوم في الشوارع..أمدرمان وسمومها
أمدرمان وضل ضحاها..أمدرمان وزقاقاتها وإنداياتها
أمدرمان هي دائما "حمالة وجوه" زي ما بقولوا الجبهجية
| |
|
|
|
|
|
|
|
|
|
امدرمان تحتضر (Re: EMU إيمو)
|
اولا عفوا
الاخ ايمو الشاعر محمد الواثق اسف لو قلت ليك انو ما من امدرمان الاصلين لانو ناس امدرمان هم البيحيو امدرمان والحمد لله امدرمان حية ترزق وستظل علية فوق الهامات
امدرمان بعد ود الريح وعتيق وابوصلاح مسكو الراية ناس الدسوقى وغيرهم والان فى الكتيابى وهاشم صديق وغيرهم
معا انا وانت وكلنا نفخر بامدرمان
القرقوووور
| |
|
|
|
|
|
|
|
|
 Re: امدرمان تحتضر (Re: ALMURADABI)
|
امدرمان رغم المظار الدخلت عليها ما زالت محافظة علي رونقها وبساطتها اصالتها ورقتا وناسا الطيبين وزي ما قال بناديها الرمزية للفترات .وامدرمان ما بتحتضر حية ترزق بي تراثا بي شعراءها بي منتدياتها بي معالما التي ما زالت سامقة عالية يشار اليها بالبنان اخي ايمو هل انت من ابناء امدر العريقة ؟؟؟ واذا لمن تكن اذهب الي رجل كبير يسرد عليك تاريخ امدرمان ومن بعد اذهب لي اي شاب تجد انهم جميعا يحبونها بعمق لدفئها وحنانها .اخي ايمو لاحظ حنان امدرمان يظهر عند دخولك امدرمان بعد دخولك من الكبري القديم يهب عليك عليل الهواء محملا بكمية الحنان الذي بكلمة امدرمان فكيف هي تحتضر اجبني اخي .
حبي ليك فاق الظنون
واحساسي باقي مع الزمن
| |
|
|
|
|
|
|
|
|
|
Re: امدرمان تحتضر (Re: ALMURADABI)
|
الأستاذ بناديها لك التحية
يقال إن فكرة ديوان ام درمان تحتضر
كانت محبوسة في صدر الشاعر منذ مطلع الستينيات
وشرع في كتابة ديوانه المثير للجدل عام 1968
وفرغ منه في أواخر عام 1972 ما عدا القصيدة
الأخيرة في الديوان وهي جنازة ام درمان
والتي فرغ منها في مايو 1973
ونظراً للظروف التي ولد فيها الديوان
والأطوار التي مر من خلالها
ثم الكتابات النقدية المتمثلة في
نقد التجاني عامر للوزن والقافية
السماني الشيخ الحفيان صاحب ديوان ام درمان الحياة
والدكتور صلاح الدين في كتابه فصول الأدب والنقد
وأصوات النساء التي ارتفعت إحتجاجا
ولهذا لا يمكن ان يكون الديوان جاء رمزاً لشئ في نفس الشاعر
مثلاً قصيدة نساء ام درمان
وربما الرأي الأرجح هو ان الشاعر أراد الخروج
من جلباب الأدب ذو المقاسات القياسية
وأراد أن يفصل جلباب بقالبه الخاص وقد نجح في ذلك
على الأقل في تلك الفترة
________________
من هم ناس ام درمان الأصليون؟
كل السودانيون ينتمون لام درمان
وهي فخر لنا كما قلت يا موردابي
| |
|
|
|
|
|
|
|
|
|
Re: امدرمان تحتضر (Re: EMU إيمو)
|
محمد الواثق تعين عميدا لمعهد الموسيقى ونحن طلبه وهو رجل عندو
عقد واسائته لى امدرمان ما هى الا كل اناء بما فيه ينضح ونحن
فى امدرمان ما بنرضى فيها وقول ليه يكفيك رد بت امدر وكان
ردينا نحن رجال امدر والله فى الكبجاب ما يسكن .....
ونحن عارفين ليه بكتب كدى .....
المهم مره استكيشناهو دخل عليه زملاء من الاتحاد وطلبوا
منو ميزانيه لتاجير لورى لنقل القلفونيه من المخزن لى امر يخص
قسم المسرح ووافق على التاجير بكل عدم معرفه لانو القلفونيه ده
صغيره جدا وهى لى نظافه قوس الكمنجه وهذا الموقف كان يدلل بانه
معين لى جهه لا يعرفها ولا يعرف تفاصيله ....
حمزة
| |
|
|
|
|
|
|
|
|
|
امدرمان تحتضر (Re: EMU إيمو)
|
الاخ ايمو
الاجابة من هم ناس امدرمان ناس امدرمان اكيد ماهم ناس محمد الواثق
ناس امدرمان هم اهل الحارة
ناس امدرمان هم شيالين التقيلة
ناس امدرمان هم المناطلين
ناس وناس امدرمان هم وهم وهم ...........
الاخ حمزة سليمان رجل بعقلية ذلك محمد الواثق هل ممكن يكون من امدرمان ... اكيد لا .
وشكرا ليك يا بت امدرمان وانتى نموذج ارد بيه على ايمو انو ناس هم زى بت امدر غيورين على امدرمان حبها الطاهر بيجرى فى دمئهم
وانا امدرمان دئما علية فوق الهمات
القرقووووور
| |
|
|
|
|
|
|
|
|
|
ويظل السوال من هم اهل ام درمان (Re: EMU إيمو)
|
الاخوة الاعزاء السلام عليكم ورحمة الله
حقيقة الواحد بيتابع فى البورد دا ليه سنين ومابيرد الا فى المواضيع البيحس انو ممكن الناس تستفيد منها ,,حقيقة الكلام طال او بالمعنى الاصح طولوه ناس امدرمان عنها,,حقيقة الزول بيشعر بى عنصرية غريبة جدا من ناس امدرمان لى منطقتهم ودا من حقهم وحق مشروع دا لو اكتفو بالاطراء بس لكن المشكلة انو كل مايتكلمو عن امدرمان بيحاولو يهمشو باقى المدن وبالاخص الخرطوم وبحرى ولينا كلااااام طويل جدا عن الاستماتة دفاعا عن الخرطوم ,,والواحد حسه انو ناس امدرمان ممكن يدافعو عن امدرمان لى درجة الاساءة للاخرين زى ماحصل من الاستاذ حمزة سليمان تجاه الاستاذ الواثق وعهدنا بيك مبدع يااستاذ وليس ناقد ساخر تبحث فى ماضى الرجال,,الاستاذ الواثق كتب ماكتب وهى فكرته فاكتبو ودافعو عن فكرتكم من غير الاساءة لى شخص,,ولم اتكلم د عبدالله حمدناالله فى امدرمان مصنوعة وفى حقيبة الفن هاجت الدنيا وماقعدت لانو اطاول على الحقيبة ورمزهاامدرمان مع انو نحن ماشايفين اى اساءة فى الكلام دا بل كلام علمى مثبت فى التاريخ,,ودائما المتابع لى احاديث ناس امدرمان بيجدهم بيتكلمو عن الدف والحب والشهامةوالمرؤةوكانهافصلت على امدرمان دون مدن السودان الاخرى,,تاكدو يااهل امدرمان انو اى حاجة بتتكلمو عنها موجودة ومتوفرة فى كافة ابناء الوطن الخالد فى شرقه وغربه وجنوبه وشماله ودى الصفات الكونت الشخصية السودانية الاصيلة واذا او انتو بترو امدرمان مميزة فتميزها دا جا نتاج تلاقى كل الاجناس من السودان فيها ومعشان الصفات الانتو بتتخيلو انها حكر عليكم,,فى الاخر الواحد بيتمنى انو كل سودانى يحب البلد دى كلها موش على قدام بابه واذا حباها بى طريقة ناس امدرمان بنتمنى منو انو مايسى باقى الناس ويوصفهم بالدخلاء والغرباء وغيرها من النغمات البنسمعها اكتر من نغمات الموبايل فى كلام ناس امدرمان عن المدن الاخرى
وليكم ودى واحترامى وتقديرى مع دوام التواصل
ودالديم
| |
|
|
|
|
|
|
|
|
 Re: ويظل السوال من هم اهل ام درمان (Re: wadaldeem)
|
ود الديم اخوي انحنا ناس امدرمان ما معناها ضد الخرطوم او بحري وهي كلها مدن حبيبة لي نفوسا حقيقتا وامدرمان بنعني بيها رمز للوطن بي كل مدنو لكن اي فينا شوية عنصرية لانو امدرمان ما زالت محافظة علي العادات والتقاليد السودانية الاصيلة رغم انف المظاهر البقت في البلد.لك مني كل التحية ولكم ابناء امدر الابية
يا بلدي يا حبوب
| |
|
|
|
|
|
|
|
|
|
امدرمان تحتضر (Re: EMU إيمو)
|
الاخ ود الامين انتا لما تتكلم عن امدرمان كانك اتكلمت عن جميع السودان وامدرمان ما عنصرية فسكان امدمان حعليون وشوايقة ونوبة ودينكا واقباض وكمان فى الهنود فى اكتر من كده قومية اكيد لا
حبنا للسودان بيبداء من حبنا لامدرمان وسوف نظل نحبها ونفتخر بيها ونتباهى بيها لانها هى الدم البيجرى فى شراينا
ولو سمح لى الاخ حمزة ارد نيابة عنو لغاية ما يرد هو
اخونا حمزة طرح شى حصل حقيقى من وجههة نظرو وشى واقع ومعاش وده حق من حقوقو افتكر انو زول بعقلية محمد الواثق يكتب ويقول امدرمان تحتضر .
بعد محمد الواثق ده بيشكل شنو فى خارطة الشعراء ابدا انسان بيحاول يبحث عن الشهرة بتلطيخ سمعة امدرمان والاساءة ليها وفى الحالة دى نحن بندافع عنها بكل السبل المشروعة والما مشروعة
وستظلى يا امدرمان دوما غالية جدا فى نظرنا
القرقوووور
| |
|
|
|
|
|
|
|
|
|
Re: امدرمان تحتضر (Re: ALMURADABI)
|
الاخ ود الامين
لك التحيه
اولا نعم انا امدرمانى حتى النخاع فلم تلغى امدرمانيتى باقى
خارطتى والى الان لم اغنى لى امدرمان بقدر ما غنيت يا جمال النيل
والخرطوم بالليل وكونى اعلن انتمائى لى امدر فهذا شى خاص يخصنى
واعلن لك الان حبى لى امدرمان فلم اقل الخرطوم تحتضر او تكلمت عن
انسان بحرى او الخرطوم ...
فانا تكلمت عن نظره الشاعر لى امدرمان الذى لم يرى فيها غير
زبولها واحتضارها...
اما عن موقف ادارى فهذا موقف برقراطى ادارى حدث ايام عمادته
وحاولت ان اثبت ان موسسسه معهد الموسيقى لا يستطيع ادارتها الا
بنوها ...
فنحن ناس امدرمان بندى الرجال والمناطق حقها فحرى بهم ان
يبادلونا الشعور ....
واحتضارها
| |
|
|
|
|
|
|
|
|
|
Re: ام درمان تحتضر (Re: EMU إيمو)
|
الاخ القرقور
تحيااااااات
فى الحقيقة والله كلامك صاح الواحد لم يتكلم عن امدرمان كانو بيتكلم عن السودان كلو لانو ناس امدرمان بيتكلمو عنها اكتر من كلامهم عن السودان ,,ياموردابى بتفق معاك انو كل القوميات والقبائل القلتها موجودة فى امدرمان وعايزك تتفق معاى انو نفس الاجناس والقبايل برضو موجودة فى باقى المدن يعنى مامحصورة على امدرمان ونفس الهجين بتاع الاجناس دا بيتوفر فى اكتر من مدينة فى السودان زى شندى فى الشمال والابيض ونيالا فى الغرب وبورسودان فى الشرق اذا استثنيا الجنوب لى ظروفه الخاصة وبرضو مابتلقى اهل المدن دى بيتكلمو عن القوميات دى لى سبب بسيط انو المناطق دى ماحصر على زول معين ولا جنس معين عكس ناس امدرمان المصريين انو يقنعونا بى شخصية قومية امدرمانية,,والبرضو مصرين انو يطلقو كلمة الدخلاء والغرباء على الناس التانية او بالمعنى الاصح المامستوطنين امدرمان,,الاخ موردابى ههههههههه والله الواحد متوقع الرد يجى سرييع من الموردة لانهم اقرب ناس لينا,,,,والله الواحد اصلو ماعندو راى فى حبكم فى امدرمان بس ماتحاولو تسلبو الباقين حقهم من الصفات الربنا خصصها لى ناس امدرمان
ودمت
اخوك
ودالديييييييييييييم
| |
|
|
|
|
|
|
|
|
|
امدرمان تحتضر (Re: EMU إيمو)
|
الاخ ود الديم
اولا بشكر فيك روح النقاش الحلووووة دى
بختلف معاااك فى روح القومية الموجووودة فى امدرمان مازى روح القومية الموجودة فى اى مكان فى السودان لانو الاجناس الموجود فى امدرمان تقريبا لامة كل السودان ودى حقيقة السودان كلووو بيشهد
بذلك لانو امدرمان هى العصمة الوطنية والمفروض موش ناس امدرمان هم البفتخرو بامدرمان المفروض كل السودان يفتخر بامدرمان لانها مثال للوطنية القومية فى السودان .
بعدين معاااى انو الشاعر محمد الواثق جنى على امدرمان حين قال انو امدرمان تحتضر .
وشكرا ليك وعلى روح النقاش الحلووووة مرة تانية
الموردابى
| |
|
|
|
|
|
|
|
|
|
Re: ام درمان تحتضر (Re: EMU إيمو)
|
الاخوة الاعزاء قرقور الاستاذ الرائع دوما بروعة اهل السودان حمزة,,حقيقة اسف اذا ادخلت فى موضوع عميد معهد الموسيقى والمسرح يعنى قزيت عودى فى ارض غيرى وانا مابدافع عن الاستاذ الواثق لانو صراحة مابعرفو ولا سمعت بيه قبل كدا لا منكم هسه لكن زى مانو اديتو نفسكم الحق فى انكم تدافعو وياريت تدافعو بل تهاجمو هو برضو ادا نفسو الحق دا,,وانا ماقصدت فى حديثى شخصك الكريم استاذى حمزة ولا قصدت حريتك فى حبك لى امدرمان بقصد ماقصدت كلام ناس امدرمان عامة الغير رسمى يعنى التحت تحت زى مابقولو والمابيبدو نقاش حول امدرمان الا يهاجمو باقى الناس حتى يبدو يسردو لينا فى الحضارة والعراقة ويجيك الكلام لى كرش الفيل ولحمة الراس وغيرهو من الكلام البيقولوه عن الخرطوم ,,دا كلو بقولو لامتداد لى نقاشات كتيرة جدا عن امدرمان مع اخوة واخوات اعزاء جدا جدا واهل واحباب ودائما لمن نتناقش بيبدو بالهجوم عن الخرطوم رقم انو نادر جدا انو ازكر زول هاجم امدرمان لله فى الله كدا يعنى حتى باقى المناطق اذا اتناقشو فى خصوصية منطقته مابتتناقشو بى طريقة التقليل من الاخرين ,,لك الود قبل ان ترضى وبعد ان ترضى حتى ترضى استاذنا حمزة فى خصوص موضوع المعهد فانتم ادرى باوضاعه وانتو اهل وجعته وياقرقور يعنى عشان البحر قام تقومو تغلو السمك؟ ليك التحية ياموردابى فى روحكم الحلوة برضو فى الردود واختلاف الراى لايفسد للود قضية
ودمتم
ودالديم
| |
|
|
|
|
|
|
|
|
|
امدرمان تحتضر (Re: EMU إيمو)
|
الاخ حمزة والاخت بت امدر لكم خالص التحايا
حقيقة انوامدرمان حبها الطاهر بيجرى فى دمانا وبنفخر انو نحن من امدرمان وما بنرضو انو زول يمسها بشى
برضو يا بت امدرمان ويا اخونا حمزة دايرين لينا بوست نتونس فيه عن امدرمام كلنا كده اولاد امدرمان نجتر فية الذكريات والطرائف وكل واحد فينا يتكلم عن اتجه معين فى امدرمان
امدر اصالة وامدر حضارة
| |
|
|
|
|
|
|
|
|
|
Re: امدرمان تحتضر (Re: ALMURADABI)
|
عزيزتي بت ام در
إجابة على سؤالك ، أنا مستوطن بام درمان أليس من حقي؟
قلتِ : أذهب إلى من هو أدرى بشعاب ام درمان
يا سيدتي أنا أعلم جيداً ما هي ام درمان
ويسعدني جداً أن أتحدث إليكِ مقدراً كلماتك الطيبة
ومع احترامي لمشاعرك ام درمان ليست كما تتحدثين
رغم مكانتها الخاصة في صدري
الأخ هواري
أبشر ، سوف أفعل ما وسعت
الفنان حمزة سليمان
لك العتبة إن كنت أخطأت في نقل قدح في حق ام درمان
محمد الواثق فرض نفسه ووجد لشعره مساحة في الأدب العربي
بتجربته الفريدة عندما بحث الجزئيان في إطار الكليات وانتفى تعدد
الأغراض والتناقض والتبعثر في الديوان الواحد
العزيز موردابي
إذا كان ناس ام درمان هم كما ذكرت فلماذا وصفهم الشاعر بالثعابين
حين قال
قالت: وقد جئت لام درمان تأويني أما تخاف بها لدغ الثعابين؟
من كل ملساء لا يبدو لها أثر لا تقذف السم إلا بعد تمكين
ولا اخالك تنجو ان أصبت بها رقطاء لذعتها بين الشرايين
فارحل رحيلك إن الدار مهلكة تلك الثعابين من أعقاب فرعون
ثم يمضي قادحاً
نشدتك الله هل في الأرض متسع
غرباً الى فارس أو شرقاً الى الصين
شرقاً الى الصين أو من دون ذا بلد
فيه أحلّق أو قبر يواريني؟
فقد رأيتك يا ام درمان باخسة
مني العطاء عطاءً غير ممنون
وقد حبوتك يا ام درمان من كلمى
حكمة موسى جلاها نطق هارون
لكن وجدتك يا خرقاء معضلة
جمعت بين شريف الفعل والدون
هل من سبيل الى عقلي أظل به
قد انتسبت الى قوم مجانين
والبيت الأخير يدلل على ان الواثق ينتمي إلى ام درمان يا قرقور
وأيضا قوله
يا صوت دعني فما ام درمان منزلتي لولا الأواصر من عم ومن خال
ود الديم
يبدو أنك عزفت على وتر محتاج إلى قلفونية
ام درمان التي قال عنها الواثق هي التي
أخرج فيها التجاني يوسف بشير من الملة
حين قيل كفر ابن يوسف
| |
|
|
|
|
|
|
|
|
|
Re: امدرمان تحتضر (Re: EMU إيمو)
|
الاخ ايمو ارجو ان الفت نظرك انالمن قلتا ليك شوف زول من الناس الكبار ما عشان اقلل من قيمتك لكن بالجد لانو انحنا حبنا لي امدرمان غرسو فينا الناس الكبار ماقصدي اي حاجة من الزعل الجواك من كلامي وانا ماقصدي السؤال عن شعاب امدرمان بس الاحساس بتاع ناس امدرمان بيها انا غايتو امدرمان جواي زي ما بحكي عنها وبفتخر بي حبي ليها .وتاني انت كلامك بيناقض بعضو فكيف تحب شيء وتسئ اليه ام تسمع قول الشاعر :_
عين الرضى عن كل عيب كليلة وعين السخط تبدي للناس المساوئ
انا امدرما تامل في ربوعي
انا السودان
| |
|
|
|
|
|
|
|
|
|
Re: ام درمان تحتضر (Re: EMU إيمو)
|
الاحباء الامدرمانيون مساء المورده علي شاطي النيل والقمره هناك بين السماء والارض والاضاءه الخافته من شرق النيل العظيم وتلك الاشجار مابين النهر وشاطي امدرمان ومن مرسي ابوروف وتلك الصناعه العريقه والقديمه بقدم امدرمان ومن المسالمه في عصرها الذهبي لما كان ما كان فيها من الاعراق المختلفه ارمن .. سورين.. لبنانين .. هنود .. اقباط.. شوية طلايناوشوية اغاريق الخ الخ .. جورج مشرقي .. اجزخانة ابونخله العدني ... التيمان ونجي لاهل البلد التبيداب .. ابو مرين ... الجاك خليل الجاك .. الكوارته .. ملجة الخضار وبعد الساعه خمسه مساء مافي زول ببيع يعني املي قفتك وامشي وزريبة العيش وكل ذاك في منتهي التنسيق والجمال وللاسف زي ما ضرب الفقر مرافق كثيره في ربوع الوطن الحبيب اصاب امدرمان القديمه للاسف ذاك الوسط الجميل المنظم النظيف المتسع اصبح يئن من الزحمه والعفن ولا تاخذوني في استعمل الكلمه ... كارو ورقشه وناس ما تعرفهم جاين او ماشين وهذه حقيقه وانا لا اقول امدرمان تحتضر بس اقول لا بده من اعادة التنظيم والتنظيف من اكوام الغبار والطمي الدفنت الشوارع الاسفلتيه وازلة ما كل هو عشوائي وغير منظم حتي تعود لحبيبتي ذاك الرونق الجميل والرشاقه المعهوده .... وبالرغم من تلك الفوضي يبقي الامدرماني هو الامدرماني كيف لا وامدرمان الحب والحنان وطبعا لا انسي تلك الاشراقات وتلك الشوارع بالمقايس العالمه الكبري الجديد والشارع الدائري الجديد والكونيش وقولدن قيت وتلك المدن الجديده الجميله ... فرايكم شنو في انتفاضه وعمل لتجديد جمال امدرمان عاصمة الكل الوطنيه ودمتم احبتي
| |
|
|
|
|
|
|
|
|
|
امدركان تحتضر (Re: EMU إيمو)
|
الاخ وليم اندرية
لك خالص التحايا
جد والله ذكرتنا امدرمان وجمال امدرمان وهيجت الشجون لينا برضو ما تنسى ود ارو ود البنا والقلعة ولو داير الشباب الحلوووو فى القلعة جنب ودارو وحى العمدة وودنوباوى وطلب فوووول معتبر فى الجان معاهو بزيانوووووس ونكى هناك قدام على حى البوستة ناس الكتيابى ونمشى حى الامراء هناك الله عليك يا امدرمان
بخصوص النظافة والتنظيم فعلا امدرمان محتاجة لاعاة تنظيم لكن ده ما يمنع انو ناس امدرمان محنفظين بنفس القيم الجميلة للانسان السودانى الامدرمانى القديمة واهو التعمير ماشى بفضل جهوووود ابناء امدرمان
وليم اندريا ورينا انت من وين فى امدرمان علشان برضو وكلمنا عن منطقتكم علشان المدعو محمد الواثق يعرف انو امدرمان حية ترزق وحبلى بالمبدعين
القرقوووووووور
| |
|
|
|
|
|
|
|
|
|
Re: امدركان تحتضر (Re: ALMURADABI)
|
شكرا إيمو على تحديد البعد التاريخي..ولكنني ما
زلت متمسكا بالرمزية المطلقة التي جسدها محمد الواثق
في أمدرمان..وما زال الظرف التاريخي وتأثير الحقبة
الزمنية التي جادت بها قريحته بقصائد الديوان هي المقصودة
من خلال إستعارة إمدرمان وجعلها رمز..فأمدرمان أحتضرت في
أشياء كثيرة..تدهور مستوى كرة القدم في أنديتها فتدهورت
كرة القدم في كل بقاع الوطن وإتكى الفريق القومي..تكونت فيها
أغنية الحقيبة وانبثقت منها الأغنية السودانية الحديثة فغرز فيها
نقاد الهوية أنيابهم..أمدرمان التي نتحدث عنها هي أمدرمان المرسومة خريطتها في "ما هو عارف قدمه المفارق" ..امدرمان هي السودان..وناس أمدرمان مشرورين في الخرطوم وفي بحري وفي كل بقاع السودان
| |
|
|
|
|
|
|
|
|
|
امدرمان تحتضر (Re: EMU إيمو)
|
الاخ بناديها طبعا التردى حاصل فى السودان كلووو ما امدرمان براها لكن انا برى انو الشاعر جنى على امدرمان حين وصفها انها تحتضر فناس امدرمان لسة الاصالة متمثله فيهم ولسة حنية اهل امدرمان الزماااان موجودة من وجهة نظرى انو الشاعر تحامل على ام درمان
القرقوووور
| |
|
|
|
|
|
|
|
|
|
Re: امدرمان تحتضر (Re: ALMURADABI)
|
الاخ بناديها
لك التحيه
اولا بنعزم كل زول يرتاح على ضحكه عيزن فيها.....
هل القصيده كانت بستدعى الزكريات وهل مخاطبه الماضى بالاحتضار
وهل النظره الرمزيه من الزوايا الحاده التى يجب عليها تكفين
الواقع ؟ اخيرا لماذا هذه اللغه ؟
لك تقديرى
| |
|
|
|
|
|
|
|
|
|
Re: ام درمان تحتضر (Re: EMU إيمو)
|
الاخوة الاعزاء
لا اري في ما كتب شاعرنا الفذ محمد الواثق غير حب عميق لامدر
...فلولا حبه لها ما كتب فيها ما كتب
ما كتب الشاعر محمد الواثق اكبر من ان ينتقد هكذا ..و لا اري سببا في التجريح بهامة هذا العملاق
ولكم ودي
| |
|
|
|
|
|
|
|
|
|
Re: ام درمان تحتضر (Re: zoro)
|
عزيزتي بت امدر
نرجو ان تسامحيني على غبائي
توك صغير السن عن عقل الأرجل اترك كبار السن هم يعقلونه
لأني حاولت الغطس في الأعماق
والميه تكذب الغطاس
أختي الفاضلة ام درمان ليست هي مسميات رملية كما ذكر الأصدقاء
ام درمان هي
مهرجان الثقافة
تراث اجدادنا الأولين
التكافل
الترابط
الجود والكرم والطيبة
التاريخ
الملحمة
العز
النضال
النصافة والضيافة
كل هذه المفردات إن ذكرت مجتمعة نسبت لام درمان
فكيف بالله عليك أن أسئ لمفخرة الشعب السودان
فقط كل ما اردت أن أقوله :
حوافر الدواب
تراصع الأوحال بالحفر
بعض البياض الشاهق البعيد
ينحل فيها يمّحي في رغوة الصديد
الأستاذ بناديها
الألم الذي تجرعه الواثق مرارة
واحتضنه جرحا وكفكفه دمعة
قد ترك أثراً كحفرة اخدودية في صدره
ترجمها بإسلوبه الخاصه في ديوانه المعني
وانا لم أوافقك على الرمزية التي ذكرت من نظرتي
كمتذوق للشعر لأن كرة القدم في تلك الفترة لم تحتضر
بل بالعكس كان ذاك العصر الذهبي للكرة وعام 1972 خير شاهد
ولكن قل لي لماذا توترت علاقته بالجامعة
ولماذا اشمعلت مكايدة النساء له
ولماذا أقيد إلى سجن كوبر رغم انه لا ينتمي لأي لون سياسي
لماذا كسب تعاطف الشباب بتوسيع قاعدة الأدبية
وإلى الأمدرمانيون
لماذا لا تعتبرون هذه القصائد كموضوع دسم للبحث الموضوعي؟
يجب أن تسألون لماذا تعامل محمد الواثق مع ام درمان بقسوة؟
ودّع لميس وداع الواثق الخالي قد كنت من أمرها في أي بلبال
قد كان حبك أوجاعاً أكتمها وأزجر الدمع لا يهمي بتهمال
| |
|
|
|
|
|
|
|
|
|
Re: ام درمان تحتضر (Re: EMU إيمو)
|
Dear MEU and all, salamat
Seems that every body is jumping to the arms to defend his town or sport club or political party, and no body is prepared to listen or enjoy the pure beauty of poetry, or selfcriticism, or jokes. Mohammed Alwathig is one of our greatest poets and his other personal things have nothing to do with his real talent. I remember he wrote also in contrast about Paris mentioning his love there and, may be, reflecting on what we need to do, to make our beloved Omduraman also that attractive. Would you please post all that collection? I am afraid the mentality which made him so angry about Omdurman (Sudan in fact) is still alive and growing.. Banadieha seems to have got the deep meaning behind all this.
| |
|
|
|
|
|
|
|
|
|
Re: ام درمان تحتضر (Re: EMU إيمو)
|
للجـمـيـع الســــــــــلااااااااااااااام
و للجـمــيــع جمال أم درمان و كـل شـئ حـلـو و لـذيـذ فيها
إحـسـاس بنـحـسـو نـحـن لـم نـدخـل أم درمان حتى لو مشينا الخرطوم
ساعتين و رجعنا أول ما نصل كبري أم درمان المكسر دا بنحس بي راحـة
نفسية ما عادية .
إحساس نحسو لم نقعد نتكلم عنها و عن ناسها و عن أحيائها و عن كل المعالم
اللي فيها و اللي كانت فيها . و سخانة سجمانة مزحومة أي شئ
فيها هي برضو أم درمان .
يعني الشغلانية إحساس أكتر منها مناظر و مظاهر
ســــــلااااااااااااااااااام يا ناس أم درمان
و ســـــــلااااااااااااااااااااااااام مكعب لي كل ناس السودان
| |
|
|
|
|
|
|
| |
EMU إيمو
ALMURADABI
banadieha
HAMZA SULIMAN
willeim andrea
Ridhaa
ABUHUSSEIN
فيس بوك
تويتر
انستقرام
يوتيوب
بنتيريست