كتب الكاتب الفاتح جبرا المتوفرة بمعرض الدوحة
|
|
 يوميـات امرأة مُـفـلكـــبه
|
ميةمسا على الناس المدهشة
هي مجرد يوميات لإمرأة عادية
حاولت ان تدونها .. هلا قرأناها
لانها مؤكد سوف تحب ذلك .
يوميات من دفتر امرأة مفلكبة
هانذي انجعص في طاولتي .. وارتاح من هذه الهموم والهواجس التي تطاردني . يا الهي .. يقولون ان تدوين يوماتك لا تاخذ وقتا .. اذ تصبح مشكلتي انا على الدوام كيف اجد هذا الوقت الذي ادون فيه هذه الحياة التعيسة التي احياها . عندي احساس انني ربما اصبح يوما إمرا’ عظيمة وساعاتها سوف يتهافت الناس على مذكراتي . لا كل الناس ايتها الغبية .. اما زلتي تجهلين الفرق بين الناس وكل الناس .. لا لا ما علينا .. دعونا من هذه المغالطات التي غطست حياة (راجلي) الله لا يعطيه عافيه محل ما قبل . اين هذا الشقي ؟ .. اكيد انه مازال يفعل الاشياء نفسها .. يظل طوال نهاره يخرمج في وزارة المويه .. اهذا هو اسمها يا امرأه ؟… لطفا بالله . متي اتخلص من هذه الافكار المشوشة .. ويخطف من هذا ويوعد ذاك انه حالما ما يقبض ثمن الهباب الذي يتعاطها سوف يكون تماما التمام ويصبح في امكانه ان يتجاوز كل الخطوط الحمراء ويخفض له فاتورة المويه .. ماذ ا فعلت له وزارة المويه .. هاهو عدمان هفتان سكران حيران لا يجد ما يكفينا للحيلولة دون الموت جوعا .. فلتذهب المثاليات الى الجحيم ايتها المرأة التعيسه .. الا تريدين ان تأكلي .. الا تريدين ان تربي عيال السجم ديل ؟؟ ويظل يفعل ما يفعل ويقبض ثمنا لهذه التجاوزات فتافيت من القروش .. يغشي هذا (السوق) المعفن دا ويشتري لنا الخبز .. والخضار . وقليلا من… . اين الدكوة .. يا الهي . . الاولاد يحبونها عندما اخلطها لهم بالطماطم .. لمذا تأخر هذا الشقي .. يا ربي مشي وين . .الله يغيظه .. ديل ديل .. الله يكتلهم واحد وراي التاني . هوي يا امرأة .. الا تبطلين هذه الدعوات التي تودي في داهية .. اولاد جارتنا (سعاد) ياكلون أي شيء . امهم لا تتعب ابدا معهم .. لكن انا افضل طوال النهار .. تعال يا ولد اكل .. ماداير .. تعال يازفت اتسمم .. عامله لينا شنو ؟؟ وهذا الشنو.. ابدا لم اتوصل ابدا الى نهايتها.
ان اخبرتيهم انك طبخت باميه .. لعنوها مثل لعنة اليهود . وان كان بطاطس رفعوا ايديهم وشتتوا خلوك مع حيرتك ..وان ذكرت لهم انه ملاح اسود قالوا فيها ما لم يقله مالك في الخمر . الخمر ..الله يلعنك يا راجل .. بالله الراجل المسنوح دا .. لو القروش التي يسكر بها هذي جاب لينا بيها .. شنو يا ربي؟ . انا محتاجه ليهو .. بسم الله الرحمن الرحيم هسع انا ما كنت متذكراهو .. انا كان ناقصاني شنو يا رب؟ .. يا الله . . انشاء الله تطير حياتي انا . النسوان ديل عايزات شنو.. كلتوم دي الله لا اعطاها عافيه . دائما غير الشمارات الزي وشها دي ماعندها شغل .. طول النهار فاضية . تلف هنا وتلف هنا .. وتجيب ليك في الكلامات الفاضية .. قالت ايه . راجلي امبارح شاغلها . هوي يا سكينه لمي راجلك دا عليك !!.. سجمي مالو راجلي ياكلتوم عمل ليك شنو ؟ جاي امبارح سكران يترنح قال ايه .. قال لي راجلي : مرتك الوسخانه دي قاعد معاها كيف .. وراجلي العوير سمع من هنا وهاااك يا ضرب فيني . الراجل قرب يرمي علي يمين الطلاق .. طيب الدخل شنو مشاغلات راجلي ليك بي طلاقك انت يا مرأة يا عويره ؟ .. ماهو عاين لي كده وكده واتبسم ثم غازلني قال لي سنه يا الدفار .!! .وتنادت كل شايطين الدنيا امام عيني .وقعدت تنطط في وشي . والولد الصغير كان مزهجني اصلو .. يشيل وينوني ويبكي وينوح . ليهو ساعتين مخاتو سايلها ، نزله مزهجاهو وكما معاها قحة ، ويشيل ويبكي ويشيل ويبكي .. والمرأة العويرة دي صالباني ليها ساعتين بتحكي لي في عوارتها ديك .. والحلة حرقت .. وقهوتي التي حسبت الوقت وانا اتشتهي فيها ، حست وطفت البوتوجاز.. وتاني الغاز حلف ما يولع ؟ والكديسه نطت شربت اللبن بتاع الشفع .. والكهرباء قطعت … والولد ماشي يجيب انبوبة الغاز لي هسع ماجي .. بس اعاين ليك لي كلتوم العويره .. كويس وانط ليك فيها فرد نطه وهاك يا زعيط ومعيط .. وبالمفراكه هااااك يا ضرب .. نتفت ليك ريشها نتف وبرضو بطني ما بردت عليها .. واطلقت ساقيها للريح تنط من حيطتنا جيراننا و حلالها الحلا بله ..ومع اني اني كنت اجهل كيف حل بله روحه .. وهانذ الان فقط عرفت كيف حل بله نفسه .
يا الهي .. اشعر بدوار .. ما الذي اخر هذا الرجل .. والعيال ..الى الان لم يأتوا من المدرسة .. وهاهي الساعة الثانيه ظهرا .. ولم ياتي احدا..
ملحـــق احداث متأخرة بعد الثانية والنصف ظهراً
بالله دي طريقه . دي ؟ قالوا ايه !! نحن ناس الكهرباء . انا الاقيها من منو .؟. كلتوم ولا الاولاد الإتاخروا ولا الراجل دا ؟. قال بجيب الخضار والطماطم والدكوة والى الآن ما جاء ..؟
مسلسل الجن دا اتأخر كده ما لو .. هذه هي القناة الثانية .. كدي النقلبا .. ياها قناة الزفت .. خلاص خلو عوارتكم دي .. كل دعاياتكم بسكويت ودعاية صابون . ماعندكم غيرها .. الله ينعلكم والله زهجتونا زاتو وكرهتونا العيشه .. الواحد هسع لو ما بخاف الله يقوم يكسر فيكم التلفزيون دا .. هو أنا بتكلم مع منو يا ربي ؟؟ بس .. بلا يبلالكم … ياربي الراجل والشفع ديل اتأخروا مالهم .. انا يا ربي شربت القهوة . بس ..قهوة شنو . ما الغاز كمل .. والشافع ود الحرام دا ذهب ليأتينا بها لكنه تأخر لأمر ما . .تاني رجعت لي لغتك العربية الماعندها طعم دي .. انت لو كنتي ناجحة كان هسي دخلتي كلية الطب ؟؟ هاهاها اهاهاههههاا .. طب شنو يا سجمانه .؟ انتي لو كنت دخلت كلية الاداب . كان جيد ليك وجيد لامك .؟ لكن الراجل السجمان دا .. امشي منو وين ؟ . كان يوم اسود لما شافني وعرسني .. يا مسلسل يا زفت.. يا ناس التلفزيون يا وهم . ياعالم ياهووو .. ما تجيبوا لينا الزفت دي . امبارح فاتتنا ، الكهربا قطعت برضو الليلة عايزين تفوتونا لينا ليها ..
وانا في انتظار المسلسل وهواجسي وافكاري السوداء تحوم حولي .. اذ بهم يدخلون علي . مثل قطعة الشيطان . يحملون الشر في عيونهم مثل (تأبط شر) من هو تأبط شراً ذاك الذي ذكرتيه يا امرأة ..؟؟ هسع ان سألوك منه ماذا تقولين .؟ سوف اقول لهم هو تأبط شراً … جاء قاصد الشر عديل كده .. السلام عليكم .. بسم الله الرحمن الرحيم ، منو انتو ..؟ نحن ناس الكهرباء عليكم مليون ومئتيين وعشرين جنيه . . اها وبعدين افهم شنو انا يعني ؟؟ شنو العايزها تفهميهو ؟؟ يعني جيتوني مثل قطعة الشيطان وتقولوا لي في كلامكم المسيخ دا ؟ يا مرأة انتي مجنونه ؟؟ شنو عايزين نعمل شنو ؟؟ يعني ناس الكهرباء لمن يجيوكم وشايلين عدتهم ويقوموا يقول ليكم عليكم فاتورة قدر الليلة وبكره .. يعني حا يعملوا شنو ؟ اكيد ح يقطعوا الكهرباء .؟ شنو ؟؟ عايزين نقطع الكهرباء لمن تجي تسددوا العليكم بعدين بنجيبها ليكم .؟ وانتو ما قالوا ليكم احذروا ان تدخلوا على امرأة روحها محرقاها .. شفعها ما جوا . قهوتها دفقتها الكدايس . وانبوب غازها فاضي . وراجلها من طلعة الصباح لا بان لا هلا .. وجارتها عويره عديل كده ؟؟ ومع انهم كانوا ثلاثة رجال طوال عراض ، الا انني قمت بغلق الباب وانا في ضيقي وزهجي داك .. وتناولت الزعافة .. وكسرتها لنصفين وهرولت صوبهم وانا امحط ليك فيهم طاخ طاخ طوووخ .. اي اي يامرأة انت جنيتي كده دعينا نتفاهم .. ويتعالي صياحهم وكوريكهم . الحقونا .. وانا اتابع ضربي ومحيطي وسؤالي اليهم لا يتوقف : تاني بتجوا هنا ؟ التوبة لي حبوبة . الحقونا ... فكونا من المرأة المجنونة دي .
وهانذا عتقتهم وفكيتهم بس في قسم البوليس .. وما ان رأني الشاويش ذو الاربعة شلخات ، الا وانتفض في الرجال الثلاثة انتو الوداكم للمرأة المجنونة دي .. وانبري ناحيتي .. ماذا تعني كلمة انبري دي ؟؟
المهم التفت ناحيتي وقال لي بعدين معاك يا سكينه : نعمل ليك نقطة بوليص برااااك .؟؟ نحن ماعندنا شغل غيرك .؟؟
وهانذي اجلس وحيده افكر .. ياربي امشي ابلغ البوليص عن المجانين الماجو ديل ولا امشي المستشفي ؟؟
|
|
 
|
|
|
|
|
|
|
|
Re: يوميـات امرأة مُـفـلكـــبه (Re: 7abib_alkul)
|
شيرى بت قطرنا
أسلوب متفرد..ولغة بسيطة..وتصوير دقيق لواقع الصراع..وعصر الدكوة وكروت الكهرباء..يحمل البوست نقداً حادا لأشياء عديدة لمن يقرأه خلف السطور..عن نفسى فكيت وش الشاشة وقريت البوست
تحياتى
ودعزة
| |
|
|
|
|
|
|
|
|
|
Re: يوميـات امرأة مُـفـلكـــبه (Re: shiry)
|
شيري
ده كلو في يوم واحد انتو عندكم اليوم بي يومين ولا شنو هههههههههههههه يكه
بعدين ده كلو الراجل لسع ماجاء يعني لو الراجل والاولاد موجودين كان ح يكون شكل المذكرات دي شنو يارب
على العموم سرد مبالغ فيهو
نتمنى المره الجايه راجل السجم يكون موجود نشوف بعد ماتاكلي الطماطم ح يكون عذرك شنو تاني
باي
زاتو
________________
وراء كل كهرباء غير مقطوعه 000 سكينه
| |
|
|
|
|
|
|
|
|
|
Re: يوميـات امرأة مُـفـلكـــبه (Re: غدى)
|
شيري
بالله كان دمي فاير من الاولاد وابوهم قلت كدي
النخش البورد كان القي حاجه ارفه بيها
وبعد 3 دقائق بقيت اضحك ذي المجنونه
كتر خيرك علي فكه المزاج
اسلوبك شيق وممتع جدا نرجو منك المواصله
| |
|
|
|
|
|
|
|
|
|
Re: يوميـات امرأة مُـفـلكـــبه (Re: shiry)
|
جانا سوداني جديد من السودان
بعدين الجماعة كلهم كانوا مشغولين في المطبخ
وكانوا عاوزين دكوة
هو طبعاص مرمد ساكت قاعد
قالوا لازم يرسلوه البقالة عشان يجيبها
مشى وجاني راجع فاضي
قال والله بتاع البقالة قال ماعندووو
قلنا البقالات دي كلها مليانة انت قلت ليهو شنو
قال قلت ليهو { عندك فول حاجات }
| |
|
|
|
|
|
|
|
|
|
Re: يوميـات امرأة مُـفـلكـــبه (Re: shiry)
|
شيري
فرحي خلق الله واتجلي
انضمي رشي عبيرك فينا ... فينا
يا سلااااااااااااااااام
زمن والله من الهترشة دي
سنة يالدفــــــــار
سرد رائع ومرتب ومهترش على اصوله
سعيد بهترشتك
وسعيد بعودة الروح وجريان المياه
ابو حراز
بقيت من ما اشوف اسمك في موضوع
ادخل فيهو على طول
اسلوبك هو السهل الممتنع
بذكرني بالدردشة تحت العمود في الزمن الأخضر
ياخي فول الحاجات قطع مصاريني عديل كدا
تحياتي
| |
|
|
|
|
|
|
|
|
|
Re: يوميـات امرأة مُـفـلكـــبه (Re: shiry)
|
هوووووي ياشيري
الفلكبة المجوعصة حاجة عجيبة
اولا يحق لك تسجيل الملكية الفكرية لدى مجموعة المنتكل الشجري
او خلال المجموعة الاستشارية للمتجهجه الأممي
الفكر الجاخومي المفعوص يماثل الفلكبة المجوعصة في التغلل عبر المسامات الانكشاطية الهجومية التي ابتليت بها الجارة الفارحة وزوار الظلام قاطعي التيار مثيري الغبار
حكمة اليوم الطويل في حياة امرأة مستريحة
راجل الشرق جاب لي سرج
شمن سرج
سرج السدر
اول سرج السدر سرج
| |
|
|
|
|
|
|
|
|
|
Re: يوميـات امرأة مُـفـلكـــبه (Re: المسافر)
|
مية مسا على الناس
المدهشة
لست مهمة للدرجة دي ، لكن برضو مشغول
للدرجة الاكبر من كده
مثلا اليوم جمعة
والجمعة تعني االضيوف
والضيوف يعنو
ان هنالك استعداد وحركة ونشاط
والحركة والنشاط يخص فقط النسوان
والنسوان ديل انا وماما بس
وهذا يعني انني اعمل تحت امره ماما
وهذا يعني بصورة حاسمة
مساعدة في المطبخ
ومساعدة تعني ان امارس نفس الاشياء السخيفة التي لشد ما كرهتها
حتى انني كرهت اليوم الجابني بت
بس برضو كويس انك تكون بت
صاااح اقلاها في رجال سخيفين في الونسة
صاااااح . كذابين .. فشخارين على الفارغة
المهم انا مشغولة
لحظات مع صياح ماما واعود اليكم
وشكر خالص للناس الحلوين ديل
قرشو
حبيب الكل
حمزة سليمان
ود عــزه
الزول ذاتو
انسانه
غدي
زهره
ابوحراز
سنجاوي
روبينسون
المــسافر
خلوني كده انروق انفكه
من شبكه غسيل العدة
واعود اليكم
ابقوا معي
انتظروني
| |
|
|
|
|
|
|
|
|
|
Re: يوميـات امرأة مُـفـلكـــبه (Re: shiry)
|
شيرى
. أقرأ هذا النص ويستغرقني
. ما أبدعه ، أحس إني واحد من شخوص على (تخوم) النص
يعني جار ناس سكينة ديل وللا زميل راجلها في الخدمة العامة، المهم الناس ديل كلهم معرفة. الله يجازيك ياشيري إنت فعلا (جنينة)ومع ذلك أرجوك لاتتوقفي عن إمتاعنا
أسامة ـ أيوا
| |
|
|
|
|
|
|
|
|
|
Re: يوميـات امرأة مُـفـلكـــبه (Re: Tumadir)
|
ازيك يا رائعة شيري والله كمن داير اكمل الموضوع للنهاية لكن يا دووووب الباقي لي 4ساعات من زمن الشغل يعني ان شاء الله في الويكند حا اخلي القدامي والوراي عشان اجي اتحقر واقعد قدام الجهاز واكمل الموضوع.
شيري انت كنتي رئيسة اللجنة الشعبية بحيكم ولا شنو. عيني باردة.
ونحن في انتظارك يا مخملية الحرف ويا نيلية الروح.
استار
| |
|
|
|
|
|
|
|
|
|
Re: يوميـات امرأة مُـفـلكـــبه (Re: star)
|
مية مسا على الناس
المدهشة
هانذي اعود اليك مهترشه . مليانه نضمي
لكم مداد صداقتي
وحبي
قرشو
سيدي ..إنها الدكوة.. اتجهل الدكوة العظيمة .. السحرية .. مما اكون اكثرانصافا واقول انها شريان الانسان السوداني .. المبسوطين قبل البسطاء . وكفي .
اوعك تقعد تحت حيطة ناس سكينة المفلكبة .. اخشي عليك من جردل موية عدتها .. تعال اقعد تحت ناس حيطتنا ولاتعال اتفضل في صالونا .. غايتو الشاي بسويهو ليك …
حبيب الكل
والله يا حبيب الكل .. لسع ما عرفت المشكلة .. مازالت لديك وسيلتين للمساعدة
اتصل بي بصديق ولا اخد راي الجمهور .. الجمهور غايتو ما بثق فيهو ..
لكن ..حضر صديقك اللي حا تتصل بيهو . وامامكما 30 ثانية من بعد ما تبلش
حمزه سليمان
والله ياحمزه يا خوي . انت لسعة ما شفت فكلبه .. هل تصدق انو سكينه اغتربت شهوراً . لكنها حسمت رأيها ..
ود عـــزه
ود قطري .. او دفعتي .. لست ادري لكني احسني فعلا اعرفك ..
المهم .. الدكوة مثلما سبق وقلت .. سحريه الفوائد وصاحبه الالف وظيفة وشغلانه … يعني ما حل ما وديتها ابدا ما بتقصر معاااااك .. رغم انهم اخيرا .. حاولوا يطلعوا لينا فيها كل العبر .. الا ان الناس هناك تمسكوا بصحبتها … منهم من اقتنع بما قالوه .. لكنه رغم ذلك تمسك بصحبتها
ومنهم من لم يقتنع وقال ليك .. طيب كيف نعيش من غيرها . يجيبوا لينا البديل ونحن برضوا ما ح نخليها ..
سلمت ياخوي .. والله يرفع عضاك مثلما رفعت معنوياتي ..
الزول زاتو
هذا ما لم استطيع تصوره .. لكن يمكنني ان اقول لك ..لو الراجل والشفع جوا .. كان حقكم راح عيونكم ح تطشش عديل كده .. ويحلكم الحل الجماعة بتاعين العدادات ..
ميرسي اوي خالص لطلتك
انسانه
انشاء الله تكوني بس ما اتهورت وطبقتي فيهم النظريه .
نصيحتي اليك ان كان عيالك وابوهم يزعجونك .. تابعي يوميات المراة المفلكبة واكيد ح تتعلمي اساليب تستخدميها في حالات الطوارئ ضد الرجال النكدييين
سلمت يا اختي . وانا سعيدة بان كتابتي ادخلت البهجة في نفسك
غــدي
وانت تملكين ثوب انصع وخاشع . لا ادري لكن لدي احساس باني اعرفك .. كأن قرأت معك ..مثلا مثلا في كنبه واحده ..
تسلمي يا بت امي .. انا مثلك سعيدة لسعادتك ..وانشاء الله ما عدتمك
ابــوحــراز
عليك الله يا ابو حراز وقت هو مرمد وسجمان لي مرسلنوا .. يااااخي انتو حقارين وحات الله ..
ضحكت لمن فار صدري وانكتم وانا اتخيل الحالة التي يكون عليها صاحب البقاله .. وخاصة لو كان هندي واكيد اكيد هو هندي ..
ايش في صديق .. انت في عربي معلوم .. انت في روح في جيب نفر في مخ كويس سوا سوا
انا في مخ خراب .. قر قير كتير انا في يبغى ..
ياعيني على اللغة .. اقول ليك لو كان الهندي رباطابي وصاحبك يشيل ويتلايق عشان يوصل ليهو في حاجة اسمها فول حاجات .. واخشي انه اخبره (مررو) وهذا اسم اخر للحناكيش الذين يجهلون اسم فول الحاجات . حبوبتي تسميه كذلك ، أي والله (مرر-رو) . واستغرب من اين اتي هذا الاسم . ربما تكون لغة هوساوية . أي انه فول مدمس .. او دكوة .. والله اعلم ..
واتخيل معاي . (هداك الله ) ان الهندي اللي هو رباطابي من بومبي وروحو طلعت بعد ان شال وفهم في صديقكم داك .. ماذا يكون ردو..؟؟؟؟
شغلوا خيالكم معاااي . ايها الرباطاب .. ماذا يكون فعل قريبكم الهندي الرباطابي ؟؟
سنجاوي
انا الذي امتعتني كلماتك ودوختني عديل كده . حبه حبه علي يا ماااان زي ما بقول اخوي المفعوص ..
هترشتي . مضره نوعا ما .. اخشي عليها مني . اذ انني كثيرة الصداع مني ..
واخاف عليكم ايضا .. هل تستحملوني . اذ انني لا استحملني في بعض الاحيان
للانصاف والله مرات مرات ..
سلمت ياخوي .. للطلة ..ودائما اشعر بدف مشاعرك ونبضك الاخوي ..
سلمت ياخوي وانشاء ما اتحرمش منك . اقراها ياخوي بالمصري .. لانو ما في سوداني بقول كده .. I mean that
| |
|
|
|
|
|
|
|
|
|
Re: يوميـات امرأة مُـفـلكـــبه (Re: shiry)
|
مية مسا على
الناس المدهشة
روبينسون
يسعدني انني اسعدتك . بس دعواتك ربنا يبعد عننا الهم والغم ..
اوعك تقوم تعكسها . عارفاك شراني من الدرجة الامريكية
انت الناس البتفلقوا ديل . الله يكفينا شركم .. هسع يا ربونسون لو سألتك عليك الله الناس ديلك العايز تفلقهم ديلك عملوا ليك شنو ؟؟ ياخي انت شراني …
المسافر
مالك يا ود امي . كرع لي .. الولد ما اتجنن .. كرع لي صغير وجاهل
لكن والله ما تستاهل ..
دي من شنو ياربي .؟؟ اوع تقول لي انت من حلة سكينة .. اوع تكون الراجلين الجو يقطعوا لكهرباء ..
لست ادري لكني احسست بك .. ياحرااااام .. تعال لي حلة ناس سكينه . اكيد ح تستعمع بالعالم التحاني .. تعال عازمنك شاي مغرب .. بس من غير سكر لانو راجل سكينه ما جاب السكر لسعه
سلمت للطله .
ABOMIHYAR
ومع ذلك لم تزل سلة احزانك متخمة بك .. ام هل تراني زحزحت اقصد (سكينة) المفلكبة قيد انملة في اتجاه الفرح .. عن نفسي يفرحني هذا العالم حد الانقسام الجزئي ويتماهي المي في انفقاعي بالضحك كلما قرأتها هذه السكينة المفلكبة . يقولون من يكتب ربما لا يسعد بما كتبه .
على العكس تماما تضحكني سكينه حد القهقهة قبل ان تحدثني بما فعلت .. اعرفها سكينه منذ ان كانت مجرد تهويمة من عدم ..الا ان نضجت وشاكلت وضربت وضحكت وقاتلت من اجل تبقى في هذه الحياة .. لذلك رأيت ان هذا هو حقها ..
سلمت لهذه الاريحية التي نسجتنا بها ..
تماضر
حبيبة البي تماضر .. هوي يا انت ما تقولي لي كلام يحلق بي في عوالم لست بحملها وبعدها تفكيني عكس الهواء.. بعرفكم كويس يا أهل الدراما والمسرح ..
افرحني كلامك ..لست اكيده مما قلت .. ليس تواضع مستغرق ، لكني حقيقة وهذا ما احس به
احسني مجرد (مهرتشاتيه) تجيد لف الثرثرة في ورق هدايا ..
شكرا كتير ليك اوي اوي على طلتك وزوقك العالي الانسيابية ..غايتو الجملة دي ما عارفها
لكن اعتقدني كنت عايزه اقول شكرا ليك كتير
وتعالي لينا كتير في بيت ناس سكينه
هل تعتقدي ان حلة ناس سكينه غنيه بشخوصها الدراميه .. أي يمكن لشخصوها ان تنمو تتطور باتجاه توسيع الحدث ..
شكرا تاني
استار
ربنا يهون عليك القواسي
ويارب الوينكد يجي جاري سرعة
بس عشان نسعد بطلتك
وخلي بالك من نفسك
شفتني كيف حنينه
دا بس عشان قت لي نيلية الروح
تسلم يا استار على الطله
| |
|
|
|
|
|
|
| |
shiry
قرشـــو
7abib_alkul
HAMZA SULIMAN
wadazza
ALZOLZATOO
ابوحراز
المسافر
Abomihyar
Tumadir
رقم صفر
Yasir Elsharif
فيس بوك
تويتر
انستقرام
يوتيوب
بنتيريست