الحاصل لينا ده ما بسبب أعمالنا ولا حاجة .. ولا بسبب أنه البنات بيلبسوا ضيق .. لأنه في دول البنات ما بيلبسوا زاته ومع كده العيش راقد والمواصلات راقدة وعندهم شبكات مترو والجو جميل عندهم كمان .. - ولو عايزين تقولوا ديل كفار بنقول ليكم ياها دي دبي .. الخمور على قفى من يشيل .. ومصايب الدنيا حاصلة فيها ومع ده مرطبين وكل مواطن عنده فيلا .. ورئيسنا يمشي يشحد منهم .. - لو عايزين تقولوا تعامل المواطنين بالربا هو السبب نقول أنه الدول اللي الربا عندهم حلال عديييييييل ما واقفة صفوف عيش ولا بنزين .. - الحاصل ده ما بسبب أعمالنا .. ولا نحن قعد نعمل حاجة أكتر من البتتعمل في كل دول العالم .. وربنا عادل ما بيخلي العالم كله يعمل العايزه ويحاسب الشعب السوداني براه عشان اعماله كعبة .. - الحاصل ده بسبب أعمالكم أنتوا .. بسبب سرقتكم ونهبكم وتدميركم وبيعكم للمؤسسات البلد .. بسبب تعيين شوية طير ودراويش في مناصب حساسة منها رئاسة الجمهورية .. الحاصل ده بسبب أنه الحاكمين البلد هم شوية عساكر من أيام الثانوي ما جابوا مجموع يخليهم يدخلوا جامعة .. وبسبب رجال دين فشلوا في أي مجال من مجالات الحياة فقرروا يتاجروا بدين الله ويبيعوا كلام الله عشان يشتروا عربات وبيوت .. - أقدار الله ما بيوزعوها بالمزاج .. الفشل ده فشل سياسي .. نحن زاااااتنا أيام الإستعمار وما بعده .. كانوا حاكمننا كفار .. والبلد كلها بارات .. والحال ما كان كده .. - الفرق بينا وبين الدول البنهاجر بيها ليها دي .. الفرق بس في العقلية الإدارية .. الفرق بينا وبين الناس العايشين رفاهية هو فرق العقلية والضمير بين من يحكمنا ومن يحكمهم .. - أسعدني الخبر بتاع خطيب الجمعة النزلوه من المنبر ده .. وحقه دي تكون عادة .. أي منافق ودجال ينزل من المنبر قبل يكمل خطبته .. الخطوة الأولى عشان نمشي صح أنه الدجل الديني ينتهي في البلد دي .. كتب عويس سعيد من الفيسبوك
Quote: قيادي اسلامي يشغل منصباً رفيعاً بالمنظمة الدعوية دعا الشعب السوداني لرفع أكفه بالدعاء حتى يتعافى الاقتصاد السوداني ويعود قوياً مزدهراً.
وكأن الله سبحانه وتعالي لم يحب علينا بالنيل الدفاق الذي يجري على مد البصر ، وسخر لنا الانجليز الذين بعد أن إحتلوا بلادنا خرجوا منها وتركوا لنا السكة حديد ومشروع الجزيرة الذي يعتبر أكبر مشروع زراعي في أفريقيا يروى بالري الانسيابي ، وظل هذا المشروع معطاءً طوال فترات الحكومات المتعاقبة والآن نتيجة السياسات غير الرشيدة تهاوى ودمر ولم يعد لسيرته الأولى رغم الوعود المكرورة من المسؤولين بذلك.
السودان أكبر منتج للصمغ العربي الذي يدخل في صناعات عديدة ذات أهمية لدرجة أن الولايات المتحدة سمحت بتصديره رغم الحصار الاقتصادي قبل رفعه ، ولكن هذه السلعة تهرب وتعجز الأجهزة في وقف المهربين وأصبح الصمغ يصدر من دول تجاورنا ونحن (سيادو) .
اكتشفنا الذهب الأسود وهللنا وتحوقلنا وأنشدنا ومعه تم التوقيع على اتفاق السلام الشامل ولكن كان البترول لشراء الذمم وارضاء البارونات وعندما انتهت الفترة الانتقالية فقدنا جزء عزيز من الوطن وذهب البترول مع ريحه فورثنا الحسرة والندم نتيجة إصابتنا بالمرض الهولندي لعدم استغلال البترول في تعزيز القطاعات الانتاجية (الزراعي والصناعي).
حبانا الله بأرض بكر يزرع فيها قصب السكر في مصانع عدة ومع ذلك نستورد السكر ، نزرع الفول والسمسم والجبايات تخنق المزارعين فالحكومة لا تعرف سبيلاً لايراداتها غيرها.
راهنا على الذهب بأنه المخلص ومنة الله علينا ومع ذلك آفة التهريب هي المسيطرة وعن طريق معابر رسمية وإن كانت هناك محاولات لكبح جماح التهريب عبرها ، إلا أن ما تم تهريبه كان يمكن أن ينتشل البلاد من وهدتها.
الله سبحانه وتعالي لم يقصر معنا وأنزل علينا من الموارد التي لو قمنا باستغلالها صحيحاً لأكفتنا ولكن سوء الادارة خاصة في العهد الحالي جعلت أهل الكفاءة خارج المسؤولية وولي بدلاً عنهم المحاسيب الذين يفتقدون التأهيل فعمت الفوضى والانتهازية والفساد فتعطلت كل المؤسسات ، ولذلك (ندعو لشنو وربنا وفر لنا كل شيء) .. مثل هذه الممارسات هي التي جعلت بعض أبناء الاسلاميين يلحدون!!
الجريدة
12-15-2018, 03:14 PM
عبدالقادر محمد
عبدالقادر محمد
تاريخ التسجيل: 07-09-2018
مجموع المشاركات: 2780
تحياتي الاخوان امتثال وناصر الشعب اصبح واعي جدا يعرف ان يفرق جيدا بين ما للرب وما للدولة والرب ليس بظلام ليحاسب الشعب السوداني فقط ويترك بقية شعوب الارض الان الارض تنبت ثورة
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة