11:56 AM October, 29 2018 سودانيز اون لاين زهير عثمان حمد-السودان الخرطوم مكتبتى رابط مختصر ـــــــــhttp://www.up-00.com/http://www.up-00.com/ **المخاليق والأمكنة: - مستورة بت عرضو :( مغنية شعبية ) في امدرمان القديمة. والدة سيدي اللورد كرومة. ــــــ- الأسطى عبدالله مختار العبادي:والد سيدي اللورد كرومة ، كان شغال فني ساعات حريف ( الزمن داك موضة الساعات كانت فنكهة الأفندية السودانيين و المصريين و الخواجات ) . عايلة العبادي من أعرق العايلات الأمدرمانية .. منها طلع الشاعر الجد وسيد الكلام إبراهيم العبادي .. وملك الغنا وسلطان الطرب الحاج محمد أحمد سرور . ــــــ- اللورد كرومر ( المندوب السامي البريطاني للسودان ):وصل السودان أول مرة سنة ١٩٢٢م وتم استقباله في أمدرمان استقبال رسمي و ظيطة ظمبليطة بديعة.. بهر الاستقبال ده الست مستورة، وكان ولدها عبدالكريم عاجبها وساري بالها لأنه صوتو سمح وزمنو مظبوط و حابي الغنا و الطرب زيها.. طوالي سمتو ( كرومه ) حسب لسانها في نطق اسم اللورد البريطاني المبجل .. فكان هذا الولد الأخدراني القصيروني الجميل .ــــــحي السيد المكي:من أعرق أحياء البقعة ، مؤسسه الشيخ السيد المكي ، أحد شيوخ الصوفية .. كنية المكي نسبة لأنه عاش في مكة المكرمة و اتشرب منها اصول الدين و رجع استقر في السودان ، السيد المكي هو أحد جدود السيد اسماعيل الأزهري ، و الشاعر محمد المكي ابراهيم ،. كان الحي يتوسط امدرمان.. و الحياة فيهو مدفوسة بالحكايا والنشاط وحركة الناس . من ضمن الدفيسيبة السمحة دي كان ناس الطريقة الختمية . نشيطين في الحوليات وليالي المديح والبهجات ، ده النشاط الفني الوحيد - الإلي حدٍ ما - مشروع ومتاح و مرضي عنه من الناس . استهوت الشغلة الولد الجميل سيدي كرومة .. فأصبح منشد ختمي وقاريء للأوراد .. هذا الولد الأخدراني القصيروني الجميل . ــــــ- سيدي اللورد الجد جد ، عبدالكريم عبدالله مختار ( كرومة ):- إتولد في حي السيد المكي / أمدرمان سنة ١٩٠٥م . دخل خلوة الفكي عبدالرحمن في حي السيد المكي وهو طفل ، قرآن وفك الحرف وتجويد التلاوات ، منها لمدرسة الهجرة . من الزولية ودوهو أهله لعطبرة يتعلم النجارة في ورش السكة حديد هناك . عطبرة ما دخلت ليهو راسو وهو ود امدرمان . رجع لمحبوبتو امدرمان و فتح دكان مكوجي في حي السيد المكي ، ما نفعت معاهو الشغلة خلاها. مسك في شغلة النقاشة والبوهية والجير ، أبت ليهو ( روح قلقانة ).. هذا الولد الأخدراني القصيروني الجميل . - بدا يرتاد مباريات الكورة و شارك فيها .. شويتين انضم لنادي الهلال . اندمج في الوسط ده و اصبح مغني لمات الاصحاب و القعدات .. شوية شوية و اتعرف الود كرومة لاعب الهلال والمغني ، بدا ينادوهو للحفلات .. عرس هنا طهور هناك سماية هنا صبحية هناك . سرقتو شغلانية الغنا بعد ما الناس بقى ما عندها شغلة غير هذا الولد المغني العجيب . و من وكتها اصبح سيدنا اللورد عبدالكريم كرومه صايعاً جميلاً.. هذا الولد الأخدراني القصيروني الجميل . - كان قصيروني مدغلب أخدراني وسيم قيافة وجيه مشلخ .. واحد من أوجه شباب أمدرمان وأكترهم أناقة و إنتكات . ما بيلبس هدوم إلا تكون من الماركات العالمية الشهيرة و الغالية ، القفاطين والملافح والجلاليب البوبلين والترلين والسكروتة ، والبدلة لازم كاملة قميص وصديري وبنطلون وجاكيت وطربوش .. كلها منفوشة بالنشا و مكوية زيو و زي أي باشا وخديوي . وبسبب حبه و شغفه بالملابس و التقليعات والأناقة أصبح زبون دايم لمحلات الخواجات والأقاريق والشوام وأولاد الريف في الخرطوم ، يوصلوا ليهو كل الجديد لحدي عندو . ونفس الشغف عندو بالعطور .. يعشق العطور الفرنسية الراقية والبريطانية ، لدرجة مصانع الشبراويشي للعطور في مصر المحروسة عملت ريحة محصوص بإسمه و عليها صورته .، بقوا تلاتة شخصيات سودانية اتعملت ليها الريحة باسمها : السيد عبدالرحمن المهدي ، السدي علي الميرغني ، سيدي اللورد عبدالكريم كرومة .. الولد الأخدراني القصيروني الجميل . - سيدي اللورد كان خجول حد الصمت ، مهذب و راقي و جنتلمان حقيقي في سلوكه ، الوحيد في قهاوي امدرمان الشهيرة وكتها البيكون ساكت في خشوع وهو بيستمع للفونوغرافات العتيقة بتطلع من اسطواناتها درر أغاني سادتنا علي الشايقي واللمين برهان وسرور و البنا وغيرهم من غنى المصريين والشوام .. هذا الولد الأخدراني القصيروني الجميل . - سنة ١٩٢٦م كان انضمام سيدي اللورد لفرقة المعلم الحاج سرور .. و ما أدراك ما الحاج سرور . مغني الفرقة الثاني فيها كان سيدنا اللمين برهان - وده كمان نصيبة تانية براها - اشتغل اللورد فترة مغني تالت في الفرقة بعد السيدين الكبيرين ديل ، شويتين و بدا نجاحه يقلق سرور ، الناس انسحرت بهذا الولد الاخدراني ابو صوت عجيب وجديد ومختلف . اللورد حس انه ده الوكت اليتخارج فيهو من الفرقة ، زي ما جا بالمعروف مرق بالمعروف .. . وقد كان . وفضل هو وسرور يتبادلوا الاحترام و التقدير و تثمين اعمال بعضهم . من وكتها .. و بدا صيتو يعلى في امدرمان .. هذا الولد الأخدراني القصيروني الجميل . وتسابق الشعراء الفطاحل وكتها في طلب ود هذا الشاب الأخدراني الفلتة .. وانبهل شلال سيدي اللورد الإبداعي دفاق و فوار . سنة بعد سنة و اصبح اللورد هو القانون الفني و هو السلطان و شيخ الطريقة ، مدعوم بشعر عالي القيمة الفنية ، من أعالي القمم الشعرية ايامها : * سيد عبدالعزيز : ( ٥٩ قصيدة ) لحنها و غناها كرومة .. أشهرها ( أنا ما معيون ) . * محمد بشير عتيق : ( ٢٥ قصيدة ) لحنها و غناها كرومة .. أشهرها ( ناعس الأجفان / أرجوك يا نسيم روح ليهو ) . * صالح عبدالسيد أبو صلاح : ( ٢١ قصيدة ) لحنها و غناها كرومة .. أشهرها ( جوهر صدر المحافل) . * عمر البنا : ( ٢٠ قصيدة ) لحنها و غناها كرومة .. أشهرها ( زهرة الروض الظليل ) . * عبدالرحمن الريح : ( ٧ قصائد ) لحنها و غناها كرومة .. أشهرها ( لي في المسالمة غزال ) . * و و و و و .....- اكاد اجزم إنه تلاتة ارباع الغنا السوداني من الخمسينات وإنت نازل هو من ألحان سيدي اللورد . فااالورد كان مجدد حقيقي و بادع خالق لفنون جديدة على الاضان السودانية . اللورد كسر دائرة الألحان وأتى بالجن الكلكي أيامها .. مرق من عباية الطمبارة و المغني ابو شيالين والأداء المدائحي الديني في اللحن .. و خش في سكة مغامرة جديدة لنج . قصيدة مثلاً زي ( نظرة يا السمحة أم عجن ) كانت فلتة أيامها ، خلت كل حسان البلاد يتعجنن ويجدعن النظرة الما بيحتمل غنجها وأنوثتها القاتلة . وكان سيدي اللورد هو من بعث فيها الجن ده .. فاللحن راقص لا يشبه الالحان الرجولية المعسمة القبالو ،. قال اللورد إنه لقطها من بين تفانين ألحان المديح للسادة الطريقة الاسماعيلية ، والكانت زاويتها جنب بيته . وكان أهم شي عند اللورد هو الإيقاع ، فحياته كلها كان ايقاعها : الحديث / الأنيق / الجديد / المختلف ، و دذه كان تماما مختلف عن السايد .. كرومة كان مكجن البطء و الرتابة والخناتة الدائرية ، فرقصت امدرمان وانفدعت علي ايقاعاته و لحونه الفريدة . شوية شوية و اتغلب الحوار علي شيخه السلطان سرور ، و شوية شوية بدا سرور في التلحين على نسق كرومة و طريقته ، و عبدالله الماحي اللمين برهان و علي الشايقي و غيرهم .. وأصبح سيدي اللورد مدرسة .. هذا الولد الأخدراني القصيروني الجميل . ( دمعة الشوق ) كانت أسطوانته الأشهر ، اصدرها سنة ١٩٣٤م في مصر ، و طوالي تقاصرت قامات المغنين بعدها .. و تقازمت ألحان المالحنين قدام جلال و جمال و سطوة لحون هذا الولد الأخدراني القصيروني الجميل . و من يومها .. كرت سبحة الغناء السوداني ، و تعالي البنيان طوفة طوفة ، من بعد ما خت ساسو و حجر زاويته هذا الولد الأخدراني القصيروني الجميل .**الغياب :- في صباح الأربعاء ٢٩ يناير ١٩٤٧م ، في مستشفى أمدرمان / قسم الباطنية .. أسلم سيدي اللورد الروح لبارئها .. و عمره فقط ٤٢ سنة .فالسلام عليك إلي يوم الدين .. يوم يسألنا السائل : إنتو منو ؟ فنجيب كورجة : نحنا ناس سيدي اللورد عبدالكريم عبدالله مختار « كرومة » .. ولد سوداني أخدراني قصيروني جميل .
كتابة جميلة مرسومة بمداد من الحب وألوان من العاطفة. ونعم يا زهير.. شكرا عباس.. هي للأستاذ (الزميل القديم المنقطع) عماد عبدالله.. https://www.facebook.com/emadame100/posts/921082154749735https://www.facebook.com/emadame100/posts/921082154749735
10-31-2018, 03:12 PM
Yousuf Taha Yousuf Taha
تاريخ التسجيل: 05-03-2013
مجموع المشاركات: 1034
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير عثمان حمد
ياسر السر
عباس محمود
هاشم الحسن
Yousuf Taha
فيس بوك
تويتر
انستقرام
يوتيوب
بنتيريست