|
Re: السودان محاولات للفهم؛ محاولات للتعايش.(و (Re: محمد علي البصير)
|
Quote: تحياتي حبيبنا عبد المنعم حمداً لله على السلامة
|
اوووه البصير الفنان كيفك يا صديق تسلم
Quote:
في أنتظار مادة دسمة
|
ساحاول بصدق ان اكتب ما يمليه على ضميري وقلبي وعقلي؛ وما انا سوى ابنا لهذا الشعب العظيم ومن الناس التحتانية؛ وكل امنياتي ان يعيش الشعب السوداني في رفاهية وفي ديمقراطية وسلام وامن تلك المفقودة الان بامتياز ياخ عاوزين رغيفة قريبة وبسعر في مقدرة الجميع تصدق نحن خمس اسر في بيت واحد نشتري رغيف في حدود مية وخمسين الف جنيه في اليوم... عاوزين موية نضيفة ياخ الموية في واوسي تجيك طميها اكتر من مويتا ولا ومرات كتيرة تقطع... غايتو تنفع لري حديقتي ولكن للشرب مشكلة يحفظها الأهالي في براميل عشان تروق وتصفى يستخدمون تلت ويرمون تلتين طمي هذه الأيام أصلا البحر زايد شوية.... عاوزين تعليم في استطاعة كل مواطن مدرسين المرحلة الثانوية في حلتنا بنى الأهالي لهم مسكنا وحتى معينات السكن من تلاجة وتلفزيون ودعم للميز ويدعمونهم بحافز ممتاز بس عشان يقعدوا يعلموا أولادنا نسيت ان أقول ان المدارس نفسها بناها الأهالي ويصنونها سنويا... الوجع كتير يا البصير؛؛؛؛
Quote:
بالله بالتفصيل عن كل شئ
وياريت نعرف الشعب دا بقول في شنو ؟
رائ الناس في الحال المائل
والموت البطئ الذي يدق ابواب المعدمين وما أكثرهم
يا ريت كل صغيرة وكبيرة يا حبيب |
نعم ساكتب تفصيلا وعن كل شيء ودا ابسط حاجة وكل صغيرة وكبيرة وراي الناس في الحكومة وراي ناس الحكومة في حكومتهم وللمغتربين اهدي هذا البوست لاصدقائي المتغربين كلهم وأقول رغم الحال المايل الا ان الحياة في السودان لا تشبه أي حياة متعة ياخ لحدت بهناك أقول تسهلوا وخففوا وعودوا لوطنكم ساواصل ساكتب عن بعض اشراقات البلد وكل اشراقات الشعب ساكتب عن الجو الماطر والمغيم الذي استضافني ربما معظم الأيام ساكتب عن يوما كاملا قضيته في حديقة منزلي الريفي الشهيرة .................................... أقول ان نومة في حوش سوداني فسيح وجو خريفي ماطر لا تسويها أي متعة في العالم!!!!
محمد البصير طولت عليكم ....... خليكم قراب
| |
|
|
|
|
|
|
Re: السودان محاولات للفهم؛ محاولات للتعايش.(و (Re: عبدالمنعم الطيب حسن)
|
اجرت عربتي الفاتت ذاتا 18 يوم ب 18 مليون اليوم بمليون جنيه طق طرق وعندما ناقشت صاحب الوكالة ان هذا المبلغ كان قبل أسبوعين عشان موسم العيد ضحك وهو يسملني العقد للتوقيع ان البلد دي ما فيها حاجة سعرا بنزل ابدا احمد ربك بس استقبلني في المطار الصديقين مطر وابوعبيدة وسلموني العربية في الخرطوم اتنين وسقتها حتى البيت في واوسي وانا المرهق أصلا من الاسفار كانت الخطة ان يوصلني الصديقين البيت وخاصة ان اليوم جمعة وشلة الكوتشينة في الحلة مجتمعة لكن ظهر لهما ظرف عمل طاري وودعتهم وتوكلت ووصلت بيتي بسلام واستقبلني الطيب ابني باكيا وفطومة كذلك بكت وعادوا وفرحوا بوصولي وجبتا ليهم شبس من النوع المفضل لهم فابتهجوا ايما بهجة؛ لاحقا في المساء الطيب تلاتة سنوات قاوم النوم بشدة فقد غادرتهم قبل أسبوعين وكان نائما وعندما صحا وجدني مافي فخاف ان ينام ويجدني تاني مافي اخذته في حضني ونومته معي في ذات السرير في الحوش الفسيح وصحى باكرا وفرح اذ وجد اباه بقربه.... انعل أبو الغربة ياخ!!! ............................
سندوتش الدجاج ب خمسين الف والبروست 12 قطعة ب 360 الف وكيلو اللحم في الجيلي الطازج الضاني ب 240 الف والعجالي 200 الف وكيلو الحليب المجفف ب 250 الف جنيه والمروحة ب مليون وستمية الف جنيه ................... ساعود
| |
|
|
|
|
|
|
Re: السودان محاولات للفهم؛ محاولات للتعايش.(و (Re: سفيان بشير نابرى)
|
تشكرات شديدة العزيز النذير حجازي للمرور والتوقيع البوست لسع طفلا (يحبي) كما قال الحبر في حفلة واوسية... وخليك قريب؛
............ العزيز سفيان نابري لك التحية يا ملك هي محاولات لفهم كيف تعيش اسرة بمليون لمدة شهر؛ هي بالضبط مصاريف يومين.... خليك قريب؛ ............. اوووه حبيبنا الباشمهندس بكري ابوبكر صاحب الحوش الأنيق شكرا لرفع البوست في البنر شكرا لرفع البوست اعلى المنبر ياخ أسعدتني ايما سعادة لدرجة إنني جليت نومة بعد الدوام عادي واتغديت مباشرة وطفقت افرح.... باختصار انبسطت الله يبسطك دنيا وآخرة ......... وتسلم يا كبير
| |
|
|
|
|
|
|
Re: السودان محاولات للفهم؛ محاولات للتعايش.(و (Re: عبدالمنعم الطيب حسن)
|
هذا البوست يتمدد في الفترة من الجمعة 15/7/2018 حتى الخميس 2/8/2018 غادرت الرياض يوم الجمعة ووجهتي واوسي ورجعت لها يوم الخميس وهذه بحساب الزمن العادي ثمانية عشر يوما بلياليها ولكنها بحساب الزمن الفلاني تتمدد في أعماقي وكياني الاف الايام فأنا شأني شان كل مغترب اسعر بسعادة غامرة كوني في مسقط راسي كون اولادي ينطلقون باكرا في بيوت أعمامهم وعماتهم وفِي البيت الكبير؛ ينطلقون من شقة ضيقة لرحابة الحيشان الفسيحة ويتعلمون مثل واخلاقيات البيت السوداني الكبير وهذه المرة اجازة طويلة لهم تجاوزت الشهر والنصف تلك فكرتي الاساسية ودا هدفي الأساسي هو ربط أطفالي بجذورهم الراسخة المطمئنة.... سعادتي لا توصف وتري احمد يلعب الكرة قبل ان يشرب شاي الصباح والساعة اتنين ظهرا في الحفير مع اقرانه وذهبوا معا للزراعة وأكلوا فتة ببصل في بيت احدهم سأواصل
| |
|
|
|
|
|
|
Re: السودان محاولات للفهم؛ محاولات للتعايش.(و (Re: عبدالمنعم الطيب حسن)
|
هذا البوست يتمدد في الفترة من الجمعة 15/7/2018 حتى الخميس 2/8/2018 غادرت الرياض يوم الجمعة ووجهتي واوسي ورجعت لها يوم الخميس وهذه بحساب الزمن العادي ثمانية عشر يوما بلياليها ولكنها بحساب الزمن الفلاني تتمدد في أعماقي وكياني الاف الايام فأنا شأني شان كل مغترب اسعر بسعادة غامرة كوني في مسقط راسي كون اولادي ينطلقون باكرا في بيوت أعمامهم وعماتهم وفِي البيت الكبير؛ ينطلقون من شقة ضيقة لرحابة الحيشان الفسيحة ويتعلمون مثل واخلاقيات البيت السوداني الكبير وهذه المرة اجازة طويلة لهم تجاوزت الشهر والنصف تلك فكرتي الاساسية ودا هدفي الأساسي هو ربط أطفالي بجذورهم الراسخة المطمئنة.... سعادتي لا توصف وتري احمد يلعب الكرة قبل ان يشرب شاي الصباح والساعة اتنين ظهرا في الحفير مع اقرانه وذهبوا معا للزراعة وأكلوا فتة ببصل في بيت احدهم سأواصل
--------------------------- سرد جميل اخى عبد المنعم مافيش احلى من الريف والجو والنوم تحت السماء مباشرة والتحية لاهلنا فى واوسي ونتابع
| |
|
|
|
|
|
|
Re: السودان محاولات للفهم؛ محاولات للتعايش.(و (Re: محمد ادريس زمراوي)
|
الصديق محمد زمراوي كيفك يا فنان نعم من حقنا ان نعيش حياتنا الطبيعية الحنينة او على الأقل جزءا منها فالسوداني ولو سكن قصورا نائفة ومنيفة يظل ابدا يحن لكوخه البسيط في حلته يظل يحن لنومة مطمئنة في حوشه الفسيح كل حيشان السودان فسيحة!!! يظل يحن للمة اهل في فرح في عرس في سماية في كرامة مريض بلغ الصحة او بعيدا وقد عاد؛ السوداني كائن اجتماعي بطبعه وبتكوينه العام والمزاج العبي العام يحفل ما زال باللمة الناس الان صارت اكتر ترابطا كونهم أصحاب وجعة واحدة الحكومة ساوت الشعب في الفقر وفي المسغبة؛ فزاد الاتحاد وزاد الترابط واللحمة طارت السماء!! فلاحظت ان كشوفات الوفيات في واوسي ارتفعت في غالبها العام من متوسط تلاتين جنيها من كل اسرة؛ الى متوسط حوالي خمسين جنيها من كل منتج في الاسرة؛ ساعود لاتحدث عن محاولات للفهم ومحاولات للتعايش......
............................ طن الاسمنت ارتفع من أكتوبر 2017 حيث كان سعره حوالي مليون وتمانمية ارتفع سعره الان وكاد ان يتجاوز التمانية مليون!! وطن الحديد في نفس الفترة كان بحوالي 14 مليون قفز الان وكان ان يتجاوز سقف الأربعين!! وكرتونة المنقة المتوسطة الحجم بحوالي 500 الف جنيه في مناطق انتاجها في الجيلي!! وعصير البرتقال الطازج بحوالي خمسين الف!! ودا متوسط سعر عصيرات الفواكه عموما!!! والبيتزا متوسط الحجم بمية وعشرين الف؛؛؛ والهوت دوق ببلاش!!! ....................... ساعود؛
| |
|
|
|
|
|
|
Re: السودان محاولات للفهم؛ محاولات للتعايش.(و (Re: عبدالمنعم الطيب حسن)
|
الشعب السوداني اصبح له خبرات متراكمة في العامل مع الكوارث والمصائب والغلاء تماما كماالإسفنجية يمتص الاهات ولا يقهر؛ ضهرو اعوج هذا الشعب فأصبح يشيل بعضه بصدق بالراي وبالحكمة وبالمشورة وبالمساعدة المباشرة في محطة كهرباء الجيلي جاءاحد الأهالي منزعجا الي نقطة بيع كهرباء مسبقة الدفع فدفع مية الف وقدم جواله به رقم العداد ساله الموظف مباشرة ان كم تبقى في عداده فذكر المواطن رقما فباع له الموظف كهرباء بحوالي عشرين جنيها بسعر تجاري واعطاه الرقم وباقي المبلغ وشرح له ان هذه الكمية تكفي لمدة الباقية البسيطة من الشهر وقدرها ربما يومين تعال واحد تمانية تشتري لك هذه التمانين الباقية كهرباء مدعومة ربما ضعف لو اشتريت الان؛ ......... اكبرت الموظف ورايت ابتسامة الرضاء على وجه الأب المسحوق من غلاء السلع وفساد المسؤولين؛ ........ الموظفة في المغتربين شهدتها في موقف مشابه في لحظات تعاطف وتفهم مع مغترب مسحوق يخم رمل الغربة المليان غلب.... ....... ساعود
| |
|
|
|
|
|
|
Re: السودان محاولات للفهم؛ محاولات للتعايش.(و (Re: عبدالمنعم الطيب حسن)
|
اكتب احيانا من الموبايل صحيح موبايلي أيفون سفن بلص😂 بس احيانا برضو تظهر اخطاء والتعديل صعب وكل ثقة إنكم تفهمونها من السياق العام واكتب في جميع الأحوال من الذاكرة مباشرة على الكيبورد وأرسل؛ فتطهر برضك ثمة اخطاء اعتمد على تفهمكم ان أخطاءت في العبارة او اعيتني في توصيلها كلي ثقة إنكم تفهمون الإشارة؛ ...،... ودمتم
| |
|
|
|
|
|
|
Re: السودان محاولات للفهم؛ محاولات للتعايش.(و (Re: عبدالمنعم الطيب حسن)
|
في محاولاتنا لفهم كيف يعيش الشعب هذا ملمح اخر تجدر الإشارة كوني اكتب عن تجارب شخصية مرت بي شخصيا او مررت بها؛ الفكرة ان في هذا الامر مزيدا من المصداقية وكوني المصدر أتحمل النتائج القصص والارقام حقيقية وتحليل النتائج هو في نهاية الامر راي وروية يمكن الاتفاق معه او الاختلاف ......... تركيب العداد الجديد في مكان سكني جديد يكلف أربعة عشر مليونا ومائتين اما الذي في بيت قديم يكلف حوالي سبعة مليون ومئة الف عداد بيتي مشترك مع البيت الكبير ومرات الكهرباء تضعف خاصة مع المكيفات كل واوسي مركبة مكيفات وطبعا انا أصلا بدفع تكلفة العداد الفي بيت امي المهم صديق ساعدني في سرعة الإجراءات دفعت مبلغ السبعة مليون وحاجة وفِي نفس اليوم جاء العمال وركبوا العداد ووصلوا التيار ولكنهم اخذوا مبلغا اضافيا وصل ل مليون وميتين الف؛ تسمى تسهيلات سرعة إنجاز المهم المبلغ فوق البيعة يسميه صديقي خالد الأرباب بوكوو بوكوو أعطيتها اياهم بحسن نية وتفهم وكلنا في الهم سودانيين؛؛ الراتب لا يغطي ولا ١٠٪ من التزامات الموظف او الموظفة اها الموظفين يتصرفون هكذا ودا واحد من محاولات فهم كيف يعيش أهل البلد مع الظرف الاقتصادي الضاغط ........ ساعود بمزيدا من الإضاءات وسلملم؛
| |
|
|
|
|
|
|
Re: السودان محاولات للفهم؛ محاولات للتعايش.(و (Re: عبدالمنعم الطيب حسن)
|
السودان كله ضربته الأزمة الاقتصادية الطاحنة السودان كله يعرف الان ان هذه الحكومة وهذا النظام هو الأفشل الذي يمر على تاريخ السودان وعلى أهل البلد لم يعد وسط الشعب من مناصرين للنظام ولَم يعد هنالك مدافعين عنه النظام براهو الشعب كل الشعب ما شغال شغلة بالحكومة عارف انها فاشلة وحرامية ولكنه للحقيقة لم يوحد صفوفه بعد ولَم ينقض كل أسباب الثورة نضجت ومتوفرة الأسباب الموضوعية اعني الأسباب الذاتية فقط لم تنتظم بعد ولَم تتنظم ولكن الشعب ممكن في اي لحظة زي العصار ينتفض ويستمر يدك صحون دولة الفساد العميقة وينتصر تلك يقينية لولاها لاحترقنا؛ قابلت ضابطا كبيرا في الشرطة تحدث في مجمع ان الراتب لا يغطي وان التذمر وصل اخر مدى داخل القوات النظامية وان اي انتفاضة في الشارع لن يقمعها النظاميون ان لم يشاركوا فيها مباشرة.... قابلت ضابطا في الامن صديق قال لي بالحرف: مافي حكومة يا صديقي البلد ماشة ساكت بالدفع الذاتي من الشعب الخلاصة من وجهة نظري ان للظلم نهاية وان الجبروت لن ينتصر على الشعب ولا السلاح ولا الجنجويد وان الشعب قادم وان التغيير قادم بأسرع مما نتصور بمن وبكيف ما عارف وتلك حتمية تاريخية ....... ساعود
| |
|
|
|
|
|
|
Re: السودان محاولات للفهم؛ محاولات للتعايش.(و (Re: عبدالمنعم الطيب حسن)
|
Quote: السودان كله ضربته الأزمة الاقتصادية الطاحنة السودان كله يعرف الان ان هذه الحكومة وهذا النظام هو الأفشل الذي يمر على تاريخ السودان وعلى أهل البلد لم يعد وسط الشعب من مناصرين للنظام ولَم يعد هنالك مدافعين عنه النظام براهو الشعب كل الشعب ما شغال شغلة بالحكومة عارف انها فاشلة وحرامية ولكنه للحقيقة لم يوحد صفوفه بعد ولَم ينقض كل أسباب الثورة نضجت ومتوفرة الأسباب الموضوعية اعني الأسباب الذاتية فقط لم تنتظم بعد ولَم تتنظم ولكن الشعب ممكن في اي لحظة زي العصار ينتفض ويستمر يدك صحون دولة الفساد العميقة وينتصر تلك يقينية لولاها لاحترقنا؛ قابلت ضابطا كبيرا في الشرطة تحدث في مجمع ان الراتب لا يغطي وان التذمر وصل اخر مدى داخل القوات النظامية وان اي انتفاضة في الشارع لن يقمعها النظاميون ان لم يشاركوا فيها مباشرة.... قابلت ضابطا في الامن صديق قال لي بالحرف: مافي حكومة يا صديقي البلد ماشة ساكت بالدفع الذاتي من الشعب الخلاصة من وجهة نظري ان للظلم نهاية وان الجبروت لن ينتصر على الشعب ولا السلاح ولا الجنجويد وان الشعب قادم وان التغيير قادم بأسرع مما نتصور بمن وبكيف ما عارف وتلك حتمية تاريخية ....... |
| |
|
|
|
|
|
|
Re: السودان محاولات للفهم؛ محاولات للتعايش.(و (Re: محمد علي البصير)
|
سأتحدث عن المطار وعن صالة المغادرة النهائية منها والطيارة تصدقوا اكتر من ميتين شخص مع حريم وشوية أطفال حشروهم حشر في قاعة صغيرة بها حوالي مية كرسي والطيارة أصلا مفروض تقوم أربعة صباحا يعني كل الناس دي مافيهن زول نام اكتر من مية شخص جالسين على الارض مباشرة والصالة دي تصدق مافيها مكيف ولا مروحة حتى ولا حمام وممنوع تطلع بعد استلام البوردنق باص والزاد الطين حرا وإرهاقا إنّو الطيارة مفروض تقوم أربعة قامت ستة الا حوالي أربعة ساعات محصورين في قفص حار حاف بلا حمام ويحزنون انا غايتو رقتا في واطة الله دي وغفوت وكان مهند ولدي معتبرني مخدة ونام برضو ونومت الطيوبي فوق ايدي أصلا من الاول المشكلة أني كنت لابس قميص ابيض يسر الناظرين جديد ومكوي قمت من نومة الديك فوق الحبل دي وقد تحول لونه الأبيض قميصي الجديد تحول للون ترابي وبعضا من زفت تصدقوا ياخ في القطر كنّا مسافر لايام ونطلع انضف من السفرية المهببة دي!!!!
.....................، شكرا محمد البصير الفنان للمرور والمداخلة الله يخليك يا حبيب
| |
|
|
|
|
|
|
Re: السودان محاولات للفهم؛ محاولات للتعايش.(و (Re: عبدالمنعم الطيب حسن)
|
اي ان كانت الساعة التي انام فيها لابد ان اصحو قبيل الإشراق بهنيهة جزلة العصافير في حديقتي الصغيرة تصحو قبلي اجدها صحوا تغني وتغرد عصافير كثيرة وبعض حمامات تشاركها الشدو وقماري تغني وحبيبا معاها؛ معا يعزفون معا سيموفونية ولا اروع قبل ان استغرق مع العصافير واغيب مع شيدوها والحمام تغرد القماري وتخلط أصوات الغناء مع خضرة المكان وحضور الضياء خافتا وناعما ومهيبا يأخذ من الخضرة ويختلط بالغناء وانا وسط لوحة الشروق اكاد أغيب مع النشوة والارتياح ورغم حركة الطيور وقد خلا لها المكان او هكذا تصورت فتحررت وغنت حنينا المح طيوبي يتقلب في سريره كانما يعلمني أني بابا انا هو وفرحان معاك وإخوته وفطومتنا وأمهم وبعدين يستمر هذا لفترة قد تبلغ دهرا غالبا ما تكون المدام صحوا فصبح مثل هذا لن تفوته نشم ريحة نار وبعد شوية لبن مقنن.... تهدا حركة الطيور ويكاد صوت شدها ينقطع مع حركة الحياة خارج حوشنا أتحرك متكاسلا انظف أسناني واستعد لشرب الشاي وتلك قصة اخرى....
| |
|
|
|
|
|
|
Re: السودان محاولات للفهم؛ محاولات للتعايش.(و (Re: عبدالمنعم الطيب حسن)
|
كلمني اليوم الشباب في قروبات الحلة ان الرغيف مافي في المنطقة كلها منذ يومين؛ وان الناس مشت لبدايل تانية كسرة عصيدة قراصة وزادت اعباء ست البيت المشغولة اصلا باي عمل يخفف اعباء المعيشة .......... الوضع دا كما عشته قبل ايام كل يوم يستفحل وكل يوم يزداد العنت والصعوبات الوضع ذا بالطريقة دي لن يستمر!!!! ......... سلام
| |
|
|
|
|
|
|
Re: السودان محاولات للفهم؛ محاولات للتعايش.(و (Re: عبدالمنعم الطيب حسن)
|
والله يا حبيبنا منعم
أبداً ما لقيت لي فرقة عشان أنداح للأخر مع بوستك دا
قبل ما تتحرك من السودان أنا ظليت أترقبه لكن ما باليد حيلة
عندي حاجات كثيرة ومأرب دائماً ما أجدها بين ثنايا السطور وغدا لناظره قريب
وكمان لو لقيت لي فيك لمة زي لمة الحبان في خميسك الأغر دا أكون سعيد في قدديمي دا
تحياتي يا وريف
| |
|
|
|
|
|
|
Re: السودان محاولات للفهم؛ محاولات للتعايش.(و (Re: محمد علي البصير)
|
اشكرك يا محمد البصير يا فنان؛ وأتمنى دوما ان أكون عند حسن ظنك واخرين احباب؛ رفعت البوست فوق رغم حزني الخرافي على الزميل العزيز الشامي الحبر عبدالوهاب؛ عارف ليه؟ لانو يا صديقي الحياة دي بتستمر باي هوك اور كروك الحياة لن تتوقف زملينا في الشركة الدكتور جاء ثالث أيام العزاء ليداوم ثالث أيام وفاة زوجته الدكتورة التي فارقته فجاءة تاركة طفلة صغيرة وحزنا ممتدا؛ رغم ان له إجازة كم يوم باقية ولكنه جاء واستلم عمله لساعات وغادر الحياة تستمر رغم الاحزان لموت شخص محترم وكبير في مقام الشامي؛ وهذا يدل على خوة المنبر القوية والمتينة فانتم أصحاب القلم والكتاب والفكرة والاحلام؛ ويا لها من علاقة متينة؛ وعلى الجانب الشخصي توفى ابن خالي العريس توفى فجاءة تاركا حزنا عميقا في الاسرة فهو شاب كريم ومحترم ومهذب وعريس.... ووحيد والدته؛
...................... غايتو يا البصير الفنان الشعب السوداني فهموا كمل مع الناس ديل؛ خلاص بلغ الغلاء حد السماء مع الندرة ياخ بالله في فشل اكتر من ان تغلق مديرة او مدير مدرسة بسبب ان لا توجد سندوتشات تسد الرمق لتلميذ صغير يداوم اقلاها ست ساعات؛ بالله أي فشل دولة كاملة ما قادرة توفر رغيف الخبز لمواطنها باي سعر؟؟؟ بالله أي دولة مواطنها يقف بالساعات في صف البنك عان يستلم راتبه الشحيح وفي صف البنزن مع الحافلة التي تقله لمكان عمله والعكس؛ وفي صف الرغيف .................. الموية في واوسي تقطع بالايام ولمن تجي نسبة الطين فيها اكتر من الموية ................. اقولك حاجة قريبا جدا تصبح الدولة عاجزة عن توفير سلعتي الماء والكهرباء للمواطن!!!! أيام عصيبة تنتظر الشعب مع هذه الحكومة اللئيمة؛
...........
ولكن للشعب تصاريف اخرى؛
.......... شكرا تاني يا حبيب واسعد بلقياك في أي زمان ومكان وحبابك عشرة تشرف في البيت في أي وكت بس شرطتنا ان تاتي ببنتك الجميلة صديقة فاطنة بنتي الظاهرة في البروفايل دا.... وتتلاقى أجيال تتونس؛ ......... تسلم يا كبير؛
| |
|
|
|
|
|
|
Re: السودان محاولات للفهم؛ محاولات للتعايش.(و (Re: ياسر السر)
|
Quote: حبيبنا عبد المنعم كل عام وانتم بخير ياخ ,,, بس عندي سؤالين .. هل ما زلت عندك الرغبة في العودة الطوعية للسودان ؟؟؟ وهل ما زلت توصينا بالعودة الطوعية للسودان ؟؟ مع كامل احترامي لرغبتك ...
تحياتي : ياسر العيلفون ... |
ههههههههههها 😂😂 ياسر يا عيلفون كيف انك يا صديقي هسع عليك دينك في داعي للسوعالات المحرجة دي؟ ليه تخت اخوك في خانة اليك وعارفني مسكين وكيبوردي طرف!!! ياخ السوال صعيب شديدوالاجابة اصعب اجابتي حا تكون مفاجاءة ليك ولي اناذاتي اتوكل على الشعب اوقولك نععععععععععام اي نعم كبيرة عارف يا ياسر نحن شعب مرتبط بالارض مرتبطين بمساحات جغرافية فيها مدفونة (صرتنا) وفيها مدفون باقي اسرتنا فيها حبنا وذكرياتنا ومقابر احبابنا تصدق سنويا اذهب اجازات واحضر وفيات اذهب للمقابر كعادة الاخالي في تلك النواحي اتسلل واصل قبر امي وانتحب سرا وعلانية وارجع اتزن؛ نعم نحن لدينا في كل حتة قصة وفي كل بيت رواية وفي كل شارع حكاية ولدينا ذكريات مع كل البشر كل الشجر كل الحجر.... بالله شفتا قرية الكنيسة وكيف الناس عايشة فيها رغم الدعت والبحيرة والحسرات والحشرات رغم الفقر والضلام وانسداد الافق ولكنها هاهم هناك قاعدون نحن لسنا استثناء ........ السودان اصعب من الصعب ذاتو صفوف الخبز والجاز والبنوك الغلاء فوق طاقة الشعب عامة ........ لكن نسوي شنو المغتربات اصبحت طاردة عديل كدة قالوا شيلوا اهلكن يا قوم تجديد الاقامة فوق لطاقة معظم المغتربين اها نسوي شنو عريجاتنا لمراحا ...... المشرقيات ان الطالبة والطالبة يدرس في القرى ويدخل كليات القمة الطب والهندسة والانسانيات الناس تعاني جدا😰 ولكنها تضحك لحدت بهناك تضحك كلما وقعت مصيبة وبعدين يا زول العمرذاتو كلو كم؟ والبشير دا البغيروا منو نرجع نساهم مع الجماعة ونموت سواء والموت مع الشعب عرس،،،،، على المستوى الشخصي قطعت ترتيبات عودتي اشواطا بعيدة واوغلت مع الاصيل وفكرتي الاساسية عودة طوعية قبل الاجبارية!!!!
..... نتقابل في العيلفون جنة عدن؛
| |
|
|
|
|
|
|
Re: السودان محاولات للفهم؛ محاولات للتعايش.(و (Re: عبدالمنعم الطيب حسن)
|
استمر في رؤيتي كيف يعيش السودانيين مع الغلاء وانغلال سبل كسب العيش ووضع الحكومة كل العراقيل الممنهجة لافقار الشعب من ضرائب ومن اتاوات ... مثلا لا افهم مثلا ان مغتربا انفق زهرة شبابه لاعالة اسر وعند كهولته او شيخوخته وانغلال سبل كسب العيش في المغتربات عاوز يرجع معاهو عربية يتحرك بيها ويكسب بيها عيش ويحفظ بيها ماء وجهه تجي الحكومة تخت ليه جمارك قدر سعرا وقد تزيد؛ معقولا بس!!!! ............... ساحاول ان ارصد من خلال مشاهداتي ومعايشاتي؛ واستمر في البوست... في مدرستنا الأساس بنات قدم احد الناس الطيبين وجبة إفطار لخمسين تلميذة مديرة مدرستنا الابتدائية ومعاها الاستاذات الماجدات اخذن مبلغ وجبة الإفطار لخمسين طالبة وعملن خبرتهن وانسانيتهن وقسمن المبلغ لاعداد سبعين وجبة بدلا عن خمسين؛ حدثتني المديرة: ان هنالك حوالي وقد يزيد العدد عن سبعين طالبة يحتاجن احتاج فعلي وحقيقي لهذه الوجبة فالخمسين وجبة تمددت بفعل أمهات عبقريات لتشمل سبعين طالبة محتاجات فعلا لهذه الوجبة.... الان هنالك سبعين اسرة او اقل قليلا؛ مزقت فاتورة فطورهن بفعل ناس خيرين وبفعل وإدارة مدرسات قريبات من نبض الشعب ومن ايقاعه ومن هذه الاسر..... وحدثني صديق اخر ان ذات المتبرع او المتبرعين قد التزموا بذات المبلغ لمدرسة الأولاد الملاصقة لمدرسة البنات لكني لم اتاكد بعد ان الموضوع قد بدا على الارض؛
............ عموما السودانيين ديل بشيلوا بعض فوق الدبر والدم!!!!
قدلوا اهلي الافاضل الكرام؛
| |
|
|
|
|
|
|
Re: السودان محاولات للفهم؛ محاولات للتعايش.(و (Re: عبدالمنعم الطيب حسن)
|
وبرضو الشيرنق قبال المناسبة ود اختي تزوج في عيد الاضحى الفينا دا... عندو ٥ مليون وهي قيمة المبلغ الذي تتدفعه لي لجنة الزواج الجماعي بيتو جاهز بي غرفة نومو ودي اهم حاجة ليهو كعريس نافض الكيس جمعنا كاسرة ٢٠ مليون وناس الفريق جمعوا مبلغ محترم برضو العريس انجز وفرحان ونزل شغل وهسع احتمال تكون العروس حامل😂😂😂😂 اهو رغم الظروف الناس قاعدة تعرس وتنبسط😂
| |
|
|
|
|
|
|
Re: السودان محاولات للفهم؛ محاولات للتعايش.(و (Re: عبدالمنعم الطيب حسن)
|
قبل ستة شهور كانت تقديرات سقف منزل (الاعمدة والسقفة) حوالي ٥٠٠ مليون الان التقديرات حوالي ٩٠٠مليون ودقدقة الدقدقة تقرب للمية مليون؛
....... بلدي يا فردة جناحي التانية وكت الناس تطير لي عالما كل البجيك ما بلقى فيك غير الهجير وناسن توالي مسالمة كل البشاشات القبيل يلقاها ميتة مهدمة ذي الجاتا جاتا من الارض ما جاتا من تالا السماء .... الكلام لحميد والغناء لمصطفى
| |
|
|
|
|
|
|
Re: السودان محاولات للفهم؛ محاولات للتعايش.(و (Re: عبدالمنعم الطيب حسن)
|
الأخ عبد المنعم لك التحية أعتقد أن من اسباب استمرار الأزمات والضوائق وتجددها هو عدم معرفة أسبابها غير التقليدية فنحن قوم قتلنا الفهم التقليدي رغم تجاسر بعضنا للفهم غير التقليدي لثوابت غير قابلة للتغيير والشي القابل للتغيير نظل يتجمد فهمنا ويتحجر وننظر له نظرة انطباع قديم تقليدي. نعود للموضوع أعتقد أن هذه الأزمات يصنعها النظام الحاكم عمدا ليجعل هناك حالة طاردة للمغتربين خارج البلاد لكي لا تراوده نفسه للعودة للسودان والذي جاء للسودان يلغي فكرة البقاء في السودان ويعود لمهاجرة . لأن النظام لا يريد عودة المعارضين للسودان ولا يريد الكفاءات التي خارج السودان لتنافس منسوبيهم في العمل وفي الصحافة وفي ابداء الرأي وفي ممارسة العمل السياسي داخل السودان . فصنع الأزمات والضوائق الإقتصادية وجدوها أفضل طريقة لمقاومة وإضعاف المعارضين وتشتيتهم واذلالهم وافقارهم للبقاء في الحكم دون مقاومة فلو اتفقنا على الفهم سنتفق إن شاء الله على الحل الناجع والسريع للقضاء على الإزمات وإجبار النظام بفضحه للذهاب نحو وسائل أخرى لمحاربة المعارضة غير وسيلة صنع الأزمات والضوائق المعيشية. فلو كانت هناك معارضة واعية وحصيفة ولماحة ومتفتحة الذهن وصاحية ومتنبهة لكل مكر لما كان ما كان
| |
|
|
|
|
|
|
Re: السودان محاولات للفهم؛ محاولات للتعايش.(و (Re: منتصر عبد الباسط)
|
هلا منتصر اتفق معك تماما حول وجهة نظرك حول وضع الازمات وما تفعله الحكومة اكتر مما ذكرت واشد مضاضة واتفق معك ان الحكومة تبث عن الواقع وعبر الاعلام وعبر جدادها الالكتروني تبث رسايلا شتى ومباشرة وغير مباشرة الهدف منها هزيمة المغتربين وهزيمة ناس الداخل المغتربين ليبقوا في مهاجرهم والداخلين يتخارجوا والتركيز على المغتربين باعتبارات كتيرة ان ناس الداخل مشدوهين ومشغولين جدا وراء لقمة العيش ومرتبطين بالحكومة بصورة او اخرى وناس الخارج العايدين لتوهم عندهم مقدرة اقتصادية ازود من الداخل وعندهم تجارب وعلم وخبرات الحكومة تبث رسايل احباط شديد عبر ابواغها للمغتربين ان يبقوا صدقني خفت من سفري واسرتي للسودان وصلت البلد والوضع عادي ورجعت والوضع عادي اتفق معك....
........ انا هنا اتحدث عن محاولات للفهم ومحاولات للتعايش مع وضع اقتصادي فوق المازوم بكتير والناس عايشة كيف؟ تلك هي كل المسالة؛ هي موضوع البوست؛
| |
|
|
|
|
|
|
|