لا يتبادر الى ذهنك ابدا انني اقصد حقيبة اليد ، خاصة وانها منسوبة لايطاليا ، تلك الدولة الجميلة التي حذقت صناعة الجلد وتشكيله والتي تشبه خارطتها الجغرافية ، للصدفة الغريبة ، شكل الحذاء ! هل كان هذا قدرها منذ الازل ؟ لا ادري .. هي حقيبة سودانية في الواقع ، او قل اغنية حقيبة .. وان لبست ثوبا ايطاليا زاهيا ملونا .. يضاهي في جودته مصنوعات ايطاليا الجلدية كلها .. مقطوعة غنائية من اوبرا "لا ترافياتا " للموسيقارفيردي او Aria كما يطلق على المقطوعة الغنائية في فن الاوبرا .. لحنها لحن حقيبة خالص وأدائها ايضا ، لدرجة انها فيها كسرة كمان .. الاختلافات بسيطة بعضها من صنع الاوركسترا الباذخة والكورس المدرب والتنفيذ ايضا .. كلما اسمعها اتذكر حديث بشاشا رد الله كسحته ، ذات شطحة ، حول سرقة الاوربيين للتراث الكوشي .. لابد ان فيردي قد التقى بعمر البنا في مكان ما وان التينور العظيم بافاروتي قد تأثر ببابكر ودالسافل او ميرغني المامون في أدائه الرجولي ، ولابد يتردد صدى صوت الراحل خليل اسماعيل ، ،على مسامعك هنا وهناك من خلال اداء خوسيه كاريراس وبلاثيدو دومينغوز .. فعلا خليل اسماعيل كان يتمتع بصوت تينور اوبرالي قوى وجميل .. والان سؤالي للموسيقيين : ألا يمكن تنفيذ اغاني الحقيبة باوركسترا فيلهارمونية وكورس دارس ومدرب سواء اداها مغني سولو او كورال؟ ، يعني حاجة كده زي المقطوعة دي ؟ لست دارسا للموسيقى ولا نظرياتها ، زول بسمع بس .. الاغنية مهداة لعشاق الحقيبة وعلى رأسهم الجنرال قباني واباذر ، مع دعوة للشيخ احمد يسن وترهاقا والبقية للتحليل والتعقيب .. لكم سادتي : بافاروتي ودالسافل ، خوسيه كاريراس و بلاثيدو دومينغوز واغنية "برنديسي" ..
07-14-2018, 05:11 PM
Abdullah Idrees Abdullah Idrees
تاريخ التسجيل: 12-05-2010
مجموع المشاركات: 3692
Quote: الله على طريقة كرومة لا زالت النشوة مستمرة وتعضف بنا عبدالله ادريس ياخ انت نشوة ريد
حبابك 10 شغل رهيب ، انا من عشاق الصوت البشري والكمان دي من اهم الحاجات عندي .. لمن يتلمو مع لحن الحقيبة الموضوع بياخد بعد تاني خالص .. رايك شنو في تجربة كابلي في اغنية "الخنتيلة" ؟
07-14-2018, 07:45 PM
Ahmed Yassin Ahmed Yassin
تاريخ التسجيل: 01-31-2013
مجموع المشاركات: 5507
" لا ترافياتا" او (الضائعة) او (الضالة) وهي مارجريت الغانية التي اوهمت حبيبها الاورستقراطي (دوفال) انها طامعة في امواله حتى تبتعد عنه (من اجله).. قصة عشق ماساوية وضحت بحياتها لاجله. فيردي اطلق على مارجريت اسم (فيوليتا) في الاوبرا ياعبدالله يا ادريس رجعتنا الى المؤلف (الكسندر دوما) لان الاعداد الموسيقي عن قصة (غادة الكاميليا) (Aria) هي (الألحان المسرحية) حنرجع ليك لمغني التينور ولى خليل اسماعيل الصوتو (ألطو) تخيل يا عبدالله ؟
07-14-2018, 07:52 PM
صديق مهدى على صديق مهدى على
تاريخ التسجيل: 10-09-2009
مجموع المشاركات: 10705
طار قلبي يا ادريس زي ما طار قلب سيدعبدالعزيز من صدره بس عشان شاف (حور الجنان جوة الحيشان) تبدأ الاحداث والبطلة ترقص وهي لابسة فستان (احمر) كاملا والرجال كلهم في بدل سوداء المشهد يا ادريس ذكرني العبادي وهو في حفلة امدرمانية العبادي : وقعة ادريس ودطه شاف الحسناء في الحفلة وطلب من العريس ان يقومها ترقص (حسب احكام ذلك الزمان والآوان) قامت لتعدل التوب ووجهها نحو البنات ومدبرة قبالة الرجال وكانت عجزاء مدبرة ، وفردت التوب وعايزة تاخد لفة بجسمها لتلتف بالتوب وكان يقف جنبها ولد اسمه ادريس ود طه فضربته بعجزها ووقع الغلام ارضا ، ومع تلك اللحظة قال العبادي (مربوع ) يصف تلك الوقعة ود البنا قال : يا الصدرك عالى وخصرك نحيل وسيد عبد العزيز: البديع السحر الفكر بالجمال والحياء انسكر حسو يرمى الزول فى وكر شوفتو تسكر من دون سكر ودالرضي متلاعب ليس الا لانه حذف البيت (المكشوف) حسب رأي اللجنة وادخلها في حرج بعدالتعديل وقال احدهم الراجل دا ما عندو (حل)
07-15-2018, 12:54 PM
Abdullah Idrees Abdullah Idrees
تاريخ التسجيل: 12-05-2010
مجموع المشاركات: 3692
Quote: يا "شيخ" احمد يس الالطو ده مش صوت انثوي ؟ تعال فهمنا الحكاية دي
جيت جاري جري عشان (النقطة ) المهمة دي .. و دي اهم نقطة في تاريخي في المنبر عشان كدة انا قلت ليك (تخيل) ..! ارجع ليك لى وراء شوية او كتير يا ود ادريس اكتشفوا عبدالرحمن الريح اكتشف الفنان (الفاضل احمد) قام ألف ليهو ولحن ليهو اغنية (كان بدري عليك) غنى الاغنية دي بى صوت (سوبرانو) نسائي صريح. فضل المولى (زنقار) كان يملك (صوتين) واحد رجالي والتاني (نسائي) يعني صوت مستلف او مستعار ماشين بعيد ليه في واحد في (الكورس) حق محمداحمد عوض اسمه لو انا بتذكر اسمو عبدالعزيز قسم كان بستلف صوت نسائي الطو خليل اسماعيل دا عينة الفنان الما بتلقى صوته دا في العصر الحديث ولا القديم ولا الجاي دا حير الاساتذة الكوريين مستر كيم ومستر اوشان سونغ .. وفي المعهد كانوا بقولوا (سلم خليل) محمد الامين بعبقريته الفذة وباستشارة الموزع الرهيب موسى محمد ابراهيم استعان بيهو في الملحمة الخالدة واختتم المقطع منفردا وكان فى الخطوه بنلقى شهيد ... بـدمو بـيـرسم فـجـر العـيــد و ايـد فى إيد حلفـنا نقاوم .....ما بنتراجع وما بنساوم
الله يرحمه
07-31-2018, 08:50 AM
Abdullah Idrees Abdullah Idrees
تاريخ التسجيل: 12-05-2010
مجموع المشاركات: 3692
Quote: اكتشفوا عبدالرحمن الريح اكتشف الفنان (الفاضل احمد) قام ألف ليهو ولحن ليهو اغنية (كان بدري عليك)
الفاضل احمد بتاع الحقيبة ؟ اعتقد تقصد عمر احمد كان بدري عليك دي من اوائل الاغنيات السمعتها في حياتي ، كانت منتشرة جدا منتصف السبعينات ، ما عارف منو الكان بغنيها في الزمن داك ، بس بتذكر انها كانت على كل لسان ...
07-31-2018, 08:54 AM
Abdullah Idrees Abdullah Idrees
تاريخ التسجيل: 12-05-2010
مجموع المشاركات: 3692
النسخة الايطالية من اغنية "غرانادا" بصوت العظيم كلاوديو فيلا الزول القصير ده عندو تكنيك اداء عالي للغاية ، تحكم رائع اجمل نسخة من الاغنية رغم ان معظم مغنيي الاوبرا غنوها
10-06-2018, 02:33 PM
جمال ود القوز جمال ود القوز
تاريخ التسجيل: 01-25-2013
مجموع المشاركات: 5925
مشهد من اوبرا "ريغوليتو" للموسيقار فيردي يغني فيه الراحل لوتشيانو بافاروتي اغنية لا دونّا إي موبيلي La Donna E Mobili من اشهر اغنيات الاوبرا ان لم تكن الاشهر ..
بالله مغني الباص الفي اخر المشهد ده لو بقا عندنا "بدقها" حسب رندوك الكورة ؟
10-23-2018, 02:26 PM
Abdullah Idrees Abdullah Idrees
تاريخ التسجيل: 12-05-2010
مجموع المشاركات: 3692
السوبرانو ماريا كالاس اسطورة حية تعتبر من اعظم مغنيات الاوبرا هنا ستغني مقطوعة رائعة جدا من اوبرا كارمن لجورج بيزيه شغل على الكمان غير معقول مهارة فائقة بالذات في المقدمة بالاضافة لبقية الالات
10-26-2018, 11:36 AM
Abdullah Idrees Abdullah Idrees
تاريخ التسجيل: 12-05-2010
مجموع المشاركات: 3692
الموسيقى الكلاسيكية دي ما بتمسخ ياخ وبتتقاطع مع موسيقانا في حتات كبيرة لو لاحظت لي الاعمال الفوق دي كلها ساهلة جدا على الاذن السودانية بالذات الزول السمع اغنية امدرمان كتير ، الايقاعات الهادية واستعراض القدرات الصوتية والالحان المعقدة احيانا ..
11-10-2018, 11:44 AM
Abdullah Idrees Abdullah Idrees
تاريخ التسجيل: 12-05-2010
مجموع المشاركات: 3692
ما اجمل الغناء للأم .. بالذات لما يكون الزول بعيد وراجع Mamma son' tanto felice Perché ritorno da te .. اعلى درجة سمو ممكن تصلا الموسيقى .. مافي اجمل منها الا رائعة محمد جبارة .. غايتو اي زول على بعد كيلومتر واحد بس من امو لازم يسمعا .. حفظ الله امهاتنا جميعا واسبغ رحمته على من رحلن ..
التينور - بنيامينو جيجلي يغني للام
نفس الاغنية من فرقة Il Volo دمها خفيف لكن بجودة أداء أقل في نظري
12-06-2018, 11:55 AM
Abdullah Idrees Abdullah Idrees
تاريخ التسجيل: 12-05-2010
مجموع المشاركات: 3692
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Abdullah Idrees
Ahmed Yassin
صديق مهدى على
سفيان بشير نابرى
حاتم إبراهيم
ناذر محمد الخليفة
جمال ود القوز
محمد حيدر المشرف
فيس بوك
تويتر
انستقرام
يوتيوب
بنتيريست