عليك واحد .. سخافة الفكرة وتساهل الضحايا ...

Quote: سخف فات حدوده ولكن لا برامج في القنوات السودانية فلابد من ان ياتو بالجديد ولكن اي جديد اتو به فقد اتو بسخف لا يتصوره العقل واستخفاف بعقول المشاهدين بعمل يفتقد لاي نوع من انواع الترفيه ااو الدراما او التسلية او العقلانية او المنطق ,,, وبايه بي مخدرات ,,,, الم يجدو غير هذا الشي المغيت ,,,, فماذا يحدث اذا مر مواطن عادي وراي هذا الشخص المشهور وهو مقيد ومكلبش كالمجرم هل يمكن ان نوقفه ونوضح له اان هذا المشهد مشهد كاميرا خفية او ما شابه وكيف لي ان اقنعه وهو يرى الكلب البوليسي ويرى رجال الشرطة حولي كمتهم في قضية مكتملة النواصي والاركان ..... هذا البرنامج احد مهازل الاعلام في الفترة الاخيرة وهو يدل على عدم احترافية عدد كبيييييير جدا من مقدمي البرنامج في القنوات السودانية .... والله يرحم ايام فرسان في الميدان ودنيا دبنقا وجراب الحاوي ........... والخ ...الله يرحمك يا بلد ... تحياتي : ياسر العيلفون .....

Quote: اضعف الايمان ان يطالبوا بعدم البث لهزيمة البرنامج التافه و مقدمه

Quote: ‏.. تلاتة مسدسات تتطاقش لكي يتخذ اصحابها وضعية مميزة للاطلاق أو للإستعداد للإطلاق، أو وضعية والسلام (المهم الوضعية لمسدسات) احدهما على الاقل ( ان لم تكن الثلاثة) مسدس حقيقي ويحمل طلقات حقيقية وسيدو مغبون وحاسي بالظلومة ويعتقد – وهو في ذلك صادق- انو بدافع عن عرضو... مسدس مشهر بين اصابع زول متوتر تختلط مشاعر انفعلاته وهو يرى قدامو زوجته تتعرض لخطر ما، أو ربما إبتزاز ما، أو خطأ فادح لكمين في جو متوتر يعج بالكوراك والنحيب والرجال الغامضين ذوي البدل المايوية والكلاب وسابعهم مصري!! تخيل يوم تقوم توصل مرتك قدام شركة وتكون قاعد منتظرا في امان الله في عربتك فجاة تلقى مرتك مقبقبنها ليك خمسة رجال، وسيرة الكوكايين تعلو وكلب بشمشم ومصري بنبح، رجال بي طبنجات في هرج ومرج وغبرة، الاول بكورك في التاني والتاني بكورك في التالت والتالت مكتف الرابع وكلهم بكوكوركو في مرتك والكلب بعاين لي المصرى والمصري بكورك انا عايز السفارة!! ولحدي ماربنا يفتح عليك بي فهم الحاصل شنو، يجي واحد يفتح عربتك الانتا عارفها ذي غرفة نومك ويمرق ليك كيس ابيض وبي ميزان يدو الدقيق يقول ليك : "لغد تم الغبض على اتنين كيلو كوكايين" مشهد مرتك وهو تركض بتوب واقع يصحى فيك غضب اعمى يحتاج الى ان يتموضع سريعاً في مكان ما، ومشهد الرجال ذوي البدل المايوية يذكرك بي تصفيات جهاز الامن ورصاص بلا رقيب، فترى في نص الذاكرة المشلول صيوان عزاء ومعزين واعتذار من مسؤول برضو بي بدلة مايوية، وسيرة الكوكايين تذكرك بي بابلو اسكوبار والمسلسلا ت المكسيكية التي ادمنتها زوجتك، ومشهد زوجتك يحمس اصبعك المتوتر على الزناد، ومشهد الكلب مع المصري مع الطنبجات وسيرة السفارة يذكرك بي محاولة اغتيال حسني مبارك. فاذا كنت مع كل ماذكر سوداني، وتربية اجواء الاستبداد والمكايد والمظالم وسمعتا بي الدعم السريع ولحدي هسي ماعارف منو العمل مذبحة بيت الضيافة، فقد لايُلام الرجل ذو الطبنجة الحقيقية لو قام فضى مشط الخزنة بتاعة الطنبجة في كل من حولة دون استثناء بما فيهم مرتو والكلب والمصرى والذكريات ونص الذاكرة الغير مشلول وركاب الحافلة. شي عجيب كل ذلك ما ذكر اعلاه في عمل قصد به المرح الرمضاني.. كل هذه المشاعر والمشاهد المذلة الخطرة المهينة المُستفزة المتوترة والتي كان من الممكن ان تنتهي الى كارثة، هي مجرد مشاهد قصدت بها قناة S24 الفكاهة والانس والامتاع والترويح عن الصائمين. ربما الفكاهة الوحيدة في هذا البرنامج انو البوليس ذاتو اعترض على البرنامج لانه يسي له!! اضحكني الامر لسببين اولا لانو البوليس ظهر كمظلوم في دعواه الاعتراضية هذه مع انو الشباب المثلو الادوار السمجة دي ماجابو الافكار دي من بوليس كمبالا وانما هي حركات البوليس التي نعرفها. تانياً لان البوليس لم يستطع الى ايقاف البرنامج سبيلاً وظل البرنامج بالرغم من مؤتمر البوليس المزعوم يواصل بث سمجاته واستهزائه بالخلق. مافي شي طبعا فايت البوليس في ماشاهدنا من الحلقات وعنفها المصاحب، لدرجة انو البوليس ذاتو التبس عليه الامر ومن شدة الشبه وشديد مظنته وشدة التباسه في ان الناس قد تظن انو العمل ده مشترك مع الشرطة أو عندو علاقة بالشرطة، قام البوليس اجبر القناة على ان تضع "إخلاء طرف" ذي الشريط الاخباري تذكر الناس بانو ديل ماناس بوليس. لا ادري كيف صمت البوليس على هذه الحلقات التي تصورهم علانيةً وللعامة في هذا الشكل المريع الذي لايحترم حقوق الانسان؟!! لا ادرى ماهو المطلوب اكتر من (1) ان يدعي شاب في سماجة انو من "ناس المكافحة" و(2) شايل معدات بوليسية كلبشات وطنبجات تتطاقش في الشارع العام و(3) انو سعادة العقيد وصل. المطلوب شنو اكتر من كده عشان تفهم إدارة البوليس انو الشباب العاطل عن الموهبة ديل قاصدين البوليس وتحديدا ناس المكافحة.. ياخي الكلب ذاتو اسمو كلب البوليس، يعني خلاقة كده الكلب العندو لون بني واسود ومنفوش كده داك بسموه كلاب البوليس. بعد كل الاشارات الصريحة والضمنية دي هل يفتكر البوليس القعد مع S24 في اجتماع انو الممثلين ديل قاصدين فعايل حرس الصيد مثلاً؟ قول بعد ملاججة ومماحكة البوليس وافق على استمرار الحلقات لاغراض الاعمال الفنية ولو كانت ضعيفة وسطحية وسمجة وركيكة وتستجدي المرح استجداءاً، ياخي بعد حلقة عفاف حسن امين دي انحنا المشاهدين ذاتنا بقينا محتاجين بيان!! بلاي اتخيل راجل عفاف ده اب مسدس تسعة ملي ده لو فرتق ليك راس الود بي طلقة في غمرة تلك الفوضى وشتت مخو في واجهة الكمرا. ألم يكن ذلكم محتملاً ولو واحد في المية مع الهرجة الحصلت ديك؟ لماذا يجازف ود بي راسو في سبيل مايظنه فكاهة لاضحاك شعب بائس ذائقته الفنية اصابها الضمور. ذي ماقال لي الديامي يوم عضاني الكلب في محطة حجازي ايام شغال بوزع فواتير لهيئة القومية لمياه المدن: (انتا ياخ كان ماخايف على نفسك ماعندك ام تخاف عليك، ماعندك اخوان يخافوا عليك؟) بقينا نهائي ماعارفين اين نهاية العبث في المشهد السوداني ؟ هل دي ازمة الامة دي ولا أزمة بوليس ولا ازمة إبداع ولا ازمة القناة ولا ازمة كلاب. فعلاً وزير المالية ليهو حق يسألك يا الطاهر (مكانا وين ؟) تاريهو عارفك جزء من الازمة