|
|
|
 Re: السيد الرئيس المشير عمر البشير (Re: عبدالحفيظ ابوسن)
|
كبس الهم على
والحال قبض يا السيد
غبنا فيا كج
وتادو وجنبى معيد
مو جنا تجيب
سلسل جنازرو تقيد
بلا غيبوبة البلد
النصيح و مصيد
كنا تلاتة ...
ود النوق وديك وعتيد
قلنا نكمل الفرض
العلينا نشيـد
جينا عليكى يا المحبوبة
شوقنا يأيـد
بقينا ضهابة متل زولاً
ضرير غليد
ود النوق دبر كورو
العليهو يشفق
بقى يتباطأ
فى خبة مشيهو يلفق
ان جاهو العلوق
صيحة نفاقو تنفق
اصبح جدوة وكل
ما شافلو سلقة يصفق
- وديك الجن
رفيق همى وغنايا وفنى
سوا طريقو فى نخبة
وصبح متهنى
ما هماهو باسط مية
سكرة ينى
كل ما شافلو زفة
جديدة فوقة يغنى
-و يا عتيد الرماد
نط الحيط بالزانة
تفضى الخانة
تلقى جنابو سيد الخانة
فارش دارو لى اسيادو
بيت كرخانة
غافل ضبحة الفجرى
وجرى السلخانة
يا حميد اقيف
شوف الخلوق محنانة
كفكف دمعتك
والعبرة فوت خنقانة
عسلك سال بحر
فوقو النحل ونانة
يات من طاق ضاق
جازاك دباير دانة
القدال
| |
 
|
|
|
|
|
|
|
|
Re: السيد الرئيس المشير عمر البشير (Re: نعمات عماد)
|
ازيك يا نعومة
أي نعم
بالحيل بين البايع والشارع والسوق قدح النبي
لكن عاد كمان كونو مثلا ونحن حكومة اسلامية مية المية في حديث بقول رحم الله رجلا سمحا اذا باع .. سمحا اذا اشتري
ما يبقو لينا زي شيلوك
| |
|
|
|
|
|
|
|
|
|
Re: السيد الرئيس المشير عمر البشير (Re: نعمات عماد)
|
صحي يا نعومة
البيع عندهم دقست الفارة
الفهلوة
وكون اننا دولة اسلامية مية المية بنكون عارفين الظلم ربنا حرمو علي ذاتو
ومنعنا ليهو
وحرم صفة التكبر علي عبادة وجعلها دون صفاته خاصة به
اها
التكبر والعجرفة فوق ام كم
والظلم زاتو مفهوم وراهو مصلحة للظالم . لكن اسوأ انواع الظالمين من يظلم لمصلحة غيره
الزول اخير عديل يقول انا مستفيد عشان ما يتخت مع اسوأ انواع الظالمين
| |
|
|
|
|
|
|
|
|
|
Re: السيد الرئيس المشير عمر البشير (Re: عبدالحفيظ ابوسن)
|
مشيت اشتري بهارات الابري
الرطل من 40 لي 160 ج
قلت للمدام جلي الفكرة نشتغل ليمون وعرديب وكركدي
انت يا سيدي الرئيس البسوي ليك الابري منو ؟ ولا عندك مصران ما بتشربو؟
انا زاتي ما بشربو لكن عامل حساب لباقي ناس البيت والضيوف
الزيادة قالوا لأنو بهارات الابري مستوردة والدولار وال وال
| |
|
|
|
|
|
|
|
|
|
Re: السيد الرئيس المشير عمر البشير (Re: عبدالحفيظ ابوسن)
|
سلام يا اب سن
انا المحيرني ومضيق اخلاقي للان في ناس تتكلم معاهم تلقاهم مصرين انو ثلاثة اربعة مليون بتكفي البيت في الشهر انا عايز زول يجيب لي كشف حساب لبيت فيهو خمسة اشخاص بياكلوا وبلبسوا وبيشربو وعندهم ناس بمشوا مدارس وما قاعدين يمرضوا حتى
| |
|
|
|
|
|
|
|
|
|
Re: السيد الرئيس المشير عمر البشير (Re: حمد عبد الغفار عمر)
|
اسرة مكونة اربعة حد ادني والدين وطفلين
غاز شهري انبوبة 170
كهرباء 35( دي ميتين متر مدعومة وما بتكفي )
موية 60 ج
الطالب للمدرسة 10 ج طابين في 26 يوم 520 الشهر
نص كيلو لحمة اسبوعيا 70ج الشهر 280 ج
رغيف وجبتين في اليوم 16عيشة في الشهر 480 ج
اشتري جركانة زيت صغيرة اربعة رطل ونص شهري ب 110 ج
شاي رطل واحد في الشهر 100 ج
نص رطل سكر يومي في الشهر 520 ج
بصل وخضار في 450 ج ( كيلة بصل بي 50 واسبوعيا خضار وسلطة ودكوة بي 100 ج يعني اليوم تقريبا 15 ج)
بهارات في الشهر 100 ج
لبن رطل يومي للشفع ب 8 ج الشهر 240 ج
كتب وكراسات وادوات مدرسة وشنط ولبس مقسوم علي الشهر ورسوم المدرسة نقول حكومية في الشهر 166ج
لبسة واحدة وشنطة واحدة وجزمة واحدة في السنة وشراء كراسات وكتب مرة واحدة بداية السنة
مافي ترحيل
مافي مرض
مافي ايجار بيت
الابو بفطر في البيت
ما بشربو جبنة لا عصير
3231 ج في الشهر
ماعندهم كسوة
ماعندهم هدوم عيد
ماعندهم خروف ضحية ولا خبيز
ولا ابري ولا سحور ولا رز
ولا بجيهم ضيف
ولا بجاملو
| |
|
|
|
|
|
|
|
|
|
Re: السيد الرئيس المشير عمر البشير (Re: عبدالحفيظ ابوسن)
|
Quote: مشيت اشتري بهارات الابري
الرطل من 40 لي 160 ج
قلت للمدام جلي الفكرة نشتغل ليمون وعرديب وكركدي |
كلمة مدام دي ما لافقة مع بهارات الآبري ...
كان تقول قلت لي ( الولية ) ... جلي الفكرة ...الخ
هذا و نعلن تضامن قلوبنا معكم يا صاحب في هذا الظلم البائن ...
| |
|
|
|
|
|
|
|
|
Re: السيد الرئيس المشير عمر البشير (Re: يحي قباني)
|
Quote: فمن ذا عاذري من ذي سفاهٍ***يرودُ بنفسه شـر المـرادِ
لقد أسمعت لو ناديت حيـا***ولكن لا حياة لمـن تنـادي
ولو نارٌ نفخت بها أضاءت***ولكن أنت تنفخ في الرمـادِ
أريد حياته ويريـد قتلـي***عذيرك من خليلك من مُراد |
سلام يا حفيظ
| |
|
|
|
|
|
|
|
|
|
Re: السيد الرئيس المشير عمر البشير (Re: حمد عبد الغفار عمر)
|
قباني يا صاحب
ولية وحرمة بتحول البوست كم مليون درجة . ما تقول لي الدايرة 360 درجة وما ممكن وبتاع .. يعني بتلف كم دايرة حتي تركز دة لو ركزت !
مدام بقت كلمة سودانية شعبية ياخ
وحياة الخوة يا قباني بت اختي عرست قلت الرووب !! تصدق
الاوز من اي عرس قريب جدا من الدرجة اللوج . عرس معناتو بند صرف اخير منو تعرس انت وبالذات لو عندك مدام واطفال 😆
| |
|
|
|
|
|
|
|
|
|
Re: السيد الرئيس المشير عمر البشير (Re: عبدالحفيظ ابوسن)
|
حبابك ابوعاقلة
المخاطب غير مقصود!!
المقصود البنقزو ديل !!
مش قالوا نشر الوعي هو بوابة الثورة
عثمان بشرى قال شنو في توما
يا توما من وجعى العنيد
هل أزهرت شجرة حديد
هل غابت الشمس الحبيبة
ومال غصن ضلك وحيد
هل عفّرَت لوحة هواى
فى البحث عن سكة خطاك
خيل الجوى
أشرت ليك شان ترفعى
الباقى الفَضَل وتَحتِّى من
عصبى النوى
وتعيدى لى بعض الوسامة
فى لون غناى
بعض الدّسامة
وتطلعى
أنا أصلو خَان عشقى
الوعى
وقَتَل ملامح طلعتك
كُتر النعى
أشرت ليك ما تطلعى
كيف تطلعى
| |
|
|
|
|
|
|
|
|
|
Re: السيد الرئيس المشير عمر البشير (Re: عبدالحفيظ ابوسن)
|
يا حمد
ناقص اكتر من كتير
لا بشتهو كستر ولا رز
ولا شافع بكا داير لبان ولا بسكويت
ولا سمع صفارة البالوظة ولا الايسكريم وروحك اتشحتفت في شحتفتو وانت خاوي الوفاض
ولا قطعة موزة .. كيلو الموز بي 15 ج ..
لا فواكهة
لا كباية عصير
لا سفنجة حمام
لا فنلة ولباس
ولا عراقي وسروال
ولا عباية للولية .. العباية البتستر ما تحتها من مهترئ الثياب
لباس الشافع بي 60 ج يا حمد والفنيلة 70 ج .. يمشو المدرسة تيوبليس
واتا زاتك وام العيال
لا بتسف لا بتسجر
ولا بتاكل برة بيتك
ولا بتشتهي ليك فنجان جبنة في السوق . جبنة النسوان بي عشرة وجبنة ناس حامد بي 4 ج
ما بتركب اي مواصلات بتساسق بي كرعينك
ومرتك زاتا ما بتمرق شيرنق جبنة مع الجارات
ما بتشتري لمبة كهربا باظت ارخص لمبة بي 30 ج وياها الصناعة الضاربها ما بتم شهر
ولا مرتك بتعمل كركار ولا طلح للدخان ولا فتيل ريحة رش
ونص رطل اليوم دة مافيهو سكة لحلاوة شيل الجسم
ولا بخور
ملايات مافي
يا حمد
عشان تعيش حياة زي الفوق دي داير 5 مليون
ولاحظ ديل طفلين ذكور
لو بنات شيل شيلتك ساي
| |
|
|
|
|
|
|
|
|
|
Re: السيد الرئيس المشير عمر البشير (Re: عبدالحفيظ ابوسن)
|
شكرا ود اب ســن
شاهدت وبألم شديد بالأمس القريب فيديو لسيدة من حرائر السودان
تحمل بيديها فقط بيديها غذاء أهل بيت كامل من الطعام للطبخ
وكلفها 50 ألف جنيه كما شهدت
فقط بصلتين وشوية لحم وشوية توم وشوية صلصة
الصلصة في كيس يشبه كيس الكاتشاب في المطاعم الراقية يعني
ربما أقل من ملعقة صلصة
50 ألف بدون غاز طبخ وبدون افطار المدارس وبدون كهرباء
وبدون أيجار بيت وبدون أي شيء أخــر
لو كل التكاليف االاخرى كلفت 50 ألف أخرى فهذه 3 مليون في الشهر
وكل الرواتب في الطبقة الوسطى تقل عن هذا المبلغ
اذا اشتكى الناس المسؤولين في بلادنا .. لرب العالمين
فيقيني أنهم سيجدون عدلاً .. فقد ورد أن دعوة المظلوم مستجابـة
أحمـد الشايقي
| |
|
|
|
|
|
|
|
|
|
Re: السيد الرئيس المشير عمر البشير (Re: عبدالحفيظ ابوسن)
|
Quote: نص كيلو لحمة اسبوعيا 70ج الشهر 280 ج
رغيف وجبتين في اليوم 16عيشة في الشهر 480 ج
اشتري جركانة زيت صغيرة اربعة رطل ونص شهري ب 110 ج
شاي رطل واحد في الشهر 100 ج
نص رطل سكر يومي في الشهر 520 ج
بصل وخضار في 450 ج ( كيلة بصل بي 50 واسبوعيا خضار وسلطة ودكوة بي 100 ج يعني اليوم تقريبا 15 ج)
بهارات في الشهر 100 ج
لبن رطل يومي للشفع ب 8 ج الشهر 240 ج |
يا عبدالحفيظ حسبتك دي يبدو إنها ناقصة. لأن حلة نصف كيلو اللحمة لن تكفي لوجبات الأسبوع، اللهم إلا إن كانت بقية الوجبات سلطة، وكأنك نسيت حاجات زي العدس والفول...؟
| |
|
|
|
|
|
|
|
|
|
Re: السيد الرئيس المشير عمر البشير (Re: عبدالحفيظ ابوسن)
|
راسا بلا كيف اريتو بالسيف
يا عبدالله
كيف وين مع اعداء الحياة ديل
الناس مستعدة تشتغل بي بطنها .. سخرة عديل
يرضو بتلك الحقبة التاريخية المظلمة
الراجل شغال والمرة شغالة والاولاد شغالين برضو ما مكفين البيت
وعايشين علي الكفاف
تقول لي كيف وما كيف
اجيب ليك اسعار الكيف شراب واستنشاق ؟
| |
|
|
|
|
|
|
|
|
 Re: السيد الرئيس المشير عمر البشير (Re: عبدالحفيظ ابوسن)
|
حين كان " عمر حسن أحمد البشير " ضابطاً في "قواتِ الشعبِ المسلحة" ... اشتهر بقدرته العالية في "التخندق" وقد كان معروفاً بحفره لأعمق خنادق في تاريخ الجيش السوداني ، ولعلك سمعت بمعركة "ميوم" التي احتمى فيها تحت خنادق يصل عمقها لـ "ثمانية أمتار" كما صرح هو شخصياً فيما بعد ل "تلفزيون السودان" حين التقاه التلفزيون وهو ضابط برتبة "العميد" ليحكي عن معركة "ميوم" ...
عموماً يبدو أنّ "السيد الرئيس" ما زال يمارس نفس قدراته وهواياته في "التخندق" .... فهو الآن يتخندق خلف "الشعب السوداني" جاعلاً منه "رهائن" و"كبش فداء" لحمايته من مخاوفه الشخصية المتمثلة في "المحكمة الدولية" وغيرها ...
لا أمل للشعب السوداني من الخروج من هذا الخندق العميق الذي يختبئ تحته "السيد الرئيس" إلا إذا حصل تغيير جذري في قيادة هذ البلد ، وما ذلك على الله بعزيز ، لكن يبدو أنّ الأمر متروك - حتى الآن - لِمَلَك الموت - !
| |
|
|
|
|
|
|
|
|
|
Re: السيد الرئيس المشير عمر البشير (Re: امتثال عبدالله)
|
تعرف يا ابوالريش في معاناة كدة بتاكل المخ
ياخ تعاين للناس تشوفها مهمومة ووجها كالح
ندر تلقا ليك زول مبتسم وهو ماشي
المعاناة البتحول كل نمط التفكير وتشغل المخ بالحصول علي حوجات بدائية . حوجة انو يظل حيا
هرم ماسيلو الشعب السوداني يقبع في سفحه
| |
|
|
|
|
|
|
|
|
|
Re: السيد الرئيس المشير عمر البشير (Re: علي دفع الله)
|
يا علي العنوان مقصود جدا
استفزاك مش كدة ؟
يعني استفزاك اكتر من عناوين الشكر والمبايعة ليهو !؟؟
عناوين كأنها تقول خليهو يطلع ......
واقع الحال يحنن الكافر !
وانت ما بكلموك شايف وعارف
شايف الظلم والغبن وضيق الناس
والناس الكل يوم بتخش في ضيق
| |
|
|
|
|
|
|
|
|
|
Re: السيد الرئيس المشير عمر البشير (Re: عبدالحفيظ ابوسن)
|
رغم انو الفقر حقيقي
والمرض الحقيقي
وتسرب الاطفال من المدارس للفقر
والبقرو زاتهم هيئتهم تسمطر الدمع
رغما عن دة كلو بعض اولياء السلطة يعتبرون الامر مكاواة .. بعتقدو الشعب دة شيوعيين ولا يسار . يتلذذون بتعكير مزاج الناس بالسخرية من رفضهم للظلم والققر والمرض والجوع
ويهللون لقدرة السلطة علي القمع ويطالبون بالمزيد منه عبر تشجيعهم للسلطة
| |
|
|
|
|
|
|
| |
عبدالحفيظ ابوسن
نعمات عماد
Hani Arabi Mohamed
حمد عبد الغفار عمر
يحي قباني
عمر أبوعاقلة
أحمد الشايقي
محمد الأمين موسى
Abdullah Idrees
محمد أبوالعزائم أبوالريش
Nasser Amin
علي دفع الله
فيس بوك
تويتر
انستقرام
يوتيوب
بنتيريست