حقيقة مسألة ثقيلة شديد غناء الجمهور مع الفنان الحاجة دي بتضايقني شديد لمن احضر حفلة عامة وفعلاً بكون عاوز اصرخ في الجمبي يا اخوانا أنا جاي عشان اسمع الفنان ما اسمعكم الجمهور عادة بكمل للفنان لمن يديهم المايك يعني بشيلو معاهو في مقاطع معينة
لكن بالاتجاه التاني ود الأمين اسلوبه كعب .. المفروض يسعى لكسب ود الجمهور ويعتبر غناهم معاهو جزء من محبتهم مفروض يحافظ عليه شوف سلين ديون هنا زعلت كيف لما الجمهور ما غنى معاها تابع من الدقيقة 4:57
03-17-2018, 08:00 AM
علي دفع الله
علي دفع الله
تاريخ التسجيل: 08-31-2012
مجموع المشاركات: 4740
والله يا احمد عمر حتة غناء الجمهور مع الفنان دي مفروض تكون امتع لحظة للفنان ود الامين زول جاف وثقيل شفت الفيديو علي الحلف لوكنت حاضر الحفل كان عملت راي عام وسحبت الجمهور كلو واتمنى الناس تقاطع ود الامين لانو اسلوبو فيه فظاظة وتعالي وجلافى
ابو حميد اخوي يومكـ سعيد باذن الله ، الجمهور يستاهل يمكن لانو ما بادر بمغادرة القاعه مباشرة بعد التصرف المشين دا لكن حقيقة صدمت من تصرف واهانة ود الامين للعازفين خاصة (اسماعيل ) زول خلوق ومهذب
03-17-2018, 08:37 AM
Hafiz Bashir
Hafiz Bashir
تاريخ التسجيل: 12-04-2004
مجموع المشاركات: 7215
الأستاذ محمد الأمين و يبدو أن وصفه ب"الأستاذ" قد طغى في فهمه لدورِه و رسالته كفنان و مغني. نجاح الفنان في اي حفلة يقاس بمقدار ما أدخله من فرح و سرور على جمهوره الذي يعبر عن ذلك بتفاعله مع الغناء. تصرف محمد الأمين يدل على أن محور إهتمامه يدور حول إرضاء نفسه بالأداء دون أي إعتبار لإحساس المتلقين. تبريره لتصرفه بأنه ما بقدر يؤدي كويس تبرير غاية في الركاكة، فالهدف من الحفل ليس كواسة أداءك بقدر ما هو إمتاع جمهور الحفلة و رضائهم. سوف اواصل الإستماع لتسجيلات محمد الأمين في الإستديوهات المغلقة، أما حفلاته العامة فدا طرفي منها.
ود الأمين ياها طبيعته يا علي وعوض .. زول نيرفز جداً بس وسائط التواصل بتسلط الضوء على الجوانب المخفية حكى لي صاحبي زمان جابوهو في حفلة عرس في صالة والناس على الترابيز وبتونسوا وهو شغال .. لما الموضوع سخن معاهو جدع المايك في تربيزة قال ليهم تسمعوني ولا اسمعكم ؟
على الجانب الآخر برضو التغطية على صوت الفنان ما حبابها .. آخر حفلات حضرتها لود الأمين اتعرفت على شلة جميلة شديد بقعدوا في ركن براهم وبكونوا محاطين بناس الاستماع .. كلهم بكونوا رافعين الهدفونات وبسجلوا لما تجي تقعد قريب منهم بقولوا ليك لو سمحت هنا دة مكان الصحفيين فقط ناس الاستماع لو داير تغني ولا تكورك ابدعت يا استاذ عليك الله شوف ليك مكان تاني نحن عاوزين نسجل صوت الفنان براهو
03-17-2018, 09:01 AM
معاوية المدير
معاوية المدير
تاريخ التسجيل: 03-24-2009
مجموع المشاركات: 14411
Quote: تبريره لتصرفه بأنه ما بقدر يؤدي كويس تبرير غاية في الركاكة،
أخيّر أكان سكت من تبريرو دا .
Quote: حكى لي صاحبي زمان جابوهو في حفلة عرس في صالة والناس على الترابيز وبتونسوا وهو شغال .. لما الموضوع سخن معاهو جدع المايك في تربيزة قال ليهم تسمعوني ولا اسمعكم ؟
الزول دا أصلو سغيّل، مرّة كبس لود أُختي دين عشان حاول يصورو، والوآد سغيّر، ؤ برضو شخخت لناس سودانيز اونلآين وانا كنت حاضر ...
سغيل و يجعّر !! انتو بتتكلموا عن طه سلسيمان ولا انصاف وين كدا؟ دا ابو اللمين في مصر عندهم فنانين ومطربين ومغنواتية ورقاصات وعندهم عب وهاب واحد والست واحدة وحليم واحد! كذلك عندنا عشرات الفنانين و مئات المغنين وآلاف المؤدين لكن عندنا أبو اللمين واحد ووردي واحد وأبو السيد واحد حوت واحد الايقونات دي ما بنقول عليها سغيل و بجعّر ياخي حتى نهيره بي فن, كدي اسمعوا "ماهو يا تغنوا انتو يا أغنّي أنا" برواقة وشوفوا كان ما انطربتوا أبو اللميييين ياااااخ! أو كما صرخ بها أحدهم بعد ان قال ابو اللمين آميييين في الصلاة خلف الإمام كما ورد في النكتة!
ثم بتاع الفيديو الاستعدل وكتب عنوان للفيديو "نهور ود الامين" مالو ما سجل باقي الكلام ولا ذاكرته اصغر من حفظ باقي التسجيل - فيها مجاز و تورية قصة ذاكرته الأصغر دي هنا باقي حديث أبو اللمين, كدي شوفو الجكهور تفاعل معه كيف الجمهور الرفع ذوقه و النجني على احساسه على اسنة الرماح
قال يجعّر قال.. الجعري الـ ...
03-17-2018, 09:20 AM
دفع الله ود الأصيل
دفع الله ود الأصيل
تاريخ التسجيل: 08-15-2017
مجموع المشاركات: 13718
Quote: والله يا احمد عمر حتة غناء الجمهور مع الفنان دي مفروض تكون امتع لحظة للفنان ود الامين زول جاف وثقيل شفت الفيديو علي الحلف لوكنت حاضر الحفل كان عملت راي عام وسحبت الجمهور كلوواتمنى الناس تقاطع ود الامين لانو اسلوبو فيه فظاظة وتعالي وجلافى
[} يا علي ولدي مالك على شغل المديدة حرقتني.الراجل عمگ و عارفو بتاع (مزاچ) و دي شغلتو الگابي فيها عرق عمرو.بالله خت في محللو طبيب و لا نجار و لا حتى سواق رگشة: ماسگ مشارطو شغال في عملية؛ و لا ماسگ فارتو و منشارو يصمم ليگ في فترينة ؛ و لا موديگ مشوار . و أنت بكل شلاقة مديت يدينگ تهابش معاه. بس تصور براگ گيف ح تگون ردة فعلو؟!!
[} بالموناسبة ظاهرة تذمر الفنانين دي منتشرة و ليس ود الأمبن فيها بدعا من البشر . سمعنا بالفرعون الراحل/وردي گان برضو بتنرفز لامن يضايق.
[} يحضرني موقف لأبو عرگي في تلفزيون الجزيرة مع المذيع القامة/ حسن عبد الوهاب، و بحضور ود اللمين. فأثناء ما أبو عرگي بغني (تحفة حواء)؛ يلا و قالو گدي العازفين قعدو يطاقشو مع الگمنجات، عبارة بس عن مصنع نسيج. فقام عمنا حسن علق بما يبدي شفقته عليهم. فطوالي أبو عرگي خت المايك و جاء انشبك ليك فيه، قاللو: يعني تقصد إنو أنا إحساسي معقد، و لا شنو؟!! لامن قام ود اللمين ياااا الله حجزم و هدأ الموقف و طيب الخواطر . فياخي بتحصل في أرقى المسارح ما سوو من الحبة قبة.
( ... مع البسمات كتمت دموع و بگيت من غير تحس بيا) [} ياخي الجريدة براها و لا ( بتتعلم) و أخواتها؟!يا جماعة قدرو بس إنو الناس دي بقت ليگم ياها شوية الضوء الباقي.
[} بينحتو في عصارة دمهم في سبيل يفرو البسمة على شلاضيمكم المقرهبات ديل. [} و معاناتم الله عالم بها. ياخي مرة الراحل(الفقيد) بدر الدين عجاج مفرطق لو جيتار فوق صلعة عمنا ود اللمين دا ظاطو. فيا ريت نفوت لهم بعض الهنات العابرة زي دي. [} و بصراحة أبگتني سماحة الجمهور و العازفين لامن قبلو الاعتذار في حينه ، و بكل أريحية رضوا حتى بعرض الأستاذ الدگتور للعدول عن الأغنية القنبلة و استبدالها بأخرى، فخيرها في غيرها.
دي - و العهدة على الراوي - نعليق احد حضور الحفل! سامع يا بتاع كندا حضور الحف حضوووور مش على بعد 14 ساعة طيران وجاس يقول يطنقع الطنقعة الـ ...
Quote: انا من جمهور محمد الامين وكنتا حضور في الحفلة والان بسمع في تسجيل الحفلة .. التصرف الحصل دا حصل بين فنان وجمهورو .. كل فنان عندو غنا معين بقدمو وعندو جمهور معين بستمع لغناهو دا .. اها اي زول بحضر حفلات لود الامين عارف انو كل حفلة بغير في التوزيع الموسيقي وبضيف وبحذف وبتحس انو انت اول مره تسمع الغنية دي.. وطبعا لمن الناس تردد معاو بتجبرو يغني علي حسب التسجيل الحافظنو فما بقدر يغير او يضيف او يحذف .. ودا بخلي الحفلة تفقد طعمه لانو ماحيكون عندها فرق من اي تسجيل قديم .. وغنية زاد الشجون دي تحديدا غنية استماع .. وانا واحد من الجمهور كنت متضايق من الترديد دا لاني خاشي الحفلة عشان اسمع ود الامين ماجاي اسمع الزول القاعد جمبي في المدرج .. عموما ود الامين وضح في الفاصل انو في اغاني مابتتحمل الجمهور يردد معاهو فيها وانو في اغاني تانية بقول بيت والجمهور بقول بيت تاني .. الجمهور اتقبل كلامو دا بصدر رحب جدا وتمو الحفلة بمزاج عالي .. وغنينا اخر 3 اغاني بالترديد معاو لامن فترنا لانها اغاني هجيج .. واسي مرقنا من الحفلة وبنسمع في التسجيلات السجلناها من الحفلة مبسوطين للاخر ..
03-17-2018, 10:23 AM
Zakaria Fadel
Zakaria Fadel
تاريخ التسجيل: 01-24-2013
مجموع المشاركات: 2002
محمد الأمين و وقبله وردي هما الغناء في السودان يمكننا ان نقبل منهما كل ( ما نحسبه) تجاوز عندما يكونا في المسرح يؤديان ما هما عباقرة فيه Having said that يبقى الجمهور هو المستهدف بهذا الغناء اي إساءة او تقليل من شأن هؤلاء ( السمعية ) يكون امر جلل وفي إعتقادي ان الاستاذ أتى بأمر جلل وغلطاته عندنا مغفورة
03-17-2018, 10:19 AM
Amira Hussien
Amira Hussien
تاريخ التسجيل: 11-26-2016
مجموع المشاركات: 1720
التواضع شيمة العظماء من علماء وفنانين ، وأول صفات الفنان الأدب والذوق ، ما تجوا تقول الفنان مجنون. والخ زول سلوكو ما مهذب ده ما فنان ، انا غايتو جنى وجن الفنان شين الخلقة والأخلاق واللفتات والسكنات ، لكن نقول الدنيا حظوظ
علي دفع الله لكن كمان يا علي ما معقولة صوت الجمهور يكون اعلى من صوت الفنان،،،، وكما قال محمد البشرى نحن في السودان عندنا ود الامين واحد وعندنا وردي واحد وعندنا حمد الريح واحد ،،، مع وافر التقدير والاحترام
محمد البشرى اجزم صادقة انك فنان وتتذوق الفن الرفيع....وشكرا كتير ،،،والله كلامك ريحني راحة شديدة،، مع وافر التقدير والاحترام والامتنان
03-17-2018, 10:43 AM
جمال ود القوز
جمال ود القوز
تاريخ التسجيل: 01-25-2013
مجموع المشاركات: 5925
بالغ ود الأمين مع الجمهور .!! .. معقوله ! .. والله زعلني شديد .. الجمهور ده بحبه جدا .. لو ما كده ماكان جا وردد وراهو .. كان يترك ليهم مساحة يرددو وراهو .. وممكن يلفت انتباههم بلطافة .. حكاية ياتغنوا انتو يا أغنى انا .. دي ماجاية خالص .. حضرت ليهو حفلات كتيرة .. عامة أسلوبه جاف جدا .. وفي حفلات اعراس حضرتها .. مشى من نص الحفلة .. لاسباب تافهة جدا .. في حفلة اتنين اتشاكلوا شكلة هايفة .. الناس حجزوهم وقعدوا .. لكن ود الامين أصر إلا يمش .. وفات خلى الفرقة متحيرة .. وخلى العريس والعروس .. خشمهم ملح ملح .. وبوظ العرس على أهله .. دي فظاظة مبالغة .. من فنان في قامة محمد الامين ..
03-17-2018, 10:53 AM
معاوية المدير
معاوية المدير
تاريخ التسجيل: 03-24-2009
مجموع المشاركات: 14411
يا امنثال ولا فنّان ولا حاجة ولا بسمع غنا كتير لكن الحاجة المميزة بتفرض نفسها عليك وتتذوّقها دون شك ود الأمين واحد ووردي واحد لكن حمد الريّح في منه صلاح للي ولا ولّي كدا ما ماعارف
03-17-2018, 11:04 AM
معاوية المدير
معاوية المدير
تاريخ التسجيل: 03-24-2009
مجموع المشاركات: 14411
Quote: ... دا واحد من الاسباب التي جعلتني افضل ( مريم دردوق ) عليه
في الاعجاب
وشكرا4د
[} حتى إتا كمان يا ود الباوقة، تبق ليك إن شاء الله( الهلموتة) في شلاليفگ؛ و ترا ماني ختيان عليك. بالله تلعب بعيد من الأيقونات دي؛ و ظنيتك ياخوي خالت بين ود اللمينو (أبصلعة) بتاعكم داگ البتعرفو براگ .
[} يعني گأنو ود اللمين ما ناقصو علا معجب واحد بس اللي هو شخصگم الظريف. علا فعلن، ياكا شبه ناس(عوضية ردحي و حنان سگليب). [} عمومن، معليش للدخول الخشن ، بس عشان لأول مرة. هذا و إن عدتم عدنا.
03-17-2018, 11:03 AM
فرح الطاهر ابو روضة
فرح الطاهر ابو روضة
تاريخ التسجيل: 10-22-2012
مجموع المشاركات: 11112
ود الأمين قال ليهم يا تغنو انتو يا انا طيب الكلام ده فيه حاجة لما نلقى فنان يطالب الجمهور تستمع ليه وتخليه يبدع وهم يعبروا عن اعجابم بطريقة معقولة الكلام ده المفروض ننبسط منه خاصة في زمن الاستماع بالرجليين العلينا ده زي ما قال الأستاذ محمد سليمان ود الأمين يظل ياهو ود الأمين مبدع معتز بفنه وما يقدمه للساحة الفنية السودانية الجمهور اتفاعل مع ود الأمين وفهم انه قاصد شنو بالضبط واي فنان انا في رايي غير ود الأمين ما ممكن يتصرف التصرف ده يبقى الفنان ما عشان يغني لينا وانحنا ننعرط ونتمرصع ويمد لينا المايك ونردد وراهو زي الببغاوات وبس الفنان والفن رسالة وقيمة وواجب الفنان الواعي يرتقي بذوق معحبيه في الاستماع وأدب الاستماع والتعبير عن الإعجاب شكرا ود الأمين يا ود الباوقة أنصاف مدني كيف معاك
دا شنو دا !، عامل راسك الكبير دا . زولكم دا إنت ؤ ود الأصيل بقدر ما هو مشهوّر بقدر ما هو سغيّل .
Quote: فارتو
البيطنقع علي الجمهور دا أكبر فارة ...
إتا عارف يا ود المدير أنا فوق ما رديت عليگ ليه؟!! طبعن عطفا عليگ و إگرامن لأبوك المدير .عشان عين نگرم ميت عين ؛ و نحن قوم نعطف على صغارنا و نوقر گبارنا و عمنا ود اللمين عصب عنگ واحد من أگابرنا بگل المقاييس يا عديم الذوق.
∆ مسمار: يخسي عليگ، يعني ما لقيت لك حاجة علا تسيب محور القضية و تمسك في شعري ؟!!
03-17-2018, 11:57 AM
Amira Hussien
Amira Hussien
تاريخ التسجيل: 11-26-2016
مجموع المشاركات: 1720
الجماعة ديل لما يكبرو اغلبهم تركيزهم بيقل بحتاجو مجهود عشان يكرزوا مع الموسيقى والكلمات، فى تكريم ابن البادية فى قاعة الصداقة ايضا وقف الغنا وقال ليهم يا جماعة ما تطلعوا تبشروا ما بقدر اركز بس كان اقل حدة ، وردى علية الرحمة كان بياشر بى ايدو لما الجمهور يلتف حولو بمعنى أبعدو وده ظاهر فى حفلتو الاخيرة . فى احتفال بذكرى اكتوبر فى إستاد الهلال وردى غنا اصبح الصبح وعندما بدا ، محمد الامين جه مسرع ومسك ليهو مايك وهاك يا كواريك غطت على صوت وردى بى كورسو مما اضطر وردى الذى كان جالسا ان يقف ويحاول تعلية صوتو مجاراة لود الأمين والزهج باين فى وشو
03-17-2018, 12:04 PM
دفع الله ود الأصيل
دفع الله ود الأصيل
تاريخ التسجيل: 08-15-2017
مجموع المشاركات: 13718
Quote: إتا عارف يا ود المدير أنا فوق ما رديت عليگ ليه؟!! طبعن عطفا عليگ و إگرامن لأبوك المدير .عشان عين نگرم ميت عين ؛ و نحن قوم نعطف على صغارنا و نوقر گبارنا و عمنا ود اللمين عصب عنگ واحد من أگابرنا بگل المقاييس يا عديم الذوق.
∆ مسمار: يخسي عليگ، يعني ما لقيت لك حاجة علا تسيب محور القضية و تمسك في شعري ؟!!
بارك الله فيك يا أصيّل يا ود الأصيّل . يا زول اب راس كبير دا ود البشرى، ثم يأخي نحن لا نعرف نتواصل مع بعضنا البعض لا الغناي بيعرف يتواصل مع الجمهور لا الجمهور بيعرف يتواصل مع الغناي لا الغناي بيعرف يتواصل مع الفرقة، هسّع شوّف عمّك ابو اللمين دا قطعو ناشف مع الجمهور ؤ قبّل علي الفرقة قطعو أنشف معاهم، والجمهور قابل سخفو دا بالتصفيق والفرقة عزفت معاهو لنهاية الحفلة !!!، وحيات ديني نحن بلد العجايب زاتا .
صورتك اللبيض وأسود دي حرّم تاني الخُلآل عِلآ تختو في جيبك ...
03-17-2018, 12:40 PM
Awad Omer
Awad Omer
تاريخ التسجيل: 12-26-2005
مجموع المشاركات: 760
ليه ياجماعة الناس بقت كدة so picky...,[وجارين جري ماسكين في خيط ميت عشان هفوة بسيطة مرتجلة من نجم في قامة ابو اللمين يعتقد انه اثري وجدان الناس علي مدي 50 عام او يزيد . كان ممكن يفتري ويدلع ويقول انه ما بعمل حفلات شعبية في نادي الضباط للشباب ب 30 ج...ويسعر نفسه في العالي والعايزو بيمشي ليهو.
ولو في حاجة استفزت الجمهور في كلامو والا تقديرهم ليهو اهتز كان ترك ليهو المسرح ...لكن دة ما حصل .
كل واحد جاي عايش قصة او وهمة او متخيلها يرفع صوتو ويغني ويخرب مزاج الناس في اغاني الاستماع زي زاد الشجون ...حرام كدة .
03-17-2018, 12:56 PM
يحي قباني
يحي قباني
تاريخ التسجيل: 08-20-2012
مجموع المشاركات: 18708
جمهور مزعج ... لم يفهم اللحظة ... و لا يفهم معنى الاستماع كما اعتب عليه انه كفنان مبدع كان عليه قراءة نوعية الحضور و الغناء له بأغاني خفيفة فقط ... ( كفاهم كان يا معاين من الشباك )
حينما غنى محمد الامين في شمبات و نحن طلبة في جامعة الخرطوم كنّا نردد معه الاغنيات الثورية و هو منفعل معنا ... ثم نستمع و هو يردد غناء الاستماع و نطرب لنشوته... محمد الامين ينجذب اثناء الأداء الاستماعي و يخرج بإبداعات خارج النص الموسيقي كما الممثل البارع على المسرح لذا من الصعب ان يصل لتلك المرحلة و أمامه مثل تلك الفوضى ...
رجاء خاص ... عدم استخدام الكلمات المسيئة في حقه ... لان هذه الكتابات ستظل للتاريخ من حق الجميع رفض الموقف ... و لكن كيل الاساءات لا يليق بعملاق مثله ...
03-17-2018, 01:00 PM
معاوية المدير
معاوية المدير
تاريخ التسجيل: 03-24-2009
مجموع المشاركات: 14411
السوداني مسكين وطيب يهينه الرئيس ويقتله عديل كدة وتهينه الحكومة ومنسوبيها وود الامين النيرفز معقولا ياخ ناس داخلة بحقها تستمتع بالطريقة التي تراها ليس للفرح طريقة كل يعبر بطريقته....
الزول دا إنقاذي صغير ليس الا، انه زمن الإنقاذ انه زمن السقوط .............. بكرة نفرح كلنا بطريقتنا ونغني لي الليل بالصباح؛ نفرح بلا رقيب ولا حسيب ولا مراقب؛ ............
03-17-2018, 01:24 PM
دفع الله ود الأصيل
دفع الله ود الأصيل
تاريخ التسجيل: 08-15-2017
مجموع المشاركات: 13718
أولن آسف جدن يا معاوية,,,للخشونة معاك لأنك بس هبشت أيقونة مو ساهل أبدن رغم انفعاله ربما ما كان في محله.و لكن يكفي رفضه دون المساس برصيد صاحبه الطويل و عريض. فلگل فرس كبوة و لكل سيف نبوة.
[} گفاية ياخي عوض شكسبير من شويةقعد يتهابل و يطنظ على أبو عركي لامن فتحعلى نفسو خشم التنين و قوم عليها الدنيا و لم يقعدها. فيا ريت تخلونا محاضرخير مغاليق شر . [} ثم مالا صورتي اللبيض و أسود. أقللو حقتي براي ، ما زي مارتن لوثر گنج ؛ و شتان بينها و بين( الفتى الأبنوسي) ذاگ العاشق لأتبرا . و أنا "مالو أعياه طال بي النضال بدني و ىوحي لبه لبع مشتهية ود مدني""""
عجبي منك يا (قبة) انت اساءت لدين الله وترجو من الناس ما يسئوا لود الامين؟ وهذا قولك بالاحمر: رجاء خاص ... عدم استخدام الكلمات المسيئة في حقه ... لان هذه الكتابات ستظل للتاريخ وانت كلامك بمشي مذبلة التاريخ ام التاريخ؟ #### هل قرأت ما قاله جلال الدين الاسيوطي شعراً: مامن كاتب إلا سيفنى ويبقي الدهر ماكتبت يداه فلا تكتب بكفك غير شيئ يسرك في القيامة ان تراه #### اما مداخلة معاوية المدير جاء فيها ما يسرك ويغضب الرب وهو ينقل قائلاً: الزول دا أصلو سغيّل، مرّة كبس لود أُختي دين عشان حاول يصورو، والوآد سغيّر، ؤ برضو شخخت لناس سودانيز اونلآين وانا كنت حاضر ...
03-17-2018, 01:11 PM
Amira Hussien
Amira Hussien
تاريخ التسجيل: 11-26-2016
مجموع المشاركات: 1720
باختصار اللخص القصة وقال ده ما فنان ده غناى أصاب كبد الحقيقة ، ود اللمين زمااان شاكل العازفين قاموا قاطعوهو و بقى يعزف ليهو عجاج الله يرحمو وشاكل عجاج لما خلاهو اتطاول على وبقت مضاربة ودق
03-17-2018, 01:12 PM
Amira Hussien
Amira Hussien
تاريخ التسجيل: 11-26-2016
مجموع المشاركات: 1720
باختصار اللخص القصة وقال ده ما فنان ده غناى أصاب كبد الحقيقة ، ود اللمين زمااان شاكل العازفين قاموا قاطعوهو و بقى يعزف ليهو عجاج الله يرحمو وشاكل عجاج لما خلاهو اتطاول على وبقت مضاربة ودق
03-17-2018, 01:18 PM
يحي قباني
يحي قباني
تاريخ التسجيل: 08-20-2012
مجموع المشاركات: 18708
لو كانت أي أغنية غير ذات الشجون لكانت مقبولة عند ود اللمين...
وللذين لا يعرفونها ، فهي التي قال عنها ود اللمين : ( تم تلحينها عام 1968 ، وانتظرت ثلاث سنوات حتى تتخرج أول دفعة من معهد الموسيقى حتى يؤدونها كما ينبغي)
الشغيل
03-17-2018, 01:39 PM
Hani Arabi Mohamed
Hani Arabi Mohamed
تاريخ التسجيل: 06-25-2005
مجموع المشاركات: 3515
المشكلة الما حا يفهمها ود الامين هي: لو عندو اي تغير في الغنية يمش يشوف ليه حتا تانية .. الجمهور خشا للغنية ذاتها وبنفس الطريقة الغناها بيها اول مرة او الاعتاد عليها .. ثم ما الذي يدريه يمكن تغيراتو دي ما حا تعجب المستمعين ..
حكاية تصنيف ثابت للأغاني بإنها أغاني إستماع دي وهمة بتاعة ناس متسلطين ساي. أي أغنية تتغنى ممكن تصلح لأي شي:استماع، هجيج، زنق،،، كلو ممكن. الجمهور هو البيحدد شكل تفاعلو مع الأغاني بدون أي وصاية. تصرف محمد الأمين دا فيهو مصادرة لحق الجمهور في التعبير عن طربهم و تفاعلهم مع الأغنية. و ما عندو أي حق يفرض على الجمهور التلقي بطريقة معينة. و حكاية إنو ما يقدر يغني مع الجمهور دي قصور منو كفنان و ليست ميزة تحسب له بأي حال. اما حكاية داير يغير و يبدع في الأداء دي فالمفروض أن يولي اهمية اكبرلإسعاد الجمهور بالطريقة التي يختارها الجمهور لو أنه يحترم جمهوره.
حصلت في آخر حفلة جماهيرية لعبد الحليم حافظ وهو يغني قارئة الفنجان،،الجمهور لم يملك نفسه من التصفيق والصفير طوال زمن الاغنية،،اوقف الأغنية وقال للجمهور : أنا برضو بعرف أزعق وبعرف أصفر وأطلق ممتعضاً صافرة طويلة وواصل في أداء الأغنية،،الجمهور بادله العداء في لحظتها وقالوها له جهرةً : دي هوشة ياحليم ،،
مافعله محمد اللمين قسوة على جمهور يحبه ويردد أغانيه التي يحفظها عن ظهر قلب،، الجمهور ردة فعله كانت خايبة جداً وكان الرد المناسب أن يتركوا له الصالة ليغني وهي خاوية ليسمع صدى صوته دون غيره،،
Quote: السوداني مسكين وطيب يهينه الرئيس ويقتله عديل كدة وتهينه الحكومة ومنسوبيها وود الامين النيرفز معقولا ياخ ناس داخلة بحقها تستمتع بالطريقة التي تراها ليس للفرح طريقة كل يعبر بطريقته....
ودي الشعب السوداني بقا يلقاها تقريبا من اي زول عندو حاجة .. يعني عادي تلقى بتاع البقالة يتنرفز في الزبون الجاي بي حقو وتلقى الطبيب ينفرز في المريض .. وتلقى الموظف والشرطي وبتاع المرور .. تقريبا اي زول وقفو ليهو في صف .. لكن اخر حاجة كنا نتوقعها ممكن تجي من فنان، وخاصة قامة زي ود الامين .. عادي زي دا والله اعلم يتلقي ما يفرق بين الاعجاب والحب، والتقديس ..
.
03-17-2018, 02:10 PM
Ali Alkanzi
Ali Alkanzi
تاريخ التسجيل: 03-21-2017
مجموع المشاركات: 9253
بتقول يا (قبة) انت عارف قبة دي اسم رائع صورة طبق الاصل لانو القبب الفي السودان كلهاما تحتا فكي يقولو ليك الشيخ فلان حلم فلان بانو ظهر في الحتة الفلانية تاني يوم تقوم قبة في الحتة الفلانية @@@@@@ وانظر لقولك بالاحمر: عجبي منك يا (قبة) انت اساءت لدين الله وترجو من الناس ما يسئوا لود الامين؟ بقت مساككة يعني ... سمح ..... @@@@ اساكك ليه؟ بس اعمل حسابك كلام زي القتلو عن ود الامين ما تكررو تاني . فاهم ولو عملتا كدا ما بتكون في اي مساككا مني تكرر زي الكلام دا تاني في المنبر دا طوالي انط ليك في حلقومك إلا ما اقراهو فاهم يا قبة؟
03-17-2018, 02:10 PM
Osman Mahmoud
Osman Mahmoud
تاريخ التسجيل: 09-05-2017
مجموع المشاركات: 581
Quote: ما ضر ود الأمين ما فعل وما سيفعل بعد إبداعاته الرائعة... ..ود الأمين يا خي .... الفن ذوق وأداء رفيع مش هرجلة وكواريك...
تقريبا حفل ودالامين اقل ما يقال عنه تفاعلي جدا .. يعني الحفلات ابدا ما مكان للاستماع الهادي ابدا .. كنت ما بفوت ليه حفلة، وخاصة في نادي الضباط، وخاصة حفلات رأس السنة .. واستغربت فعلا من رد فعلو الفي فيديو موضوع البوست، لأنه اول واخر من يعلم "بصخب" حفلات ود الامين هو نفسه ود الامين .. والموضوع هو اكبر بكثير من مجرد يوزن اغنية بطريقة ممكن تكون جديدة، او فيها اضافات"ول يقولو شنو اهل الفن" الموضوع المهم هو طريقة التفاعل نفسها التي تضايق منها ود الامين، انا بتكلم عن الاغلبية الساحقة في المسرح دائما ما يطربون بطريقة الترديد معه، " شخصيا اكثر شيئ كان يعجبني في حفلات ود الامين هو تفاعل الجمهور معه بهذه الطريقة" وكل الحفلات الحضرتها شفت فيها تفاعل ايجابي من ود الامين، والله كل ملاحظاتي فيه كنت بشوفو لدرجة يتعجب جدا بترديد الناس معاهو .. وفي اغاني يمد في وقتها وفي اغاني تتكرر، المهم في تقديري ممكن يغفر له الناس، ولكن فقط علينا ان نعلم ونحس بفداحة خطأه، يغتفر او لا دا موضوع تاني ..
تحياتي واحترامي ..
.
03-17-2018, 03:04 PM
حمد عبد الغفار عمر
حمد عبد الغفار عمر
تاريخ التسجيل: 06-06-2008
مجموع المشاركات: 7662
جاءنا زمان نستهزآ فيه بمحمد الامين ،،، جمهور مزعج ... لم يفهم اللحظة ... و لا يفهم معنى الاستماع كما اعتب عليه انه كفنان مبدع كان عليه قراءة نوعية الحضور و الغناء له بأغاني خفيفة فقط ... ( كفاهم كان يا معاين من الشباك ) حينما غنى محمد الامين في شمبات و نحن طلبة في جامعة الخرطوم كنّا نردد معه الاغنيات الثورية و هو منفعل معنا ... ثم نستمع و هو يردد غناء الاستماع و نطرب لنشوته... محمد الامين ينجذب اثناء الأداء الاستماعي و يخرج بإبداعات خارج النص الموسيقي كما الممثل البارع على المسرح لذا من الصعب ان يصل لتلك المرحلة و أمامه مثل تلك الفوضى ... رجاء خاص ... عدم استخدام الكلمات المسيئة في حقه ... لان هذه الكتابات ستظل
شكرا يا قباني ياخ
انا ما عارف وين المهانة للجمهور في الحصل دا وخصوصا بعد ما وضح وجهة نظره (امكن شوية صرامة زايدة شوية وضرورية ) اغنية زمنها صعب وعايزة تركيز عشان تتغنى ما يسمعوا بس زي ما كان بعملوا المصريين مع أم كلثوم طول ما هي بتغني مافي زول حتى بصفق لحدي ما تنتهي من الكوبليه والله رائحة ليكم كرامة ساي
شوفوها ضاعت وين ومنو الضيعها
الجمهور يغني زاد الشجون؟ ياخ الباشكاتب نفسو بيعاني عشان يغنيها
واحد في الفيسبوك كاتب تخيل دكتور بعمل ليك في عملية وانت قمت قابضتا المقصات والمباضع بتاعتو
03-17-2018, 03:46 PM
دفع الله ود الأصيل
دفع الله ود الأصيل
تاريخ التسجيل: 08-15-2017
مجموع المشاركات: 13718
التجلة لك يا حمد. ياهي نافي داعي للمشاوير. اعتبرني أنا اللافحا. بس حبيت أقول ليگ نحنو هنا. و يمكن في سبب تاني ، إنو الاسم مطابق تقريبا لزميل (حنتوبابي) گان فنان لامع و لعله من شادلي أو مريود أيام العازفين ناس فرح حمد (تنوب) و الهادي صادق (طابت)الجزيرة.
03-17-2018, 03:58 PM
Hafiz Bashir
Hafiz Bashir
تاريخ التسجيل: 12-04-2004
مجموع المشاركات: 7215
أعتقد في الحفلات الجماهيرية الفنان من حقه يمنع التسجيل والتصوير الذي ممكن يخرج مشوها ويسئ للأداء لكن طالما هي حفل جماهيري مفتوح ومدفوع الثمن ما من حقه ينفعل بهذه الصورة وثانيا لو في اغنية لها ميزات خاصة وطلبت منه قبل أن يبدأ فيها ممكن يطلب من الجمهور برجاء خاص طالبا منهم الصمت والاصغاء في هذه الاغنية تحديدا .. طالما هو لم يبتدر بهذه الخطوة كان عليه ـأن يكملها بأي صورة وبصخب و صفير وترديد أو جوطة .
03-17-2018, 04:35 PM
يحي قباني
يحي قباني
تاريخ التسجيل: 08-20-2012
مجموع المشاركات: 18708
اساكك ليه؟ بس اعمل حسابك كلام زي القتلو عن ود الامين ما تكررو تاني . فاهم ولو عملتا كدا ما بتكون في اي مساككا مني تكرر زي الكلام دا تاني في المنبر دا طوالي انط ليك في حلقومك إلا ما اقراهو فاهم يا قبة؟
فاهم يا قبة كمان ؟
انت زول بليد ليس الا ...
احترم سنك ... حقيقي رجل اهبل ... و عديم فهم ...
قال 6000 كتاب قال ...
كالحمار يحمل اسفارا ...
03-17-2018, 04:49 PM
حمد عبد الغفار عمر
حمد عبد الغفار عمر
تاريخ التسجيل: 06-06-2008
مجموع المشاركات: 7662
قلتها زمان هنا الزول ده من ما قعد فن بيت حمد الريح مع بشّة رئيس على الكنزى مرق من نفسى اهو هسى بقى يطربق طربقة البشير و الكنزى فاضل ليهو يبقى عضو فى سودانيز قلتها فى قروب و اقولا هنا يمين الله لو كنت من ضمن الحضور كانت طلعت المسرح و قلعت قروش التذكرة منّو و معاها حق الزمن الضيعتو معاهو و اشيل المايك كمان
03-17-2018, 08:50 PM
Osman Musa
Osman Musa
تاريخ التسجيل: 11-28-2006
مجموع المشاركات: 23082
بعد 22 سنة من متابعات الحفلات المفتوحة للفنانين الكبار دخلت حفلة الأستاذ محمد الأمين بنادي الضباط في العمارات . دخلت الحفل بي دعوة كريمة من الأخوان أولاد المكي بمناسبة عودة عبدالعزيز المكي الي أمريكا . حقيقة كانت سهرة جميلة خرج منها الجمهور شاكر للفنان الضخم ود الامين . و حقيقة لاملاحظ أنو محمد الامين عمل تعديلات جديدة و جميلة في موسيقتو ودخل شغل رهيب بالعود . والاملاحظ الجمهور حافظ حتي الموسيقي الجديدة , ومتابع شديد و خاصة الناس البتدخل الصفوف القدامية . تسمعها تغني معاو وتتحرك و ترقص . الأستاذ محمد الامين فنان متفرد و جد مدهش وداير الناس تسمع . وأكيد جمهور محمد الامين ما ح ياخد حاجة في كلام الأستاذ ولا الفرقة الموسيقية . أرجو ذلك
03-17-2018, 08:54 PM
ABUHUSSEIN
ABUHUSSEIN
تاريخ التسجيل: 08-14-2002
مجموع المشاركات: 39330
يغيظنى الزول البستحم ويقشر ويتريح من العصر عشان يمشى يستمع لحفلة فنان ، فيقوم يمشى يغنى بدل الفنان ويقد اضان المستمع القاعد جنبه بصوته النشاذ الممجوج وزمنه الفارق .. 😬😬 مفروض الزول البغنى مع الفنان ده ويستلم الاغنية على حسابه يقدر مشاعر الناس القاطعة تذاكر عشان تسمع الفنان وليس ليهو هو 😶
03-18-2018, 02:16 AM
معاوية المدير
معاوية المدير
تاريخ التسجيل: 03-24-2009
مجموع المشاركات: 14411
والله الجمهور زاتو ما عندو اى عقليه فى لحظته كان كلو يطلع بره ويتركه للعازفين بتاعنو دي وهو زاتو فاكر نفسو شنو يعنى وهل صوتو ده صوت يطرب غايتو بس لله فى خلقه شؤون
03-18-2018, 05:24 AM
ABUHUSSEIN
ABUHUSSEIN
تاريخ التسجيل: 08-14-2002
مجموع المشاركات: 39330
يعني الملحمة طلعتوها اي كلام ... ؟؟؟ و بتتعلم من الايام راحت شمار في مرقه ...؟؟؟ و عويناتك ضاعت تحت الكرعين .... ؟؟؟؟ و الجريدة و قلنا ما ممكن تسافر و حيات ابتسامتك و زاد الشجون كمان ... .... ... الراجل فنان و ملحن و موسيقاروجردتوه من ديل كلهن ابو الامين ما محتاج لي تزكية منكم لأنو اعمالو بتزكيه لكن طلعتو شعب يجيد اغتيال الشخصية كنا مفتكرين ناس لالا هم وحدهم من يجيدونها و هي ماركة مسجلة بي اسمهم لكن طلع غالبية الشعب السوداني يجيدها و ببراعة تغتالون اي شخصية دون حياء او رحمة
قومو لفو ......
03-18-2018, 05:45 AM
معاوية الزبير
معاوية الزبير
تاريخ التسجيل: 02-07-2003
مجموع المشاركات: 7893
ود اللمين قال للناس إنو قاعد يرتجل أثناء الغنا ويعمل حاجات جديدة بينما الجمهور بغني الأغنية باللحن والأداء بتاعنها المحفوظات طق طرق مما يضطراهو يجامل الجمهور ويترك الارتجال المبدع ما قال ليهم ما تنطربوا والكلام ده منطقي جدا وين المشكلة؟!
في حفلة رأس السنة 2010 أعتقد بنادي الضباط بعد ود الأمين خش في الكوبليه التاني من أغنية ذاد الشجون فجأة وقف الغنا لنفس السبب و أدى الجمهور محاضرة زي عشرة دقائق عن انهم مفروض يسمعوا بس وما يشوشروا عليهو وعلى العازفين لأنو الحفلات دي بتتصور وما عاوز ينزل ليهو تسجيل فيهو شوشرة . جزو من الجمهور شاف الأستاذ عندو حق وجزو شافا طنقعة وعدم زوق من الأستاذ. الحفلات الجماهيرية أعتقد غناء الجمهور بديها طابع جميل عكس تسجيلات الاستوديوهات وجلسات الاستماع واغلب المغنيين في الحفلات الجماهيرية ما بلتزموا بكل اللزمات الموسيقية ويرتجلوا أحيانا حسب تفاعل الجمهور .
03-18-2018, 06:56 AM
دفع الله ود الأصيل
دفع الله ود الأصيل
تاريخ التسجيل: 08-15-2017
مجموع المشاركات: 13718
كتب حمد عبد الغفار عمر: يا دفع الله ود الأصيل انت داير ليك قعدة خاصة خارج البوست دا ما دام بتذكر فرح حمد والصادق شوف لجمال الصدف أمس شفت كورال معهد الموسيقى زمن الكوريين وفيهو فرح حمد مع قادة الكورال وهو بعزف في العود شفتا كيف تحياتنا تاني
# و من عجائب الصدف برضو يا حمد إني قبال شهر تقريباًجابني الدرب ماري بقرية تنوب(مسقط رأس أخونا فرح حمد)، فتزاحمت في دماغي أرتال من الذكرياتالعتيقة. و الأغرب من كدا كمان مرة بشاهد في رحيق الأمكنة على قناة الشروق منقولاً من حنتوبنا الجميلة حيث استضافت مذيعتنا المحتشمة الخلوقة / إيمانن بركية فيما من استضفات أستاذنا الديناصور / الطيب علي و من قدممته على أنه الدكتور/ فرح حمد.فهل كان هو هو فرحنا، أم أن البقر تشابه علي لا أدري .
@ عمومن أنا جاهز للمة دكاكينية كاربة معاك،حيثما تكون؛ و يا ريت ينضم لينا أخونا (KABAR) كما تفضل بتعريف نفسه هنا و يا ريتا كمان يتداعى غإى قصعتنا كول الحنتوباب الهنا و الهناك على صعيدٍ واحدٍ.
الأخوة : abdlaziz eisa hafiz bashir معاوية المدير ود الباقة محمد البشرى الخضر فرح الطاهر ابوروضة دفع الله ود الاصيل امتثال عبدالله جمال ود القوز zakaria fadel amira hussien ali alkanzi hani arabi mohamed osman mahmoud عبدالمنعم الطيب حسن عبدالعزيز محمد عمر يحي قباني عبداللطيف بكري احمد حمد عبدالغفار درديري كباشي جلالدونا قسم الفضيل مضوي محمد munir kabar السنجك عثمان معاوية الزبير عثمان الامام ــــــــــــــــــــــــ الاستاذ - لا شكـ أخطأ في حق محبيه وفرقته الموسيقية واعتذاره المطول جاء بعد الفاصل وتنبيه الفرقة له على فعلته ما جعله يقدم تبريراته . ويظل ود الامين هو الموسيقار والفنان
03-18-2018, 09:33 AM
دفع الله ود الأصيل
دفع الله ود الأصيل
تاريخ التسجيل: 08-15-2017
مجموع المشاركات: 13718
Quote: لأخوة :abdlaziz eisahafiz bashir معاوية المديرود الباقة محمد البشرى الخضر فرح الطاهر ابوروضةدفع الله ود الاصيل امتثال عبدالله جمال ود القوز zakaria fadelamira hussien ali alkanzihani arabi mohamedosman mahmoud عبدالمنعم الطيب حسن عبدالعزيز محمد عمر يحي قباني عبد اللطيف بكري احمد حمد عبدالغفار درديري كباشي جلالدونا قسم الفضيل مضوي محمد munirkabar السنجك عثمان معاوية الزبير عثمان الامام ــــــــــــــــــــــــ الاستاذ - لا شكـ أخطأ في حق محبيه وفرقته الموسيقية واعتذاره المطول جاء بعد الفاصل وتنبيه الفرقة له على فعلتهما جعله يقدم تبريراته .ويظل ود الامين هو الموسيقار والفنان.
@ تشكراتنا لك ود جاه الرسول لحسن نوايا صنيعك بنا أن وضعت مبضعك على موطن أذىً فينا كمبدعين و كمجهور على حدٍ سواءٍ (على الاقل كما أرها).حادثة يستعصي تفويتها لِتمر على عواهنها هكذاكما السادة الكرام .
# كما لا يفوتنا أن نتوجه بالشكر أجزله لكل من أدلو ا بأشطان دلائهم هنا، على توافقهم بالحد الأدنى على الإلقاء باللائمة ع لى الأستاذ ، نظراً لمخاشنته غير الموفقة لجمهورٍ يعشقه بعفويةٍ خرافيةٍ لا يُحسَدُونَ عليها، لدجة (ألَّا يُحْسِنُوا ) الإصغاءَ إليه.
# كذلك و جب علينا الوقوفُ قياماً تجلةً لهذا الجمهور المُعلم لنوفه (التبجيلا) و هم يربؤون بذوائقهم الرفيعة عن معاباةِ رجلٍ كهلٍ (شاطرٍ) على غلطة لا يمكن تفويتها لِتَمُر مر السحاب لا ريثٍ ولا عجلٍ و هي إنما تُحْسَبُ عليه بعشرِ أمثالِها. دونما أدنى مجال للمغالطة. احتراماتي
السلام عليكم جميعا...ود اللمين فنان ما في شك...تصرفه ما كان لائق أكيد (على الأقل كما أرى).الجمهور غلطان وما غلطان...دي كيف ما عارف بس حاسي بالحاجة دي كده..بس المزعلني صديق خليجي أول من أرسل لي المقطع ( تفتكروا عايز يقول لي شنو؟)أنا غايتو قطعتها في مصاريني لأنو قطعا الزاوية الرسل منها الصديق غير زاويانا كلنا...فشنو ود اللمين كان يتحمل... لأنو فنان والفنان صاحب رسالة واصحاب الرسالات.. لابد لهم من التحمل والعزم. وبعدين ود اللمين لازم يعرف أن الميديا هي سيدة الموقف وما في شيء بدسّ ... هسه أنا في المصيبة إنو غير السودانيين الطوالي نمطوا التصرف بأنه بعض من حمق طالما وسمونا به أقول زورا وبهتانا... كسرة...في تقديري ليس لدينا ثقافة الأستماع للأغاني... نحن شعب يهزمنا قرع الطبول ومع أول لازمة غنائية نتمايل... فهمنا أم لم نفهم... وده من العلينا...يعني مدسترين بسبب الضغوط وما إلى ذلك...جلسات الاستماع الراقية ما بتشبه واقعنا..معليش مع محبتي لكم جميعا
لا اعتقد أن الخلل في ود الأمين لوحده ولكن ايضا فيمن يبرر له مثل هذا الفعل ، كلنا نستمتع بسماع اغاني ود الأمين ولكن ان يتعامل مع الجمهور بهذه الطريقة المهينة ويتقبل جمهوره ذلك بهذه السهولة ويتفنن في ابداء المبررات لسلوكه هذه شيء محيرجدا. شكر خاص لمن اورد فيديوهات ل سيلين ديون واستيفي وندر و مطربة فرنسية اخري .. الحقيقة المقارنة بين هؤلاء وود الأمين مقارنة بين الشمس والأرض، فهؤلا يطربون وينتشون لتفاعل الجمهور معهم ويشعرهم ذلك بقيمة فنهم ، ويعرفون جيدا أن حفلات المسارح " كونسرت " هي لتطريب وامتعاع الجمهور ويستمتع المؤدي لاستمتاعهم أما التسجيل فيتم في الاستديوهات المغلقة. عموما أعتقد ان هناك خلل ما يجعل الخلود الى الأرض والرضاء بالقليل وعدم التغيير للافضل سمة مميزة لنا كشعب في كثير من المجالات.
لسلام عليكم جميعا...ود اللمين فنان ما في شك...تصرفه ما كان لائق أكيد (على الأقل كما أرى). الجمهور غلطان وما غلطان...دي كيف ما عارف بس حاسي بالحاجة دي كده.. بس المزعلني صديق خليجي أول من أرسل لي المقطع ( تفتكروا عايز يقول لي شنو؟) أنا غايتو قطعتها في مصاريني لأنو قطعا الزاوية الرسل منها الصديق غير زاويانا كلنا...فشنو ود اللمين كان يتحمل... لأنو فنان والفنان صاحب رسالة واصحاب الرسالات.. لابد لهم من التحمل والعزم. وبعدين ود اللمين لازم يعرف أن الميديا هي سيدة الموقف وما في شيء بدسّ ... هسه أنا في المصيبة إنو غير السودانيين الطوالي نمطوا التصرف بأنه بعض من حمق طالما وسمونا به أقول زورا وبهتانا. .. كسرة...في تقديري ليس لدينا ثقافة الأستماع للأغاني... نحن شعب يهزمنا قرع الطبول ومع أول لازمة غنائية نتمايل ... فهمنا أم لم نفهم... وده من العلينا...يعني مدسترين بسبب الضغوط وما إلى ذلك.. .جلسات الاستماع الراقية ما بتشبه واقعنا..معليش مع محبتي لكم جميعا (عدل بواسطة Kamal Karrar on 18-03-2018, 07:48 AM) ــــــــــــــــــــــــــــــــ سلامات Kamal Karrar
الخليجي عايز يوصل ليك انكم يا سوادنه على قولتهم خلقكم ضيق حتى على مستوى الفنانييييييين والمبدعيييييين هههههههههه
Quote: جمهور مزعج ... لم يفهم اللحظة ... و لا يفهم معنى الاستماع كما اعتب عليه انه كفنان مبدع كان عليه قراءة نوعية الحضور و الغناء له بأغاني خفيفة فقط ... ( كفاهم كان يا معاين من الشباك )
03-18-2018, 08:44 AM
ولياب
ولياب
تاريخ التسجيل: 02-14-2002
مجموع المشاركات: 3785
لو كان الفنانون من الشباب (الجيل الجديد) الذين عودو الجمهور على الترديد خلفهم يملكون القدرة على انتاج مؤلفات موسيقية وانتاج موسيقي مثلما انتج ود الأمين وصحبه وأبناء جيله ومن كان قبله ساعتها كان يحق لكم انتقاد ود الأمين ولومه. أما أن تلزموا ود الأمين بما أحدثه من جاء بعده ليغطوا به على ضعف مقدراتهم الموسيقية فهذا والله ظلم وحقارة راسها عديل واستخفاف برجل بذل وقدم للموسيقى والغناء ما لم يقدم الجيل الحالي عشره ولا خمسه .
ود الامين ليس "أكبر" من الاعتذار ولن "يعفيه" تاريخه وابداعه من تقديم اعتذار لمحبيه ومستمعيه ولن يجدي ايجاد مبررات لتصرفه
المسالة ليست في صحة او خطا ترديد الاغاني مع الفنان وتاثيرها على اداء الاغنية وانسياب الحانها ولكن في الاسلوب والتصرف الاحمق الفج وسوء اللادب مع مستمعيه
وتماما كما قال الزميل قسم الفضيل تصرفه يشبه تماما تصرف بروف قاسم تجاه احدى طالباته مع الاختلاف في التفاصيل ولكن الفكرة هى نفسها...خصوصا لمن يحاولون ايجاد مبررات ياخ لا يوجد مبرر لسوء الادب والحمق...تحت اي بند او باب
03-18-2018, 11:39 AM
محمد البشرى الخضر
محمد البشرى الخضر
تاريخ التسجيل: 11-14-2006
مجموع المشاركات: 28869
يا هوّاري سوء الأدب و الحمق وين؟ هل رمى العود وطلع ورفض مواصلة الحفل ام شتم المستمعين ام ضربهم كما فعل قاسم بدري الراجل انزعج وعجز عن تكملة الأعنية وسط نهيق الجمهور فتوقف عن الغناء وخاطبهم يا تغنوا انتو ا يا اغنّي أنا وبعد الفصل وضّح ليهم سبب تصرفه
03-18-2018, 11:50 AM
Hatim Alhwary
Hatim Alhwary
تاريخ التسجيل: 01-23-2013
مجموع المشاركات: 2418
اسلوبه وكلماته للجمهور واخراسهم عن الترديد معه تعتبر في نظري سوء ادب تجاه مستمعيه ومعجبيه هناك الف طريق لتوصيل طلبه للجمهور بكل ادب وذوق ودون فظاظه ودون اعتبار وتفهم لمشاعرهم طولة البال مهمه انت تتعامل مع جمهور ولازم تضبط كلماتك وتصرفاتك ول كمان لا تغني في مسارح واماكن عام واكتتفي فقط باتسجيلات والاستديوهات المقفولة
يا ود البشرى لازم ودالامين يعرف انو الكلمة الاولى والاخيرة هى للجمهور...ودي العلاقة "الطبيعية" بين كل فنان وجمهوره
غير كده
يبقى واحد "متسلط" فقط على الجماهير باسم الفن والابداع
03-18-2018, 11:57 AM
محمد البشرى الخضر
محمد البشرى الخضر
تاريخ التسجيل: 11-14-2006
مجموع المشاركات: 28869
تحياتي هواري بدل تستخدم لفظ اخراسه للجمهور ممكن تقول طلب منهم عدم الترديد معاه و الاستماع! ما كان شايل ليه مسدس أو خرطوش ليخرس به أحد الشي التاني كيف تكون الكلمة الولى و الأخيرة للجمهور؟ ود الامين مافي مسابقة ذا فويس عشان يستجدي اصوات الجمهور ولايكاتهم هو يقدم ابداع هنا زيو وزي الطيب صالح في رواياته او شكسبير في مسرحياته عليه ان يجوّد عمله و ابداعه كما يراه هو أولا آخر كلمة هي كلمة الجمهور, عجبه كان بها ما عجبه يشوف محل يعجبه وين استغرب في الالفاظ التي وصف بها ود الأمين من أمس فمن بجعّر لكوز أخيرا بقى متسلط!! هل صرنا نحمل ذاكرة ذبابة كلنا, هل فقر وجداننا و جف احساسنا للدرجة دي!
03-18-2018, 01:56 PM
عمر نملة
عمر نملة
تاريخ التسجيل: 11-08-2009
مجموع المشاركات: 2550
الرجل لم يفعل أي تصرف خاطىء وما فعله يدل على أنه يحترم فنه وأنه رجل صريح ومخلص لفنه ولا يريد شراء إرضاء مستمعيه بأي ثمن وهذا موقف يحمد له . من حقه اسكات الجمهور طالما هو يرى أن هذا الفعل يضر بأدائه وهناك من يسعد بمشاركة الجمهور فمن سمح سمح لحاجته لذلك ومن منع منع لذات السبب والسماح والمنع غايتهما واحدة لدى من منع أو سمح. والحقيقة الرجل لم يسىء لجمهوره ولكن يبدو أن هناك من هو حريص أن يبني مواقفه بحسب حبه وأو بغضه أو فرض ما يراه على غيره . لكل صاحب فن ما يناسبه وما يخدم أدائه لكنها دكتاتورية البعض في فرض ما يرونه على غيرهم أو رفض أي كلام يقول لهم: هذا خطأ هناك من يعتبر أن تقول لفرد أو جماعة هذا خطأ شتيمة وسب أكبر مشكلة أقعدتنا كسودانيبن هي رفضنا وبغضنا لمن يقول لنا أن هذا خطأ وهذا صواب إن أكثرنا تجده مبغضا للصراحة وهو ما يعبر عنه البعض هنا.
شكرا يا علاء على الفيديو.... الكبير دائما كبير ....ود الأمين فنان عظمة وقامة في الفن الراقي ..وما عندنا غير ود الأمين واحد وهو فنان يغني بإحساسه زي ما قال هو بنفسه... .وشوفو الجمهور اتجاوب بإيجابية كيفن مع اعتذاره .... ..ود الأمين يا خي مع وافر التقدير والاحترام والامتنان
في حفلة رأس السنة 2010 أعتقد بنادي الضباط بعد ود الأمين خش في الكوبليه التاني من أغنية ذاد الشجون فجأة وقف الغنا لنفس السبب و أدى الجمهور محاضرة زي عشرة دقائق عن انهم مفروض يسمعوا بس وما يشوشروا عليهو وعلى العازفين لأنو الحفلات دي بتتصور وما عاوز ينزل ليهو تسجيل فيهو شوشرة . جزو من الجمهور شاف الأستاذ عندو حق وجزو شافا طنقعة وعدم زوق من الأستاذ. الحفلات الجماهيرية أعتقد غناء الجمهور بديها طابع جميل عكس تسجيلات الاستوديوهات وجلسات الاستماع واغلب المغنيين في الحفلات الجماهيرية ما بلتزموا بكل اللزمات الموسيقية ويرتجلوا أحيانا حسب تفاعل الجمهور . كلام فى عين الحقيقه
03-19-2018, 00:45 AM
Munir
Munir
تاريخ التسجيل: 02-11-2002
مجموع المشاركات: 10496
يبدو أن تضارب الآراء ناتج عن اختلاف مفاهيم الناس على معنى التجاوب والانفعال بالفن.. فهناك من يرى أن التفاعل والاعجاب يتمثل فى الغناء مع الفنان والهجيج والهيجان، بينما هناك من يرى أن الاعجاب بالفن يتمثل فى الانصات والاستماع بصمت .. وذلك سببه اختلاف الأنفاس مابين نارية ومائية ☺.. وأكرر وأقول لييه الزول القطع تذكرة لحضور الحفل ده يفرض صوته الأجش على المستمع الذى قطع تذكرة لسماع الفنان وموسيقاه؟ وعموماً، فإن بدعة الغناء مع الفنان دى بدعة سيئة فى نظرى .. هزة راس محمدالأمين بعصبية قبل أن يقول كلامه تنم عن أنه وصل مرحلة قصوى من الضجر والضيق قبل أن ينفجر ..
03-19-2018, 00:54 AM
Munir
Munir
تاريخ التسجيل: 02-11-2002
مجموع المشاركات: 10496
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة