|
Re: كشك .... زماااااانك (Re: عمران بابكر بدري)
|
هههههههه روعة والله ياعمران .. صحي كلامك كلو كان حاصل .. أها البيزعلك ويجيب كثافتك يكونوا حاقرين بيك .. ومايكون عندهم مرسال في البيت غيرك .. ومايحلوا ليهم يرسلوك الا وقت المسلسل عشان تجيب اللبن .. فتقعد تكوس في فردة سفنجتك تحت السراير وانت لابس فردة .. وتكون شغال نقنقة وطنطنة بي تحت تحت .. يقولوا ليك بي نهرة انت بتنقنق وبتطنطن بتقول في شنو ؟ .. غايتو انا كنت مرسال البيت ولي هسه رغم انه المرسال بقى بالتلفون .. مازي زمان لكن نقنقتي وطنطنتي ياهم ذاتم ما اتغيرو ..
كلامك ده زمانك بس مش زمانك خالص .. خخخخخخخ ...
| |
|
|
|
|
|
|
Re: كشك .... زماااااانك (Re: جمال ود القوز)
|
ود القور ..يا انيق
تسلم للمرور
#وليدبقيتكيف ؟؟
مهند انا عايز جلابيتك الظابطة لانو بتاعتي السمحة انشرطت من ورا مسكت ليك في السور و شررررر قد قميصي من دبر و الجلابية التانية زي ما عارف شربانة .
ابيت .. ما بديك ليها . هي امها و ابوها
مهند انا ماش اتقدم لي فلانة بكرة دي .. و كلمت ابوها اني جاي و زفت الجلابية دي شرباااانة قلنا
تتقدم عدييل ؟؟؟ جادي انت !!!!
اي و الله ... ما اخوها العارض دة كل دقيقة ناطي لي في حلقومي .. شغلها لي يخ و قبل فترة قبضنا في ستي سنتر بنحضر في فيلم رومانسي حنضل لي الفيلم زاتو و ساق اختو ومشى مع انو هو زاتو كان خالط !!! سياسة الكيل بمكيالين دي ما صح منو والله و امبارح تاني قبضني متعمق في شاطي الممزر معانا كرك و تشيز كيك و ليز و حركات كان عيد ميلادها يعني وكدة . قبضني مكووووع ليها وراااقد في الرمال على بطني و بلولوح في كرعي كنت بغني ليها هابي بيرث داي توووو يووو . بلاي جاء طابي زي القدر وحاتك يا هنو دخل فيني خلعة لي اسي ما مرقت حيرني زاتو! ما عارفتو الزول دة عندو شيطان ؟ ولا رابط في اختو جي بي اس ولا قنحو شنو بالظبط !! بعدين طباني ليك طبة قبقبني اتخيل ؟ تكلني في عربيتي خنقني و قال لي انت كلامك دة رجالة ولا كوبر عضلات و لا فهمك شنو بالظبط ؟
انا بي امانة كدة .. بحبها و ح اطلبها عديييل فانا شايف تديني الجلابية و جازف لي عمة و شال من ميرغني تكون عزيت اخوك .
الحقيقة خاطب لي ضميري يعني .. صاحبي و كنا ساكنين مع بعض و نحن في غربة و قابضنو مرتين متعمق في الزولة و الراجل قصدو شريف يعني ف وافقت اني اديه الجلابية ... على مضض .. اصلو الجلابية دي عزيزة علي .. عزيزة علي جدددن ..
وليد وليد سوقني معاك طيب اتقلك شوية .. اقسم بالله ما تباريني ولا خطوة يا مهند انت بالتحديد خراب اعراس اختاني يازول بتخرب لي الشغلانية كولها .
خلاس امشي ليهم الله ورقبتك زي الكككلب
كلب كديس ارنب ما شغلتك بس الجلابية لو سمحتة و جازف لي عمة و شال من مورغا .
عريس جلابية ما عندك ماشي ليهم ساااي مدلدل يدينك ؟ في الصقيعة ؟ كافي البلا انا زاتي ما بباريك لانك عريس مقطع زاتو
المووووهم ضربتا لي ميرغني صادف انو قريب مننا لانو ماش المطار يجيب مرتو جاية من السودان .. ثانية ثانية ميرغني دة اعمق زول في دبي هههه ده قدر يقنع مرتو انها ترجع السودان و تجيه كل شهرين خميس جمعة سبت يوم الاحد تلحق شغلها في السودان هي شغالة في سوداتل هههه و هو بمشي بعد شهر السودان برضو خميس جمعة السبت بالليل فلاي دبي جاك زول .. قال مدارس الشفع غالية في دبي و كلامو صح مع انو العواليق عندو قروش النار ما تحرقهن هههه
جانا البيت و منتظر طيارة مرتو تنزل بس شان يخمها و يمشي معاه وليد شان يديه العمة و الشال و في مركوب جلد نمر اصلي ..
و احنا قاعدين جا اسوأ من وطأت قدماه الثرى .. اسمو سامي ابو السماسم الشهير ب ود ابزهانة .. طابي ليه باغتين كوووبار لبن و ساخن بارد ...اها ود اب زهانة دة عملنا الردي في شكل انسان .
دكتور قاري في جامعة .... لكن بالقروش يقرش حلقومو زاتو .. مسبسب شعرو و عامل كيف كيف كدة و هو كطبيب فاشل .. و الله فااااشل انا مستغرب زاتو باصة في امتحان ال DHA كيف !!
دلااااهة يييخ بعدين جدو همباتي .. همباتي همباتي يعني ما ونسة لالا همبااااتي عدييييل ناس البطانة دي كووولها عارفة انو جدو همباااااتي و رباطي و بعتز بيها جدن قال جدو كان بيسرق الابل من الاغنياء يديها للفقراء 😨😨 رابط مكنة روبن هود اظنو .. و مترس قروش لي نخرينو كوووولو مال حرااااام من جدهم ده عندهم 10 الف راس ابل همبتة ساي ..
المووووهم
جا خاشي السلام عليكم ما قالها ... ملموين لي رزقكم يا معفنين اتغديتو ولا لسه ؟
لسة 😊
بس بس ظابط ظابط امي مرسلة لي من السودان شية ضان و كبدة ابل و مرارة و ام فتفت و لبن إبل فرييييش من ضرع الناقة للخرطوم للطيارة لي هنا راس حتتغذو غذاء من امو
طوالي انا كابست الساخن بارد لاني عارف العجل دة امو بتعلفو علف جججد و انا بكابس في الساخن بارد الفيه الشية و ميرغني بقالع فيه مهند فففك فكك انا مرتي جاية اسي و وكيلك الله مافيني حيل اسلم عليها في يدها ساي فك يخ وانا طاااابي الساخن بارد مهند فك قلت ليك الشية دي بتنفعني و بتبيض وشي شوية
شية ماف !!! الساخن بارد طلع فاضي اتخيلو !! اتضح انو ودابزهانة غرف الشية كووولها لي نسيبتو !! بعدين هي ما نسيبتو هي ام خطيبتو .. جاب لينا ام فتفت و كبدة الابل و جالونين لبن ابل ...
الموووهم
انا ما حصل شربتة لبن ابل و ودابزهانة بدأ يعد في فوائد لبن الابل قال بطول الشعر و انا بي امانة قامت لي جلحة يمين و الموضوع ده ماكل معاي جنبة لانو راسي من بعيد شكلو بقا مفتول مفتول كده و شيتن بقوم الشعر دة الحق يقال لازمني .. و كنكشتة ليك في باغة اللبن و جغ جغ جغ .. لما نفسي كتم حتى دليتها .. الوقت ده وليد رعااا رعي في ام فتفت و ماسك ليه بصلة و الشطة و مدمع و نخرينو سايلات لانو عندو التهاب رئوي حاد يقحقح و يعطس و حالتو بالبلا و مسك ليك باغة اللبن كشح بالميت لترين في بطنو مع ام فتفت و البصل و كبدة الابل ... بطنو زاتها اتخلعت ... العجب ميرغني مورغا مورغا اها دة كوم براو .. ده مما سمع انو لبن الابل اعنف من مديدة الدخن و البلح و القدوقدو مخلوتات مع بعض . و الراجل مرتو جاية من السودان يعني .. قام بالجالون التاني براه اتملا وقف زومبارة و شال الباقي معاو قال باور بانك 😂😂😂😂😂
عاينو عاينو ... اتضح انو لبن الابل لما تشربو اول مرة .... بسل عورانك زاتو .. و لغير الناطقين بها بدور فيك طه القرشي لما عيونك تبيض . وحيفقدك سوائل ... يعني بكتمها فيك كتمة ما حصلت و احنا على غبانا ما جايبين خبر اتجوغرنا بيه و عرفنا تاني يوم الطفأ النور منو 😢
انا بي امانة صحيت من الصباح عرفت انو وش البامية مااااياهو احترمت نفسي و ما ماشي الشغل انا لاحمل بهدلة و لا بكضب بعدين برستيجي زاتو ما بسمح لي .. وليد طلع من الحمام بعد تسعين ساعة ماسك بطنو ... هوندا .. بطني كتمت يخ .. انت كيف ؟
كدي زح من باب الحمام نتفاهم بعد اطلع
بعد كم ساعة ... بحنس ياوليد اعتذر للناس دي لحد ما تبقى كويس حتى امشي اتقدم
يازول يقولو علي شنو زوغتة !!! ستين يمين ماشي كان اتظبط بالبامبرس بقابل ابوها بقابل ابوها .. هو يا حبة عيني عندو التهاب رئوي حاد و بطنو كاتمة بقن عليه الاتنين
لما لقيتو مصر و مووولح قلت ليه كدي ارح الصيدلية نجيب فلاجيل ولا مصيبة زمان تنفعنا وصلنا الصيدلية كان في مصري كضااااب كدة ببيع لقيناه مافيش و لي حظنا الكوج لقينا عينو مكانو بت صيدلانية سودانية سمحة سماحة !!
وليد عاين لي و قال لي اسي دي يقولو ليها شنو ؟
رجال كبار كده و لابسين بدل نقول ليها ادينا فلاجيل ؟؟
عادي ياوليد امشي ليها انت .. انا و الله برستيجي كمدير ما بسمح اقيف قدام الطيارة دي و تعرف انو انا عندي هناي يعني عيب عيب امشي ياوليد الله يرضى عليك
مهند مهند اقسم بالله ما امشي
بكل ثقة مشيت ليها و قلت ليها سلام دكتورة جديدة هنا انت صح ؟
ايوة الليلة اول يوم 😊
لي حظنا الكعب ... انت سودانية صح ؟
أيوة و افتخر بذلك 😊😊😊 اتفضلو
لا انا مصدع بس عايز لي بندول لكن صاحبي ده عايز .... ماخلاني تميت كلامي شب لي في حلقي عاااايز أنتيآسيد عندي حيرقان و خاتي لي اصبعو في عيني كده يورر وير لي في وشي حيرقااااااااان يا موووهند حيرقان العيان انا دة صح ؟ حيرقاااان و كوع لي و قال اها غالتني !!
قعدت اضحك لما دمعتا لانو الدكتورة زاتها ما فهمت اي شي ههه كان اقول ليها فلاجيل ما عارف هههههه
الموووهم
المغرب جاء و قشر بالجلابية و العمة و مشى قابل ابو البت و خالها ... قاعد معاهم .... كيف الصحة ، و كيف الاخبار و لسة ماقال شي ... كرررر طق طق بطنو قامت تنبح من جوة لحد الان الصوت انتيرنال حتى خال العروس بهظار كدة قال ليه جعان جوووعة شديدة شكلك قام اتبسم و بطنو كتتتتمت لواااااية زي الكانت عندي بالظبط كعبة كعبة ولادة بس لما عووووج رقبتو و ما بتمهلك .. قال قحة مرتين و مسك نفسو بالرجالة لما وشو حمر و بقا مكنكش و عاصر على السرير خايف يقوم يمشي على الحمام يقوم يضرب لباد لانو الحمام بعيد .. وشو بقا يعمل تعابير ما جميله و براه و الناس بتعاين ليه معاها لواية تاني كدة و قحة برضو لسه مسيطر قام جات عطسة كدة من وين ما عارف .. اها بس العطسة دي خربت ام اي شي ههههههه
يخ هو زاتو ببالغ زول عندو هناي سبب واااااحد يخليه يعطس ماف و الله جد
.. ك اخصائي اعصاب احب ااكد انو الشغلانية دي كوووولها مربوطة بي حبل واحد بس النخاع الشوكي الي هو الطايوق .. تدقس تعطس الشغل دة بجر السلك لي فوق بقفل العيون .. و بفتح اي شي تاني .. اي صامولة فيك بحلها بحلها خشمك ، حلقومك نخرتك رئتينك عرباتك شركاتك وكده يعني بالجد يا اخوانا من عضلة القلب لي اصابع رجلينك التحت بتفتحو و يتشتحو كدة شان كدة الزول بعد يعطس بقول الحمد لله لانو الفتح ده لو ما قفل !!! واتطاتك بتصبح ...
المووووهم هو عطس ... و ليبيا فتحت
صوت و زخيرة حية .. ضرب ناااار جد و خرب الرصة
الماغسني و هارد حشاي العولاق دة لابس جلابيتي انا جلابيتي الغالية علي ... يلا خلاس عفيتها انا زاتو و الله ما لازماني تاني ..
نرجع نرجع .. قال هو اتخلع .. لانو الشغل دة مااا صوت بس لالا ده في المليان !! بقا منطط عينونو كدة و مخلوع و قلبو بيضرب و نظرة حزن كدة و مزبهههل .. هيا اخوانا دي مصيبة شنو دي .. وليد لسه مخلوع و مندهش و منشده و ماقادر يستوعب الحصل
ابو البت رااااقي حاول يخفف على العريس يا حبة عيني قال ليه و الله انت عريس وااااضح و صريح جدااااا و دي بداية موفقة تدل على علاقة متينة 😂😂😂😂😂😂
وليد ضحك و مع ضحكتو قال تاني ضرب فيوز لزوم هاك الزيادة دي 😂😂😂
هو قال شال هم الملاية ههههههه
مشجرة بالاخدر و عامله تمويه ظابط كدة
زول يمشي لي نسابتو اول مرة يعطن ليهم الملاية !!
يمين الله ضبح الكديسة يا كدي يا بلاش وفيما يتعلق بي جلابيتي .. الشهادة و العمل الصالح . قال زعلان من خال البت لانو بضحك دموعو سيور سيور وليد وليد احب اقول ليك انو حيمسكوها ليك لي جنا الجنا هههه ومن زاوية اخرى ميرغني اب ضروس هههه .. اها ده مرتو جات من السودان و الشفت اتطوطر معانا باللبن قال طاقات و انرجايزر و كدة
رسلت في الواتس عمك بطنك كيف ؟
رسل لي فويس نوت بالواتس فيها صدى صوت و ظاااهر انو في الحمام قال لي: قول لي ود ابزهانة اب ضروس قال ليك بس الا مايبقا كويس ستين يمين اطلع تيت ام ابو حلتك لا ابو حلة الناقة الحلبوها في السودان و كتمتها فينا هنا ما اشوف خلقتو و انا هين مرتي لو لمت فيه ... حتغتالو
مرتك علاقتها شنووو بالمضوع هي مالها ؟
ملالة تشق حنك انت و صاحبك كيف مالها جات تعبانة اديتها كوووباية هي زاتها ... و الشقة دي فيها حمام واحد بس .. لي يومين يا مهند من اووومبارح بايت في الحمام ... يقول ليك اللبن بديك طاقة ؟ اقسم بالله سلة روحي عديل كدة ... ماخلا فيني نقطة طاقة وحدة و خلاني حاتل في الحمام و مرتي اليوم كولو تكوكو في الباب .
خارج السرب :::: الحارق جوفي انو ود ابزهانة بعد البهدلة البهدلنا ليها دي الحبة ما جاتو عاااااادي
الخلاصة :
1- جلابيتك .. ما تديها لي صاحبك لو عايز يخطب ..
لانو الظروف ما معروفة .
2- لبن ابل لو بطنك ما متعوده عليه مااااااا تشربووووووو ما تتطوطر بيه مااااا تتجوغر بيه لييييه ؟؟ لانو الظروف ما معروفة
3-لو عندك حيرقان ... اوعاااااااا تعطس من طرف .. اوعااااا
لانو الظروف شنووخوووو ؟؟؟؟
بعض الكلمات كما يكتبها اولا د ميكي
مودتي
| |
|
|
|
|
|
|
Re: كشك .... زماااااانك (Re: عمران بابكر بدري)
|
شكرا استاذ / عمران على الموضوع الجميل ذكريات جميلة فى الايام الخوالى كانت الكهرباء مبرمجة يوم ليك ويوم عليك فى مدينة شندى والحى مقسم الى جزئين مربع (1) شمال مربع (1) جنوب قدسية المسلسل بتظهر قبل نصف ساعة من موعد البث اذا الكهرباء حقت شمال كل سكان جنوب متجهين الى منازل سكان شمال والعكس صحيح . اما ساعة الصفر بداية المسلسل يسود الشوارع صمت رهيب ودى مواعيد المفتحين اى مصيبة فى راسك ممكن تعملا وزول بجيب خبرك مافى هههههههههههههههههههههه . ظريف المدينة كان راكب الفيل شاف الجماعة متحركين للمسلسل وقف بكل خشوع وقال يأتوك رجالا وعلى كل ضامر يأتين من كل فج عميق
| |
|
|
|
|
|
|
|