|
|
|
 Re: أزمة مكتومة بين الجمهوريين والشيوعي (Re: زهير عثمان حمد)
|
شيئ مؤسف ان يقترن اسم الجمهوريين مع الحزب الشيوعى اساسا.. ويتحالفون معهم. المؤمن لا يلدغ من جحر مرتين.. وبعد خيانة الشيوعيين الجمهوريين فى السبعينات ما كنت اعتقد ان اى جمهور ى يفكر مجرد تفكير فى التحالف معهم.
الحزب دا عنده اى واحد يعمل معهم وليس منهم فهو مغفل نافع. لا فرق بينهم وبين الإسلاميين.
| |
 
|
|
|
|
|
|
|
|
Re: أزمة مكتومة بين الجمهوريين والشيوعي (Re: Abureesh)
|
سلامات يا زهير
لا أعتقد أن هناك أزمة، لا مكتومة ولا مفتعلة، بين الحزب الجمهوري وبين الحزب الشيوعي. ولو كان الحزب الجمهوري يلوم أحدا فسيلوم الجمهوريين الذين لم يحضروا الاحتفاء، لكنه لا يلوم أحدا فشعاره "الحرية لنا ولسوانا"
أرجح أن تكون هذه دسيسة من دسائس الأمن للوقيعة بين الحزب الجمهوري والحزب الشيوعي في هذه الأيام الحاسمة.
الحزب الشيوعي حزب أصيل في السودان وله الحق في الوجود والنشاط والمعارضة، وكذلك الحزب الجمهوري. التحية للحزب الشيوعي والتحية للحزب الجمهوري.
بالوحدة الشعب سيسقط تجار الدين الذين اختطفوا السودان.
ولأنني أعرف أن البوست سيكون حاشدا أحب أن أضع فيه مقال للأخ القراي يرثي فيه العم الأستاذ يونس الدسوقي، الشيوعي حزبا، المهموم بوطنه وبشعبه وبالمساكين.
سلام على يونس الدسوقي في العالمين!!ا
01-24-2011 08:00 AM
في ذكرى الاستاذ محمود
سلام على يونس الدسوقي في العالمين!!
رجل فقير، نزيه، عف اللسان، حاضر الجنان، مستقيم الخلق، ينضح إباء وشمم، مثقف يدمن الاطلاع، ويطرب للحوار، في عينيه حزن دفين، تراه فلا تخطئ في ملامحه هموم الوطن ومعاناته، إذا حدثك وددت لو انه لا يصمت، وإذا انصت إليك تمنيت لو انه ينطق بكلمة!! كان جل وقته مقسم بين الجلوس، في كرسي قديم، داخل كشك ملئ بالكتب والمجلات والصحف، في وسط سوق مدينة كوستي في الستينات وأوائل السبعينات، وقد كتب عليه بطلاء باهت \" مكتبة الفكر\".. وبين المعتقل الذي ما يكاد يخرج منه، حتى يدخله من جديد، باعتباره من أهم قادة الحزب الشيوعي السوداني، في المدينة، بل وعلى نطاق السودان.. ثم الوقت الذي يقضيه في المحاضرات، والندوات، وجلسات الحوار، بمنزل صديقه الأستاذ محمود محمد طه، بحي المرابيع.. تلك باختصار كانت الحياة الثرة، التي عاشها العم يونس الدسوقي، والتي لم يمل تكرار الحديث عنها، حتى آخر أيامه..
لقد كان يونس الدسوقي مثقفاً عتيداً، تخرج من مدرسة الكادر، يناقش في الديالكتيك، والمادية التاريخية، والصراع الطبقي، ونظرية فائض القيمة، ويقرأ بنهم لكافة المدارس الفكرية والأدبية، ويحفظ نهج البلاغة، والمتنبئ، وابوتمام والبحتري، ومقاطع من الأدب العالمي، عن ظهر قلب!! ويحاور زبائن مكتبته في ما يشترون من كتب ومجلات وصحف..
أول مرة سمعت عن عم يونس الدسوقي، كانت من الاستاذ محمود.. قال (لما كنا في كوستي كان من ضمن الناس البزورونا، شيخ فلان \"ذكر الاستاذ الاسم ولكني لا اذكره الآن\".. وكان القاضي الشرعي، وامام الجامع الكبير، وبرضو اظنو المأذون.. يقعد معاي مرات ساعة أو ساعتين، ما يتكلم الا عن تأخر العلاوة، وكيف انو جماعتو في الشئون الدينية، منعوا عنو الترقية.. بعدين تلقاه يتكلم عن الغلاء، وزيادة سعر اللحم، والسكر وكدا.. بعد شوية يجي صاحبنا يونس الدسوقي، راجل اغبش، و شيوعي معروف، ودائماً يعتقل، أول ما يقعد أسالو عن حالته، طوالي يبدأ يتكلم عن وضع البلد، واخطاء سياسات حكومة ناس عبود.. وكيف الناس تعبانة والوضع في الجنوب متأزم.. وتشعر انو يتحسر على الفقراء، ويتألم لحالة المعدمين) ثم ابتسم الأستاذ وقال (رجل الدين مشغول بي علاوته، والشيوعي مشغول بحال الناس)!!
قبل ان اقابل عم يونس في القاهرة، حيث استقر حين هجر السودان، حدثني الأخ د. صلاح الزين بان عم يونس، قابل مجموعة من المثقفين السودانيين، فنقد لهم، موقف المثقفين من محاكمة الاستاذ محمود واغتياله.. وحدثهم كيف ان الأستاذ حين واجه المحكمة، كان يعبر عن ضمير الشعب السوداني، ولم يكن يعبر عن فكرته، التي يختلفون معه حولها.. ولهذا لم يكن يستحق منهم هذا الخزلان.. ثم أخذ يحدثهم عن سيرة الاستاذ محمود حتى بكوا جميعاً!!
عندما زرت عم يونس الدسوقي، في الفندق الصغير، الذي كان يقيم فيه بالقرب من ميدان رمسيس، في وسط القاهرة، في منتصف التسعينات، وعرفته بنفسي بادرني قائلاً: وين جمعة حسن؟! أخبرته انه في أمدرمان. فقال: جمعة دا كان طالب في المدرسة الصناعية، في كوستي لما دخل معانا في الحزب الشيوعي.. وكان طاقة عجيبة، يمكن يساوي عشرة من زملاهو.. قام غاب عننا زي سنة كدا، لقيتو شايل كتب الجمهوريين يبيع فيها!! قلت ليهو: ياجمعة الحكاية شنو؟ مالك خليتنا وبقيت مع الجمهوريين؟! قال لي: يا عم يونس انا والله بحترمكم.. لكن اليقين الشفتو في عيون الاستاذ محمود، ما شوفتو في غيرو.. قلت ليهو: والله صدقت ياولدي، صدقت!!
دعوت العم يونس في شقتنا بحي النصر، وحضر عدد من الاصدقاء، وطلبوا منه ان يحدثهم عن حركة النضال الوطني، حين كان ناشطاً فيها، في الخمسينات والستينات.. فتحدث قليلاً عن نشأة مؤتمر الخريجيين، وبدايات الاحزاب السياسية، ومواجهة الحزب الشيوعي لنظام عبود.. ثم آثر ان يتحدث عن الموضوع، الذي يعشقه، ولا يمل الحديث فيه، وهو سيرة الاستاذ محمود فقال (محمود كان شغال في المشاريع، بتاعة النيل الابيض، هو مساح شاطر، لكن اشتهر اكثر، بانو برضو أمين، ودقيق، بصورة ما طبيعية.. الملاك كانو ما بدو غيرو شغل الا ما يلقوه..كان يقضي ثلاثة، اربعة شهور، في المشاريع، وبعدين يجي كوستي، كان يجيب معاه حصيلة عمله حوالي خمسة ألف جنيه!! ودا كان مبلغ خرافي.. اذا كان قاضي المديرية كانت ماهيته ثلاثين جنيه.. في غرفتو بتاعة بيتو الفي المرابيع، كان عندو تربيزة، بتاعة حديد يخت فيها القروش ديك كلها.. ومن الصباح للمسا الناس داخلين وما رقين.. نسوان ورجال ما عندهم شغلة بالندوة وللأ النقاش البكون داير.. كل واحد منهم، يوسوس مع محمود، فيقوم يأشر ليهو على التربيزة، يمشي يشيل المبلغ الطلبو ويمرق!! المسألة دي تستمر لغاية ما القروش تكمل.. لا عندو خزنة ولا جزلان!! الناس ديل، فيهم واحدين بكفرو محمود، ويسبوه في غيابو ولما يجي، يجوا يشيلو منو قروش!! مرة واحد كان حاضر الحكاية دي، خلى الراجل شال الفي النصيب ومرق.. قام قال لي الاستاذ محمود، الزول دا بقول عنك كلام ما كويس.. وكان داير يشرح، محمود قام وقفو طوالي، وقال ليهو: انا ما بهمني رأيو فيني شنو.. لكن بهمني رأيي أنا فيهو شنو.. ورأيي انو بستحق المساعدة!! يقولو ليك في كتب الأدب، فلان كان كالريح المرسلة، علىّ الطلاق محمود محمد طه، أجود من الريح المرسلة.. والمشاكل الكان بحلها لي ناس كوستي، والقرى الحولها، وعمال السكة حديد، يمين وزارة الشئون الاجتماعية ما تحلها!!
لقد كنا نحاول ان يستريح عم يونس من الكلام قليلاً، فنعطيه ماء أو شاي، ولكنه كان يرشف رشفة، ثم يواصل حديثه.. قال: مرة محمود جاني في المكتبة، وطلب مني كتاب ما بذّكر اسمو هسع.. لكن قال وهو دايرو، عشان يعرف منو اسم الفرعون، الكان مع سيدنا موسى.. اتصلت بي سودان بوكشوب في الخرطوم، ما وجدنا الكتاب.. قمت رسلت لي مكتبة في بيروت.. بعد أيام ارسلو الكتاب، عن طريق بنك باركليز، والجماعة اتصلو بي في المكتبة، عشان استلم الكتاب واسدد ثمنه، لكن التكلفة ما كانت عندي.. مر عليّ محمود كلمتو، برضو ما كان عندو.. وهي التكلفة كانت عشرة جنيه!! قلت لمحمود طيب نعمل كيف؟! قال: خلي البنك يرجعو!! بعد ما مشى، جاني القاضي المقيم، وكان الوقت داك عبد العزيز شدّو، حكيت ليهو القصة.. طوالي اتصل من تلفون الكشك بمدير البنك، وقال ليهو من المبلغ العندكم باسم القاضي المقيم، اخصم عشرة جنيه، وارسل الكتاب لمكتبة الفكر.. بكرة لما محمود جا قلت ليهو: بالله دي حالة دي.. لا أنا ولا إنت عندنا عشرة جنيه، والمغفلين ديل عندهم مئات الجنيهات، واشرت الى بعض التجار. فقال: ما كفاية عليهم انهم مغفلين، كمان دايرهم يكونوا فقرا!! مرة كنت مفلس حق قفة الملاح ما عندي، وقاعد في الكشك ما عارف اعمل شنو، قام جا محمود.. قلت ليهو: ياستاذ انا تعبت من الفقر أعمل شنو؟! قال لي: كلم الله. قلت ليهو أكلمو كيف، واقول ليهو شنو؟ قال لي: اطلع برا الكشك وارفع بصرك للسماء وقول \" رب اني لما انزلت الي من خير فقير \".. وصمت عم يونس ثم أردف: يا سلام يا محمود!! وعاجل دمعة، طفرت رغماً عنه، من مؤخرة عينه، بمنديل كان يحمله في يده، ثم راح في صمت وقور. صمتنا كلنا لدقائق، حتى خرج عم يونس من حالة الحزن، التي احتلت مشاعره.. فسأله احد الحاضرين: وعملت كدا يا عم يونس؟! قال: والله ياولدي عملتها، أنا ما شيوعي؟ عملتها!! وكان ما محمود ما بعملها.. وفعلاً في نفس اليوم، جاتني بيعة كتب، وكراسات للضهاري، يمكن حصلت قريب الثلاثين جنيه!!
سأله احد الحاضرين: انت ياعم يونس اكتر حاجة عجبتك في الاستاذ محمود شنو؟! صمت للحظة، وكأنه يفكر بعمق، ثم قال: الخلاني موله بحب محمود، مقدرته غير العادية على اشعار كل انسان بي قيمتو الانسانية.. بعاملك على أساس انك حر، ويحترمك، مهما اختلفت معاه!! أنا ما كنت بفوت محاضرة، ولا ندوة، ولا حتى جلسة داخلية للجمهوريين.. وكان محمود يعرّفني، بقولو دا يونس الدسوقي صديقنا، وحتى مرة قالها في محاضرة عامة.. مع دا كلو، ما حصل محمود قال لي انت شيوعي ليه.. ولا حصل قال لي ابقى معانا جمهوري!! مرة واحد مولانا اسمو شيخ عبد الله، كان قاعد معانا، وقال لمحمود: يونس صاحبك دا ما عندو دين.. قام محمود قال لي: انت دينك شنو يا يونس؟! قلت ليهو: انا ديني حب البروليتاريا!! مولانا قال: أعوذ بالله، أعوذ بالله.. فقام محمود قال: الله دينو محبة الاحياء والاشياء.. الله خلق الوجود بالمحبة. مولانا قال: لا يا أستاذ.. الله خلق الوجود بقوله كن فيكون!! محمود قال ليهو: يعني بالإرادة يا مولانا؟!. شيخ عبد الله قال: أيوة. محمود قال ليهو: الشيخ العبيد ودبدر قال الإرادة ريدة، يعني محبة!! فسكت مولانا.
وواصل عم يونس: في واحد من اصحاب المشاريع، بعرف الاستاذ محمود حق المعرفة، وتعامل معاه كتير.. وكان يجي يكلمني عن اخلاقو ومعاملتو باعجاب شديد.. مشى الحج وجا بقى من جماعة الاخوان المسلمين!! يوم جاني في المكتبة قال لي: قالو صاحبك ما بصلي!! قلت ليهو: انت رأيك شنو في اخلاق محمود؟ قال لي: ما فيها كلام.. قلت ليهو: ومعاملتو للناس؟ قال لي: اصلو ما شفنا زول زيو.. قلت ليهو: طيب ياخي اذا كان الزول، ممكن يكون زي محمود دا بدون صلاة، وبدون دين، الدين لزومو شنو؟! قال لي: انت بتقول كدا عشان إنت شيوعي. قلت ليهو خليني أنا، النبي ذاتو ما قال الدين المعاملة؟ فسكت. لما نقلت النقاش دا لي محمود، قال لي: هم الناس ديل ما عندهم حاجة.. لكن انتو المثقفين، انسحبتو من ميدان الدين، وتركتوه ليهم يتحكمو فيهو..
وواصل عم يونس: انا مرة اعتقلت بواسطة البوليس السري، وختوني في سجن كوستي .. ونحنا معروف عندنا، لما واحد يعتقل، ما في زول بسأل عنو ولا يزورو، عشان ما ندي فرصة لأي اخذ معلومات.. يوم الشاويش قال لي عندك زيارة.. قلت يارب المغفل الزارني دا منو، يمكن يكون واحد من أهلنا الشايقية، جا من البلد، وما عارف الحاصل.. لما مشيت مكتب القمندان، لقيتو دا الأستاذ محمود!! قال لي: انا كنت في المشاريع، واول ما جيت كوستي، عرفت انك معتقل، قلت اشوفك. قلت ليهو: يا استاذ نحن ما دايرين زيارات، عشان البوليس السري، ما يقوم يدخلكم في مشكلة. ابتسم وقال: انت الخوف العندك دا، داير تنقلوا لي أنا؟! قلت ليهو: يا استاذ قالو من خاف سلم. ضحك وقال: هي سلم نفسها معناها شنو، غير السلامة من الخوف؟! ولما طلعت من المعتقل، بعد كم شهر، لقيت ناس البيت عاملين كرامة وضابحين، وعازمين الناس.. وانا عارف انهم ما عندهم حاجة.. قلت ليهم محمود محمد طه جاكم هنا؟! قالو: لا.. وانو القروش اداهم ليها واحد اسمو ابراهيم عبيد.. لما قابلتو بعد كم يوم في السوق، وسألتو، قال لي القروش، رسلها معاهو محمود من الرنك، وقال ليهو اديها أسرة يونس الدسوقي، ولما وصل صادف قبل يوم، من خروجي من المعتقل.. محمود ما بدي وبس بيدي في الوقت المناسب زي ما قال المتنبئ:
ليس التعجب من مواهب ماله * بل من سلامتها الى أوقاتها
قال لي عم يونس: ان شاء الله نرجع السودان، عشان اعرفك بي ناس، معرفتهم تطرب.. وذكر اسماء منها الاستاذ عبد الكريم ميرغني.. ورجع عم يونس الى السودان قبلي، وحين رجعت كان همي، ان اعرف مكان اقامته لازوره.. ولم يقدر الله لي لقاءه، فتوفى قبل ان اقابله.. لقد كان سر اعجابنا جميعاً، بالعم يونس الدسوقي، هو مقدرته الفائقة، على تحقيق قولة اختلاف الرأي لا يفسد للود قضية.. لقد كان باذلاً لنفسه من أجل الحزب، ومن أجل البلد، ولم يظفر بكلمة ثناء، أو اعانة على مصائب الدهر من كليهما.. عاش حر الرأي، شجاع الكلمة، شديد الانضباط في سلوكه العام، متعلقاً بالقمم السوامق من مكارم الاخلاق.. لقد كان انموذجاً رائداً للسوداني الأصيل، الذي يملؤه الوفاء شعوراً باقدار الرجال.. فسلام على يونس الدسوقي في العالمين..
د. عمر القراي
| |
|
|
|
|
|
|
|
|
Re: أزمة مكتومة بين الجمهوريين والشيوعي (Re: Yasir Elsharif)
|
أرجح أن جهاز مخابرات النظام ساءه أن تصبح صورة الأستاذة أسماء في قلب المظاهرات السلمية أيقونة للشباب من كل الاتجاهات، وصارت تتحدث من داخل دار حزب الأمة، وكذلك تحدثت في مؤتمر حزب المؤتمر السوداني الخامس.
التحية لها ولرفاقها ورفيقاتها في الحزب الجمهوري وفي مبادرة لا لقهر النساء. فقد كانت هي وقليلون وقليلات في وقفة احتجاجية أمام منزل الزعيم اسماعيل الأزهري في يناير قبل أن تبدأ سلسلة المظاهرات الأخيرة.
| |
|
|
|
|
|
|
|
|
|
Re: أزمة مكتومة بين الجمهوريين والشيوعي (Re: زهير عثمان حمد)
|
هذه مجرد شنشنة، فليست هناك ازمة بين الحزب الجمهورى والحزب الشيوعى، فالذى يجمع بينهم اكبر واهم واخطر من هذه الاقاويل وهذه الاكاذيب
فى الحقيقة الجمهوريون يكنون قدر كبير من الاحترام والتقدير لعضوية الحزب الشيوعى، ذلك لانهم شرفاء ووطنيين، ولقد اتضح هذا لكل الشعب السودانى، فى الحقيقة حتى الاخوان المسلمين شهدوا بذلك
اما نشر مثل هذه الاكاذيب فى هذا الوقت فان له دلالات كثيرة
| |
|
|
|
|
|
|
|
|
|
Re: أزمة مكتومة بين الجمهوريين والشيوعي (Re: صلاح أبو زيد)
|
طبعا الواحد لما يكتب رايه ان يكون غير متأثر بالأحداث او نظريات المؤامرة او غيرها.. يكون متجرد. هكذا علمنا الأستاذ. ثم انه لا احد يستطيع ان يسلب او يدعو لسلب اى شخص او حزب حقه الدستورى.. فهذه مفروغ منها. والوطن ليس ملك لشخص او حزب.
اما التحالفات والعمل المشترك فهذا امر اخر وارجو ان نتحدث فى اطار ما يطرح.
الجمهوريون عندهم تجربة المشاركة مع الاحزاب منذ نهاية الخمسينات.. وكانت تجربة يتيمة لم تتكرر. حين خرجوا مع الاحزاب فى مظاهرة وكانوا متفقون ان لا يستجيبوا للقمع.. ولما ملأ دخان البمبان الشارع جرت كل ممثلى الأحزاب وتركوا الاستاذ وحده.. حين انتهى الامر وتفرقوا ذهب الاستاذ الى حيث كان اجتماع الأحزاب مقررا بعد المظاهرة.. ولكنه لم يجلس واعطاهم درسا فى المسؤولية والأخلاق.. وخرج.. ترجونه ان يعود ولكنه رفض. فقال أحدهم ان موضوعكم فشل ما دام خرج منه محمود.
تلك كانت اخر مرة ينسق فيها الجمهوريون مع الاحزاب فى وجود الاستاذ.
نفس هذا حدث من عضوية الجبهة الديمقراطية فى الجامعة مما فرض على الجمهوريين الخروج من العمل المشترك زمن نميرى.
ولو كان الاستاذ بيننا اليوم لما اقدم على التنسيق مع الاحزاب.
| |
|
|
|
|
|
|
|
|
 Re: أزمة مكتومة بين الجمهوريين والشيوعي (Re: صلاح أبو زيد)
|
سلامات يا صلاح أبو زيد
فقد أبت نفسي إلا أن أواصل في سيرة الأستاذ الراحل المقيم محجوب شريف، قدس الله سره. فهذا هو المقطع التالي لمقطعك الذي زينت به جيد هذا البوست. وطالما أن الوشاية "أمنجية" بالدرجة الأولى فقد جاءت قصيدة الغويشاية. فسأضعها هنا ومعها مقال الأخ الأستاذ يحيى فضل الله. أهو زيادة الخير خيرين.
غويشاية محجوب شريف
غويشاية محجوب شريف
04-03-2014 07:18 AM
يحيي فضل الله
( ما تسألني كم تمن الغويشايه
بل جاوبني كم تمن الطمأنينة )
هكذا يتسأل الشاعر محجوب شريف بنبضه الحميم تجاه حدث قد يبدو صغيرا عن ثمنالطمأنينة ، ويتجوهر هذا السؤال الذي يبدو بسيطا ولكنه يملك من العمق و التكثيف ما يجعل الاجابة عنه تمر عبر جدال سياسي قد يؤدي الي ذروة الهذيان ، كم ثمن الطمأنينة في ظل حكومة الظلام التي تربصت بانسان ؟السودان
تفجرت شاعرية محجوب شريف التي عودتنا دائما الانحياز الي الانسان السوداني ، تفجرت هذه الشاعرية لتفضح اساليب القمع و الارهاب التي ميزت حكومة الانقاذ ، وذلك من خلال حدث واقعي .
كعادتهم دائما اقتحم رجال الامن منزل الشاعر يفتشونه متسربلين باللاجدوي اذ ان موقف الشاعر هو موقف معلن وفي الضد الصريح و الصارخ من ممارستهم تلك التي اعتدت علي الحياة في السودان وقادت نبضاتها الي ذلك الموات في نسيج كل التفاصيل، و حين خرج هولاء الباحثون الخبثاء لم ينسوا ان يتركوا وراءهم فضيحة داوية وهي انهم سرقوا ( غويشة ) من الذهب وجدوها في مكان غير آمن من اياديهم اللصوصية ولكنه كان آمنا في منزل الشاعر ، وهنا تفجرت شاعرية محجوب شريف الخصبة عن قصيدة ( الغويشايه ) التي تحتفي بها هذه الكتابة وذلك باعتبارها قصيدة تمارس حقها المعلن والصريح في تعرية هذه النظام البغيض و قد اختار الشاعر وبتعمد جميل ان يضع تلك ( الغويشه ) في مقام التعظيم باستخدامه اسلوب التصغير المراد به تعظيم الشئ ( غويشه ، غويشايه ) ، وادعو القارئ الي الدخول الي عوالم هذه القصيدة
( هذه سيرة ذاتية لها
تلك الغويشايه
هجين الدبله و الخاتم
سلالة كم وكم حاجه
متل الستره وهاجه
بحتم الدوله لا حوله
باوراقا الثبوتيه
صبحت في خبر كان
للي كانت ليها محتاجه
المسيكينه
ما تسألني كم تمن الغويشايه
بل جاوبني كم تمن الطمأنينة ؟ )
هاهو الشاعر مجوب شريف يحرض شفافيته كي يختار هذا المدخل العميق لهذه القصيدة ( سيرة ذاتية لتلك الغويشايه ) ، مكثفا وجودها و معلنا اختفاءها ، انها هجين الدبلة والخاتم ، بل مجذرا اصولها النقية باعتبارها ( سلالة كم وكم حاجه ) ، وبنقلة ذات ايحاء كثيف دون اللجوء الي المباشرة بسبب اختفاء ( الغويشايه ) اذ انها اصبحت ( في خبر كان بختم الدوله و اوراقا الثبوتيه ) و بذلك يتحول اللصوص الي رمز لهذه الدولة التي تدخل الي بيت الشاعر وتسرقه ، و يا لها من دولة تلك التي يسرق رجال امنها من بيت شاعر بسيط و نقي مثل محجوب شريف( غويشايه) ترمز في المعني البعيد والقريب من تعامل ذاكرة الشعب السوداني مع المشغولات الذهبية التي هي بمثابة إدخار وتحوط لمواجهة الظروف المعيشية الحرجة ، إذن ، فان الدولة تسرق ما يدخر وتقذف في وجه شعبها بكل تفاصيل الظروف الصعبة و القاهرة
( دخري الحوبه للقمريه
حبة عيش و قشايه
غويشايه
تدسدس فيها و تخبي
يعلم الله بتربي
علي كل المهن طافت
من عين الفقر خافت
بس عين الصقر شافت
صقر لابس لبس حربي
وختم الدوله لا حوله
باوراقا الثبوتيه
في هنداما متخبي
صبحت في خبر كان
للي كانت بيها فرحانه
المسيكينه )
و يستمر الشاعر في تساؤله ذلك العميق
( ما تسألني كم تمن الغويشايه
بل جاوبني كم تمن الطمأنينة )
تري من يملك تلك الاجابة ؟
و من يستطيع ان يثمن معني الطمانينة ؟
علي كل ها هي شمعة الشعر تتحدي كل هذا الظلام و تعريه و تفضحه و تقذف به في متاهات القيم القبيحة ، ان تلك الغويشاية و التي كثف الشاعر معني وجودها و معني إختفائها وثقت و بقدرة شاعرية تستطيع ان تستحلب الحكمة من ضرع المعاناة و تحولها الي اشارة ومعني عميق يقف في الضد من تلك القيم الخائبة والتي تختبئ في هندام السلطة برجال امنها ، لاحظ وجود كلمة ( امن ) هنا مع معني السرقة، سرقة الاشياء البسيطة و و العميقة المعني مثل ( غويشه ) ، ولاحظ كلمة (امن) مع تساؤل الشاعر عن تلك الطمأنينة ، و يستمر الشاعر في سرد تلك السيرة الذاتية
( غويشة مي و مريومه
تماما زي حمامايه
لم تعرف لها زوجا
ولم تعرف لها تومه
وحيده وجوه عشايه
= = = = = = = =
بتاتا لم تساسق
في الطريق العام
و لا في الحله قوقايه
و تب ما للتباهي
و لا لزوم القدله والزينه
هي المختوته لي يوما
المدسوسه للحفله
المحروسه من غفله
الموروثه في الخاطر
المخصوصه للممكن
يكون باكر
= = = = = = =
كتير الحمي تتسربل
مسام البيت
وتسكن في ضرا النومه
و كم تتعثر القومه
كتيرا ما
كتيرا ما
كتيرا ما
ككل الناس
تتم الناقصه بالمويه
و تبقي الستره عشايه )
غويشاية محجوب شريف تعلن عن معانيها السامية و تتعدي حالة كونها شيئا ،و تصبح رمزا و مرموزا لتلك المعاني السامية التي لا يعرفها اولئك اللصوص المختومين بختم الدولة و اوراقها الثبوتية ولكنهم يسرقون من الاشياء معانيها، الم يسرقوا معني الحياة في السودان ؟
( غويشايه
غويشة السترة والحوبه
ومن تعب التي ظلت
ترتق بالصبر توبا
تفتق وردة السترة
التبتق في بنياتا
وتعتق ذكري حبوبه
غويشايه
وفر من سكرا وشايا
وفر من كسرتا و زيتا
و كم من باقي ماهيه
يشيلا السوق كما هي
بلا سكة رفاهيه
ولا حتة قماشايه
تساسق مكتبا و بيتا
كما كل الافنديه
حبيبة فول وعيشايا
تساهر ابرتا و خيطا
مكنتا من زمن ياما
تحت الداما دواره
و كل زراره نواره
تفرهد في قماشايا
تخليهو القديم لنجي
يبقي المافي من مافي
و يبقي البلدي افرنجي
تقول للذله حاشايا )
بهذه البساطة ذات العمق الكثيف يتباهي الشاعر بتفاصيل حميمة هي التي كونت هذه الغويشايه ، يتباهي بشريكة حياته تلك التي تساسق بين المكتب و البيت كما الافندية ، اتها غويشايه وجدت من إنصهار كل هذه التفاصيل ، و بهذه الثقل الوصفي للغويشايه وتفاصيل وجودها و تواجدها و بجوهرة المعاني التي تشتبك في سيرتها الذاتية يتم حصار اولئك اللصوص داخل القصيدة فيتقبح ذلك الفعل ازاء تجليات الجمال التي تتباهي بها هذه القصيدة في بنائها وصورها الشعرية و موسيقاها ذات التلقائية العالية
( اما العبد باللاهي
فزوجا ليس باللاهي
قلبي الجمره واطئها
و ماني محلقا ساهي
و لا متملقا احدا
و لا متعلقا ابدا
باموال و لاجاه
طول العمر ماهيه
بقت حزمة معاشايه
اخيرا اصبحت ورقة
وما بتسد فرد فرقه
المنديل تمن طرقه
و الصقر ان وقع كتر
الباتابت عيب
ضرا و درقه
لذلك يا رضي نفسي
حزمت الامر من اول
ما بالخوف بنتحول
و لا بنجوع بنتسول
اكيد عمر الكلام اطول
قصير العمر لو طول
احب الكلمة لو حره
احب الستره لو مره
اعاف الشينه لو دره
احب العفه بت امي
حليب الستره في فمي
دبيب النمله في دمي
وكت تلقالا عيشايا
تجر جريا واباريها
و ما بتضل طريق الصف
للمخزن
و لم تأذن لنفسها
تنفرد بيها
ولم تأذن
ولم تحزن علي ذلك
و لم تحرن
= = = = = =
و بعض البعض قد ذهبوا
الي من عنده ذهب
و بعض البعض قد مالوا
الي من عنده مال
و لكن من ستر حالو
يمين الله قد نهبوا
الا ما اشرف النمله
الاما اشرف النمله
و تبا للضمير
لمن يصير خمله )
وفي بيان شعري شفيف و متواضع يعلن الشاعر إنحيازه للقيم السامية مفتخرا بصفاته ومن حقه ذلك و لاينسي ان يعري ما اسماهم ببعض البعض ، اولئك الذين قذفت بهم رياح الإنتهازية والمنفعة في متاهات السلب و القبح ، منحازا في ذلك الي النملة في إنتمائها للحراك الجماعي ، هاتفا بملء الصوت ( الا ما اشرف النمله )، معلنا ادانته الدامغة للضمير الخامل.
في المقطع التالي يخاطب الشاعر ذلك اللص الحكومي محاولا إيجاد اعذار لفعلته تلك وبحساسية شاعر يقف دائما مع قيم التسامح والعفو
( فيا لصاحكوميا
بختم الدوله لاحوله
باوراقا الثبوتيه
بكل ملابس الحمله
عمل عمله
عمل عمله
عمل عمله
عفيت لو بقت سكر
وشاهي و زيت
عفيتك لو كسيت امك
صرفت روشتة الوالد
و راحت في إيجار البيت
واقول ياريت
اذا فرحتهم بالحق
اقول يا ريت
عفيتك .. لو ولكنك )
و لاينسي الشعر ان يجذر واقع الازمة في بحثه عن اعذار تستحق ان يعفو عن ذلك اللص الحكومي و يحيل ذلك الفعل ( السرقة ) الي السلطة الحاكمة
(دا ما منك
دا ما منك
دا من حال البلد ذاتا
حراباتا و حزازاتا
ناس السلطة ناساتا
ناس فوق و ناس تحت
تحت الارض اقرب لامواتا )
و ما اعظم اسف الشعراء علي اوطانهم ، ، انه ذلك الاسف العميق الذي ينبع من مجمرة الشعر الصادقة
( ضاقت ولما استحكمت حلقاتا
ياللاسف ... كم من ولد فاتا
سهولا ، جبالا ، غاباتا
ونيلا جاري
في حزة مفازاتا
هديك لجة موانيها
و فوق رحمة سماواتا
ضاقت و لما استحكمت حلقاتا
كم من ولد فاتا ؟؟)
و تبقي قصيدة ( غوايشايه ) لمحجوب شريف بمثابة إدانة دامغة علي سلوك هولاء الظلاميين ، تري هل يستحق ذلك اللص الحكومي المختوم بختم الدولة و اوراقها الثبوتية عفو هذا الشاعر الجميل.
[email protected]
| |
|
|
|
|
|
|
|
|
|
Re: أزمة مكتومة بين الجمهوريين والشيوعي (Re: Yasir Elsharif)
|
أنا على إطلاع واسع على مختلف قروبات الجمهوريين والصالون الخاص وموقع الفكرة
كذلك على اتصال يومي بكثير جدا من الجمهوريين بعضهم على رأس الحزب مثل الأستاذة أسماء محمود
لم اسمع لا تصريحا ولا تلميحا في هذه الأيام أي حديث من الجمهوريين عن مثل ما ذهب اليه الخبر
الجمهوريين عهدم (داخل وخارج الحزب) إذا لم يترضوا أمرا من شخص أو حزب أو خلافه واجهوه به
في الحين والتو - يكاد يكون عدا حادثة واحد ايام النضال الوطني عن شخصية سودانية معروفة وقفت موقفا مماليء للإنجليز
ورأى الأستاذ محمود محمد طه وقتها الا يواجه بما فعل خشية كسر الصف الوطني وقتها
| |
|
|
|
|
|
|
|
|
|
Re: أزمة مكتومة بين الجمهوريين والشيوعي (Re: عبدالله عثمان)
|
قال عثمان عبدالله،
Quote: واحد ايام النضال الوطني عن شخصية سودانية معروفة وقفت موقفا مماليء للإنجليز
ورأى الأستاذ محمود محمد طه وقتها الا يواجه بما فعل خشية كسر الصف الوطني وقتها |
وتحديداً وهو يقول:
Quote:
موقفا مماليء للإنجليز
ورأى الأستاذ محمود محمد طه وقتها الا يواجه بما فعل خشية كسر الصف الوطني |
ونسى نفس المتداخل انه اورد عن استاذه رسالته الشهيرة للحصول على الموافقة من ريئسه الانجليزي وهو يتذلل بالقول:
Quote:
I beg to remain,
Sir,
Your most obedient servant,
(Sgd.) Mahmoud Mohamed Taha
A/ S. W. and W.
Kassala
اتوسل إليكم سيدى في أن اكون خادمكم الاكثر طاعة
محمود محمد طه |
| |
|
|
|
|
|
|
|
|
|
Re: أزمة مكتومة بين الجمهوريين والشيوعي (Re: sadig mirghani)
|
وكل أعدائنا سؤال وكل أحبابنا جواب
وكل وقت لنا دنو وكل حين لنا اقتراب
ــ
ــ
فالشمس في الأفق ذات نور وإن بدا دونها السحاب
ـــ
الجزء الحادي عشر والأخير من ليلة الأستاذ محجوب شريف في مركز الأستاذ محمود محمد طه، وكلمة الأستاذة أسماء، وبعدها كلمة الأستاذ محجوب شريف، ثم الختام أشودة "جيلانينا" أداء آمنة حيدر الصافي وعزف الأستاذ علي الزين، نتوجه بها ونسأل الله أن تكون مسيرة اليوم الأربعاء عملا عظيما لدفع الظلم والقهر عن الشعب السوداني الطيب.
وجيلانينا
عوض الكريم موسى
جيلانينا قد شدّ نحو خيامنا الخيلَ
أيا قدم الهدى والنور كلنا سيدى كيلا
وخذنا في سياحات إلى أم القرى ليلا
فعنكم نحن ما ملنا ولم نعهد بكم ميلا
وهذي شمسكم دارت ولا حر ولا ظل
وهذا يومكم وافى وهاهم قومكم حلوا
وذي داراتكم نضر وذي راياتكم خضر
حواليها أهيل الله روح الله والذكر
إليك الحبل ممدود من المبعوث إذ يرقى
ومنك الحبل ممدود إلى أبداله طرقا
ويطوى الحبل في المرقى لأولى عروة وثقى
لحضرته وأنت بها لحضرة ذاته الأبقى
ويعلو من سقى كفيك في ارض الرضا غرس
وإذ منك اخضرار العود حتى تسفر الشمس
وتشهد يوم زينته وأنت حمى مدينته
حواليه نبيوه ومنه الروح والقدس
فيا قنديل سيرته ويا سلطان حضرته
ويا يعسوب من طافوا عكوفا حول سدرته
وهذا ركبنا فجرا وهذا نور غرته
ألا فاجعل جنودك في مراضيه ونصرته
| |
|
|
|
|
|
|
|
|
|
Re: أزمة مكتومة بين الجمهوريين والشيوعي (Re: Yasir Elsharif)
|
"I beg to remain,
Sir,
Your most obedient servant,
(Sgd.) Mahmoud Mohamed Taha
A/ S. W. and W.
Kassala
اتوسل إليكم سيدى في أن اكون خادمكم الاكثر طاعة
محمود محمد طه"
اخونا على.. ياخى بإسم الأخوة والإحترام البيناتنا.. عليك الله كان توريني الصنف دا بشتريه من وين.
| |
|
|
|
|
|
|
|
|
|
Re: أزمة مكتومة بين الجمهوريين والشيوعي (Re: Abureesh)
|
سلام يا أخي أبو الريش والأخ علي الكنزي
لا أتفق معك يا عزيزي أبو الريش فيما ذهبت إليه من إشارة نحو الأخ الكنزي، وأظنك تمزح.
على كل حال أريد أن أقول للأخ علي الكنزي أن سواي قد حاولوا شرح كلمات الأستاذ التي كتبها في عام 1939 عندما تقدم بطلب للالتحاق بمدرسة القانون في كلية غردون، وهي طبعا نوع الخطاب السائد في الكتابة في ذلك الوقت. وهذا لا يقدح في أن الأستاذ محمود كان من رواد النضال الوطني ضد الانجليز وهذا يعرفه الناس، وربما يجهله البعض، وأظن أنك من هذا البعض. فأرجو أن تمنح نفسك فرصة لمزيد من التقصي والتبين "يا أيها الذين آمنوا إن جاءكم فاسق بنبأ فتبينوا أن تصيبوا قوما بجهالة فتصبحوا على ما فعلتم نادمين" صدق الله العظيم.
أرجو أن تشاهد هذا الفيلم الوثائقي بدون نظرة مسبقة كالتي تبدو لي من كتاباتك عن الأستاذ:
ياسر
| |
|
|
|
|
|
|
|
|
|
Re: أزمة مكتومة بين الجمهوريين والشيوعي (Re: Yasir Elsharif)
|
صدقت أخي ياسر باستشهادك بالاية التي تقول:
(يا أيها الذين آمنوا إن جاءكم فاسق بنبأ فتبينوا أن تصيبوا قوما بجهالة فتصبحوا على ما فعلتم نادمين" صدق الله العظيم.)
فمن هو الحري بوصف الفاسق من ادعى على الله رسالة ثانية ؟
ام من لم يأتي بأي كلمة منه بل نقل كلام الاستاذ نقلاً ولم يحرف فيها حتى حركة أحرف؟
والله لو أن الاستاذ ترسخ الايمان والتوحيد في قبله ما شرف أحداً دعك المستعمر بقوله الذي لا يجري على لسان ذو كرامة حتى ولو اراد دراسة لا تتوفر إلا لواحد
فهي سبة له وعليه اجراها الله على لسانه (ليخرج الله اضغانهم) :
Quote:
I beg to remain,
Sir,
Your most obedient servant,
(Sgd.) Mahmoud Mohamed Taha
A/ S. W. and W.
Kassala
اتوسل إليكم سيدى في أن اكون خادمكم الاكثر طاعة
محمود محمد طه |
| |
|
|
|
|
|
|
|
|
|
Re: أزمة مكتومة بين الجمهوريين والشيوعي (Re: Yasir Elsharif)
|
صدقت أخي ياسر باستشهادك بالاية التي تقول:
(يا أيها الذين آمنوا إن جاءكم فاسق بنبأ فتبينوا أن تصيبوا قوما بجهالة فتصبحوا على ما فعلتم نادمين" صدق الله العظيم.)
فمن هو الحري بوصف الفاسق من ادعى على الله رسالة ثانية ؟
ام من لم يأت بأي كلمة منه بل نقل كلام الاستاذ نقلاً ولم يحرف فيها حتى حركة أحرف؟
والله لو أن الاستاذ ترسخ الايمان والتوحيد في قبله ما شرف أحداً دعك المستعمر بقوله الذي لا يجري على لسان ذو كرامة حتى ولو اراد دراسة لا تتوفر إلا لواحد
فهي سبة له وعليه اجراها الله على لسانه (ليخرج الله اضغانهم) فكان الزهد فيها أولى:
Quote:
I beg to remain,
Sir,
Your most obedient servant,
(Sgd.) Mahmoud Mohamed Taha
A/ S. W. and W.
Kassala
اتوسل إليكم سيدى في أن اكون خادمكم الاكثر طاعة
محمود محمد طه |
| |
|
|
|
|
|
|
|
|
|
Re: أزمة مكتومة بين الجمهوريين والشيوعي (Re: معاوية عبيد الصائم)
|
السلام عليكم جميعاً...
اعتقد أن من يقرأ هذه الكتابة(اصل البوست) و في هذا التوقيت بالذات يدرك إنها موجهة و من ورائها قصد و هدف.
و اعتقد ان هذا البوست سيكون به كثير من المداخلات بشكل كبير و مدهش و هذا أمر يصب في ذات منحى الهدف من الكتابة.
بشكل شخصي انا غير معني بالرد لكل من يحاول مناقشتي في معتقدي هذا بل معنى بأن ارد لمن أحب أن أرد له.
| |
|
|
|
|
|
|
|
|
|
Re: أزمة مكتومة بين الجمهوريين والشيوعي (Re: Abureesh)
|
اخ ابوالريش
سلام
وانت تستفسرني قائلاً:
| Quote: اخونا على.. ياخى بإسم الأخوة والإحترام البيناتنا.. عليك الله كان توريني الصنف دا بشتريه من وين. |
الصنف دا انتاج الاستاذ محمود محمد طه
وتجده حصرياً عند تلميذه عبدالله عثمان
| |
|
|
|
|
|
|
|
|
|
Re: أزمة مكتومة بين الجمهوريين والشيوعي (Re: علي الكرار هاشم)
|
كتب الاستاذ عيسى ابراهيم محمد صالح
هذه محاولة صريحة لدق اسفين _ ولا استبعد الجداد الالكتروني _ بين الجمهوريين والشيوعيين،
اصلا قيادة الحزب لم تدع الى مسيرة تنطلق من منزل الاستاذ محمود، وانما هدف الحزب
الى قيام الوقفة المعهودة في منزل الاستاذ، ومجرد قيامها يعتبر انتزاع لحق الجمهوريين
في نشاطهم المشروع، وقد انعقدت الوقفة بمشاركة احزاب قوى التضامن، والقيت الكلمات،
ولم يتدخل الامن _ كعادته في فترات سابقة _ لفضها، وهذا وحده
انتصار لخط الحزب المعلن، الحقوق تنتزع!..
| |
|
|
|
|
|
|
| |
زهير عثمان حمد
Abureesh
Yasir Elsharif
صلاح أبو زيد
عبدالله عثمان
Ali Alkanzi
معاوية عبيد الصائم
سفيان بشير نابرى
محمد حيدر المشرف
mohmmed said ahmed
علي الكرار هاشم
Elbagir Osman
فيس بوك
تويتر
انستقرام
يوتيوب
بنتيريست