|
|
|
 Re: امثال دارفورية (Re: عبدالحفيظ ابوسن)
|
أشهر تلاتة امثال دارفوية انتشرت في كل السودان وصارت قومية :
جراداية في سروال
تلصق الطين في الكرعين
و المثل بتاع ابو القدح وأخوه
تاني في واحد ما متأكّد هل اصوله دارفوية أم لا: بتاع الإتنين (stuff) في سروال واحد
| |
  
|
|
|
|
|
|
|
|
Re: امثال دارفورية (Re: عبدالحفيظ ابوسن)
|
العزيز ابوسن
تحياتي
جميل ان تتطرق للحكم و الامثال من دارفور
الطيب سيخة عندما كان والياً على دارفور الكبرى كان يتباهى امام ولات الولايات الاخرى في مؤتمرات الولاة التي كانت تعقد سنوياً في ولاية من الولايات الكبرى قبل تقسيمها و يقول لهم :(انا حاكم دولة ولتست حاكم اقليم مثلكم)
وكان مندهشاً لتنوع وتعدد الثقافات :
الأمثال الشعبية في دارفور...
-1 - نمر كان مات كلو جلدايتو أرقط
-2 - دواني ما بودو لي بير
-3 - كديسة ما بتشال فى طبق
4 - - أبو القدح بعرفي محل بعضي أخيو
-5 - شدرة كم مالت بتكي في أخيو
-6 - الراجل برجالو .. المفنقل بسروالو .. والكريم بأم عيالو
-7 - دنيا دبنقا دردقو بشيش
8 - - جقلو ما مشي عرجة
-9 - الديك أجاويدو عيالو
-10 - أب جنقور في فاشر ما عندو رأي
11 -- سفر خريف وأكل تفاتيف وجيزة بني لفيف كله منو أقيف
-12 - شدرة كن هوززت يا أبلاي يا هبوباي
13 - - نعال بقديد ولا مرة بوليد
14 -- أم سلمبيتي ولا كدكاى زول
-15 - الرجال دناقر ما كبر عناقر
-16 - جرداي في سروال ولا بعضي إله قعادو ياشين
-17 - ألمي حار ما لعب قعونج
-18 - مسكين جدلاي درب
-19 - ام جلخمة ما بأكل دردين
-20 - الجوعان فورة البرمة قاسي ليهو
-21 - أخوك كان زينوه بلي رأسك
22 -- المرا بدقو بأخيتو
23 -- جمل ولا بعرفي عوجة رقبتو
-24 - ابلاي برقبتو بربطو في صلبو مالوه
-25 - بليلة مباشر ولا ضبيحة مكاشر
-26 - عينو في فيل وبطعن في ضله
-27 - أم بلتيتي ولا تقلية زول
28 - - دابي في خشمو جرداي ولا بعضي
-29 - ما تعضي حلووف وتملأ خشمك صوف
-30 - زرع درب وتربية كلب وعامل دار غرب عشانهم ما تنكرب
-31 - تربية كدايس وترديد حدايث وجيزة عجايز كل نقايص في نقايص
32 -- العندو بخور بتشم
-33 - تلصق طين في كرعين ما ببقى نعلين
34 -- عيال كان سكتوا يا غدور يا جرو
-35 - أهلك كان كلاب بنبحو كلو أنبح معاهم
36 -- هيلك كان دابي كلو أربطي في صلبك
-37 - السنون عضام والبطون برام
-38 - كان فاتوك في ذنب أتزوج مرتين وربي كلب
-39 - تجخجخ سنون بجيبي دم
40 -- اللحم بدمو والبنيه من بيت امه
-41 - اللحم بدمو والبنيه بشمو
-42 - أبيانا باين ولا جودا ملخلخ
43 -- العندو قش في ضهرو ما بتكي في نار
44 - - كبش ما بعرفي رأسو طاعم إلا في كلول
45 -- مسكين رأس تيس بملأ بيتو لحم
-46 - الفولة بتملئ والبقارة بجو
-47 - حلة من في ده عجوز بموت
-48 - الزعلان جرابو فاضي
-49 - كل شوكاي بسلو بدربو
-50 - الشريعة توب
51 -- سبلان ونقده جدادي
-52 - أخوك كان قدامك أخير من نعال شين
53 -- أم دنقدنق ما جري وتفتف ما مطر
54 - - حكم في ساق ولا مال في خناق
55 -- عجيلي بكر كرين أبوه
-56 - سفاهة أبو دنقا بخلي خشمو وبعضي بعنقرتو
-57 - العود كان ما فيه شق ما بقول طق
-58 - الما كسا أمو ما بكسي خالتو
-59 - رأس ولا بشيلي جرين
- 60 - الخريف اللين من شوقارتو بين
-61 - محل خيل مافين حمير بقلبو
-62 - البريدك بقشي ليك درب والباباك بشبشبي فيك كلب
-63 - الشيطان غشاك وسويتي براك، والله التسوي بايدك بغلب أجاويدك
-64 - الكلام الغش وموية الرش ما بقوم قش.
65 - - جرداي ما بلزو في زرع
-66 - ما في غزالا ما قام جدي
-67 - كديسه ما بحرسو بشرموت
68 -- الما بريدك ببردي شاي في أيدك
-69 - شوكاي في رأس دابي ياتو بسلي
-70 - جبل ولا بحشو بجراي
-71 - من أول ولا بلحيل ووطا بقى ليل
-72 - زرو زرين كلب في دانقة
-73 - غراب ولا بسلي عين أخيو
- 74 - الرأس ما كراس
-75 - الما فى أيدك بكيدك
| |
|
|
|
|
|
|
|
|
|
Re: امثال دارفورية (Re: A.Razek Althalib)
|
اوووو موسي الراجل
شوق اخدر ومخدر
وينك ياخ
فتنتك مع عيسي عبدالله ود عمك .. قلت ليهو وقال لي جا متين ؟!!
اممممك انا اخوك آ موسي دحين ما وشيت بيك
وقنبت في الاعذار
تشكر للامثال اللتنا
صحي والله
الكوم صعيد التقا بوتاب
وصحي محير
براد بلا كبابي
شن بسووبوو
| |
|
|
|
|
|
|
|
|
|
Re: امثال دارفورية (Re: عبدالحفيظ ابوسن)
|
طبعا الامثال بصفة عامة هي نتاج وتراكم لخبرات متواترة ..
ومتداولة بين الأجيال لكن ما يعجبني في الأمثال الدارفورية ..
هو نزوعها نحو الطرفة والملاحة والتصاقها الشديد بالواقع ..
يعني المثل تجده معبرا عن البيئة وعن الموروثات ..
«أم صلمبايتي ولا كدكاي زول » ..
مثل جميل يعبر عن التعفف عن حق غيرك ..
واعتزازك وقناعتك بما هو عندك وما منحك له الله ..
أم صلمباي : الفار الصغير أم سيسي ..
والكدكاي : الجقر الكبير ...
شوف بالله الوصف ده كيفنو !! ..
سحب للوصف بصورة دقيقة ليوافق ويطابق ويوازي صورة أخرى .
بوست أكثر من رائع يا حفيظ ..
.
| |
|
|
|
|
|
|
|
|
|
Re: امثال دارفورية (Re: جمال ود القوز)
|
كمان هناك أمثال تتقال بكل عفوية ..
حتى لو كان فيها ما يتحفظ البعض عن قوله .. مثل :
ألفى جعابو عويش ولا بنطى نار ..
ألسروالو مقدود ما بفنقل ..
طبعن المثلين ديل بيعبروا عن واقع حال يوازي طرفة المثل ..
كما يعجبني جدا المثل بتاع ..
البحر رايق و القعونج مضايق ..
مثل روعة خالص .. تحس فيهو شفتنة ههههههه...
عموما المثل الدارفوري ..
يحفّزك لأن تستنبط الوقائع المماثلة والتي ينطبق عليها المثل ..
فتجد أمامك أبعاد لا متناهية ممكن تسحب عليها المثل ..
| |
|
|
|
|
|
|
|
|
|
Re: امثال دارفورية (Re: جمال ود القوز)
|
عبد الحفيظ ..حبابك يا صديقي
وحباب ضيوفك هنا..
فعلا يا عبد الحفيظ ، الجمال في هذه الأمثال هي طريقة نطقها وتوظيفها ، والناس هناك كلهم حكماء وحينما يقول احدهم مثلا تستغرب في سرعة البديهة واستحضار الصورة بالدقة المتناهية..
الوالدة الله يرحمها ، كانت في كل جلسة رسمية (يعني عشان توصيك) تبدأ خطبتها بعبارة (كلام بلا مثل ما بيكمل) أي ان الحكمة لابد ان تكون بالتمثيل واستيعاب الموروث السابق. وكلام هنا لا تعني مجرد الكلام ، وانما تعني الرأي في الأشياء المهمة لابد أن يكون مصحوب بالأمثال ، فالحاجة عليها الرحمة كانت تعرف قيمة الجدل والحجة والإقناع.
بعض من شرح الأمثال التي ارفقها صديقنا ول ابا سماعين:
10/ اب جنقور في فاشر ولا عندو راي
الجنقور هو الزي المهلهل (عراقي ممزق) ، كناية عن الإنسان الفقير/المسكين..الفاشر عاصمة مملكة دارفور ، والمعنى ان الرجل الفقير لا رأي له في العاصمة (رئاسة السلطة) ، وهو يشرح حال الديموقراطية اليوم في امريكا مثلا..حيث العلاقة الوطيدة بين المال والسلطة.
13/نعال بقديد ولا مرا بوليد
القديد تصغير قد أي الخرم في النعال ، اي ان يكون لك حذاء ممزق (مقدود/مخروم) خير من ان تتزوج مطلقة لديها اطفال. أي سينتهي بك المقام في تحمل مسئولية اطفال الغير. المعنى النهي عن زواج المطلقة ام الأطفال.
14/ ام سلمبويتي ولا كدكاي زول
صديقنا جمال ذكر انها الفار الصغير (ام سيسي) ، وسمعتها في بعض الشروحات تعني الحربوية أو حربويتي ولا جقر زول..لأن الحربوية محتقرة ولا احد يأكل لحمها.
ويقابله المثل المشهور:لالوب بلدنا ولا تمر الناس.
18/ مسكين جدلاي درب
الجُدل/الجُضل/الدقُل هو ما تبقى من جذع الشجرة المقطوعة..
في كردفان يقولون:المسكين دقل..
وهي تعني ان المسكين مثل ما تبقى من جذع الشجرة المقطوعة فلا احد يراه ولا احد يعيره انتباها..
19/ ام جلخمة ما بياكل دردين
والنطق وطريقة الكتابة تفقد المعني.
في كردفان نفس المثل: ام جركم ما بتاكل درتين
ام جركم هي الجرادة الكبيرة وتطلق على كل انواع الجراد
درتين مفردها درت وهو موسم الحصاد..أي ان الجراد قصير العمر
29/ ما تعضي حلوف وتملا خشمك صوف
الحلوف هو الخنزير البري ، بعضه كثيف الشعر واذا حاولت ان تعضه فلن تصيبه بالأذى لأن كثافة الشعر تمنعك من الوصول الى اللحم..أي مجازفة بلا معنى.
36/هيلك كن دابي كلو اربطي في صلبك
هيلك أي حقك ، والحق هنا تعني الثروة ، الدابي هو الثعبان والمقصود الثعبان السام ، ومعنى المثل الحرص على حقك/ثروتك مهما كان الأمر.
55/عجيلي بكر كرين ابوه
واصلا :عجيلي بيكر كرير ابوه
الكرير هو خوار الأبقار ، فالذكر (التور) يقولون كرير ، والأنثي (البقرة) يقولون تبكي. غالبا المثل تطلقه النساء على اطفالهن. أي ان طفلي سيصير مثل ابيه في الشجاعة والفراسة والكرم.
66/مافي غزالا ما قام جدي
ويقال في وصف المرأة الجميلة ، والجدي هو صغير الغزالان ، أي ان الجمال فيها مؤصل من سابق الزمان (حبوباتها ، امهاتها كلهن جميلات).
67/ كديسة ما بحرسوا بشرموت
والصياغة الأصل: كديسة ما بيحرسوا الشرموط
والشرموط هو شرائح اللحم التي تجفف ، فتكون هي قمة قلة العقل ان اوكلت امر حراسة اللحم للكديسة..!
68/المابيريدك يبردي الشاي في ايدك
والناس هناك تحب شرب الشاي ، ويشربونه حارا للغاية..
أي ان من لا يحبك ، بثقل دمه وبروده تجاههك يجعل الشاي باردا في يدك..يعني يمسخ عليك القعدة.
69/شوكاي في راس دابي ياتو بسلي
الثعبان سام ، أي ان طعنت الثعبان شوكة في رأسه من يستطيع اخراجها..المعنى استحالة الشئ.
70/جبل ولا بحشوا بجراي
الحش هو عملية تنظيف الزرع من الأعشاب الطفيلية حتى ينمو الزرع بطريقة جيدة
الجراية: هي اداة تستخدم في قطع الأعشاب (الحش) ، والمعنى ان الجبل ليس مثل الحشائش الصغيرة الرقيقة التي يمكن قطعها بجراية صغيرة.
71/من اول ولا بالحيل لما وطا بقى ليل
المعنى هو القبح ، وعادة يطلق على الزول/ة الشين والذي يصر على انو جميل. ولأن الكهربا كانت غير موجودة في تلك الأزمنة ، فكانت الناس تعتمد على ضوء الشمس (النهار) ، أي كان في ضوء النهار قبيح فهل يصر على انه جميل حتى في حال تعذر الرؤية (ليل).
72/ زرو زرين كلب في دانقة
واضح ان دانقة هي الطاحونة ، والمثل مشهور في المناطق الأخرى من السودان:زرهو زرة كلب في طاحونة..والطاحونة كانت لديها سير طويل يربط بين الموتور وباقي الشغلانة ، ويضع في مكان قريب من الحائط ، وحينما تكون بين الحائط والسير يصعب الخروج.
نفس المثل له صيغة اخرى وهي: زروهو زرة كلب في فريق فلاتة..أي حي فلاتة..وذلك أن اهلنا الفلاتة لا يربون الكلاب. ومن اتيحت له فرصة لرؤية فريق اهلنا امبررو ، يلاحظ انهم يحلبون اللبن ويضعونه في مواعين كبيرة في طرف الفريق ، وذلك اذا قدم ضيف يجد ما يتعشى به.
ونشوفكم
كبر
| |
|
|
|
|
|
|
|
|
|
Re: امثال دارفورية (Re: jini)
|
مرة وراجل كن تافقو ... برقدو في عوداي وبغطو بخيطاي ..
------------------
الجزء الاول تقريبا مفهوم ارجو شرح اكتر لو سمحتو
احترامي
| |
|
|
|
|
|
|
|
|
|
Re: امثال دارفورية (Re: خالد العبيد)
|
يا خالد الراجل والمرة ويقصد الازواج لو متفقين .. العود بشيلهم والخيط بغطيهم . يعني برضو وبقتنعو بحياتهم
النفوس لو اتطايبت العنقريب بشيل عشرة
دة مثل جميل والله
| |
|
|
|
|
|
|
| |
عبدالحفيظ ابوسن
محمد البشرى الخضر
اسماعيل عبد الله محمد
موسى العجب
A.Razek Althalib
جمال ود القوز
Kabar
Gaafar Ismail
عبدالعزيز الفاضلابى
jini
خالد العبيد
فيس بوك
تويتر
انستقرام
يوتيوب
بنتيريست