|
Re: الترزيه (Re: أبوذر بابكر)
|
ابو ذر بابكر يا راجل شارك الناس همومها واكتب عن الغلاء الطاحن وانصح الحاكم والمحكوم علك تكتب كلام يكون فيه حل مشكل السودان ويجب أن تهتم بأمر الناس علك تحسب من أمة محمد صلى الله عليه وسلم تخريمة بس ما تفهم الكلام غلط
| |
|
|
|
|
|
|
Re: الترزيه (Re: صديق مهدى على)
|
تحياتى اخانا صديق مهدى وكل التقدير
اكيد بتفق معاك تماما و الواجب هو الكتابة عن الواقع المهموم والمزحوم بالالام وصدقنى انا شخصيا فى عمق المعاناة والمكابدة لكل الحاصل الان
وصدقنى برضو لو قلت ليك مشاركتنا اكتر واكبر من مجرد فعل الكتابة
وده فعل عنده ناسه برضو و ما مقصرين ومشكورين
وزى ما بقولو كل فوله وليها كيال
انا عندى موقف معلن ومعروف من زمان بخصوص السياسة والكلام فى السياسة خصوصا هنا فى المنبر
وليك الشكر تانى على التنبيه
| |
|
|
|
|
|
|
Re: الترزيه (Re: Asim Ali)
|
ازيك يا عاصم
لا ما نسيناه كنا حنجيب سيرة عابدين عوض لما نجى لذكر الاسماء
كان هو الوحيد المتخصص فى اليونيفورمات العسكرية المحل الشهير فى السوق الافرنجى شمال فندق اراك وقريب من استديو محمدين وانت داخل على شارع الجمهورية
| |
|
|
|
|
|
|
Re: الترزيه (Re: أبوذر بابكر)
|
لكن الدين النصيحة لله ولرسوله ولعامة الناس يعنى عليك ان تنصح سوف يجزيك الله خير وهذا ليس سياسة ولا شنو ؟
| |
|
|
|
|
|
|
Re: الترزيه (Re: أبوذر بابكر)
|
يعنى حتى سيدنا على بن أبى طالب كرم الله وجهه عندما قال له الناس زمن زى سيدنا عمر بن الخطاب رضى الله عنه احسن من زمانك فأجاب سيدنا على كرم الله وجهه فى زمن عمر بن الخطاب كان هناك رجال امثالى اذا أخطأ نقول له اخطأت يا عمر اما فى زمنى لم أجد رجل يقول لى اخطأت يا على رضى الله عنهم جميعا
| |
|
|
|
|
|
|
Re: الترزيه (Re: صديق مهدى على)
|
تحياتى يا ابوذر
ماتنسى ايضاً الترزى القبطى المصرى المشهور ( فتح الله ) ترزى بدل ( بدلة ) ومحله كان فى نفس عمارة شركة الاخوة للادوات الكهربائية بالقرب من حلويات الكوبانى فى السوق العربى
| |
|
|
|
|
|
|
Re: الترزيه (Re: Moawia Mohammed)
|
نعم يا معاوية اليافطات كانت فى واجهة المحلات
لكن الفالبية طبعا من الترزية كانو فى برندات المحلات التحارية وخصوصا محلات الاقمشة قبل ما تغرب شمس الاقمشة وتحل محلات الملابس الجاهزة
| |
|
|
|
|
|
|
Re: الترزيه (Re: أبوذر بابكر)
|
الاخ ابوذر بابكر صبحك الله بالخير مرقتنا من جو الزيطا والزنبريطا بتاعت الأيام دي قبضوهو ودقوهو وعذبوهو وعييييك ... انا من المنتظرين فذلكتك عن الترزيه وتاريخهم فاكيد حا تضيف لي معلومة مهمه لكن من الذاكره علمت ان الفنان عثمان حسين كان ترزي والترزي الاشهر علي الاطلاق هذا الزمان هو مهدي الشريف الذي فجع بمقتل زوجته في حادث غدر مأساوي : : : مع التحيات لله الزاكيات
| |
|
|
|
|
|
|
Re: الترزيه (Re: Moawia Mohammed)
|
فعلا يا معاوية كل المبدعين ديل كانو ترزية والخياطة اصلا فن وابداع وجمال قبل ما تكون مهنة
وفى شعراء كمان برضو ترزية حنجى لذكرهم
| |
|
|
|
|
|
|
Re: الترزيه (Re: محمد حمزة الحسين)
|
تحياتى يا محمد حمزة وكل التقدير
لا بأس من شوية تنويع فى المواضيع
ان شاء الله نحوم فى سياحة مقتصرة عن الترزية وتفاصيلهم واسرار المهنة
انا طبعا ابن ترزى واتعلمت كمان ابجديات التفصيل والخياطة يعنى الزول ممكن يحاول يفصل و يخيط كمان
| |
|
|
|
|
|
|
Re: الترزيه (Re: أبوذر بابكر)
|
من اكبر تجمعات الترزية فى مكان واحد، هو السوق العربى فى الخرطوم وتحديدا مع محلات الاقمشة فى وحول شارع الصياغ الممتد شرق و غرب وموازى لشارع الجامع الكبير من الناحية الجنوبية ومحلات الاقمشة بتبدا بعد محلات الدهب وتتجه غربا من الزاوية الغربية المواجهة لعمارة الجهب حاليا وكان فيها بقالة اولاد ملاح وتتجه غربا لغاية مبنى البنك الصناعى واجزخانة فكرى ومن نفس التقاطع المحلات بتتجه جنوبا على الجانبين لغاية تقاطع مدرسة الخرطوم الاهلية او مدرسة الشيخ مصطفى الامين
اشهر محلات الاقمشة كانت البان جديد والصاروخ واحمد قاسم و ال النو، عمنا عبد القادر النو واخوه الامين النو، ومحلات السلاوى و حسن عامر وغيرهم
ومن أهم المعالم فى الشارع كان دكان محمد سعيد حمزة، الرجل الشايقى الحازم والصارم وهو اشهر محل لبيع مستلزمات الخياطة، الزراير والخيوط والابر والقيطان ومعاها كمان شوية حلويات، الدربس و البريمو وبسكويت جكسا و حلاوة لكوم
المحل كان جوار مخازن البان جديد وفى بيت تابع لال ابو حسبو وهم اخوال الشاعر الكبير سيف الدين الدسوقى الرحل قبل ايام عليه الرحمه
والمحل المهم التانى لبيع مستلزمات الخياطة هو دكان عبده تادرس فى شارع هاشم بك على يمينك وانت ماش جنوبا من جهة ميدان الامم المتحدة
اللافت كان هو كثافة التزرية الجنوبيين الاحباب وكلهم مختصين فى الخياطة الافرنجية حصريا، كانوا من ارقى واجمل واصدق خلق الله
ولينا عودة لمزيد من التفاصيل
| |
|
|
|
|
|
|
Re: الترزيه (Re: أبوذر بابكر)
|
نظام مهنة الخياطة واعرافها وتقاليدها بسيطة جدا الترزى الكبير المعلم و معاه تلميذ هدف التلميذ الاساسى هو تعلم المهنة على اصولها وعمله اليومى بدا بتجهيز مكنة الخياطة نظافة و تزييت وترتيب وفى معظم الاوقات بكون قريب من الترزى المعلم عشان يراقب ويتعلم ومن المهام الرئيسية عمل العراوى وهى فتحات الزراير فى الجلابية والقميص والبنطلون والعمل بكون بعمل غرز منتظمة بالخيط والابرة اليدوية فى فتحات الزراير البتكون اتعملت مسبقا بواسطة المعلم سواء فى القميص او الجلابية او البنطلون وتركيب الزراير يدويا اضافة طبعا للمراسيل
يتبع
| |
|
|
|
|
|
|
Re: الترزيه (Re: أبوذر بابكر)
|
الترزيه امام محلات الاقمشة ما بكون عندهم يافطات مكتوبة بحكم موقع العمل وبدل من اليافطة غالبا ما يكون لكل ترزى زبائن منتظمين ومداومين باستمرار على تفصيل وخياطة كل ملابسهم عنده، وفى معظم الحالات كل الاسرة بتكون ملتزمة بخياطة ملابسها عنده
اما اصحاب المحلات او الدكاكين المختصة بالخياطة بكون عندهم يافطات للمحلات زى كل باقى المحلات التجارية
محمد شبيرقله .. ترزى بلدى سيد عبد المحسن .. ترزى افرنجى نور الدائم محمد الشيخ .. ترزى افرنجى عبد الله محمد صالح .. ترزى ستاتى
وكلمة ستاتى كانت هى المعتمدة بدلا من نسائي
محجوب حسون .. ترزى افرنجى
وهكذا
| |
|
|
|
|
|
|
|