|
|
|
 Re: انطباعات 33 يوما في السودان؛ رسالة صادقة ل� (Re: عبدالمنعم الطيب حسن)
|
ولاصدقائي المغتربين؛
ان ارجعوا !!!!
اخاف من ان ياتي يوما قريبا؛
ان لا تمرا في الاغتراب؛
وان العريجا تتلفت براها؛
وقد فاتها المُراح؛
........................
ساتحدث عن اي شيء وكل شيء...
(فهذه اطول اجازة لي في البلد منذ سنين طويلة)
عن الاسعار
وعن الاستقرار
وعن الحياة الصاخبة في البلد
ساورد ارقاما عن السلع واخرى عن الخدمة؛
عكس اجازتي الماضية التي قضيتها كلها في واوسي ولم اذهب للمدينة سوى يتيمة كنت مكرها فيها لا بطل....
هذه المرة كنت اذهب تقريبا كل يوم للمدينة واعود اخر النهار لبيتي الريفي الجميل!!
كنت في ذهابي اليومي للمدينة برضك مكرها اخاك لا بطل؛؛؛
ساعود؛؛
| |
 
|
|
|
|
|
|
|
|
Re: انطباعات 33 يوما في السودان؛ رسالة صادقة ل� (Re: Abdalla Hussein)
|
Quote:
حباب ود الطيب والف حمدالله على السلامة
منتظرينك تجيب الاكيدة واخير الناس يبقوا خفاف او يبقوا مارقين
وزى ماقال القذافى" قد تندمون يوم لاينفع الندم "
كل الود |
حبابك الف عبدالله حسين؛
شرفت البوست
شكرا لمرورك؛
الاسعار قطعة من النار؛
السلعة ما بتنهبش!!!!
بس الناس ياخ عايشة ومبسوطة ضاحكة ومحتفلة؛
كيف ما تسالني؟
من وين ؟
هم ذاتم ما عارفين؛
العربية التي اقلتني واسرتي من مطار الخرطوم حتى واوسي(60 كلم بالمللي)
قال مليون؛ بدات في المفاوضات كمغتربي يخاف الغش؛
نقص 50 الف وبدا في رفع العفش...
عندما وصلت البيت اعطاه اخي مليون جنيه؛
فتأمل!!!
اخر كيلو لحم اشتريته من الكدرو ب 130 الف جنيه
ومن الجيلي الدجاح شبه المحمرة ب 80 الف
شبه المحمرة لانها عندما وصلنا البيت اعادة المدام صياغتها فقد ظهرت الدماء تحت الجلد حمراء
لا تسر الاكلين؛؛؛
اجرت عربية متوسطة الجودة وصغيرة لمدة شهر طق
تكلفتها مع البنزين تقترب من او ربما تتجاوز ال 20 مليون من الورقات!!!!
ساعود لاتكلم عن الجوانب المضيئة في البلد
وقدرة الناس على المعايش رغم الحال الحرن؛
ساعود لاتحدث عن الاسعار برضك
فقد اصبحت خبيرا في السوق؛
ضعيفا في المفاوضات؛
شكرا صديقي عيدالله حسين
خليك قريب؛
| |
|
|
|
|
|
|
|
|
|
Re: انطباعات 33 يوما في السودان؛ رسالة صادقة ل� (Re: سيف اليزل الماحي)
|
المبلغ فعلا كبير ياسيف لكن ده الواقع
انا كنت في اجازة قضيت عيد رمضان الفات في الخرطوم برضو
واجهت مشكلة ايجار العربية ..تخيل اكسنت دبدوب موديل2010
ايجار اليوم 500 جنيه واقل شئ لازم تأجر 10 -15 يوم اقل من كدا
صاحبا ما بقبل , في النهاية ما لقيت غير كلك موديل قدييم اليوم 330 جنيه
وطبعا البنزين الجالون كان 28 جنيه يعنى يومى محتاج اكتر من جالون حسب
مشاويرك .
قبل الاجازة حسبتها عشان امشى اجازة بالعربية لقيت الشغلة ما جايبة حقها
اولا سوء الخدمات البحرية والجبايات يعنى حتدفع تقريبا 4 - 5 الف ريال
عشان تودى العربية + ضياع ايام طويلة في الاجراءات والسفر من مكان
اقامتك للميناء ومن الميناء لمقصدك وبالعكس .
في الحالتين المغترب ضايع
| |
|
|
|
|
|
|
|
|
|
Re: انطباعات 33 يوما في السودان؛ رسالة صادقة ل� (Re: Basamat Alsheikh)
|
بت الشيخ سلام مربع
انا غايتو عندي توسان ادبني ادبة .. المكنيكي بقولي الجاز ما تقرشو كعب القريش معاو بقفل الفوني والانجكترات خصوصا جاز السودان الوسخان دا
البنزين مافيو كلا تقرشو وتجي تدور نقرة بس ..
عموما العربات البتقيف ما حباباها خلي المفتاح لي زول يدورها وهي واقفه ان شاء الله وما بتجيا عوجه ( ولو خايفه من الكسير ) عفرتيا وخليهم يدورها واقفه تقسم ..
تحياتي
Quote: ما فهمنا كلامك حكاية ما تشتري الجاز...
لأني بركن العربية سنة كاملة داخل الحوش لغاية ما اسافر اجازة الصيف.
وضح لينا اكتر
ودمت بخير |
| |
|
|
|
|
|
|
|
|
|
Re: انطباعات 33 يوما في السودان؛ رسالة صادقة ل� (Re: عبدالمنعم الطيب حسن)
|
حمدا لله علي السلامه
بالله واوسي خرطوم يعني ، انا مفتكرها من دنقلا و انت طالع
المشوار 1000 ج ل 60 كلم كتيره ، الباقير 40 كلم ، طريق مدني ، بي 250 ج
عربات التاجير الشهري غاليه و ما بتقدر تقضي بيها كل مشواريك
عندي بوكس ديزل ( مقرش ) بملئ التنك فل بي 200 ج ، بسوط الخرطوم مشاوير بالطول و العرض ، مع حمل الاغراض مواد بناء و غيره ، بقعد معاي 10 يوم ، يعني الشهر بي 600 ج .
الاسعار في الخرطوم ما في زول عارفها ، تدخل تشتري تدفع ، بالقرب منا 3 بقالات كبيره ( في السودان بقولوا عليها مول او سوبرماركت ) كل واحده سعرها لوحدها لنفس المنتج . مثال : حلاوه جلاكسي في واحد 200 ج و الاخري 490 ج ، تصدق
نعرج علي اول البوست
السودان جميل رغم الاحن و المجن والفتن
| |
|
|
|
|
|
|
|
|
|
Re: انطباعات 33 يوما في السودان؛ رسالة صادقة ل� (Re: الزبير بشير)
|
عمر مصطفى مضوي
شكرا يا صديقي تسلم
منى عمسيب
شكرا للمرور تسلمي
خليكم قراب في حاجات حاتبسطكم اوي
وفِي حاجات كمان حا تحبطكم جدا
سأحاول ان ابسط المعلومة من زول من عمق الشعب
ومن الناس التحتانية....
سأكتب عن العيد والشية في هواء طلق
تزيده دخاخين الشواء القا
سأكتب عن عشرات المناسبات الاجتماعية التي حضرتها لايف
سأكتب بعيون مشاهد ومشارك وناقد ومشفق وحزين وفرح
ومحب في جميع الأحوال......
وتبقى نومة في حوشي الوسيع تحت ضوء القمر
والنسيم الطبيعي...
لا شيء يعدلها الا الوطن البتول،،،
والقومة من النوم على تغريد القمري وبعضا من طيور
تسكن حديقتي الصغيرة
وتشرب من حويض الليمونة مطمئنة
تلعب ابني الطيب ذو العامين ودقدقة
وهي تعرف انه طفل
تتحرك ليس بعيدا عنا وعنه
وتشرب من حوض تاني
الطيور في بيتي كتيرة
بل ان بعضها اتخذ لونا اصفرا جميلا
هو ذات لون البرم في شجرتي سدر
تخضراني بيتي وتظللانه؛؛؛
شكرا عمر منى ساعود
............
نعم معقولة ونص وخمسة،
...........
العزيزان الطيب عباس
والزبير الختمي
بالمناسبة بالزبير أولادي بمدرسة النور وعباس الدسيس صديقي
شكرا لمروركما الكريم
الطيب والزبير
ساعود لكما بالتفصيل.....
| |
|
|
|
|
|
|
|
|
|
Re: انطباعات 33 يوما في السودان؛ رسالة صادقة ل� (Re: Basamat Alsheikh)
|
.
..
...
يا بسمات ...
العشرين مليون القاصدها عبد المنعم هي بالقديم ...
يعني ايجارو كلف بالجديد 2000 جنيه لا غير ...
الناس في السودان الان بتعاملوا بالجديد ...
يعني لو داير تشرب شاي بقولوا ليك الشاي بي 3 جنيه ...
لكن لو الزول عنده ارض ولا عربية بحاول يغليها ليك ويقول ليك عندي ارض بمليار جنيه (بالقديم) وهي بالجديد تساوي (مليون جنيه) ...
ناس الحكومة حذفوا تلاتة اصفار من العملة القديمة ...
...
..
.
| |
|
|
|
|
|
|
|
|
|
Re: انطباعات 33 يوما في السودان؛ رسالة صادقة ل� (Re: قسم الفضيل مضوي محمد)
|
Quote:
العشرين مليون القاصدها عبد المنعم هي بالقديم ...
يعني ايجارو كلف بالجديد 2000 جنيه لا غير ...
|
يوجد خطأ في المداخلة السابقة ...
20 مليون (20,000,000) بالقديم تساوي 20 الف (20,000) بالجديد ...
ال 20 مليون البتكلم عنها منعم يقصد بالقديم وهي تساوي 20 الف جنيه بالجديد ...
.
.
.
.
تحياتي لمنعوف ...
| |
|
|
|
|
|
|
|
|
|
Re: انطباعات 33 يوما في السودان؛ رسالة صادقة ل� (Re: مازن فيصل هلال)
|
الطيب عباس
شكرا للنصيحة بس لو ان وديت عربية من هنا ما حا اقرشا ابدا
حا ادرشا درش المغترب المجهجه العائد لتوه من دياسبورا لئيمة
ساصل بها كل الاحباب والاهل والاصحاب لتخف الناستولجيا
ويدر الحنين وتختضر الزكريات؛
فقد لاحظت ان ابي عندما ياتي اليه اخوانه من جهة ام ضوبان وسوبا والصفراء
ونواحي البطانة يغرق في الذكريات ويعود شابا
يبرق وجهه بالحنين ويضيء؛
ويزداد طولا وعرضا وجمالا؛
عاوزين نتشبب ونشب ونغادر الشيب؛
والاغتراب؛
دعوتي ما زالت حارة للعودة للوطن البتول؛
......................
الزبير الختمي كيفك يا امير؛
ياخ في بطاطس شيبس يشتريها اولادي هنا ب ريالين ونص
تصدق اشتريتا ليهم هي ذاتا من بقالة في الجيلي ب 70 الف جنيه!!!!
اشتريت كيلو سكر ب 7 الف؛
والخضرجي في الجيلي بعمل لي كل ما اجيهو سلطة مشكلة ب 100 الف
واشتريت 10 تفاحات صُغار ب 100 الف من الجيلي برضو؛
يا زول جاييك لسع
العلاج سافرد له مداخلة منفصلة تلك ماساة كاملة الدسم!!!!!
وتسلم؛
وبرضو السودان دا ما حا نخليهو للكيزان ديل!!!
دا وطنا ياخ؛
............
محب شكرا للمرور اخوي العشرين مليون تعادل تقريبا 900 دولار ودقدقة!!!
...........
الاخ الفاضل مازن فيصل هلال؛
شكرا لمرورك العطير؛
قست المسافة من بوابة بيتي في واوسي الشيخ عبدالقادر؛
حتي تجاوزت المحطة الوسطى بحري وقربت اصل النيل لم تصل ل50 كلم وان اقتربت جدا جدا!!!
هذه المسافة اقطعها يوميا في حدود الساعة في حالة الزحمة
ايام العيد قطعتها في نص ساعة تقريبا؛
تسلم اخوي؛
| |
|
|
|
|
|
|
|
|
|
Re: انطباعات 33 يوما في السودان؛ رسالة صادقة ل� (Re: عبدالمنعم الطيب حسن)
|
تلاتة ايام العيد بلياليها لم ناكل غير لحم وثريد وشيات ومرارة؛
في البيت عند الجيران الاهل؛
حتى اننا ناكل في بيت وندخل البيت التاني
نلقى اللحوم بوخة يلوي
نضرب والنفس على الله؛
ولم نشرب سوى شاي وقهوة وشربوت؛
وما زلت اسجل زيارات خفافية لقارورة طه تلك المخباة بعناية في شجرة ليموني الظليلة؛
اها بعد داك بدأت دعوات ناس الحلة للاعراس؛
هذا موسم الاعراس بامتياز؛
حضرت معظم مناسبات الزواج في واوسي الشيخ عبدالقادر حلتنا؛
وباقي واوسيات لم اذهب ببساطة لا يوجد زمن؛ حتى في حلتنا ذهبت للاقرب؛
في اليوم الواحد هنا في الشيخ عبدالقادر يوجد اكتر من مناسبة فطور واخرى غداء
الصباح نتروش
ونركب عربيتنا وفللي على ناس العرس؛
نضرب المخللات والجبنة وقليلا من اللحوم
وفي تحلية كمان؛ شعيرية وسكسكانية ومطبق؛؛؛
ونشرب شايا وقهوة
ونحضر العقد
وبعدها نكرطع الكركدي البارد
وبعضا من تميرات؛
وجري المكيفات وغمدة صغيرونة
ونستعد للعرس الجاي؛
استمر البرنامج ربما اسبوعا؛
ياخ لاقيت كل اصدقائي وزملائي واحبابي
وناس الحلة كلهم؛
وفي ناس كتا ما دائر الاقيهم برضو لاقيتهم
استمتعت ايما متعة
ودي عظمة الناس والبلد والسودان
الشعب يعوض الضنك ويتناسى الظلم وجور الحكام
بتماسكه وبحياته الصاخبة؛
,,,,,,,,,,,,,,,,,,,,,,
هذا من جانبي ساعود لاتحدث عن اندماج اطفالي وفرحتهم بالوطن؛
وبرضو في لسع انطباعات
خليكم قراب؛؛؛
| |
|
|
|
|
|
|
|
|
|
Re: انطباعات 33 يوما في السودان؛ رسالة صادقة ل� (Re: عبدالمنعم الطيب حسن)
|
طبق البيض ب ستين الف
والبيضة الواحدة دي ب ألفين
السعر دا جانب
لكن الوسخ على كل بيضة دا براه قصة وآخرا فضلات
تصدق اي بيض كانما خرجت من أمها استلما واحد
وغتسا في الفضلات تلك المجموعة بكثافة
البيضة مليانة بكل جوانبا بفضلات الدجاج وقد نشفت
وتمسكت بالبيضة لا فكاك
اول طبق بيض جاء البيت قربت استفرغ لما شفتو
بعد شوية أفرغته في حوض المطبخ وتركت الماء تنزل عليه لمدة
وبعداك مسكتو بيضة بيضة الهم نعدو
غسلتو واحدة واحدة
وقربتا اشرو
معقولا بس
وين البلديات
والمحليات والوزارات
تنشط في جمع الجبايات
وتتكاسل وتتناسي وتتجاهل
ولا تهتم بالمواطن
ان شاء الله يأكل خ..
يخسي على الحكومة المعفنة الوسخانة
لاحقا صرت لا اشتري أبدا بيضا كهذا
ولو اخترت البيض النضيف واحدة واحدة
ولو من عشرين طبق
تف على الحكومة وهي تستهين بصحة شعبها
تف يا دنيا تف من ها الزمن
.........
ساعود لأتكلم عن تجربة علاج اختي عشة
وتلك قصة اخري مبالغة لجهة الغلاء الفظيع
وبها طابع نبيل من واحد من أبناء الشعب الغبش
ساعود،
| |
|
|
|
|
|
|
|
|
|
Re: انطباعات 33 يوما في السودان؛ رسالة صادقة ل� (Re: عبدالمنعم الطيب حسن)
|
والله كنت منتظر لغاية ما تجيب سيرة البيض
عليك الله لوكل أسرة سوت قفص جداد عشان البيض والجداد البحصل شنو
والله ما اسهل من قفص بسيط فيه كم جدادة وديك ، وتاكل احلى بيض واحلى جداد
لكن مين البقنع الفيميل
ما عندنا اوسع من حيشانا ، وحيشانا تساوي تسعين في المية من معيشتنا
دا كله ما دفاع عن الحكومة ولا عن سياساتها، لكن عرفنها الفيها والمفروض نتعايش مع كدا
| |
|
|
|
|
|
|
|
|
|
Re: انطباعات 33 يوما في السودان؛ رسالة صادقة ل� (Re: احمد الشيخ)
|
هلا احمد الشيخ
شكرا للمرور والمشاركة
بس ياخ هل كل الناس ساكنة حيشان فسيحة؟
وهل كلها عندها مود وزمن لمن تربية الدواجن؟
نحن زمان كان عندنا بقر في التحتانية
وغنم وضان ساكن معانا في البيت
ودجاجات كتيرة بديكتها وبسواسيوا
بس دا كلو فات مع ناسو
هسع حلتنا كلها وهم المزارعون
الأسر التي لديها بقر وغنم تعد على أصابع اليد الواحد
بتاع اللبن بقى يجي ببكسي
لو شفتا الزحمة قبل المغرب وبعده
تقول بوزعو مجانا وليس ب ٦ الف للرطل الواحد
بعدين بالمنطق كلو واحد يسوي ليه فرن وقدرة فول
وبقرتين ومزرعة خضروات
ياصديقي احمد الدولة تقدم السلعة للمواطن بسعر الدولار العالمي
وبوساخة وسخافة وهددتم حيل وقلة حيلة الجنيه السوداني
هذا منطق معوج جدا
من حكومة عاطلة ومتعطلة وباطلة
الحكومة وصلت مرحلة من الترهل كونها لا تبالي ولا تهتم
شكرا احمد الشيخ....
| |
|
|
|
|
|
|
|
|
|
Re: انطباعات 33 يوما في السودان؛ رسالة صادقة ل� (Re: عبدالمنعم الطيب حسن)
|
يا سادتي الكرام هذا البوست طازج جدا،
له نفس اسم بوست السنة الماضية
ويدور حول ذات الفكرة العمدة
فكرة الرجوع لي وطن حرق
وطن يكاد يتلاشى؛
حاكمه لا يبالي
والشعب جاري؛
ولا في حاجة بتتلحق
الشعب لا شغال بالحكومة
واحقاقا للحق ولا المعارضة
وتسعة وتسعين في المية منهم لم يسمعوا بسودانيزونلاين
حتى؛
وبعدين يا جماعة لفت نظري اختفاء صفار البيض في البيضة
ذلك اللون العدسي الأصفر الفاقع يسر الاكلين اختفى تماما
وحل محله لون ابيض الا درجة
تحول لون صفار البيض للون اغيبش
اقرب للأبيض
فصار الطبق أبيضاً في ابيضا
............
الصباح عشة اختي تدي اقرب طفل عشرين الف عشان يشتري
رغيف للفطور فقط؛
فتململوا؛
..........
سلام هوي؛
ساعود....
| |
|
|
|
|
|
|
|
|
|
Re: انطباعات 33 يوما في السودان؛ رسالة صادقة ل� (Re: عبدالمنعم الطيب حسن)
|
| Quote: هو ذات لون البرم في شجرتي سدر |
تصحيح عبد المنعم أخوووي البرم زهرة السنط وليس السدر
ثانيا موش انت من فتوار الباوقجيه ؟ حقتنا واللا انا ملخبط صححني كما صححتك
ثالثاً
السودان بخير والناس متعايشا معاهو شوفتا اخوووك كيف دفع المليون
وتحضرني نكته واحد صاحبي مشي السعوديه قال لي لمن ولاد البلد يعملوا شيرنق عشان
يجيبوا جداد انا بضحك فيهم يوم عزمتهم وقلتا ليهم حرم الليلا الميز عليّا استغرشوا يا قول جبرا
مرقتا ليهم ميتين ريال استغرشوا حد الصمت .
قمت قلتا ليهو ما جيت لي صاحبك فلان لي شنووو وصاحبو دا مغترب جاااي في إجازه
قال لي زمان بنجي للمغتربين يمكن يدونا شبشب حسي عليّا الايمان بقوا نحن نديهم الشباشب السمحه 
يا منعم ما شوفتا الناس لابسا كيف وشايلين جلكسيات كيف
وأخيراً من هنا ادعو واهيب بناس المعارضه يدلفوا لهذا البوست للإطلاع عليه
ليعرفوا السودان وشعب السودان ويشوفوا ليهم شغله
:
:
:
:
:
:
:
مع التحيات لله الزاكيات
| |
|
|
|
|
|
|
|
|
|
Re: انطباعات 33 يوما في السودان؛ رسالة صادقة ل� (Re: محمد حمزة الحسين)
|
هلا محمد حمزة الحسين
شرفت البوست
تسلم
| Quote: تصحيح عبد المنعم أخوووي البرم زهرة السنط وليس السدر |
هههها افو انا لخبطت بين السنط والسدر؛
ياخ انا ود السدر البعرفو نبقتو وشوكو....
بس شكلي لخبطت كنت اود ان اكتب سنط فكتبت سدر؛
ولو سالتني بعد دقيقة من المداخلة ما الشجرتين في بيتي لقلت انهما سنطات؛
دا كلو من الكُبر والغربة البطالة!!!
اها ايه رايك عندي شجرة سيال معمرة في بيتي؛
دا غير النيمات والليمونات وشجرات تانية باسطاني؛
| Quote: ثانيا موش انت من فتوار الباوقجيه |
حضرتي من اهلك ناس واوسي؛
تلك المنطقة العريقة التي تملا ذلك الفضاء الواسع الممتد من خور ديري حتي خور رملي؛
ومن البحر حتى الحجر؛
منطقة عظيمة باهلها وناسها وشعبها الطيب الكريم؛
50 كلم فقط من سنتر بحري حتى عمق واوسي؛ واوسي الكبرى....
بس انا من هناك لكن ناس الباوقة اشتروا حي كامل في واوسي وسموهو الباوقة
وفي الباوقة في واوسي كما توجد هناك واوسي في الباوقة
وهي منطقة صديقنا معاوية المدير....
| Quote: السودان بخير والناس متعايشا معاهو |
عاد الحقيقة السودان اصو ما بخير
الشعب بخير نعم!!!
لكن البلد تتطور كل ساعة نحو الاسواء؛
يالله بكم العلاج؟
وبكم الموية والكهرباء؟
وبكم الرغيفة والسكرة والملحة؟
وبكم خروف الضحية؟
وبكم مصاريف طالبة من الاقليم عاوز تدرس في الخرطوم...
بكم طلب الفول وقارورة الموية ورطل الزيت؟
بكم المواصلات؟
وبكم الحرية والديمقراطية وسيادة حكم ومحكمة القانون؟
اخخخخخخخ
العوج كتير لكن شقي الحال يقع في زول ما زال بشكر في الحكومة!!!
جلست اكتر من شهر في عمق الشعب ومع كل فئاته؛
لم اسمع احدا قال الحكومة دي سمحة؛؛؛
يا زول كم رسوم الاراضي وتكلفة الارض نفسها
وتكلفة الاستعداد اابناء وتكلفة البناء؟
بكم العربة وبكم البنزين؟
السودان اغلى بلد في العالم وفقا لدخل المواطن؛وتبعا لمنصرفاته!!!!
الشعب متجاوز وعظيم وبشيل بعض وبشيل فوق الدبر والدم
قدل شعبي؛؛
الشعب في وادي عظيم وصعب وغير ذي زرع ولكنه متماسك؛
والحكومة براها مترهلة وعاجزة وكافرة!!!
وتبا لها؛؛؛
..............................
شكرا صديقي محمد حمزة الجسين لاثراء النقاش واضافة ابعادا للحوار؛
وشكرا لاثارة شجوني؛؛
وتسلم يا كبير.....
| |
|
|
|
|
|
|
|
|
|
Re: انطباعات 33 يوما في السودان؛ رسالة صادقة ل� (Re: nazar hussien)
|
Quote: الصفراء دي عندي شك انها الصفر ما عارف ليه؟؟؟
|
هلا نزار حسين
شكرا على الطلة؛
ابوي عاش شبابه كله في تلك النواحي؛
وعندما استقر به المقام مزارعا؛
ظل يحدثنا طول عمره؛
عن وادي سوبا؛ وعن ام ضبان؛
وعن ام شديدة
وعن ريرا والصِفيَّة
وعن رفاعة ابسن ونواحي الهوج!!!
وعن وعن ابودليق وابزليق حتى عمق البطانة وقريبا جدا من انهر كسلا والعطبراوي
وحتى مدنا زي حلفا والقاش
ابوي امتد وتممد في البطانة من عمقها وحتى حوافها ومرا بالتخوم!!!
وله في كل وادي قصة وفي كل منحدر طرفة؛؛؛
ومع كل غنماية حكاية؛؛؛
وله جملا اصهب؛
وخرفان...ورباع بتعرف الرباع يا نزار
اسمع ابوي يقول
شوق حننة علي من الدمر قفو
وشوق عمك علي العزلوا الرباع جلبو؛؛؛
وشوق حننة علي المازعلوا من قول قال
وشوق عمك علي الخوة ام فراقا حار....
الخوة فعلا فراقا حار
بالامس في مطار الخرطوم
رايت عيني اخوي عبدالوهاب وقداغرورقتا بالدمع!!!
بعدين الصفراء دي بالذات لا تُنسى ابدا؛
وهي وادي سوبا العظيم حالما يشيخ وفيها يزرع اهلنا الذرة
غذاءا لنا وقشه تحبه البهائم!!!
حدثني عنها ابوي واعمامي زمنا
وعنها اخواني وابناء عمومتي ما زالوا
وحدثني عنها ابناء اخواني وحدثني عنها الاحفاد
هي الصفراء اذن؛
عزيزي نزارتسلم اخوي؛
| |
|
|
|
|
|
|
|
|
|
Re: انطباعات 33 يوما في السودان؛ رسالة صادقة ل� (Re: عمر السلمة)
|
| Quote: الزي زولك دا نسبتهم كم في الشعب السوداني او قول الشعب العاصمي ؟؟؟؟ |
هلا عمر السلمة
عمك زعل عديل كدة لمن عرف اني جائي خروج وعودة باطفالي؛؛؛
وطفق يحدثني حديث المتابع والحافظ عن التكلفة بعد القرارات المالية؛
يبتغي اقناعي بان اخلي الاولاد ديل في (فجتن) دي؛ واستمر يردح
وعندما فشل في اقناعي بوجهة نظره النظرية وتاكد انني راجع تاني!!!
قال لي: السنة دي بنديك ياها لكن علي الطلاق السنة الجاية ما بتقدروا؛
الاغتراب دا كان زمان هسع تجوا تملوا معانا هنا في الرمضاء دي!!!!
بعد الناس بحسن ظن او بسوءه يتدخل فيما لا يعنيه ويصر؛
في عينة زي دي؛؛؛
شتارة الف؛
شتارة من امها؛؛؛
| |
|
|
|
|
|
|
|
|
|
Re: انطباعات 33 يوما في السودان؛ بوست متجدد!!! (Re: عبدالمنعم الطيب حسن)
|
القهوة تحولت لمشروب شعبي؛
شعبي بامتياز؛
كانت القهوة وطقوسها مرتبطة بامهاتنا وجداتنا....
ولكن لاحظت منذ سنوات في زياراتي
في واجب العزاء لأهل واوسي
ان صارت القهوة تقدم جنب صديقها الشاي
ومع البيبسي طوالي
ويخيرونك بينها والشاي....
الان خلاص أصبحت تقدم في وكت صباح ضهر مغرب
وبالليل
هذا تحول عظيم في مزاج السودانيين والسودانيات
ربما مرده لستات الشاي....
القهوة تحولت لطقس شعبي
وأصبحت كلالإعمار تتعاطاها
وفنجان جبنة بشمالو
يساوي الدنيا بحالو،،،
وكلنا في القهوة شرق؛
وسأعود
| |
|
|
|
|
|
|
|
|
|
Re: انطباعات 33 يوما في السودان؛ بوست متجدد!!! (Re: الطيب عباس)
|
يا الطيب
يا سمي ابوي وابني الطيوبي
تسلم للمرور وحبابك الف
ياخ في ناس شتر
وناس فقر
ياخ البلد دي أكان بقت ما بقت تراها بلدنا
وما حانخليها الكيزان ولا للشتر!!!
ودا وطنا ياخ الباسموا غنَّينا ورطتا
بنحبو حقيقة وبنحبو مجاز
وبنحبو بضحك وبرضو وهو عبوس؛
سمعت لقاءا لوردي في التلفزيون ومقارنة بين الغربة والوطن
قال وردي فيما معناه: ان له شقة في القاهرة واُخرى في الاسكندرية
وله إقامة في أمريكا والسعودية والإمارات؛
وله بيت الف متر في الكلاكلة
وزار معظم دول العالم؛؛؛
ولكن كل ذلك لا يساوي ليلة حنينة في حلتن في صواردة !!!!
الوطن دا يا الطيب لا يقاس ولا يقارن
الوطن مشاعر وأحاسيس وذكريات وناس تحتانية؛
الوطن حاجة جوة في الأعماق تظل تفتقدها
وتأتيك حضورا وانت تلتمس بإحساس لا يوصف
ترابها الحنين؛
وتستنشق هواها النقي وتملأ رئتيك؛
وتتمنى ان لا زفير؛
......................
سيبك من الشتر ؛
واستمتع انت الان في وطن النجوم....
| |
|
|
|
|
|
|
|
|
|
Re: انطباعات 33 يوما في السودان؛ بوست متجدد!!! (Re: tasneem)
|
مرحبتين تسنيم
حبابك الف
شرفت البوست.....
والله الحديث عن الغربة وعن الوطن
وعن حق العودة المقدس حديث ذو شجون،
وغالبا ما يتجاوز المنطق ويدخل في اللحم الحي
وهنالك حقيقة ساطعة ان السوداني/ة
يظل مثل السمكة قلبه معلق بالماء وببلده وناسه والوطن
لاحظت ان الجنسيات التانية دي ولا يهمها ياخ
عايشة ومبسوطة في اغترابها الطويل
الا نحن السودانيين والسودانيات
نظل نحن أبدا لوطننا ولناسنا
الطيبين البسطاء
أمكن الحياة الصاخبة في البلد
أمكن ارتباطنا الاسري والمحتمعي
وأمكن عشان بلدنا سنا المجد
وينبوع الشذى العطر
تظل أبدا ملهمة لاغاريدنا
وفِي بعدها نظل شتر
وناقصانا حاجة وحاجات
ونظل رغم الحياة السهلة نحلم بالرجوع
اي زولة او زولة برة الوطن يظل يحلم بالرجوع
ويظل هذا الحلم شريطا اخضرا وبراقا
دوما يظل اخضرا
ولولاه لاحترقنا؛
الناس في السودان عايشة باي هوك آور كروك
نحن لسنا استثناءاً؛
نستطيع ان نمشي امورنا
ليه لا!!!!
بالله هو العمر كلو كم؟
ياخ البيبسي الملآن سكر دا في السودان ممتع؛
والجو من ما تغيب الشمش دا ما في زيو
اكتر حاجة انبهر منها اولادي واحبوها
هي النومة في الهواء الطلق؛
وصادقوا النجوم بعد ان تاملوها لايام
وكونوا منها أشكال
وعرفوا العصاء
والترياء
وقد رايتهم يستيقظون ربما قبل طلوع الشمس
يستمتعون باغاريد الطيور
وبنجيمات مازالت تغالب
ما زالت تضيء
وبهدوء الاسحار
وبشمشهم التي لم تشرق بعد
وان بدأت خيوط ضوءها يغازل صباحهم الجميل؛
تصدقي بكوا بعالي صوت وابنخجاجة
وهو يودعون اهلهم
ويغادرون نحو مهجرهم القسري...
ويظل السودان وطن النجوم
وأغلى وطن رغم الطاغوت والظلم والظلمات
والفسادوالحال المايل...
....................
وتصبحون جميعا على وطن وان طال السفر....
| |
|
|
|
|
|
|
| |
عبدالمنعم الطيب حسن
Abdalla Hussein
عمر مصطفى مضوي
مني عمسيب
الطيب عباس
الزبير بشير
Muhib
alsngaq
قسم الفضيل مضوي محمد
احمد الشيخ
محمد حمزة الحسين
عمر السلمة
فيس بوك
تويتر
انستقرام
يوتيوب
بنتيريست