التحية و التقدير للجميع قلنا البورداب يرتاحوا شوية و يتنفسوا شوية .. و العاوز يشرب شاى منعنع و لاّ حتى لو الشاى الحلفاوى المحروق ( دة واحد من اندنا كان بيبع شاى جنب السفارة السعودبة ايام السفر و الاغتراب للسعودية كان ليه طعم .. فكان يكورك ايةو الشاى الحلفاوى المحروق كناية عن الشاى المقنن ) .. و لاّ قهوة و لاّ سجاير كان بنسون و لاّ برنجى .. ان شاءالله حتى يخمس ( برضو واحد من احبابنا ما كان يحب الا التخميسة .. يديك سجارة و يخمس معاك و كان يمصو مص حتى يخلى السبارس يئن و يطلع صوت استغاثة .. خميسك لو تبيع قمصيك مقولة ايام زمااان .. و ناس زمااان .. و ناس بتزيد عليه و تقول عيد مبلادك يا ابليس .. الان .. المهاجر قلعت الناس من حضن الوطن .. و اصبح الخميس للعائلة .. ترجع منهوك و تشيلهم و تدويهم محل ما هم عايزين .. سواء كان حديقة و لاّ زيارة عائلية و لاّ مناسبة اجتماعية( و ما اكثر المناسبات) و اصبحت ... سائق ... مرافق .. حمّال شيال ..حارس(بودى قارد) ... ثم ... قون المغربية احست من مية .. و شاى المغربية احسن من 100 سجارة .. و خميس الاسبوع راح ف 60 داهية و شوق القلب يتدفق اليكم فردا فردا و اعانق حروفكم لتكون كلماتكم بلسما و ترياقا .. و نغنى ايام عمرى جنبك جنة و الف جنة مودتى و تقديرى
01-25-2018, 06:14 PM
محمد بدرالدين محمد بدرالدين
تاريخ التسجيل: 01-15-2018
مجموع المشاركات: 2185
قالو ف صلاة المغرب ..الامام صلي بسورة طويلة ..بعضهم اتضايق ..بعد الصلاة سال السورة الطويلة دي اسمو شنو .. قالو ليه سورة النمل .. بالله النمل الصغير سورتو طويل كدة ....... اها و لمان جاء ف صلاة العشا ..و وقفو للصلاة ..الامام بدا ب الم تري كيف فعل ربك باصحاب الفيل .... صاحبنا طوالي سلم و طلع من الصلاة و هو يقول .. شوف دة بالله عاوز يصبح بينا ..ف النمل الصغير دة ماسكنا ساعتين .. امال ف الفيل حيعمل ايه .. خايف يفوت عليه الخميس....هههههههه مودتي و تقديري
01-25-2018, 09:53 PM
طلحة عبدالله طلحة عبدالله
تاريخ التسجيل: 09-14-2007
مجموع المشاركات: 18023
سلام يا محمد بدر الدين مرحب بيك والله يا خوى الناس الهنا ديل ما بتاعين فرفشة جيب ليك أي موضوع فيهو فرقة ل الكواريك الغلاط الجرجرة التنظير العوك عاك الخ الخ الخ وعد الصفحات خخخخخخخخخ
01-25-2018, 11:32 PM
محمد بدرالدين محمد بدرالدين
تاريخ التسجيل: 01-15-2018
مجموع المشاركات: 2185
حبيبنا طلحة الف مرحب و اتشرفت بك جدا ... و يسعدني جدا ان اقرا لك و اسمع نصايحك .. صراحة بما انني برلوم جديد عندكم قلت استحدث بوست كاستراحة للاحباب الافاضل .. و خصوصا بعد بوستات التنظير و المجادلات و كدة ... الحاجات الذكرتها ... لات السوداني يكون قريب من اخوه ف الونسة العادية .. قلنا نخفف عليكم و عليهم شوية و بعدما ياخدو نفسهم و استراحتهم يقوموا تاني للبوستات و هم اكثر قربا من بعضهم و المحبة ترفهم.. مودتي و تقديري
01-25-2018, 10:03 PM
صديق مهدى على صديق مهدى على
تاريخ التسجيل: 10-09-2009
مجموع المشاركات: 10204
محمد بدرالدين انت يا عارف وعايز تعمل فيها رايح ولا ما عارف تبقى مصيبة لان عنوان بوستك دا ليهو علاقة بالممارسة الغير شرعية مع النساء ودا ما قديم ظهر مع ناس الانقاذ اها شن قولك
01-26-2018, 00:05 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
التحية و التقدير اخي الفاضل الصديق... قولي مع اكيد الاحترام للجميع. . اني لم اكن امرأ سؤء ..و ما جئت لافسد ..اتيتكم بقلب ابيض محب للجميع متمنيا الخير و السلام للوطن و للجميع و ان و ان نجتمع جميعا ف محبة الوطن .. و ان نكون نحن و هذا المنتدي داعما لذلك ... و فكرة البوست والله اقولها بصدق هو لتلك الاهداف .. استراحة و مؤانسة بعيدا عن الرسميات و الشكليات ..لان السوداني يكون اقرب لاخيه ف مجالسنا الاجتماعية و ينزل فيه عاداتنا و تقاليدنا و ما تربينا عليه من اخلاق لارض الواقع و نشعر ببعضنا و نكتشف جوانب شخصياتنا المتعددة .. و يكون التعارف الحقيقي المؤدي للصداقات الحقيقة .. و تكون عرفت راجل ..زي ما بنقول .. عنوان البوست عن مقولة كانت سائدة بين موظفي الزمن الجميل .. احتفاءا بنهاية الاسبوع ...التي غالبا ما يكون خميسها سينما .. او جلسة انس ..و جمعتها لمة قراصة او عصيدة ثم صلاة و العصر كورة .. ثم لتجهيز للسبت الثقيل ...و لكني والله العظيم لم يدر بخلدي ان هذا العنوان يمكن ان يوحي بما ذكرت ...و اقدم اعتذاري مليار ..لك و لكل من اعتقد او راي اني اقصد ذلك .. و ارجو شاكرا من جميع من يدخل البوست ان يعرف اني ما اردت الا خيرا .. اكرر تقديري و احترامي للجميع مودتي و تقديري
01-26-2018, 08:24 AM
فيصل محمد خليل فيصل محمد خليل
تاريخ التسجيل: 12-15-2005
مجموع المشاركات: 26041
وهاااك واحد من فكاهات عبده دهيه الحلفاوى عبده دهيه شخصيه ظريفه من اهالى المجراب كان لد يه شفيقه صالح بالسعوديه وعندما علموا بموعد عودته فى الا جازه لوادى حلغا قالت له اخته فاطمه دهيه الله يرحمها ياعبد ه بالله جيب لينا شوال فحم من السوق عشان صالح جاى من السعوديه فرد عبده ليه؟؟ هو ااصلوا جاى مكوجى
01-26-2018, 01:08 PM
Hassan Makkawi Hassan Makkawi
تاريخ التسجيل: 02-27-2008
مجموع المشاركات: 6157
Quote: محمد بدرالدين انت يا عارف وعايز تعمل فيها رايح ولا ما عارف تبقى مصيبة لان عنوان بوستك دا ليهو علاقة بالممارسة الغير شرعية مع النساء ودا ما قديم ظهر مع ناس الانقاذ اها شن قولك
صديق مهدى برضك نسيت تاخد الدوا؟
واصل يا سيد البوست.... ما عليك من صديق
01-26-2018, 05:09 PM
محمد بدرالدين محمد بدرالدين
تاريخ التسجيل: 01-15-2018
مجموع المشاركات: 2185
فيصل الحبيب ...تحياتي يا سلام ذكرتنا الناس الطيبة ..آل دهية .. و بقية ظرفاء المجراب .. و تحية للخالة صفية دهية الشباب المتجدد...ههههه انت عارف ناس عمران لمان عاوزين يزوغوا من ابوهم ..عمنا عثمان بيرم .. كانوا بيجوا ماشين بقدامو و يسلموا عليه بعربي غليظ الصلام عليوكم يا حاج .. و المسكين يرد عليهم ..و يقول لصفية ..واحد بيشبه عمران جا فات بي جاي .. التحية لهم و ربنا يحفظهم مودتي و تقديري
01-26-2018, 05:20 PM
باسط المكي باسط المكي
تاريخ التسجيل: 01-14-2009
مجموع المشاركات: 5475
محمد بدرالدين انت يا عارف وعايز تعمل فيها رايح ولا ما عارف تبقى مصيبة لان عنوان بوستك دا ليهو علاقة بالممارسة الغير شرعية مع النساء ودا ما قديم ظهر مع ناس الانقاذ اها شن قولك.............. .................................. محمد بدر الدين صديق دة ...مفارق الدرب واشتر ماتشتغل بيه وواصل
01-26-2018, 05:48 PM
محمد بدرالدين محمد بدرالدين
تاريخ التسجيل: 01-15-2018
مجموع المشاركات: 2185
السبت بقى اجازة تمشيا مع العالم الفوقانى .. اها صاحبة الحفظ الصون .. ايام الاسبوع كله نشاط و حيوية و صحيان بدرى و تجهيز الاولاد للمدارس .. و عصائر و سندوتشات و يتبعه احيانا قطع من الفواكه المهم توضيب و تجهيز 5 و لاّ7 نجوم كمان .. ماشاءالله .. و لا باس لو عملوا ليك سندوتش كدة من بقايا سندوتشات الفلذات .. اها يوم السبت دة ... يعنى زى الليلة ... يا سرير جاك نوم .. نومة الفيلة و اهل الكهف ..و انت تصحى و تنحنح .. و تلبس .. و و و لا حياة لمن تنادى ..تجرجر اذيالك و تلبس و تطلع عشان تلحق الشغل .. تقفل الباب و تتحرك خطوة كدة تسمع تك فى الباب .. الجماعة قفلو الباب بالترباس !!!ههههههههههههه طيب قبل شوية ما عاملين نفسكم ميتين من النوم ... و تمشى المكتب و تشرب ليك شاى اى كلام من بتاع البوفيه(كتر خيرو) و كل سبت او اجازة اعمل حساب شايك و فطورك... مودتى و تقديرى
02-01-2018, 07:32 AM
محمد بدرالدين محمد بدرالدين
تاريخ التسجيل: 01-15-2018
مجموع المشاركات: 2185
اهو الخميس رجع و الجميع بحمد الله بالف خير ااااخ من الخميس نفسيا الواحد بيرتاح .. ساكت لمان يسمع انو الخميس جاى .... ايام داخلية الثانوى .. كان عندنا زميل يموت ف الخميس ... والله لمان نجى يوم السبت الصباح من قرانا للداخلية اول حاجة كان بيعملوا يشيل قميص و بنطلون مكوى و يحفظوا فى شنطة الحديد الكبيرة الموجودة تحت السرير .. و يقول دة لبس الخميس .. و يوم الخميس من الصباح يكون فرحان و مبسوط و مرات والله ما كان بياكل الفطور ...و سميناه عمر خميس و حسع الجو حلو شديد ف رياض الخير ( هههههه) و ملزوعين ف المكتب .. و امنية فطور كااارب بالملوحة يراود المفس .. لكن ان شاءالله حتى فتة فول مجيه و مظبط و مندكل .. اااااه من السودانيين .. ههههههههههه حياتنا كلو حيكون امنيات .. و قال ليك عمك ماشى فى الطريق و لقى ليه كمية قروش و شالهم و حمد ربك ...ف شباب جوه جاريين يا عمك معاك الكمرا الخفية و رجع القروش .. عمك شخط فيهم .. كمرا حفية و شخصية بتاع ايه ..يلا روحوا من هنا .. دة رزق جابوا لى الله تقول كمرا ما عارف ايه .. يلا بلاش حركات قالوا المخرج جا و سيارة التلفزيون و الكميرات عشان يصدق . برضو عنك ابى يصدق .. من حقو ياااخ ... و مودتى و تقديرى
02-01-2018, 08:11 AM
علي عبدالوهاب عثمان علي عبدالوهاب عثمان
تاريخ التسجيل: 01-17-2013
مجموع المشاركات: 12481
بدرالدين أننقا .. مسكاقمي .. الخميس والجمعة كمان عندنا في جدة هنا عسل .. في قهاوي الهنداوية .. أشهر فوال أخونا ( مجدي الحلفاوي ) معروف عند كل الناس فول على كيفك ( ونسة ) فول مميز .. ونكات وقفشات .. عندما تطلب الفول يرد عليك .. برشلونه ولا ريال مدريد عندو حلة فول ( قدرة ) إسمها برشلونة .. والثانية ريال مدريد ولكل منها مذاق خاص أجمل المجالس السودانية تجدها في هذه القهوة كسلا .. الاسبوع الفات .. واحد من ( إندينا ) زهج من الوضع هنا وقرر الرجوع إلى الوطن نهائي ويحكي لأخوه : (( بالله الواحد ثلاثين سنة ما يعمل حاجة .. يرجع زي ما جاء .. كل المشكلة من جدي أبو أبوي .. بعد الصلاة .. كانت دعواته .. اللهم أمتنا فقراء .. وأبعثنا فقراء .. الظاهر دعواته كانت مستجابة ))
خلاص زمن ( الخميس صفقة ورقيص ) no more آه ثم آه ده كان أيام ( ميز المدرسين ) في زمن الجميل
حبيبنا على التحايا و التقدير مجدى دة قريبنا ... و فوالو و حوالين قدرته موبااالغة و الجو و الكورنيش و الرطوبة و النسيم ....بختكم والله و ااااخ تانى من ميز المدرسين و اكل المدرسين ف قريتنا .. مدرسى الابتدائى و المتوسطة كانوا بياكلو الفطور مع بعض لان كل مدرسى الابتدائية كانوا من القرية .. اما المتوسطة فكان فيهم مدرسين خارج القرية ..لهذا مدرسى القرية كانوا بيجبوا الفطور ف المدرسة .. و مقسمين الاسبوع فيما بينهم .. نظام ضيافة و كدة .. اها .. المشكلة وبن بقى ؟؟؟ مين الولد الشقى البقدر يصل لصينية الاكل ف الفسحة ؟؟ لانو طبعا الصينية مدنكلة جدا ... انه اذا لسعيد ايام مرت و مضت يحلى ما بقى من العمر لك مودتى انقا
02-01-2018, 08:39 AM
محمد بدرالدين محمد بدرالدين
تاريخ التسجيل: 01-15-2018
مجموع المشاركات: 2185
حبيبنا على التحايا و التقدير مجدى دة قريبنا ... و فوالو و حوالين قدرته موبااالغة و الجو و الكورنيش و الرطوبة و النسيم ....بختكم والله و ااااخ تانى من ميز المدرسين و اكل المدرسين ف قريتنا .. مدرسى الابتدائى و المتوسطة كانوا بياكلو الفطور مع بعض لان كل مدرسى الابتدائية كانوا من القرية .. اما المتوسطة فكان فيهم مدرسين خارج القرية ..لهذا مدرسى القرية كانوا بيجبوا الفطور ف المدرسة .. و مقسمين الاسبوع فيما بينهم .. نظام ضيافة و كدة .. اها .. المشكلة وبن بقى ؟؟؟ مين الولد الشقى البقدر يصل لصينية الاكل ف الفسحة ؟؟ لانو طبعا الصينية مدنكلة جدا ... انه اذا لسعيد ايام مرت و مضت يحلى ما بقى من العمر لك مودتى انقا
02-01-2018, 09:13 AM
محمد حمزة الحسين محمد حمزة الحسين
تاريخ التسجيل: 04-22-2013
مجموع المشاركات: 1437
Quote: محمد بدرالدين انت يا عارف وعايز تعمل فيها رايح ولا ما عارف تبقى مصيبة لان عنوان بوستك دا ليهو علاقة بالممارسة الغير شرعية مع النساء ودا ما قديم ظهر مع ناس الانقاذ اها شن قولك
الممارسة الغير شرعيه مع النسوان وظهر مع ناس الانقاذ يا رااااجل ... بالله وريني مكانك انا بجي اوديك الضل ... من الله خلقنا وبالمناسبة انا خُلقت في عهد نميري خميسك ولو تبيع قميصك مربوط بالقعدات والمزهـ والفرفشه ناس الانقاذ يا وهم انت المتل دا ما ببيعوا ليه قميص بخمشو من طرف الخزنه وماعندهم خميس ولا سبت ولارمضان شوفتا كيف ؟!!! زول فاتح بوست قال للفرفشه عايز تفرفش تعال ما عايز اتلملم بوستات النضال علي قفا من يشيل ... : : : : : محمد بدر الدين ازييك مليح مع التحيات لله الزاكيات
02-01-2018, 09:43 AM
محمد بدرالدين محمد بدرالدين
تاريخ التسجيل: 01-15-2018
مجموع المشاركات: 2185
اخوى محمد حمزة تحايا و تقدير و مودةو محبة الف شكر للدعم .. و فعلا قعدات السودانيين ابدا ما كانت كما افتكر صاحبنا .. هنا .. عاوزين نرتاح و نقعد بجلاليبنا و عراقينا و نفرفش و نتونس و نتعرف على بعض.. بعيدا من البدل و الكرفتات و الشغل و الرسميات... مودتى و تقديرى
02-01-2018, 12:48 PM
محمد بدرالدين محمد بدرالدين
تاريخ التسجيل: 01-15-2018
مجموع المشاركات: 2185
عمك قاعد مدبرس كدة .. سالوه مالك يا حج محمد زهجان و قرفان .. قال ليهم بالله تلاتين سنة نصلى و نصوم و ندعو ربنا الجنة و الحور العين ..يجى شيح عبدالسلام يقول لينا الحور العين ديل زوجاتكم ف الدنيا حيكون برضو زوجاتكم بالجنة؟؟؟ لا حولا ..بالله الجماعة ورانا ورانا ... اصلو قسمتنا راقد بالقلبة ... لو كنا عارفين كدة ما زمااان كنا ازوجنا اتنين تلاتة مشكل ...بعدما عجزنا و بقينا خرد يقول لينا كلام زى دة .. اما رد حواء السودانية لعمنا دة .. طبعا ما ح اقدر انزلو هههههههههههههههه فقط نتعامل معاها بالصمت الايجابى .. و اكرر بالصمت الايجابى .. لكى لا يلحقك ما حدث لطه ود الزبير .. و مودتى و تقديرى
02-01-2018, 01:21 PM
محمد بدرالدين محمد بدرالدين
تاريخ التسجيل: 01-15-2018
مجموع المشاركات: 2185
Quote: تبقى مصيبة لان عنوان بوستك دا ليهو علاقة بالممارسة الغير شرعية مع النساء
صديق مهدى ذكَّرنى الزول اللى سأل الامام قال ليهو: ياشيخنا لو الزول زنا بى مرتو فى نهار رمضان صيامو ببطل؟ صديق ده النوع اللى قالوا ليه نفسك فى شنو؟ قال بِتِّيخ بى لبن:) مرحب بسيد البوست ,,
02-01-2018, 06:31 PM
علي عبدالوهاب عثمان علي عبدالوهاب عثمان
تاريخ التسجيل: 01-17-2013
مجموع المشاركات: 12481
ميمد أننقا .. الخميس زمان .. أهلنا الترابلة في الزمن الجميل كان عندهم جلسات البوقانا .. كمان الافندية كان يشاركوهم .. ممرض الشفخانه والمدرس كمان .. كانت الجلسة في بيت شوية بعيد من الحلة في بداية الساقية الواحد كان يسمع النما ( كلقييه ) من بعيد كنا صغار نحن ( ما بقول ليك قبل كم سنة ) كمان التقليد في البوقانا شراب الدكاي بس ( عرقي التمر ممنوع ) .. بعدين الدكاي ما فيه عدوانية يعني شكله وغيرها .. لأن الدكاي ما فيه خروج من النص شديد .. بس لدرجة الابداع .. التاني داك مشكلة .. الترابلة كانت لديهم ثقافة ووقت مرتب .. كل الاسبوع شغل .. بس لازم كمان ( week end ) أشهر أغانيهم كانت ( سبو ليليه ) زمان الدنيا كانت مرتبة صح .. تاني يوم الجمعة تلقاهم في الجامع .. شكراً الحبيب محمد ..
02-01-2018, 06:35 PM
محمد بدرالدين محمد بدرالدين
تاريخ التسجيل: 01-15-2018
مجموع المشاركات: 2185
صلي بالناس جماعة ..و رتل التين و الزيتون ... بعد الصلاة الناس اتلموا عليه و يشكروه و يثنوا عليه .. عمك كان من اكثرهم فرحا ... الله يبارك يا شيحنا .. ايوة كدة الصلاة بالنعيم و الحاجات الحلوة .. مش زي حج محمد متلحنا ب هاكم التزاكر زوروا المقابر ... و خميسكم كلو طيبات مةدتي و تقديري
02-08-2018, 09:33 AM
محمد بدرالدين محمد بدرالدين
تاريخ التسجيل: 01-15-2018
مجموع المشاركات: 2185
ااااااااااااه خميس و خميس يوم مريح و خفيف و لذيذ.. و لو ان ف الغربة لذته ربما تنحصر ف الراحة الجسدية من دوامات العمل المجهدة .. و بعض الزيارات او المناسبات الاجتماعية.. او لقاء الاصحاب فى الجمعية ( سكن عزابة منطقتك) و الحمدلله كل السودانيين و ناس كل منطقة عاملين ليهم سكن ( جمعية المنطقة ) تعنى بجمع الشمل و التعاضد الخ .. و صاحبنا قاعد و يحكى : فى الاجازة الفاتت نزلت البلد و عاوز اشغل الجوال و النت .. سالتهم عن الشبكة ... فرد على احدهم : والله ما متزكرين اكلنا السمك متين ( طبعا عمنا افتكر انه بسالو عن شبكة الصيد) ... و لا باس تاكلوا سمك بمزااااج اما انا فمساء الخميس او غداء الجمعة حيكون ملوحة لغير الناطقين بها ...ههههههه و فسيخ للناطقين بها و خميسك خميسك يا زول ربنا يسعدكم
02-08-2018, 01:44 PM
Sudany Agouz Sudany Agouz
تاريخ التسجيل: 04-28-2002
مجموع المشاركات: 9014
يا سلام عليك يا غالى والله صراحة ادخلت البهجة و السرور و اضحكت النفوس و ريحتها والله الف شكر اخونا الكبير مقاما و العجوز خيرة و ريادة و قيادة كل التقدير و الاحترام ... عادل امام مبهج جدا و لا يتكرر متعه الله بالصحة و العافية
02-08-2018, 02:42 PM
محمد بدرالدين محمد بدرالدين
تاريخ التسجيل: 01-15-2018
مجموع المشاركات: 2185
و على ذكر السمك قال ليك ولد صياد يوم نتيجة الامتحانات الاستاذ اداه النتيجة و قال ليه ضعيف جدا .( طبعا النظام حسع ممتاز و حسن و كدة ما زى زمان اول و تانى و تالت) الولد شال النتيجة و مشى لى ابوه .. و قال بالله شوف يا ابوى الاستاذ قال لى ضعيف جدا .. مع كترة السمك القاعدين ناكلو ...
02-15-2018, 09:26 AM
محمد بدرالدين محمد بدرالدين
تاريخ التسجيل: 01-15-2018
مجموع المشاركات: 2185
اهو الخميس الجديد كمان وصل الحمد لله و امبارح الغبار عطّل المدارس فى الرياض .. و كان اجازة .. و الحقيقة كلنا انبسطنا .. الطلبة و نحن و هم و هن ... و العربية كمان ارتاحت من شوارع الرياض المزدحمة و المحفرة كمان .. ههههههههه بس الخسائر البسيطة .. الحرمان من السندوتش و الشاى المدكنل بالقرقروش .. و كدة زى اصحابنا زمان فى القرية .. الصباح بدرى يقيفوا ف طرف الشارع و يعاينوا للمدرسة اذا الطلبة وصلو ... طبعا الوقت بدرى جدا و المدرسة تكون فاضية .. يلا يصفقوا فرحانيين اىىىىىىىى الليلة اجازة ... و يرجعوا البيت .. و مرة فى حصة الانجليزى و الاستاذ بيسمع فى الاسبلنق .. واحد من الطلبة ما حافظ .. و خائف من الدق .. قال احسن يتخارج ... الاستاذ ماشاءالله جسم رياضى و ضحم .. و صاحبنا قليلونى و ضعيف و عندو مشكلة فى رجلو كمان .. المهم صاحبنا رفع يدو للاستاذ و هو قاعد ف اخر الصف ..و رد عليه الاستاذ : ماتستعجل .. الدور جاييك يا محمد قال ليه يا استاذ انا طلعت من المدرسة !!! الاستاذ فهم انو محمد دة ما حافظ ... قال ليه خلاص طيب اطلع من المدرسة لكن بعدما تتجلد ... اتجلد ؟ ليه اصلو فوضى انا طلعت من المدرسة تقول اتجلد .. يا طلبة هووووى شايفين الاستاذ دة بيقول شنو ..انا لمان اقول ليه انا طلعت من المدرسة يقول لى حتتجلد!!! دة مش عاوز شكل ؟ اشهدوا يا خوانا .. والله الدم يجرى هنا الليلة قال ليك الاستاذ من كترة الضحك ما قدر يقعد ف الفصل و مشى مكتبو و تلك ايام خلت .. و شالت منا ازاهر الايام و معكم ايضا يبدا نواضر الايام .. و خميسك خميسك ..
02-16-2018, 02:35 AM
النذير حجازي النذير حجازي
تاريخ التسجيل: 05-10-2006
مجموع المشاركات: 7159
هههههههههه النزير الحبيب .. يا روعتنا.. فعلا جديدة لنج ....لسه ما مرّ علينا عمك بعد الجمعة منتظر الغدا ... سالهم ليه الغدا اتاخر .. قالو ليه فلان لسه ما جا من الصلاة .. اسرها ف نفسه و قعد ...اها لمان فلان رجع من الصلاة سالو ليه اتاخرت ... رد والله تسفاي الحبشي دخل الاسلام عشان كدة اتاخرنا .. قال ليه اها دخل بدل مين و جمعتكم مباركة ..و فضلو معاي قراريص
02-17-2018, 01:57 AM
النذير حجازي النذير حجازي
تاريخ التسجيل: 05-10-2006
مجموع المشاركات: 7159
الاسد شاف ليه غنمايه تمشي بي رشاقه فوق الطين بعد مارجع البحر . الثعلب وصف ليهو طريق قال ليهو من الاتجاه ده بتقبضها والاسد ماصدق خش في الطين وكرعينو غرزن لي بطنو . الاسد عاين للثعلب قال ليهو ورطني في الطين ده الله يازاك الثعلب قال ليهو الورطه الكبيره لامن يجيك سيد الغنمايه ,,,,,,,,,,,,,,,,,,,,,,,,,,,,,, اها يا الهندي يا اخوي نعل ماجاك سيد الغنمايه 😄 منقول
02-17-2018, 08:07 AM
محمد بدرالدين محمد بدرالدين
تاريخ التسجيل: 01-15-2018
مجموع المشاركات: 2185
النزير الغالى صباحك زين و كل الاحباب سبت جميل و لو انو السبت اصلو ما بقى جميل الا ف السعودية لانو اجازة .. ايام الدراسة كان اثقل يوم ,,, و دائما كان بكون فيه تسميع ... الواحد كان بيسمع .. و عينو على الجريد الراقد فى الطربيزة .. ااااااااااااااه من تلك الايام .. و ضربات الجريد التى كانت تترك اثار فى الضهر .. و بالمناسبة الواحد كان بيخفى الضربات دى من ناس البيت .. عشان هم كمان ما بعاقبونا ( لانهم لو عرفوا الاستاذ جلدنا .. دة معناه نحن غلطنا عشان كدة كانوا بيجلدونا هم كمان) و للحق ابوى الله يديه العافية ما جلدنا و لا ضربنا .. لكن امى !!!! الله لا وراكم عقابها لينا كان كيف ...السباحة و العوم خوفا منها ما اتعلمنا ... ههههه تعمل لينا خط ف الرجل نظل نحافظ عليها لغاية ما نرجع البيت .. ااااه تلك ايام خلت ههههههههههههههه قلت لى با النزير الهمدى يرجى الراجيه ؟؟ انت ما سمعت نكتة محمد موسى فى الفكى ابكر ........ الواحد لو قرا ليه اية تطلعوه مسلم .. انال ابو خواتكم ههههههههههههه اكيد لقى حل ... و الحل بله بيحلوا .... و هم كتاار و جاهزين ..
02-17-2018, 11:38 AM
Kabar Kabar
تاريخ التسجيل: 11-26-2002
مجموع المشاركات: 18537
أنا الأسعد منك يا محمد بدر الدين..الأسعد في كل يوم خميس قاعد ابيع قميصي وانتشي وافرح للطيش..عارف ليه يا محمد؟ مش عشان نكتة ..مش عشان شكش حسب فهم حبيبنا الأنصاري صديق مهدي (يا علي عثمان ديل ناس سيدنا عبد القادر ود حبوبة..!!)
ابيع قميصي يا محمد في يوم الخميس..عشان الاقي روح محمد عبد الله حرسم..عشان الاقي حبيبنا ول ابا النوبي الجميل استاذنا علي عبد الوهاب عثمان..
هنا البياض يا محمد..ناس قميصك ولا تفوت خمسيك..
ونقة تانية..للخلصاء اهل النقاء..ناس استاذنا علي عبد الوهاب عثمان..!!
ده خميس الجلابة يا ول ابا علي عبد الوهاب..لو تلقى فرصة تشرح لحبيبنا محمد بدر الدين..!!
كبر
02-17-2018, 12:43 PM
محمد بدرالدين محمد بدرالدين
تاريخ التسجيل: 01-15-2018
مجموع المشاركات: 2185
و نحن اسعد بمرورك الغالى كبر تشرفت بك و نورت والله .. و الخميس خميس السعادة .. ربنا يسعدكم و يسعد الجميع .. هههههه حنكشة وين يا الحبيب ... نحن اولاد قرى و زراعة و لروح محمد حرسم(و عبد الله برسم في الأرض لون السحابة الممطرة و شكل الدريب المسطرة وسعدية تحكي عن رجالنا المسخرة و كبارنا برسمو فينا زي ضلاية .. زي هباية زي مشرع .. زي قنديلة .. زي واسوق .. و زي شفع كبارنا مشونا في الخيط و الزلط إلا سعدية البقت خازوق و مسمار و ضد الغلط مرقت تكسر في بيوت العنكبوت .. رافعة البنية المبهرة .. زي سحابات ممطرة و شالت عكاكيز الحقيقة اليها كسرّت المظالم و الساقية الشقت بطن الليل .. روت الناس الفكرة و فجأة ظلام الليل أتهد .. و جفت برك الفارغة) .. و لحبيبنا شيخ على كل التقدير و المحبة .. مودتى و تقديرى
02-21-2018, 01:32 PM
محمد بدرالدين محمد بدرالدين
تاريخ التسجيل: 01-15-2018
مجموع المشاركات: 2185
الاربعاء بيجيب الخميس ههههه و فى ناس بياخدو حق الخميس فى الاربعاء ... عشان الخميس يمكن يكون ما مضمون المهم الانبساط و الفرفشة و الفرح الطفولى .. و صحابنا كان بينوم الاربعاء بدرى عشان الخميس يجى بسرعة .. و يصحى ليك من الدغش ليكون فى استقباله و يمك اليوم الوحيد البصلى فيه الصبح حاضر.. و ايه .. يصحى معاه بقية الزملاء عشان يلحقوا الصبح حاضر و ليكونوا معه لاستقبال يومه المفضل .. ان لم يكن مقدسا .. ...,, و اذا ذهب الخميس لا صلى و لا صام كـأن لم يكن يوما يصحى اصخابه لصلاة الصبح ... اها يا ادروب وين ماشى بجداداتك ... قال الهرتوم نمشى يا ها ... ابيع دجاجاتى .. اصلو الدرب عرفنا ... المرة الفات :ـ ركبنا البص و شلت معاى دجاجاتى ... اها لمان جينا تفتيش القدمبلية البوليس سال .. مين صاحاب الدجاجات .. انا يا حضرة البوليس بتاكلهم شنو ..درة ياكلو ... طاخ ادانى كف ...درة يا مفترى ؟ و الناس ما لاقية تاكل .... و تاسفنا و هدين الجو ببقشيش و تانى لمان جينا تفتيش مدنى برضو سالونا .. قلنا سمسم ياكل .. طاخ كف كبير ... و برضو اديناه كان عشرة جنيه ما نعرف كان عشرين . والله ما نعرف .. المهم اتخارجنا و فى تفتيش سويا البوليس الكبير سال مين صاحب الدجاجات ... قلنا انا يا حضرة الصول .. طاخ طرخ صول مين يا حيوان .. المهم قال دجاجك ديل ياكلو شنو ... قلت والله يا حضرة الدابت (الضابط) نديهم مصاريف براهم يمشوا ياكلوا هههههه ادروب واجرك الله ... و ربنا يحلى ايامك .. و تاكلو من دجاج البلد السمح الخالى من الهرمونات ...............ويو بلدو مودتى و تقديرى
02-22-2018, 03:23 PM
محمد بدرالدين محمد بدرالدين
تاريخ التسجيل: 01-15-2018
مجموع المشاركات: 2185
الخميس جا .. الظاهر الناس مشغولة .. عمك مجنن الناس .. الصلاة صعبة .. الصلاة صعبة و الونسة شغالة .. مافى زول جايب ليه خبر المهم قدر ينبه الناس و ياخد فرصة كلام .....سالوه الصلاة صعبة كيف .. قال ليهم والله الصلاة صعبة خلاص و حصوصا لمان تبقى امام اها مرة صلينا بالناس .. الركعة الاولى قرينا الحمدو .. و اديناهم قل هو احد .. و بعدين ركعنا و سجدنا و جينا فى الركعة التانية اها شغالين ف الركعة التانية و قاعدين نقرا الحمدو .. نسيت السورة الحنقراه بعد الحمدو ..و انا افكر يا حج محمد نديهم شنو .. و الحمدو ماشى .. نفكر يا حج محمد نديه شنو .. اها لمان جينا فى ولد ضالين امين ربنا اكرمنا بتلع البدر علينا.. ....و اللهم صلى على كامل النور.. و خميسكم فل و ياسمين
02-22-2018, 04:59 PM
معاوية عبيد الصائم معاوية عبيد الصائم
تاريخ التسجيل: 06-09-2010
مجموع المشاركات: 22458
هلا و غلا ود الصائم شرفت و نورت .. و خليت للخميس طعم و نكهة .. و عايزنك تحكي عن ايام الخميس الروعة .. و خميسك و ايامك سعد و سرور و للجميع طيب الخميس فل و ياسمين مودتي و تقديري
03-01-2018, 07:46 AM
محمد بدرالدين محمد بدرالدين
تاريخ التسجيل: 01-15-2018
مجموع المشاركات: 2185
ما اسرعك يا خميسو الجو موباااالغة ف الرياض ...صباح منعشو السودانيين يقولو ليك جو فول .. و لو فى واحد من العالم التانى .. يقول جو ونسة او (خلط) ع ايام فرع القاهرة زمان .. يقعدوا يتونسوا فى الحلم و التمنى و ورود الحياة مع المحاولة المستميتة لاخفاء شوكها .. و العكس صحيح بعد الزواج .. ايام الخطوبة و ما قبلها .. يحاول الجميع اظهار الايجابيات و جمالياتهم .. لهذا تكون ايام وردية و تهدى فيه الورود و الروائح و العطورو قد نال المنديل حظه من الاهتمام حتى من الشعراء المغنيين .. و الان ذهب ماسوفا على شبابه و حل محله الورقية التى تذهب لسلة المهملات تتبعها ............ ياخى انت ما تفهمى ...انا ما اتغيرت .. انا ياهو انا نفس بتاع زمان .. بتاع الجكيس و الونسة و الهدايا ... بس حسع نحن ازواج ... يعنى ابتدينا الحياة الحقيقة .. زمان كان احلام .. حسع بقى واقع .. وشى فى وشك ...و بقى فى مسئوليات ... يعنى شنو يا ابو الشباب ؟؟ يعنى قعادنا مع بعض ف بيت واحد تعبير عن حبى ذهابى للعمل .. تعبير عن حب رجعتى للبيت عشان اتغدا و انوم و ارتاح .. تعبير عن حب يا بت امى زمان كان كلام ..كلالالام و ناس ابوك كان بياكلوك و يشربوك و يلبسوك .. لكن انا حسع بقيت المسئول عن الحاجات دى ..و توفيرى لك الحاجات دى معناه انى بحبك ... ما تفهمى !!! فلسفة الحب السودانى يوم الخميس.. هههههههههههههههههههههههه و خميسكم زى ما عايزين
اشتقنا للخميس .. و حلفاالجديدة مليان بعوض انعل ديسك يا عبود .. غايتو عبود دة تلت التلاتة ف احاديث الحلفاويين .. مرة ايام ما كان مستشفى سوبا يهز و يرن .. بلدياتنا منوم بالمستشفى و اخر راحات و انبساط الدكتور المشرف عليه كان عمر عبود .. قام كتب ليه خروج .... عمك زعلان و قاعد .. جاء دكتور عمر مارى و قال ليه خلاص يا حاج مبروك بقيت كويس و حتطلع ... عاين ليه شذرا كدة .. و رد عليه انت العيان و لا انا ؟؟ انا لسه مبقتش كويس .. ثم تانيا انت ايه حكايتكم معانا .. ابوك يطلعنا من حلفا و انت تطلعنا من المستشفى ...
03-29-2018, 03:38 PM
محمد بدرالدين محمد بدرالدين
تاريخ التسجيل: 01-15-2018
مجموع المشاركات: 2185
خميس الايام الجميلة رفع الاذان لصلاة العشاء الزوج قال لزوجتو افرش المصلاية نصلى العشا المراة ردت الشرع قال صلاة الرجل ف المسجد الزوج قال ليها الراجل محلل ليه اربع المراة طوالى قالت ليه نفرش ف البرندة و لا الحوش
03-29-2018, 05:55 PM
عبدالعظيم عثمان عبدالعظيم عثمان
تاريخ التسجيل: 06-29-2006
مجموع المشاركات: 8399
صاحب صيدليه..وظف دكتور صيدلى خريج جديد.. يوم دخل صاحب الصيدليه و شاف واحد جوه مسنود على الحيط..وعلى وشه نظرات رعب.. سال الصيدلى..الراجل دا ماله واقف جنب الحيط..؟..رد عليه الدكتور..الراجل دا عنده كحه وانا خليته يشرب علبه دوا اسهال كامله.. صاحب الصيدليه قاله..كيف يعنى تديه دوا اسهال وهو عنده كحه..؟ الصيدلى رد عليه..لا دا شغلنا احنا بقى..شوفه واقف كيف و خايف يكح...!!
04-19-2018, 07:49 AM
محمد بدرالدين محمد بدرالدين
تاريخ التسجيل: 01-15-2018
مجموع المشاركات: 2185
غايتو اجدع ناس لا شغالين بالخميس و لا بجمالياتو ... كأن الخميس زى السبت زمااان ... حسع زميلنا مصرى عزمنا فطور ف المكتب .... جاب كميات فول و فلافل و بتنجان و طورش و الذى منو ... انا و احد الزملاء لمان غسلنا و مشينا السفرة .. لقينا المعركة حامية الوطيس ...و الفول يئن و البتنجان يئز ... اخوانا المصرين شغالين ضرب بالصواريخ و الراجمات .. اجزم لو اشتغلو ف حروبهم بنفس القدر لتحررت كل الاراضى العربية المحتلة لكم الله اشقاؤنا ابناء النيل ( ولو دة حيزعل البعض منا ) بالهناء و الشفاء و محل ما يسرى يمرى ... و مرة واحد قال والله كتر خيرو ولدنا جاب لينا غسالة من السعودية .. رد عليه واحد مناقرو ... والله لو ختو فيه سروالك الكهربا حتضرب لغاية سنار ... و خميسك و لو تاكل فول مع زملاءك
قال ليك رباطابي طلع من السجن وداير يخطب واحدة اهلها قالو ليه ما بندي بتنا لواحد خريج سجون .. الرباطابي قال ليهم : سيدنا يوسف عليه السلام .. كان خريج علوم سياسية ؟؟
عاالم بطاالــــــــــــــــــة ,,,
04-19-2018, 01:35 PM
محمد بدرالدين محمد بدرالدين
تاريخ التسجيل: 01-15-2018
مجموع المشاركات: 2185
ههههههههههههههههههه يا مجيدو يا عالم بطانة يا حلو والله ضحكتنا زى حبيبنا خالد .. خلودى زكرتنا واحد بلدياتنا ... ماشى بعصايتو ف المكاتب .. و صوت العصاية مع البلاط عامل شفل ( كك .. كك ) المسئول انزعج من الصوت .. و قال ليه ياخينا عصايتك دى ختها ... قال ليه لا .. مش سيدنا موسى لمان كلم ربنا كان معاه عصاية ؟ رد المسئول انت سيدنا موسى ؟؟ قال ليه و انت ربنا ... .. الف شكر ... ايوه جوال مغلق ... امس الجهاز استشهد عندما عفسطته بالعربية ... الان شغال مؤقت بدون واتس .. مودات و تقدير .. ود عباس و مجيدو و الناس الرايحة من الخميس هههههههههههههههههههههه مودتى و تقديرى
04-26-2018, 08:00 AM
محمد بدرالدين محمد بدرالدين
تاريخ التسجيل: 01-15-2018
مجموع المشاركات: 2185
المستشفى ف حلفا .. له وقع تانى نضيييييف لمان غلط .. ياخى مرة ف مجلس شعب نميرى نائب الدائرة صدح باعلى صوتو ( هل تعلم سيدى الرئيس ان مستشفى حلفا بدون قفل ؟) كناية على قمة تردى الخدمات ف حلفا ... و عشان تخش المستشفى لزيارة مريض ايضا كان قمة المعاناة .. و حصوصا ف غير اوقات الزيارة (ودائما الزيارة كانت ف فترة الفطور من 9 لعشرة تقريبا) و فى اغانى الفت ف معاناة الدخول ( حسن بصلك اى بلبصا مسكا) و خالتنا فاطنة جات عشان تخش المستشفى ... البواب رفض ..و هى بتقول ليه انا ام محمد .. بالصباح دكتور و بالليل فنان محمد ولدها شغال ممرض ف المستشفى ...و ايضا مغنى .. برضو دة ما شفع ليها تخش المستشفى .. اها و هى راجعة لقت امراة مهمومة و تفتش ف شى ضائع ليها ...و بعد جهد عرفت انو وقع منها دهب .... لانها من غير الناطقين بها عكس المراة التانية و بقت تفتش معاها .. و قالت ليها ... الزمن دة يا احتى شلتو وما بديك !!! المراة استغربت و قالت قلتى شنو ؟؟ كررت فاطنة شلتو و ما بديك يا وليه جيبى دهبى .. هاترى انت الشلتى دهبى ؟؟ ادينى دهبى .........وووووو و فاطنة تردد شلتو و ما بديك و الشكلة دورت .. و الناس تجى تحجز .. و اسكتوا يا حريم ... و الحاصل شنو و المراة تقول : هى شالت دهبى .. و فاطنة تقول شلتو و ما بديك\ المهم البوليس اتدخل و ودوهم للقاضى الشعبى و لاّ الشرعى و القاضى قال لفاطنة احكى بالرطانة الحصل شنو ( قالت والله لقيت المراة دى تفتش ف الشمس و الحر على حاجة ضائع ليها .. حنيت عليها و سالتها الضائع شنو قالت دهبى .. و بقيت افتش معاها و قلت ليها فى الزمن دة البشيل حاجة ما بديك و لا بيرجعو ) القاضى شرح للمراة .. و ديك تفهمت و انتهى بالسلام و الحضن و الاعتذار و شوية دموع صادقة على غير العادة و ما دموع تماسيح... و شلتو ما بديك خميسك خميسك حتى لو بعت دهبك
04-26-2018, 08:24 AM
علي عبدالوهاب عثمان علي عبدالوهاب عثمان
تاريخ التسجيل: 01-17-2013
مجموع المشاركات: 12481
حبيبنا بدرالدين .. مسكاقمي .. حكاوي الخميس في الجمعية .. نحن الكبار نحاول أن ننقل بعض تراث أهلنا الكبار لهذا الجيل الجديد ومن هذه الحكاوي الخميسية هذه القصة لأحد الاعمام :
البرنامج اليومي للتربال طبعاً معروف .. من الصباح حتى منتصف النهار ثم القيلولة وفترة العصرية .. والاستراحة زمان كانت في (المسيد) نوم لأن المسيد الهواء فيه طلق كمان مع ظلال النخيل .. بيوت الجزر ضيقة وتترك للحريم .. المهم عمنا سعيد جاء من مصر وتقاعد في البلد وزمان صلاة الجماعة إلا يوم الجمعة والاذان إلا يوم الجمعة .. جاء عمنا سعيد وفرض عليهم صلاة العصر جماعة .. وأطال في السجود .. وأثناء السجود أنسحب حسن بحجة أن البهائم وسقاية الماء .. وأخوه محمد كذلك .. باقي عمنا أحمد .. وقال قولة مشهورة لعمنا سعيد (( إنت جاي من مصر وما عندك بهائم ولا زراعة .. الصلاة للناس الفاضين زيك .. وبعدين نحن ناس نأكل يومياً بليلة لا نستطيع رفع مؤخرتنا في السجود لفترة طويلة )).. وسرت هذه الرواية في البلد .. رحمهم الله هؤلاء الانقياء ..
04-26-2018, 09:01 AM
محمد بدرالدين محمد بدرالدين
تاريخ التسجيل: 01-15-2018
مجموع المشاركات: 2185
اهلا بشيخنا الغالى الريس على .. هههههههههههههههههه قال صلاة العصر قال ... ياخى احا ههههههههههههه حبوبة صائمة .. و تشرب مع الوضوء .. قالو ليها لا يجوز .. ردت يعنى نموت ؟؟ عمك خاتى السحور جنبو .. لمان صحى عشان يتسحر لقى الكديسة قامت بيه ..\ اسرها ف نغسه و اتغطى ببطانيته الحمراء و رقد الصباح جاب ليه شاى و جك موية و بثى يشرب عينك يا تاجر.. الناس اتصايحو فيه .. ايه دة يا حاج مهمد قال ليهم الكديس يصوم وخميسك غير و انت ف جدة غير و ما تنسى فول صحبك مجدى و كن بخير
04-26-2018, 01:07 PM
محمد بدرالدين محمد بدرالدين
تاريخ التسجيل: 01-15-2018
مجموع المشاركات: 2185
الناس تتناقش ف ازمة البترول و كدة عمك قاعد ساكت و مستمع جيد .. سالوه .. رايك شنو ف كلامنا و نقاشنا .. و الحل قال ليهم .. مهمد صالح دة عندو سن واحد و بيستعمل معجون سنقل براه .. زى دة الجاب ليكم الازمة ...
04-26-2018, 01:17 PM
علي عبدالوهاب عثمان علي عبدالوهاب عثمان
تاريخ التسجيل: 01-17-2013
مجموع المشاركات: 12481
الحبيب محمد .. مسكقامي مشكلتي الترجمة من النوبية إلى العربية .. شايفك بليغ في العامية عشرات القصص ولكن المشكلة في الترجمة .. ==== في رمضان حبوبتنا زينب رحمها الله بعد الاكل جهزت الشاي .. وقبل تناول الشاي كان أذان الصبح .. ومع بداية الاذان (الله أكبر ) خرجت من البيت ووقفت أمام الموذن وطلبت منه أن يتوقف حتى تكمل الشاي لكن عما سعيد واصل .. وعندما رجعت شربت كباية الشاي .. في صباح سيد الحسن الادريسي أفتى بأن صيامها مضبوط هنا عمنا سعيد حلف طلاق تاني ما يأذن .. ( يعني زينب صح وأنا غلط)
رحم الله الأهل والاحباب
04-26-2018, 03:13 PM
محمد بدرالدين محمد بدرالدين
تاريخ التسجيل: 01-15-2018
مجموع المشاركات: 2185
ههههههههههههههه حبوبتنا زينب .. زى عمنا بتاع الكديس يصوم .. ههههههههههههه عم سعيد المؤذن يصوم ... و زى عمك بيحكى قصص زمان .. و الدكاى و كدة واحد من احفادو قال ليه يا جدو ما كان ف شريعة و جلد؟ عمك رد يا ( انجتى ) نقول ليك سنة 36 (1936) تقول لى شريعة .....وايو بلدو
04-26-2018, 03:24 PM
علي عبدالوهاب عثمان علي عبدالوهاب عثمان
تاريخ التسجيل: 01-17-2013
مجموع المشاركات: 12481
حبيبنا محمد .. إنت كده تثير الذكريات وترجعنا سنوات طويلة للزمن داك أذكر كان أول تموين والسكر معدوم في البلد تقريباً عام 1976م أنا كنت معلم في الثانوية العامة في كرمة النزل .. في جزيرتنا جالسين في المسجد بعد فطور رمضان عمنا جالس بالقرب مني .. جاء ولده .. وقال عايز مفتاح الشنطة لأن في تلك الفترة اصبح السكر ضمن مهام الرجل وليس الزوجة عمنا رابط المفتاح في ( دكة السروال ) ولم يستطيع فك الربطة .. في المسجد خلع السروال وجلس بالجلابية وقال للولد (( أفتحوا الشنطة ورجع لي السروال بسرعة ))
ناس جميلين الله يرحمهم ويغفر لهم كل خميس عندنا جلسة تنويرية تراثية للشباب في الجمعية ..
تحياتي .. بوست جميل ميمد أننقا ..
04-28-2018, 09:15 AM
محمد بدرالدين محمد بدرالدين
تاريخ التسجيل: 01-15-2018
مجموع المشاركات: 2185
ههههههههههههههههههههه ضجكتنا بسرول عمك يا غالى شوف بيت الله مريح كيف ... بالله حسع لو كان ف مكان تانى .. كان قدر يخلع و يجلس بالجلابية .. مع دة كلو صاحبنا محمد صالح اعتبر البيت الجوار المسجد منفصة لسعره .. واحد عرض بيته للبيت .. و لم يجد مشترى .. و جاء لمحمد صالح عشان يشتريه .. و شكر ليه البيت .. بناء مسلح و طابق و سور عالى و موتور موية و صهريج .. يعنى كامل مكتمل بمجماعيه ....و سعره معقول جدا و اثل بكتييير من سعر السوق محمد صالح قال ليه .. و طيب ليه ما بعتو ...اكيد بيتك دة فيه عيب ........ فال ليه لا والله بيت تمام و على ناصيتين و لصق المسجد كمان هههههههه محمد صالح ضحك و قال ليه مش قلت ليك فيه عيب
05-03-2018, 03:16 PM
محمد بدرالدين محمد بدرالدين
تاريخ التسجيل: 01-15-2018
مجموع المشاركات: 2185
خميس السعد و السرور للجميع فى الغدا عمك بيحب الجلى .. ف صراع قاتل معه ... هو يرتعش و الجلى بيرتجف صحبو قال ليه يا ااا ما جهجهت المعلقة .. .... و صحبك راكب جمل و ضارب الخلا و الصقعة ... شاف ليه دخان فرح و جرى ليه لقى تحت شجرة عجوز مركب حلة ف النار .. و طوالى اناخ الجمل و قعد .. العجوز لمان شافت العربى اتضايقت انه حيقاسمها البليلة فى الخلا دة .. بقت تهبب النار و تقول : جقجق يا برمة الجقجاق .. انت قايل الليلة حناكلوكى ؟ الليلة حننجضوك و بكرة حنبردوك و بعد بكرة حناكلوك .. العربى فهما .. و قال / اخ يا جمل الشيل .. الليلة يوما ريح .. و بكرة نستريح و بعد بكرة سفرا مليح ..\ قالو العجوز جاها نفسيات .. قالت بدل ما نقعد يومين ننتظر البليلة ... احسن ناكلو سخن ..... و قالو العربى رفض ياكل و ركب جملو و فات ..... و ما بصدقكم .... زى خالتى فاطنة شلتو و ما بديك .. (سعودي يسال سوداني اقول : ياازول صحيح انتم تاكلون الذره والدخن والشعير قال: السوداني ايوة قال : طيب طال عمرك ايش عاد خليتو للحمير قال : السوداني (الكبسه ))
05-17-2018, 09:28 AM
محمد بدرالدين محمد بدرالدين
تاريخ التسجيل: 01-15-2018
مجموع المشاركات: 2185
كل رمضان و كل يوم و الجميع بالف الف خير و ينعاد للجميع بالخير و نسال الله ان يعين الجميع لصومه و قيامه و حصد الحسنات و خميسنا هذا اصبح اسعد الايام لان شهر الخير بدا به و طل على المسلمين فاتحا ابواب الجنان نتمنى للجميع صياما مقبولا و عملا متقبلا و افطارا شهيا .. و ما تبقوا زى عمنا حسين الذى كان لا يصوم اول يوم بحجة ان اول يوم بيجيب الصداع .. و خميسكم طاعة و غفران و صلى اللهم على كامل النور
05-28-2018, 11:26 AM
محمد بدرالدين محمد بدرالدين
تاريخ التسجيل: 01-15-2018
مجموع المشاركات: 2185
انا كنت قايل الليلة الخميس واحد قال لى الليلة الاتنين قلت ليه يعنى صيام الاتنين .. قال يا حلفاوى دة شهر الصيام ... يعنى 30 يوم صيام ربنا يعين و يتقبل من الجميع .. طيب نشوفكم الخميس بعد الافطار لو ربنا حيانا و تصومو و تفطرو على خير و اللهم صلى على كامل النور لدران
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد بدرالدين
طلحة عبدالله
صديق مهدى على
معاوية المدير
فيصل محمد خليل
Hassan Makkawi
باسط المكي
علي عبدالوهاب عثمان
محمد حمزة الحسين
عبدالعزيز الفاضلابى
Sudany Agouz
النذير حجازي
Kabar
معاوية عبيد الصائم
عبدالعظيم عثمان
محمد مجيدو
فيس بوك
تويتر
انستقرام
يوتيوب
بنتيريست