04:08 PM August, 13 2016 سودانيز اون لاين أبوبكر عباس-الإمارات مكتبتى رابط مختصر نهائي بطلت الحوارات الدينية والسياسية والفكرية وقررت أتفرغ للأدب درب زي دا ما ممكن تشوف فيهو ناس الشغيل وجلادونا وبقية الرجرجة.
المداخلة دي بالرغم من إنها كُتبت في بوست حقي وسحبت منه الأضواء، إلا أنها تظل عندي كشجرة نيمة وريفة جنب بحر الحصاحيصا؛ بهاجر ليها كلما شنو كدا ما عارف، أو كما يقول معاوية.
الحتل: (مداخلة لكبر في بوست استاربكس)
لمن ضحى قامت قلبت بقت مسيحية ، وهي قايلة انا بقيت شيخ مسيحيين كبير في دار ترك.. وقطعت لي اسم دلع:ديفيد.. ثم عشاني ، مخسوس قامت مشت الجبال..دار نوبه..ثم وصلت لماما اميركا..اها يوم هف ليها حق السودانيات العجيب داك.. قالت لي عازماك تشرب معاي بن في استاربكس..طبعا استاربكس عندي معاهو مشكلة كواحد من ادوات الأمبريالية.. اها هي في سقط لقط وانا في امطرقا عراض..وتفتقت عبقريتها ان كل واحد فينا يشوف اقرب استاربكس..ونشرب البن بالتلفون .. هي اختارت طريقة الجلوس..قالت لي اقعد و قبل صباح وانا بقبل صباح..يعني نظام توازي وكده..الإتنين طلبنا البن في فناجيل صيني ..لونها ابيض..لأنو كبابي الكرتونة شكلها غير اليف.. وانا بتكلم معاها بالتلفون قلت ليها ما تدفقي الحتل..قالت اها وصلت الحتل اعمل شنو..قلت ليها حركيهو بصورة دايرية.. الساعة القامت فكت ليك الدهشة..قالت:سجمي ، ده مش انتا؟..قلت ليها ايوه ده انا..ياخي لا ما تهظر..صحي انت اللابس ليهو جاكت بني وبيريه اصفر؟.. قلت ليها.. ده انا يا ضحا.. الساعة العاطت ليك بطول حسها: الله اكبر..الله اكبر!!.. وانا اشيل واعيط:يا ضحا لأ..انتا في اميركا..الإ دي..!!.. وضحى تشيل وتعيط اندهاشا وازبهلالا: شكلك وسيم..ووب علي من الخدرة الدقاقة دي..الله اكبر..الله اكبر..الله اكبر!!
كل الخلق، القاعدة في استاربكس في نورث كارولينا،في العاصمة راليجا، المدينة القاعدة فيها ضحا ، كل الخلق اتضايرت تحت الترابيز.. وبعد شوية البوليس جا تووشك داخل..اخر حاجة قالتها لي: العالم دي متخيلة فنجالي قنبلة قرنيت..وفرحتي لله مخطط لضرب الأمني الوطني الأميركي.... ثم اسمع ليك: طاخ..طراخ..طراخ..!!..والتلفون ، الخط فيهو لسه فاتح..!!
انا جدعت تلفوني وفنجالي..وبلغت البوليس بتاع مدينتنا انو تلفوني اتسرق من اول امبارح.. ومرقتها في مدينة تانية..!!!
سلام يا عمر دهب، تعرف الدنيا دي أهم حاجة تعملها فيها، تعمل صندوف فيهو ترص الحاجات الحلوة الممكن تهرب ليها، مثلا: المنتدى بعد البوستات الأخيرة دي؛ تسيبو وتمشي تفتح صندوق السينما تحضر ليك فلم اجتماعي لجوليا روبرتس أو ساندرا بولوك أو تشوف ليك قوز رملة وتسمع أغنية قمر الزمان أو تمشي ميدان بن ياس تشتري شاي كرك وتقعد تتفرح في تنوع الناس الجاية تتسوق في دبي أو ترجع تشوف ليك بوست زي الحتل دا وتشوف كبر خارج السياسة المهم لازم يكون عندك جراب للطواري. ----- يا أخي، ود خالك الايام دي منزل ليهو لاند كروزر ٢٠١٦
08-14-2016, 04:27 PM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3594
أها صندوق الطواري بتاع بهجتك الخاصة دا، أنا داير اسميهو الحتل ومنه جات كلمة الحتالة كنت داير أنزل فيديو من صندوقي لبنتي الحتالة، لكن تخيلت جيش الغاضبون منك في منعطفات أخرى، يحولون هذا الفيديو الطريف لسلاح لا يقل عن تهمة الالحاد! وتخيلت نفسي معزيا في بوست عزاء، ليقول لي غاضب: التعزية ليك شنو يا باطل وبتك بترقص رقيص غربي!! شلت حتالتي وهربت للسينما
08-14-2016, 05:17 PM
معاوية الزبير معاوية الزبير
تاريخ التسجيل: 02-07-2003
مجموع المشاركات: 7893
دي تشبه، شلنا شوقنا رجعنا بيهو بالله هسع بوست الإلحاد مش أحسن من التفاهة والعنصرية دي؟ طبعا جذر المشكلة واااحد، لكن دي مقاربة ما بتستاهل تتكتب هنا عشان تقوم تنحذف، تيمناً بموقف ماركس عندما سألوه عن سبب عدم نشر الجزء الثاني من رأس المال قال ليهم: تركناه في المخزن لتنقده الفئران حالتو الوكت داك مافي رجرجة شديد
08-14-2016, 08:01 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
الإلهام بالفينات: أو معاوية الزبير واقف لي فوق راسي..!
عارف يا درديري ، الدنيا دي فيها حاجات عجيبة وغريبة خلاص..والفينات جمع فينة أي سهوة.. واهلنا بيقولوا الدواس بالفينات.. اي بينجح في حالة سهوة العدو..ياخي الفينة يعني الدقسة بالعربي الفصيح كده..
قبل شهور ، ول ابا ابكر الطويل (على قول قمر عليها السلام) قام تووشك دخل في حكاية جوايز الطيب صالح ، ياتو فيهن مسلمة وياتو فيهن كافرة..اها دي دقسة من المعلم الكبير.. قامت الهمتني اكتب رواية مشتركة بيني وبين ابكر الطويل ، يعني زي حكاية عبد الرحمن منيف وجبرا ابراهيم جبرا في رواية (عالم بلا خرائط)..اها قلت البداية نشوف ايميل ابكر الطويل ونعمل تخطيط للحكاية.. تاني قلت لأ يا ولد.. اكتب الفصل ..ورسلو لأبكر الطويل.. وهو يقوم يشوت الفصل التاني شمال.. وانت تشوت التالت.. وهكذا.. والتايم فريم.. المشاركة في واحدة من جوايز الطيب صالح..عشان نقلب موازين الأدباء..!
اها قمت دقست ونسيت اسال ابكر الطويل من الإيميل.. فقلت ياخ السايقة واصلة اخير ابدا انا براي..وبديت.. والقصة احلوت نسيت ليك ابكر الطويل وجوايز الطيب صالح الإتنين..ياخي لمن تندمج مع الرواية بتكون في حالة تانية.. كتبت لي تلاتة فصول وبقيت اقطع واتلفت..لكن الفينات حصلت تاني..وبقية في كل دقسة بقوم اكتب فصل جديد..عارف الدقسات دي شكلها كيف؟
بجي داخل المنبر (والله ياصحي يا درديري) بقوم بفتش اسم درديري ، أي بوست.. ان شاء الله احم ساكت..وبتفرج في البروفايل (دموع حواء) وتوشك اخش ليك في الكتابة وانجز لي فصل.. بعد شوية بقوم بعمل مراجعة موقف (الزولة دي تمشي ولا تكون قاعدة ، لابسة كيف..الخ) اها اخش المنبر.. اشوف ليك حاجات ابكر الطويل..فووووووو..تولع الفكرة في الراس واراجع مواقف الأبطال والبطلات..ياخي البطلة لو الهوا هبش الإسكيرت بتاعها ساكت يقوم الكاتب يقول ليها اوعي من ابكر الطويل..لمن افتر اقوم اقفل اللابتوب..وبعد شوية بجيك احساس انك عملت حاجة كعبة خلاص.. اها تقوم تاني ترجع المنبر.. تفتش معاوية الزبير..طبعا معاوية مقل.. وحاجاتو قاعد اسميها (بصقات معاوية الزبير)..بقوم اقراها..وتوشك اخش اللابتوب..اها الكتبتو قبيل اقوم اشتغل ليك تحرير وتصحيح شديد..في الوكت داك بتشوف معاوية الزبير كانو واقف فوق راسك..(عن) بتكسر جبل ، و(حتى) بيجي شنو كده بعدها ماعارف ، ودي شبه جملة ما مفروض تكون هنا (الكلام ده يا درديري قبال معاوية الزبير يفكر في انو يفتح فصل تقوية لناس المنبر..والله صحي)..وهكذا وهكذا..!
وده كلو هين.. عارف المحنة وين؟..
المحنة اخترت لي اسم بطلة ناجرو من راسي..(حورية القاسم).. اها يوم ابحت وابحت ..لأني قاعد اتابع اخبار امير تاج السر بالدس..القى امير عندو رواية جديدة اسم بطلتها (حورية مصلح) وقال شنو ..قال جذورها يمانية..ياخي دي محنة شنو دي..؟..و(حورية القاسم) بتاعتي دي امشي بيها وين يعني؟..
الإ صحي كده يا معاوية الزبير : البلوزة بالعربي اسمها شنو؟..وهل يجوز اقول لابسة بلوزة وبعد داك اصب الألوان والمقاسات ولا مفروض اقول حاجة تانية؟..بعداك البشكير ياخي.. البشكير ده طلع عيني..ما نحن كمان لازم نكتب الحاجات الحميمة واللصيقة بالإنسان والإ سيتهمنا النقاد بالصناعة.. وكده..!
نرجع لدرديري.. الرواية في بدايتها ، بعد الإهداء مباشرة.. مقتبس من قصيدة المثاقيل للشاعر سليم بركات..والمشهد الأول صادم وجديد خالص في عالم الرواية كن بالعربي وكن بالإنجليزي..
الفصول مقسمة بطريقة مبتكرة خالص.. يعني لا بنسمي فصل أو قسم أو جزء أو كتاب ..وانما اسم تاني خالص..! المكان برضك جديد خالص وغير مطروق..! الثيمة الأساسية الحرية ومساككة الحرية .. وممارستها ثم بعد داك تقوم تدخل في حيص بيص وجودي وجمالي..! غايتو لحد الآن الشغلانة لحقت الفصل الطمنطاشر..! فشنو يا ابكر..حكاية ناس رؤية لمعالجة شنو كده ما عارف..ومساككة الحوار الوطني .. والكوميديا السوداء ..هي فقه التقية ساكت..!
لمن يا ابكر انت قلت للجماعة (الزول دا).. انا كنت بتونس مع الحلاج وقال لي ، عارف يا كبر (ما تحت الجبة الإ..) وقطع..!
تحياتي..لضحا الأنيقة..اينما كانت وكيفما كانت.. ولن ابرها بان تكون احد وجوه بطلاتي العوين في الرواية المزعومة..لأنو وصف وشها براهو داير تلاتين فصل ..وانا الرواية مخطط ليها ست وخمسين فصل فقط..!
والسلام عليكم..
كبر
08-15-2016, 01:12 AM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3594
لمان أشرت لعمر بن عبد العزيز "بالزول دا"؛ الجماعة شالوا سيوفهم متوجهين لدار عمر بن هشام لجز عنقرته وقف عند باب داره وقال ليهم: اليطلع معاي الخلا اندادي، امشوا جيبوا لي ابن أبي طالب أو حمزة. أها مرّة تاني قال لابن مسعود و ابن مسعود طالع في صدرو بكرعينو الرقاق ديك، وماسك شعرو داير يجز راسو، قال ليهو: "لقد ارتقيت مرتقىً صعبا يا رويعي الغنم" طاخ كتلو ثم قطع الراس رصدتها كجريمة حرب تاني يوم اشرت لله "بالزول دا" وما كنت خاتي في راسي انهم يزعلوا في دي، قلت في سري: بن عبد العزيز حقهم وبزعلو ليهو؛ الله دا كمان حق زول؟! لاقاتي واحد صاحبي كان مسميني "أبكر رويعي الغنم" قال لي: دا شنو يا رويعي؟ "يهدوا فيها من الطشيش، باتت برّة" المهم يا كبر، زي ما زمان اتوسطت لي عند ول ابا بريمة، دايرنك تتوسط لول ابا معاوية يطلعوهو من لستة الكرور. وبعدين نشوف ليه سبعة وخمسين محببة عندي اكتر من التمانية والستة عمر هاشم صاحبي كلما الاقيهو بقول ليهو احكي نكتة الجنوبي، يقول لي: ياتا فيهن أقول ليهو: الاتنين. طبعا معروف انا ما عنصري، لكن النكتة بتمتعني لطرافة الجنوبيين عموما وطريقة كلام عربي جوبا. مرّة قلت لواحد اماراتي: اتوا ليش بتحبوا السودانيين؟ قال لي: طريقة كلامك عجيبة وممتعة يا زول، تقولوا للزول "بالمناسبة" من غير مناسبة. جنوبي سألوهو: أكتر كلمة في العربي عاجباك شنو؟
قال ليهم: ٥٧ ونطقها بعربي جوباوي سليم قالوا ليهو: طيب واحدة تاني مكسراك اكتر قال: ١٥٧ ونطقها بجوباي اسلم مع تفخيم للمائة أها فصول الرواية لازمن ١٥٧ والفصل الأخير نخصصوا لعودة جوبا، زي الجزء بتاع عودة الملك في ملك "الخواتم"
08-15-2016, 02:13 AM
معاوية الزبير معاوية الزبير
تاريخ التسجيل: 02-07-2003
مجموع المشاركات: 7893
كبر عرفناهو صاحي هسّ ليه، زمنو مخالف (زي كتابتو) طيب أبّكر مالو؟ صاحبنا يا كبر اسمو مرتضى باسبار من أظرف ظرفاء كوستي جاني زيارة الشارقة سنة 99 الوكت داك أبكر ساكن معانا في بيت العزابة.. بِصْحى الدغش (أو بصَحّي الدغش) ماشي الشغل باسبار من تحت البطانية بقول لي صاحبك قام يحلب الغنم وكتها ما كنا عارفين طبيعة شغلو إلا المواعيد ياها مواعيد حلب الناقة وقد كان صاحبي محقا أها في رمضان الفات مشوا العمرة باسبار ومعاهو اتنين من زملاء المكتب قال لي يوم بنصلي في المغرب في الحرم جنب بعض، بعد سلموا - واحد من اصحابو قال ليهو: حرَماً - باسبار: ومال نحن في ميدان جاكسون
فاا شنو عليك الله خصص ليك فصل لصاحبي باسبار دا، إن شاء الله الحتالة
08-15-2016, 02:57 AM
معاوية الزبير معاوية الزبير
تاريخ التسجيل: 02-07-2003
مجموع المشاركات: 7893
مرة ضرب لي تلفون، حق الله بق الله - اسمع... ياخ لقيت لي قطعة ما بتتفوّت.. سمحة وكبيرة وأنا مفلس ديني طالع وما عايز زول يشاركني فيها، رسّل لي حاجة - لقيتَا وين - عِن واحد في حي الأندلس - يعني درجة أولى! - أولى ساكت، درجة ممتاز - إن شاء الله تكون ناصية - ناصية؟!! انت قايلا قطعة شنو يا معاوية؟ - أرض - أرض شنو ياخ بنقو
08-15-2016, 03:09 AM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3594
اكتر حاجة بكرهها في الدنيا دي هي المراسيل.. لكن..! المحبة بتكون برضك.. صوت مذيعة اذاعة ود مدني ، الشفــّة ، وكان عندها برنامج اسمو شنو كده ما عارف ، لكن التحية في المقدمة بتجري كالآتي (خلان الوفا وسمار الصفا) ، والشفـّة لاطشة التحية من اصدقائي (اخوان الصفا) عليهم السلام..
اها حكاية (خلان الوفا ، سمار الصفا) ، مرتضى باسبار مصر انو المقصود هي طائفة (الندامى) ودي طايفة بين بين.. لا تقدر تقول عليها سرية زي الماسونية والحركة الإسلامية وخلايا البعث العربي الإشتراكي ، ولا تقدر تقول عليها زي الطرق الصوفية (قادرية ، احمدية ، نبقنشدية ،تيجانية ، سمانية ، اسماعلية ..الخ) او ناس الأنصار ، حزب الأمة ، الأتحادي الديموقراطي ، الختمية.. باختصار.. لا تعرف تقول (باطنية) ولا تعرف تقول (ظاهرية)..حاجة مجوبكة كده زي حال امسودان عليها السلام..ودي ما المشكلة..!
المشكلة انو طائفة (الندامى) ، ولا ندري نقول عليهم السلام ، ولا نقول عليهم قبحهم الله في اعاليه ، ناس عندهم حس عالي بحكاية تقسيم العمل القالها المجنون الفرنسي اميل دوركايم ، القاعدين ناس الظاهر يسموهو ابو علم السيوسيولجيا..! المهم الندامي ديل عندهم ..قوانين ولوائح داخلية سرية صارمة.. منها حكاية المراسيل لإحضار (ماء الحياة، بالعربي الفصيح العرقي ، وعشبة البهاء ، بالعربي الفصيح البنقو)..اها المراسيل دي ما بتكون خبط عشواء سمبلا كده.. لكنها منظمة.. كل مرسال على زول معين أو زولين..والموضوع بالمناوبة الدقيقة.. مافيش حاجة اسمها تهميش وتركيز سلطات وكده..!
من ضمن نوبة مناوبة المراسيل اياها..ذات مرة.. وقعت علي وصديقي مرتضى باسبار..يعني نحن المكلفين باحضار الدعم اللوجيستي وهو ما يسمى في عرف الندامي بالزوادة.. تجيبها عبر مسارات داخلية او مسارات خارجية مش مهم..المهم تجيبها والسلام.. يعني باختصار تاكل نارك وتضحي بروحك عشان تسعد الندامي.. وده جزء من القسم السري.. كن خنت القسم ده الله قال بي قولك..!
مشكلة مرتضى باسبار ، انو، اضافة للزوادة بتاعة (ماء الحياة) عندو زوادة خاصة وهي عشبة (البهاء)..اها الغلاط وقع ، من وين نبدأ : هل نبدأ بماء الحياة أم نبدأ بعشبة البهاء؟..اخيرا اتفقنا نبدأ بمأء الحياة..!
قطعنا المدينة من اقاصي جنوبها، ووصلنا حوافيها الغربية ، عند الحلة الجديدة.. والزوادة في الحلة الجديدة (نضيفة) ما تقول لي سودان جديد ولا كوستي رديف عرقي نضيف.. بضاعة مجيهة خلاص..!!..اها لاقينا امونة طــُلبة (عليها السلام).. ولمن حددنا كمية الزوادة..قامت انخلعت.. لكن بحس التفاوض العالي ، قالت خلاس اشوف جاراتي في الحلة.. اها في لحظة مفاوضات امونة طــُلبة في الحلة مع جاراتها ، برزت عادة مرتضى باسبار السيئة للغاية..وهي الطفاسة المعروفة في عرف الندامي بحكاية الضواقة.. وهي في ظاهرها حاجة كويسة.. لأنو ما ممكن تشيل ليك بضاعة من غير تجريبها ..لكن في باطنها ممكن توديك في ستين داهية..!!
المهم اتخارجنا من الحلة الجديدة ، وانا كنت سايق البكيب التاتشر بتاع المؤسسة (عليك الله يا عزيزي القاري بطل اللواقة وحكها للدم..ياخي افترض انو بيكب بتاع ضرائب ، امن داخلي ، استخبارات ، ضابط تنفيذي ، منظمات اجنبية.. ياخي بيكب والسلام)..!!.. سايق لأنو الضواقة فعلت فعلها في صديقي مرتضى باسبار..! اها في نص المدينة ، مرتضى باسبار كانو اتذكر حاجة.. ضحك بصوت عالي.. ثم خفض الضحكة لبسمة مسكينة خلاص وقال لي: العشبة يا صاح..العشب يا صديقي..! اها عدلنا مسيرنا ، ولفيت العربية البكيب وانا متجه شرقا تجاه بيت، نعمات ربكونا..ياخي دي عندها عشبة بهاء..نفسين تشوف الجنة في القزاز..!!
بعد داك.. انا اتذكرت حاجة..مواعيد ضحا بعد ما قلبت وبقت مسيحية..وكانت عازماني امر عليها في الكنيسة واحضر معاها الترانيم الروتينية..!
اها سقت البيكب ، وعبرت مستشفى الأم بخيت ، ومشيت بي عدلي على الكنيسة الصغيرة (الكلام ده يا ابكر الطويل في مدينة الدلنج)..بعد تعب لقيت لي زواية مضلمة وبركنت فيها البكيب.. وقبلت على مرتضى باسبار وقلت ليهو: ح ننزل عشان نجامل ضحا .. اوعك تعمل حركة جاي ولا جاي.. الغريبة ابتسم مرتضى باسبار وقال لي: ضحا..فوق الحاجات يا عمك..وهي اليقين البنحلم بيهو..! الغيرة دخلتني ، وقلت ليهو: هوي يا وليد الجلابة هوي..ارعا بي قيدك..!
نزلنا من البكيب.. قمت عملت صلوات خاصة ، حفظتها عن جدي نصر الدويد ، والد امي عليهما السلام ، ونزلنا..! في مدخل الكنيسة الصغيرة ، قابلتنا المضيفة ، وهي المسئولة من استقبال الضيوف.. زولة كده اسكت خالص خليها.. اسكيرت واقف فوق الركبة..جسم متناسق.. ملامح جمال نبيل..نغوغي واثيانغو ما يقدر يعبر عنو..حتى لو سماها وانجا ، واقتبس كلامو ايوب مصطفى (عليه السلام) وقام خلاها توزع منشور ولا شنو كده ما عارف..!!
اها المضيفة ، في خشم باب الكنيسة الصغيرة في مدنية الدلنج البهية ، قالت باسمة (بسمة حقيقية ، والله صحي) :حبابكم يا شباب، اتفضلوا..!
وقال كده مرتضى باسبار مرق من علبو..ياخي لمن انا احترت في ديني ذاتو..!
قبال يخط رجلو اليمين في عتبة الكنيسة الصغنونة ، قال بصوت واضح ، وهو يخاطب المضيفة: لكم دينكم ولي ديني..!! ابتمست المضيفة ، ذات الجمال النبيل ، وقالت لصديقي مرتضى باسبار: معلوم يا صديقي.. معلوم.. وحبابك كيفما كنت..!!
جلسنا أنا ومرتضى باسبار في مقاعد في الوسط..وكانت ضحا قائدة الكورس الذي يؤدي الترانيم..واختارت ترنيمة معينة ، نسيت تفاصيل كلماتها ، ولكني احتفظت باللحن الذي لا يغباني.. !!
اللحن كان غنية ثنائي العاصمة : يا نسايم الليل..روحي كلميهو..!!
لمن القداس انتهي..جاتني ضحا تسلم علي.. وقلت ليها ، محرجا ومعتذرا: اعفي لي يا ضحا سلوك صاحبي مرتضى باسبار..!
ابتسمت ضحا ابتسامة عريضة وقالت لي: ما بتخجل يا كبر تجيب صاحبك مرتضى باسبار طاشم..!
وبألية تامة ، اضفت: وساطل كمان..!!
قالت ضحا بابتسامة ملؤها اليقين: الجوامع والكنائس ، هي بيوت الرب.. ونحن ما عندنا مشكلة ، مين يعرف..يمكن زيارة مرتضى باسبار لبيت الرب وهو طاشم وساطل تعمل فيهو اثرهأ.. سأصلي من اجلك يا حبيبي يا كبر .. وسأصلي من اجل صاحبك مرتضى باسبار..!! المهم.. بعد العفيص بتاع ضحا ، والأرشاد الديني المنظم.. قدرنا نلقى لينا فرقة نمرق من تلك الكنيسة الصغيرة..انا وصديقي مرتضى باسبار..!!
في السكة ، نحو البيكب الحنين ، الذي يحفظ زوادة الندامي ، عليهم السلام ، بصدق واخلاص يفوق حفظ جهاز محمد عطا لأمن دولة اخونا عمر البشير ، وقف مرتضى باسبار.. وبملامح طارت منها الضواقة وعشبة نعمات ربكونا اياها ، وقال لي: انت متأكد يا كبر ، الناس ديل شغالين ترانيم دين..؟!! في الحقيقة انا اتخضيت .. وخفت امرق لي واحد من عيال المسلمين من الملة.. وقلت ليهو مذعورا: نعم يا مرتضى باسبار.. دي ترانيم دينية..
ويبدو انو مرتضى باسبار، عضت معاهو للأخر.. ولا ادري هل هو وجه ضحا ، بنية المسيرية القامت قلبت وبقت مسيحية ، ام وجه المضيفة ذات الجمال النبيل الذي يشبه جمال ملكة سبأ لمن قابلت سيدنا سليمان ، ام هو فعل الضواقة لعرقي امونة او عشبة نعمات..؟!! وقال لي بصحو تام: ده ياتو دين يا كبر القاعد يشتغل على انغام ثنائي العاصمة وهم يؤدون كلمات امحمد ود الرضي..؟!! قلت ليهو ، بصورة توفيقية ومجازفة لا تغيب عن عين الحصيف المتأمل: يا مرتضى باسبار ، نفس الألحان المركبة دي بتلقاها في ترانيم الطريقة القادرية..ياخي.. المشكلة شنو؟
ثم صمت مرتضى باسبار..صمت صمتا طويلا..!
انا خفت مرتضى باسبار يلحق بداعش.. وفي جواي لعنت ضحا بت اللذينا.. يعني في داعي للأحراج ده..!!
فانا اكره المراسيل ياااااااااااااااخ.. والله صحي..!
كبر
* تنويه مهم للغاية: هذا الحكي ليس جزء من روايتي المزعومة..!
التنويه الثاني: ضحا شخصية حقيقية يا اخوانا ، وهي شابة عندها ماجستير ، ومن بنات المسيرية ، وابوها كان شنو كده ما عارف (نظام مسئول كبير وكده، واسلامي كمان..والله صحي).. وقامت هفت ليها قلبت وبقت مسيحية..ثم اهلها عملوا معاها فقية التقية بتاع التبرؤ.. وعينها طلعت من ذاك الفعل القبيح العجيب..وهي الآن في نورث امريكا في مكان ما..مشكلتها مش في انها بقت مسيحية..ولكن مشكلتها في ظنها انو كبر زول كويس..فهل هو زول كويس؟.. الإجابة عند ضحا..ليها كل المحبة والسلام..اينما كانت ، كيفما كانت..!!
عندنا في السودان لامن تدخل تشيل الفاتحة في صيوان عزاء
بعد الفاتحة مع أهل الميت تغطي بنظرك مسحة على الجالسين لتختار مجلسك ..ومجالسيك .
قبل ما يتحلك واحد من الشليقين بتاعين الأسعار والسياسة والكورة يجرك معاهم يعكر مزاجك و يضيع يومك .
موقف طريف .. عندي قريبي من حلفا الجديدة مرة زارهم ابن خالهم من الشمالية متربي مع جده وشغال معه في التجارة . جالسين قدام بيتهم اتلم عليه أصحابه عرفهم به وخلاهم جالسين معاه وراح يجيب العشا . بعدما عاد وجد قريبه لوحده أنفض من حوله الأصحاب .
ذهب يعاتبهم كيف يتركوا الضيف لحاله .
واحد فيهم قاله ياخ قريبك دا زول بتاع معايش ساي قدانا ياخ شابكنا ليك شوال العيش بقى بكم وزمان كان بكم . وطلب الفول كان بكم ورطل السكر كان بكم . نحن مالنا ومال الحاجات دي ؟ هههههههههههه
كنت عايز أقول شنو
فيما يتعلق بالسرد والملكة السردية وشروطه وغيرها عندي تجربة طريفة سأضيفها هنا لو سمح مقامكم :
عبقرية مجانين صديق من أبناء كسلا يقول درديري ما خلا حاجة في كسلا حتى المجانين أداهم حقهم . ردا على سلسلة عن المجانين بدأت اكتبها .. ولكن الحقيقة كسلا كل من فيها ومنها وبها مبدعا بطريقة مختلفة بمن فيهم المجانين ( جنو براه كما نقول في العامية) وثانيا لأن معظم عمرنا شبابنا وطفولتنا قضيناها في السوق .. ومعروف انه في كل بقع الدنيا يكثر المجانين بالأسواق حيث تسهل لهم سبل العيش أكل ولبس ونوم في برندات السوق .ماذا يريد بالحارات غير الشقاوة ومطاردة الصغار . وكان معظم المجانين أو اغلبهم في تجوالهم بالسوق يمرون بنا بالمكتبة فألفناهم وألفونا يسألون الجلوس والزبائن .. ليس الحافا .. ولكن حتى في طريقة الشحذه هذه كل واحد له طريقته .. نساءا ورجالا .. لكن من تحضرني في هذه السانحة أثنتين ..هما حليمة وخديجة مرة اللوري ..إذا كان بالإمكان الإعجاب بالمجانين فأنا كنت من معجبيهما . أولا حليمة تلك كانت مسالمة جدا تلبس الثوب السوداني وتجره على معظم وجهها ( شبه متبلمة) عمرها ربما تجاوز الخمسين . تحمل قفة في يدها لاتدري ما بها .. وما يميزها كانت تخوض في حوار دائم مع ذاتها .. قصص وبعض مرات مشاكل وضحك .. تحس كأنها حافلة ركاب مليئة بالنساء .. لم تكن تمد يدها لأحد فقط تقف قرب الحضور وهي مواصلة في حوارها مع ذاتها..إذا مد أحدهم لها مبلغا تناولته دون أن تقطع حديثها .. يوم من الأيام بعد ما خلصت من حضور الصالة دخلت الينا في المكتبة لتنال ما فيه النصيب دون أن تسكت ..حاولت أن أخوض معها تجربة جديدة إن جاز التعبير . أقحمت لها سؤال في النص .. ( يا حليمة أنت فاطمة أخبارها شنو ؟) سكتت نظرت إلي بدهشة وابتسامة أول مرة تسكت ( خوفتني ) لكنها أستلمت المادة وأدخلتها في مفرمتها السردية مواصلة بذات الابتسامة . ( فاطمة ما شاء الله عرسوها عرسها عبد الرحمن وساقها معاه حلفا الجديدة .. وفي عرسها طلعت زي القمر .. وهسه حامل يمكن تلد قريب. و عبد الرحمن جا ساق أمها وداها عندها تنفسها ,وهو عنده لوري يشيل بضاعة من كسلا يودي قضارف ويجيب العيش من هناك....) شعرت أن قصة فاطمة لن تنتهي قريب حبيت أغير الموجة بإسم آخر وأقحمت لها أسم تاني .. وسعدية عاملة كيف ؟؟. ( سعدية مسكينة عرسها الكلب السكران صالح كل يوم يضربها بعد ما ولدت منه ثلاثة عيال أخوانها قالوا يطلقوها منه .. مشى أخوها الكبير جابها من ود شريفي . هسع المسكينة عيانة .. وهو كمان غشاهم وقال تبت من السكر وجاء عشان يرجعها .. وهي ما مسكينة عايزة ترجع معاه و ...........) ألم أقل لكم هي عبقرية ملكة سردية تعجز أمامها ملكة أسامة أنور عكاشة ( بقيت في التحلني أنا ..) لكن منذ ذلك اليوم أصبحت شريكا لحليمة في سردياتها أتشوق حضورها .. أقحم لها الأسماء وهي تنسج حولها القصص بسرعة عجيبة جعلتني أحس كأنه هؤلاء الناس لهم وجود فعلا بنفس هذه الحكاوي وليس في خيالها هي ..أعتقد بادلتني ذات الشعور بل من تطل على باب المكتبة وتجدني تتبدأ تتبسم معلنة عن الأستعداد للحكي الجديد. ومرحبا بالحكي الجديد .
من هذه المجنونة العاقلة
تعلمت أن خلف أي اسم تكمن مئات القصص
شرطة أنه يكون أسم مطروق مليان شحمان مثل أسم احمد فاطمة طه عثمان علي محمد
لكن السؤال الذي أسفت عليه
هل لو قلت لها ماذا حصل مع سحر أو سهى
هل طانت ستجد ما تسرده
ما أظن
والله أعلم
08-16-2016, 06:24 AM
ناصر حسين محمد ناصر حسين محمد
تاريخ التسجيل: 01-09-2013
مجموع المشاركات: 5237
Quote: الساعة القامت فكت ليك الدهشة..قالت:سجمي ، ده مش انتا؟..قلت ليها ايوه ده انا..ياخي لا ما تهظر..صحي انت اللابس ليهو جاكت بني وبيريه اصفر؟.. قلت ليها.. ده انا يا ضحا.. الساعة العاطت ليك بطول حسها: الله اكبر..الله اكبر!!.. وانا اشيل واعيط:يا ضحا لأ..انتا في اميركا..الإ دي..!!.. وضحى تشيل وتعيط اندهاشا وازبهلالا: شكلك وسيم..ووب علي من الخدرة الدقاقة دي..الله اكبر..الله اكبر..الله اكبر!!
ههههههههههه أمسك لينا في الادب ده قوي
وسيب مسخرة الاديان والسياسة البتعملها
08-16-2016, 06:56 AM
حيدر حسن ميرغني حيدر حسن ميرغني
تاريخ التسجيل: 04-19-2005
مجموع المشاركات: 27700
ابدا ما مسخرة يا ناصر لو كانت عن قناعة طيب الفضَل شنو للإنسان عشان يجادل فيه؟ كورة وغناء ؟ مرات الإنسان بيحتاج لخجة لدواخلو عشان يصل ليقين كلمة مسخرة دي غاظتني جد
08-16-2016, 07:46 AM
Kabar Kabar
تاريخ التسجيل: 11-26-2002
مجموع المشاركات: 18547
وبعد.. يا معاوية الزبير.. انا ليه تجيني الموية حفيانة..كما قال عاطف خيري..!
وليه انا ما حبيت زولة من كوستي؟..
لك يا صديقي ، مراجعة المزعم في اساطير الأولين..ارجع اقرا اداورد الخراط (مايا ويست) ، حيدر حيدر (وليمة لأعشاب البحر) ، عبد الحكيم قاسم (المهدي وطرف من خبر الآخرة) ، الطاهر بن جلون (ليلة القدر) ، الطاهر بن وطار (اللاز) ، اللعين واسيني الأعرج ( زهرة اللوز) ، بهاء طاهر (وقالت ضحا)..عبد الرحمن منيف (شرق المتوسط) ، ثم عبد الرحمن منيف وجبرا براهيم جبرا (عالم بلا خرائط) ، وحالنا صاحب لا تعدو هجايص جبرا في (البحث عن وليد مسعود)..كانا ذلك الخائس وليد مسعود..فهل يا ترى هناك من له الإستعداد للبحث عنا..!!
ثم انا ليه..تجيني الموية حفيانة..؟!!
يا ترى ماذا يضير عبد الحفيظ اب سن ان يذهب الى المرسى ويمتطي صهوة البنطون العتيق الي (طيبة) ، ثم يشرب كباية شاي ، ويرجع مع نفس البنطون الراجع لكوستي، ولو غلبوا المحال.. يضرب سمك في المرسى ..بتاع كوستي المودي لطيبة .. ثم يسمع حكايا المراكبية الغميسة.. ويتصور معاهم..ويقول انا: شفت..!!
وتظل بيني وبين مراقي الجمال: المسافة..!!
سلام يا صديقي.. سلام..
هي بقايا الحتل يا ول ابا ابوبكر..في الحتل تكمن الرؤيا..!!
سلام..
كبر
08-16-2016, 08:29 AM
Kabar Kabar
تاريخ التسجيل: 11-26-2002
مجموع المشاركات: 18547
في اول مداخلة ليك .. انت وعدت ابوبكر عباس .. انك ح ترجع لفلفة الحكي.. اها المنعك شنو يا حيدر تواصل..؟.. هل لأنك اكتشفت انو الحكي المستند عليهو ابوبكر عباس هو حكي كتبو كبر ؟.. ولا المانع شنو بالضبط؟..
ابوبكر عباس جاب الحكي ، الكتبو كبر يا ناصر وحيدر ، لأنو ابوبكر شغال في سكة مهمة للغاية وهي ضرورة التفريق بين الحاجات..يعني حتى لو اختلفنا مع الناس في موقف سياسي ، لكن برضو بنحفظ ليهم حقهم في انهم يكونوا انسان ويكتبوا حكي ادبي وجمالي ممكن نعاين ليهو بعيون الجمال بعيدا عن عيون الأيدولوجيا..!!
ابوبكر عباس ومعاوية الزبير يا حيدر ..زعلانين شديد من هجايص كبر السياسية ..لكن بالرغم من غضبهم من موقف صديقهم ده.. برضك بيحرصوا يوصلوا ليهو رسالة بانهم بيفرقوا بين كبر العابر بتاع السياسة وبين كبر الممكن يكتب كلام جمالي ما يتنسي..فأين انت من ذلك يا صاحب؟
بالجد يا حيدر موقفك حيرني يا صديقي..!!
كبر
08-16-2016, 12:48 PM
علي عبدالوهاب عثمان علي عبدالوهاب عثمان
تاريخ التسجيل: 01-17-2013
مجموع المشاركات: 12500
Quote: لمهم الندامي ديل عندهم ..قوانين ولوائح داخلية سرية صارمة.. منها حكاية المراسيل لإحضار (ماء الحياة، بالعربي الفصيح العرقي ، وعشبة البهاء ، بالعربي الفصيح البنقو)..اها المراسيل دي ما بتكون خبط عشواء سمبلا كده.. لكنها منظمة.. كل مرسال على زول معين أو زولين..والموضوع بالمناوبة الدقيقة.. مافيش حاجة اسمها تهميش وتركيز سلطات وكده..!
حبيبنا كبر .. مودتي .. يا سلام على الابداع .. نعم زمان أيام نحن معلمين في ضواحي الدنيا كانت هناك قوانين ولوائح داخلية لهذه الجلسات في ميز المدرسين ( في الزمن الجميل داك ) أهم بند في هذه اللوائح ( كلام الليل يمحوه النهار ) والناظر كان يقول ( الشراب بعد صلاة العشاء ) وكلام الناظر طبعاً ماشي علينا حتى في ليالي الخميس كنا عندنا فراش في المدرسة هو المرسال ( والمصطلح .. سفير جهنم ) بعد الشراب كل واحد ينوم في محله .. لأن المدرس السكران كان عيب ومحسوب على الناظر والمجتمع في ذلك الوقت لا يرحم .. صدقني المدرس كان مراقب من المجتمع أكثر من ( إمام المسجد )
واصلوا ..
08-16-2016, 01:16 PM
ناصر حسين محمد ناصر حسين محمد
تاريخ التسجيل: 01-09-2013
مجموع المشاركات: 5237
Quote: ابدا ما مسخرة يا ناصر لو كانت عن قناعة طيب الفضَل شنو للإنسان عشان يجادل فيه؟ كورة وغناء ؟ مرات الإنسان بيحتاج لخجة لدواخلو عشان يصل ليقين كلمة مسخرة دي غاظتني جد
حبيبنا حيدر سلامات
البنشوفو منو في الاديان والسياسة مسخرة ساي وحياتك اما الباقي اخر حلاوة
ما فيها شي لو قلنا مسخرة بمعناها البسيط ( ماجايبه حقها )
08-17-2016, 00:35 AM
معاوية الزبير معاوية الزبير
تاريخ التسجيل: 02-07-2003
مجموع المشاركات: 7893
التحيّة للأديب درديري، ولناصر، حيدر والأنيقة نور منورين.
Quote: ابوبكر عباس ومعاوية الزبير يا حيدر ..زعلانين شديد من هجايص كبر السياسية ..لكن بالرغم من غضبهم من موقف صديقهم ده
في ردّة فعل بريمة لموازرة الغالي، طلع ليهو لستة "كرور" ضمت معاوية الزبير بوست الغالي محتفظ بيهو، راجعتو أكثر من مرّة عشان شوف سبب زعل بريمة منو شنو؟ ما عرفتا المهم يا كبر، دايرين منك وساطة تسمح ببقرنت (جعله بقاري) معاوية الزبير. لي زمن طويل بحاول أفتح نفاج ونسة في البوستات مع الغالي وإسماعيل، لكن ردوا الجواب قاسي مع اني من ناسم
فرصة نسرق طريقتك في دمج الغنا في الردود
08-17-2016, 07:20 AM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3594
وفرصة تانية أقول لصديق الغالي: بوست ود الباوقة وبوست عادل الباهي آلمني ألم شديد يؤسفني عدم المشاركة الإيجابية بهن، ولو إعتذاري ممكن يحدث فرق؛ فأنا أعتذر عن ما حدث بهنّ.
08-17-2016, 07:28 AM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3594
يا علي امبس كيفك عندنا لمن ينجضوا السمن مش في حاجات لذيذة كدا بتقعد في قعر الحلة بس دا ياهو الحتل واظن الكلمة جاية من حتل الشيئ اي نزل في القاع ويقولوا ليك انت كنت حاتل وين من الصباح
08-17-2016, 09:46 AM
علي عبدالوهاب عثمان علي عبدالوهاب عثمان
تاريخ التسجيل: 01-17-2013
مجموع المشاركات: 12500
مودتي إسمان أمبس .. عرفت الموضوع .. بالدنقلاوية ( كوركور ) يا أخي دي حاجة لذيذة جداً .. ( بعيداً عن كرور المشهورة ) الغريبة الحلة دي كان من تخصص الاولاد مش البنات .. الحلة ومعاها المعلقة ومثلها أيضاً في حلة الحليب ( هلنتود ) وكمان أحياناً الشحم المحروق ..
يا عبد الوهاب، زيادة في كلام عووضة؛ الحتل القصدو كبر في نصو هو بقية البن غير الذائب في فنجان القهوة إعتادت النسوان زمان يقرن ليك منو الحظ ونزار قال لحليم: في حياتك يا ولدي، امرأة سبحان المعبود وستعرف بعد رحيل العمر بأنك كنت تطارد خيط دخان
مودتي أبوبكر .. ربما تكون أصل الكلمة ( حثالة ) بالعربية الفصحى ويمكن تعريفها ( ما يترسب في القاع ) فبدلاً من الثاء جاءت التاء لسهولة النطق بالعامية مودتي ..
08-18-2016, 05:31 AM
Kabar Kabar
تاريخ التسجيل: 11-26-2002
مجموع المشاركات: 18547
درديري ..حبابك يا صديقي.. ياخي مجانين امسودان عندهم حاجات اسكت ساكت خليها.. في الدلنج كان عندنا واحد اسمو ذو النون..صموت ..مبحلق..يشفط الوجوه والملامح بصورة مدهشة خلاص.. ! في نص موقف اللواري.. الساعة اليقول ليك: لو احتمل زندها الندى ، لكسوت زندك ما يشاء.. ابرتين من العشب الطري ، وخيط ماء..!! واصلا كانت الناس البتحفظ شعر مصطفى سند في الدلنج تلاتة: ام دهب غبوش ، وواحد اخونا عضو المنبر ده ، والتالت ذو النون.. التحية لحليمة.. لمن كنت شغال الزامية في ابوزبد.. كنا مدرسين في المدارس الثانوية (بنين وبنات)..اها العيال بعد تعب اقنعناهم يعملوا ليلة ترفيهية (مسرح ، شعر ، غناء..الخ)..وعشان اشجعهم قلت ليهم ح اشارك معاكم..طبعا الجماعة اخر حماس.. يوم الحفلة.. لبست جلابية وعمة وشايل لي عكاز وجاي من اخر الجمهور..الناس صانة.. الساعة الهتفت ليك فيهم: تسقط تسقط حاجة حليمة ست الدكوة.. واشيل واهتف.. ياخي العالم دي عرقت جنس عرق..اسكت ساكت خليهو.. ناس الحيكومة المحلية قربوا يقوموا صوف..! اها لمن طلعت المسرح.. وانا داير اجازف لي اشعار حدباي وطارق اللمين وربيع طه..اسمع ليك واحد يقول: الموضوع تمثيل يا سعادتك..! وقال كده عماتك انفقعن زغرات..!! ياخي الواحد قرب يبقي ذو النون..! تحياتي كبر
08-18-2016, 05:32 AM
Kabar Kabar
تاريخ التسجيل: 11-26-2002
مجموع المشاركات: 18547
ول ابا علي..حبابك يا صديقي كتر خيرك على الخواطر.. من حسنات رمضان الفات..اتفرجت في مسلسل من اخراج قاسم ابوزيد واسمو (اقمار الضواحي)..وهي عن تجارب المعلمين في مدارس الريف..لكن فاتت عليهو حتة المراسيل.. مع انو جاب مشاهد لأستاذنا موسى الأمير (اب قناية)..! اما فئة اخوانا المعلمين..كانت فئة عجيبة.. معلم في البيت وفي الشارع وفي أي حتة..! وحاجات كتيرة في حياتنا ونحن بنقلد المعلمين..! لهم التحية (اقمار الضواحي).. ايام يا صديقي.. كبر
08-18-2016, 05:33 AM
Kabar Kabar
تاريخ التسجيل: 11-26-2002
مجموع المشاركات: 18547
ول ابكر الطويل.. يعني ما لقيت الإ الغنية دي يا ابكر؟.. زمان ، ايام الشباب ، سبأ..ما بتقدر تسال عن اخباري بنات حلتنا..وبتسال بنات الحي المجاور..اها يوم لمت في عجوبا..حق الله بق الله.. قامت سألتها من الحنان ، اها عجوبا يبدو انها كانت مبيتة النية.. الساعة القالت لسبأ: البياكل حقو وحق رفيقو بيدخل النار بابريقو..! سبأ اتخضت.. وجرت بيتهم بسراع.. وكتبت لي جواب اولو: كلما سألت عليك ..صدوني حراسك..الى اخر القول..! فشنو .. انا اتألمت شديد ياااااااااخ..ومن ديك الغنية دي بشوفها عشرة عشرة..!! وبعد.. ياخي لستة بريمة انا ذاتي حيرتني..لمن قريتها في البداية زعلت..وبعد شوية ضحكت بصوت عالي.. واتذكرت بريمة في واحدة من تجلياتو..كنا بنتكلم عن الهدايين في ثقافات البقارة.. والهدايين ديل عندهم حس عالي بحكاية الإسم الفني..(العجوز ام بارات ، الأندرين ، الدحش اب ورقة..ام شحاح الضي..التيس اللخضر ..الخ)..اها بريمة عجبتو الحكاية واخترع ليهو لقب في المنبر وقال اسمو (رقـّاع جنب القد)..! وشرح اللقب.. تكون عندك بيسكليت رالي سمح..يقوم العجل ينقد..اها تقوم تخط الرقعة البيلزقوها بالسليسيون (انتو السليسيون ده شنو يا ناس الكيمياء؟)..فبريمة بيخط الرقعة جنب الخرم.. يعني نظام احوص مع سبق الإصرار والترصد..! فشنو الجاتهم في تكريرهم ، سامحتهم.. معاوية الزبير بقاري حقيقي.. لأنو البقاري الحقيقي ما بعاير العوين..! اما صاحبنا سماعين.. الما عارف يقول عدس.. او على قول على الحاج (خلوها مستورة)..! طبعا على الحاج ضرب عصفورين بحجر: قال عبارة بليغة تنطوي على تهديد..ثم ضرب ثقافة البعثيين في مقتل..! اخونا صديق الغالي اخطأ.. وكلنا خطاؤن..! وكأني به يقول للحكامة اياها: سامحني غلطان بعتذر..او كما قال.. كبر
08-18-2016, 05:36 AM
Kabar Kabar
تاريخ التسجيل: 11-26-2002
مجموع المشاركات: 18547
الحتالة ياول ابا علي..المخيال الإجتماعي في امسودان بيقوم يضفي عليها معنى سالب.. يعني حاجة شينة كلو كلو.. لكن الحتل حاجة حنينه يااااااااخ..! عثمان عووضة شرح الحتل ، وهو يتحدث عن الـحـرُتُرب..! متذكر يا عثمان اخر صاج اللحمة المحمرة..؟.. زمان يا ابكر..عثمان عوضة ، ضباني ليك في كورنر مضلمة..وقبقبني وقال لي: يا كبر يا خي انت زول كويس..بس ما تنبذ الشيوعيين..لأنو ح ازعل منك..! ومن ديك وانا يا مؤمن يا مصدق..وقفت من الشيوعيين.. وصاحبنا قام صوف..عالم خيانات ياااااااااااااخ.. شكرا على هذه المساحة.. ويا حيدر علي ما تتحسس ياااااااااااااخ.. داك كبر كان مركب مكنة ابكر الطويل..! اما في بوست البغو..اشهد انو محمد حيدر المشرف مرق من علبو ..وبقى من الناس الركبوا الطرورة..الله يجازي محنك يا ابكر..! كتر خيركم يا شباب.. وعلى قول حبوبتي ام سماح ام عسكرية: الونسة بتطول العمر ...! كبر
08-18-2016, 05:50 AM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3594
والله يا محمد لا قمت صوف ولا حاجة وما قاعد افوت ليك حرف شفت قصة حنانك الحكيتها هسي دي بس ياها الباقية علي لو بتتذكر زمان يا كبر بنات ام درمان كانوا بيجو ابو صليب بنات الخرطوم يمشوا سعد قشرة وبنات بحري يمشوا ام درمان جنب السينما شفت الفن دا
08-18-2016, 07:31 AM
عثمان عووضة عثمان عووضة
تاريخ التسجيل: 06-02-2004
مجموع المشاركات: 461
Quote: علي امبسي ياخ اتذكرت حتالة نجيض السمن اسمها برضو الجرجوق دايرك تبحت لي الكلمة دي بالكوشية. وتفتفتها. لامن تقول بس
إسمان أمبس .. صحيح المواد المترسبة تسمى ( جرجووق ) ليس في السمن فقط ولكن في كل السوائل .. وإستخدام المفردات تجدها مختلف أحياناً ما بين المناطق كما في حالة الزير ( قالو أو فوكا )
ويسمى أيضاً ( حلة نوسود ) وترجمت إلى العامية ترجمة حرفية ( قعر الحلة ) والغريب في اللغة النوبية أن كلمة ( اوسود ) يدخل معناها في مجال العيب حسب الاستعمال يكون عيب إذا خاطبت به إنسان أو حيوان أو أي كائن حي .. ولكن لا يكون عيباً إذا أستخدم للجماد كما يلي :
وهي ترجمات حرفية ربما أتبعها أهلنا لعدم معرفتهم بعمق اللغة العربية في ذلك الزمان ولمحدودية المفردات وربما أستخدمت هذه الترجمة للاجابة لتساؤلات آباءنا من العرب
الكلام واسع وكثير .. إسمان أمبس .. شكراً كثير .. على فتح هذه النافذة مودتي لصاحب البوست ..
08-18-2016, 07:37 AM
Kabar Kabar
تاريخ التسجيل: 11-26-2002
مجموع المشاركات: 18547
وين يا قريبي.. محمد حيدر هين ياااااااااااااخ.. الكلام عبد اللطيف.. في حكاية الحاد المستنير..ياخي عبد اللطيف وقع في القرعة لمن اترسم ليهو شنب اييييييييييييييييييييييييييييااااااااض..لا تعرفو شنب فعل السنين بتاع صاحبنا (عن ادواء النساء فاني بهن خبر..اذا شاب شنو كده ماعارف ..او كما قال)..ولا تعرفو اتعشى قرعت لبن..!! عندي فيديو كنت داير اختو في بوستك بتاع محمد سليمان.. لكن خفت وقلت يااااااخ.. المستنير يقوم يعمل بيهو سالفة ساكت..! كلام محمد ادم عميق خالص.. وعبد اللطيف في حكاية كلام محمد ادم كان اوف سايد عدييييييييييييييييييييل..! ثم نرجع للونسة.. كبر
08-18-2016, 07:54 AM
Kabar Kabar
تاريخ التسجيل: 11-26-2002
مجموع المشاركات: 18547
من غير حليفة يا صاح.. وبعد.. زمن حنين يا عثمان..حنين شديد ياااااااااااخ..! ناس..ألـــــــ GMH GORDON MUSIC HALL
وكت داك شرحبيل كان قون.. والكورس جكسويات من ألمانيا وانت ماشي..والله صحي..!
البيرة ام جمل والشراب اسكوب..كب يا علي بكبابي الشوب..! وتاني يوم الجماعة بيصلوا الجمعة زي الماحاصل شي..!
ثم وتباع التذاكر بمحلات عباس رشوان..طبعا ابكر الطويل ممكن يلف الخرتوم ويرجع بعدلوا.. وما يعرف صينية سان جون..!
ثم الدنيا امقدود ، بردلب تجيبنا في تسويف البغو.. او كما قال..
مافي داعي للحليفة يا عثمان..
على ذكر ابو صليب..
كفاية مزاح..*
الذ حاجة..الخنفس (مش جاكسون فايف ، وانما استايل ريشتارد راوندتري في سلسلة افلام شافت ..طبعا لحد الليلة قاعد اتفرج في افلام شافت)..قميص تحرمني..وهكذا..
الحنان جميل يا صديقي..بالجد جميل ياااااااااااخ..
نحن ناس الريف الموضوع عندنا كان كالآتي..تكونوا ماشين في الشارع ، الدنيا مغربية..الشوراع خالية..الكون والأشياء يتضامنوا معك ويفسحوا ليك فرقة ..يقوم الحنان يعمل فيها بيتلفت مخصوص عشان التوب يقع..وانت تتفرج في الخصل.. اها بدل تتفرج وتملأ عينك ذارت جمال ..تقوم تجوعر: غطي المال..غطي المال..!
وكت داك بتخاف على الحنان اكتر مما تخاف على نفسك ..!
لو هبش النسيم العليل..حتة خصلة..انت بتكون مارق سيفك..اظرط من عمنا دون كيشوت ، او دون كيخوتا كما نطقتها ليليان بت السلفادور..!
انت قايل حكاية ضحكة وصفقة وكوم تراب ..غطت عليها (في حماك ربنا) ولا شنو يعني..!
كبر
_____________________
* الفنان السوداني الشاب وليم اندريا ، ضاعت في كتلة حركة 2يوليو 1976.. وهي للأجيال الجديدة (عملية الذراع الطويل) الحضروها بعض من عجايز المنبر.. المافي شنو يعني؟
08-18-2016, 08:10 AM
Kabar Kabar
تاريخ التسجيل: 11-26-2002
مجموع المشاركات: 18547
اها مفهوم (الجرجوق)..نحن عندنا مفهوم مقارب ليهو عند البقارة وألأبالة..تحديدا الناس العندها عصارات بلدية بتاعة زيت السمسم ديك..
في مرحلة بين استخلاص الزيت الصافي والبذرة ( ألأمباز) بيسموها (ام جغوغة)..نفس الفكرة موجودة عند النحـّالة (الناس البتمشي بتمرق عسل النحل)..توجد مرحلة بين فرز العسل الصافي من البروش (الخلايا الشمعية) ودي برضك بيسموها (أم جغوغة)..
وناسف للخروج عن النص (البوست) بتاع ابكر الطويل.. كبر
08-18-2016, 08:00 AM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3594
نرجع للونسة: بت جيرانا، سمحة سماحة شديدة، لطيفة اكتر من سماحتا وبريدا اكتر من سماحتا ولطافتا بتعاملني زي أخوها وسيد اللبن بعد عشرين سنة من زواجها مشيت ليهم زيارة في بيتم في الرياض قالت لي: والله يا أبكر، صدفة عجيبة، أمس حلمانة بيك تقول لي إتي ما عارفاني بريدك؟ قلت ليها: الرسالة دي رسلتها ليك من موبايلي سنة ١٩٨٥ يكون كانت الشبكة مكتظة
صباحية عجيبة، أصلاً نمت بدري جدا وصحيت واحدة صباحا، و هادي القعده قبال شوية قبل ما تشرق كويس، وقفت في خشم الباب ادخن سجارة وقدام البيت المقاصدنا شجر نخيل نفسي دخلَت في التمر (هو الآن في مرحلة بين الصُفّير والمعصود، يعني نص أصفر ونص بني مرحلة ام جغوغة ممكن أو البغو) أها مديت يدي أعزّل في التمر .. أقوم أسمع ليك هديل القمري ما بين .. (وما بين أقابلك ومشتهيك كان حلمك الأول تَرَفْ وكنتي الصبية الغايبة فى زحمة حجى وكلمة شرف كنتى الزوايا الميتة فى متحف خزف كنتي الوصايا العشرة واللون الشحيح، سميت مساحاتك "كبر"..) التداعي ياخ، كلمة ما بين طوالي وبدون منافس جابت ما بين عاطف خيري. أقول ما بين مَدّة يدي للثمر وسماع القمري ألقى روحي في الجزيرة مقرات (سبحان الذي أسرى..) وخلاص
يا نور تاور، تسعدني ضحكة أي زول قدُر ما تبقى، إن شاء الله حجم بسمة، ومهما كان السبب ولو بالغلط كبر كتّاب وأحسن للناس إنو يكون في جانب الحق .. هِنا الأئمة اختلفوا
يا اخوانا بالجد بنزيني (هنا) كِمل و ناوي ابركنغ العربية إن شاء الله في نص المسافة ولو في الخلاء
الحكاوي كتيره وما أظن الزول تاني يلقى مكان وعمر يكتبها غير في المنبر دا لأنو البداية الجديدة بعد دا صعبة وكتابتكم سمحة، تستاهل القراية (سااكت)، بدون تعليق زاتو. ولو زول كمان أهدانا نزيف عاطف الفوق دا بي روح مصطفى تكونوا ما قصرتوا قصّرت معاكم يا اولاد اللزيزه
08-19-2016, 03:52 AM
عثمان عووضة عثمان عووضة
تاريخ التسجيل: 06-02-2004
مجموع المشاركات: 461
ما فوكا حاجة عادي يقوموا لي صلاتهم يوم الجمعة يرحمهم الله عيال الخليج بقولوا نظرية السودانيين انو بعد العشاء (بكسر العين) مافي اختشا ..... ايام تحول الفرح من معبی فی قزاز لی معبأ في اكياس الجماعة كانوا. بيعلقوا الكيس في عمود جنبهم في انتظار اذان العشاء يوم جيت. لقيت. واحد صاحبنا قاعد براهو اها يا خينا مالك ما مشيت. الصلاة مع الجماعة قال لي ياخي الليلة يومي يومك في شنو؟ قال. ياخي الجماعة قالوا يمكن تجي نملة اب ريش تقد الكيس وهم. في الصلاة. عشان. كدا الحراسة. بالدور. كل. يوم علي زول😜
08-19-2016, 09:34 AM
Kabar Kabar
تاريخ التسجيل: 11-26-2002
مجموع المشاركات: 18547
تمام.. شكرا خليني أقراك مرة صاح خليني أقراك مرة صاح عكس احتشادك فى الحضور هل غاب معاك وعى الطريق أم بيكى زكـّانى الزمن ماشيك .. وعارفك يا حريق .. فى يوم غماماتك .. بِجَن فرهد غيابك .. أغنيات ظلت أراضى اللقيا بور بلقاكى يا كل الطيور .. مسجونة والحرية سور وبلقاكى بيناتنا الثبات وبيناتنا شمس البُكره فى لحظة مخاض
*******
طول الوجع رشـّح مواطن العافية فيك خلانى أرجع و أبتديك وأقراكى من كل الجهات ومابين أقابلك .. ومشتهيك .. كان حلمك الأول ترَفْ وكنتى الصبية الغايبة فى زحمة حجا وكلمة شرف كنتى الزوايا الميتة فى متحف خزف كنتى الوصايا العشرة واللون الشحيح
*********
سميت مساحاتتك حكر كل البيحلموا بالشمس هجـّرت من واقعك عبث سكـّنت فيك ضد السكون كل اللى كان ممكن يكون وطارت ضفيرتك ليل غنا جدلة صبُر وطولة نفس
*******
وما بين أقابلك ومشتهيك وجيت عليك كان عندى ليك بس نِحنَ والجرح الثرى وخيبة أمل أم الشهيد فى الكلمة والوجه الجديد وكان احتقان نبض الزمن نومة طفل فوق الدّمن يا صاحية بى الحاصل علىْ يا نايمة عن فقرى البليد سميت مرافيك الوطن صبحت مناحاتك نشيد وقرينا .. أقراك مرة صاح خليني أقراك مرة صاح
08-19-2016, 04:27 PM
محمد حيدر المشرف محمد حيدر المشرف
تاريخ التسجيل: 06-20-2007
مجموع المشاركات: 20440
بوست البغو كما اسميته يا عزيزي .. بوست خستكة ساكت لا يخلو من مضمون التضامن البسيط مع اصحاب تلك اللسته ومن السخرية من مسالة حذف البوستات الموجهه للادارة كبوست معاوية الزبير التذي تم حذفه .. لذلك جاء العنوان تلتيق ساكت من غير معنى حقيقي ولم يتعرض البوست للحذف الاداري !!
مسالة المروق من العلب دي لطيفة جدا ... تقال عادة للزول المسيكين داك لما يتفرعن او تبقى عليهو قصة الكديس الشرب ليهو سجارة خدرا داك فظن بنفسه الظنون .. ونحنا بالفعل ناس مساكين ساي ولكن برضو بنمرق من علبنا باقتدار شديد يا مولانا ودونما سجارات خدرا
ابوبكر ده ما بسوي شي يا كبر.. لاكين بس قعادو ما حلو !!
08-19-2016, 04:34 PM
محمد حيدر المشرف محمد حيدر المشرف
تاريخ التسجيل: 06-20-2007
مجموع المشاركات: 20440
عليك بريمة، يا كبر، شوف الحتلاية دي كتبتها في بوست "قمر عليها السلام" وكان بجواري الملك ومعاوية، واحكم شوف أحلى ضحا ولّ قمر عليهما السلام؟ الحتلاية: "أصلاً يا مُعاوية الحاجات بتسلسل من بعض لحدي ما تعمل جامعة، من القرآن جوا ناس أبو هريرة، وتبعوهو ناس البخاري، وجا بعد داك أبن حمبل شايل الكتب في حمار، ولمان وصل العراق شرطن، وعمل ليهو مذهب جديد، وجوا الصعاليك في العهد العباسي كتبوا المعلقات السبع ونجروا قصص لا حد لها، وجات بت من قرية الربدّة الجنب قرية أم طرطارة ريفي القرية أربعين القلبوا اسمها لأم القرى تيمنا بعهد التمكين، وقامت البت امتحنت وجابت خمسة وستين، وخالها المشى السعودية قال لأمها خلوها تواصل تعليمها، وقبلوها بجامعة القرآن الكريم، وسكنوهن في الداخليات الجنب سوق الموردة بتاع السمك، عجبتا فكرة الخرطوم فأحتارت؟!
يا أخي، قمر بعد قرت الخاطرة، نزلت منها دمعة وسقطت في السراميك بتاع بهو الفندق بتقنية التصوير العجيبة بتاعت الأفلام الأمريكية تابعت سقوط الدمعة بالبطي، ولمان إرتدّت من السراميك إنقسمت، وواحدة من النصين استخدمت خاصية التوتر لدى السوائل وصنعت ليها كرة دموع صغيرة تدحرجت في السراميك مسافة مليمترين تلاتة، خفت الجرسون الجاي يشيل الفاضي بتاع القهوة يعفص الكورة برجلو بدون ما يشعر، وتذكرت نملة سليمان وتشابه كشف بلقيس لساقها من لجة السراميك مع حادثة مسمار اللوري مع الإسكيرت!
باقي ليك قصة زي دي ممكن تنتهي يا مُعاوية؟"
08-19-2016, 06:35 PM
محمد حيدر المشرف محمد حيدر المشرف
تاريخ التسجيل: 06-20-2007
مجموع المشاركات: 20440
Quote: خليكم شاهدين الزول دا وصفني بجرادة في سروال!! أمشي يا خرج في ثياب الواعظينا
انت تتسول المواقف .. تمد اناءك الفارغ في قارعة الدروب من اجل درهم او اتنين من اغنياء زمن الغفلة... انت بذلك تفتقد لكبرياء المعرفة بالتأكيد (كبرياء المعرفة ليس كما الكبرياء المتطاول داك كما قد تفهم المعنى بصورة خاطئة)
ليس ذلك بهام على اية حال .. ما يهم هو عدم قدرتك على الاستقراء والتأويل .. وده خلل اساسي في اي مشروع انساني يدعي الاستنارة .. علاقتك تعبانه مع اللغة .. ولياقتك اقل من احتمال المعاني .. .. لا لم انعتك بالجرادة, مدحا كان ذلك ام ذما بحسب المعطيات .. لا .. لم انعتك بالجرادة على الاطلاق, فهمت ذلك ام لم تفهم.
كن بخير.
08-19-2016, 06:56 PM
جلالدونا جلالدونا
تاريخ التسجيل: 04-26-2014
مجموع المشاركات: 9661
Quote: خليكم شاهدين الزول دا وصفني بجرادة في سروال!! أمشي يا خرج في ثياب الواعظينا المستنير
انت تتسول المواقف .. تمد اناءك الفارغ في قارعة الدروب من اجل درهم او اتنين من اغنياء زمن الغفلة... انت بذلك تفتقد لكبرياء المعرفة بالتأكيد (كبرياء المعرفة ليس كما الكبرياء المتطاول داك كما قد تفهم المعنى بصورة خاطئة)
ليس ذلك بهام على اية حال .. ما يهم هو عدم قدرتك على الاستقراء والتأويل .. وده خلل اساسي في اي مشروع انساني يدعي الاستنارة .. علاقتك تعبانه مع اللغة .. ولياقتك اقل من احتمال المعاني .. .. لا لم انعتك بالجرادة, مدحا كان ذلك ام ذما بحسب المعطيات .. لا .. لم انعتك بالجرادة على الاطلاق, فهمت ذلك ام لم تفهم.
كن بخير. م المشرف
اتصل بي صديق، قال لي: يا مستنير، المثل الأول بقول:"جراداية في سروال هو ما بعضي؛ إلا قعادو ما حلو" جرادية وليس جرادة. وبيت النشيد بقول: برز الثعلب يوما في ثياب الواعظينا، وليس خرج الثعلب قلت ليهو: شكرا
08-19-2016, 07:28 PM
معاوية الزبير معاوية الزبير
تاريخ التسجيل: 02-07-2003
مجموع المشاركات: 7893
ما بتنتهي يا بكه ما بتنتهي زي مَباراة المنبر ومخاواة القماري وشراب موية المطر قلت ليك بنزين الرحلة دي وصل الحتالة وبعد دا بـ يوسخ الماكينة والدَرب زاتو بقى وعر مليان مطبات والدنيا ضلمت وأصبحنا ندور في سراب ما ليهو حد.. ما ليهو قيف حالتي الراهنة في المنبر دي ذكرتني قصة تجربة توهان في خلا البطانة والدنيا ليل والمطر معاكس الاتجاه وأنا أداقش مسابق حلكة الظلمة وظهور الشِفته أجري يمين وأجري شمال اقيف أشيل نفَسي.. رميت شنطة الكتب والرسايل الماشه لي خواجات المنظمة.. وأجري أدخل في دغل شوك وأمرق منو مجرّح، أقعد في مجرى السيل عشان أرتاح و أسلل الشوك من أطرافي تفاجئني الدواب تتسلل بين رجلَي وأقوم تاني أجري يمين وشمال والنفَس مقطوع .. كايس شنو عارفين؟ كايس الشِفتة الحذروني منهم ناس اللوري النزلوني وأبوا يكملوا المشوار عسكروا في نص المسافة وأنا قررت المسير أيوه بقيت أفتش في الشِفته قلت يمكن ألقى بينم واحد ما شِفته، أو اموت وسط بشر البرق يبرق وقبُل ما يبين لي درب يختفي زي البرق حسيت إنو ما باقي شئ، اتشهدت وسلّمت نفسي للحاصل: الليل والمطر والدواب وسط الـ bushes في ثانية، وبين ميت وبين قاعد أموت، اتذكرت ليك حكاية حياتي من الطفولة لغاية ما نزلت الليلة دي قريب خشم القربة
فجأة أشوف أنوار من بعيد، أجري عليها، تجري مني، قلت دا أبو فانوس، أراوغ فيهو ويراوغني أتاريها لاندكروزر بتاعت منظمة إغاثة جنب معسكر منظمتنا في الشجراب قرّبت مني، بدت تدور حواليني كم مرة زي بص السيرة، السواق بعدين قال لي خفنا تكون شِفته.. أنا شِفته؟
بعد وصلوني الكمباوند بتاع الخواجات الماشي ليهو وأنا ألهث، جَن اتنين من الشغالات الأريتريات، و بي ضو الفانوس قعدن ينسلن الشوك من كرعي الممددات زي عريس بيتحنن. الخواجية -الله يطراها بالخير- عرضت عليّ كاس أنِشا: عشان تهدأ ماي فريند، زحيتو بي يدي وقلت ليها عندكم prayer mat ؟
من ديك وأنا قاعد أحذر من الشوك والتوهان
08-20-2016, 04:19 PM
عمر التاج عمر التاج
تاريخ التسجيل: 02-08-2008
مجموع المشاركات: 3749
Quote: قلت ليها.. ده انا يا ضحا.. الساعة العاطت ليك بطول حسها: الله اكبر..الله اكبر!!.. وانا اشيل واعيط:يا ضحا لأ..انتا في اميركا..الإ دي..!!.. وضحى تشيل وتعيط اندهاشا وازبهلالا: شكلك وسيم..ووب علي من الخدرة الدقاقة دي..الله اكبر..الله اكبر..الله اكبر!!
سلام على (كبر) لما يتعتق في الكتابة ويضيف إليها من بهاراته الخاصة.. تقرأ حروفه فتجدها زي عصير المنقه في الكباية .. تتذوق فيها نفس الطعم والدهشة والمفعول. في السياسة تقرأ له فيشحنك بزبدة الرغبة والرهبة ، اما في الأدب فـ(تسكت وتقرا). تحياتي بكري وضيوفه: وددت لو أضيف خاطرة هنا ، ولو ردا على زعمك السابق عني في بوست المشرف ولكني احتفظ بها حتى أجد الإذن من (كبر ) أو بعض ممن معك لعبارات من مثل ما في هذا البوست: الحرة
08-20-2016, 04:38 PM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3594
كبر وعووضة وبكور ومعاوية وباقي اللطفاء مرورا بهذه الحديقة
هل يجوز أن نسمى بواقي المواد الصناعية بالحتل مثل بدرة الحديد ونشارة الخشب والقطاع وغيره
على كل حال عندي ليكم قصة واقعية طريفة تصب في حتل الحديد إذا جاز الأصطلاح .
حق الحرام عمك في بدايات الأنقاذ شاف الحملة المسعورة بتاعة الصالح العام والناس تطير من وظائفها بدون مقدمات .. حب يعمل وقاية لنفسه ربى دقن وشال سبحة طيلة اليوم لكن برضو ما نفعته رأس السوط وصله .. شال المعاش وفكر يستثمره ويعمل مشروع يسترزق منه .. فتح ورشة حدادة لصناعة السراير والأبواب والشبابيك .. لكنه ظل ملتزما بالسبحة والدقن .. لا زال هناك أمل طالما في عطاءات ومقاولات حكومية .. بما أنه موظف فقط لا فكرة عنده في المهنة وظف عنده حداد ماهر مع صبيانه . بما أنه رأس المال خلص في تجهيز الورشة لم يبقى له (رأس مال عامل ) يشتري به الخامات ويصنع الأسرة والأبواب ويبعيها جاهزة أصبح يعتمد على الصفقات مثلا واحد يكون عاوز ابواب وشبابيك .. الحداد يأخذ المقاسات ويحدد المطلوب من حديد زوي وصاج ومواسير وغيرها .. بعد ما تخلص العملية ..أكيد ارح يتبقى قطاع حديد من بواقي الزوي والصاج والمواسير .. هو جالس في كرسي قدام الورشة لاحظ للحداد حريص على بواقي الحديد هذه يلمها ويجمعها في شوالات ..سأله .. - أنت دا شنو بالتجمع فيه دا .؟ - دا باقي قطاع الحديد . - تعمل بيه شنو ؟ - أبيعه تاني في ناس يشتروه . - شوف هنا دا حق ناس وحق حرام أوعك تدخل علي حق حرام ؟ - حاضر يا شيخنا . واستمرت الحكاية يصنعوا سراير لفلانة وترابيز لعلانة والحداد يلم في البواقي وأما هو يسترزق من صافي الربح . يوم جالس قدام الورشة . لاحظ وقفت شاحنة قدام الورشة .. الحداد والعمال يجمعوا في الشوالات ويرفعوا في الشاحنة .. بعد شوية جاء صاحب الشاحنة يتحاسب مع الحداد سلمه حزمة كبيرة من الأموال .. قبل ما يدخلها في جيبه عمك سأله . - أنت القروش دي بتاعة شنو ؟. - دي حقة قطاع الحديد - حق الحرام ؟ - أيوا . - بالنص يا معفن .. هههههههههههههههههههه
08-21-2016, 08:52 AM
عثمان عووضة عثمان عووضة
تاريخ التسجيل: 06-02-2004
مجموع المشاركات: 461
درديري. ياخي بواقي الحديد و ماشابه بقولوا عليها خردة وفي رواية صدرت حديثا (كرور) الحتل غالبا الحاجة البتحتل في سايل زي الموية، الزيت ،. العرقي😜😜 هذا و الله أعلم
05-27-2017, 11:28 AM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3594
سطل سطلة بتي كل-ب، البنقو جابو ليهو صحبو من نيالا، اصلو بنقو الغرب وويكتو ما في زيّهن قعد في الخور الجنب مدرسة ابوزيد الابتدائية في شارع المحطة مدني، شفط ليهو سجارة تانية، الوكت كان ضلام شديد، طلع الرادي وفتح امدرمان، الفنان بغني: النار ولعا وروني العدو واقعدو فراجة قام على حيلو وعرض وطلّع سكينو في اللحظة دي مرّ واحد سائق عجلة وخاتي قصب سكر مقطع في السرج سكاهو وقطع ليهو اضانو الشمال وشال ليهو قصبة لفى الاضان في منديل كلينكس ودخلها في جيب الجنيز مسك قضيب السكة حديد وفللي مرقا في عووضة
(عدل بواسطة أبوبكر عباس on 05-28-2017, 03:12 AM) (عدل بواسطة أبوبكر عباس on 05-28-2017, 03:15 AM) (عدل بواسطة أبوبكر عباس on 05-28-2017, 03:17 AM)
05-28-2017, 03:16 AM
معاوية الزبير معاوية الزبير
تاريخ التسجيل: 02-07-2003
مجموع المشاركات: 7893
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أبوبكر عباس
حيدر حسن ميرغني
معاوية الزبير
معاوية المدير
Kabar
Hani Arabi Mohamed
ناصر حسين محمد
علي عبدالوهاب عثمان
nour tawir
عثمان عووضة
محمد حيدر المشرف
جلالدونا
عمر التاج
فيس بوك
تويتر
انستقرام
يوتيوب
بنتيريست