كل الآلات الموسيقية المستخدمة حاليا فى التكوين الاوركسترالى الحالى فى مصاحبة أغنيات الوسط والبسموها اعتباطا - الأغنية السودانية - كلها تقريبا آلات مستجلبة من خارج السودان سواء الوترية أو آلات النفخ النحاسية والخشية وحتى آلات الإيقاع كمان
وطبعا كلها تسللت على مراحل وبقت هى المعتمدة ومستعملة رسميا فى تلحين ومصاحبة الاغانى حاليا
مع استثاء الأعمال السودانية الحقيقية الأصيلة والبسموها شعبية ، أغنيات المجموعات الإثنية المختلفة فى كل السودان
طيب
السؤال المقصود
طالما اعتمدنا وبقينا على مجموعة الآلات دى سواء الشرقية أو الغربية ورضيناها
ليه اسقطنا تماما ونسينا أجمل وطعم آلة لطالما جملت وطعمت وزينت اغنياتنا
آلة القانون
والكانت موجودة ومستخدمي لغاية نهاية خمسينيات أو بداية ستينيات القرن الفات
وعلى حسب ماهو معروف انه آلة القانون دخلت على يد الموسيقار المصرى مصطفى كامل والقدر يطول ويسودن القانون بطريقة بديعة فعلا ومبدع وخلافة فى عشرات الأغنيات
والا مصدق يسمع أعمال السبعة الكبار فى عقد الخمسينيات
السبعة الكبار مقصود بيهم حسن عطية وأحمد المصطفى والكاشف وعثمان حسين والشفيع والتاج مصطفى وابوداود
ومعاهم شوية تانى من المطربين
واكيد لو ساعدت الظروف والوقت بنجيب نماذج فعلية للأعمال دى عشان نسمع ونحكم
وكتصبيرة بس يا ريت لو تبسر اى زول يسمع فى محراب النيل مع ابوعفان أو الملهمة مع التاج مصطفى
ليه مافى موسيقيين سودانيين بعد مغادرة مصطفى كامل اتعلمو واتبنو وواصلو فى آلة القانون ؟
زى ما اتعلمو العود من زهرى باشا والكمان من ماستريللى الايطالى والات النفخ من موسيقى الجيش الانجليزة وغيرها من باقى الآلات
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة